ប្រទេសរុស្ស៊ី ៖ កាលពីថ្ងៃទី២០ ខែកញ្ញា ឆ្នាំ២០២៤ សារព័ត៌មាន TASS របស់ប្រទេសរុស្ស៊ីរាយការណ៍ថា អាកាសយានិកជនជាតិរុស្ស៊ី គឺលោក Oleg Kononenko និងលោក Nikolai Chub បានបំបែកកំណត់ត្រាស្នាក់នៅក្នុងស្ថានីយអវកាសអន្តរជាតិ (ISS) លើលំហយូរបំផុតលើពិភពលោក ។

អាកាសយានិករុស្ស៊ីទាំង២រូបនេះបានចំណាយពេលអស់ចំនួន ៣៧៤ថ្ងៃ នៅក្នុងស្ថានីយអវកាសអន្តរជាតិ ។ ពួកគេបានធ្វើដំណើរចាកចេញពីផែនដី កាលពីថ្ងៃទី១៥ ខែកញ្ញា ឆ្នាំ២០២៣ ក្នុងឋានៈជាក្រុមការងាររបស់ក្រុម Expedition 71 ហើយពួកគេមានគម្រោងត្រឡប់មកផែនដីវិញ នៅថ្ងៃទី២៣ ខែកញ្ញា ឆ្នាំ២០២៤ នេះ ។

កន្លងមក ការបំបែកកំណត់ត្រាស្នាក់នៅលើលំហយូរបំផុតលើពិភពលោក គឺបានទៅ Frank Rubio អាកាសយានិកអាមេរិក, Dmitry Petelin អាកាសយានិករុស្ស៊ី និង Sergey Prokopyev អាកាសយានិករុស្ស៊ី ។ អាកាសយានិកទាំង៣រូប បានចំណាយពេល ៣៧០ថ្ងៃ នៅក្នុងស្ថានីយអវកាសអន្តរជាតិ ដោយសារយានអវកាស Soyuz មានបញ្ហា ទើបធ្វើឱ្យពួកគេជាប់លើលំហ និងបំពេញភារកិច្ចបន្ថែមទៀត គឺពីរយៈពេល៦ខែ រហូតដល់ជាង១ឆ្នាំ ។

ចំណែកការបំពេញភារកិច្ចបច្ចុប្បន្នរបស់លោក Oleg Kononenko ក្នុងស្ថានីយអវកាសអន្តរជាតិ គឺជាការបំពេញភារកិច្ចលើកទី៥ របស់លោក និងលើកទី៣ ដែលលោកបំពេញតួនាទីជាមេបញ្ជាការនៅស្ថានីយអវកាស ។ លោកនិយាយថា ៖ «ខ្ញុំហោះមកលំហអាកាសដើម្បីធ្វើអ្វីដែលខ្ញុំស្រឡាញ់ មិនមែនដើម្បីបំបែកកំណត់ត្រាពិភពលោកទេ» ។

លោកបាននិយាយទៅកាន់សារព័ត៌មាន TASS ក្នុងកិច្ចសម្ភាសន៍ចេញពីស្ថានីយអវកាសអន្តរជាតិថា ៖ «ខ្ញុំមានមោទនភាពណាស់សម្រាប់ភាពជោគជ័យទាំងអស់របស់ខ្ញុំ តែខ្ញុំមានមោទនភាពខ្លាំងជាង ដែលជនជាតិរុស្ស៊ីនៅតែអាចបំបែកកំណត់ត្រាស្នាក់នៅលើលំហយូរបំផុតលើពិភពលោក» ។

ការបំពេញភារកិច្ចក្នុងស្ថានីយអវកាសអន្តរជាតិបានជួយឱ្យអាកាសយានិកទាំងនេះអាចឈ្វេងយល់បន្ថែមទៀត អំពីផលប៉ះពាល់របស់លំហអាកាសមកលើរាងកាយមនុស្ស ។ រីឯអង្គការ NASA និងភ្នាក់ងារអវកាសផ្សេងៗមានគម្រោងបំពេញបេសកកម្មនាថ្ងៃអនាគត ទៅកាន់ឋានព្រះច័ន្ទ និងភពអង្គារ ។

ទិន្នន័យដែលបានប្រមូលផ្តុំពីមនុស្សតិចតួចដែលធ្លាប់ហោះទៅអវកាស នៅតែមានសារៈសំខាន់សម្រាប់កាត់បន្ថយគ្រោះថ្នាក់ពេលធ្វើដំណើរទៅលើលំហរយៈពេលយូរ ។ ចុះនៅថ្ងៃអនាគត តើមនុស្សនឹងអាចស្នាក់នៅលើលំហបានយូរកម្រិតណា?

ប្រទេសអ៊ីស្រាអែល ៖ អ៊ីស្រាអែលជាប្រទេសគ្របដណ្តប់ដោយសមុទ្រខ្សាច់ជាងពាក់កណ្តាល ហើយមានផ្ទៃដីអាចដាំដំណាំបានត្រឹមតែ២០% ប៉ុណ្ណោះ និងគ្មានទឹកគ្រប់គ្រាន់សម្រាប់ធ្វើកសិកម្មទេ ។ ប៉ុន្តែបច្ចុប្បន្ន អ៊ីស្រាអែលអាចប្រែក្លាយវាលខ្សាច់ឱ្យទៅជាកសិដ្ឋានដំណាំ និងជាប្រទេសនាំមុខផ្នែកបច្ចេកវិទ្យាកសិកម្មលើពិភពលោក ។

ទិន្នផលកសិកម្មផលិតនៅអ៊ីស្រាអែលដែលសេសសល់ពីការបរិភោគក្នុងស្រុក គឺអ៊ីស្រាអែលបាននាំចេញទៅក្រៅប្រទេស ។ កាលពីមុន ផ្ទៃដីនៅអ៊ីស្រាអែលគ្មានគុណភាព ពុំអាចដាំដំណាំបានទេ ខណៈបរិមាណភ្លៀងធ្លាក់ក្នុង១ឆ្នាំៗតិចតួច ។ ហេតុនេះ ពលរដ្ឋអ៊ីស្រាអែលបានដោះស្រាយបញ្ហាដោយការប្រើប្រាស់សារធាតុគីមីកែលម្អគុណភាពដី រហូតដល់ពួកគេអាចដាំបន្លែដោយជោគជ័យ ។

ក្រៅពីនេះ រដ្ឋាភិបាលអ៊ីស្រាអែលបានទាក់ទាញក្រុមហ៊ុនបរទេសផ្នែកកសិកម្ម រហូតដល់ជាង៣៤៨ក្រុមហ៊ុន មកវិនិយោគក្នុងប្រទេសរបស់ខ្លួន ។ វាពុំងាយស្រួលទេ ដែលអ៊ីស្រាអែលអាចប្រែក្លាយវាលខ្សាច់ឱ្យក្លាយជាកសិដ្ឋានដាំបន្លែទំនើបទាន់សម័យ ។ ទោះបច្ចុប្បន្ន ផ្នែកកសិកម្មផ្តល់ចំណូលចូលជាតិបានត្រឹមតែ២% ក្តី ដោយសារសេដ្ឋកិច្ចភាគច្រើនពាក់ព័ន្ធនឹងផលិតផលបច្ចេកវិទ្យាទំនើប ប៉ុន្តែអ៊ីស្រាអែលអាចផលិតទិន្នផលកសិកម្មគ្រប់គ្រាន់ និងនាំចេញផងដែរ ។

អ៊ីស្រាអែលបានទទួលយកពលករបរទេសយ៉ាងច្រើនមកធ្វើការងារផ្នែកកសិកម្ម បើទោះជាបច្ចុប្បន្ន អ៊ីស្រាអែលកំពុងមានសង្គ្រាមជាមួយក្រុមហាម៉ាស់ក្តី ប៉ុន្តែវាពុំមែនជាឧបសគ្គសម្រាប់ពលករបរទេសទេ គឺពួកគេសុខចិត្តធ្វើការងារកសិកម្មនៅទីនេះបន្តទៀត ដោយសារទទួលបានប្រាក់ខែខ្ពស់ជាងប្រទេសផ្សេង ។

ហេតុអ្វីអ៊ីស្រាអែលអាចផ្តល់ប្រាក់ខែខ្ពស់ឱ្យពលករបរទេសផ្នែកកសិកម្ម?

អ៊ីស្រាអែល គឺជាប្រទេសនាំមុខផ្នែកបច្ចេកវិទ្យាកសិកម្មលើពិភពលោក ហើយអ៊ីស្រាអែលបានអភិវឌ្ឍន៍បច្ចេកវិទ្យាផ្នែកនេះរីកចម្រើនយ៉ាងខ្លាំង ប៉ុន្តែពលរដ្ឋអ៊ីស្រាអែលមានចំនួនតិច ហើយ​មិន​ធ្វើការងារ​កសិកម្ម ។ ហេតុនេះ ទើបអ៊ីស្រាអែលខ្វះខាតកម្លាំងពលកម្មផ្នែកកសិកម្ម ហើយអ៊ីស្រាអែលចាំបាច់ជួលពលករបរទេសមកធ្វើការ និងផ្តល់ប្រាក់ខែឱ្យខ្ពស់ ដូចជា ៖ ការដាំបន្លែ និងបេះផ្លែឈើ ។

ពលរដ្ឋអ៊ីស្រាអែលភាគច្រើនបានធ្វើការផ្នែកស្រាវជ្រាវ និងអភិវឌ្ឍន៍បច្ចេកវិទ្យាផ្សេងៗ ហើយពុំសូវមានអ្នកចាប់អារម្មណ៍ធ្វើការងារកសិកម្មទេ ។ ពលរដ្ឋអ៊ីស្រាអែល៩៩% ធ្វើការផ្នែកឧស្សាហកម្ម និងសេវាកម្ម ។ រីឯពលករបរទេសធ្វើការនៅអ៊ីស្រាអែលច្រើនបំផុត គឺពលករអាស៊ី ដែលទទួលបានប្រាក់ឈ្នួលជាង១ពាន់ដុល្លារអាមេរិកក្នុង១ខែ ។ ថៅកែអ៊ីស្រាអែលនិយមជួលពលករអាស៊ី ដោយសារមានជំនាញផ្នែកកសិកម្ម, ទទួលខុសត្រូវ, ទុកចិត្តបាន និងឧស្សាហ៍ព្យាយាម ៕

ប្រទេសថៃ ៖ នៅខែកញ្ញា ឆ្នាំ២០២៤នេះ ប្រទេសថៃបានរងឥទ្ធិពលខ្យល់ព្យុះមួយហើយមួយទៀត និងបណ្តាលឱ្យថៃមានទឹកជំនន់ខ្លាំងក្លាស្ទើរគ្រប់បណ្តាខេត្ត-ក្រុង ។ ប៉ុន្តែពលរដ្ឋថៃពុំទាន់រួចផុតពីទុក្ខលំបាកដោយសារគ្រោះធម្មជាតិទេ ពីព្រោះភ្នាក់ងារឧតុនិយមប្រកាសថា ថៃនឹងទទួលរងឥទ្ធិពលខ្យល់ព្យុះថ្មីជាបន្តបន្ទាប់ទៀត ដែលបណ្តាលឱ្យមានភ្លៀងខ្លាំងក្នុងខេត្តចំនួន៦០ ។

ហេតុនេះ ពលរដ្ឋថៃរស់នៅតាមបណ្តាខេត្តនានា ក៏ដូចជាទីក្រុងបាងកក បាននាំគ្នាប្រមូលទុកដាក់សម្ភារៈតូច-ធំ និងឯកសារសំខាន់ៗក្នុងគ្រួសារនៅទីខ្ពស់ផុតពីទឹកជំនន់ ។ រីឯនៅខេត្តស៊ីសាកេត ពលរដ្ឋភ្ញាក់ផ្អើលនាំគ្នាមើលដុំពពកខ្មៅចម្លែកពាសពេញមេឃ កាលពីថ្ងៃទី២០ ខែកញ្ញា កន្លងមក ។ ពលរដ្ឋនិយាយថា វាគួរឱ្យខ្លាចខ្លាំងណាស់ ហើយពួកគេសន្និដ្ឋានថា នឹងមានខ្យល់ព្យុះបោកបក់មកលើខេត្តស៊ីសាកេត នាពេលឆាប់ៗមិនខាន ។

កាលពីថ្ងៃទី២០ ខែកញ្ញា សមាគមគ្រប់គ្រងគ្រោះមហន្តរាយប្រទេសថៃ បានបង្ហោះរូបភាពដុំពពកខ្មៅលើមេឃ និងសរសេរថា ៖ «ដុំពពកខ្មៅលើមេឃស្ថិតនៅភូមិដួន ឃុំដួន ស្រុករ៉ាស៊ីសាឡៃ ខេត្តស៊ីសាកេត គឺជាសញ្ញាបញ្ជាក់ថា នឹងមានខ្យល់ព្យុះ និងភ្លៀងធ្លាក់» ។

សារព័ត៌មានថៃរាយការណ៍ថា ដុំពពកខ្មៅនៅលើមេឃនេះ គឺជាសញ្ញាខ្យល់ព្យុះ ផ្គររន្ទះ ដែលវាជាពពកនៅស្រទាប់ក្រោមប្រមូលផ្តុំគ្នាបង្កើតជារន្ទះបាញ់ ។ ហេតុនេះ នឹងមានរន្ទះបាញ់ញឹកញាប់ឆ្ងាយពីចំណុចពពកខ្មៅជាច្រើនគីឡូម៉ែត្រ ។

ចំណែកលោក Bancha Thanaboonsombat នាយកផ្នែកការផ្សព្វផ្សាយបច្ចេកវិទ្យានៅមជ្ឈមណ្ឌលបច្ចេកវិទ្យាលោហៈ បានដាក់ឈ្មោះដុំពពកខ្មៅថា «ជាពពកបាំង» ហើយលោកបញ្ជាក់ថា ពពកខាងលើអាចបញ្ជាក់ពីទិសដៅភ្លៀងធ្លាក់ និងផ្គររន្ទះ ។ ដុំពពកខ្មៅបង្ហាញលើមេឃខេត្តស៊ីសាកេត បានធ្វើឱ្យអ្នកឃើញភ្ញាក់ផ្អើលយ៉ាងខ្លាំង ពីព្រោះវាជាសញ្ញាបង្ហាញថា ប្រទេសថៃនឹងមានភ្លៀងធ្លាក់ខ្លាំង និងផ្គររន្ទះនាពេលឆាប់ៗនេះ ។

គួរបញ្ជាក់ថា ឥទ្ធិពលខ្យល់ព្យុះ Yagi បានបំផ្លិចបំផ្លាញទ្រព្យសម្បត្តិពលរដ្ឋថៃអស់យ៉ាងច្រើន ជាពិសេស អ្នករស់នៅស្រុកមេសាយ ខេត្តឈៀងរ៉ៃ ។ បើទោះពេលនេះ ទឹកបានស្រកហើយក្តី ប៉ុន្តែពួកគេជួបការពិបាកក្នុងការសម្អាតផ្ទះ ដោយសារមានគំនរភក់ខ្ពស់ៗជិតដល់ពិដាន ។

បើទោះជាអាជ្ញាធរបានជួយសម្អាតផ្ទះពលរដ្ឋក្តី ប៉ុន្តែពលរដ្ឋនៅតំបន់ខ្លះទៀតក្នុងស្រុកមេសាយ បានចំណាយប្រាក់ខ្លួនឯងដើម្បីជួលកម្មករមកកាប់ដីចេញពីក្នុងផ្ទះ គឺកម្មករម្នាក់យកថ្លៃពី៥០០បាត ទៅ៦០០បាតក្នុង១ថ្ងៃ ពីព្រោះអាជ្ញាធរធ្វើការយឺតយ៉ាវ ៕

ប្រទេសជប៉ុន ៖ វាបានធ្វើឱ្យពលរដ្ឋជប៉ុនភ្ញាក់ផ្អើលយ៉ាងខ្លាំង ក្រោយពេលភ្នាក់ងារឧតុនិយមប្រកាសថា អាចមានការផ្ទុះខុសធម្មតានៅបរិវេណជុំវិញកោះស៊ូមិស៊ុ (ឬកោះ Smith) ហើយវានឹងបណ្តាលឱ្យភ្នំភ្លើងផ្ទុះនៅបាតសមុទ្របង្កើតជារលកយក្សស៊ូណាមិនាពេលឆាប់ៗនេះ គឺដូចនៅប្រទេសតុងហ្គា ។ ការប្រកាសអាសន្ននេះ ក្រោយពីឆ្មាំសមុទ្រជប៉ុនបានឃើញទឹកសមុទ្រប្រែពណ៌ខ្លាំងខុសពីធម្មតា ។

ភ្នាក់ងារឧតុនិយមជប៉ុនប្រកាសថា ពណ៌ទឹកសមុទ្របានប្រែពណ៌ខ្លាំងនៅបរិវេណជុំវិញកោះស៊ូមិស៊ុ ស្ថិតនៅប្រជុំកោះ Izu ហើយភ្នាក់ងារឧតុនិយមក៏បានដាស់តឿនពលរដ្ឋជាបន្ទាន់ ឱ្យប្រុងប្រយ័ត្នគ្រោះថ្នាក់កើតឡើងដោយសារភ្នំភ្លើងផ្ទុះ ជាពិសេស នាវាចតនៅបរិវេណក្បែរកោះ ។

កាលពីថ្ងៃទី១៨ ខែកញ្ញា ឆ្នាំ២០២៤ យន្តហោះសង្កេតការណ៍របស់ឆ្នាំសមុទ្រជប៉ុនរាយការណ៍ថា ទឹកសមុទ្រនៅក្បែរកោះស៊ូមិស៊ុ ដែលជាទីតាំងភ្នំភ្លើងនៅបាតសមុទ្រ ស្ថិតនៅឆ្ងាយពីកោះ Aogashima ប្រមាណ១១០គីឡូម៉ែត្រ បានប្រែទៅជាពណ៌ស-ខៀវ ។ បើទោះជាពួកគេមើលដោយភ្នែកទទេ ក៏ឃើញទឹកសមុទ្រនេះប្រែពណ៌ខ្លាំងដែរ ។

ក្រោយមក ទឹកសមុទ្របានប្រែពណ៌កាន់តែច្រើនជាងមុន និងលាតសន្ធឹងរហូតដល់១.៨គីឡូម៉ែត្រ ទៅកាន់ភាគពាយ័ព្យរបស់កោះ ។ ក្រៅពីនេះ ឆ្មាំសមុទ្រជប៉ុនក៏បានប្រទះឃើញវត្ថុអណ្តែតលើទឹកនៅក្បែរនោះផងដែរ ទើបពួកគេសន្និដ្ឋានថា វាអាចជាឧស្ម័នភ្នំភ្លើង ឬទឹកក្តៅចេញពីបាតសមុទ្រ ។

ហេតុនេះ កាលពីថ្ងៃទី១៩ ខែកញ្ញា ឆ្នាំ២០២៤ ភ្នាក់ងារឧតុនិយមជប៉ុនក៏បានជូនដំណឹងជាបន្ទាន់ ដើម្បីឱ្យពលរដ្ឋជ្រាបពីគ្រោះថ្នាក់ដែលបណ្តាលមកពីការផ្ទុះភ្នំភ្លើងនៅបាតសមុទ្រ ។

គួរបញ្ជាក់ថា នៅលើកោះស៊ូមិស៊ុ មានជួរថ្មមានកម្ពស់ជាង១៣០ម៉ែត្រ និងមានតំបន់ទំនាបមួយឈ្មោះ «Caldera» ។ ឆ្មាំសមុទ្រជប៉ុនតែងតែឃើញទឹកសមុទ្រនៅក្បែរកោះនេះប្រែពណ៌ជាញឹកញាប់ ទើបរាយការណ៍ទៅភ្នាក់ងារឧតុនិយមឱ្យប្រកាសអាសន្នពីគ្រោះធម្មជាតិ ៕

ប្រទេសថៃ ៖ ក្រោយពេលពលរដ្ឋរស់នៅខេត្តឈៀងរ៉ៃ ប្រទេសថៃ បានរងគ្រោះដោយសារទឹកជំនន់ជន់លិចផ្ទះរួចមក ពេលនេះ ពួកគេកំពុងតែប្រឈមនឹងបញ្ហាទំនិញឡើងថ្លៃគ្រប់មុខក្រោយទឹកជំនន់ស្រក ។ សូម្បីតែអំបោសធាងដូង ក៏ឡើងថ្លៃដែរ គឺអំបោស១ មានឡើងថ្លៃចាប់ពី១៨០បាត ទៅ២០០បាត (ឬស្មើពី១ម៉ឺន៨ពាន់រៀល ទៅ២ម៉ឺនរៀល) ខណៈការចែកអង្កររបស់អាជ្ញាធរពុំបានដល់ដៃពលរដ្ឋគ្រប់រូបទេ ។

កាលពីថ្ងៃទី១៩ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ក្រោយពេលទឹកជំនន់នៅខេត្តឈៀងរ៉ៃ ស្រកចុះចូលសភាពធម្មតាវិញ ពលរដ្ឋបានសហការជាមួយអាជ្ញាធរជួយគ្នាសម្អាតភូមិស្រុក និងផ្លូវយ៉ាងញាប់ដៃ ញាប់ជើង ។ ត្រាក់ទ័រចូកដីតូច-ធំ ព្រមទាំងមន្ត្រីរាជការ និងក្រុមអ្នកស្ម័គ្រចិត្តជាច្រើននាក់បានជួយគ្នាកាយដីចេញពីផ្លូវ និងសម្អាតភូមិចំនួន៣ ដែលទឹកជំនន់លិចខ្លាំង រួមមាន ៖ ភូមិកោះសាយ ភូមិម៉ៃលុងខន និងភូមិមឿងឌែង ស្ថិតនៅស្រុកមេសាយ ។

ប៉ុន្តែពលរដ្ឋប្រឈមនឹងបញ្ហាខ្វះខាតស្បៀងអាហារយ៉ាងខ្លាំង ហើយទំនិញផ្សេងៗបានឡើងថ្លៃទាំងអស់ ។ រីឯម្ហូប១ចាន បានឡើងថ្លៃចាប់ពី៨០បាត ទៅ១០០បាត, អំ
បោសធាងដូង បានឡើងថ្លៃចាប់ពី១៨០បាត ទៅ២០០បាត ខណៈកាលពីមុន វាមានតម្លៃត្រឹមតែ៤៥បាតប៉ុណ្ណោះ ។ ក្រៅពីនេះ ឧបករណ៍សម្រាប់សម្អាតគំនរភក់ក្នុងផ្ទះ ដូចជា ៖ ចបកាប់ ក៏ឡើងថ្លៃដែរ ហើយនៅតំបន់ខ្លះ គ្មានឧបករណ៍សម្អាតផ្ទះលក់ទេ ។

ពលរដ្ឋនៅតំបន់មួយចំនួនខ្វះខាតប្រាក់សម្រាប់ទិញអាហារបរិភោគ ហើយពួកគេពុំអាចទៅយកស្បៀងដែលអាជ្ញាធរចែកឱ្យទេ ដោយសារនៅតាមផ្លូវសុទ្ធតែដីភក់ ។ ពលរដ្ឋនិយាយថា អ្នកដែលទៅទទួលយកស្បៀងពីអាជ្ញាធរ ភាគច្រើនជាពលរដ្ឋមីយ៉ាន់ម៉ា ហើយទម្រាំដល់វេនពលរដ្ឋថៃ គឺអស់ស្បៀងហើយ ។

ដោយឡែក បន្លែគ្រប់មុខដែលលក់នៅផ្សារក្នុងស្រុកស៊្រីរ៉ាឆា ខេត្តឈុនបុរី ក៏បានឡើងថ្លៃខ្ពស់ដូចគ្នាដែរ ក្រោយពេលទឹកជំនន់ស្រក ។ ហេតុនេះ អាជីវករបានទិញបន្លែពីប្រទេសជិតខាងមកលក់ជំនួស ដោយសារនៅប្រទេសថៃខ្វះខាតបន្លែ ។

លោក ឡិក អាយុ៦០ឆ្នាំ ជាអាជីវករលក់បន្លែនៅផ្សារក្នុងស្រុកស៊្រីរ៉ាឆា និយាយថា ទឹកជំនន់បានលិចខេត្តជាច្រើនរបស់ថៃ ទើបធ្វើឱ្យកសិករពុំអាចដាំដុះបន្លែបាន ។ ទឹកជំនន់បានបំផ្លិចបំផ្លាញដំណាំកសិករអស់យ៉ាងច្រើន ទើបលោកធ្វើដំណើរទៅឆ្ងាយដើម្បីទិញបន្លែពីប្រទេសជិតខាងមកលក់ ។

លោកបន្តថា មូលហេតុដែលអាជីវករដំឡើងថ្លៃបន្លែ ដោយសារពួកគេត្រូវចំណាយដើមទុនច្រើនជាងមុនលើថ្លៃដឹកជញ្ជូនបន្លែពីប្រទេសជិតខាង ។ បន្លែនៅថៃនឹងឡើងថ្លៃខ្ពស់មួយរយៈទៀត រហូតដល់ស្ថានការណ៍ទឹកជំនន់នៅចម្ការបន្លែធូរស្រាល ទើបវាមានតម្លៃធម្មតាវិញ ៕