ប្រទេសនីមួយៗនៅលើពិភពលោកយើងនេះសុទ្ធតែមានពិធីបុណ្យប្រពៃណីជាតិរៀងៗខ្លួន និងខុសៗគ្នា ហើយខ្លះទៀតក៏មានលក្ខណៈស្រដៀងគ្នាផងដែរ ដោយសារតែការកាន់សាសនាដូចគ្នា។ ប៉ុន្តែក៏មានពិធីបុណ្យមួយចំនួនត្រូវបានគេចាត់ទុកថាប្លែកជាងគេផងដែរដូចជាពិធីបុណ្យ Day of the Dead របស់ប្រទេសម៉ិកស៊ិក, ពិធីបុណ្យត្រីបាឡែនរបស់ប្រទេសដាណឺម៉ាក និងពិធីបុណ្យគប់លាមកគោរបស់ប្រទេសឥណ្ឌា ដែលប្រទេសទាំងបីនេះត្រូវបានគេចាត់ទុកថាមានពិធីបុណ្យប្រពៃណីចម្លែកជាងគេបំផុតក្នុងលោក។

ពិធីបុណ្យ Day of the Dead របស់ប្រទេសម៉ិកស៊ិកជាញឹកញាប់បកប្រែថា “ថ្ងៃនៃមរណៈ” គឺជាពិធីបុណ្យដែលរំលឹក និងគោរពដល់អ្នកស្លាប់។ ពិធីបុណ្យនេះធ្វើឡើងនៅថ្ងៃទី ១-២ ខែវិច្ឆិកាជារៀងរាល់ឆ្នាំ ដោយតម្រូវឱ្យអ្នកចូលរួមស្លៀកពាក់ជាគ្រោងឆ្អឹង ឬជានិមិត្តសញ្ញាពីវប្បធម៌ប្រពៃណី ដើម្បីគោរពដល់អ្នកស្លាប់។ ពិធីបុណ្យនេះក៏រួមបញ្ចូលនូវសកម្មភាពវប្បធម៌ជាច្រើនដូចជាការរាំ និងតន្ត្រីផ្ទាល់ផងដែរ។ Day of the Dead ត្រូវបានអង្គការ UNESCO ទទួលស្គាល់ជាបេតិកភណ្ឌវប្បធម៌អរូបីនៃមនុស្សជាតិក្នុងឆ្នាំ ២០០៨។

រីឯពិធីបុណ្យត្រីបាឡែនរបស់ប្រទេសដាណឺម៉ាកវិញក៏ត្រូវបានគេចាត់ទុកថាចម្លែក និងប្លែកជាងគេបំផុតក្នុងលោកផងដែរ ដោយសារក្នុងអំឡុងពេលពិធីបុណ្យនេះ ត្រីបាឡែនជាច្រើនក្បាលត្រូវបានគេសម្លាប់ដើម្បីផ្តល់អាហារដល់ប្រជាជនក្នុងតំបន់។ ពិធីបុណ្យត្រីបាឡែន ដែលត្រូវបានគេស្គាល់ថាជា “Grindadráp” ប្រារព្ធឡើងនៅកោះ Faroe តំបន់ស្វយ័តរបស់ប្រទេសដាណឺម៉ាក ដែលមានទីតាំងនៅមហាសមុទ្រអាត្លង់ទិកខាងជើង។ ពិធីបុណ្យនេះមានអាយុកាលរាប់រយឆ្នាំមកហើយ គឺជាផ្នែកមួយនៃវប្បធម៌ប្រពៃណីរបស់ជនជាតិ Faroese។

ចំណែកឯ Gorehabba ដែលជាពិធីបុណ្យគប់លាមកគោមានតែមួយគត់ក្នុងលោកធ្វើឡើងនៅក្នុងភូមិ Gumatapura រដ្ឋ Karnataka ប្រទេសឥណ្ឌា ក៏ត្រូវបានគេចាត់ទុកថាប្លែក និងចម្លែកជាងគេផងដែរ។ ពិធីបុណ្យនេះត្រូវបានប្រារព្ធឡើងនៅថ្ងៃទី ១០ ខែវិច្ឆិកាជារៀងរាល់ឆ្នាំ ហើយទាក់ទាញការចូលរួមពីអ្នកស្រុក និងភ្ញៀវទេសចររាប់ពាន់នាក់។ Gorehabba មានដើមកំណើតពីពិធីគោរពព្រះដែលមនុស្សជឿថាការចោលលាមកគោឱ្យគ្នាទៅវិញទៅមក ជួយការពារវិញ្ញាណអាក្រក់ និងនាំមកនូវសំណាងល្អ ក៏ដូចជាការប្រមូលផលល្អជាដើម៕

ប្រទេសឥណ្ឌូណេស៊ី ៖ សារព័ត៌មានបរទេសបានរាយការណ៍ កាលពីថ្ងៃទី២៧ ខែតុលា ឆ្នាំ២០២៤ ថា ឥណ្ឌូណេស៊ីបានហាមឃាត់ក្រុមហ៊ុន Apple លក់ទូរស័ព្ទ iPhone 16 ក្នុងប្រទេសរបស់ខ្លួន ហើយចាត់ទុកថា គឺជាទង្វើខុ.សច្បាប់ ។ ប៉ុន្តែភ្ញៀវទេសចរបរទេសអាចប្រើប្រាស់ទូរស័ព្ទនេះនៅឥណ្ឌូណេស៊ីបាន ដោយសារវាជាទ្រព្យសម្បត្តិផ្ទាល់ខ្លួន ។

ក្រសួងឧស្សាហកម្មឥណ្ឌូណេស៊ីប្រកាសថា ភ្ញៀវទេសចរបរទេសដែលធ្វើដំណើរមកដល់ឥណ្ឌូណេស៊ី ពួកគេអាចយកទូរស័ព្ទ iPhone 16 មកឥណ្ឌូណេស៊ីបាន ដោយសារវាជាទ្រព្យសម្បត្តិផ្ទាល់ខ្លួន ហើយគ្មានបំណងយកទូរស័ព្ទនេះមកលក់ចែកចាយ ឬនាំចូលឥណ្ឌូណេស៊ីតាមប្រៃសណីយ៍ ។ ហេតុនេះ ភ្ញៀវទេសចរបរទេសអាចប្រើប្រាស់ទូរស័ព្ទ iPhone 16 នៅឥណ្ឌូណេស៊ីបាន ។

រដ្ឋាភិបាលឥណ្ឌូណេស៊ីបានកំណត់ឱ្យពលរដ្ឋអាចយកទូរស័ព្ទ iPhone 16 មកឥណ្ឌូណេស៊ី ត្រឹមតែ២គ្រឿងប៉ុណ្ណោះក្នុងម្នាក់ ។ បើគិតចាប់ពីខែសីហា រហូតដល់ខែតុលា ឆ្នាំ២០២៤ មានការនាំចូលទូរស័ព្ទ iPhone 16 ប្រមាណ៩.០០០គ្រឿងចូលប្រទេសឥណ្ឌូណេស៊ី សម្រាប់ប្រើប្រាស់ផ្ទាល់ខ្លួន និងបានបង់ពន្ធរួចរាល់ ។

រដ្ឋាភិបាលឥណ្ឌូណេស៊ីនឹងចាត់ទុកថា វាជាទង្វើខុសច្បាប់ ប្រសិនបើពលរដ្ឋណាម្នាក់នាំចូលទូរស័ព្ទនេះជាច្រើនគ្រឿងមកលក់នៅឥណ្ឌូណេស៊ី ។ មូលហេតុដែលទូរស័ព្ទនេះខុសច្បាប់ ដោយសារក្រុមហ៊ុន Apple ពុំទាន់សម្រេចគោលដៅវិនិយោគនៅឥណ្ឌូណេស៊ី ឱ្យស្មើទឹកប្រាក់១.៧១លានលានរូពៀ ទើបមានសិទ្ធិលក់ទូរស័ព្ទនៅឥណ្ឌូណេស៊ីបាន ។ បច្ចុប្បន្ន ក្រុមហ៊ុនបានវិនិយោគទឹកប្រាក់ត្រឹមតែ១.៤៨លានលានរូពៀប៉ុណ្ណោះ ។

រដ្ឋមន្ត្រីក្រសួងឧស្សាហកម្មឥណ្ឌូណេស៊ីបានថ្លែងនៅដើមខែតុលា ឆ្នាំ២០២៤ ថា ឥណ្ឌូណេស៊ីពុំអនុញ្ញាតឱ្យទូរស័ព្ទស៊េរីទំនើបចុងក្រោយរបស់ក្រុមហ៊ុន Apple គឺ iPhone 16 ចូលក្នុងទីផ្សារឥណ្ឌូណេស៊ីទេ ដោយសារក្រុមហ៊ុននេះពុំអនុវត្តតាមលក្ខខណ្ឌកំណត់ការនាំចូល ។

ចំណែកក្រុមហ៊ុន Apple បានលើកឡើងកាលពីថ្ងៃទី១១ ខែតុលា កន្លងមកថា ក្រុមហ៊ុនប្តេជ្ញាចិត្តយ៉ាងមុតមាំចំពោះប្រទេសឥណ្ឌូណេស៊ី ហើយក្រុមហ៊ុនមានអារម្មណ៍រំភើបក្នុងការយកទូរស័ព្ទស៊េរីទំនើបចុងក្រោយ រួមទាំងទូរស័ព្ទ iPhone 16 មកលក់ឱ្យអតិថិជនឥណ្ឌូណេស៊ីយ៉ាងឆាប់រហ័សបំផុត ៕

ប្រទេសវៀតណាម៖ ផុតពីព្យុះមួយ ចូលព្យុះមួយ វៀតណាមកំពុងជួបទុ.ក្ខផ្ទួនៗខណៈព្យុះ Trami ថ្មីបានបោកបក់មកលើតំបន់ជាច្រើនបណ្តាលឱ្យជន់លិចយ៉ាងខ្លាំង។

ក្នុងរយៈពេលបីថ្ងៃកន្លងមកនេះ ពោលគឺចាប់ពីថ្ងៃទី២៥ ដល់ថ្ងៃទី២៨ ខែតុលា តំបន់ជាច្រើនក្នុងប្រទេសវៀតណាម ត្រូវបានជន់លិចក្នុងជម្រៅ ១-២ ម៉ែត្រ នៅពេលដែលព្យុះ Trami បានបោកបក់ជាបន្តបន្ទាប់ ដែលបណ្តាលឱ្យមានភ្លៀងធ្លាក់ពីមធ្យមទៅច្រើន។

យោងតាមគណៈកម្មាធិការដឹកនាំការពារ ស្វែងរក និងជួយសង្គ្រោះគ្រោះមហន្តរាយធម្មជាតិ បានឱ្យដឹងថា បច្ចុប្បន្នភ្លៀងនៅតែបន្តធ្លាក់ខ្លាំងឥតឈប់ឈរដោយសារឥទ្ធិពលព្យុះ Trami បង្កឱ្យមានទឹកជំនន់ធ្ងន់ធ្ងរបំផុត ហើយដើមឈើជាច្រើនក៏ត្រូវដួលរលំ។ លើសពីនេះដំណាំរបស់ប្រជាពលរដ្ឋចំនួន ៣៧៤ ហិកតានៅក្នុងស្រុក ឡឺ ធុយ ក៏បានរងការខូចខាត ហើយការចិញ្ចឹមត្រីចំនួន ១០០ ហិកតាក៏ត្រូវបានទឹកហូរកាត់ផងដែរ។

ដើម្បីធានាសុវត្ថិភាពអាយុជីវិតប្រជាជន អាជ្ញាធរបានកំពុងរៀបចំការផ្លាស់ទីលំនៅរបស់ប្រជាពលរដ្ឋចំនួន ១០ ម៉ឺននាក់ទៅកាន់ទីសុវត្ថិភាព ខណៈប្រជាជនក៏ត្រូវបានណែនាំកុំឱ្យធ្វើដំណើរតាមទឹកជ្រៅដែលហូរលឿនផងដែរ។ គួរបញ្ជាក់ដែរថា ក្នុងរយៈពេល ៣ ថ្ងៃមកនេះព្យុះត្រាមី បានបង្កឱ្យមានភ្លៀងធ្លាក់យ៉ាងគំហុកនៅក្នុងប្រទេសវៀតណាមភាគខាងជើង និងភាគកណ្តាល ដោយបានសម្លាប់មនុស្ស ៣នាក់ និងបាត់ខ្លួនម្នាក់ ដោយសារទឹកជំនន់ និងឧបទ្ទវហេតុលិចលង់ផ្ទះសម្បែង។

ព្យុះនេះក៏បានបង្កការខូចខាតយ៉ាងច្រើននៅកន្លែងមន្ទីពេទ្យ រួមទាំងបំផ្លាញហេដ្ឋារចនាសម្ព័ន្ធយ៉ាងធ្ងន់ធ្ងរ ជាមួយនឹងផ្លាកសញ្ញាចរាចរណ៍ជាង ៦០ បានដួលរលំ ភ្លើងចរាចរណ៍ចំនួន ៣១ ត្រូវបានខូចខាត និងឈប់ដំណើរការ។ ទីភ្នាក់ងារឧតុនិយមបានព្យាករណ៍ថា យប់ថ្ងៃទី ២៨ នេះតំបន់ភាគខាងត្បូងប្រទេសវៀតណាមក៏ត្រូវរងឥទ្ធិពលព្យុះត្រូពិក Trami ផងដែរ៕

ប្រទេសម៉ាឡេស៊ី ៖ សេដ្ឋវិទូជាន់ខ្ពស់មកពីធនាគារពិភពលោក (World Bank) និយាយថា ម៉ាឡេស៊ីនឹងក្លាយជាប្រទេសមានប្រាក់ចំណូលខ្ពស់ក្នុងរយៈពេល៤ឆ្នាំខាងមុខ (ឬមានចំណូលខ្ពស់យ៉ាងឆាប់រហ័សនៅឆ្នាំ២០២៨) ដោយសារសេដ្ឋកិច្ចម៉ាឡេស៊ីរីកចម្រើនខ្លាំងជាងប្រទេសនានានៅអាស៊ាន លើកលែងសិង្ហបុរី ហើយតម្លៃរូបិយប័ណ្ណរីងហ្គីតរឹងមាំ ។

លោក Apurva Sanghi ប្រធានសេដ្ឋវិទូធនាគារពិភពលោក ប្រចាំម៉ាឡេស៊ីនិយាយថា ម៉ាឡេស៊ីបានដើរលើផ្លូវឈានទៅសម្រេចគោលដៅនេះ ក្រោយពីធនាគារពិភពលោក បានកែប្រែការព្យាករកំណើនសេដ្ឋកិច្ចម៉ាឡេស៊ី នៅឆ្នាំ២០២៤ ពី៤,៣% មកស្មើ៤,៩% ។ កំណើនខ្ពស់នេះ មានន័យថា ពលរដ្ឋម៉ាឡេស៊ីមានកម្រិតជីវភាពរស់នៅកាន់តែល្អប្រសើរឡើង ព្រមទាំងតម្លៃរូបិយប័ណ្ណរីងហ្គីតរឹងមាំ ដែលបានជំរុញឱ្យម៉ាឡេស៊ីក្លាយជាប្រទេសមានចំណូលខ្ពស់នាពេលឆាប់ៗ ។

ចំណែកសេដ្ឋកិច្ចម៉ាឡេស៊ី ក៏បានរីកចម្រើនយ៉ាងឆាប់រហ័ស និងរីកចម្រើនជាងអំឡុងពេលមុនជំងឺកូវីដ-១៩ ឆ្លងរាតត្បាត រហូតដល់១២% ។ នេះចាត់ទុកថា គឺជាការរីកចម្រើនយ៉ាងខ្លាំង និងវ៉ាដាច់ស្ទើរគ្រប់ប្រទេសក្នុងតំបន់អាស៊ាន លើកលែងតែសិង្ហបុរី ។

លោក Apurva យល់ឃើញថា កត្តាទាំងអស់នេះនឹងជំរុញឱ្យម៉ាឡេស៊ីក្លាយជាប្រទេសមានប្រាក់ចំណូលខ្ពស់យ៉ាងឆាប់រហ័សនៅឆ្នាំ២០២៨ ប្រសិនបើមានកំណែទម្រង់ជាបន្តបន្ទាប់ ។

លោកក៏បានសំណូមពរឱ្យរដ្ឋាភិបាលម៉ាឡេស៊ីផ្តល់ភាពសំខាន់លើការធ្វើកំណែទម្រង់ផ្សេងៗដើម្បីឱ្យម៉ាឡេស៊ីរីកចម្រើនកាន់តែខ្លាំង ព្រមទាំងបន្ធូរបន្ថយការឧបត្ថម្ភធុនទិញប្រេងឥន្ធនៈ ។ ក្រៅពីនេះ រដ្ឋាភិបាលគួរតែដោះស្រាយបញ្ហាការធ្វើការកម្រិតទាប ឬធ្វើការទាបជាងជំនាញរបស់ពលរដ្ឋម៉ាឡេស៊ីប្រមាណ២លាននាក់ ដែលពួកគេមានសមត្ថភាពខ្ពស់ជាងការងារដែលកំពុងធ្វើ ។

ធនាគារពិភពលោក បានកំណត់លក្ខខណ្ឌប្រទេសដែលមានចំណូលខ្ពស់ គឺត្រូវតែជាប្រទេសមានចំណូលជាតិសរុប (Gross National Income: GNI) ក្នុងពលរដ្ឋម្នាក់លើសពី១៤.០០៥ដុល្លារអាមេរិក ។

ការធ្វើការកម្រិតទាប មានន័យថា គឺជាការធ្វើការមិនពេញលេញ ដែលកើតឡើងក្នុងពេលសេដ្ឋកិច្ចធ្លាក់ចុះ ។ ជាក់ស្តែង ពលរដ្ឋមួយចំនួនពុំបានធ្វើការពេញម៉ោង ដោយសារមានការងារតិច ឬពលរដ្ឋពុំអាចស្វែងរកការងារពេញម៉ោងធ្វើបាន ឬសុខចិត្តធ្វើការទាបជាងចំណេះដឹង និងសមត្ថភាពរបស់ខ្លួន ទើបធ្វើឱ្យពួកគេទទួលបានប្រាក់ចំណូលតិចតួចជាងការរំពឹងទុក ៕

ប្រទេសឥណ្ឌា៖ ថ្មីៗនេះប្រទេសឥណ្ឌាបានកំពុងរងនូវការវាយប្រ.ហារ.ធ្ងន់ធ្ងរបំផុតពីព្យុះស៊ីក្លូន Dana ជាមួយនឹងខ្យល់បក់ខ្លាំងក្នុងល្បឿនអតិបរមាប្រហែល ១២០ គីឡូម៉ែត្រក្នុងមួយម៉ោង ដែលបណ្តាលឱ្យមានភ្លៀងធ្លាក់ខ្លាំងឥតឈប់ឈរ។

យោងតាមនាយកដ្ឋានឧតុនិយមឥណ្ឌា ព្យុះ Dana បានបោកបក់នៅរដ្ឋ Odisha កាលពីថ្ងៃទី២៥ ខែតុលា ជាមួយនឹងកម្លាំងខ្យល់អតិបរមាប្រហែល ១២០ គីឡូម៉ែត្រក្នុងមួយម៉ោង ដោយនាំមកនូវទឹកជំនន់កើនឡើងខ្ពស់បំផុតមិនធ្លាប់មាន។

ព្យុះនេះត្រូវបានគេព្យាករណ៍ថានឹងរំកិលចូលកាន់តែជ្រៅទៅភាគខាងជើង Odisha នៅថ្ងៃបន្តបន្ទាប់ទៀត ដែលបណ្តាលឱ្យបាក់ដី ក៏ដូចជាដួលរលំដើមឈើ រួមទាំងធ្វើឱ្យខូចខាតហេដ្ឋារចនាសម្ព័ន្ធជាច្រើន។ នេះបើយោងតាមប្រព័ន្ធផ្សព្វផ្សាយក្នុងស្រុកបានរាយការណ៍ថា បច្ចុប្បន្នភ្លៀងនៅតែបន្តធ្លាក់ខ្លាំងឥតឈប់ឈរ និងខ្យល់បក់ខ្លាំងភ្លាមៗបានបណ្តាលឱ្យមនុស្សពីរនាក់ស្លាប់ និងជាច្រើននាក់ទៀតរងរបួស នៅតំបន់មួយចំនួនក្នុងរដ្ឋ Odisha និងរដ្ឋ West Bengal ដែលនៅជិតខាងនោះ។

យោងតាមអាជ្ញាធរ ឥទ្ធិពលព្យុះស៊ីក្លូន Dana បានផ្តាច់ចរន្តអគ្គិសនី និងបណ្តាលឱ្យមានទឹកជំនន់ធ្ងន់ធ្ងរបំផុតនៅក្នុងរដ្ឋ Odisha និង West Bengal ។ នៅតំបន់មួយចំនួនក្នុង Odisha នាយកដ្ឋានអាកាសធាតុបានព្យាករណ៍ពីការកើនឡើងនៃកម្រិតទឹកសមុទ្រប្រហែល ១ ម៉ែត្រដែលអាចបណ្តាលឱ្យមានទឹកជំនន់រីករាលដាលនៅក្នុងតំបន់ទំនាប។ បច្ចុប្បន្នរដ្ឋ Odisha ត្រូវបិទសាលារៀន និងផ្អាកជើងហោះហើរមួយចំនួនជាបណ្តោះអាសន្ន ហើយមនុស្សជាង ៦០០,០០០ នាក់ក៏ត្រូវបានជម្លៀសចេញផងដែរ។

គួរបញ្ជាក់ដែរថា ឆ្នេរសមុទ្រភាគខាងកើតនៃប្រទេសឥណ្ឌា គឺកើតមានព្យុះស៊ីក្លូនជាយូរហើយ ប៉ុន្តែចំនួនព្យុះដែលបានបោកបក់ខ្លាំងៗគឺកំពុងកើនឡើងនាថ្មីៗនេះទេ។ កាលពីឆ្នាំ ២០២៣ ព្យុះស៊ីក្លូនដ៏សាហាវបំផុតរបស់ប្រទេសឥណ្ឌាក្នុងរយៈពេលប៉ុន្មានឆ្នាំចុងក្រោយនេះ បានបណ្តាលឱ្យមនុស្សស្លាប់យ៉ាងហោចណាស់ ៥២៣ នាក់ ក៏ដូចជាបង្កឱ្យមានការខូចខាតហេដ្ឋារចនាសម្ព័ន្ធជាច្រើន ដែលត្រូវបានប៉ាន់ស្មានចំនួន ២.៥ ពាន់លានដុល្លារអាមេរិក៕

Caspian ដែលជាសមុទ្រធំបំផុតមួយនៅលើពិភពលោក បានរួមតូចយ៉ាងឆាប់រហ័ស ដោយសារការប្រែប្រួលអាកាសធាតុ និងការបំពុល ដែលនឹងពិបាកក្នុងការស្តារឡើងវិញ។

សមុទ្រកាសព្យែនបច្ចុប្បន្នកំពុងរួមតូចគួរឱ្យព្រួយបារម្ភខ្លាំងណាស់ ខណៈកម្រិតទឹកក៏ស្រកចុះផងដែរ ដោយបន្សល់ទុកនូវដីទទេជាកន្លែងដែលធ្លាប់តែមានទឹកច្រើន ស្រាប់តែក្លាយជាដីវាលទៅវិញ។ សមុទ្រកាសព្យែនមានផ្ទៃដីធំដូចរដ្ឋម៉ុនតាណារបស់សហរដ្ឋអាមេរិកអ៊ីចឹង ដែលដើរតួនាទីយ៉ាងសំខាន់ក្នុងសេដ្ឋកិច្ចនៃប្រទេសជុំវិញចំនួនប្រាំ រួមមាន កាហ្សាក់ស្ថាន អ៊ីរ៉ង់ អាស៊ែបៃហ្សង់ រុស្ស៊ី និងតូមិននីស្ថាន។

កន្លែងនេះផ្តល់ប្រភពទឹកសម្រាប់កសិកម្ម នេសាទ ទេសចរណ៍ និងធនធានប្រេង រួមទាំងឧស្ម័នដ៏មានតម្លៃជាច្រើន។ ទន្ទឹមនឹងនោះវាក៏រួមចំណែកដល់ការគ្រប់គ្រងអាកាសធាតុនៅក្នុងតំបន់ស្ងួតផងដែរ។ ទោះជាយ៉ាងណា ដោយសារបម្រែបម្រួលអាកាសធាតុ និងការបំពុល ក៏ដូចជាការសាងសង់ទំនប់ ការកេងប្រវ័ញ្ចហួសហេតុ បានធ្វើឱ្យសមុទ្រដ៏ធំមួយនេះប្រែក្លាយជាសមុទ្រដែលមានទំហំតូចបន្តិចម្តងៗ។

យោងតាមលោក Matthias Prange អ្នកស្រាវជ្រាវនៅសាកលវិទ្យាល័យ Bremen ប្រទេសអាល្លឺម៉ង់ បាននិយាយថា ប្រសិនបើពិភពលោកមិនកាត់បន្ថយការបំភាយឧស្ម័នយ៉ាងលឿននោះទេ កម្រិតទឹកនឹងថយចុះពី ៧.៨ ទៅ ១៧.៧ ម៉ែត្រនៅចុងសតវត្សនេះ ។ ការរួមតូចនៃទឹកសមុទ្របានធ្វើឱ្យប្រទេសជាច្រើនជួបប្រទះនឹងវិបត្តិសេដ្ឋកិច្ច ថែមទាំងគំរាមកំហែងដល់សត្វព្រៃដែលជិតផុតពូជទៀតផង។

លើសពីនេះ ការថយចុះនៃកម្រិតទឹកក៏បណ្តាលឱ្យខ្វះអុកស៊ីហ្សែន ដែលគំរាមកំហែងដល់អាយុជីវិតរបស់សត្វជាច្រើនដែលអាចមាននៅទីនេះផងដែរ។ សមុទ្រកាសព្យែនកាន់តែតូចចង្អៀតធ្វើឱ្យមេដឹកនាំព្រួយបារម្ភ ទោះបីជាយ៉ាងនេះក្តីពួកគេកំពុងរៀបចំវិធានការការពារ ដើម្បីលើកកម្ពស់ការយល់ដឹងអំពីសារៈសំខាន់នៃសមុទ្រកាសព្យែន ដែលជាសមុទ្រធំបំផុតរបស់ពិភពលោក៕

ប្រទេសចិន៖ សម្រាប់ភ្ញៀវទេសចរដែលចង់ទទួលបានបទពិសោធន៍ថ្មី ប្លែកដូចជាការធ្វើដំណើរកម្សាន្តនៅលើលំហអាកាស ឥឡូវនេះក្រុមហ៊ុន Deep Blue Aerospace របស់ប្រទេសចិន បានប្រកាសថា ខ្លួននឹងលក់សំបុត្រទេសចរណ៍អវកាសជាផ្លូវការហើយនៅឆ្នាំ ២០២៧ ជាមួយតម្លៃសំបុត្រ ១.៥ លានយ័ន (ប្រមាណ ២១ ម៉ឺនដុល្លារអាមេរិក)។

យោងតាមក្រុមហ៊ុន សម្រាប់តម្លៃនេះ អតិថិជននឹងទទួលបានពិសោធន៍ថ្មីៗ ប្លែកៗជាច្រើន ដូចជាបានឃើញនូវទេសភាពក្រៅភពផែនដីដ៏អស្ចារ្យ ដឹងរឿងអាថ៌កំបាំងមួយចំនួននៃចក្រវាឡ រួមទាំងបានហោះហើរលើបរិយាកាសដ៏ធំធេងបំផុត។

Deep Blue Aerospace ក៏បានបង្ហាញរូបភាពនៃប្រព័ន្ធហោះហើរ suborbital របស់ខ្លួនផងដែរ ដែលជាកប៉ាល់អវកាសពិសេសមួយស្រដៀងគ្នាទៅនឹង New Shepard របស់ក្រុមហ៊ុនអាមេរិក Blue Origin ដែរ។ កប៉ាល់នេះអាចផ្ទុកអ្នកដំណើរបាន ៦ នាក់ ជាមួយសមត្ថភាពហោះហើរក្នុងកម្ពស់អតិបរមាពី ១០០ ទៅ ១៥០ គីឡូម៉ែត្រ។ រហូតមកដល់ពេលនេះកប៉ាល់អវកាស suborbital គឺបានសាកល្បងហោះហើរដឹកមនុស្សចំនួន ៨ នាក់ទៅកាន់លំហដោយជោគជ័យ។

ក្រុមហ៊ុនចិន Deep Blue Aerospace បាននិយាយថា សម្រាប់លក្ខខណ្ឌក្នុងការទិញសំបុត្រគឺត្រូវតែមានអាយុចន្លោះពី ១៨ ទៅ ៦០ ឆ្នាំហើយត្រូវតែមានសុខភាពល្អ។ បន្ទាប់មក អ្នកទិញនឹងឆ្លងកាត់ការពិនិត្យរាងកាយយ៉ាងម៉ត់ចត់ដើម្បីកំណត់កាយសម្បទាសម្រាប់ការហោះហើរ។ អ្នកតំណាង Deep Blue Aerospace បាននិយាយថា កប៉ាល់ suborbital នឹងចុះចតដោយប្រើប្រព័ន្ធឆ័ត្រយោង ដើម្បីធានាអ្នកដំណើរត្រឡប់មកផែនដីវិញដោយសុវត្ថិភាពបំផុត។

គួរបញ្ជាក់ដែរថា Deep Blue Aerospace មិនមែនជាក្រុមហ៊ុនចិនតែមួយគត់ដែលមានគម្រោងចូលក្នុងទីផ្សារទេសចរណ៍អវកាសនោះទេ។ CAS Space ដែលជាក្រុមហ៊ុន spinoff នៃបណ្ឌិត្យសភាវិទ្យាសាស្ត្រចិន (CAS) ក៏កំពុងអភិវឌ្ឍយានដឹកជញ្ជូនមនុស្ស suborbital ដែលអាចដំណើរការបានក្នុងរយៈពេលប៉ុន្មានឆ្នាំខាងមុខផងដែរ ប្រសិនបើអ្វីៗដំណើរការទៅតាមផែនការ៕