ប្រទេសបារាំង ៖ Loire ជាទន្លេវែងបំផុតនៅប្រទេសបារាំងបានរីងទឹកយ៉ាងលឿន រហូតដល់អាចមើលឃើញខ្សាច់នៅបាតទន្លេ ខណៈប្រទេសនេះជួបគ្រោះរាំងស្ងួតធ្ងន់ធ្ងរបំផុតនៅរដូវរងាក្នុងរយៈពេល៦០ឆ្នាំកន្លងមក ។ បារាំងបានប្រកាសទៅកាន់ខេត្តចំនួន៥ ថា អាចត្រូវប្រើប្រាស់ទឹកមានកំណត់ និងជួបគ្រោះរាំងស្ងួតខ្លាំងជាងនេះក្នុងរដូវក្តៅ ។

ជាធម្មតា ទន្លេ Loire នឹងមានកម្រិតទឹកពេញទន្លេរហូតដល់ចុងខែកុម្ភៈជារៀងរាល់ឆ្នាំ ដោយសារមានប្រភពទឹកពីព្រិលក្នុងរដូវរងារលាយ ប៉ុន្តែបើមើលតាមរូបភាពពីដ្រូនគ្មានមនុស្សបើក កាលពីថ្ងៃទី១ ខែមីនា ឃើញថា ទឹកក្នុងទន្លេនេះបានរីងខ្លាំង រហូតគេអាចមើលឃើញខ្សាច់នៅបាតទន្លេផុសចេញពីទឹកយ៉ាងច្បាស់ ហើយក៏ឃើញខ្សាច់ផុសឡើងនៅកណ្តាលទន្លេផងដែរ ។

ខ្សាច់នៅទន្លេនេះតែងលិចនៅក្រោមទឹកនាដើមនិទាឃរដូវ ប៉ុន្តែនៅឆ្នាំ២០២៣ គេបែរជាសង្កេតឃើញខ្សាច់ផុសចេញពីបាតទន្លេលឿនជាងពេលធម្មតា ដោយសារបារាំងជួបគ្រោះរាំងស្ងួតធ្ងន់ធ្ងរក្នុងរដូវរងា ។ រូបភាពនេះធ្វើឱ្យពលរដ្ឋក្នុងតំបន់បារម្ភខ្លាចកើតការខ្វះខាតទឹក ដោយពួកគេប្រាប់ថា ទទួលយកមិនបានទេ ព្រោះមិនធ្លាប់ឃើញរូបភាពទន្លេនេះស្ងួតហួតហែងពីមុន ។

មុននេះ ក្រសួងបរិស្ថានបានប្រកាសដាស់តឿនទៅកាន់ខេត្តចំនួន៥ ពីការប្រើប្រាស់ទឹកមានកំណត់ ហើយកាលពីថ្ងៃទី២៥ ខែកុម្ភៈ ប្រធានាធិបតីបារាំង លោក Emmanuel Macron បានអំពាវនាវឱ្យមន្ត្រីពាក់ព័ន្ធរៀបចំផែនការប្រើប្រាស់ទឹកដោយឈ្លាសវៃ ដូចជា ការយកទឹកភ្លៀងមកប្រើប្រាស់ ការជួសជុលប្រព័ន្ធទឹកធ្លាយ និងកែលម្អការចែកចាយទឹកស្អាតដល់ពលរដ្ឋ ។

ផ្នែកឧតុនិយមបញ្ជាក់ថា បារាំងកំពុងប្រឈមនឹងគ្រោះរាំងស្ងួតខ្លាំងបំផុតនៅរដូវរងាក្នុងប្រវត្តិសាស្ត្រ ហើយព្រិលធ្លាក់ចាប់ពីថ្ងៃទី២១ ខែមករា រហូតដល់ថ្ងៃទី២២ ខែកុម្ភៈ ឆ្នាំ២០២៣ មានបរិមាណតិចជាង១មីលីម៉ែត្រ/១ថ្ងៃ គឺតិចបំផុតក្នុងរយៈពេល៦៤ឆ្នាំ ចាប់តាំងពីឆ្នាំ១៩៨៩ ។ លើសពីនេះ កាលពីខែកុម្ភៈកន្លងមក បរិមាណទឹកភ្លៀងបានថយចុះប្រមាណ៧៥% ។

វិទ្យាស្ថានស្រាវជ្រាវកសិកម្ម INRAE លើកឡើងថា ស្ថានភាពទឹកទន្លេប្រែប្រួលបែបនេះ វាស្ទើរតែមិនធ្លាប់កើតឡើងពីមុនទេ ដោយកម្រិតទឹកក្នុងទន្លេ Loire ពេលនេះស្ថិតក្នុងកម្រិតទាបខ្លាំងជាងកម្រិតទឹកទាបបំផុតដែលគេប៉ាន់ស្មានថា វានឹងកើតឡើងរៀងរាល់១០ឆ្នាំទៅទៀត ។

បើទោះជាបារាំងជួបគ្រោះរាំងស្ងួតក្នុងរដូវរងា ប៉ុន្តែគេរំពឹងថា នឹងមានភ្លៀងធ្លាក់ទូទាំងប្រទេសនៅពេលឆាប់ៗនេះ ហើយវាអាចជួយបំពេញទឹកនៅតាមកន្លែងរីងស្ងួតបាន ប៉ុន្តែវិទ្យាស្ថានស្រាវជ្រាវកសិកម្មដាស់តឿនថា គ្រោះរាំងស្ងួតនៅរដូវរងានឹងក្លាយជាបញ្ហារយៈពេលវែង ហើយពលរដ្ឋអាចប្រឈមនឹងការប្រើប្រាស់ទឹកមានកំណត់ និងជួបគ្រោះរាំងស្ងួតកាន់តែធ្ងន់ធ្ងរនៅរដូវក្តៅ ៕

ប្រភព ៖ TNN World

ប្រទេសរុស្ស៊ី ៖ មហាសេដ្ឋីល្បីឈ្មោះរុស្ស៊ីបានដាស់តឿនរដ្ឋាភិបាលរបស់លោកប្រធានាធិបតី វ៉្លាឌីមៀ ពូទីន ថា ប្រាក់នឹងអស់ពីក្នុងប្រទេសនៅឆ្នាំ២០២៤ ក្រោយពីសង្គ្រាមអូសបន្លាយយូរធ្វើឱ្យរុស្ស៊ីខ្វះខាតប្រាក់ជាខ្លាំងក្នុងប្រវត្តិសាស្ត្រ ។ មហាសេដ្ឋីរូបនេះបញ្ជាក់ថា រុស្ស៊ីគួរតែអភិវឌ្ឍន៍ប្រព័ន្ធសេដ្ឋកិច្ចបែបទីផ្សារ មិនមែនមូលធននិយមរបស់រដ្ឋទេ ។

កាលពីថ្ងៃទី២ ខែមីនា មហាសេដ្ឋីរុស្ស៊ី លោក Oleg Deripaska បានលើកឡើងក្នុងវេទិកាសេដ្ឋកិច្ចថា នៅឆ្នាំ២០២៤ ប្រាក់របស់រុស្ស៊ីនឹងអស់ពីប្រទេស ហើយរុស្ស៊ីត្រូវការវិនិយោគិនអន្តរជាតិ ជាពិសេស វិនិយោគិនពីប្រទេសជាមិត្តដើម្បីលុបចោលវិធានការដាក់ទណ្ឌកម្មសេដ្ឋកិច្ច ។ លោក Oleg Deripaska ជាអ្នកបង្កើត United Co RUSAL International PJSC ជាក្រុមហ៊ុនផលិតអាលុយមីញ៉ូមធំបំផុតក្នុងប្រទេសចិនបន្តថា បច្ចុប្បន្ន មូលនិធិជិតអស់ហើយ នេះជាមូលហេតុធ្វើឱ្យរុស្ស៊ីចាប់ផ្តើមរង្គោះរង្គើ ។

មតិយោបល់របស់លោក Oleg Deripaska ជាបុគ្គលម្នាក់ក្នុងចំណោមប្រធានគ្រប់គ្រងអាជីវកម្មដែលមានល្បីបោះសំឡេងនៅរុស្ស៊ី ក្រោយពីចុងឆ្នាំ២០២២ រុស្ស៊ីខ្វះខាតប្រាក់ជាច្រើនដោយសារប្រាក់ចំណូលរបស់រដ្ឋាភិបាលធ្លាក់ចុះ វិធានការកំណត់ការនាំចេញប្រេង និងការចំណាយរបស់រដ្ឋាភិបាលកើនឡើងដោយសារការឈ្លានពានអ៊ុយក្រែន ។ បច្ចុប្បន្ន មន្ត្រីរុស្ស៊ីកំពុងដាក់ផែនការបង្កើនប្រាក់ចំណូល ដោយការផ្លាស់ប្តូរវិធីប្រមូលពន្ធពីក្រុមហ៊ុនប្រេងឥន្ធនៈ ដោយអាចប្រមូលពន្ធតែម្តង (One-time levy) ជាមួយក្រុមហ៊ុនផលិតទំនិញផ្សេងៗដូចជា ក្រុមហ៊ុនផលិតជី និងធ្យូងថ្ម ។

លោក Oleg Deripaska ថា អាមេរិកបានដាក់ទណ្ឌកម្មរុស្ស៊ីកាលពីឆ្នាំ២០១៨ ហើយត្រូវបានអឺរ៉ុបដាក់ទណ្ឌកម្មបន្ថែមទៀត ក្រោយពីរុស្ស៊ីវាយលុកអ៊ុយក្រែននៅឆ្នាំ២០២២ ។ មហាសេដ្ឋីរូបនេះបន្តថា ការបង្កើតមូលធននិយមដោយរដ្ឋាភិបាល (State Capitalism) មិនមែនជាជម្រើសទេ ហើយរុស្ស៊ីគួរអភិវឌ្ឍន៍ប្រព័ន្ធសេដ្ឋកិច្ចបែបទីផ្សារ (Market Economy) ហើយលោកក៏បានដាស់តឿនពីការដាក់ទណ្ឌកម្មធ្ងន់ធ្ងរមកលើរុស្ស៊ីផងដែរ ។

លោក Oleg Deripaska ថ្លែងថា ៖ «រដ្ឋាភិបាលចាំបាច់ត្រូវធ្វើឱ្យប្រាកដចិត្តថា រុស្ស៊ីជាប្រទេសមួយគួរឱ្យទាក់ទាញ ដោយបង្កើតបរិយាកាសអាជីវកម្មមានសុវត្ថិភាព សេរីភាពផ្នែកសេដ្ឋកិច្ច និងការប្រកួតប្រជែង បើទោះជាប្រទេសមានសេដ្ឋកិច្ចរីកចម្រើននានាក្នុងពិភពលោកនឹងប្រឆាំងរុស្ស៊ី ប៉ុន្តែរុស្ស៊ីត្រូវបើកទីផ្សាររបស់ខ្លួន ដែលមានពលរដ្ឋចំនួន៤,៥ពាន់លាននាក់» ៕

ប្រភព ៖ thestandardwealth

រដ្ឋធានីវ៉ាស៊ីនតោន៖ ជាមួយនឹងការព្រួយបារម្ភរបស់មហាអំណាចបស្ចិមលោក ជុំវិញសកម្មភាពរបស់ក្រុងប៉េកាំង កំពុងតែពិចារណា បញ្ជូនគ្រឿងសព្វាវុធរបស់ខ្លួន នាំទៅផ្គត់ផ្គង់ដល់កម្លាំងទាហានរុស្ស៊ី ដែលកំពុងតែធ្វើសង្គ្រាម នៅលើទឹកដីរបស់អ៊ុយក្រែន នោះ សហរដ្ឋអាមេរិក កំពុងតែស្វះស្វែងរកនូវការគាំទ្រ ពីបណ្ដាប្រទេសជាសម្ពន្ធមិត្ត ដើម្បីហ៊ុមព័ទ្ធសេដ្ឋកិច្ចរបស់ចិន។

សារព័ត៌មានសិង្ហបុរី Channel News Asia បានចេញផ្សាយ កាលពីព្រឹក ថ្ងៃសុក្រ ទី៣ ខែមីនា ឆ្នាំ២០២៣ ថា បើតាមមន្រ្ដីសហរដ្ឋអាមេរិក និង ប្រភពផ្សេងៗទៀត បានឲ្យដឹង ថា ក្រុងវ៉ាស៊ីនតោន កំពុងតែកៀរគរ ដល់សម្ពន្ធមិត្តដ៏ជិតស្និទ្ធរបស់ខ្លួន អំពីលទ្ធភាព ដាក់ទណ្ឌកម្ម ប្រឆាំងនឹងប្រទេសចិន ប្រសិនបើក្រុងប៉េកាំង ផ្ដល់នូវកិច្ចគាំទ្រយោធា ដល់រុស្ស៊ី ដែលកំពុងតែធ្វើសង្គ្រាម នៅក្នុងប្រទេសអ៊ុយក្រែន។

ការពិគ្រោះយោបល់ ជុំវិញការហ៊ុមព័ទ្ធសេដ្ឋកិច្ចរបស់ចិន កំពុងតែស្ថិតក្នុងដំណាក់កាលបឋម ហើយសហរដ្ឋអាមេរិក មានគោលបំណង បង្រួបបង្រួមនូវការគាំទ្រ មកពីបណ្ដាប្រទេសជាច្រើន ជាពិសេស បណ្ដាប្រទេសមានសេដ្ឋកិច្ចជឿនលឿនបំផុត នៅលើពិភពលោក ឬ ក្រុមប្រទេស G7 រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក។ ចំណែកក្រុងវ៉ាស៊ីនតោន កំពុងតែបង្កើននូវការគាំទ្រ នៅក្នុងចំណោមបណ្ដាប្រទេស G7 នេះ ដើម្បីរឹតបន្តឹងដល់សេដ្ឋកិច្ចរបស់ចិន។ ប៉ុន្ដែគេនៅមិនទាន់ច្បាស់ អំពីទណ្ឌកម្មយ៉ាងពិសេស ដែលសហរដ្ឋអាមេរិក នឹងមានគោលបំណង ផ្ដោតទៅលើប្រទេសចិន។

បើទោះជាយ៉ាងណាក៏ដោយ សេតវិមាន និង ក្រសួងសេដ្ឋកិច្ចរបស់សហរដ្ឋអាមេរិក ដែលដឹកនាំទីភ្នាក់ងារដាក់ទណ្ឌកម្មនានា បានបដិសេធ ធ្វើការអត្ថាធិប្បាយ ជុំវិញបញ្ហាទាំងនេះ។

ក្រុងវ៉ាស៊ីនតោន និង សម្ពន្ធមិត្តរបស់សហរដ្ឋអាមេរិក បានបញ្ជាក់ កាលពីប៉ុន្មានសប្ដាហ៍កន្លងទៅថ្មីៗ ថា ចិន កំពុងតែពិចារណា លើការផ្គត់ផ្គង់គ្រឿងយុទ្ធោបករណ៍ទំនើបៗរបស់ខ្លួន ដល់ប្រទេសរុស្ស៊ី។ ដោយឡែក ក្រុងប៉េកាំង បានច្រានចោលយ៉ាងដាច់អហង្ការ ចំពោះការចោទប្រកាន់ទាំងនេះ ហើយសហរដ្ឋអាមេរិក ក៏មិនបានបង្ហាញភស្ដុតាងជាសាធារណៈ។

បណ្ដាប្រទេសលោកខាងលិច បានព្រមានដោយផ្ទាល់ដល់ប្រទេសចិន ប្រឆាំងនឹងការបញ្ជូនគ្រឿងចម្បាំង ទៅជួយដល់ប្រទេសរុស្ស៊ី។ ការព្រមាននេះ បានកើតឡើង នៅក្នុងជំនួប រវាងប្រធានាធិបតីសហរដ្ឋអាមេរិក លោក ចូ បៃដិន (Joe Biden) និង សមភាគីចិន លោក ស៊ី ជិនពីង (Xi Jinping) ក៏ដូចជាជំនួបទល់មុខគ្នា កាលពីថ្ងៃទី១៨ ខែកុម្ភៈ ឆ្នាំ២០២៣ រវាងរដ្ឋមន្រ្ដីក្រសួងការបរទេសសហរដ្ឋអាមេរិក លោក អេនតូនី ប្ល៊ីនខែន (Antony Blinken) និង សមភាគីចិន លោក វ៉ាង យី (Wang Yi) នៅខាងក្រៅកិច្ចប្រជុំសន្ដិសុខពិភពលោក នៅក្នុងទីក្រុងមូនិច ប្រទេសអាល្លឺម៉ង់៕

នៅលើពិភពលោកបច្ចុប្បន្នចិនគឺជាប្រទេសដែលមានចំនួនគុកច្រើនជាងគេ ប៉ុន្តែមិនប្រាកដថាមានអ្នកទោសច្រើនជាងគេនោះឡើយ។ ដូចច្នេះសូមប្រិយមិត្តមកដឹងពីប្រទេសទាំង១០លើពិភពលោកដែលមានអ្នកទោសច្រើនជាងគេដូចតទៅ៖

1. ប្រទេសសហរដ្ឋអាមេរិកជាប្រទេសដែលមានអ្នកទោសជាង២លាននាក់
2. ប្រទេសចិនជាប្រទេសដែលមានអ្នកទោសជាង១លាននាក់
3. ប្រទេសប្រេស៊ីលជាប្រទេសដែលមានអ្នកទោសជាង៨សែននាក់
4. ប្រទេសឥណ្ឌាជាប្រទេសដែលមានអ្នកទោសជាង៤សែននាក់
5. ប្រទេសរុស្ស៊ីជាប្រទេសដែលមានអ្នកទោសជាង៤សែននាក់
6. ប្រទេសថៃជាប្រទេសដែលមានអ្នកទោសជាង៣សែននាក់
7. ប្រទេសតួកគីជាប្រទេសដែលមានអ្នកទោសជាង២សែននាក់
8. ប្រទេសឥណ្ឌូនេស៊ីជាប្រទេសដែលមានអ្នកទោសជាង២សែននាក់
9. ប្រទេសមិកស៊ីកូជាប្រទេសដែលមានអ្នកទោសជាង២សែននាក់
10. ប្រទេសអ៊ីរ៉ង់ជាប្រទេសដែលមានអ្នកទោសជាង១សែននាក់

រដ្ឋធានីមូស្គូ៖ នៅក្នុងសង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន នៅលើទឹកដីរបស់អ៊ុយក្រែន អស់រយៈពេលជាងមួយឆ្នាំកន្លងមកនេះ បានសម្លាប់មនុស្ស អស់រាប់ម៉ឺននាក់ និង បានបំផ្លិចបំផ្លាញហេដ្ឋារចនាសម្ព័ន្ធស៊ីវិល នៅក្នុងប្រទេសអឺរ៉ុបខាងកើតមួយនេះ អស់តម្លៃរាប់រយពាន់លានដុល្លារ ខណៈការវាយប្រយុទ្ធគ្នាយ៉ាងខ្លាំង កំពុងតែបន្ដ នៅតំបន់ភាគខាងកើត ហើយឥឡូវ ក្រុងមូស្គូ បានចោទប្រកាន់ក្រុងកៀវ វាយប្រហារឆ្លងដែន ចូលទឹកដីរបស់រុស្ស៊ី។

សារព័ត៌មាន Al Jazeera បានចេញផ្សាយ កាលពីថ្ងៃព្រហស្បតិ៍ ទី២ ខែមីនា ឆ្នាំ២០២៣ ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានបញ្ជាក់ ថា រុស្ស៊ី បានរងការវាយប្រហារ ដោយភេរវកម្ម នៅតំបន់ភាគខាងត្បូង ប្រ៊ីយ៉ាន់ស្ក៍ (Bryansk) ជាប់ជាមួយនឹងព្រំដែនរបស់អ៊ុយក្រែន។ មេដឹកនាំវិមានក្រឹមឡាំង រូបនេះ បានប្ដេជ្ញា នឹងកម្ទេចនូវអ្វីដែលគាត់ បានអះអាង ថា ក្រុមបំផ្លិចបំផ្លាញរបស់អ៊ុយក្រែន បានបាញ់ប្រហារទៅលើជនស៊ីវិល នៅលើទឹកដីរបស់រុស្ស៊ី។

ក្រុងមូស្គូ បានចោទប្រកាន់ដល់ក្រុងកៀវ ថា កងទ័ពអ៊ុយក្រែន បានឆ្លងកាត់ព្រំដែន ដោយបានបាញ់ប្រហារ ទៅលើរថយន្ដមួយគ្រឿង ហើយបានសម្លាប់មនុស្សម្នាក់ និង ធ្វើឲ្យកុមារម្នាក់ រងរបួស ហើយបានចាប់ជាចំណាប់ខ្មាំង នៅក្នុងផ្សារមួយ។

ទីភ្នាកងារសន្ដិសុខសហពន្ធន៍រុស្ស៊ី (FSB) បានបញ្ជាក់ ថា «ក្រុមអ្នកជាតិនិយមរបស់អ៊ុយក្រែន ត្រូវបានវាយបករុញច្រាន ឲ្យត្រឡប់ចូលទៅក្នុងព្រំដែនរបស់អ៊ុយក្រែន វិញ ដើម្បីបញ្ចៀសនូវគ្រោះថ្នាក់ដល់ជនស៊ីវិល និង ខូចខាតដល់រចនាសម្ព័ន្ធស៊ីវិល»។

ដោយឡែក អ៊ុយក្រែន បានចោទប្រកាន់ដល់រុស្ស៊ី អំពីការប្រឌិតព័ត៌មានក្លែងក្លាយ ដើម្បីបង្កហេតុ។ ប៉ុន្តែអ៊ុយក្រែន ក៏ទំនងជាបង្ហាញ ថា ទម្រង់ប្រតិបត្តិការមួយចំនួន ពិតជាត្រូវបានអនុវត្ត ដោយភាគីប្រឆាំងនឹងរដ្ឋាភិបាលរុស្ស៊ី។

លោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សាជាន់ខ្ពស់របស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី (Volodymyr Zelenskyy) បានសរសេរ នៅលើបណ្ដាញសង្គមធ្វីធើរ ថា «រឿងចោទក្រុមបំផ្លាញរបស់អ៊ុយក្រែន កំពុងតែប្រព្រឹត្ដ នៅលើទឹកដីរបស់សហពន្ធន៍រុស្ស៊ី គឺជាការបង្កហេតុ»៕

ប្រទេសឥណ្ឌា ៖មន្ត្រីរដ្ឋាភិបាលអាមេរិកបង្ហាញថា រដ្ឋមន្ត្រីក្រសួងការបរទេសអាមេរិក លោក Anthony Blinken បានជួបជាមួយរដ្ឋមន្ត្រីក្រសួងការបរទេសរុស្ស៊ី លោក Sergey Lavrov នៅក្រៅកិច្ចប្រជុំរដ្ឋមន្ត្រីការបរទេស G20 នៅទីក្រុងញូវដេលី ប្រទេសឥណ្ឌា កាលពីថ្ងៃទី២ ខែមីនា កន្លងមក ។ ការជួបគ្នានេះ ស្របពេលស្ថានការណ៍កំពុងតានតឹងរវាងប្រទេសមហាអំណាចទាំងពីរ ខណៈរុស្ស៊ីបានសម្រេចចិត្តបញ្ជូនកងទ័ពទៅវាយលុកអ៊ុយក្រែនកាលពី១ឆ្នាំមុន រហូតដល់ការសម្រេចចិត្តផ្អាកកិច្ចព្រមព្រៀងគ្រាប់នុយក្លេអ៊ែរ New START របស់រុស្ស៊ីកាលពីពេលថ្មីៗនេះ ។

តាមប្រភពព័ត៌មានពីមន្ត្រីដែលបានអមដំណើរជាមួយលោក Blinken លើកឡើងថា លោក Blinken ជាមួយលោក Lavrov បានជជែកគ្នារយៈពេលខ្លីៗប្រមាណ១០នាទី ហើយក្នុងការជជែកគ្នានេះ លោក Blinken បានអំពាវនាវឱ្យរុស្ស៊ីដោះលែង Paul Whelan ជនជាតិអាមេរិក ដែលត្រូវបានគេឃុំខ្លួននៅរុស្ស៊ី រួមទាំងសូមឱ្យទីក្រុងមូស្គូចូលរួមក្នុងសន្ធិសញ្ញា New START ជាកិច្ចព្រមព្រៀងគ្រប់គ្រងអាវុធនុយក្លេអ៊ែរតែមួយគត់ ដែលនៅសល់រវាងប្រទេសអាមេរិកជាមួយរុស្ស៊ី ។

ក្រៅពីនេះ លោក Blinken ក៏បានផ្តោតទៅលើគោលជំហរនយោបាយរបស់អាមេរិកថា រដ្ឋាភិបាលអាមេរិកនឹងផ្តល់ការគាំទ្រអ៊ុយក្រែនបន្តទៀត ខណៈពេលមុននេះ មន្ត្រីផ្នែកគ្រប់គ្រងរបស់ប្រធានាធិបតីអាមេរិក លោក ចូ បៃដិន បានអនុម័តបញ្ជូនរថក្រោះចម្បាំងទៅកាន់អ៊ុយក្រែនដើម្បីតស៊ូក្នុងសមរភូមិ រួមទាំងអនុម័តផ្តល់ការគាំទ្រអាវុធ និងប្រាក់ជំនួយបន្ថែមទៀត ។ ក្រៅពីនេះ អាមេរិកក៏បានអំពាវនាវតាមរយៈអង្គការសហប្រជាជាតិ ដើម្បីឱ្យរុស្ស៊ីដកកងទ័ពចេញពីទឹកដីអ៊ុយក្រែនជាបន្ទាន់ ។

គួរបញ្ជាក់ថា ការជួបគ្នាលើកចុងក្រោយរវាងលោក Blinken និងលោក Lavrov គឺមុនហេតុការណ៍កងទ័ពរុស្ស៊ីចូលឈ្លានពានទឹកដីអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ កន្លងមក ៕

ប្រភព ៖ thestandard
រក្សាសិទ្ធដោយ KBN News