បឹងកន្សែង ដែលជាបឹងធម្មជាតិមួយស្ថិតនៅចំកណ្តាលបេះដូងនៃខេត្តរតនគិរី និងជាតំបន់រមណីយដ្ឋានទេសចរណ៍ដ៏មានសក្តានុពលបំផុតមួយក្នុងខេត្តភាគឦសានមួយនេះ។ យ៉ាងណាមិញថ្មីៗនេះ សមិទ្ធិផលថ្មីបន្ថែមមួយទៀតក៏បានលេចចេញមកនៅមាត់បឹងកន្សែងនេះ ដើម្បីត្រៀមស្វាគមន៍ភ្ញៀវទេសចរជាតិ-អន្តរជាតិ។

រូបសំណាក់គ្រួសារសត្វដំរី ដែលរួមមានដំរីចំនួន៣ ក្បាល គឺដំរីឈ្មោល១ ដំរីញី១ និងកូនដំរី១ បានដាក់បង្ហាញទៅកាន់សារធារណៈជនទូទៅនៅទីតាំងខាងត្បូងមាត់បឹងកន្សែង ដើម្បីជាការបន្ថែមនូវសោភ័ណ្ឌភាព និងជានិមិត្តរូបដ៏មានន័យ។

កាលពីថ្ងៃទី៩ ខែកញ្ញា បើយោងតាមការដាក់បង្ហោះរបស់ ឯកឧត្តម ញ៉ែម សំអឿន អភិបាលខេត្តរតនគិរីបានគូសបញ្ជាក់ថា«សមិទ្ធិផលថ្មីបន្ថែមទៀតនាមាត់បឹងកន្សែង ។ ការរៀបចំលើកដាក់គ្រួសារដំរីលើទីតាំងនៅវេលាម៉ោង ៩ ,៩ នាទី និង ៩ វិនាទី នាថ្ងៃទី៩ ខែ៩ ត្រូវនឹងថ្ងៃច័ន្ទ ៧កើត ។ អត្ថន័យគ្រួសារដំរី និងពេលវេលាដែលបានលើកដាក់នៅកន្លែងបញ្ជាក់អំពីៈ សុខដុមរម្យនីយ៌ ត្រជាក់ត្រជុំ ជួបជុំ សុខសាន្ត ថ្កុំថ្កើង រុងរឿង ដែលនឹងជូនពរដល់បងប្អូន ក្រុមគ្រួសារ សង្គមជាតិ ប្រទេសជាតិ ឲ្យកាន់តែរីកចម្រើនក្រោមម្លប់នៃសន្តិភាព!»។

គួរបញ្ជាក់ថា បឹងកន្សែង ដែលមានទីតាំងស្ថិតនៅក្នុងទឹកដីនៃភូមិអូរកន្សែង សង្កាត់បឹងកន្សែង មានចម្ងាយប្រមាណជាង ១គីឡូម៉ែត្រពីក្រុងបានលុង ខេត្តរតនគិរី ។ បឹងធម្មជាតិដ៏ស្រស់ត្រកាលមួយនេះត្រូវបានអ្នករស់នៅក្នុងខេត្តរតនគិរីភាគច្រើនប្រាប់ឱ្យដឹងថា ក្នុងសម័យអតីតកាល នៅតំបន់មាត់បឹងកន្សែង សំបូរទៅដោយរុក្ខជាតិជាច្រើនប្រភេទដុះមានផ្ការីកចោលក្លិនក្រអូបឈ្ងុយឈ្ងប់ ហើយនៅក្នុងផ្ទៃបឹងវិញមានផ្ទៃទឹកថ្លាឈ្វេងមានដុះប្រមូលផ្ដុំដោយសារាយ និងព្រលិតជាដើមមានផ្ការីករហង់។

យ៉ាងណាមិញ បច្ចុប្បន្ននេះ បឹងកន្សែងបានក្លាយជាកន្លែងដែលមានបរិស្ថានស្អាត សោភណ្ឌភាពល្អ និងជារមណីយដ្ឋានល្អឯកប្រកបដោយភាពទាក់ទាញ បន្ទាប់ពីឯកឧត្តមអភិបាលខេត្ត បានដាក់ចេញគម្រោងរៀបចំកែលម្អជុំវិញបរិវេណរមណីដ្ឋានបឹងដ៏ស្រស់ស្អាតនេះឡើងវិញដោយកែលម្អ ហេដ្ឋារចនាសម្ព័ន្ធជុំវិញបរិវេណមាត់បឹង រៀបចំសួនច្បារ និងបំពាក់ភ្លើងបំភ្លឺសាធារណៈ សាងសង់រូបសំណាក់គ្រួសារដំរី រូបសំណាកសត្វអកញីឈ្មោល១គូ ដែលជាសត្វបក្សី រំលេចក្នុងបទចម្រៀងអធិរាជាសម្លេងមាស (អកបឹងកន្សែង) ,ការរៀបចំដាក់ឧបករណ៍ហាត់ប្រាណ និងឧបករណ៍សម្រាប់ក្មេង ជិះលេងតាមមាត់បឹង ការសាងសង់បង្គន់អនាម័យសាធារណៈជាបន្តបន្ទាប់ជាដើមផងដែរ៕

ថ្មីៗនេះ នៅលើបណ្តាញសង្គមគឺមានការជជែកវែកញែកគ្នាយ៉ាងក្តៅគគុកពាក់ព័ន្ធនឹងរឿងថ្មមួយដុំ ដែលគូសបញ្ជាក់ថាជា«សមិទ្ធផលថ្មី នៃស្រុករមាសហែក ខេត្តស្វាយរៀង»។ យ៉ាងណាមិញ ការគូសបញ្ជាក់ថ្មីមួយបានឲ្យដឹងថា ថ្មមួយដុំនេះគឺមានឈ្មោះថា សិលាសុខសិរី ឬសិលារួបរួមសុខសប្បាយ ដែលនឹងត្រូវឆ្លាក់ចេញជារូបសត្វរមាស។

កាលពីថ្ងៃទី ១០ ខែកញ្ញា ឆ្នាំ២០២៤នេះ រដ្ឋបាលស្រុករមាសហែក បានចេញលិខិតមួយដែលបានគូសបញ្ជាក់យ៉ាងច្បាស់ៗថា«ការដាក់តម្កល់ថ្មនេះ រដ្ឋបាលស្រុកបានគិតគូររកជាងមកវាស់វែងរួចហើយ ដើម្បីកែលម្អឆ្លាក់ជារូបសត្វរមាស តំណាងឱ្យស្រុករមាសហែក និងសរសេរអក្សរ ទី១ ការអនុវត្តគោលនយោបាយភូមិឃុំសង្កាត់ មានសុវត្ថិភាព និង ទី២ ប្រវត្តិថ្មសិលាសុខសិរី ផងដែរ គឺដើម្បីនាំមកនូវភាពត្រជាក់ត្រជុំ សុខសប្បាយជូនបងប្អូនគ្រប់រូប និងគ្រប់ក្រុមគ្រួសារ។

គួរបញ្ជាក់ថា បច្ចុប្បន្ន ថ្មមួយដុំនេះ ត្រូវបានយកមកដាក់តាំងបង្ហាញ ស្ថិតនៅផ្លូវបំបែកជាបួនក្បែរសាលាស្រុករមាសហែក មិនទាន់ឆ្លាក់ចេញជារូបរាងនៅឡើយនោះទេ។ ថ្មនេះទៀតសោត បាននាំយកមកពីកំពូលភ្នំជុំសែនរីករាយ ស្ថិតនៅកម្ពស់ជាង៧០០ម៉ែត្រ ដែលជាអំណោយដ៏ថ្លៃថ្លារបស់ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការ រងកងយោធពលភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងារចុះមូលដ្ឋានស្រុករមាសហែក៕

ភ្ញៀវទេសចរភាគច្រើន ដែលបានទៅកម្សាន្តនៅភ្នំប្រសិទ្ធ តែងមើលរំលងប្រាសាទស្រីគ្រប់លក្ខណ៍ និងអ្នកខ្លះទៀតប្រហែលជាមិនដឹងថាមានប្រាសាទនេះនៅលើភ្នំប្រសិទ្ធផង។

ប្រាសាទស្រីគ្រប់លក្ខណ៍ ជាប្រាសាទបុរាណមួយ កសាងឡើងរវាងសតវត្សរ៍ទី៧ និងទី៨ ក្នុងរជ្ជកាលរបស់ព្រះបាទជ័យវរ្ម័នទី១ (ឆ្នាំ៦៥៥-៦៨១ នៃគ្រិស្តរាជ) នាសម័យចេនឡា ស្ថិតនៅចង្កេះភ្នំប្រសិទ្ធិ។

ប្រាសាទនេះ មានក្បាច់រចនាល្អប្រណិត បែរមុខទៅទិសខាងកើត មានទ្វារបញ្ឆោត៣ទិស និងស៊ុមទ្វារមានរចនា ក្បាច់វិមានអាកាស។

ចំពោះឈ្មោះប្រាសាទនេះ ត្រូវបានដូនតាតែងហៅតៗគ្នារហូតមកដោយពុំដឹងប្រភពច្បាស់នោះទេ តែនៅក្នុងសៀវភៅប្រវត្តិសាស្ត្រខ្លះលើកឡើងថា ឈ្មោះប្រាសាទនេះយកតាមរូបសំណាក ប្រតិមាទេវី ទេពស្រីគ្រប់លក្ខណ៍ដែលមាននៅទីនោះ។

បច្ចុប្បន្ន ប្រាសាទស្រីគ្រប់លក្ខណ៍ហាក់មានការទ្រុឌទ្រោម និងបែកបាកើស្ទើរតែទាំងស្រុង ដែលជាហេតុមិនសូវមានភ្ញៀវទេសចរចាប់អារម្មណ៍ទៅកម្សាន្ត៕

កាលពីខែសីហា ឆ្នាំ២០២៣ នារីជាជនបរទេសម្នាក់ឈ្មោះ Jessica បានពោលសរសើរប្រទេសកម្ពុជាមិនដាច់ពីមាត់ និងសន្យាជួយប្រូម៉ូតឱ្យទេសចរមកកម្សាន្តឱ្យបានច្រើនបន្ទាប់ពីទេសចរមួយចំនួនមើលរំលងទៅលេងប្រទេសក្បែរខាងកម្ពុជា។ ជាប់ចិត្តនឹងប្រទេសកម្ពុជានិងមានបំណងមកកម្សាន្តសាជាថ្មី ពេលនេះ Jessica បានបង្ហោះវីដេអូខិតខំរៀននិយាយភាសាខ្មែរបើទោះបីជាមានភាពលំបាកសម្រាប់នាងយ៉ាងណាក្តី។

កាលពីពេលថ្មីៗនេះ Jessica ដែលមានគណនីទិកតុកឈ្មោះថា Callheroppa ជាអ្នកអាម៉េរិកផ្លាស់ទៅរស់នៅប្រទេសកូរ៉េ បានបង្ហោះវីដេអូមួយដោយដាក់ចំណងជើងថា « learn khmer with me! »។ នៅក្នុងវីដេអូរបស់នារីដ៏ស្រស់សោភា រូបនេះបានរៀបពីការដោនឡូតអេបដើម្បីសិក្សាភាសាខ្មែរដែលប្រើប្រាស់នៅក្នុងប្រទេសកម្ពុជា។

ពាក្យដែល Jessica រៀនគឺពាក្យ សួស្តីអ្នកទាំងអស់គ្នាហើយនាងបានដឹងថាពាក្យថា សួស្តី ដែលមានអត្ថន័យស្មើនឹងពាក្យអង់គ្លេស Hello ហើយក៏ដឹងភាសាផ្លូវការពាក្យនេះថា «ជម្រាបសួរ» ផងដែរ។

ពាក្យដែល Jessica រៀនទៀតនោះគឺ «ខ្ញុំឈ្មោះ Jessica» និងបាននិយាយប្រយោគពេញទៀតថា ជម្រាបសួរអ្នកទាំងអស់គ្នាខ្ញុំឈ្មោះ Jessica។ ហើយពាក្យដែលនាងរៀនបន្តទៀតគឺពាក្យ «ខ្ញុំស្រលាញ់អ្នក»។

គួរបញ្ជាក់ថា កន្លងមកទេសចរបរទេសនិងជាអ្នកបង្កើតមាតិការូបនេះធ្លាប់បាននិយាយពីប្រទេសកម្ពុជាថា មនុស្សភាគច្រើនដែលមកកម្សាន្តនៅតំបន់អាស៊ីអាគ្នេហ៍ចង់សំដៅទៅប្រទេសវៀតណាម និងថៃ ឬប្រទេសផ្សេងដែលមានសម្រស់ស្រស់ស្អាត ប៉ុន្តែបែរមើលរំលងប្រទេសកម្ពុជាទៅវិញ។

តាមរយៈបទពិសោធរបស់នាងដែលទើបមកពីកម្សាន្តនៅប្រទេសកម្ពុជា Jessica បានឱ្យដឹងថាប្រជាជនកម្ពុជាមានភាពរួសរាយរាក់ទាក់ តំបន់រមណីដ្ឋានអង្គរមានសម្រស់ស្រស់ស្អាតខ្លាំងតាមបែបធម្មជាតិដោយមិនមានការកែច្នៃដូចតំបន់ទេសចរណ៍ដទៃឡើយ។ Jessica ថាភ្ញៀវទេសចរនានាពុំគួររំលងប្រទេសខ្មែរខណៈនាងបានសន្យាថានឹងជួយប្រូម៉ូតពីប្រទេសកម្ពុជាឱ្យបានច្រើនដើម្បីរួមចំណែកឱ្យប្រជាជននៅតំបន់ទេសចរណ៍កាន់តែទទួលបានប្រាក់ចំណូលផ្គត់ផ្គង់នៅក្នុងជីវភាពគ្រួសារ៕

យោងតាមសេចក្តីជូនដំណឹងរបស់ក្រសួងពាណិជ្ជកម្មនៅថ្ងៃទី១១ ខែកញ្ញានេះ បានកំណត់ឱ្យតម្លៃលក់រាយប្រេងឥន្ទនៈ នៅកម្ពុជាចាប់ពីថ្ងៃទី១១ ដល់ថ្ងៃទី២០ ខែកញ្ញា ឆ្នាំ២០២៤ នឹងមានតម្លៃ ៣៩០០ រៀល/លីត្រ សម្រាប់សាំងធម្មតា និង ៣៧៥០ រៀល/លីត្រ សម្រាប់ប្រេងម៉ាស៊ូត។

បើធៀបតម្លៃនេះ ទៅកាលពីថ្ងៃទី០១ ដល់ថ្ងៃទី១០ ខែកញ្ញា ឆ្នាំ២០២៤ កន្លងទៅ មានការខុសគ្នាបន្តិចបន្តួចដោយ៖

• សាំងធម្មតាក្នុងតម្លៃ ៤ ០០០រៀល/លីត្រ (ធៀបថ្ងៃទី១១ ចុះមួយរយរៀល)
• ម៉ាស៊ូតត្រូវលក់ ៣ ៨៥០រៀល/លីត្រ (ធៀបថ្ងៃទី១១ ចុះមួយរយរៀល)