ប្រទេសថៃ ៖ កាលពីថ្ងៃទី១៧ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា រដ្ឋាភិបាលក្រោមការដឹកនាំរបស់នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ នឹងចំណាយប្រាក់ជាង៣ពាន់លានបាត (ឬស្មើជិត៩ម៉ឺនដុល្លារអាមេរិក) សម្រាប់បង់ថ្លៃទឹក-ភ្លើង នៅខែកញ្ញា ឆ្នាំ២០២៤ ជំនួសពលរដ្ឋដែលរងផលប៉ះពាល់ដោយសារទឹកជំនន់ ។

នៅថ្ងៃទី១៦ ខែកញ្ញា កន្លងមក នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានលើកឡើងពីការបង្កើតមជ្ឈមណ្ឌលគ្រប់គ្រងស្ថានការណ៍ទឹកជំនន់ ដើម្បីដោះស្រាយបញ្ហាដែលកើតឡើងឱ្យទាន់ពេលវេលា ។ មជ្ឈមណ្ឌលនេះនឹងដោះស្រាយរាល់បញ្ហាគ្រោះធម្មជាតិទាំងអស់ ឬស្វែងរកប្រាក់ឧបត្ថម្ភ និងសម្រេចចិត្តយ៉ាងឆាប់រហ័ស ។

ក្រៅពីនេះ នាយករដ្ឋមន្ត្រីថៃក៏បានជជែកពិភាក្សាជាមួយក្រសួងមហាផ្ទៃផងដែរ អំពីការចំណាយប្រាក់បង់ថ្លៃទឹក-ភ្លើងនៅខែកញ្ញា សម្រាប់ពលរដ្ឋរស់នៅតំបន់រងផលប៉ះពាល់ដោយសារទឹកជំនន់ ។ ហេតុនេះ ពលរដ្ឋពុំចាំបាច់បង់ថ្លៃទឹក-ភ្លើងនៅខែកញ្ញាទេ ហើយនៅខែតុលា នឹងមានបញ្ចុះតម្លៃទឹក-ភ្លើង ៣០% ដោយសារពលរដ្ឋត្រូវប្រើប្រាស់ទឹកយ៉ាងច្រើនសម្រាប់លាងសម្អាតផ្ទះពីគំនរភក់ ។

លោកស្រី ផេថងថាន ស៊ីណាវ៉ាត់ បន្តថា វិធានការនេះនឹងជួយសម្រួលដល់ពលរដ្ឋរស់នៅតំបន់ទឹកជំនន់ ដោយសារពួកគេជួបការលំបាកខ្លាំង និងខូចខាតទ្រព្យសម្បត្តិអស់យ៉ាងច្រើន ។ បើស្ថានការណ៍ទឹកជំនន់នៅតែអូសបន្លាយយូរជាងនេះ រដ្ឋាភិបាលនឹងមានវិធានការជួយពលរដ្ឋបន្ថែមទៀត និងដោះស្រាយបញ្ហាឱ្យចំគោលដៅ ។

ចំណែកការជួសជុល និងសម្អាតលំនៅឋានរបស់ពលរដ្ឋក្រោយទឹកជំនន់ គឺរដ្ឋាភិបាលបានបញ្ជូនកម្លាំងទាហានទៅជួយជួសជុលលំនៅឋានពលរដ្ឋ ។ ប៉ុន្តែមានបញ្ហាមួយចំនួន ដោយសារកម្លាំងទាហានពុំគ្រប់គ្រាន់ ទើបស្នើឱ្យស្ថាប័នអប់រំក្នុងតំបន់ក្បែរៗបញ្ជូនកម្លាំងមកជួយជួសជុលលំនៅឋានពលរដ្ឋឱ្យបានឆាប់រហ័សបំផុត ។ រីឯលំនៅឋានណាខូចខាតរហូតដល់៧០% គឺពលរដ្ឋនឹងទទួលបានប្រាក់ឧបត្ថម្ភពីរដ្ឋាភិបាល ចំនួន២សែន៣ម៉ឺនបាត សម្រាប់ផ្ទះ១ខ្នង ។

លោកស្រីនាយករដ្ឋមន្ត្រីបញ្ជាក់ថា ក្រសួងការបរទេសថៃបានពិភាក្សាអំពីបញ្ហាគ្រោះធម្មជាតិជាមួយប្រទេសផ្សេងៗដើម្បីរកដំណោះស្រាយរួមគ្នា ដោយសារប្រទេសថៃបានរងគ្រោះដោយទឹកជំនន់យូរមកហើយ ៕

ប្រទេសថៃ ៖ ក្រសួងធនធានទឹក និងឧតុនិយមថៃបានចេញសេចក្តីប្រកាសថា ខ្យល់ព្យុះថ្មីមួយទៀតឈ្មោះ «Depression» នឹងបោកបក់មកលើភាគកណ្តាលប្រទេសវៀតណាម បន្ទាប់មក វានឹងសំដៅមកប្រទេសថៃ ។ ហេតុនេះ សូមពលរដ្ឋថៃត្រៀមខ្លួនឱ្យបានល្អ ដោយសារខ្យល់ព្យុះថ្មីនឹងធ្វើឱ្យថៃមានភ្លៀងធ្លាក់ខ្លាំង និងខ្យល់កន្ត្រាក់ ចាប់ពីថ្ងៃទី២០ ដល់ថ្ងៃទី២៣ ខែកញ្ញា ឆ្នាំ២០២៤ ។

កាលពីថ្ងៃទី១៧ ខែកញ្ញា គេហទំព័ររបស់នាយកដ្ឋានឧតុនិយមថៃបានប្រកាសថា ប្រទេសថៃនឹងរងឥទ្ធិពលដោយសារខ្យល់ព្យុះថ្មីឈ្មោះ Depression ដែលបក់មកពីសមុទ្រចិនខាងត្បូង ហើយខ្យល់ព្យុះនេះនឹងធ្វើឱ្យមានភ្លៀងធ្លាក់ខ្លាំងក្នុងតំបន់ជាច្រើនរបស់ថៃ ។

ខ្យល់ព្យុះនេះកំពុងបក់ទៅទិសខាងលិចក្នុងល្បឿន៤០គីឡូម៉ែត្រក្នុង១ម៉ោង ហើយវានឹងមានកម្លាំងខ្លាំងក្លាយជាព្យុះត្រូពិក ហើយថៃសន្និដ្ឋានថា ចាប់ពីថ្ងៃទី២០ ដល់ថ្ងៃទី២១ ខែកញ្ញា វានឹងបក់មកកាន់តំបន់ឆ្នេរសមុទ្រភាគកណ្តាលប្រទេសវៀតណាម បន្ទាប់មក កម្លាំងខ្យល់ព្យុះនឹងថមថយបន្តិច ។ វានឹងធ្វើឱ្យប្រទេសថៃមានភ្លៀងធ្លាក់ខ្លាំងនៅភាគខាងជើង, ភាគឦសាន, ទីក្រុងបាងកក និងបរិវេណជុំវិញ, ភាគខាងកើត និងភាគខាងត្បូង ហើយថៃនឹងមានខ្យល់កន្ត្រាក់ ចាប់ពីថ្ងៃទី២០ ដល់ថ្ងៃទី២៣ ខែកញ្ញា ។

ចាប់ពីថ្ងៃទី១៧ ដល់ថ្ងៃទី២១ ខែកញ្ញា ខ្យល់មូសុងមានកម្លាំងខ្លាំងបានបក់មកភាគខាងជើង, ភាគកណ្តាល និងភាគឦសាន ខណៈខ្យល់មូសុងនិរតីបក់ខ្លាំងនៅសមុទ្រអាន់ដាម៉ាន់ភាគខាងត្បូង និងឈូងសមុទ្រថៃ ។ ហេតុនេះ វាធ្វើឱ្យភាគខាងជើង, ភាគឦសាន, ភាគកណ្តាល ព្រមទាំងទីក្រុងបាងកក និងតំបន់ជុំវិញមានភ្លៀងធ្លាក់ខ្លាំង ក៏ដូចជាមានភ្លៀងធ្លាក់ខ្លាំងនៅតំបន់ខ្លះរបស់ភាគខាងកើត និងខាងត្បូង ។

ចំណែកទឹករលកនៅសមុទ្រអាន់ដាម៉ាន់ និងឈូងសមុទ្រថៃនឹងមានកម្លាំងកាន់តែខ្លាំង គឺទឹករលកមានកម្ពស់ចាប់ពី២ម៉ែត្រ ទៅ៤ម៉ែត្រ ខណៈបរិវេណដែលមានផ្គររន្ទះ ទឹករលកនឹងមានកម្ពស់ជាង៤ម៉ែត្រ ។ រីឯនៅឈូងសមុទ្រថៃផ្នែកខាងក្រោម ទឹករលកនឹងមានកម្ពស់២ម៉ែត្រ ខណៈបរិវេណមានផ្គររន្ទះ ទឹករលកនឹងមានកម្ពស់ជាង៣ម៉ែត្រ ។

ភ្នាក់ងារឧតុនិយមថៃបានសំណូមពរឱ្យអ្នកនេសាទនៅតំបន់ប្រឈមត្រូវនេសាទដោយការប្រុងប្រយ័ត្ន និងចៀសវាងចេញនេសាទនៅតំបន់មានផ្គររន្ទះ ។ រីឯបរិវេណសមុទ្រអាន់ដាម៉ាន់ និងឈូងសមុទ្រថៃ គួរផ្អាកការនេសាទនៅថ្ងៃដែលខាងឧតុនិយមប្រកាស ហើយពលរដ្ឋត្រូវតាមដានស្ថានការណ៍អាកាសធាតុតាមការប្រកាសរបស់ឧតុនិយម ឬតាមដានក្នុងគេហទំព័រ ៕

ប្រទេសថៃ ៖ នៅខែកញ្ញា ឆ្នាំ២០២៤ ខ្យល់ព្យុះ Yagi បានបោកបក់មកលើប្រទេសវៀតណាម មីយ៉ាន់ម៉ា ឡាវ និងថៃ ហើយបានបំផ្លិចបំផ្លា.ញ ហេដ្ឋារចនាសម្ព័ន្ធ អគារ លំនៅឋាន សម្ភារៈ និងដំណាំអស់យ៉ាងច្រើនមហាសាល ។ លើសពីនេះ នៅតាមវត្តអារ៉ាមរបស់ថៃ ក៏បានរងផលប៉ះពាល់ខ្លាំងផងដែរ ដោយសារមានភ្លៀងធ្លាក់ជាប់ៗគ្នាអស់ជាច្រើនសប្តាហ៍ ។

សារព័ត៌មានថៃរាយការណ៍ថា ព្រះកេសព្រះពុទ្ធបដិមាខ្នាតយក្ស ដែលតម្កល់នៅវត្ត «ព្រះធាតុដយសាកេត» ស្ថិតនៅស្រុកដយសាកេត ខេត្តឈៀងម៉ៃ ប្រទេសថៃ បានបាក់ខូចខាត ដោយសារមានភ្លៀងធ្លាក់ខ្លាំងជាបន្តបន្ទាប់ ហើយទឹកភ្លៀងបានជ្រាបចូលផ្នែកខាងក្នុងព្រះកេស ទើបព្រះពុទ្ធបដិមាអង្គនេះពុំអាចទ្រាំទ្រទម្ងន់ទឹកភ្លៀងបាន ។ ព្រះចៅអធិការវត្តមានសង្ឃដីកាថា នឹងជួសជុលព្រះកេសព្រះពុទ្ធបដិមាឡើងវិញ ព្រមទាំងរៀបចំពិធីបើកព្រះនេត្រ ។

កាលពីថ្ងៃទី១៥ ខែកញ្ញា ឆ្នាំ២០២៤ សារព័ត៌មាន Thairath រាយការណ៍ថា ព្រះកេសព្រះពុទ្ធបដិមាខ្នាតយក្សនៅវត្តព្រះធាតុដយសាកេត ស្ថិតនៅស្រុកដយសាកេត ខេត្តឈៀងម៉ៃ បានបាក់ខូចខាតដោយសារភ្លៀងធ្លាក់ខ្លាំងពេក ទើបបណ្តាលឱ្យព្រះកេសពុំអាចទទួលទម្ងន់ទឹកភ្លៀងបាន ។ ហេតុការណ៍នេះធ្វើឱ្យអ្នកស្រុកដែលគោរពព្រះពុទ្ធសាសនាកើតទុក្ខ ខណៈអ្នកស្រុកខ្លះទៀតបារម្ភខ្លាចមានហេតុការណ៍អាក្រក់កើតឡើង ពីព្រោះវត្តទើបតែរៀបចំពិធីបំពេញបេះដូងព្រះពុទ្ធបដិមារួចរាល់ ។

ក្រុមការងារសារព័ត៌មាន Thairath បានធ្វើដំណើរមកកាន់វត្តព្រះធាតុដយសាកេត ឃើញថា វត្តបានយកផ្ទាំងសំណាញ់យ៉ាងធំមកគ្របពីលើព្រះកេសព្រះពុទ្ធបដិមាបរិនិព្វានខ្នាតយក្សដែលខូចខាតនេះ ព្រមទាំងដាក់ស្លាកថា ហាមបុគ្គលពុំពាក់ព័ន្ធចូលទៅផ្នែកខាងក្នុង ។ ប៉ុន្តែក្រុមការងារសារព័ត៌មានពុំបានជួបព្រះចៅអធិការវត្តទេ ពីព្រោះព្រះអង្គនិមន្តទៅខេត្តសមុទ្រប្រាកាន ។

តាមការសាកសួរព្រះសង្ឃគង់នៅវត្តនេះឱ្យដឹងថា កាលពីថ្ងៃទី១២ ខែកញ្ញា កន្លងមក វត្តបានរៀបចំពិធីបំពេញបេះដូងព្រះពុទ្ធបដិមាបរិនិព្វានខ្នាតយក្ស ស្រាប់តែកើតហេតុការណ៍បាក់ព្រះកេសព្រះពុទ្ធបដិមា នៅព្រឹកថ្ងៃទី១៣ ខែកញ្ញា ។ ព្រះសង្ឃបន្តថា វាបណ្តាលមកពីភ្លៀងធ្លាក់ខ្លាំងអស់ជាច្រើនសប្តាហ៍ ហើយទឹកភ្លៀងបានជ្រាបចូលផ្នែកខាងក្នុងព្រះកេស ទើបធ្វើឱ្យព្រះកេសមានទម្ងន់ធ្ងន់ និងបាក់បែបនេះ ។

វត្តនឹងជួលក្រុមជាងម៉ៅការមកជួសជុលព្រះកេសព្រះពុទ្ធបដិមាឱ្យរឹងមាំជាងមុន ហើយរំពឹងថា អាចចំណាយពេលប្រមាណ៣ខែ ទើបជួសជុលរួចរាល់ ។ ជាមួយគ្នានេះ វត្តបានសំណូមពរពុទ្ធបរិស័ទទាំងអស់សូមកុំផ្សព្វផ្សាយរូបភាព និងចុះផ្សាយព័ត៌មាននេះ ពីព្រោះបារម្ភថា នឹងប៉ះពាល់ដល់ផ្លូវចិត្តពុទ្ធបរិស័ទ ជាពិសេស អ្នករស់នៅស្រុកដយសាកេត ខេត្តឈៀងម៉ៃ ដែលពួកគេគោរព និងមានជំនឿលើព្រះបដិមាអង្គនេះយ៉ាងខ្លាំង ។

គួរបញ្ជាក់ថា ព្រះពុទ្ធបដិមាខ្នាតយក្សនេះបានកសាងរួចរាល់នៅឆ្នាំ២០២៤ ដែលមានប្រវែងសរុប ៥៩.៩៩ម៉ែត្រ ។ ព្រះពុទ្ធបដិមាត្រូវបានកសាងឡើងយ៉ាងស្រស់ស្អាត និងជាទីគោរពរបស់ពលរដ្ឋថៃ និងភ្ញៀវទេសចរ ហើយវត្តទើបតែរៀបចំពិធីបួងសួងបើកព្រះនេត្រ កាលពីថ្ងៃទី១២ ខែកញ្ញា ប៉ុណ្ណោះ ៕

ប្រទេសថៃ ៖ នៅខែកញ្ញា ឆ្នាំ២០២៤ ខេត្តឈៀងរ៉ៃ ប្រទេសថៃ បានរងផលប៉ះពាល់ដោយសារឥទ្ធិពលខ្យល់ព្យុះ Yagi ដែលបណ្តាលឱ្យមានទឹកជំនន់លិចលំនៅឋានពលរដ្ឋ និងខូចខាតទ្រព្យសម្បត្តិអស់យ៉ាងច្រើន ។ ក្រោយពេលទឹកជំនន់ស្រក ពលរដ្ឋខេត្តឈៀងរ៉ៃ បានសហការជាមួយអាជ្ញាធរសម្អាត និងជួសជុលលំនៅឋានដែលពោរពេញដោយដីភក់ ។

កាលពីថ្ងៃទី១៧ ខែកញ្ញា សារព័ត៌មានថៃរាយការណ៍ថា ស្ថានការណ៍ទឹកជំនន់នៅខេត្តឈៀងរ៉ៃបានធូរស្រាលបន្តិចហើយ ប៉ុន្តែខេត្តភាគខាងជើងមួយទៀតឈ្មោះ ផាយ៉ៅ ដែលមានព្រំដែនជាប់ខេត្តឈៀងរ៉ៃ បានជន់លិចយ៉ាងខ្លាំង ។ ទឹកបានហូរពីតំបន់ព្រៃភ្នំភ្លាមៗបណ្តាលឱ្យរថយន្តជាង២០០គ្រឿងខូចខាត និងអណ្តែតក្នុងទឹក ហើយពលរដ្ឋរស់នៅក្នុងទីប្រជុំជនពុំបានត្រៀមខ្លួនមុនទេ ដោយសារឃើញថា ភ្លៀងធ្លាក់តិចជាងមុន ។

អាជ្ញាធរគ្រប់ជាន់ថ្នាក់បានដាស់តឿនពលរដ្ឋថា បើទោះជាភ្លៀងធ្លាក់តិចជាងមុនក្តី ប៉ុន្តែសូមកុំធ្វេសប្រហែសឱ្យសោះ ។ ពលរដ្ឋគួរតែស្តាប់តាមការប្រកាសរបស់អាជ្ញាធរ និងលើកសម្ភារៈទាំងអស់ដាក់នៅទីខ្ពស់ ដើម្បីការពារកុំឱ្យខូចខាតដោយសារទឹកជំនន់ ។

នៅខេត្តផាយ៉ៅ មានភ្លៀងធ្លាក់ខ្លាំងត្រឹមតែ២ម៉ោងប៉ុណ្ណោះ ស្រាប់តែមានទឹកហូរពីតំបន់ព្រៃភ្នំលិចម៉ូតូនិស្សិត និងរថយន្តដែលចតនៅខាងមុខសាកលវិទ្យាល័យមួយកន្លែង ។ ក្រៅពីនេះ ទឹកក៏បានជន់លិចលំនៅឋានជិតដល់ដំបូល និងអគារស្នាក់នៅជាច្រើនកន្លែង ខណៈពលរដ្ឋជាង២០០នាក់ជាប់នៅតាមអគារ និងលើដំបូលផ្ទះ ។ អាជ្ញាធរ, ភ្នាក់ងារសង្គ្រោះបន្ទាន់, ប៉ូលិស និងកងទ័ព បានប្រមូលកម្លាំងគ្នាជួយសង្គ្រោះនិស្សិតនៅបរិវេណខាងមុខសាកលវិទ្យាល័យ និងពលរដ្ឋយ៉ាងឆាប់រហ័ស ។

បើទោះជាកម្រិតទឹកជំនន់បានស្រកចុះក្នុងតំបន់មួយចំនួន ប៉ុន្តែទឹកនៅតែហូរខ្លាំងក្នុងតំបន់ផ្សេងទៀតរបស់ខេត្តផាយ៉ៅ ។ អាជ្ញាធររាយការណ៍ថា ម៉ូតូ និងរថយន្តបានខូចខាតដោយសារទឹកជំនន់អស់ជាង២០០គ្រឿង ប៉ុន្តែគ្មានមនុស្សស្លាប់ ឬរងរបួសទេ ។

អភិបាលខេត្តផាយ៉ៅនិយាយថា ភ្លៀងបានធ្លាក់យ៉ាងខ្លាំងអស់រយៈពេលជាង២ម៉ោង ទើបធ្វើឱ្យទឹកហូរពីព្រៃលិចទីប្រជុំជននៅភូមិហួយខៀន ។ អាជ្ញាធរ និងភ្នាក់ងារពាក់ព័ន្ធបានចាត់កម្លាំងជួយសង្គ្រោះពលរដ្ឋ និងត្រួតពិនិត្យការខូចខាតបន្តទៀត ៕

សហរដ្ឋអាមេរិក ៖ លោក Elon Musk ជាម្ចាស់បណ្តាញសង្គម X, SpaceX និងក្រុមហ៊ុន Tesla បានលុបសាររបស់ខ្លួនចេញពីបណ្តាញសង្គម X ក្រោយពីលោកសួរថា ហេតុអ្វីគ្មានការប៉ុនប៉ងធ្វើឃា.ត ប្រធានាធិបតីអាមេរិក លោក ចូ បៃដិន និងអនុប្រធានាធិបតីអាមេរិក លោកស្រី Kamala Harris ។ លោក Elon Musk ថែមទាំងដាក់រូប Emoji មានមុខឆ្ងល់ក្នុងសាររបស់ខ្លួនទៀតផង ។

មូលហេតុដែលលោក Elon Musk សម្រេចចិត្តលុបសារចេញពីបណ្តាញសង្គមនេះ ដោយសារមហាជនពុំពេញចិត្តនឹងសាររបស់លោក ដែលសរសេរពាក់ព័ន្ធដល់ការប្រមាថអាយុជីវិតប្រធានាធិបតីអាមេរិក លោក ចូ បៃដិន ខណៈនាពេលថ្មីៗនេះ មានការប៉ុនប៉ងធ្វើឃាតអតីតប្រធានាធិបតីអាមេរិក លោក ដូណាល់ ត្រាំ លើកទី២ ។

ក្រោយពីបានលុបសារនេះចេញ លោក Elon Musk ក៏សរសេរសារមួយទៀតថា ៖ «ខ្ញុំដឹងថា អ្វីដែលខ្ញុំនិយាយក្នុងបណ្តាញសង្គមធ្វើឱ្យគេរិះគន់នោះ គឺមិនមែនមានន័យថា វានឹងកើតឡើងពិតប្រាកដទេ ។ រីឯរូប Emoji ដែលខ្ញុំដាក់នោះ ពុំមែនជាការកំប្លែងទេ បើអ្នកពុំបានអានការសរសេររបស់ខ្ញុំ» ។

នាយកដ្ឋានសារព័ត៌មានប្រចាំសេតវិមានបានថ្កោលទោសការបង្ហោះសាររបស់លោក Elon Musk ថា គ្មានការទទួលខុសត្រូវយ៉ាងខ្លាំង ។ ប្រធានាធិបតីអាមេរិក លោក ចូ បៃដិន និងអនុប្រធានាធិបតីអាមេរិក លោកស្រី Kamala Harris បានថ្លែងកាលពីថ្ងៃទី១៦ ខែកញ្ញា ថា វាជាដំណឹងអាក្រក់ និងអំពើហិង្សាផ្នែកនយោបាយនៅអាមេរិក ។ យើងនឹងប្រឹងប្រែងទប់ស្កាត់ដើម្បីឱ្យប្រាកដចិត្តថា នឹងគ្មានអំពើហិង្សា ឬការលួចធ្វើឃាតកើតឡើងទៀតទេ ។

រីឯមន្ត្រីនាំពាក្យសេតវិមានអាមេរិកនិយាយថា ៖ «អំពើហិង្សា ឬការធ្វើឃាតនៅអាមេរិក មិនត្រឹមតែត្រូវបានថ្កោលទោសប៉ុណ្ណោះទេ ប៉ុន្តែពុំគួរអ្នកណាម្នាក់យកពាក្យនេះមកនិយាយលេងសើចឡើយ» ។

លោក Elon Musk បានសរសេរសារក្នុងបណ្តាញសង្គម និងធ្វើឱ្យមហាជនរិះគន់ ក្រោយកើតហេតុការណ៍ប៉ុនប៉ងធ្វើឃាតអតីតប្រធានាធិបតីអាមេរិក លោក ដូណាល់ ត្រាំ លើកទី២ កាលពីថ្ងៃទី១៥ ខែកញ្ញា កន្លងមក ។ លោក Elon Musk ទើបតែប្រកាសពីគោលជំហរច្បាស់លាស់របស់លោកកាលពីខែសីហាថា លោកគាំទ្រ លោក ដូណាល់ ត្រាំ មកពីគណបក្ស Republican ដើម្បីប្រកួតប្រជែងយកតំណែងប្រធានាធិបតីអាមេរិក ។

កាលពីដើមខែកញ្ញា ឆ្នាំ២០២៤ លោក ដូណាល់ ត្រាំ បានប្រកាសថា លោកនឹងតែងតាំងលោក Elon Musk ជានាយកគ្រប់គ្រងគណៈកម្មការប្រសិទ្ធភាពរបស់រដ្ឋាភិបាល បើលោក ដូណាល់ ត្រាំ ត្រូវបានជ្រើសរើសជាប្រធានាធិបតីអាមេរិកម្តងទៀត ។

បច្ចុប្បន្ន លោក Elon Musk ក៏បានប្រឈមជាមួយការប្រឆាំងក្នុងសង្គមផងដែរពីក្រុមមនុស្សមានមតិផ្ទុយគ្នាផ្នែកនយោបាយ ។ គេឃើញមានការបង្ហោះសារខ្លីៗមួយចំនួនប្រឆាំងជាមួយលោកក្នុងបណ្តាញសង្គម X កាលពីថ្ងៃទី១៦ ខែកញ្ញា កន្លងមក ៕

ប្រទេសមីយ៉ាន់ម៉ា៖ នេះគឺជារឿងដ៏កម្របំផុតដែលរដ្ឋាភិបាលមីយ៉ាន់ម៉ាបានអំពាវនាវសុំជំនួយពីអន្តរជាតិ ខណៈប្រទេសនេះពីមុនមកបានបដិសេធម្តងហើយម្តងទៀតនូវជំនួយមនុស្សធម៌ពីបរទេស។
ទោះជាយ៉ាងណា ឧត្តមសេនីយ៍ Min Aung Hlaing ដែលជាមេដឹកនាំរដ្ឋាភិបាលមីយ៉ាន់ម៉ាបាននិយាយកាលពីពេលថ្មីៗនេះថា “មន្ត្រីទាំងអស់ត្រូវតែទាក់ទងទៅបរទេសដើម្បីទទួលបានជំនួយ និងការផ្គត់ផ្គង់ដល់ជនរងគ្រោះដោយទឹកជំនន់ ដែលវិធានការសុំជំនួយនេះ ចាំបាច់ត្រូវតែដាក់ពង្រាយឱ្យបានលឿនតាមដែលអាចធ្វើទៅបាន”។

រដ្ឋាភិបាលយោធាមីយ៉ាន់ម៉ាបាននិយាយនៅថ្ងៃតែមួយថាមនុស្សជាង ១២០ នាក់ហើយបានស្លា.ប់និងជាង ២៣៥,០០០ នាក់ត្រូវបានជម្លៀសចេញដោយសារតែទឹកជំនន់។ តំបន់មួយចំនួនបានបាត់បង់ទំនាក់ទំនង ហើយមន្ត្រីក៏កំពុងផ្ទៀងផ្ទាត់ព័ត៌មានអំពីមនុស្សរាប់សិបនាក់ដែលត្រូវបានកប់នៅក្នុងការបាក់ដីនៅឯការដ្ឋានជីកយករ៉ែមាសក្នុងតំបន់ Mandalay ផងដែរ។ ការអំពាវនាវរបស់រដ្ឋាភិបាលយោធាមីយ៉ាន់ម៉ាត្រូវបានចាត់ទុកថាជារឿងដ៏កម្របំផុត ហើយនេះក៏ជាលើកដំបូងហើយ ដែលរដ្ឋាភិបាលមីយ៉ាន់ម៉ាបានអំពាវនាវសុំជំនួយពីអន្តរជាតិ។

គួរបញ្ជាក់ដែរថា បច្ចុប្បន្នប្រទេសមីយ៉ាន់ម៉ា និងបណ្តាប្រទេសអាស៊ីអាគ្នេយ៍មួយចំនួនកំពុងប្រឈមមុខនឹងគ្រោះទឹកជំនន់ និងការបាក់ដីយ៉ាងធ្ងន់ធ្ងរ បន្ទាប់ពីព្យុះទីហ្វុង Yagi បានបោកបក់ និងបង្អាក់ទឹកភ្លៀងយ៉ាងច្រើននៅក្នុងតំបន់ចាប់តាំងពីចុងសប្តាហ៍មុន។ ប្រព័ន្ធផ្សព្វផ្សាយមីយ៉ាន់ម៉ា បាននិយាយថា ទឹកជំនន់នៅក្នុងតំបន់ជុំវិញរដ្ឋធានី Naypyidaw បានបណ្តាលឱ្យមានការបាក់ដី បំផ្លាញបង្គោលភ្លើងតង់ស្យុងខ្ពស់ ផ្លូវថ្នល់ ស្ពាន និងផ្ទះសម្បែង។ អ្នកភូមិរាប់រយនាក់នៅតំបន់ជុំវិញទីក្រុងណៃពីដោ នៅថ្ងៃទី ១៣ ខែកញ្ញា ត្រូវដើរ ឬហែលឆ្លងកាត់ទឹកដែលមានកម្ពស់ខ្ពស់ ដើម្បីទៅដល់កន្លែងសុវត្ថិភាព។

ប្រជាពលរដ្ឋមួយចំនួនបាននិយាយថា ពួកគេបានលាក់ខ្លួននៅក្នុងដើមឈើពេញមួយយប់ ដើម្បីគេចពីទឹកជំនន់ដ៏ខ្លាំងនៅខាងក្រោម។ គ្រោះធម្មជាតិបានកំពុងធ្វើឱ្យវិបត្តិមនុស្សធម៌ក្នុងប្រទេសមីយ៉ាន់ម៉ាកាន់តែធ្ងន់ធ្ងរឡើងៗ។ ប្រហែលមួយភាគបីនៃចំនួនប្រជាជនរបស់ប្រទេសនេះត្រូវការជំនួយ ហើយមនុស្សជាង ២.៧ លាននាក់ត្រូវបានទុកចោលគ្មានផ្ទះសម្បែង បន្ទាប់ពីរដ្ឋប្រហារយោធាឆ្នាំ ២០២១ បង្កឱ្យមានជម្លោះនៅក្នុងប្រទេសអាស៊ីអាគ្នេយ៍៕

ផលិតផលរបស់ចិនកាន់តែខ្លាំងទៅៗហើយ មិនថារថយន្ត ឬស្មាតហ្វូននោះទេ ឥឡូវនេះសុទ្ធតែទំនើបនិងទាន់សម័យ ហើយតម្លៃក៏ខ្ពស់ទៀតផង។ ខណៈដែលអេក្រង់ស្មាតហ្វូន Huawei Mate XT Tri-fold មានតម្លៃរហូតដល់ ១,៣៧៦ ដុល្លារអាមេរិក បើប្រៀបធៀបទៅនឹង iPhone 16 Pro Max ទាំងមូលវិញគឺមានតម្លៃត្រឹមតែ ១,១៩៩ ដុល្លារអាមេរិកប៉ុណ្ណោះ នេះបញ្ជាក់ថាអេក្រង់ស្មាតហ្វូន Huawei របស់ចិនគឺមានតម្លៃថ្លៃជាង iPhone មួយគ្រឿងរបស់អាមេរិកទៅទៀត។

កាលពីថ្ងៃទី១៥ ខែកញ្ញា ឆ្នាំ២០២៤ ក្រុមហ៊ុន Huawei បានប្រកាសពីតម្លៃ Mate XT ដែលជាស្មាតហ្វូនអេក្រង់បត់បានបីតង់ដំបូងបង្អស់របស់ពិភពលោក ដោយមួយគ្រឿងមានតម្លៃចាប់ពី ២,៨០០ ដុល្លារឡើងទៅ។ ក្នុងចំណោមនោះ សមាសធាតុដែលថ្លៃបំផុតគឺអេក្រង់ OLED ប្រសិនបើស្មាតហ្វូននេះខូចអេក្រង់ អ្នកប្រើប្រាស់នឹងត្រូវប្តូរអេក្រង់ ដែលអេក្រង់មួយមានតម្លៃ ១,៣៧៦ ដុល្លារអាមេរិក ខ្ពស់ជាងតម្លៃ iPhone 16 Pro Max ទៅទៀត។

ទោះជាយ៉ាងណាពួកគេក៏មានជម្រើសថោកជាងនេះផងដែរ នៅពេលដែលពួកគេយល់ព្រមអនុញ្ញាតឱ្យក្រុមហ៊ុន Huawei កែច្នៃអេក្រង់ដែលខូចក្នុងតម្លៃ ១,១២៣ ដុល្លារ។ លើសពីនេះក្រុមហ៊ុនចិនក៏បានផ្តល់នូវដំណោះស្រាយមួយចំនួនដើម្បីសន្សំសំចៃថ្លៃជួសជុលទូរស័ព្ទថ្មី ដូចជាការជំនួសអេក្រង់ដែលបានប្រើរួចក្នុងតម្លៃ ៩៨៣ ដុល្លារ ឬទិញធានារ៉ាប់រងលើអេក្រង់ក្នុងតម្លៃ ៤៩២ ដុល្លារសម្រាប់ការជំនួសមួយលើក បន្ទាប់ពីអ្នកក្លាយជាម្ចាស់ Huawei Mate XT Tri-fold រយៈពេលមួយឆ្នាំ។

ក្រុមហ៊ុន Huawei Consumer ត្រូវបានគេស្គាល់ថាជាក្រុមហ៊ុនឈានមុខគេក្នុងវិស័យទូរស័ព្ទដែលអាចបត់បាន ហើយ Huawei Mate XT Tri-fold គឺជាទូរស័ព្ទអេក្រង់បត់បានបីតង់ដំបូងគេរបស់ពិភពលោក។ ដោយក្រុមហ៊ុនត្រៀមចេញលក់ស្មាតហ្វូននេះជាផ្លូវការ នៅថ្ងៃទី ២០ ខែកញ្ញា ឆ្នាំ២០២៤ ជាមួយតម្លៃចាប់ពី ២,៨០០ ដុល្លារអាមេរិកឡើងទៅ ក្នុងគោលបំណងប្រកួតប្រជែងជាមួយក្រុមហ៊ុន Apple ដែលនឹងចេញលក់ iPhone 16 Pro Max ជាមួយតម្លៃ ១,១៩៩ ដុល្លារអាមេរិកជាផ្លូវការក្នុងថ្ងៃដូចគ្នា៕