ភ្នំពេញ៖ យោងតាមសេចក្តីប្រកាសទីស្តីការគណៈរដ្ឋមន្ត្រី បានបញ្ជាក់ឲ្យដឹងថា រាជរដ្ឋាភិបាលកម្ពុជាបានសម្រេចមិនយកពន្ធលើប្រាក់ចំណូលរបស់គ្រឹះស្ថានសិក្សារដ្ឋ និងឯកជនទូទាំងប្រទេសរយៈពេល ៦ឆ្នាំ ចាប់ពីឆ្នាំ២០២៣ ដល់ឆ្នាំ២០២៨។

ប្រភពបន្តថា រដ្ឋាភិបាលបានសម្រេចអនុគ្រោះដល់គ្រឹះស្ថានសិក្សារដ្ឋ និងឯកជនទូទាំងប្រទេស ឱ្យរួចផុតពីការបង់ពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល ពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវា ការប្រាក់ និងភាគលាភ ចាប់ពីឆ្នាំ២០២៤ រហូតដល់ដំណាច់ឆ្នាំ២០២៨។

ប្រភពដដែលបន្ថែមថា ប៉ុន្តែគ្រឹះស្ថានសិក្សាត្រូវបង់ពន្ធ លើប្រាក់បៀវត្ស ពន្ធកាត់ទុកលើការជួលទីតាំង ពន្ធអចលនទ្រព្យ និងពន្ធប៉ាតង់ ហើយត្រូវបំពេញកាតព្វកិច្ចចុះបញ្ជីពន្ធដារនៅរដ្ឋបាលសារពើពន្ធ កត់ត្រា និងកាន់កាប់បញ្ចិកា គណនេយ្យឱ្យបានត្រឹមត្រូវ ព្រមទាំងដាក់លិខិតប្រកាសពន្ធប្រចាំខែនិងពន្ធប្រចាំឆ្នាំតាមច្បាប់ជាធរមាន។

ក្នុងករណីខកខាន ឬយឺតយ៉ាវក្នុងការបំពេញកាតព្វកិច្ចសារពើពន្ធនានា គ្រឹះស្ថានសិក្សាត្រូវទទួលរងនូវទោសទណ្ឌនានា រួមមានប្រាក់ពិន័យនិងការប្រាក់ តាមបទប្បញ្ញត្តិស្តីពីពន្ធដារជាធរមាន៕

កាលពីពេលថ្មីៗនេះ រដ្ឋមន្ត្រីក្រសួងយុត្តិធម៌ លោក Somsak Thepsuthin បានចេញសេចក្តីថ្លៃងការជុំរុញឱ្យមានការផ្សព្វផ្សាយ​ការ​ជល់​មាន់ឱ្យខ្លាំងក្លា ដើម្បីទាក់ទាញ​ភ្ញៀវ​ទេសចរនៅក្នុងឆ្នាំ២០២៣នេះ។

ពួកឈ្មួញដែលមានកន្លែងជល់មាន់ស្របច្បាប់ បានបង្ហាញត្រេកអរយ៉ាងខ្លាំង ដោយម្នាក់ៗបានលើកឡើងថា៖” ការជល់មាន់មានឫសគល់យ៉ាងជ្រៅនៅក្នុងវប្បធម៌ថៃ ហើយដូចនេះការជុំរុញឱ្យមានការផ្សព្វផ្សាយពិតជា ធ្វើឱ្យពិភពលោកបានស្គាល់ការជល់មាន់បែបប្រពៃណី របស់ប្រទេសយើងកាន់តែច្រើន”។

តែយ៉ាងណាមិញ អ្នកខ្លះក៏បានបង្ហាញគំនិតអវិជ្ជមានមកវិញ ដោយលើកឡើងថា៖” ជល់មាន់ជាអំពើខុសច្បាប់ ហេតុដូចនេះ ប្រសិនបើរាជរដ្ឋាភិបាលចង់ជុំរុញឱ្យមានការផ្សព្វផ្សាយ​ការ​ជល់​មាន់នោះ ត្រូវតែមានច្បាប់តឹងរឹងបំផុត ព្រោះពួកដែលមានទីលានជល់មាន់មួយចំនួន មិនមានអញ្ញាបត្រនោះទេ”។

រដ្ឋាភិបាលថៃ យល់ឃើញថា ការជល់មាន់ គឺជាប្រពៃណីដ៏យូរលង់ណាស់មកហើយ ហើយការជុំរុញឱ្យមានការផ្សព្វផ្សាយ​ការ​ជល់​មាន់ នឹងធ្វើឱ្យការ​ចិញ្ចឹម និង​ការ​ជួញ​ដូរ​មាន់​ជល់​ក៏​នឹង​កើន​ឡើង ដែលនឹងនាំប្រាក់ចំណូលមួយកម្រិតទៀតឱ្យពលរដ្ឋរបស់ខ្លួន៕

ប្រភព៖ NATION THAILAND

ប្រទេសវៀតណាម ៖ កាសែតវៀតណាមបានរាយការណ៍ថា ក្រសួងហិរញ្ញវត្ថុរបស់វៀតណាមកំពុងគ្រោងដំឡើងពន្ធសម្រាប់ការផលិតបារី ស្រាបៀរ និងភេសជ្ជៈមានជាតិអាល់កុល ព្រមទាំងស្នើឱ្យប្រមូលពន្ធលើភេសជ្ជៈមានជាតិស្ករផងដែរ ដើម្បីដោះស្រាយបញ្ហាសុខភាពរបស់ពលរដ្ឋក្នុងប្រទេស ។

ប្រទេសវៀតណាមបានដំឡើងពន្ធលើស្រាបៀរលើកចុងក្រោយបង្អស់នៅឆ្នាំ២០១៨ ស្មើ៦៥% ខណៈការប្រមូលពន្ធបារីស្មើ៧៥% និងផលិតផលគ្រឿងស្រវឹងពី៣៥-៦៥% ។

ក្រសួងហិរញ្ញវត្ថុក៏បានស្នើឱ្យប្រមូលពន្ធលើក្រុមភេសជ្ជៈមានជាតិស្ករច្រើនផងដែរ បន្ទាប់ពីក្រសួងធ្លាប់បានស្នើឱ្យប្រមូលពន្ធលើភេសជ្ជៈប្រភេទនេះក្នុងអត្រា១០% ឬ២០% កាលពីឆ្នាំ២០១៧ កន្លងមក ប៉ុន្តែមិនទទួលបានជោគជ័យ ។

វិធានការប្រមូលពន្ធនេះមានការគាំទ្រពីអង្គការសុខភាពពិភពលោក និងវិទ្យាស្ថានជាតិអាហារូបត្ថម្ភ ដែលលើកឡើងថា ពលរដ្ឋវៀតណាមបានផឹកភេសជ្ជៈមានជាតិស្ករកើនឡើងដល់៧ដងក្នុងរយៈពេល១៥ឆ្នាំកន្លងមក និងស្មើបរិមាណ៥០,៧លីត្រ/ម្នាក់នៅឆ្នាំ២០១៨ ដែលធ្វើឱ្យពួកគេមានរោគធាត់កាន់តែច្រើនឡើង ។

ក្រសួងហិរញ្ញវត្ថុបញ្ជាក់ថា បច្ចុប្បន្ន ប្រទេសជាច្រើនក្នុងភូមិភាគអាស៊ីអាគ្នេយ៍បានប្រមូលពន្ធលើភេសជ្ជៈមានជាតិស្ករ ក្នុងនោះប្រមូលពន្ធចាប់ពី២០-២៥% នៅថៃ, ៥-១០% នៅឡាវ និង១០% នៅកម្ពុជា ។ ការប្រមូលពន្ធខ្ពស់នឹងជួយឱ្យពលរដ្ឋកាត់បន្ថយផឹកភេសជ្ជៈទាំងនេះសម្រាប់ហេតុផលសុខភាព និងអាចបង្កើនប្រាក់ចំណូលចូលរដ្ឋ ៕

ប្រភព ៖ Mono News

ទីក្រុងតៃប៉ិ៖ ក្រោយពេលមន្រ្ដីជាន់ខ្ពស់ មន្ទីរបញ្ចកោណរបស់ក្រសួងការពារជាតិ សហរដ្ឋអាមេរិក បានព្យាករ អំពីសមត្ថភាពរបស់កងទ័ពរំដោះប្រជាជនចិន អាចនឹងវាយលុក ដណ្ដើមកាន់កាប់កោះតៃវ៉ាន់ នៅក្នុងឆ្នាំ២០២៧ ស្របពេលក្រុងប៉េកាំង កំពុងតែបង្កើនសកម្មភាពយោធាឥតឈប់ឈរផងនោះ ក្រុងតៃប៉ិ ក៏កាន់តែបង្កើននូវការទិញគ្រឿងយុទ្ធោបករណ៍ទំនើបៗ ពីមហាអំណាចលោកលិច សម្រាប់ត្រៀមទប់ទល់នឹងការឈ្លានពានរបស់ក្រុងប៉េកាំង។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី២ ខែមីនា ឆ្នាំ២០២៣ ថា សហរដ្ឋអាមេរិក បានយល់ព្រមលក់គ្រឿងយុទ្ធោបករណ៍ថ្មីបន្ថែមទៀត មានទំហំទឹកប្រាក់ ៦១៩លានដុល្លារ ទៅឱ្យតៃវ៉ាន់ រួមទាំងមីស៊ីល សម្រាប់កងយន្ដហោះចម្បាំងដ៏ទំនើប F-16 របស់ដែនកោះមួយនេះ។ ការសម្រេចចិត្តលក់គ្រឿងសឹករបស់ក្រុងវ៉ាស៊ីនតោន មកឲ្យក្រុងតៃប៉ិ បានកើតឡើង ស្របពេលមានសេចក្ដីរាយការណ៍ អំពីកងទ័ពអាកាសរំដោះប្រជាជនចិន បានបង្កើននូវការលុកលុយទ្រង់ទ្រាយធំ ឈានដល់ថ្ងៃទី២ នៅជិតកោះតៃវ៉ាន់។

ការលក់គ្រឿងចម្បាំងទំនើបៗរបស់សហរដ្ឋអាមេរិក មកឲ្យកោះតៃវ៉ាន់ ទំនងជានឹងធ្វើឱ្យទំនាក់ទំនងដ៏តានតឹងដែលមានស្រាប់ រវាងក្រុងវ៉ាស៊ីនតោន និង ក្រុងប៉េកាំង កាន់តែតានតឹងបន្ថែមទៀត។ ចិនតែងតែទាមទារម្តងហើយម្តងទៀតឲ្យបញ្ឈប់នូវកិច្ចព្រមព្រៀងបែបនេះ ខណៈសហរដ្ឋអាមេរិក នៅតែអះអាង ការពារកោះតៃវ៉ាន់ ប្រសិនបើមានឈ្លានពានពីចិន។

មន្ទីរបញ្ចកោណ បានបញ្ជាក់ កាលពីថ្ងៃពុធ ថា ក្រសួងការបរទេសសហរដ្ឋអាមេរិក បានអនុម័តនូវការលក់គ្រឿងសព្វាវុធដ៏មានសក្ដានុពល និង សម្ភារសឹក ទៅឲ្យកោះតៃវ៉ាន់។ គ្រឿងចម្បាំងទាំងនោះ រួមមាន មីស៊ីលដ៏ទំនើបបាញ់ពីលើអាកាសទៅលើអាកាសរយៈចម្ងាយមធ្យមប្រឆាំងនឹងយន្ដហោះ (AMRAAM) ចំនួន ២០០ដើម និង មីស៊ីល AGM-88B HARM ចំនួន១០០គ្រឿង ដែលអាចបាញ់ចេញពីស្ថានីយរាដានៅលើដី។ ការលក់គ្រឿងសព្វាវុធតាមសំណើរបស់តៃវ៉ាន់ នេះ នឹងរួមចំណែកដល់ការបង្កើនសមត្ថភាពរបស់កងទ័ពដែនកោះមួយនេះ នៅក្នុងការការពារដែនអាកាសរបស់ខ្លួន សន្តិសុខក្នុងតំបន់ និង អន្តរប្រតិបត្តិការជាមួយសហរដ្ឋអាមេរិក»។

ទន្ទឹមគ្នានេះដែរ ក្រសួងការពារជាតិតៃវ៉ាន់ បានបញ្ជាក់ ថា «មីស៊ីលទាំងនេះ នឹងជួយការពារដែនអាកាស ប្រកបដោយប្រសិទ្ធភាព សម្រាប់ដោះស្រាយនូវការគំរាមកំហែង និង ការបង្កហេតុ ពីកងទ័ពរំដោះប្រជាជនចិន ហើយនឹងពង្រឹងនូវឃ្លាំងអាវុធការពារបន្ថែមទៀត។

ក្រុងប៉េកាំង តែងតែអះអាង ថា តៃវ៉ាន់ ជាដែនដីរបស់ចិន ហើយក្រុងប៉េកាំង នឹងប្រើប្រាស់កម្លាំងយោធា រឹបអូសយកដែនកោះមួយនេះ ប្រសិនបើមានការចាំបាច់ណាមួយកើតឡើង។ ជាមួយនឹងការអះអាងបែបនេះ ចិន តែងតែបញ្ជូនយន្ដហោះយោធា យន្ដហោះទម្លាក់គ្រាប់បែក នាវាផ្ទុកយន្ដហោះ និង នាវាចម្បាំង ទៅជិតដែនកោះគ្រប់គ្រងដោយខ្លួនឯងតាមបែបប្រជាធិបតេយ្យ ដើម្បីបង្កើនការបំភិតបំភ័យ ជំរុញឲ្យក្រុងតៃប៉ិ ព្រមទទួលយកនូវដែនអធិបតេយ្យភាពរបស់ខ្លួន។

ដោយឡែក លោកស្រី សៃ អ៊ីងវ៉ិន (Tsai Ing-wen) ប្រធានាធិបតីតៃវ៉ាន់ តែងតែបដិសេធយ៉ាងដាច់អហង្ការ ចំពោះការអះអាងរបស់ចិន។ លោកស្រី បានសង្កត់ធ្ងន់ ថា បើទោះជាអស់នៅក្នុងតម្លៃណាក៏ដោយ តៃវ៉ាន់ នៅតែការពារដែនដីរបស់ខ្លួនឲ្យខាងតែបាន ហើយមានតែប្រជាជនរបស់ដែនកោះមួយនេះទេ ទើបមានសិទ្ធិអាចសម្រេចបាននូវជោគវាសនារបស់ពួកគេ។

លោក អេនដ័រ ហ្វគ រ៉ាស្មូសសេន (Anders Fogh Rasmussen) អតីតអគ្គលេខាធិការ អង្គការណាតូ និង ជាអតីតនាយករដ្ឋមន្រ្ដីដាណឺម៉ាក បានបញ្ជាក់ ថា «ប្រទេស ជាអ្នកផ្គត់ផ្គង់គ្រឿងសព្វាវុធ និង ជំនួយយោធាដ៏សំខាន់បំផុត ជួយដល់តៃវ៉ាន់ មានតែសហរដ្ឋអាមេរិក។ ប៉ុន្ដែអឺរ៉ុប អាចជួយដល់ក្រុងតៃប៉ិ តាមវិធីសាស្រ្ដផ្សេងៗគ្នា»។

អតីតប្រមុខអង្គការណាតូ រូបនេះ បានសង្កត់ធ្ងន់ ថា «យើងគួរតែផ្តល់ជំនួយយោធា ជួយដល់តៃវ៉ាន់ ដើម្បីធ្វើឱ្យក្រុងតៃប៉ិ មានសមត្ថភាពការពារខ្លួន។ យើងគួរតែបញ្ជាក់ឱ្យបានច្បាស់ ដល់ប្រទេសចិន ថា ការឈ្លានពាន ទៅលើតៃវ៉ាន់ នឹងបង្កឱ្យមានទណ្ឌកម្មសេដ្ឋកិច្ចយ៉ាងធ្ងន់ធ្ងរបំផុត និង ទូលំទូលាយ ដោយនឹងត្រូវកាត់ផ្តាច់ប្រទេសចិន ចេញពីប្រព័ន្ធសេដ្ឋកិច្ចពិភពលោក។ ចំណែកការចំណាយលើការឈ្លានពាន ប្រឆាំងនឹងតៃវ៉ាន់ នឹងត្រូវខាតបង់ខ្ពស់ខ្លាំងណាស់។ ដូច្នេះមេដឹកនាំក្រុងប៉េកាំង ត្រូវតែគិតគូរ យ៉ាងហោចណាស់ឲ្យបានពីរដងផងដែរ ព្រោះបញ្ហាតានតឹង រវាងចិន និង តៃវ៉ាន់ នឹងបង្កឲ្យមានផលប៉ះពាល់ជាសកល ហើយគួរតែមានចំណាប់អារម្មណ៍ជាសកល នៅក្នុងការទប់ស្កាត់នូវភាពតានតឹងទាំងនេះ មិនឱ្យកើតឡើង ក្លាយទៅជាជម្លោះប្រដាប់អាវុធ»៕

ប្រទេសថៃ ៖ ការធ្វើកសិកម្ម ការត្រៀមដីជារឿងសំខាន់ ព្រោះបើដីល្អ ដាំដុះអ្វីក៏ល្អដែរ និងងាយស្រួលថែទាំ ។ ប៉ុន្តែបើយើងដាំដុះលើដីនោះយូរទៅ វានឹងខ្សោះជីជាតិ ហើយបើមិនថែទាំដីទេ ការដាំដំណាំផ្សេងៗនឹងពិបាក មិនសូវល្អ ហើយមានមេរោគផងដែរ ។

តើយើងធ្លាប់សង្កេតទេថា កសិករជាច្រើននាក់បានយកកំបោរសមកបាចលើដំណាំ និងយកវាទៅផ្សំជាមួយដី ។ វាជាការបង្កើនគុណភាពដីដែលមានជាតិអាស៊ីតខ្ពស់ ប៉ុន្តែមិនមែនដីទាំងអស់ចាំបាច់ត្រូវតែប្រើកំបោរសទេ ។ បើយើងមិនចង់ខ្ជះខ្ជាយប្រាក់ច្រើន សូមពិនិត្យមើលដីជាមុនសិន កំបោរសអាចបន្សាបដីបានដើម្បីដាំដំណាំផ្សេងៗ ហើយពេលដាំ ក៏ត្រូវប្រយ័ត្នផងដែរ កុំឱ្យមានទឹកដក់ ពីព្រោះវាធ្វើឱ្យដំណាំស្អុយរលួយ ។

ចំណែកអ្នកដាំបន្លែ ត្រូវមានប្រភពទឹកគ្រប់គ្រាន់សម្រាប់បន្លែ ដោយសារវាចូលចិត្តសំណើមខ្ពស់ ប៉ុន្តែវាមិនចូលចិត្តទឹកដក់ទេ ។ មុនពេលដាំដុះ យើងត្រូវជីកដីហើយហាលថ្ងៃចោលប្រមាណ៧ថ្ងៃសិនដើម្បីកម្ចាត់ស្មៅ និងមេរោគផ្សេងៗ ហើយយកកំបោរសមកផ្សំគ្នាជាមួយដី ក្នុងករណីដីមានជាតិអាស៊ីតខ្លាំង ជាពិសេស ផ្ទៃដីស្រែមានទឹកដក់ មានកម្ទេចកម្ទីស្មៅឬសត្វ វានឹងធ្វើឱ្យដីនោះកាន់តែមានជាតិអាស៊ីតលើសដើម ដូច្នេះ កំបោរសអាចជួយបាន ។

ជាធម្មតា ដីមានជាតិអាស៊ីតតិចៗ ប៉ុន្តែយើងសម្លឹងដោយភ្នែកទទេមិនដឹងទេថា ដីបែបណាមានជាតិអាស៊ីតតិចឬច្រើន ប៉ុន្តែយើងអាចសង្កេតបានពីសភាពផ្ទៃដីថា មាន កម្ទេចរុក្ខជាតិឬសត្វច្រើនប៉ុនណា បើផ្ទៃដីដាំដំណាំនោះស្មើសាច់ហើយ យើងមិនចាំបាច់បាចកំបោរសទេ ។

ការដាំដំណាំជាទូទៅ បើយើងបានទទួលផលល្អហើយ គ្មានអ្វីត្រូវបារម្ភទេ ហើយមិនចាំបាច់ប្រើកំបោរសក៏បានដែរ ។ រឿងសំខាន់មួយដែលគួរធ្វើ គឺក្រៅពីមានដីល្អហើយ ត្រូវរករូបមន្តផ្សំជីសម្រាប់ដាក់ដំណាំឱ្យឆាប់លូតលាស់ ប៉ុន្តែបើដីនោះខ្សត់ជីជាតិខ្លាំងពេក យើងដាំអ្វីក៏មិនបានផលដែរ ដូច្នេះ មិនគួរមើលរំលងកំបោរសទេ ៕ ប្រភព ៖ ta.propernews

ប្រទេសក្រិក ៖ ចំនួនអ្នកស្លាប់ដោយសារហេតុការណ៍រថភ្លើងបុកគ្នានៅប្រទេសក្រិក កាលពីថ្ងៃទី២៨ ខែកុម្ភៈ កន្លងមក បានកើនឡើងដល់៤៣នាក់ហើយ រីឯអ្នករងរបួសមានចំនួន៨៥នាក់ ។ លោក Kyriakos Mitsotakis នាយករដ្ឋមន្ត្រីក្រិកថ្លែងថា មូលហេតុនៃគ្រោះថ្នាក់នេះអាចមកពីកំហុងឆ្គងរបស់មនុស្ស ប៉ុន្តែនៅមិនទាន់មានការបញ្ជាក់ពីមូលហេតុច្បាស់លាស់ទេ ដោយត្រូវរង់ចាំការស៊ើបអង្កេតបន្ថែមទៀត ។

កាលពីថ្ងៃទី២៨ ខែកុម្ភៈ មានហេតុការណ៍រថភ្លើងដឹកអ្នកដំណើរពីក្រុង Athens សំដៅទៅក្រុង Thessaloniki ស្ថិតនៅភាគខាងជើងប្រទេស បានបុកគ្នាជាមួយរថភ្លើងមួយខ្សែទៀតដែលដឹកទំនិញក្នុងផ្លូវដែកតែមួយនៅបរិវេណជាយក្រុង Larissa ភាគកណ្តាលប្រទេសក្រិក ខណៈរថភ្លើងទាំងពីរបើកបរក្នុងល្បឿនលឿន បណ្តាលឱ្យកើតភ្លើងឆេះទូររថភ្លើងជាច្រើន និងមានអ្នករងរបួសដោយសាររលាកភ្លើងផងដែរ ។ សារព័ត៌មានក្នុងស្រុករាយការណ៍ថា មានមនុស្សប្រមាណ៣៥០នាក់បានធ្វើដំណើរតាមរថភ្លើងនេះ ហើយភាគច្រើនជាសិស្ស ។

បន្ទាប់ពីមានគ្រោះថ្នាក់រថភ្លើងបុកគ្នានេះ រដ្ឋមន្ត្រីក្រសួងគមនាគមន៍ក្រិក លោក Kostas Karamanlis បានប្រកាសលាលែងពីតំណែងដើម្បីទទួលខុសត្រូវចំពោះហេតុការណ៍នេះ លោកបញ្ជាក់ថា ៖ «នៅពេលមានហេតុការណ៍សោកនាដកម្មកើតឡើងគួរឱ្យតក់ស្លុត យើងមិនអាចធ្វើការបន្តទៀត ហើយធ្វើពុធថា មិនដឹងរឿងនេះទេ» ។

ជាមួយគ្នានេះ អាជ្ញាធរបានចាប់ខ្លួនម្ចាស់ស្ថានីយរថភ្លើងដែលមានអាយុ៥៩ឆ្នាំ ខណៈម្ចាស់ស្ថានីយរូបនេះមានតួនាទីទទួលខុសត្រូវពិនិត្យមើលសញ្ញារថភ្លើង ករណីមិនប្រយ័ត្នក្នុងការងារបណ្តាលឱ្យកើតរថភ្លើងបុកគ្នាមានអ្នកស្លាប់ និងរបួសជាច្រើននាក់ ។ ទោះយ៉ាងណា បុរសរូបនេះបដិសេធថា ខ្លួនមិនបានធ្វើខុសទេ ហើយនិយាយថា គ្រោះថ្នាក់នេះកើតឡើងព្រោះកំហុសបច្ចេកទេស ។

មេដឹកនាំក្រិកបានថ្លែងក្រោយពីចុះទៅពិនិត្យមើលការខូចខាតក្នុងចំណុចកើតហេតុថា វាជាកំហុសឆ្គងរបស់មនុស្ស ហើយភាពយុត្តិធម៌នឹងធ្វើតួនាទីរបស់វា ។ អ្នកប្រព្រឹត្តខុសត្រូវតែទទួលខុសត្រូវ ហើយរដ្ឋាភិបាលនឹងនៅខាងពលរដ្ឋ ។

ចំណែកសហជីពការងារនិយាយថា មូលហេតុនៃការបុកគ្នាបណ្តាលមកពីកត្តាជាច្រើន ហើយសំខាន់ គឺគ្រោះថ្នាក់នេះបានបង្ហាញឱ្យឃើញពីភាពសាំញ៉ាំក្នុងវិស័យដឹកជញ្ជូនតាមផ្លូវដែក មិនថាការខ្វះខាតបុគ្គលិក សញ្ញារថភ្លើងមិនទៀងទាត់ និងឧបករណ៍ហួសសម័យ ។ មន្ត្រីក្រិកបានប្រកាសកាន់ទុក្ខទូទាំងប្រទេសរយៈពេល៣ថ្ងៃ សម្រាប់អ្នកស្លាប់ គឺចាប់ពីថ្ងៃទី១ ខែមីនា តទៅ ៕

ប្រភព ៖ thestandard

ប្រទេសឥណ្ឌា ៖ នាយកដ្ឋានឧតុនិយមឥណ្ឌាព្យាករណ៍ថា រដូវក្តៅនេះនឹងមានរយៈពេលរហូតដល់ខែឧសភា ហើយអាចជារដូវក្តៅខ្លាំងបំផុតសម្រាប់ឥណ្ឌា តាំងពីខែកុម្ភៈ ឆ្នាំ២០២៣ កន្លងមក ។ ឥណ្ឌាបានកត់ត្រាថា កុម្ភៈ គឺជាខែមានសីតុណ្ហភាពខ្ពស់បំផុតចាប់តាំងពីឆ្នាំ១៩០១ ខណៈសីតុណ្ហភាពជាមធ្យមខ្ពស់បំផុតស្មើ២៩,៥អង្សារសេ ។

នាយកដ្ឋានឧតុនិយមបានព្យាករណ៍ថា ចាប់ពីខែមីនា ដល់ខែឧសភា ឆ្នាំ២០២៣នេះ វាអាចទៅរួចដែលឥណ្ឌានឹងមានអាកាសធាតុក្តៅខ្លាំង ជាពិសេស នៅភាគឦសាន ភាគខាងកើត និងភាគកណ្តាល ។ ដូច្នេះ ឥណ្ឌាត្រូវបង្កើនកម្លាំងផលិតអគ្គិសនីឱ្យបានគ្រប់គ្រាន់ ដោយសារពលរដ្ឋមានតម្រូវការប្រើប្រាស់អគ្គិសនីខ្ពស់ ។

វាជាបម្រែបម្រួលអាកាសធាតុ ខណៈឥណ្ឌាកំពុងជួបប្រទះនឹងសីតុណ្ហភាពក្តៅខ្លាំងស្រាប់ទៅហើយ ជាពិសេស ចាប់ពីខែឧសភា ដល់ខែមិថុនា ប៉ុន្តែកាលពីឆ្នាំ២០២២ រដូវក្តៅក្នុងប្រទេសនេះចាប់ផ្តើមលឿនជាងមុន ខណៈខែមីនា ឆ្នាំ២០២២ ក៏មានការកត់ត្រាទុកដូចគ្នាដែរថា ជាខែក្តៅបំផុតចាប់តាំងពីឆ្នាំ១៩០១ ។

អ្នកជំនាញនិយាយថា បច្ចុប្បន្ន ឥណ្ឌាកំពុងប្រឈមមុខនឹងរលកកំដៅកាន់តែខ្លាំងក្លា ញឹកញាប់ និងយូរជាងមុន ។ សីតុណ្ហភាពកើនឡើងខ្ពស់ខុសធម្មតានេះ ធ្វើឱ្យតម្រូវការប្រើប្រាស់អគ្គិសនីរបស់ពលរដ្ឋកើនឡើង រហូតធ្វើឱ្យដាច់ចរន្តអគ្គិសនីនៅតាមរដ្ឋជាច្រើនកាលពីឆ្នាំ២០២២ ។

Bloomberg រាយការណ៍ថា នៅឆ្នាំ២០២៣ តម្រូវការប្រើប្រាស់អគ្គិសនីរបស់ពលរដ្ឋបានកើនឡើងខ្ពស់ ហើយធ្វើឱ្យអ្នកជំនាញជាច្រើននាក់បង្ហាញការបារម្ភអំពីផលប៉ះពាល់ខ្លាំងដល់ពលរដ្ឋក្រីក្រ ដោយសារពួកគេត្រូវធ្វើការក្រោមកំដៅថ្ងៃ ។

នៅឆ្នាំ២០២២ កន្លងមក Jandani Singh អ្នកវិទ្យាសាស្ត្រផ្នែកបរិស្ថានធ្លាប់បានដាស់តឿនដោយផ្តល់បទសម្ភាសន៍ជាមួយ BBC ថា រលកកំដៅធ្វើឱ្យប៉ះពាល់ដល់សុខភាពយ៉ាងខ្លាំងក្លាពេលសីតុណ្ហភាពកើនឡើងជាបន្តបន្ទាប់ បើទោះជានៅពេលយប់ក្តី ដោយសាររាងកាយមិនបានសម្រាកគ្រប់គ្រាន់ធ្វើឱ្យពួកគេងាយឈឺ និងត្រូវចំណាយប្រាក់ក្នុងការព្យាបាល ។

តាមទិន្នន័យស្រាវជ្រាវរបស់ Lancet ដែលបានចេញផ្សាយកាលពីឆ្នាំ២០២២ បញ្ជាក់ថា ឥណ្ឌាមានអ្នកស្លាប់ដោយសារអាកាសធាតុក្តៅខ្លាំងកើនឡើងដល់៥៥% នៅចន្លោះពីឆ្នាំ២០០០-២០០៤ និងពីឆ្នាំ២០១៧-២០២១ ៕ ប្រភព ៖ thestandard