ប្រទេសហ្វីលីពីន ៖ កាលពីថ្ងៃទី២ ខែមករា កន្លងមក មានហេតុការណ៍ដាច់ភ្លើងនៅព្រលានយន្តហោះអន្តរជាតិ Ninoy Aquino ប្រចាំទីក្រុង Manila ប្រទេសហ្វីលីពីន ដែលធ្វើឱ្យប៉ះពាល់ដល់ជើងហោះហើរជាង៣០០ ។ ព្រលានយន្តហោះនេះអាចទទួលយន្តហោះចុះចតបានត្រឹមតែ១៥គ្រឿងប៉ុណ្ណោះក្នុង១ម៉ោង ខណៈពេលធម្មតាទទួលបានដល់ទៅ២០គ្រឿង ។

ហេតុការណ៍នេះ បានធ្វើឱ្យជើងហោះហើរចំនួន៣៦១ជើងត្រូវប្រកាសផ្អាកការហោះហើរជាបណ្តោះអាសន្នសិន ហើយយន្តហោះមួយចំនួនត្រូវប្តូរទៅចុះចតនៅព្រលានយន្តហោះផ្សេងជំនួសវិញ ដែលធ្វើឱ្យប៉ះពាល់ដល់អ្នកដំណើរប្រមាណ៦៥.០០០នាក់ ។

អ្នកតំណាងខាងព្រលានយន្តហោះបានប្រាប់សារព័ត៌មានថា ហេតុការណ៍នេះកើតឡើងដោយសារតែមានបញ្ហាផ្នែកអគ្គិសនី ។ លោកបន្តថា ជាលើកទី១ហើយដែលជួបបញ្ហាបែបនេះ ហើយត្រូវប្រើពេលវេលា៧២ម៉ោងដើម្បីឱ្យគ្រប់យ៉ាងត្រឡប់មកធម្មតាវិញ ។

ទោះជាយ៉ាងណា ការដាច់ភ្លើងលើកនេះ បានធ្វើឱ្យប៉ះពាល់ដល់ប្រព័ន្ធសំខាន់ៗជាច្រើនផ្នែកនៅក្នុងព្រលានយន្តហោះ មិនថាប្រព័ន្ធត្រួតពិនិត្យ ប្រព័ន្ធស្វែងរកទីតាំង រ៉ាដា ប្រព័ន្ធទំនាក់ទំនងការបញ្ជាយន្តហោះ និងអ៊ីនធើរណេត ជាដើម ៕ ប្រភព ៖ TNN World

បរទេស៖ ទីភ្នាក់ងារ Xinhua បានរាយការណ៍ពីទីក្រុង Haikou ប្រទេសចិនកាលពីថ្ងៃទី ១ ខែមករា ឆ្នាំ២០២៣ ថា ឆ្មាំឆ្នេរសមុទ្រនៃខេត្ត Hainan ភាគខាងត្បូងប្រទេសចិន បានរាយការណ៍ពីរបាយការណ៍ស្តីពីកិច្ចសហប្រតិបត្តិការជាមួយការិយាល័យស្រុក Chengmai និងក្រុមហ៊ុន China Power International New Energy Hainan Co., Ltd. ដើម្បីបំផ្លាញ “គ្រាប់ធុញ្ញជាតិ” ដែលរឹបអូសពីករណីរត់ពន្ធទំនិញហាមឃាត់ ដែលបាន រឹបអូស ពីសំណាក់មន្ត្រីនានា និងឆ្មាំឆ្នេរសមុទ្រកន្លងមក។

ជាមួយគ្នានោះរបាយការណ៍បានបញ្ជាក់បន្ថែមដូច្នេះថា “គ្រាប់ធុញ្ញជាតិ”ទាំងនោះបានចែកជា ១២៥ បាវ ទម្ងន់សរុប ៣,៧៨ តោនត្រូវបានកម្ទេចចោលតាមនីតិវិធីដែលច្បាប់បានកំណត់ទុក  រួមជាមួយនឹងការថតរូបភាព ព្រមទាំងសំឡេងទុកជាភស្តុតាង ដើម្បីធានាបាននូវប្រតិបត្តិការប្រកបដោយសុវត្ថិភាព និងហ្មត់ចត់ក្នុងការបំផ្លាញនេះផងដែរ។

ទោះជាយ៉ាងណាឆ្មាំឆ្នេរសមុទ្រ Hainan នឹងបង្កើនការបង្រ្កាបរបស់ខ្លួនលើសកម្មភាពខុសច្បាប់ និង បទល្មើសផ្សេងៗ ជាពិសេសការរត់ពន្ធ ការនាំចេញផលិតផលដែលត្រូវបានហាមឃាត់ ដោយច្បាប់នឹងពង្រីកការអនុវត្តច្បាប់ដែនសមុទ្រប្រកបដោយប្រសិទ្ធភាព បង្កើតបរិយាកាសសមុទ្រប្រកបដោយសុវត្ថិភាព និងរក្សាសណ្តាប់ធ្នាប់នៅលើទីផ្សារក្នុងប្រទេសចិន៕ ប្រភព៖ dailynews

សហរដ្ឋអាមេរិក ៖ មនុស្សជាង៦០នាក់បានជាប់ក្នុងកន្ត្រកវិលស្ថិតនៅសួនកម្សាន្តល្បីឈ្មោះមួយរបស់សហរដ្ឋអាមេរិក ដែលភ្នាក់ងារជួយសង្គ្រោះបាននាំគ្នាឡើងទៅលើកន្ត្រកនោះរំដោះមនុស្សម្នាចេញមក ។

ភ្នាក់ងារជួយសង្គ្រោះបាននាំកម្លាំងទៅជួយសង្គ្រោះមនុស្សចំនួន៦២នាក់ជាប់ក្នុងកន្ត្រកវិលមានកម្ពស់១២២ម៉ែត្រ ស្ថិតនៅសួនកម្សាន្តឈ្មោះ Icon Park ស្ថិតនៅក្រុង Orlando រដ្ឋ Florida សហរដ្ឋអាមេរិក បន្ទាប់ពីកើតហេតុដាច់ភ្លើងកាលពីព្រលប់ថ្ងៃទី៣១ ធ្នូ កន្លងមក ដែលជាថ្ងៃមានមនុស្សម្នាមកលេងកម្សាន្តឆ្លងឆ្នាំ ។

តាមព័ត៌មានរាយការណ៍ថា ភ្នាក់ងារជួយសង្គ្រោះបានប្រើពេលវេលាជាច្រើនម៉ោងឡើងទៅលើកន្ត្រកវិល ដើម្បីជួយអ្នកជាប់ក្នុងនោះឱ្យចេញមកដោយសុវត្ថិភាព និងគ្មានអ្នកណាម្នាក់មានគ្រោះថ្នាក់ទេ ។

កន្ត្រកវិលចាត់ទុកជាគ្រឿងកម្សាន្តពេញនិយមមួយដែលបណ្តាអ្នកចូលមកសួនកម្សាន្ត Icon Park នាំគ្នាមកតម្រង់ជួររង់ចាំ ។ នៅពេលឡើងទៅដល់កំពូលខាងលើ យើងនឹងអាចមើលឃើញទេសភាពនៅជុំវិញដ៏ស្រស់ស្អាត ហើយតម្លៃក្នុងម្នាក់គឺ២៨,៩៩ដុល្លារអាមេរិក ។

ទោះជាយ៉ាងណា សួនកម្សាន្ត Icon Park មិនមែនទើបតែកើតហេតុលើកនេះទេ កាលពីឆ្នាំ២០១៥កន្លងមក គ្រាន់តែសួនកម្សាន្តនេះបើកឱ្យភ្ញៀវចូលលេងកម្សាន្តមិនបានប៉ុន្មានខែផង ក៏កើតហេតុការណ៍ខុសបច្ចេកទេសធ្វើឱ្យភ្ញៀវជាប់នៅលើកន្ត្រកវិលជាច្រើនម៉ោងផងដែរ ៕

ប្រភព ៖ TNN World

រដ្ឋធានីប៊ែរឡាំង៖ ក្រោយពេលប្រធានាធិបតី លោក វ៉្លាឌីមៀ ពូទីន (Vladimir Putin) បានចេញក្រឹត្យមួយ ដាក់បម្រាម ដល់ការលក់ប្រេងទៅកាន់ប្រទេសណាមួយ ធ្វើតាមក្រុមប្រទេស G7 ដោយបានកំណត់តម្លៃប្រេងរបស់ក្រុងមូស្គូ ត្រឹមតែ៦០ដុល្លារនោះមក ប្រទេសអាល្លឺម៉ង់ បានសម្រេចបញ្ឈប់នូវការនាំចូលប្រេងរបស់រុស្ស៊ី តាមបំពង់បង្ហូរប្រេង ខណៈចក្រភពអង់គ្លេស ក៏បានបញ្ឈប់នូវការទិញឧស្ម័នរបស់រុស្ស៊ី ក្រោមហេតុផលដូចគ្នា។

គេហទំព័រ Oil Price បានចេញផ្សាយ កាលពីថ្ងៃចន្ទ ទី២ ខែមករា ថា ប្រទេសអាល្លឺម៉ង់ កាលពីថ្ងៃទី១ ខែមករា បានផ្អាកនូវការនាំចូលប្រេង តាមបំពង់បង្ហូរពីប្រទេសរុស្ស៊ី។ ការសម្រេចចិត្តរបស់ក្រុងប៊ែរឡាំង បានធ្វើឡើង តាមការសន្យាពីមុន ដើម្បីបញ្ឈប់ការទិញប្រេងឆៅ តាមបំពង់បង្ហូរប្រេងរបស់រុស្ស៊ី ថ្វីបើការហាមឃាត់របស់សហភាពអឺរ៉ុប មានការលើកលែងនូវការទិញប្រេង តាមបំពង់បង្ហូរ ពីប្រទេសរុស្ស៊ី មកកាន់តំបន់អឺរ៉ុប យ៉ាងក៏ដោយ។

សហភាពអឺរ៉ុប ហាមឃាត់ដល់ការនាំចូលប្រេងឆៅរបស់រុស្ស៊ី ដឹកចូលតាមច្រកសមុទ្រ ត្រូវបានចូលជាធរមាន កាលពីថ្ងៃទី៥ ខែធ្នូ ឆ្នាំ២០២២។ ប៉ុន្ដែបម្រាមនេះ មានការលើកលែងនូវការនាំចូលប្រេងរបស់រុស្ស៊ី តាមបំពង់បង្ហូរប្រេង ទៅកាន់បណ្ដារដ្ឋជាសមាជិក នៃសហភាពអឺរ៉ុប។

ទោះជាយ៉ាងណាក៏ដោយ អាល្លឺម៉ង់ និង ប៉ូឡូញ បានបញ្ជាក់ ថា ប្រទេសអឺរ៉ុបទាំងនេះ នឹងបញ្ឈប់នូវការនាំចូលប្រេងឆៅ មកពីប្រទេសរុស្ស៊ី តាមរយៈបំពង់បង្ហូរប្រេងឌ្រូសបា (Druzhba) ចាប់ពីថ្ងៃទី១ ខែមករា ឆ្នាំ២០២៣នេះតទៅ។

បើតាមទីភ្នាក់ងារសារព័ត៌មានរបស់អាល្លឺម៉ង់ DPA បានផ្សាយ ថា ការផ្អាកនូវការនាំចូលប្រេងតាមបំពង់បង្ហូរប្រេងនេះ នឹងធ្វើឲ្យប៉ះពាល់ ដល់រោងចក្រចម្រាញ់ប្រេងនានា នៅក្នុងទីក្រុង Schwedt រដ្ឋប្រេនដែនប៊ឺគ (Bradenburg) និង ទីក្រុងលូណា (Leuna) រដ្ឋសាកសូនីអានហាល (Saxony-Anhatl) នាភាគខាងកើត ប្រទេសអាល្លឺម៉ង់។ ប៉ុន្ដែរដ្ឋាភិបាលក្រុងប៊ែរឡាំង បានបញ្ជាក់ ថា ជំនួសការផ្គត់ផ្គង់ ដល់រោងចក្រចម្រាញ់ប្រេងទាំងនោះ នឹងត្រូវទិញយក។

រដ្ឋាភិបាលអាល្លឺម៉ង់ បានដាក់អាជីវកម្មក្នុងប្រទេស សម្រាប់ក្រុមហ៊ុនប្រេងយក្ស Rosneft របស់រុស្ស៊ី ឱ្យស្ថិតក្រោមការធានា នៅក្នុងខែកញ្ញា ដោយប្រគល់នូវការគ្រប់គ្រង លើរោងចក្រចម្រាញ់ Schwedt ទៅឱ្យនិយតករទីផ្សារថាមពលរបស់ប្រទេស។ រោងចក្រ Schwedt នេះ ក្លាយជារោងចក្រចម្រាញ់ប្រេងដ៏ធំជាងគេលំដាប់លេខ៤ នៅក្នុងប្រទេសអាល្លឺម៉ង់ ហើយត្រូវបានគ្រប់គ្រង រហូតដល់៥៤ភាគរយ ដោយក្រុមហ៊ុនប្រេងរដ្ឋរបស់រុស្ស៊ី។ រោងចក្រចម្រាញ់ប្រេងមួយនេះ បានទទួលប្រេងឆៅ តាមបំពង់បង្ហូរប្រេង Druzhba ហើយបានផ្គត់ផ្គង់ប្រេងឥន្ធនៈ រហូតដល់៩០ភាគរយ នៅក្នុងរដ្ឋធានីប៊ែរឡាំង។

ស្របគ្នានេះដែរ ចក្រភពអង់គ្លេស បានប្រកាសជាផ្លូវការ ថា ក្រុងឡុងដ៍ បញ្ឈប់នូវការនាំចូលឧស្ម័ន (LNG) មកពីប្រទេសរុស្ស៊ី។ ការិយាល័យកិច្ចការបរទេសរបស់ចក្រភពអង់គ្លេស បានចាត់ទុកនូវការទិញឧស្ម័នទាំងនេះ នឹងផ្ដល់ប្រាក់ចំណូល សម្រាប់ផ្គត់ផ្គង់ហិរញ្ញវត្ថុ ជួយដល់សង្គ្រាមរបស់រុស្ស៊ី ដែលកំពុងតែបន្ដ នៅក្នុងប្រទេសអ៊ុយក្រែន។

ការិយាល័យកិច្ចការបរទេសរបស់ចក្រភពអង់គ្លេស បានបញ្ជាក់ នៅក្នុងបណ្ដាញសង្គម Tweet ថា «ថ្ងៃនេះ ចក្រភពអង់គ្លេស បានបញ្ចប់នូវការនាំចូលឧស្ម័ន មកពីប្រទេសរុស្ស៊ី ទាំងស្រុង។ យើងកំពុងតែកាត់ផ្ដាច់នូវមូលនិធិ ចេញពីលោក ពូទីន សម្រាប់យកលុយទៅផ្គត់ផ្គង់ដល់សង្គ្រាមរបស់គាត់ ហើយយើងក៏កំពុងតែគាំទ្រដល់បណ្ដាប្រទេសនានា នៅជុំវិញពិភពលោក ត្រូវតែកាត់បន្ថយនូវការពឹងផ្អែករបស់ពួកគេ ទៅលើប្រេង និង ឧស្ម័នរបស់រុស្ស៊ី»។

បច្ចុប្បន្ន សហរដ្ឋអាមេរិក ក្លាយជាអ្នកផ្គត់ផ្គង់ឧស្ម័ន (LNG) ដ៏ធំជាងគេបំផុត ដល់ចក្រភពអង់គ្លេស និង បណ្ដាប្រទេសផ្សេងៗទៀត នៅតំបន់អឺរ៉ុប។ អឺរ៉ុប បានខិតខំប្រឹងប្រែងយ៉ាងលំបាក សម្រាប់ការផ្តាច់ខ្លួន ចេញពីការទំនិញថាមពលរបស់រុស្ស៊ី ចាប់តាំងពីការឈ្លានពានរបស់ក្រុងមូស្គូ នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។ សហភាពអឺរ៉ុប បានហាមឃាត់ធ្យូងថ្មរបស់រុស្ស៊ី ហើយគ្រោងនឹងរារាំង ដល់ការនាំចូលប្រេង មកពីរុស្ស៊ី ភាគច្រើន នៅចុងឆ្នាំ២០២២ ដោយមានគោលបំណង ដកហូតប្រភពប្រាក់ចំណូលដ៏សំខាន់ ចេញពីក្រុងមូស្គូ យកទៅធ្វើសង្គ្រាម នៅក្នុងអ៊ុយក្រែន។

បើតាមសារព័ត៌មាន The Wall Street Journal បានរាយការណ៍ ថា ការនាំចូលឧស្ម័នរបស់រុស្ស៊ីរបស់ប្លុកសេរីមួយនេះ កើនឡើង ដល់៤១ភាគរយ នៅក្នុងឆ្នាំនេះ រហូតដល់ខែសីហា៕

ប្រទេសវៀតណាម៖ ក្រុមអ្នកជួយសង្គ្រោះនៅប្រទេសវៀតណាម កំពុងព្យាយាមជួយសង្គ្រោះក្មេងប្រុសអាយុ ១០ ឆ្នាំម្នាក់ បន្ទាប់ពីគេបានធ្លាក់ចូលទៅក្នុងរណ្តៅបេតុងនៅឯការដ្ឋានសំណង់មួយនៅភាគខាងត្បូងប្រទេសវៀតណាម។

ឧប្បត្តិហេតុនេះបានកើតឡើងនៅព្រឹកថ្ងៃសៅរ៍ ទី៣១ ធ្នូ ឆ្នាំ២០២២ នៅពេលដែល Li Hao Nam អាយុ ១០ ឆ្នាំ រួមនឹងមិត្តភ័ក្តិបីនាក់កំពុងស្វែងរកដែកអេតចាយនៅឯការដ្ឋានសាងសង់ស្ពាន Roxen  នៅក្នុងស្រុក Than Binh ខេត្តដុងថាប មុនពេលធ្លាក់ចូលទៅក្នុងរណ្តៅបេតុងតូចចង្អៀត ដែលមានទទឹងត្រឹមតែ ២៥ សង់ទីម៉ែត្រ ជម្រៅប្រហែល ៣៥ ម៉ែត្រ ហើយបានជាប់គាំងនៅក្នុងនោះ។

ជាមួយគ្នានោះអាជ្ញាធរបាននិយាយថាក្មេងប្រុសម្នាក់នេះបានស្រែករកជំនួយបន្ទាប់ពីធ្លាក់ចូលក្នុងរណ្ដៅកាលពីថ្ងៃសៅ ប៉ុន្តែស្ថានភាពគួរឱ្យបារម្ភដោយនៅថ្ងៃច័ន្ទនេះ មិនមានការឆ្លើយតបណាមួយពីក្មេងប្រុសនោះទេ ខណៈដែលគេបានព្យាយាមយកកាមេរ៉ាដើម្បីកំណត់ទីតាំងគាត់នៅក្នុងរណ្តៅសសរបេតុងនោះ។

ទោះជាយ៉ាងណាពេញមួយយប់នៅថ្ងៃទី ២ និងថ្ងៃទី ៣ ខែមករា ឆ្នាំ២០២៣នេះ អ្នកជួយសង្គ្រោះប្រហែល ៣៥០ នាក់ត្រូវបានបែងចែកទៅជាក្រុមជាច្រើនដើម្បីធ្វើការជាបន្តបន្ទាប់ជួយសង្គ្រោះ ហើយនៅម៉ោងប្រហែល ៣ ទៀបភ្លឺថ្ងៃនេះ ក្រុមអ្នកជួយសង្គ្រោះបានប្រើប្រាស់បំពង់ដែកអង្កត់ផ្ចិត ១.៥ ម៉ែត្រ ដើម្បីបិទបាំងរន្ធដែលក្មេងប្រុសធ្លាក់ពីលើសសរបេតុងបន្ទាប់មកជីក និងជីកដីតាមរន្ធសសរបេតុង រួចលើករន្ធសសរបេតុងបន្តិចម្តងៗឡើង។

ទន្ទឹមនឹងនោះក្រុមអ្នកជួយសង្គ្រោះបាននិយាយថា គ្មាននរណាម្នាក់នឹកស្មានដល់ថាក្មេងប្រុសនោះអាចជាប់ក្នុងបង្គោលភ្លើងយ៉ាងជ្រៅនោះទេ ព្រោះចន្លោះខាងក្នុងគឺត្រឹមទទឹងបាតដៃរបស់មនុស្ស ពេញវ័យប៉ុណ្ណោះ។

ហើយបច្ចុប្បន្ន អាក្រុមអ្នកជួយសង្គ្រោះកំពុងព្យាយាម និងដុតដៃដុតជើង ព្រមទាំងប្រើឧបករណ៍ទំនើបៗដែលមាន និងប្រឹងប្រែងឱ្យអស់ពីសមត្ថភាពដើម្បីស្វែងរកវិធីសាស្ត្រសង្គ្រោះដ៏ល្អបំផុតក្នុងការជួយសង្គ្រោះក្មេងប្រុសនោះ៕ ប្រភព៖ Thairath

រាជធានីអូតតាវ៉ា (Ottawa)៖ ដោយសារសង្គ្រាមកំពុងតែបន្ដ និង មានគំនិតគិតគូរ អំពីសុវត្ថិភាពអាយុជីវិតរបស់កងទ័ពអ៊ុយក្រែន កំពុងតែធ្វើសង្គ្រាម ការពារទឹកដី និង សេរីភាពរបស់ពួកគេ ទើបក្រុមហ៊ុនផលិតរថចម្បាំងរ៉ូសែល (Roshel) របស់កាណាដា បានបញ្ជូនរថយន្ដដឹកទ័ពពាសដែក ប្រកបដោយបច្ចេកវិទ្យាជាន់ខ្ពស់ ជាង១០០គ្រឿង ទៅឲ្យកងទ័ព នៅក្នុងប្រទេសអឺរ៉ុបខាងកើតមួយនេះ។

សារព័ត៌មាន Defense បានចេញផ្សាយ កាលពីព្រឹក ថ្ងៃអង្គារ ទី៣ ខែមករា ថា រថយន្ដដឹកកងទ័ពពាសដែកក្រោះ ជាង១០០គ្រឿង កំពុងតែបញ្ជូនទៅកាន់ប្រទេសអ៊ុយក្រែន។ នេះជាផ្នែកមួយ នៃជំនួយយោធារបស់ក្រុងអូតតាវ៉ា សម្រាប់ក្រុងកៀវ និង ជាកិច្ចគាំទ្រ ជួយដល់ប្រទេសអឺរ៉ុបខាងកើត ដែលកំពុងតែហែកហួរ ដោយសារសង្រ្គាមរបស់ក្រុងមូស្គូ អស់រយៈពេល៣១៤ថ្ងៃ គិតត្រឹម ថ្ងៃទី១ ខែមករា។

តំណាងជាន់ខ្ពស់របស់ក្រុមហ៊ុនផលិតរថចម្បាំងរបស់កាណាដា បានបញ្ជាក់ ថា «ក្រុមហ៊ុន Roshel បានបញ្ជូនយានយន្ដពាសដែកក្រោះដឹកកងទ័ព ជាង១០០គ្រឿង ទៅកាន់ប្រទេសអ៊ុយក្រែន។ រហូតមកដល់ពេលនេះ ក្រុមហ៊ុន បានបញ្ជូនរថយន្ដប្រភេទនេះ ជាង៣០០គ្រឿង ទៅជួយដល់ប្រទេសអ៊ុយក្រែន សម្រាប់ប្រើប្រាស់ នៅក្នុងចម្បាំងនេះ។

រថយន្ដ Senator នេះ ជាប្រភេទយានយន្ដពាសដែកក្រោះដឹកកងទ័ព ទើបនឹងបង្កើតថ្មី ត្រូវបានដាក់ឲ្យដំណើរការ ជាលើកដំបូង នៅក្នុងអំឡុងឆ្នាំ២០១៨។ រថយន្ដដឹកកងទ័ព ប្រភេទនេះ ត្រូវបានរចនាឡើង សម្រាប់ការអនុវត្តច្បាប់ និង ការប្រើប្រាស់ សម្រាប់ល្បាត នៅតាមព្រំដែន។

កងទ័ពការពារទឹកដីរបស់អ៊ុយក្រែន បានប្រើប្រាស់រថយន្តទាំងនេះយ៉ាងសកម្ម នៅក្នុងអំឡុងការវាយលុករបស់កម្លាំងទាហានរបស់រុស្ស៊ី នៅភាគខាងកើត និង ភាគខាងត្បូង ប្រទេស។ លើសពីនេះ រថពាសដែកមួយឈុត ត្រូវបានប្រគល់ទៅឱ្យកងទ័ពការពារព្រំដែន ដើម្បីធានាដល់សន្តិសុខ នៅតាមព្រំដែនរបស់អ៊ុយក្រែន ជាប់ជាមួយនឹងបេឡារុស ដែលជាសម្ពន្ធមិត្តដ៏ជិតស្និទ្ធបំផុតរបស់ក្រុងមូស្គូ។

ក្រុមហ៊ុន Roshel បានបញ្ជាក់ទៀត ថា តួរថយន្ត ប្រភេទនេះ ត្រូវបានរចនាឡើងយ៉ាងពិសេស សម្រាប់បញ្ចូលនូវសម្ភារៈការពារកម្ដៅ និង សំឡេងរំខានកម្រិតខ្ពស់ និង ផាសុភាពដល់អ្នកប្រើប្រាស់វា។ រថយន្តនេះ ក៏បានបំពាក់ម៉ាស៊ីនត្រជាក់យ៉ាងល្អបំផុត សម្រាប់ការប្រើប្រាស់ ប្រកបដោយផាសុកភាព នៅក្នុងបរិយាកាសដ៏អាក្រក់បំផុត។

រថយន្ដ ប្រភេទ Senator នេះ បានពាសដែក នៅតាមបរិវេណកន្លែងរបស់អ្នកជិះ និង កន្លែងដាក់ម៉ាស៊ីន។ លើសពីនេះទៅទៀត រថយន្ដស៊េរីនេះ ក៏ត្រូវបានរចនាឡើង ដើម្បីផ្តល់កិច្ចការពារ រហូតដល់កម្រិតគ្រាប់ផ្លោង CEN B7។ ប៉ុន្តែគ្រឿងសឹករបស់រថយន្ដ ប្រភេទនេះ ធន់នឹងផលប៉ះពាល់ខ្លាំង។ ចំណែកផ្នែកខាងក្រោមរបស់រថយន្ដ ត្រូវបានបំពាក់ជាមួយនឹងដែកក្រោះការពារគ្រឿងបំផ្ទុះ សម្រាប់ការពារដល់អ្នកបើកបរ នៅក្នុងករណីមានការបំផ្ទុះគ្រាប់ នៅក្នុងពេលដំណាលគ្នា ឬ គ្រាប់មីនធុនស្រាល សម្រាប់ប្រឆាំងនឹងមនុស្ស៕