វីដេអូក្នុងខ្សែភាពយន្តខ្មែរពីដើមត្រង់ចំណុចសំឡេងទ្រត្រូវបានអ្នកជិតខាងរអ៊ូថាថ្លង់ដេកពួនបានក្លាយជាប្រធានបទនៅលើបណ្តាញសង្គមយកបកបង្ហោះឡើងវិញដែលបែងចែកសំឡេងរំខានក្នុងផ្សេងប្លែកពីគ្នាតាមសម័យកាល។ ទោះយ៉ាងណា ការយកឧបករណ៍ភ្លេងបុរាណខ្មែរទ្រនេះយកមកលេងសើច តារាចម្រៀងដ៏មានឈ្មោះបោះសំឡេងអ្នកនាង ម៉េង កែវ ពេជ្ជតា បង្ហាញការមិនពេញចិត្តការលេងសើចរបៀបនេះនិងបានស្នើសុំខាងក្រសួងវប្បធម៌ និងវិចិត្រសិល្បៈ រួមទាំងក្រសួងពាក់ព័ន្ធនានាជួយបញ្ឈប់សកម្មភាពលេងសើចខុសទំនង។

នៅយប់ថ្ងៃទី៩ កញ្ញា អ្នកនាង ម៉េង កែវពេជ្ជតា ដែលកំពុងល្បីបទ «ពេលណាបងមករកអូន » ជាមួយព្រីន បានរៀបរាប់លើបណ្តាញសង្គមយ៉ាងដូច្នេះថា «ប៉ុន្មានថ្ងៃនេះខ្ញុំមើលឃើញថា មានការលើកយកសម្លេងទ្រ មក Bully លេងសើចយ៉ាងសម្បើម។ នេះក៏ដោយសារមានការបង្ហោះឈុតមួយនៃវីដេអូរឿងខ្មែរដែលនិយាយថាថ្លង់សម្លេងទ្ររកដេកពួនមិនបាន។ តាមរយៈវីដេអូឈុតខ្លី និងសម្តីក្នុង Comments អ្នកខ្លះបានប្រើពាក្យចំអកបន្ទាបបន្ថោកតម្លៃ ទ្រ ដែលជាឧបករណ៍ភ្លេងបុរាណខ្មែរដ៏ចំណាស់នេះយ៉ាងខ្លាំងរហូតអ្នកខ្លះហ៊ានប្រដូចទៅនឹងរូបភាពក្នុងន័យមិនល្អទៀតផង។ កាយវិការទាំងនេះ បានធ្វើឱ្យប៉ះពាល់ដល់តម្លៃនៃឧបករណ៍តន្ត្រីបុរាណខ្មែរផង និងប៉ះពាល់ដល់ទឹកចិត្តសតិអារម្មណ៍របស់លោកគ្រូ អ្នកគ្រូ តន្ត្រីករ( អ្នកលេងភ្លេងបុរាណ លេងទ្រ ) ផង។ ការលេងសើចនេះដែរក៏អាចបញ្ជាក់ពីកម្រិតយល់ដឹង ការគោរព និងភាពជាតិសាសន៍វប្បធម៌និយមរបស់មនុស្សមួយចំនួននៅមានកម្រិតទាបគួរឱ្យបារម្ភ។ សោកស្តាយដែលខ្លួនជាខ្មែរតែមិនស្គាល់អ្វីជារបស់ខ្មែរខ្លួនឯង «មានរបស់មិនចេះថែប៉ុន្តែចូលចិត្តឡាំប៉ានៅពេលគេយកទៅបាត់»។

តារាចម្រៀងជើងចាស់ទឹកដមសំឡេងក្រអួនក្រអៅរូបនេះបានបន្តទៀតថា «ដំបូងខ្ញុំខំទប់ចិត្តអូសរំលងធ្វើមើលមិនឃើញដែរ ប៉ុន្តែមិនអាចធ្វើចិត្តបានសោះ ព្រោះទោះជាបិទភ្នែកយ៉ាងណាក៏ខ្ញុំជាខ្មែរ លោកឪពុករបស់ខ្ញុំជាស្តេចទ្រសោរបស់ប្រទេសខ្មែរ ម្តាយខ្ញុំ រូបខ្ញុំ បងប្អូនខ្ញុំជាសិល្បការិនីចម្រៀងអាយ៉ៃ សម័យ បុរាណ ភ្លេងការ មហោរីយីកេបាសាក់ ។ ល ។ ដូច្នេះបើខ្ញុំមិនអើពើទេ គឺខ្ញុំមិនគប្បីឡើយ ទើបក្នុងពេលនេះ ខ្ញុំដាច់ចិត្តលើកដៃសំពះអង្វរដោយទទូចចំពោះបងប្អូនដែលយក ទ្រ មក Bully ក្នុងបណ្តាញសង្គមមួយចំនួននេះ ក៏ដូចជាសំណូមពរទៅកាន់ក្រសួងវប្បធម៌និងវិចិត្រសិល្បៈ រួមនិងស្ថាប័នពាក់ព័ន្ធសូមមេត្តាឈប់ និងជួយបញ្ឈប់រាល់សកម្មភាពលេងសើចមិនទំនងជាមួយឧបករណ៍ភ្លេងបុរាណខ្មែរ ឬអ្វីដែលទាក់ទងនឹងសិល្បៈខ្មែរ ដែលទាំងអស់នេះគឺជាអត្តសញ្ញាណជាតិ ជាសម្បត្តិកេរ្តិ៍ដូនតាជាទីគោរពសក្ការៈ និងមានតម្លៃ មុននឹងវិស័យសិល្បៈវប្បធម៌របស់យើងត្រូវបានគេប្រមាថ និងឈានទៅរកការបាត់បង់»។

ក្នុងនោះដែរ អ្នកនាង ម៉េង កែវពេជ្ជតា បានរៀបរាប់អំពីប្រភេទទ្រនិងស្នើឱ្យបញ្ឈប់សកម្មភាពសើចចំអកឧបករណ៍បុរាណខ្មែរប្រភេទនេះ។ តារាចម្រៀងរូបនេះថា «ទ្រ គឺជាឧបករណ៍តន្ត្រីបុរាណខ្មែរដែលដើរតួយ៉ាងសំខាន់ក្នុងបទភ្លេងចម្រៀង ល្ខោន របាំ ពិធីខ្មែរមិនអាចខ្វះបាន ។ ទ្រខ្មែរខ្សែ៣ ទ្រសោ ទ្រអ៊ូ ទ្រឆេ ..ទាំងអស់នេះពេលខ្លះធ្វើជាតួឯកទៀតផងទៅតាមទម្រង់នៃបទភ្លេង ចម្រៀង ។ ក្នុងពិធីរៀបមង្គលការ ទ្រសោ ទ្រខ្មែរខ្សែ៣គឺជាតួឯកសម្រាប់នាំមុខ។ ទ្រ នៅមានតួនាទីជាច្រើនទៀតស្ទើរតែលើសឧបករណ៍តន្ត្រីបុរាណខ្មែរដទៃទៀតផង។ នាងខ្ញុំសង្ឃឹមថា សារមួយនេះនឹងជួយបណ្តាលចិត្តបងប្អូនដែលយល់ខុសមួយចំនួនឱ្យបញ្ឈប់រាល់ការគិត និងសកម្មភាពមិនល្អ ហើយងាកមកជួយគ្នាថែរក្សាការពារឱ្យបានមាំមួននូវសម្បត្តិវប្បធម៌ខ្មែរដ៏កម្សត់របស់យើងដើម្បីឱ្យមានស្នាមញញឹមដើរទន្ទឹមនឹងភាពស៊ីវិល័យនៃឧបករណ៍តន្ត្រីសម័យដែលជាឧបករណ៍ភ្លេងរបស់បច្ចឹមប្រទេស។ សូមអរគុណ!»៕

តារាសម្តែងជើងចាស់ដ៏មានប្រជាប្រិយភាពលោក ទេព រិនដារ៉ូ ត្រូវបានអ្នកសម្តែងជំនាន់ក្រោយចាត់ទុកជានិមិត្តរូបម្នាក់នូវទេពកោសល្យរបស់លោក។ ជាតារាសម្តែងល្បីមួយរូបចំណាំដើរជាតួឪពុកតួឯកប៉ុន្តែលោក ទេព រិនដារ៉ូ ហាក់មិនប្រកាន់ខ្លួនក្នុងការសម្តែងនោះទេ សូម្បីតែសម្តែងរឿងខ្លីប្រូម៉ូតផលិតផលលោកក៏សម្តែង។

តាមរយៈរឿងខ្លីៗដែលបង្ហោះនៅលើបណ្តាញសង្គម នាយព្រែក លោក ទេព រិនដារ៉ូ បានសម្តែងជាច្រើនរឿងជាមួយតារាសម្តែងស៊ិចស៊ី ជេស៊ីកា ត្រូវប៉ាន់ពីម្ចាស់ផលិតផលទទួលបានការផ្សព្វផ្សាយជាបន្តបន្ទាប់។ ថ្មីៗនេះការសម្តែងរបស់លោក ទេព រិនដារ៉ូ បំបោសអង្អែល តារាស្រី ជេ ស៊ីកា ក្នុងរឿងខ្លីរបស់ នាយព្រែកត្រូវបានមហាជនលើកឡើងជាច្រើនថាលោក ទេព រិនដារ៉ូ ចំណេញលើគោក។

កាលពីថ្ងៃទី៨ ខែកញ្ញា នាយព្រែក បានបង្ហោះរឿងខ្លីមួយដោយដាក់ចំណងជើងថា «ក្នុងទ្បានមានអីមិនល្អ…» ។ ក្បាលដំបូងនៃសាច់រឿងគឺតារាសម្តែងស៊ិចស៊ី ជេ ស៊ីកា អង្គុយពីលើលោក ទេព រិនដារ៉ូ នៅក្នុងឡានដែលបង្ហាញសកម្មភាពរបៀបសាច់រឿងមនុស្សធំ។ ការសម្តែងរបស់តារាសម្តែងជើងចាស់ជាមួយនឹងតារាស្រីវ័យក្មេងបែបនេះអ្នកលេងបណ្តាញសង្គមជាច្រើនបានបញ្ចេញមតិថា «ចំណេញហាស់ លោកពូ, អាយដល លេង វគ្គនេះ ចំណេញ ធំ ,ព្រែកនាំពូរ៉ូ ខូចរហូតម៉ងគ្រប់វគ្គ, ពូអើយ ចំណេញលើគោកបានទាំងលុយបានទាំងឱប រួមទាំងការបញ្ចេញមតិជាច្រើនទៀត»។

ទោះយ៉ាងណា ការសម្តែងមានឈុតរោលរាលនេះ នាយព្រែក បានបញ្ជាក់ជូនមហាជនថាដោយសារតែបង្ហាញពីស្រោមអនាម័យទើបមានឈុតឆាកបែបនេះ។ នាយព្រែកបានបញ្ជាក់ក្នុងខម្មិនថា «អធ្យាស្រ័យបងប្អូនដោយសាររឿងនេះយើងបង្ហាញពីប្រើប្រាស់ស្រោមអនាម័យ ដូច្នេះការសម្ដែងវាពិតជាខុសពីការសម្ដែងរបស់យើងមុនៗ សូមអរគុណបងប្អូនដែលតែងតែស្រលាញ់គាំទ្រក្រុមយើងខ្ញុំ…!»៕

ឃើញមានការយល់ច្រឡំពីអ្នកមួយចំនួនថាបទចម្រៀងសម័យសង្គមរាស្រ្តនិយមជំនាន់លោក ស៊ិន ស៊ីសាមុត ថាជាបទបុរាណ តារាចម្រៀងចាស់វស្សា ណុប បាយ៉ារិទ្ធ ចេញមកបញ្ជាក់ច្បាស់ៗពីភាពខុសគ្នារវាងបទបុរាណនិងប្រភេទបទមរតកដើម។

នៅលើបណ្តាញសង្គមរបស់តារាចម្រៀង ណុប បាយ៉ារិទ្ធ នៅថ្ងៃទី៨ ខែកញ្ញា នេះបានឱ្យដឹងថា «បច្ចុប្បន្នមានមនុស្សជាច្រើនកំពុងយល់ច្រឡំថា បទចម្រៀងសម័យសង្គមរាស្រ្តនិយម បទចម្រៀងជំនាន់លោកតាស៊ិន ស៊ីសាមុត ជាបទបុរាណ ។ បទចម្រៀងរបស់លោកតាស៊ិន ស៊ីសាមុត ជាបទចម្រៀងមរតកដើម មិនមែនជាបទបូរាណទេ លើកលែងតែលោកតាច្រៀងបទទំរង់មហោរីតែម្តង ដូចជាបទ«ពឹងញាត្តិ» លំនាំបទឡាវឡឹក ។ល។ »។

តារាចម្រៀងសម្រស់មិនចេះចាស់រូបនេះ បានលើកឡើងទៀតថា «បទចម្រៀងរបស់លោកភាគច្រើនគឺប្រគំដោយឧបករណ៍ភ្លេងសម័យ និង មានលាយឧបករណ៍ភ្លេងបូរាណខ្មែរចូលខ្លះដែរក្នុងបទចម្រៀងមួយចំនួន (មិនទាំងអស់គ្រប់បទទេ) ។ រីឯបទចម្រៀងបូរាណចែកចេញជាទំរង់ផ្សេងៗគ្នាទៀត ហើយភាគច្រើនប្រគំបទភ្លេងដោយឧបករណ៍ភ្លេងខ្មែរទាំង៤ប្រភេទ»។

ឧបករណ៍ភ្លេងបុរាណខ្មែរមាន៤ប្រភេទ តារាចម្រៀង ណុប បាយ៉ារិទ្ធ បានបង្ហាញជូនថា«
១ ឧបករណ៍ត្រេះ ដេញ ឬ កូត ៖ គ្រឿងដែលមានខ្សែសម្រាប់ត្រេះ ដេញ ឬ កូតៈ មានខ្សែរដៀវ តាខេ ទ្រ ចាប៉ី…២ ឧបករណ៍ផ្លុំ ៖ គ្រឿងសម្រាប់ផ្លុំឲ្យព្ញសូរៈ មានខ្លុយ ប៉ី ស្រឡៃ ស្លឹក… ៣ ឧបករណ៍វាយ ឬ ទះ ទូង គោះ ៖ គ្រឿងដាសស្បែកសម្រាប់វាយឬទះ មានស្គរសំភោរ ស្គរធំ…៤ ឧបករណ៍គោះ ទង្គិច ៖ គ្រឿងគោះទង្គិចឲ្យឮសូរ មានរនាត គងវង់ ឈឹង ឆាប ក្រាប់ គង ឃ្មោះ រគាំង…»។

ម្ចាស់បទ «បំណងល្អពីសង្សារអូន» បានបន្ថែមទៀតថា «ឧបករណ៍៤ប្រភេទ(សង្ខេប)ខាងលើជាឧបករណ៍ភ្លេងខ្មែរដែលដើរតួរយ៉ាងសំខាន់ក្នុងប្រភេទបទចម្រៀងបូរាណខ្មែរក្នុងទំរង់ផ្សេងៗគ្នា ។ បទចម្រៀងដែលច្រៀងជាមួយវង់ភ្លេងខ្មែរមានដូចជា ៖ បទទំរង់បូរាណ
បទទំរង់មហោរី បទទំរង់មហោរីក្លាយ បទភ្លេងការ ។ល»។

គួរបញ្ជាក់ថា បច្ចុប្បន្នលោក ណុប បាយ៉ារិទ្ធ មានអាយុ៤៣ឆ្នាំហើយប៉ុន្តែតាមរយៈរូបភាពរបស់លោកបង្ហោះនៅលើបណ្តាញសង្គមគឺនៅតែស្រស់សង្ហាមិនចាញ់ក្មេងៗនោះទេ។ ជាតារាចម្រៀងម្នាក់ដែលប្រឡូកក្នុងអាជីពជាច្រើនឆ្នាំក្នុងទ្រនំរស្មីហង្សមាស លោកទទួលបានឱកាសធ្វើជាគណៈកម្មការជាច្រើនកម្មវិធីក្នុងការប្រកួតចម្រៀងរបស់ស្ថានីយទូរទស្សន៍ហង្សមាស៕

តារាកំប្លែង កាតុ បានចេញវីដេអូខ្លីមួយក្នុងនោះក៏មានវត្តមានពិធីករ វី យ៉ារ៉ូ បានផ្តាំផ្ញើទៅដល់អ្នកសិល្បៈតួមួយចំនួនមិនគោរពពេលវេលា មិនឱ្យតម្លៃកម្មវិធីទូរទស្សន៍ មិនគោរពរៀមច្បងឱ្យសិល្បៈរៀមច្បងចាំរាប់ម៉ោងមិនទាន់ឃើញមកដល់។

អ្នកនាង សុខ ច័ន្ទធីតា ហៅ កាតុ បានបង្ហោះវីដេអូមួយនៅលើបណ្តាញសង្គមកាលពីពេលថ្មីៗនេះមានទាំងវត្តមានពិធីករស្រស់សង្ហា វី យ៉ារ៉ូ នៅជាមួយផងដែរដោយអ្នកនាងបង្ហាញការងឿងឆ្ងល់របស់ខ្លួនទៅលើអ្នកសិល្បៈមួយចំនួន។ ក្នុងវីដេអូនោះ តារាកំប្លែង កាតុ បាននិយាយថា «ថ្ងៃនេះចង់និយាយរឿងតួបន្តិច ហេតុអ្វីតួយើងណាត់មកម៉ោង៨ ម៉ោង៩មិនទាន់ឃើញមក ម៉ោង១០មិនទាន់ឃើញមកចេះតែឆ្ងល់ ហេតុអ្វីយល់ឃើញយ៉ាងមិច ចង់ឃើញមើលងាយកម្មវិធីគេឬមួយក៏ចាត់ទុកថាលុយកម្មវិធីទូរទស្សន៍គ្មានតម្លៃសម្រាប់តួមួយចំនួន»។

អ្នកនាងបន្តទៀតថា «យើងត្រូវការជួយនិយាយគ្នា រិះគន់ដើម្បីស្ថាបនា គោរពពេលវេលា ពេលវេលាជាមាសប្រាក់»។ យ៉ារ៉ូ បានបន្ទរថា តួធំតួយូរសុខចិត្តអង្គុយចាំតួក្មេងៗគួរពិចារណាខ្លួនឯង ធ្វើចឹងត្រូវឬអត់? ហើយភាគច្រើនចឹងគឺមិនសូវបានប៉ុន្មាននោះទេដោយសារតែមិនគោរពពេលវេលា»។

គួរបញ្ជាក់ថា អ្នកនាង កាតុ គឺជាតារាកំប្លែងម្នាក់ដែលនៅតែមានស្រស់ស្អាត រក្សារាងរបស់ខ្លួននៅស្លីមមិនចាញ់ក្រមុំៗនោះទេ។ ក្រៅពីអាជីពកំប្លែងអ្នកនាង កាតុ ក៏ជាតារាចម្រៀងម្នាក់ចេញបទចម្រៀងនៅក្នុងផលិតកម្មថោនផងដែរ និងមានមុខរបរក្រៅពីអាជីពសិល្បៈមួយចំនួនទៀត។ ខំប្រឹងធ្វើការទាំងថ្ងៃទាំងយប់ជាមួយស្វាមី តារាកំប្លែងរូបនេះក៏ធ្លាប់ត្អូញត្អែរពីការទិញផ្ទះបង់លុយផ្តាច់ច្រើនឆ្នាំហើយប៉ុន្តែផ្ទះនៅមិនទាន់បានផងដែរ៕