បណ្តាសារព័ត៌មានជាច្រើននៅប្រទេសកូរ៉េខាងត្បូងបានចុះផ្សាយអំពីអ្នកស្រី Choi Soon Hwa គឺជាបេក្ខនារីដែលមានវ័យចំណាស់ជាងគេក្នុងការប្រលងសម្រស់ក្នុងឆ្នាំនេះ។ តារាម៉ូដែលរូបនេះមានអាយុ៨០ឆ្នាំ។ ដោយសារស្ថាប័នរបវរកញ្ញាចក្រវាលគ្មានកំណត់អាយុ ទើបធ្វើឱ្យអ្នកស្រីមានចេតនាចង់ចូលរួមជាថ្មី ដោយមានការគាំទ្រពីកូនៗ។

អ្នកស្រី Choi Soon Hwa ជាអតីតគិលានុបដ្ឋាយិកានៅមន្ទីរពេទ្យ។ បន្ទាប់ពីចូលនិវត្តន៍ អ្នកស្រីបានចូលរៀនវគ្គបង្ហាញម៉ូត និងក្លាយជាតារាបង្ហាញម៉ូតអាជីពនៅអាយុ ៧៧ឆ្នាំ។ ក្នុងរយៈពេលប៉ុន្មានឆ្នាំចុងក្រោយនេះ អ្នកស្រីបានដើរបង្ហាញម៉ូត និងថតរូបសម្រាប់ទស្សនាវដ្តី និងម៉ាកសម្លៀកបំពាក់។ បេក្ខភាព Miss Universe Korea 2024 រូបនេះបាននិយាយថាខ្លួនអ្នកស្រីតែងតែចង់ “ដើរចេញពីតំបន់សុខស្រួលរបស់នាង” ហើយធ្វើអ្វីដែលខ្លយនស្រលាញ់។ អរគុណចំពោះរឿងនេះ អ្នកស្រីមានអារម្មណ៍ជឿជាក់ និងសកម្ម។ អ្នកស្រី Choi Soon Hwa បានលើកទឹកចិត្តមនុស្សចាស់ផ្សេងទៀតឱ្យចូលរួមក្នុងសកម្មភាពសង្គម និងបន្តក្តីសុបិនរបស់ពួកគេ។

បវរកញ្ញាចក្រវាលកូរ៉េឆ្នាំនេះ មិនមានកំណត់អាយុ ឬទម្ងន់ទេ។ អ្នកដែលនៅលីវ រៀបការ ឬមានកូនអាចចូលរួមបាន។ ក្នុងចំណោមបេក្ខជនបេក្ខនារី ក្មេងជាងគេកើតនៅឆ្នាំ ២០០៣។ វគ្គផ្តាច់ព្រ័ត្រធ្វើឡើងនៅទីក្រុងសេអ៊ូលនៅថ្ងៃទី៣០ ខែកញ្ញា។
Miss Universe ត្រូវបានចាត់ទុកថាជាការប្រកួតសម្រស់ប្រចាំឆ្នាំដ៏ធំបំផុតនៅលើភពផែនដី ដែលប្រារព្ធឡើងដំបូងក្នុងឆ្នាំ ១៩៥២ ដែលបង្កើតឡើងដោយក្រុមហ៊ុនម៉ូតនៅរដ្ឋកាលីហ្វ័រញ៉ា សហរដ្ឋអាម៉េរិក។ ចាប់ពីឆ្នាំ ២០២២ ការរក្សាសិទ្ធិក្នុងការរៀបចំការប្រកួតជាកម្មសិទ្ធិរបស់ក្រុមហ៊ុននៅក្នុងប្រទេសថៃ។ ក្នុងរយៈពេលប៉ុន្មានឆ្នាំចុងក្រោយនេះ បវរកញ្ញាចក្រវាលបានបន្តបន្ធូរបន្ថយបទប្បញ្ញត្តិរបស់ខ្លួន ដើម្បីឱ្យស្ត្រីភាគច្រើនអាចចូលរួមបាន។

កាលពីដើមឆ្នាំនេះ បវរកញ្ញាចក្រវាលហ្វីលីពីនឆ្នាំ ២០២៤ ក៏បានធ្វើឱ្យអ្នកគាំទ្រវិស័យបវរកញ្ញាមានការភ្ញាក់ផ្អើលមិនតិចនោះទេបន្ទាប់ពីមានបេក្ខភាពអាយុ៦៩ឆ្នាំចូលរួមប្រកួតផងដែរ ដោយអ្នកស្រី Jocelyn Cubales មិនបានក្លាយជាម្ចាស់ជ័យលាភីនោះទេបានជាប់ចំណាត់ថ្នាក់TOP10ក្នុងការប្រកួត។

លោក Yang Sun Mook ដែលធ្វើការក្នុងឧស្សាហកម្មម៉ូត និងសហការជាមួយក្រុមហ៊ុនដែលរៀបចំកម្មវិធីប្រកួតសម្រស់បាននិយាយថា បវរកញ្ញាចក្រវាលកូរ៉េឆ្លុះបញ្ចាំងយ៉ាងត្រឹមត្រូវអំពីបាតុភូតនៃភាពចាស់របស់ប្រជាជន។ នៅប្រទេសកូរ៉េ មនុស្សចាស់កំពុងលេចមុខជាបណ្តើរៗនៅក្នុងការផ្សាយពាណិជ្ជកម្ម ឬកម្មវិធីទូរទស្សន៍ទាក់ទងនឹងការប្រលងសម្រស់៕

ត្រីឆ្លាមចម្លែក មានក្បាលសំប៉ែត ភ្នែកធំៗ រន្ធច្រមុះធំពណ៌ផ្កាឈូក និងមានសំឡេងដូចជ្រូក ធ្វើឱ្យវាមើលទៅដូចជាសត្វជ្រូកអ៊ីចឹង ត្រូវបានគេស្គាល់ថាជាត្រីឆ្លាម Angular roughshark។
ត្រីឆ្លាម Angular គឺជាត្រីឆ្លាមដ៏កម្រមួយត្រូវបានគេប្រទះឃើញអណ្តែតលើទឹក ហើយមនុស្សក៏នាំគ្នាទាញវាចេញពីទឹក Elba ក្បែរកោះ Tuscany ដោយពួកវាត្រូវបានគេដាក់រហ័សនាមថាជា “ត្រីមុខដូចជ្រូក” ដោយសារតែវាបានបញ្ចេញសំឡេងដូចជ្រូកនៅខាងក្រៅទឹក។

យោងតាម Live Science ត្រីឆ្លាមនេះគឺរស់នៅក្នុងមហាសមុទ្រអាត្លង់ទិកភាគខាងកើតពីប្រទេសន័រវេសទៅអាហ្វ្រិកខាងត្បូង និងសមុទ្រមេឌីទែរ៉ាណេ។ ពួកវាមានជំនាញក្នុងការស៊ីត្រី ក្តាម ប្រម៉ោយ ដង្កូវទឹកសមុទ្រ និងពងត្រីឆ្លាម។ ត្រីឆ្លាម Angular មានប្រវែងមួយម៉ែត្រ និងមានដងខ្លួនពណ៌ត្នោតប្រផេះ ជាមួយនឹងព្រុយធំពីរដែលស្រដៀងនឹងក្ដោង ហើយពួកវាមានរាងត្រីកោណនៅពេលមើលពីខាងមុខ។ ដូចត្រីឆ្លាមទាំងអស់ដែរ ស្បែករបស់ពួកវាត្រូវបានគ្របដណ្ដប់ដោយស្រកាមុតៗ ដែលមានរាងសំប៉ែត ផ្សំឡើងដោយសាច់ ធ្មេញ និងស្រោម។

ខណៈពេលដែលត្រីឆ្លាមទាំងអស់មាន denticles ធ្មេញរបស់ Angular sharks មានទំហំធំ និងលេចធ្លោ ដែលផ្តល់ឱ្យពួកវានូវរូបរាងរដុប រួមផ្សំជាមួយនឹងមុខដូចរោមសត្វ ហើយត្រីឆ្លាម Angular ក៏មានច្រមុះខ្លីជាមួយនឹងរន្ធច្រមុះធំផងដែរ។ ពួកវាចំណាយពេលភាគច្រើនលើការហែលទឹកពីលើបាតសមុទ្រដើម្បីស្វែងរកអាហារ។ ជាធម្មតាពួកវាផ្លាស់ទីយឺតៗ ដើម្បីបឺតយកចំណីរបស់ពួកវា។ ត្រីឆ្លាម Angular មានធ្មេញខាងក្រោមមុតស្រួចសម្រាប់កាត់សាច់ ក៏ដូចជាធ្មេញខាងលើរាងសាជី ដែលជួយឱ្យវាខាំបានយ៉ាងល្អ ហើយវាក៏ស៊ីស៊ុតរបស់ត្រីឆ្លាមប្រភេទផ្សេងទៀតដែរ។

ទោះជាយ៉ាងណា ត្រីឆ្លាម Angular ត្រូវបានគេចាត់ទុកថាជាត្រីកម្រ ថ្វីត្បិតតែប្រភេទត្រីឆ្លាមនេះមានតម្លៃពាណិជ្ជកម្មតិចតួចក៏ដោយ ប៉ុន្តែព្រុយ និងឆ្អឹងខ្នងដ៏ធំរបស់វាធ្វើឱ្យវាងាយរងគ្រោះដោយសារការជាប់នៅក្នុងសំណាញ់របស់អ្នកនេសាទ ហើយវាក៏ត្រូវបានចុះក្នុងបញ្ជីរងគ្រោះថ្នាក់នៅក្នុងបញ្ជីក្រហមនៃសហភាពអន្តរជាតិសម្រាប់ការអភិរក្សធម្មជាតិផងដែរ ដូច្នេះការប្រទះឃើញត្រីនេះគឺជារឿងដ៏កម្របំផុតព្រោះវាមិនងាយហែលឱ្យមនុស្សឃើញនោះទេ៕

ៀតណាម៖ ចាប់ពីថ្ងៃទី៧ ដល់ថ្ងៃទី១៥ ខែកញ្ញា ឆ្នាំ២០២៤ ឥទ្ធិពលព្យុះយ៉ាហ្គីបានបំផ្លិចបំផ្លាញហេដ្ឋារចនាសម្ព័ន្ធជាច្រើននៅក្នុងប្រទេសវៀតណាម ធ្វើឱ្យប្រទេសនេះខាតបង់ប្រាក់រហូតដល់ ១.៦ ពាន់លានដុល្លារអាមេរិកឯណោះក្នុងរយៈពេលមួយសប្តាហ៍កន្លងមកនេះ។

យោងតាមការចុះផ្សាយរបស់ Reuter ព្យុះទីហ្វុង Yagi ដែលជាព្យុះដ៏មានឥទ្ធិពលបំផុតរបស់អាស៊ី បានធ្វើឱ្យសេដ្ឋកិច្ចប្រទេសវៀតណាមក្នុងឆ្នាំ ២០២៤ ធ្លាក់ចុះយ៉ាងខ្លាំងបើធៀបនឹងការព្យាករណ៍ពីមុន ដោយប្រទេសនេះបានខាតបង់ប្រាក់រហូតដល់ ១.៦ ពាន់លានដុល្លារអាមេរិកឯណោះក្នុងរយៈពេលមួយសប្តាហ៍។

យោងតាមរបាយការណ៍បានឱ្យដឹងទៀតថា ក្នុងចំណោមវិស័យដែលរងគ្រោះខ្លាំងជាងគេនៃឥទ្ធិពលព្យុះយ៉ាហ្គីគឺ កសិកម្ម រុក្ខាប្រមាញ់ និងនេសាទ ដែលកំណើនអាចថយចុះ ០.៣៣% ចំណែកឧស្សាហកម្ម និងសំណង់ក៏អាចឃើញផលប៉ះពាល់តិចតួចផងដែរ។ ដូច្នេះគិតត្រឹមថ្ងៃទី១៦ ខែកញ្ញា ឆ្នាំ២០២៤ នេះព្យុះទីហ្វុងយ៉ាហ្គីគឺបានសម្លាប់មនុស្សយ៉ាងហោចណាស់ ២៩២ នាក់ និងបាត់ខ្លួន ៣៨ នាក់។

គួរបញ្ជាក់ដែរថា គ្រោះទឹកជំនន់បានជន់លិចផ្ទៃដីស្រែចំនួន ១៩០,០០០ ហិកតា ដំណាំសាច់ប្រាក់ចំនួន ៤៨,០០០ ហិកតា ដូចជាពោត និងដំឡូងមី និងខូចខាតផ្ទះជិត ២៣២,០០០ នៅភាគខាងជើងប្រទេសវៀតណាម។ ហើយទីក្រុង Haiphong ដែលជាកន្លែងសម្រាប់សួនឧស្សាហកម្មជាច្រើនបានកត់ត្រាការខាតបង់ និងការខូចខាតប្រហែល ១១ ពាន់ពាន់លានដុង (ប្រមាណ ៤៤៨.៤៣ លានដុល្លារអាមេរិក) ពីព្យុះទីហ្វុងផងដែរ។ ទោះជាយ៉ាងណារដ្ឋាភិបាលវៀតណាមបានកំពុងខិតខំគ្រប់គ្រងអតិផរណាឱ្យនៅថេរ ទោះបីជាមានការវាយលុកពីព្យុះទីហ្វុង Yagi ធ្ងន់ធ្ងរក៏ដោយ៕

ប្រទេសអេស្ប៉ាញ ៖ កាលពីថ្ងៃទី១៣ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ការស្វែងរកគូស្រករតាមវិធីថ្មីកំពុងទទួលបានការពេញនិយមយ៉ាងខ្លាំងនៅប្រទេសអេស្ប៉ាញ ។ យុវជនអេស្ប៉ាញជាច្រើននាក់បានទៅប្រមូលផ្តុំគ្នានៅផ្សារទំនើប ព្រមទាំងបង្ហាញផ្លែម្នាស់ជាសញ្ញាសម្គាល់ថា ពួកគេចង់បានគូ ។ ប៉ុន្តែវាធ្វើឱ្យផ្សារទំនើបភ្ញាក់ផ្អើល និងរាយការណ៍ទៅសមត្ថកិច្ច ។

បុគ្គលិកផ្សារទំនើបមួយកន្លែងបានរាយការណ៍ទៅសមត្ថកិច្ចឱ្យមកជួយអន្តរាគមន៍ភាពរញ៉េរញ៉ៃក្នុងផ្សារ ដោយសារក្រុមយុវជនជាច្រើននាក់បានប្រមូលផ្តុំគ្នាពេញផ្សារទំនើប ។ ពេលសមត្ថកិច្ចមកដល់ផ្សារទំនើប ក្រុមយុវជនទាំងនេះក៏បំបែកគ្នាយ៉ាងឆាប់រហ័ស និងគ្មានអ្នកណាម្នាក់ត្រូវសមត្ថកិច្ចចាប់ខ្លួនទេ ។

ក្រុមយុវជនដែលពុំទាន់មានគូស្រករបានណាត់ជួបជុំគ្នានៅផ្សារទំនើប រួចហើយពួកគេយកផ្លែម្នាស់ដាក់ត្រឡប់ក្បាលចុះក្រោមលើកន្ត្រកអីវ៉ាន់ ឬរទេះរុញ ដើម្បីជាសញ្ញាសម្គាល់ថា ម្ចាស់ផ្លែម្នាស់កំពុងស្វែងរកគូស្រករ ។ យុវជនភាគច្រើនមកណាត់គ្នានៅកន្លែងលក់ស្រាទំពាំងបាយជូរក្នុងផ្សារទំនើប ។

បើពេញចិត្តអ្នកណាម្នាក់ គឺពួកគេគ្រាន់តែយករទេះដាក់ផ្លែម្នាស់របស់ខ្លួន ទៅបុករទេះអ្នកដែលពួកគេពេញចិត្តស្រាលៗ ។ ការបុករទេះរុញនេះដើម្បីបង្ហាញពីអារម្មណ៍ថា ពួកគេចាប់អារម្មណ៍ចង់ជជែក និងស្គាល់គ្នាជាមួយអ្នកនោះ ។ បើម្ចាស់រទេះរុញម្ខាងទៀតចង់ជជែកជាមួយដែរ ពួកគេនឹងយករទេះម្នាស់បុកទៅវិញ ហើយអ្នកទាំងពីរក៏ចាប់ផ្តើមស្គាល់គ្នា ។

ក្រៅពីផ្លែម្នាស់ ទំនិញផ្សេងៗក្នុងរទេះរុញ ក៏អាចប្រើប្រាស់ដើម្បីស្វែងរកគូស្រករបានដែរ ដូចជា ៖ បើដាក់សូកូឡា ឬនំចំណីក្នុងរទេះរុញ មានន័យថា ពួកគេកំពុងស្វែងរកគូស្រកររស់នៅជាមួយគ្នាអស់មួយជីវិត ។ ប៉ុន្តែបើពួកគេដាក់បន្លែផ្សេងៗក្នុងរទេះរុញ មានន័យថា គ្រាន់តែចង់រកដៃគូស្រឡាញ់គ្នាមួយរយៈ ។ ការទិញផ្លែម្នាស់ស្វែងរកគូនេះបានទទួលការចាប់អារម្មណ៍យ៉ាងខ្លាំង រហូតដល់ហាងផ្សេងៗនៅប្រទេសអេស្ប៉ាញលក់ម្នាស់អស់ពីស្តុក ។

ដោយឡែក ហាងលក់ទំនិញមួយឈ្មោះ Lidl នៅប្រទេសអាល្លឺម៉ង់ ក៏បានទាក់ទាញយុវជនឱ្យស្វែងរកគូស្រករតាមវិធីថ្មីនេះដែរ ប៉ុន្តែពួកគេប្រើប្រាស់ផ្លែឪឡឹកជំនួសម្នាស់ ។ ហាងនេះបានអញ្ជើញអតិថិជនណាដែលពុំទាន់មានគូស្រករឱ្យមកប្រមូលផ្តុំគ្នានៅហាង និងទិញឪឡឹកដាក់ក្នុងរទេះរុញដើម្បីបញ្ជាក់ថា ម្ចាស់របស់វាចង់បានគូ ៕

ប្រទេសអ៊ីតាលី ៖ បច្ចេកវិទ្យា AI បានដើរតួនាទីយ៉ាងសំខាន់ក្នុងការផលិតភាពយន្តផ្សេងៗ និងមានភាពយន្តខ្លីបង្កើតដោយ AI ទទួលបានពានរង្វាន់ពីការប្រកួតប្រជែងនៅមហោស្រពភាពយន្តអន្តរជាតិ លើកទី៨១ (The 81st Venice International Film Festival) ដែលរៀបចំនៅទីក្រុង Venice ប្រទេសអ៊ីតាលី ។ ប៉ុន្តែការរីកចម្រើននៃបច្ចេកវិទ្យានេះ ធ្វើឱ្យតារាភាពយន្តបារម្ភពីការបាត់បង់ការងាររបស់ខ្លួន ។

ភាពយន្តខ្លីបង្កើតដោយបច្ចេកវិទ្យា AI និងទទួលបានពានរង្វាន់ក្នុងការប្រកួត គឺរឿង «To Dear Me» ដែលរឿងនេះបង្ហាញពីជីវិតតស៊ូរបស់យុវតីម្នាក់ ដោយសារឪពុក-ម្តាយរបស់នាងចែកផ្លូវគ្នា ។ រីឯភាពយន្តខ្លីៗឈានដល់ការប្រកួតវគ្គផ្តាច់ព្រ័ត្របានបង្ហាញពីផ្លូវចិត្តរបស់មនុស្ស និងត្រូវបានជ្រើសរើសដោយគណៈកម្មការអន្តរជាតិ ក្នុងនោះមានរឿង Rob Minkoff បង្កើតឡើងដោយអ្នកដឹកនាំរឿងគំនូរជីវចលដ៏ល្បីល្បាញ «The Lion King» របស់ Disney ព្រមទាំងភាពយន្តជាច្រើនទៀត ។

អ្នកដឹកនាំរឿងនេះបានផ្តល់សម្ភាសន៍ជាមួយសារព័ត៌មាន Reuters ថា ការបង្កើតភាពយន្តដោយបច្ចេកវិទ្យា AI នឹងធ្វើឱ្យយើងអាចផលិតសាច់រឿង ដែលធ្លាប់គិតថាពុំអាចទៅរួច ឱ្យវាចេញជារូបរាងបាន ។ AI ប្រៀបដូចជាឧបករណ៍ថ្មីសម្រាប់ការបង្កើតភាពយន្ត ។

ការប្រកួតប្រជែងភាពយន្តនេះរៀបចំឡើងដោយ Reply គឺជាក្រុមប្រឹក្សាអន្តរជាតិធ្វើការផ្នែក AI និងព័ត៌មានឌីជីថល ។ វាជាផ្នែកមួយនៃគំនិតផ្តួចផ្តើមដើម្បីលើកកម្ពស់បច្ចេកវិទ្យាថ្មីៗសម្រាប់យុវជនជំនាន់ក្រោយ ។

ទោះយ៉ាងណា ការបង្កើតភាពយន្តដោយបច្ចេកវិទ្យា AI ពុំទទួលបានការគាំទ្រទាំងអស់ទេ ។ លោក Filippo Rizzante អ្នករៀបចំការប្រកួតភាពយន្តនិយាយថា ពួកលោកបានព្យាយាមទាក់ទងទៅមហោស្រពភាពយន្តជុំវិញពិភពលោក ប៉ុន្តែពុំទទួលការឆ្លើយតប ដោយសារមនុស្សភាគច្រើនគិតថា បច្ចេកវិទ្យា AI គឺជាការផ្លាស់ប្តូរមួយគួរឱ្យបារម្ភ ។

បច្ចុប្បន្ន វិស័យសិល្បៈកំពុងប្រឈមនឹងបញ្ហាផលិតភាពយន្ត ដោយសារ AI អាចផលិតភាពយន្តកាន់តែច្រើន និងផ្សព្វផ្សាយយ៉ាងទូលំទូលាយ ។ វាជាប្រធានបទមួយដ៏សំខាន់ពាក់ព័ន្ធនឹងភាពយន្តហូលីវូដកាលពីឆ្នាំ២០២៣ ផងដែរ ។ តារាភាពយន្តនិយាយថា AI បានលួចយកផ្ទៃមុខរបស់តារាភាពយន្ត និងធ្វើឱ្យពួកគេប្រឈមនឹងការបាត់បង់ការងារក្នុងវិស័យសិល្បៈ ៕

ប្រទេសនីហ្សេរីយ៉ា ៖ អ្នកទោ.ស បានរត់ចេញពីពន្ធនា.គារ អស់ជាង២៧០នាក់ ក្រោយកើតគ្រោះធម្មជាតិទឹកជំនន់យ៉ាងខ្លាំងនៅប្រទេសនីហ្សេរីយ៉ា បណ្តាលឱ្យជញ្ជាំងពន្ធនា.គារ ក្នុងរដ្ឋ Borno បាក់រលំ ។ សមត្ថកិច្ចតាមចាប់ខ្លួនអ្នកទោ.ស ត្រឡប់មកវិញបានតែ៧នាក់ប៉ុណ្ណោះ រីឯអ្នកទោ.ស ផ្សេងទៀតរត់ចែកផ្លូវគ្នារៀងៗខ្លួន ។

សារព័ត៌មាន BBC បានរាយការណ៍កាលពីថ្ងៃទី១៦ ខែកញ្ញា ឆ្នាំ២០២៤ ថា អ្នកទោសយ៉ាងហោចណាស់ ២៧៤នាក់បានរត់ចេញពីពន្ធនាគារនៅទីក្រុង Maiduguri រដ្ឋ Borno ស្ថិតនៅភាគឦសានប្រទេសនីហ្សេរីយ៉ា ។ អ្នកទោសរត់ចេញពីពន្ធនាគារយ៉ាងច្រើនបែបនេះ ក្រោយពីភ្លៀងធ្លាក់ខ្លាំងបណ្តាលឱ្យធ្លាយទំនប់ ហើយក៏មានទឹកជំនន់ភ្លាមៗបំផ្លាញជញ្ជាំងពន្ធនាគារ ។

លោក អាបូបាខា អូម៉ា មន្ត្រីនាំពាក្យពន្ធនាគារនីហ្សេរីយ៉ា បាននិយាយកាលពីថ្ងៃ១៥ ខែកញ្ញា ថា ក្រោយពីជញ្ជាំងពន្ធនាគារកណ្តាលខូចខាត ឆ្មាំពន្ធនាគារក៏បានជម្លៀសអ្នកទោសទៅកាន់ជម្រកបណ្តោះអាសន្ន ប៉ុន្តែពេលនោះ អ្នកទោសជាង២០០នាក់ ក៏ឆ្លៀតឱកាសរត់ចេញពីពន្ធនាគារ ។ រហូតមកដល់ថ្ងៃទី១៥ ខែកញ្ញា សមត្ថកិច្ចចាប់អ្នកទោសត្រឡប់មកវិញបានតែ៧នាក់ប៉ុណ្ណោះ ។

ចំណែកលោក បាបាកាណា ស៊ូឡុម អភិបាលរដ្ឋ Borno និយាយថា អ្នកទោសដែលបានរត់គេចខ្លួននោះ អ្នកទោសខ្លះជាសមាជិកក្រុមប្រដាប់អាវុធបូកូហារ៉ាម ដែលពួកគេប្រឆាំងជាមួយរដ្ឋាភិបាលជាច្រើនឆ្នាំហើយ ។ អាជ្ញាធរបានផ្សព្វផ្សាយរូបភាពអ្នកទោសគេចខ្លួនទាំងនេះ និងអំពាវនាវឱ្យពលរដ្ឋរក្សាភាពស្ងប់ស្ងាត់ ។ លោកបញ្ជាក់ថា ការរត់ចេញពីពន្ធនាគារលើកនេះ ពុំប៉ះពាល់សន្តិសុខសាធារណៈទេ ។

ប្រទេសនីហ្សេរីយ៉ាបានជួបគ្រោះទឹកជំនន់ក្នុងតំបន់នានាអស់ជាច្រើនសប្តាហ៍ហើយ ដែលបណ្តាលឱ្យពលរដ្ឋស្លាប់រហូតដល់២៦៩នាក់ និងពលរដ្ឋជាង៦៤ម៉ឺននាក់ទៀតផ្លាស់ទីលំនៅគេចពីទឹកជំនន់ ។ តំបន់ភាគខាងជើងបានរងគ្រោះធ្ងន់ធ្ងរជាងគេ ហើយសម្រាប់រដ្ឋ Borno តែមួយមានពលរដ្ឋស្លាប់យ៉ាងហោចណាស់ ៣០នាក់ ។

កាលពីពាក់កណ្តាលខែសីហា ឆ្នាំ២០២៤ ក្រោយពីទឹកជំនន់លិចសួនសត្វក្នុងទីក្រុង Maiduguri បណ្តាលឱ្យសត្វក្រពើ និងពស់ជាច្រើនក្បាលរួចចេញពីទ្រុងទៅកាន់ភូមិអ្នកស្រុក ។ ភ្នាក់ងារសួនសត្វពុំទាន់រកឃើញសត្វទាំងនេះទេ រហូតមកដល់ថ្ងៃទី១៦ ខែកញ្ញា ៕

ប្រទេសថៃ ៖ កាលពីថ្ងៃទី១៦ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា អ្នកលេងបណ្តាញសង្គមថៃមួយចំនួនបានបង្ហោះរូបសំណាក Angel of Maesal ហើយសរសេរថា គឺជាទេពធីតាបង្កើតឱ្យមានទឹកជំនន់យ៉ាងខ្លាំងក្លា និងធ្វើឱ្យខូចខាតទ្រព្យសម្បត្តិរបស់ពលរដ្ឋនៅខេត្តឈៀងរ៉ៃ ។ លើសពីនេះ ពួកគេពុំជឿថា ទឹកជំនន់នៅខេត្តឈៀងរ៉ៃបណ្តាលមកពីឥទ្ធិពលខ្យល់ព្យុះ Yagi ទេ ។

នាពេលថ្មីៗនេះ ខេត្តឈៀងរ៉ាយរបស់ថៃបានរងគ្រោះដោយសារទឹកជំនន់យ៉ាងខ្លាំងក្លា ដែលថៃពុំធ្លាប់ជួបហេតុការណ៍បែបនេះពីមុនមក ។ ពលរដ្ឋថៃជាច្រើនគ្រួសារត្រូវបានជម្លៀសចេញពីផ្ទះសម្បែងរបស់ខ្លួនភ្លាមៗ ខណៈអ្នកខ្លះទៀតជម្លៀសតែខ្លួន និងពុំអាចយកទ្រព្យសម្បត្តិទៅជាមួយបានទេ ។

នៅថ្ងៃទី១៦ ខែកញ្ញា កម្រិតទឹកជំនន់បានស្រកចុះខ្លះៗហើយនៅតាមតំបន់មួយចំនួន គឺនៅសល់តែគំនរភក់ និងមែកឈើបាក់ ។ រីឯតំបន់ខ្លះទៀតពុំអាចធ្វើដំណើរតាមផ្លូវបានទេ ដោយសារមានគំនរភក់បិទផ្លូវ ហើយអាជ្ញាធរបានបញ្ជូនស្បៀងអាហារ និងទឹកបរិសុទ្ធតាមឧទ្ធម្ភាគចក្រចែកឱ្យពលរដ្ឋរងគ្រោះ ។

ប៉ុន្តែអ្នកលេងបណ្តាញសង្គមថៃមួយចំនួនជឿថា មូលហេតុបណ្តាលឱ្យមានទឹកជំនន់ខ្លាំងនៅស្រុកមេសាយ ខេត្តឈៀងរ៉ៃ គឺដោយសារទេពធីតា Angel of Maesal ដែលតម្កល់នៅបរិវេណព្រំដែនប្រទេសថៃ និងមីយ៉ាន់ម៉ា បានបង្កើតទឹកជំនន់ ។ ពួកគេនិយាយថា វាពុំបានកើតឡើងដោយសារឥទ្ធិពលខ្យល់ព្យុះទីហ្វុង Yagi ឬបណ្តាលមកពីការកាប់បំផ្លាញព្រៃឈើទេ ហើយពួកគេសំណូមពរឱ្យអាជ្ញាធរយករូបសំណាកទេពធីតាចេញពីបរិវេណនេះ ។

ហ្វេសប៊ុកផេកឈ្មោះ PGerrard Eatnewshawk បានផ្សព្វផ្សាយវីដេអូអាជ្ញាធរយករូបសំណាកទេពធីតាចេញពីបរិវេណព្រំដែនថៃ-មីយ៉ាន់ម៉ា នៅស្រុកមេសាយ រួចរាល់ហើយ ដោយសារអាជ្ញាធរត្រូវសម្អាតបរិវេណនេះ ក្រោយមានទឹកជំនន់ខ្លាំង ។

អ្នកលេង TikTok ម្នាក់បានបង្ហោះវីដេអូទេពធីតា Angel of Maesal ដែលត្រូវបានគេដឹកតាមរថយន្តធំមួយ ព្រមទាំងសរសេរថា ៖ «ទឹកជំនន់នៅស្រុកមេសាយ ខេត្តឈៀងរ៉ៃ លើកនេះ តើបណ្តាលមកពីទេពធីតាមែនទេ ឬជាស្នាដៃអ្នកណា? ហេតុអ្វីត្រូវយកទេពធីតាចេញពីទីនេះ?» ។

នៅថ្ងៃទី១៥ ខែកញ្ញា លោកសាស្ត្រាចារ្យឈ្មោះ ឆាឡឺមឆ័យ ខូស៊ិតផិផាត់ អ្នកតំណាងសិល្បករជាតិបាននិយាយពាក់ព័ន្ធនឹងករណីនេះថា ៖ «វាជារឿងឆ្កួតមួយ ហេតុអ្វីនាំគ្នាឆ្កួតបែបនេះ? បែរជាទៅបន្ទោសរូបសំណាកទៅវិញ ហើយភ័យខ្លាចខ្លាំងអីដល់ថ្នាក់នេះ? ខ្ញុំពុំយល់ថា តើរូបសំណាកអាចបង្កើតគ្រោះធម្មជាតិដោយរបៀបណា» ។

ហេតុនេះ លោកបានសំណូមពរឱ្យយករូបសំណាកទេពធីតាមកតម្កល់ក្នុងសារមន្ទីរសិល្បៈសហសម័យនៅស្រុកមឿងឈៀងរ៉ៃ ហើយរង់ចាំមើលថា តើសារមន្ទីរនេះនឹងមានគ្រោះថ្នាក់ដូចការលើកឡើងរបស់មនុស្សខ្លះដែរឬទេ?

គួរបញ្ជាក់ថា រូបសំណាកទេពធីតាដែលតម្កល់នៅបរិវេណព្រំដែនថៃ-មីយ៉ាន់ម៉ា នៅស្រុកមេសាយ ខេត្តឈៀងរ៉ៃ គឺសម្រាប់តំណាងឱ្យក្រុមជនជាតិផ្សេងៗ ។ រូបសំណាកនេះជាស្នាដៃរបស់សាស្តា្រចារ្យឈ្មោះ ក្រៃវុធ ដនចាក់ មកពីសមាគមសិល្បៈខេត្តឈៀងរ៉ៃ ។

ទឹកជំនន់បានជន់លិចបរិវេណច្រកព្រំដែនថៃ-មីយ៉ាន់ម៉ាយ៉ាងខ្លាំង ប៉ុន្តែរូបសំណាកទេពធីតាបែរជាពុំខូចខាតអ្វីទាំងអស់ ។ ហេតុនេះ ទើបពលរដ្ឋថៃមួយចំនួនទម្លាក់កំហុសលើរូបសំណាក និងជឿថា គឺជាមូលហេតុធ្វើឱ្យខេត្តឈៀងរ៉ៃមានគ្រោះទឹកជំនន់ ៕

ប្រទេសជប៉ុន ៖ ហេតុអ្វីជនជាតិជប៉ុនចូលចិត្តបរិភោគសាច់ត្រីឆៅ? តើយើងធ្លាប់សង្កេតទេថា ម្ហូបអាហារជប៉ុនមានភាពស្រស់ស្អាត និងគួរឱ្យចង់បរិភោគយ៉ាងខ្លាំង ប៉ុន្តែអាហារទាំងនេះមានរសជាតិស្រាល គ្មានរសជាតិឌិតឡើយ ពីព្រោះចំណុចពិសេសរបស់អាហារជប៉ុន គឺពុំដាក់គ្រឿងផ្សំទេ ។ ជប៉ុនគិតថា ការបរិភោគអាហារស្រស់ៗរសជាតិដើម វានឹងមានរសជាតិឆ្ងាញ់ជាងការផ្សំគ្រឿង ។

ចុងភៅជប៉ុនតែងតែផ្តោតសំខាន់លើអាហារមានភាពស្រស់ស្អាត និងពណ៌អាហារយ៉ាងខ្លាំង ហើយជប៉ុនចាត់ទុកថា ការរៀបចំតុបតែងអាហារ គឺដូចគ្នានឹងរូបគំនូរដែរ ។ មូលហេតុធ្វើឱ្យពួកគេចូលចិត្តបរិភោគសាច់ត្រីឆៅ ដោយសារប្រទេសជប៉ុនជាកោះ និងហ៊ុព័ទ្ធដោយមហាសមុទ្រ ទើបជប៉ុនងាយស្រួលរកអាហារសមុទ្របរិភោគ ដែលភាសាជប៉ុនហៅថា «Sashimi /សាស៊ិមិ» ។

ជប៉ុននិយមបរិភោគអាហារសមុទ្រគ្រប់ប្រភេទដោយពុំផ្សំគ្រឿង ហើយសាច់ត្រីឆៅ (ឬ Sashimi) បានក្លាយជាអាហារពេញនិយមបំផុតនៅប្រទេសជប៉ុន ។ ក្រៅពីនេះ សាស៊ិមិ គឺជាអាហារតំណាងជាតិរបស់ជប៉ុន ដែលបង្ហាញពីអត្តសញ្ញាណជប៉ុនច្រើនបំផុត ។ ពលរដ្ឋនៅប្រទេសផ្សេងទៀត ក៏និយមបរិភោគសាច់ត្រីឆៅដែរ ប៉ុន្តែជប៉ុនបរិភោគត្រីសមុទ្រឆៅច្រើនជាងប្រទេសផ្សេង ទើបគេដាក់ឈ្មោះថា «ជាប្រទេសបរិភោគត្រីឆៅ» ។

ការបរិភោគត្រីសមុទ្រនៅជប៉ុន គឺមានអនាម័យជាងត្រីទឹកសាប ព្រមទាំងសម្បូរទៅដោយប្រូតេអ៊ីន និងវីតាម៉ីនផ្សេងៗ ។ ចំណុចសំខាន់ សមុទ្រនៅជប៉ុនគ្មានប៉ារ៉ាស៊ីតដូចទឹកសាបទេ ។ រីឯមូលហេតុដែលធ្វើឱ្យការបរិភោគសាច់ត្រីឆៅនេះគ្មានមេរោគ ដោយសារជប៉ុនផ្តោតលើអនាម័យម្ហូបអាហារខ្លាំងបំផុត ។

*ខាងក្រោមនេះ គឺជាសារធាតុចិញ្ចឹមទទួលបានពីសាច់ត្រីឆៅរបស់ជប៉ុន ៖

-ខ្លាញ់ ៖ អាហារឆៅជប៉ុនបានផ្តោតលើបន្លែ និងផ្លែឈើ ទើបធ្វើឱ្យបរិមាណខ្លាញ់ដែលរាងកាយទទួលបានស្ថិតនៅចន្លោះពី២០% ទៅ៣៥% របស់បរិមាណកាឡូរីសរុបដែលទទួលបានពីខ្លាញ់ក្នុងអាហារ១ថ្ងៃ ។ រីឯខ្លាញ់ក្នុងសាច់ត្រីឆៅបានផ្តល់ផលប្រយោជន៍យ៉ាងច្រើនដល់សុខភាព ។
-ប្រូតេអ៊ីន ៖ បើទោះជាពុំបានបរិភោគសាច់សត្វច្រើន ប៉ុន្តែការបរិភោគសាច់ត្រីឆៅនឹងទទួលបានប្រូតេអ៊ីនកម្រិតសមរម្យ ដូចការបរិភោគបន្លែបៃតង ឬសណ្តែក ។
-កាបូអ៊ីដ្រាត ៖ មានបរិមាណសមល្មម គឺមិនច្រើន ឬមិនតិចខ្លាំងពេក
-អំបិល ៖ សាច់ត្រីឆៅរបស់ជប៉ុនមានបរិមាណអំបិលតិចបំផុត ៕