សហរដ្ឋអាមេរិក ៖ កាលពីថ្ងៃទី២៥ ខែតុលា ឆ្នាំ២០២៤ សារព័ត៌មានបរទេសរាយការណ៍ថា សាលារៀនអាមេរិកគ្រោងដាក់ពាក្យប្តឹ.ង ក្រុមហ៊ុនបណ្តាញសង្គមធំៗ ដូចជា ៖ Meta, Google, TikTok និង Snapchat ក្រោយពីរកឃើញថា បណ្តាញសង្គមទាំងនេះបានធ្វើឱ្យកុមារញៀនខ្លាំងស្រដៀងនឹងការញៀនបារី និងមានចំណែកធ្វើឱ្យកុមារកើតជំងឺផ្លូវចិត្ត ។

សារព័ត៌មាន BNN Bloomberg រាយការណ៍ថា បណ្តាញសង្គមភាគច្រើនបានបង្កើតកម្មវិធីផ្សេងៗដើម្បីទាក់ទាញកុមារឱ្យឈ្លក់វង្វេងខ្លាំង ដែលស្រដៀងនឹងអ្នកញៀនបារី ហើយពុំអាចកាត់ផ្តាច់បាន ។ បណ្តាញសង្គមទាំងនេះតែងតែបង្ហាញខ្លឹមសារជាបន្តបន្ទាប់ពាក់ព័ន្ធនឹងឥរិយាបថអ្នកប្រើប្រាស់ ហើយនៅទីបំផុត កុមារ និងយុវជនប្រឈមនឹងគ្រោះថ្នាក់ដោយសារបណ្តាញសង្គម ។

តុលាការនៅទីក្រុងអូកឡេន រដ្ឋកាលីហ្វ័រញ៉ា លើកឡើងថា ក្រុមហ៊ុន Meta ប្រឈមនឹងការប្តឹងពីសាលារៀនក្នុងរដ្ឋជាច្រើន ដោយចោទប្រកាន់ថា Meta មានគោលបំណងធ្វើឱ្យកុមារញៀននឹង Facebook និង Instagram ។

លើសពីនេះ កម្មវិធីទាក់ទាញកុមាររបស់ Instagram, Snapchat, TikTok និង YouTube បានធ្វើឱ្យប៉ះពាល់ដល់ផ្លូវចិត្តកុមារ ហើយសាលារៀនបានទទួលខុសត្រូវបន្ថែមទៀតក្នុងការជួយកុមារកើតផ្លូវចិត្ត ។ ហេតុនេះ បណ្តាញសង្គមភាគច្រើននឹងប្រឈមជាមួយការប្តឹងផ្តល់ក្នុងករណីជាច្រើន ដោយសារយុវជនបានចំណាយពេលច្រើនចុចទូរស័ព្ទ រហូតប៉ះពាល់ផ្លូវចិត្ត ។

Jose Castaneda ជាអ្នកនាំពាក្យរបស់ Google និយាយថា ការចោទប្រកាន់ទាំងនេះ មិនមែនជាការពិតទេ ។ ការសហការជាមួយអ្នកជំនាញផ្នែកយុវជន, សុខភាពផ្លូវចិត្ត និងការថែទាំកូន គឺយើងបានគ្រប់គ្រង និងមានគោលការណ៍ឱ្យយុវជនទទួលបានបទពិសោធន៍សមស្របតាមវ័យ ហើយអាណាព្យាបាលអាចគ្រប់គ្រងកូនចៅរបស់ខ្លួនយ៉ាងល្អ ។

ដូចគ្នានេះ អ្នកពាក្យក្រុមហ៊ុន Meta និយាយថា ក្រុមហ៊ុនពុំយល់ស្របនឹងការចោទប្រកាន់ទេ ពីព្រោះក្រុមហ៊ុនបានបង្កើតកម្មវិធីជាច្រើនដើម្បីគាំទ្រអាណាព្យាបាល និងយុវជន ។ ក្រុមហ៊ុនបានប្រកាសនាពេលថ្មីៗថា យើងកំពុងផ្លាស់ប្តូរបទពិសោធន៍ Instagram សម្រាប់យុវជនរាប់លាននាក់ដោយការប្រើប្រាស់គណនីថ្មី ។ ហេតុនេះ វានឹងកំណត់អ្នកដែលអាចទំនាក់ទំនងមកយុវជនដោយស្វ័យប្រវត្តិ និងកំណត់ការមើលឃើញខ្លឹមសារ ៕

ប្រទេសអាល្លឺម៉ង់ ៖ ក្រុមហ៊ុនមួយនៅប្រទេសអាល្លឺម៉ង់បានបង្ហាញត្រាក់ទ័រអគ្គិសនីទើបផលិត ដែលវាដំណើរការដោយការសាកថ្មជំនួសការប្រើប្រាស់ប្រេងម៉ាស៊ូត ។ ក្រុមហ៊ុននេះមានគោលបំណងជួយកាត់បន្ថយការចំណាយដើមទុនពេលប្រើប្រាស់ ជាពិសេស ក្នុងវិស័យកសិកម្ម ហើយក្រុមហ៊ុនគ្រោងផលិតត្រាក់ទ័រអគ្គិសនីនៅចុងឆ្នាំ២០២៥ ។

ក្រុមហ៊ុនបានដាក់ឈ្មោះត្រាក់ទ័រអគ្គិសនីថា «Tadus» គឺដាក់តាមឈ្មោះរបស់ក្រុមហ៊ុន ។ បច្ចុប្បន្ន ក្រុមហ៊ុនកំពុងសាកល្បងប្រើប្រាស់ត្រាក់ទ័រអគ្គិសនីក្នុងកសិដ្ឋានមួយកន្លែងនៅភាគអាគ្នេយ៍ប្រទេសអាល្លឺម៉ង់ ហើយក្រុមហ៊ុនបញ្ជាក់ថា ត្រាក់ទ័រអគ្គិសនីនេះអាចប្រើប្រាស់ចាប់ពី៥ម៉ោង ទៅ១០ម៉ោងសម្រាប់ការសាកថ្ម១លើក ហើយវាអាស្រ័យលើការប្រើប្រាស់ផងដែរ ។ ប៉ុន្តែត្រាក់ទ័រនេះពុំអាចប្រើប្រាស់ជាមួយការងារធ្ងន់ៗបានទេ ។

ចំណែកការសាកថ្មត្រាក់ទ័រនឹងចំណាយពេលរហូតដល់៨ម៉ោង និងអាស្រ័យលើកម្រិតអគ្គិសនីនៅទីតាំងសាកថ្ម ។ បើមានការងារត្រូវប្រើប្រាស់ត្រាក់ទ័រជាបន្ទាន់ គឺអាចផ្អាកការសាកថ្មវាសិន និងផ្លាស់ប្តូរមកប្រើប្រាស់ថ្មមួយទៀត ។

កសិករម្នាក់បានសាកល្បងប្រើប្រាស់ត្រាក់ទ័រអគ្គិសនីក្នុងកសិដ្ឋានរបស់ខ្លួនអស់រយៈពេលជិត១ឆ្នាំ និយាយថា ការប្រើប្រាស់ត្រាក់ទ័រអគ្គិសនីអាចជួយឱ្យខ្លួនអាចសន្សំសំចៃការចំណាយប្រាក់យ៉ាងច្រើន ជាពិសេស ពុំចាំបាច់ទិញប្រេងម៊ាស៊ូតទៀតទេ ដោយសារអាចសាកថ្មត្រាក់ទ័រនៅផ្ទះ ។

បច្ចុប្បន្ន ត្រាក់ទ័រអគ្គិសនីពុំទាន់ដាក់លក់ជាផ្លូវការទេ ដោយសារគេត្រូវចំណាយពេលសាកល្បងប្រើប្រាស់ក្នុងកសិដ្ឋានជាក់ស្តែង និងកែសម្រួលបច្ចេកទេសបន្ថែមទៀត ។ បើការសាកល្បងដំណើរការទៅយ៉ាងរលូន ក្រុមហ៊ុន Tadus រំពឹងថា នឹងអាចផលិតត្រាក់ទ័រអគ្គិសនីនៅចុងឆ្នាំ២០២៥ ។ រីឯតម្លៃរបស់វាវិញ គឺខ្ពស់ជាងត្រាក់ទ័រចាក់ប្រេងម៉ាស៊ូត ប្រមាណ៣៥% ៕

យោងតាមការស្រាវជ្រាវថ្មីបង្ហាញថា ការបាចគ្រាប់ពេជ្រឡើងលើអាកាសនឹងអាចជួយកាត់បន្ថយកំដៅផែនដីមានប្រសិទ្ធភាពខ្លាំងជាងវិធីផ្សេងៗ ហើយសូម្បីតែស្ពាន់ធ័រឌីអុកស៊ីត ក៏ពុំអាចកាត់បន្ថយកំដៅផែនដីបានល្អដូចគ្រាប់ពេជ្រទេ ។ ប៉ុន្តែត្រូវយកគ្រាប់ពេជ្រមកកិនឱ្យម៉ត់ចំនួន៥លានតោនក្នុង១ឆ្នាំ និងត្រូវចំណាយប្រាក់រាប់លានដុល្លារអាមេរិក ។

គ្រាប់ពេជ្រ គឺជាគ្រឿងអលង្ការដ៏មានតម្លៃសម្រាប់មនុស្សភាគច្រើន ហើយវាជាការស្រាវជ្រាវប្លែកជាងគេ ដែលណែនាំឱ្យបាចគ្រាប់ពេជ្រដើម្បីកាត់បន្ថយកំដៅផែនដី ។ អ្នកស្រាវជ្រាវនិយាយថា យើងត្រូវយកគ្រាប់ពេជ្រមកកិនឱ្យម៉ត់ដូចម្សៅ បន្ទាប់មក យកវាទៅបាចលើអាកាស ។

ការលើកឡើងបែបនេះ ស្តាប់មើលទៅគ្មានប្រយោជន៍ ប៉ុន្តែសម្រាប់អ្នកស្រាវជ្រាវបញ្ជាក់ថា វាអាចទៅរួច ។ ការស្រាវជ្រាវថ្មីនេះផ្សព្វផ្សាយក្នុងទស្សនាវដ្តីឈ្មោះ Geophysical Research Letter បង្ហាញថា ភាគល្អិតណាណូរបស់គ្រាប់ពេជ្រមានប្រយោជន៍យ៉ាងខ្លាំងសម្រាប់កាត់បន្ថយកំដៅផែនដី តាមរយៈការបាចពេជ្រដែលកិនរួចទៅលើអាកាស ។

Sandro Vattioni ជាប្រធានក្រុមស្រាវជ្រាវ និងមានជំនាញផ្នែកអាកាសធាតុ មកពីស្ថាប័នបច្ចេកវិទ្យា Zurich ប្រទេសស្វីស និយាយថា ៖ «ការបាចភាគល្អិតគ្រាប់ពេជ្រ និង CaCo3 នឹងធ្វើឱ្យកំដៅធ្លាក់ចុះយ៉ាងខ្លាំង ដោយសារវាមានគុណសម្បតិ្តផ្នែកពន្លឺច្រើនជាងវត្ថុផ្សេងៗ ដែលបានស្រាវជ្រាវកន្លងមក» ។

អស់រយៈពេលជាច្រើនឆ្នាំហើយដែលអ្នកស្រាវជ្រាវគិតថា តើការបាចភាគល្អិតលើមេឃនឹងអាចបង្កើតស្រមោលគ្រប់គ្រាន់ ដើម្បីប្រឆាំងនឹងផលប៉ះពាល់ដោយសារឧស្ម័នផ្ទះកញ្ចក់ ដែលធ្វើឱ្យពិភពលោកក្តៅដែរឬទេ? ហើយបើអាចធ្វើបាន តើវានឹងមានប្រសិទ្ធភាពកម្រិតណា?

កន្លងមក ស្ពាន់ធ័រឌីអុកស៊ីតទទួលបានការចាប់អារម្មណ៍យ៉ាងខ្លាំង ដោយសារវាកើតឡើងតាមធម្មជាតិ និងមានប្រភពពីភ្នំភ្លើង ។ ហេតុនេះ បញ្ជាក់ថា វានឹងអាចជួយឱ្យសីតុណ្ហភាពផែនដីធ្លាក់ចុះបាន ប៉ុន្តែមានផលប៉ះពាល់ខ្លាំង ។

អ្នកស្រាវជ្រាវសុំពេលមួយរយៈដើម្បីស្រាវជ្រាវឱ្យប្រាកដចិត្តថា តើភាគល្អិតគ្រាប់ពេជ្រដែលបាចក្នុងបរិយាកាសនឹងមានគុណសម្បត្តិ និងគុណវិបត្តិអ្វីខ្លះ? អ្នកស្រាវជ្រាវខ្លះបានព្យាយាមស្វែងរកវិធីផ្សេងដើម្បីកាត់បន្ថយកំដៅផែនដី ប៉ុន្តែពួកគេរកឃើញថា ភាគល្អិតផ្សេងៗគ្មានប្រសិទ្ធភាពទេ សូម្បីតែស្ពាន់ធ័រឌីអុកស៊ីត ក៏ពុំអាចកាត់បន្ថយកំដៅផែនដីបានល្អដូចគ្រាប់ពេជ្រដែរ ។

ទោះជាលទ្ធផលការស្រាវជ្រាវថ្មីគួរឱ្យចាប់អារម្មណ៍ក្តី ប៉ុន្តែនៅមានឧបសគ្គយ៉ាងខ្លាំង ដោយសារគ្រាប់ពេជ្រមានតម្លៃថ្លៃ ហើយការយកគ្រាប់ពេជ្រមកកិនឱ្យម៉ត់ ចំនួន៥លានតោនក្នុង១ឆ្នាំ គឺត្រូវចំណាយប្រាក់រាប់លានដុល្លារអាមេរិកឯណោះ ។ ដូច្នេះ ពិភពលោកគួរតែអនុវត្តងាយស្រួលជាងនេះ គឺកាត់បន្ថយឧស្ម័នផ្ទះកញ្ចក់ ចាប់ពីឆ្នាំ២០២៤ តទៅ ព្រមទាំងថែរក្សាធម្មជាតិ ដែលវាជាវិធីងាយស្រួល និងអាចអនុវត្តបាន ៕

ប្រទេសចិន ៖ ក្រុមអ្នកស្រាវជ្រាវចិន និងបរទេសបានសហការគ្នាស្រាវជ្រាវជាថ្មីក្នុងល្អាងសួងហឺ ដែលជាល្អាងមានប្រវែង វែងបំផុតនៅតំបន់អាស៊ី ហើយពួកគេរកឃើញថា ប្រវែងរបស់ល្អាងបានកើនឡើងបន្ថែមទៀតពុំគួរឱ្យជឿ ។ ការស្រាវជ្រាវនេះបានធ្វើឡើងចាប់ពីថ្ងៃទី៧ ដល់ថ្ងៃទី២៤ ខែតុលា ឆ្នាំ២០២៤ ។

សារព័ត៌មានស៊ីនហួរបានរាយការណ៍ កាលពីថ្ងៃទី២៤ ខែតុលា ឆ្នាំ២០២៤ ថា ក្រុមអ្នកស្រាវជ្រាវអន្តរជាតិនិយាយថា ការស្រាវជ្រាវផ្នែកវិទ្យាសាស្ត្រកម្រិតអន្តរជាតិ អំពីល្អាងសួងហឺ លើកទី២៣ ក្នុងខេត្តហ្គីចូវ នៅភាគនិរតីប្រទេសចិនឃើញថា ប្រវែងរបស់ល្អាងនេះកើនឡើងពី៤០៩គីឡូម៉ែត្រ រហូតដល់៤៣៧គីឡូម៉ែត្រ ។

ល្អាងសួងហឺ ត្រូវបានគេចាត់ទុកថា គឺជាល្អាងវែងបំផុតក្នុងតំបន់អាស៊ី, ល្អាងវែងបំផុតលំដាប់ទី៣ លើពិភពលោក និងជាល្អាងថ្ម Dolomite វែងបំផុតលើពិភពលោក ។ តាមការស្រាវជ្រាវចុងក្រោយបង្អស់បញ្ជាក់ថា ល្អាងនេះមានរន្ធតភ្ជាប់គ្នាចំនួន១១៥រន្ធ ដែលបានកើនឡើងពី១០៧រន្ធ ហើយក្នុងល្អាងមានហ្វូស៊ីលសត្វកើនឡើងផងដែរ ដូចជា ៖ ហ្វូស៊ីលខ្លាឃ្មុំយក្ស ២ក្បាល ។

ការស្រាវជ្រាវផ្នែកវិទ្យាសាស្ត្រជាច្រើនលើកកន្លងមក បានរកឃើញហ្វូស៊ីលសត្វខ្លាឃ្មុំយក្សជាច្រើនដុំ ហើយដុំហ្វូស៊ីលចាស់បំផុត គឺមានអាយុ១សែនឆ្នាំ ។ នេះបញ្ជាក់ថា ខ្លាឃ្មុំយក្សធ្លាប់រស់នៅខេត្តហ្គីចូវ ហើយបច្ចុប្បន្ន ខ្លាឃ្មុំប្រភេទនេះរស់នៅខេត្តស៊ីឈួន, សានស៊ី និងហ្គាន់ស៊ូ ។

លោក Jean Bottassi អ្នកស្រាវជ្រាវល្អាងជនជាតិបារាំង និងជាប្រធានក្រុមស្រាវជ្រាវលើកនេះ ដែលលោកមានបទពិសោធន៍ស្រាវជ្រាវល្អាងនៅចិនអស់ជាង៣០ឆ្នាំ និយាយថា ក្រុមអ្នកស្រាវជ្រាវបានស្កេនឡាស៊ែរ 3D ដើម្បីបង្កើនភាពត្រឹមត្រូវនៃការវាស់វែង ។ ក្រៅពីនេះ ពួកគេបានរកឃើញទន្លេក្រោមដីដ៏ធំទៀតផង ហើយអ្នកស្រាវជ្រាវសន្និដ្ឋានថា ទន្លេនេះ គឺជាមូលហេតុដែលធ្វើឱ្យប្រវែងល្អាងកើនឡើងបន្ថែមទៀត ។

លោកបន្តថា តាំងពីចុងឆ្នាំ១៩៨០ ក្រុមអ្នកស្រាវជ្រាវចិន និងបរទេសបានអាប់ឌេតប្រវែងរបស់ល្អាងម្តងហើយម្តងទៀត ហើយបានរកឃើញហ្វូស៊ីលក្នុងល្អាង និងសត្វមានជីវិតជាច្រើន ។ យើងចាត់ទុកថា នេះជាការស្រាវជ្រាវផ្នែកវិទ្យាសាស្ត្រដ៏សម្បូរបែប និងមានតម្លៃ ។

អ្នកស្រាវជ្រាវល្អាងជនជាតិបារាំងម្នាក់ទៀតឈ្មោះ Anne Cholin និយាយថា ល្អាងសួងហឺ គឺជាល្អាងពិសេសដ៏មានតម្លៃផ្នែកបុរាណវិទ្យា និងការសិក្សាពីបម្រែបម្រួលអាកាសធាតុក្នុងសម័យបុរាណ ។ ការរុករកល្អាង និងសមុទ្រជ្រៅលើអវកាស គឺជាវិធីយល់ដឹងពីពិភពលោកដែលយើងរស់នៅតាមបែបវិទ្យាសាស្ត្រ ។

ការស្រាវជ្រាវក្នុងល្អាងសួងហឺ ប្រទេសចិន គឺមានការចូលរួមពីអ្នកស្រាវជ្រាវចិន, បារាំង, ព័រទុយហ្គាល់, បែលហ្សិក និងអ្នកស្រាវជ្រាវមកពីប្រទេសផ្សេងទៀត ។ ល្អាងសួងហឺ ត្រូវបានគេដាក់ឈ្មោះថា «សារមន្ទីរល្អាងធម្មជាតិ» ហើយក្រុមអ្នកស្រាវជ្រាវមកពីប្រទេសនានាបានស្រាវជ្រាវក្នុងល្អាងនេះ យ៉ាងហោចណាស់ ២២លើក គិតចាប់ពីឆ្នាំ១៩៨៨ ៕

សហរដ្ឋអាមេរិក៖ អ្នកវិទ្យាសាស្ត្រអាមេរិកបានបង្កើតបច្ចេកវិទ្យាថ្មីសម្រាប់ដាំរុក្ខជាតិក្នុងទីងងឹត ជាមួយគោលបំណងផ្លាស់ប្តូរវិស័យកសិកម្មយ៉ាងឆាប់រហ័ស ធ្វើឱ្យកសិកម្មកាន់តែមានប្រសិទ្ធភាព និរន្តរភាព និងសម្របខ្លួនទៅនឹងបរិស្ថានដូចជាលំហ ក៏ដូចជាធ្វើឱ្យទីផ្សារម្ហូបអាហារមានស្ថេរភាព។

បច្ចេកវិទ្យាថ្មីនេះមានឈ្មោះថា Electric Agriculture ឬអគ្គិសនីកសិកម្ម ដែលមានសក្តានុពលក្នុងការដោះស្រាយបញ្ហាមិនមានប្រសិទ្ធភាពជាច្រើននៃកសិកម្មបែបប្រពៃណី ដូចជាទាមទារទឹក ជី និងដីច្រើនដើម្បីដាំដំណាំ។

ប្រព័ន្ធនេះនឹងជំនួសរស្មីសំយោគប្រពៃណី ជាមួយនឹងប្រតិកម្មបំប្លែងកាបូនឌីអុកស៊ីត (CO2) ប្រកបដោយប្រសិទ្ធភាពទៅជាម៉ូលេគុលសរីរាង្គដែលរុក្ខជាតិអាចប្រើប្រាស់បាន។ មានន័យថា បច្ចេកវិទ្យានេះនឹងជួយយើងដាំដុះរុក្ខជាតិដោយសេរី ដោយមិនបាច់ខ្វល់ពីលក្ខខណ្ឌអាកាសធាតុនោះទេ យើងចង់ដាំពេលណាខែណាក៏រុក្ខជាតិទាំងនោះលូតលាស់ល្អដែរ។ ដូច្នេះបច្ចេកវិទ្យា Electric Agriculture អាចបម្រើជាវិធីសាស្រ្តដ៏មានប្រយោជន៍បំផុតមួយសម្រាប់ផលិតអាហារបន្ថែមនៅពេលចាំបាច់។

ជាការពិតណាស់ នៅពេលដែលអាកាសធាតុប្រែប្រួល វានឹងប៉ះពាល់ដល់វិស័យកសិកម្មបែបប្រពៃណី ដូច្នេះការបង្កើតបច្ចេកវិទ្យាផលិតកម្មស្បៀងកម្រិតខ្ពស់នេះ នឹងកាន់តែមានសារៈសំខាន់ក្នុងការធ្វើឱ្យទីផ្សារម្ហូបអាហារមានស្ថេរភាព ក៏ដូចជាជួយគាំទ្រដល់ចំនួនប្រជាជនដែលកំពុងកើនឡើង។ Electric Agriculture មានសក្តានុពលក្នុងការដោះស្រាយបញ្ហាលេចធ្លោមួយចំនួននៃកសិកម្មបែបប្រពៃណីដូចជា ទាមទារទឹក ជី និងដីច្រើនដើម្បីដាំដំណាំ។

កសិកម្មនឹងផលិតអាហារក្នុងបរិយាកាសគ្រប់គ្រង ដែលអនុញ្ញាតឱ្យមានការគ្រប់គ្រងធនធានច្បាស់លាស់ជាងមុន និងកាត់បន្ថយផលប៉ះពាល់បរិស្ថាននៃការធ្វើកសិកម្ម។ លើសពីនេះ វិធីសាស្ត្រនេះក៏អាចកាត់បន្ថយផលប៉ះពាល់នៃការប្រែប្រួលអាកាសធាតុ តាមរយៈការកាត់បន្ថយការផលិតស្បៀងពីគំរូអាកាសធាតុ និងការប្រែប្រួលតាមរដូវ។ ដូច្នេះបច្ចេកវិទ្យាទំនើបនេះនឹងដាក់ដំណើរក្នុងប្រទេសអាមេរិកឆាប់ៗនេះ៕

ប្រទេសចិន៖ នៅក្នុងត្រីមាសទីបីនៃឆ្នាំ ២០២៤ នេះការលក់ iPhone របស់ក្រុមហ៊ុន Apple នៅក្នុងប្រទេសចិន ដែលជាប្រទេសមហាអំណាចទីពីររបស់ពិភពលោកបានធ្លាក់ចុះ ០.៣% ខណៈពេលដែលក្រុមហ៊ុន Huawei វិញបានកើនឡើងរហូតដល់ ៤២%។

យោងតាមទិន្នន័យដែលចេញផ្សាយដោយក្រុមហ៊ុនស្រាវជ្រាវទីផ្សារ IDC កាលពីថ្ងៃទី ២៥ ខែតុលា បានឱ្យដឹងថា ទីផ្សារស្មាតហ្វូនរបស់ចិនគឺបានចាប់ផ្តើមកើនឡើងខ្លាំងជាបន្តបន្ទាប់ៗ ដោយចាប់ពីខែកក្កដាដល់ចុងខែកញ្ញា ស្មាតហ្វូនចំនួន ៦៨.៨ លានគ្រឿងត្រូវបានលក់អស់ កើនឡើង ៣.២% ធៀបនឹងរយៈពេលដូចគ្នាកាលពីឆ្នាំមុន។

Arthur Guo អ្នកវិភាគប្រព័ន្ធអតិថិជននៅ IDC China បាននិយាយថា “រលកនៃការធ្វើឱ្យប្រសើរឡើងនូវឧបករណ៍ កំពុងជំរុញឱ្យមានការងើបឡើងវិញប្រកបដោយនិរន្តរភាព នៃទីផ្សារស្មាតហ្វូននៅក្នុងប្រទេសចិន” ។ ទោះបីជាបញ្ហាប្រឈមផ្នែកសេដ្ឋកិច្ចកំពុងបន្តក៏ដោយ អ្នកប្រើប្រាស់នៅតែចំណាយច្រើនលើស្មាតហ្វូនថ្មី បន្ទាប់ពីតម្រូវការកើនឡើងរយៈពេល ៣ ឆ្នាំជាប់ៗគ្នា។ បច្ចុប្បន្នម៉ាកយីហោដែលឈានមុខគេនៅក្នុងទីផ្សារប្រទេសចិនគឺ ក្រុមហ៊ុន Vivo ដែលជាក្រុមហ៊ុនលក់ទូរស័ព្ទតម្លៃទាបជាចម្បង ជាមួយនឹងចំណែកទីផ្សារ ១៨.៦% កើនឡើង ២១.៥% បើធៀបនឹងឆ្នាំមុន។

ខណៈដែលក្រុមហ៊ុន Apple វិញទទួលបានចំណាត់ថ្នាក់លេខ ២ ជាមួយនឹង ១៥.៦% ធ្លាក់ចុះ ០.៣% ក្នុងរយៈពេលដូចគ្នា។ ទន្ទឹមនឹងនេះដែរ ក្រុមហ៊ុន Huawei បានកើនឡើងចំនួន ៤២% ឡើងមកនូវចំណាត់ថ្នាក់លេខ ៣ ដែលឈានដល់ចំណែកទីផ្សារចំនួន ១៥.៣% ហើយ Xiaomi និង Honor គឺជាម៉ាកយីហោពីរដែលនៅសល់ក្នុងកំពូលទាំង ៥ ដែលមានចំណែកទីផ្សារ ១៤.៨% និង ១៤.៦% រៀងគ្នា។ គួរបញ្ជាក់ដែរថា Huawei កាលពីមុនមិនបានស្ថិតនៅលំដាប់កំពូលទាំង ៥ ដូចឆ្នាំនេះទេ។ នេះមានន័យថា ការស្ទុះងើបឡើងវិញរបស់ Huawei គឺគួរឱ្យចាប់អារម្មណ៍បំផុត៕