នៅលើពិភពលោកយើងនេះគឺមានកោះច្រើនខ្លាំងណាស់ មានទាំងស្អាត មានទាំងមិនស្អាត មានទាំងកោះធំ មានទាំងកោះតូច ហើយក៏មានកោះមួយដែលពោរពេញទៅដោយសំរាមផងដែរ។ ដោយសារមនុស្សបានចោលសំរាមផ្តេសផ្តាស់ បង្កើតបានជាចង្កោមសំរាមដ៏ធំមហិមារប្រមូលផ្តុំគ្នានៅក្បែរសមុទ្រ បង្កឱ្យមានការបំពុលយ៉ាងខ្លាំង ធ្វើឱ្យប៉ះពាលយ៉ាងធ្ងន់ធ្ងរដល់ប្រព័ន្ធអេកូឡូស៊ី។ ដូច្នេះហើយតើលោកអ្នកដឹងទេថា កោះសំរាមធំជាងគេបំផុតលើពិភពលោកស្ថិតនៅឯណា? ហើយវាមានទំហំប៉ុន្មាន? ហេតុអ្វីបានជាកោះនេះពោរពេញទៅដោយសំរាមជាងគេ? តើមានកោះសំរាមធំៗប៉ុន្មានក្នុងមហាសមុទ្រនៅលើពិភពលោកយើងនេះ?

កោះសំរាមធំជាងគេបំផុតលើពិភពលោកគឺស្ថិតក្នុងមហាសមុទ្រប៉ាស៊ីហ្វិកជាមួយទំហំ ១.៦ លានគីឡូម៉ែត្រការ៉េដែលមានទីតាំងនៅចន្លោះរដ្ឋហាវ៉ៃ និងរដ្ឋកាលីហ្វ័រញ៉ា សហរដ្ឋអាមេរិក។ មូលហេតុដែលមហាសមុទ្រប៉ាស៊ីហ្វិកមានសំរាមកកុញច្រើនជាងគេ គឺដោយសារចរន្តទឹកសមុទ្រយក្សទាញសំរាមពីកន្លែងផ្សេងៗទៅកាន់ចំណុចកណ្តាល ខណៈមហាសមុទ្រប៉ាស៊ីហ្វិកគឺស្ថិតនៅចំណុចកណ្តាល ហើយ«បង្ខាំង»វាធ្វើឱ្យមហាសមុទ្រដ៏ធំមួយនេះមានការប្រមូលផ្ដុំផ្លាស្ទិចច្រើនជាងគេបំផុតក្នុងពិភពលោក។ លើសពីនេះបើយោងតាមអង្គការបរិស្ថាន Ocean Cleanup បានប៉ាន់ប្រមាណថាមានបំណែកប្លាស្ទិកប្រហែល ១.៨ ពាន់ពាន់លាននៅក្នុងកោះសំរាមនេះដែលមានទម្ងន់ប្រហែល ៨០,០០០ តោន។

ដោយភាគច្រើនមានប្រភពមកពីសកម្មភាពនេសាទ ហើយប្រហែល ១០-២០% អាចមកពីរលកយក្សស៊ូណាមិជប៉ុនឆ្នាំ ២០១១។ ទោះបីជាសមុទ្រមានការបំពុលខ្លាំងយ៉ាងណាក៏ដោយ ក៏សត្វជាច្រើនប្រភេទនៅតែអាចរស់នៅបានជាធម្មតា។ ទោះជាយ៉ាងណា បើយោងតាមការស្រាវជ្រាវ បំណះសំរាមប៉ាស៊ីហ្វិកនេះគឺមានទំហំធំជាងប្រទេសបារាំងរហូតដល់ទៅ ៣ ដងឯណោះ នេះបើតាមការស្ទង់មតិពីលើអាកាស និងអូសតាមកប៉ាល់ បន្ទាប់មកបញ្ចូលទិន្នន័យទៅក្នុងគំរូកុំព្យូទ័រ។

ដូច្នេះហើយអស់រយៈពេល ៣៥ ឆ្នាំកន្លងមកនេះ ចរន្តមហាសមុទ្របានរុញច្រានសំរាមនៅក្នុងមហាសមុទ្រទៅជាកោះចំនួនប្រាំ គឺនៅភាគខាងជើង និងខាងត្បូងមហាសមុទ្រប៉ាស៊ីហ្វិក ក៏ដូចជាខាងត្បូងមហាសមុទ្រអាត្លង់ទិក រួមទាំងមហាសមុទ្រឥណ្ឌាផងដែរ។ អ្នកវិទ្យាសាស្ត្របានប៉ាន់ប្រមាណថា តាមអត្រាបច្ចុប្បន្ននៅឆ្នាំ ២០២៥ សមាមាត្រនៃត្រីគឺនៅតែមានច្រើនជាងសំរាម ប៉ុន្តែនៅឆ្នាំ ២០៥០ មហាសមុទ្រនឹងមានសំរាមច្រើនជាងត្រីទ្វេដង នេះបើយោងតាមការចុះផ្សាយរបស Tech Insider៕

ជឿថាប្រិយមិត្តប្រាកដជាបានដឹងអំពីជីវប្រវត្តិតស៊ូរបស់ Jack Ma ហើយដែលជាសហស្ថាបនិកក្រុមហ៊ុនពាណិជ្ជកម្មអេឡិចត្រូនិកយក្ស Alibaba។ ទោះជាយ៉ាងណាថ្ងៃនេះ យើងចង់ចែករំលែកដំបូន្មានដ៏ឈ្លាសវៃរបស់ Jack Ma សម្រាប់ភាពជោគជ័យនៃអាជីវកម្ម មុននឹងលោកទទួលបានភាពជោគជ័យមកដល់សព្វថ្ងៃនេះបុរសមានបំផុតនៅអាស៊ីតែងតែប្រកាន់ភ្ជាប់នូវទ្រឹស្តីដូចខាងក្រោម៖
ទីមួយ គឺត្រូវជួលមនុស្សដែលមានសមត្ថភាពខ្ពស់ជាងអ្នក
ទីពីរ គឺផ្តោតលើរបៀបដែលពួកគេធ្វើការជាមួយយើង និងមនុស្សជុំវិញខ្លួន។

នៅក្នុងបទសម្ភាសន៍មួយនៅឯវេទិកាសេដ្ឋកិច្ចពិភពលោកថ្មីៗនេះ មហាសេដ្ឋីរូបនេះបានចែករំលែកថា៖ «គ្មានបុគ្គលណាម្នាក់ដែលមិនធ្លាប់បរាជ័យនោះទេ» ដំបូងឡើយ លោកមិនដឹងអ្វីទាំងអស់អំពីបច្ចេកវិទ្យា ហើយលោកក៏មិនបានដឹងអ្វីទាំងអស់អំពីការគ្រប់គ្រងដែរ។ ប៉ុន្តែរឿងមួយដែលអ្នកត្រូវចងចាំ ប្រសិនបើអ្នកចង់ជោគជ័យក្នុងអាជីវកម្មត្រូវតែជួលមនុស្សដែលមានទេពកោសល្យខ្ពស់ជាងអ្នក អ្នកត្រូវតែស្វែងរកមនុស្សដែលឆ្លាតជាងអ្នក ដើម្បីឱ្យគេជួយតម្រង់ទើស បង្ហាញផ្លូវប្រាប់លោកអ្នក ទោះបីជាអ្នកមានតួនាទីជាអ្នកគ្រប់គ្រង ឬមេដឹកនាំក៏ដោយ ក៏អ្នកមិនអាចមើលងាយសមត្ថភាពបុគ្គលិករបស់អ្នកបានឡើយ ជួលកាលពួកគេអាចមានសមត្ថភាពខ្លាំងជាងអ្នកទៅទៀតក៏ថាបាន។

ដូច្នេះត្រូវដាក់ខ្លួន និងបើកចិត្តឱ្យទូលាយរៀនពីពួកគាត់ ក៏ដូចជាត្រូវបោះបង់ភាពអាត្មានិយមរបស់អ្នកដើម្បីឱ្យអាជីវកម្មរីកចម្រើន។ Jack Ma បានបន្តថា លោកតែងតែព្យាយាមស្វែងរកមនុស្សដែលមានចំណេះដឹងខ្ពស់ជាងលោកជានិច្ច ដើម្បីឱ្យពួកគេជួយអភិវឌ្ឍការងារឱ្យកាន់តែរីកចម្រើន។ បន្ថែមពីនេះទៀត ក្នុងនាមយើងជាអ្នកគ្រប់គ្រងក៏គួរផ្តោតលើរបៀបដែលសមាជិកក្រុមនីមួយៗធ្វើការជាមួយគ្នាដែរ ព្រោះមនុស្សក្រុមណាក៏មានគំនិត និងស្ទីលការងារខុសៗគ្នា ក៏ដូចជាមានទេពកោសល្យ និងមានឥរិយាបទខ្ពស់ផ្សេងៗគ្នា។ ហេតុនេះក្នុងនាមយើងជាអ្នកដឹងនាំ ឬជាអ្នកគ្រប់គ្រងដ៏ល្អម្នាក់ត្រូវតែដឹងពីចំណុចខ្លាំង និងចំណុចខ្សោយរបស់សមាជិកក្រុមនីមួយៗ។

ដើម្បីឱ្យអាជីវកម្មដើរទៅមុខរហូត អ្នកត្រូវតែអនុវត្តទ្រឹស្តីទាំងពីរខាងលើ ទោះជាយ៉ាងណារបៀបគ្រប់គ្រងបុគ្គលិកឱ្យបានត្រឹមត្រូវ និងដឹងថានរណាម្នាក់ខ្លាំងជាយើង គឺវាមិនអាចកើតឡើងដោយធម្មជាតិនោះទេ ដោយវាទាមទារការអត់ធ្មត់ និងបញ្ញាផ្លូវចិត្តខ្ពស់ (EQ)។ ដូច្នេះហើយ ប្រសិនបើអ្នកចង់គ្រប់គ្រងក្រុមប្រកបដោយប្រសិទ្ធភាព និងជោគជ័យដូច Jack Ma អ្នកត្រូវតែបោះបង់ភាពអត្មានិយមរបស់អ្នក ដោយអ្នកមិនចាំបាច់ធ្វើខ្លួនល្អបំផុតនោះទេ ប៉ុន្តែត្រូវធ្វើជាមនុស្សដែលចេះមើលមនុស្ស និងចេះចាប់យកឱកាសបំពេញការងារជាមួយបុគ្គលិកឱ្យបានច្រើនទើបជាការល្អ៕

ធ្លាប់តែឃើញខ្យងដែលមានទំហំតូចៗ ស្រាប់តែឃើញខ្យងមានទំហំធំមហិមារថែមទាំងមានទម្ងន់ធ្ងន់ខ្លាំងមិនគួរឱ្យជឿទៀត បានកំពុងធ្វើឱ្យអ្នកវិទ្យាសាស្ត្រមានការចាប់អារម្មណ៍យ៉ាងខ្លាំង។
ថ្មីៗនេះអ្នកវិទ្យាសាស្ត្រមួយក្រុមបានរកឃើញខ្យងមួយប្រភេទដែលមានសំបកធំរហូតដល់ ៩១ សង់ទីម៉ែត្រ ជាមួយទម្ងន់រហូតដល់ ១៨ គីឡូក្រាម នៅក្នុងតំបន់ទឹកភាគខាងលិច និងខាងជើងនៃប្រទេសអូស្ត្រាលី បានកំពុងធ្វើឱ្យមនុស្សម្នាជាច្រើន រួមទាំងអ្នកវិទ្យាសាស្ត្រ និងជំនាញមានការចាប់យ៉ាងខ្លាំង។

យោងតាមការស្រាវជ្រាវ ខ្យងដ៏ធំមួយប្រភេទនេះមានឈ្មោះថា Syrinx aruanus ឬ ខ្យងត្រែអូស្ត្រាលី ត្រូវបានគេទទួលស្គាល់ថាជាខ្យងធំបំផុតរបស់ពិភពលោក ដោយសារតែវាមានទំហំធំខ្លាំងមិនធ្លាប់មាន និងមានទម្ងន់ធ្ងន់ទៀតផង។ ជាមួយនឹងជើងពណ៌លឿងភ្លឺ អមដោយសំបកដ៏សែនក្រាស់និងទំហំ ៩១ សង់ទីម៉ែត្រ ទម្ងន់ ១៨ គីឡូក្រាម ខ្យងត្រែអូស្ត្រាលីមិនត្រឹមតែជាខ្យងធំជាងគេលើពិភពលោកប៉ុណ្ណោះទេ ថែមទាំងជាខ្យងដ៏ធំបំផុតដែលនៅតែមានជីវិតនៅលើផែនដីផងដែរ។

យោងតាមការស្រាវជ្រាវ ខ្យងមួយប្រភេទនេះគឺពួកវាចូលចិត្តស៊ីពពួកដង្កូវ polychaetes, loimia និង diopatra ជាអាហារ។ នៅក្នុងការសិក្សាមួយនៅលើវេទិកា ResearchGate អ្នកជំនាញ John D. Taylor នៅសារមន្ទីរប្រវត្តិសាស្ត្រធម្មជាតិទីក្រុងឡុងដ៍ និងសហការីរបស់លោកបាននិយាយថា ពួកគេបានរកឃើញខ្យងដ៏ធំនេះនៅលើឆ្នេរខ្សាច់នៃ Withnell Bay និង Western Australia នៅពេលដែលពួកគេបានធ្វើដំណើរទៅកាន់តំបន់ទឹកភាគខាងលិច និងខាងជើងនៃប្រទេសអូស្ត្រាលី។ ដូច្នេះនៅពេលមនុស្សទៅកាន់តំបន់នេះ មនុស្សប្រហែលជាអាចជំពប់ជើងដួលលើខ្យងដ៏ធំបំផុតរបស់ពិភពលោក ដោយសារពួកវាតែងលាក់ខ្លួននៅក្នុងខ្សាច់។

បន្ថែមពីលើទំហំដ៏គួរឱ្យចាប់អារម្មណ៍របស់វា ខ្យងត្រែអូស្ត្រាលីក៏មានរូបរាងពិសេសមួយដែលត្រូវបានគេប្រដូចទៅនឹងត្រែ ហើយសែលរបស់ពួកវាគឺមានរចនាសម្ព័ន្ធជារង្វង់។ លើសពីនេះសំបកខ្យងគឺមានអត្ថប្រយោជន៍ច្រើនសម្រាប់មនុស្ស ដោយជនជាតិដើមអូស្ត្រាលីតែងយកសំបកខ្យងទទេរទៅប្រើជាឧបករណ៍តន្ត្រី និងធុងទឹកជាដើម៕

ប្រសិនបើលោកអ្នកកំពុងគិតថាជីវិតរបស់លោកអ្នកជួបការលំបាក សូមក្រឡែកមកមើលការរស់នៅរបស់ប្រជាជនអាហ្វ្រិកមួយនេះ ដែលកំពុងរស់នៅលើកោះដ៏សែនតូចចង្អៀតបំផុតមួយក្នុងពិភពលោក។ កោះ Migingo ស្ថិតនៅលើបឹង Victoria រវាងព្រំដែននៃប្រទេសទាំងពីរគឺ Kenya និង Uganda របស់ទ្វីបអាហ្រ្វិកត្រូវបានគេចាត់ទុកថាជាកោះតូច ប៉ុន្តែមានមនុស្សរស់នៅច្រើនជាងគេបំផុតលើពិភពលោក។ កោះនេះមានផ្ទៃដីតិចជាង ២០០០ ម៉ែត្រការ៉េ ប៉ុន្តែមានប្រជាជនរស់នៅ ១,០០០ នាក់ ដោយផ្ទះនីមួយៗគឺមានទំហំប៉ុនបន្ទប់ទឹកត្រឹមតែ ២ ម៉ែត្រការ៉េប៉ុណ្ណោះ ហើយភាគច្រើនធ្វើពីដែកជ្រុង ជង់លើគ្នា។

ទោះបីជាការរស់នៅប្រឈមនឹងបញ្ហាលំបាកវេទនាក៏ដោយ ក៏ប្រជាជននៅទីនេះនៅតែអាចស៊ូទ្រាំបាន ដោយសារកោះ Migingo ស្ថិតនៅលើបឹង Victoria ខណៈបឹងនេះគឺជាបឹងទឹកសាបដ៏ធំបំផុតនៅទ្វីបអាហ្រ្វិក និងជាបឹងធំជាងគេទីពីរក្នុងពិភពលោក ដែលល្បីល្បាញខាងជីវៈចម្រុះមានត្រីរហូតដល់ ៥០០ ប្រភេទរស់នៅ។ បឹង Victoria ល្បីល្បាញខ្លាំងដោយសារធនធានអាហារសមុទ្រដ៏សម្បូរបែបរបស់វា ហើយការនេសាទនៅលើកោះ Migingo ក៏បានទាក់ទាញអ្នកនេសាទជាច្រើនមកពីគ្រប់ទិសទី ដោយប្រជាជននៃកោះដ៏តូចនេះភាគច្រើនសុទ្ធតែធ្វើការជាអ្នកនេសាទ។

កន្លែងនេះក៏មានទីតាំងភូមិសាស្រ្តនៅជិតផ្លូវទឹកសំខាន់ៗ ងាយស្រួលបំផុតសម្រាប់ពាណិជ្ជកម្មផងដែរ លើសពីនេះធម្មជាតិ “ចង្អៀត” និងរបៀបរស់នៅប្លែកៗរបស់ប្រជាជន Migingo ក៏បានទាក់ទាញអ្នកទេសចរមកពីគ្រប់ទិសទីដើម្បីស្វែងយល់ទៀតផង។ ទោះជាយ៉ាងណាក៏ដោយ ការរស់នៅរបស់មនុស្សនៅលើកោះគឺបានប្រឈមមុខនឹងបញ្ហាជាច្រើនដូចជា៖ ផ្ទះនីមួយមានទំហំតូចចង្អៀតខ្លាំងពេក រួមជាមួយអាកាសធាតុក្តៅខ្លាំង ហើយផ្ទះភាគច្រើនធ្វើពីដែកជ្រុង ជង់លើគ្នាយ៉ាងកកកុញ។

ប្រភពទឹកសំខាន់សម្រាប់ប្រើប្រាស់ប្រចាំថ្ងៃគឺមកពីបឹង ដែលធ្វើឱ្យការងូតទឹក ការបោកគក់ និងអនាម័យផ្ទាល់ខ្លួនមានការលំបាក ហើយថាមពលត្រូវបានផ្តល់ដោយម៉ាស៊ីនភ្លើងតូចមួយដែលគ្រប់គ្រាន់សម្រាប់បំភ្លឺប៉ុណ្ណោះ។ ទន្ទឹមនឹងនោះ មានបញ្ហាជាច្រើនទៀតដែលត្រូវដោះស្រាយ ដូចជាកាកសំណល់ក្នុងគ្រួសារមានបរិមាណច្រើន ប្រភពទឹកកខ្វក់ ប៉ះពាល់ដល់ប្រព័ន្ធអេកូឡូស៊ីរបស់បឹង។ កង្វះហេដ្ឋារចនាសម្ព័ន្ធសង្គម ដូចជា សាលារៀន មន្ទីពេទ្យ ផ្លូវថ្នល់…និងប៉ះពាល់ដល់គុណភាពជីវិតជាដើម។

ទោះជាបីជាយ៉ាងនេះក្តី ប្រជាជននៃកោះ Migingo តែងតែមានសុទិដ្ឋិនិយម និងទន្ទឹងរង់ចាំអនាគត។ ទោះបីពួកគេរស់នៅក្នុងស្ថានភាពលំបាកក៏ដោយ ក៏ពួកគេនៅតែនៅជាមួយគ្នា និងជួយគ្នាទៅវិញទៅមក។ រហូតមកដល់ពេលនេះ ការរស់នៅរបស់ប្រជាជននៅលើកោះបានឃើញការផ្លាស់ប្តូរជាវិជ្ជមានបន្តិចម្តងៗហើយ។ ដោយនៅឆ្នាំ ២០១៦ ប្រទេសកេនយ៉ា និងអ៊ូហ្គង់ដាបានចុះកិច្ចព្រមព្រៀងមួយដើម្បីការពារអ្នកនេសាទពីចោរសមុទ្រ។

ប្រទេសឥណ្ឌូណេស៊ី ៖ កាលពីថ្ងៃទី៦ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ប្រទេសឥណ្ឌូណេស៊ីនឹងទិញអង្ករពីក្រៅប្រទេសមកស្តុកទុកឱ្យបានចំនួន២លានតោន នៅខែធ្នូ ឆ្នាំ២០២៤នេះ ដើម្បីទប់ទល់នឹងការផលិតស្រូវធ្លាក់ចុះ ។ រដ្ឋាភិបាលឥណ្ឌូណេស៊ីរំពឹងថា ទិន្នផលស្រូវនឹងធ្លាក់ចុះនៅចុងឆ្នាំ២០២៤ រហូតដល់ដើមឆ្នាំ២០២៥ ទើបឥណ្ឌូណេស៊ីចាំបាច់ត្រូវស្តុកទុកអង្ករសម្រាប់ពលរដ្ឋ ។

ការកំណត់គោលដៅស្តុកទុកអង្ករក្នុងបរិមាណដ៏ច្រើននេះ ដោយសាររដ្ឋាភិបាលឥណ្ឌូណេស៊ីរំពឹងថា ពលរដ្ឋនឹងត្រូវការអង្ករច្រើនក្នុងអំឡុងពេលការបោះឆ្នោតនៅថ្នាក់តំបន់ ដែលនឹងប្រព្រឹត្តទៅនៅខែវិច្ឆិកា ឆ្នាំ២០២៤ ។

លោក Arif Prasetyo Adi ប្រធានការិយាល័យស្បៀងអាហារជាតិឥណ្ឌូណេស៊ីនិយាយថា ៖ «យើងចាំបាច់ត្រូវត្រៀមអង្ករស្តុកទុកឱ្យបានគ្រប់គ្រាន់ ដើម្បីបំពេញតម្រូវការខ្វះខាតរបស់ពលរដ្ឋ ។ ចំណែកពេលវេលាដែលយើងនឹងតាមដានជាពិសេសនោះ គឺនៅខែវិច្ឆិកា, ខែធ្នូ ឆ្នាំ២០២៤ និងខែមករា ឆ្នាំ២០២៥ ។ នៅខែកញ្ញា ឆ្នាំ២០២៤នេះ បរិមាណអង្ករក្នុងឃ្លាំងរបស់ឥណ្ឌូណេស៊ី គឺស្មើនឹង១លាន៣សែន៩ម៉ឺនតោន» ។

រីឯលោក Bayu Krishnamurti នាយកគ្រប់គ្រងរបស់ Peram Bulok គឺជាក្រុមហ៊ុនម្ហូបអាហាររបស់ឥណ្ឌូណេស៊ី បានប្រកាសពីផែនការទិញអង្ករពីក្រៅប្រទេស រហូតដល់៣លាន៦សែនតោន នៅចុងឆ្នាំ២០២៤ ។

បច្ចុប្បន្ន ប្រទេសឥណ្ឌូណេស៊ីបានទិញអង្ករពីក្រៅប្រទេស ចំនួន២លាន៤សែនតោន ខណៈអង្ករនៅសល់១លាន២សែនតោនទៀត នឹងមកដល់ឥណ្ឌូណេស៊ីនៅមុនខែធ្នូ ឆ្នាំ២០២៤ ។ រដ្ឋាភិបាលឥណ្ឌូណេស៊ីបាននាំចូលអង្ករពីបណ្តាប្រទេសជាច្រើននាពេលកន្លងមក ដូចជា ៖ ថៃ, វៀតណាម, ប៉ាគីស្ថាន និងមីយ៉ាន់ម៉ា ដើម្បីបំពេញតម្រូវការបរិភោគរបស់ពលរដ្ឋ ខណៈឥណ្ឌូណេស៊ីស្ថិតក្នុងចំណោមប្រទេសត្រូវការអង្ករច្រើនបំផុតលើពិភពលោក ។

យោងតាមទិន្នន័យរបស់ការិយាល័យស្បៀងអាហារជាតិឥណ្ឌូណេស៊ីបញ្ជាក់ថា អាហារសំខាន់ៗក្នុងប្រទេស រួមមាន ៖ អង្ករ, សណ្តែក និងសាច់គោ ហើយបរិមាណអង្ករស្តុកទុកនៅពុំទាន់គ្រប់គ្រាន់នៅឡើយទេ ។ ហេតុនេះ វាអាចបណ្តាលឱ្យមានវិបត្តិស្បៀងអាហារ ប្រសិនបើរដ្ឋាភិបាលពុំបង្កើនការផ្គត់ផ្គង់ឱ្យបានសមរម្យទេនោះ ៕

ប្រទេសម៉ាឡេស៊ី ៖ កាលពីថ្ងៃទី៨ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋម៉ាឡេស៊ីស្មើនឹង៧១% បានស្នើឱ្យរដ្ឋាភិបាលចាត់វិធានការទប់ស្កាត់ការលេងបណ្តាញសង្គមរបស់ក្មេងអាយុក្រោម១៤ឆ្នាំ ដោយសារពួកគេបារម្ភពីផលប៉ះពាល់ផ្សេងៗ ។ ពួកគេបានសំណូមពរឱ្យគ្រូបង្រៀន និងសាលារៀនដើរតួនាទីផ្តល់ចំណេះដឹងពីបច្ចេកវិទ្យាឌីជីថល និងសុវត្ថិភាពក្នុងបណ្តាញសង្គមដល់កូនសិស្ស ។

បើតាមលទ្ធផលការស្ទង់មតិបង្ហាញថា ពលរដ្ឋម៉ាឡេស៊ីស្មើនឹង៧១% បានស្នើឱ្យរដ្ឋាភិបាលដោះស្រាយការលេងបណ្តាញសង្គមរបស់ក្មេងអាយុក្រោម១៤ឆ្នាំ ។ រីឯពលរដ្ឋម៉ាឡេស៊ី២៩% ទៀតបានជំរុញឱ្យរដ្ឋាភិបាលទប់ស្កាត់ការប្រើប្រាស់កម្មវិធី ChatGPT របស់ក្មេង ។ នេះបើតាមការចុះផ្សាយរបស់សារព័ត៌មាន Xinhua ដែលយោងតាមលទ្ធផលស្ទង់មតិរបស់ Ipsos គឺជាក្រុមហ៊ុនស្រាវជ្រាវទីផ្សារ និងស្ទង់មតិការយល់ឃើញលំដាប់ពិភពលោក ។

ក្រុមហ៊ុន Ipsos បានធ្វើការស្ទង់មតិការយល់ឃើញពាក់ព័ន្ធនឹងការលេងបណ្តាញសង្គមនៅប្រទេសមួយចំនួន ដូចជា ៖ ម៉ាឡេស៊ី, ឥណ្ឌូណេស៊ី, ថៃ និងសិង្ហបុរី ហើយលទ្ធផលការស្ទង់មតិបង្ហាញថា ពលរដ្ឋម៉ាឡេស៊ីភាគច្រើនបានសំណូមពរឱ្យទប់ស្កាត់ការលេងបណ្តាញសង្គមរបស់ក្មេង បន្ទាប់ពីឥណ្ឌូណេស៊ី ។

បច្ចុប្បន្ន ពលរដ្ឋម៉ាឡេស៊ីបានប្រុងប្រយ័ត្នបំផុតចំពោះការលេងបណ្តាញសង្គម ជាពិសេស ក្មេង ខណៈការឆ្លើយតបការស្ទង់មតិពាក់ព័ន្ធនឹងការប្រើទូរស័ព្ទស្មាតហ្វូន និងបច្ចេកវិទ្យា AI នៅសាលារៀន គឺខុសៗគ្នា ។ លទ្ធផលស្ទង់មតិបង្ហាញថា ពលរដ្ឋម៉ាឡេស៊ី៥១% យល់ឃើញថា គួរហាមឃាត់ក្មេងអាយុក្រោម១៤ឆ្នាំ ប្រើទូរស័ព្ទស្មាតហ្វូនទាំងអំឡុងពេលរៀន និងក្រោយពេលរៀន ។ រីឯមតិ២៩% ទៀតយល់ថា គួរហាមប្រើគំរូភាសាបច្ចេកវិទ្យា AI ដូចជា ៖ កម្មវិធី ChatGPT ។

ជាមួយគ្នានេះ ពលរដ្ឋម៉ាឡេស៊ី៥៦% បានសំណូមពរឱ្យគ្រូបង្រៀន និងសាលារៀន គួរតែដើរតួនាទីផ្តល់ចំណេះដឹងអំពីបច្ចេកវិទ្យាឌីជីថល និងសុវត្ថិភាពក្នុងបណ្តាញសង្គមដល់កូនសិស្ស ។ រីឯមតិ៣៩% ទៀតយល់ថា ការផ្តល់ចំណេះដឹងផ្នែកនេះ គួរប្រគល់ឱ្យអាណាព្យាបាលសិស្ស ៕

ប្រទេសចិន ៖ ប្រទេសនានាលើពិភពលោក បានព្យាយាមអភិវឌ្ឍន៍បច្ចេកវិទ្យាឆ្កែយន្តឱ្យកាន់តែទំនើបជាងមុន ដើម្បីជួយសម្រួលដល់ការប្រើប្រាស់របស់មនុស្សពិការភ្នែក ។ នៅឆ្នាំ២០២៤នេះ ចិនបានផលិតឆ្កែយន្តនាំផ្លូវមនុស្សពិការភ្នែក ដែលបំពាក់ដោយបច្ចេកវិទ្យាទំនើបជាងឆ្កែយន្តប្រទេសផ្សេង ហើយចិនក៏មានគម្រោងលក់ឆ្កែយន្តទៅក្រៅប្រទេសផងដែរ ។ តើឆ្កែយន្តរបស់ចិនមានលក្ខណៈពិសេសអ្វីខ្លះ?

កាលពីខែកក្កដា ឆ្នាំ២០២៤ ប្រទេសចិនបានសាកល្បងប្រើប្រាស់ឆ្កែយន្តនាំផ្លូវ ដើម្បីជួយសម្រួលដល់ការធ្វើដំណើរនៅតាមផ្លូវរបស់មនុស្សពិការភ្នែក ខណៈកាលពីមុន ពួកគេប្រើប្រាស់សត្វឆ្កែពិតប្រាកដ ។ ក្រៅពីឆ្កែយន្តនេះអាចត្រួតពិនិត្យបរិស្ថាននៅជុំវិញខ្លួនវាតាមរយៈកាមេរ៉ា វាក៏អាចចងចាំពីភ្លើងសញ្ញាចរាចរណ៍នៅតាមផ្លូវផងដែរ ។

ក្រុមអ្នកផលិតឆ្កែយន្តនាំផ្លូវនិយាយថា ឆ្កែយន្តដែលបានផលិតកន្លងមក គ្មានសមត្ថភាពពិសេសដូចឆ្កែយន្តនាំផ្លូវនេះទេ ។ ក្រុមអ្នកស្រាវជ្រាវមកពីសាកលវិទ្យាល័យមួយនៅទីក្រុងសៀងហៃ បានបង្កើតឆ្កែយន្តនេះឡើង គឺវាមានជើងចំនួន៦ ដើម្បីឱ្យវាអាចដើរនៅតាមបរិវេណផ្សេងៗបានយ៉ាងងាយស្រួល ។

ឆ្កែយន្តនេះអាចទំនាក់ទំនងជាមួយមនុស្សតាមរយៈការស្តាប់សំឡេងអ្នកបញ្ជា ដោយសារវាត្រូវបានបំពាក់ដោយបច្ចេកវិទ្យា AI ។ លើសពីនេះ ឆ្កែយន្តអាចស្គាល់ផ្លូវ និងចងចាំភ្លើងសញ្ញាចរាចរណ៍បានយ៉ាងល្អទៀតផង ។ ការអភិវឌ្ឍបច្ចេកវិទ្យាឆ្កែយន្តនាំផ្លូវមនុស្សពិការភ្នែក ពុំមែនជារឿងថ្មីទេ ពីព្រោះនៅប្រទេសផ្សេងៗ ដូចជា ៖ អូស្ត្រាលី និងអង់គ្លេស ក៏បានផលិតឆ្កែយន្តនាំផ្លូវដូចគ្នាដែរ ។

ប៉ុន្តែសម្រាប់ប្រទេសចិន ក្រុមអ្នកបង្កើតឆ្កែយន្តយល់ឃើញថា ការផលិតឆ្កែយន្តនាំផ្លូវនេះអាចជួយដោះស្រាយបញ្ហាការខ្វះខាតឆ្កែនាំផ្លូវ ហើយក្រុមអ្នកបង្កើតឆ្កែយន្ត បញ្ជាក់ថា នៅប្រទេសចិនមានឆ្កែនាំផ្លូវត្រឹមតែ៤០០ក្បាលប៉ុណ្ណោះ បើធៀបនឹងចំនួនពលរដ្ឋចិនពិការភ្នែក ស្មើរហូតដល់៤០លាននាក់ ។

បើទោះជាចិនធ្លាប់បានប្រើប្រាស់ឆ្កែនាំផ្លូវមនុស្សពិការភ្នែកក្តី ប៉ុន្តែនៅប្រទេសមួយចំនួនចាត់ទុកថា វាជារឿងថ្មី ហើយនៅកន្លែងធ្វើការ, ភោជនីយដ្ឋាន និងទីសាធារណៈរបស់ប្រទេសទាំងនេះពុំអាចប្រើប្រាស់ឆ្កែនាំផ្លូវទេ ដោយសារបារម្ភពីភាពកខ្វក់របស់សត្វចិញ្ចឹម ។ ហេតុនេះ ការផលិតឆ្កែយន្តនាំផ្លូវមនុស្សពិការភ្នែកនឹងអាចជួយដោះស្រាយបញ្ហាទាំងអស់ ។

ក្រុមអ្នកផលិតឆ្កែយន្តនិយាយថា ពួកគេនឹងផលិតឆ្កែយន្តនាំផ្លូវមនុស្សពិការភ្នែកឱ្យបានច្រើនគ្រឿងសម្រាប់ប្រើប្រាស់នៅប្រទេសចិនផង និងលក់ទៅក្រៅប្រទេសផង ។ ហេតុនេះ វានឹងជួយសម្រួលដល់ការធ្វើដំណើរតាមផ្លូវរបស់មនុស្សពិការភ្នែកបានមួយកម្រិត ដោយពុំចាំបាច់ពឹងលើសត្វឆ្កែពិតប្រាកដ ៕