ប្រទេសជប៉ុន៖ ប្រទេសជប៉ុននាពេលបច្ចុប្បន្ននេះបានកំពុងប្រឈមមុខនឹងវិបត្តិធំៗចំនួន ៣ ដែលវិបត្តិទាំងនេះនឹងគំរាមកំហែងដល់សេដ្ឋកិច្ច ក៏ដូចជាប្រព័ន្ធសុខុមាលភាពរបស់សង្គម។
យោងតាមសារព័ត៌មានបរទេស Newsweek ប្រទេសជប៉ុនបានកំពុងដោះស្រាយវិបត្តិទាំងបីនេះហើយ ប៉ុន្តែមិនទាន់ជោគជ័យនោះទេ ដែលវិបត្តិធំៗទាំងនោះរួមមាន៖ ទីមួយគឺចំនួនប្រជាជនវ័យចំណាស់។ យោងតាមរបាយការណ៍របស់ក្រសួងកិច្ចការផ្ទៃក្នុង និងទំនាក់ទំនងរបស់ប្រទេសជប៉ុន បច្ចុប្បន្នប្រទេសនេះមានប្រជាជនដែលមានអាយុចាប់ពី ៦៥ ឆ្នាំឡើងទៅរហូតដល់ ៣៦.២៥ លាននាក់ ស្មើនឹង ២៩% នៃចំនួនប្រជាជនសរុបទាំងអស់ ដែលនេះគឺជាអត្រាខ្ពស់បំផុតមិនធ្លាប់មាន បើធៀបនឹងប្រទេស ឬដែនដីដទៃទៀតនៅក្នុងពិភពលោក។

ទន្ទឹមនឹងនេះ មនុស្សចាស់ជាច្រើននៅតែត្រូវធ្វើការ ដោយក្នុងរយៈពេល ២០ ឆ្នាំជាប់ៗគ្នា ចំនួនកម្មករវ័យចំណាស់បានកើនឡើង ដែលឈានដល់កម្រិតកំណត់ត្រា ៩.១៤ លាននាក់។ ទោះបីជាក្រុមហ៊ុនជប៉ុនជាច្រើនបានកំណត់អាយុចូលនិវត្តន៍ជាកាតព្វកិច្ចសម្រាប់អាយុ ៦០ ឆ្នាំក៏ដោយក៏រដ្ឋាភិបាលលើកទឹកចិត្តពួកគេឱ្យរក្សាបុគ្គលិកចាស់ៗដែលចង់បន្តការងារ។ ភាពបត់បែននេះជួយបិទគម្លាតរហូតដល់ទទួលបានប្រាក់សោធននិវត្តន៍នៅអាយុ ៦៥ ឆ្នាំ។ ប្រាក់បៀវត្សរ៍ និងលក្ខខណ្ឌការងារក៏ត្រូវបានកែសម្រួលផងដែរ ដើម្បីសម្រួលដល់កម្មករដែលមានវ័យចំណាស់។

រីឯវិបត្តិទីពីរវិញនោះគឺអត្រាកំណើតបានថយចុះ ប្រទេសជប៉ុនបានកត់ត្រាការសម្រាលកូនច្រើនជាង ៣៥០,០០០ នាក់ចាប់ពីខែមករាដល់ខែមិថុនាឆ្នាំនេះ ធ្លាក់ចុះជិត ៦% បើធៀបនឹងឆ្នាំ ២០២៣ នេះមានន័យថាអាត្រាកំណើតរបស់ប្រទេសជប៉ុនបានធ្លាក់ចុះពីមួយឆ្នាំទៅមួយឆ្នាំ។ យោងតាមស្ថិតិរបស់ក្រសួងសុខាភិបាល បានឱ្យដឹងថា វាក៏ជាឆ្នាំទី ៣ ជាប់ៗគ្នាដែរ ដែលមានកំណើតតិចជាង ៤០០,០០០ នាក់ក្នុងឆមាសទីមួយនៃឆ្នាំនេះ។ រដ្ឋមន្រ្តីក្រសួងសុខាភិបាល Keizo Takemi បាននិយាយថា ស្ថានភាពនេះថាគឺកាន់តែធ្ងន់ធ្ងរហើយ ប៉ុន្តែមិនទាន់អាចដោះស្រាយចេញនោះទេ។

ជាការពិតណាស់ការថយចុះចំនួនប្រជាជន បានធ្វើឱ្យប្រទេសជប៉ុនប្រឈមនឹងបញ្ហាស្មុគស្មាញជាច្រើនដែលនឹងគំរាមកំហែងដល់សេដ្ឋកិច្ច ក៏ដូចជាប្រព័ន្ធសុខុមាលភាពរបស់សង្គម។ យោងតាមស្ថិតិរបស់រដ្ឋាភិបាលដែលបានចេញផ្សាយនៅក្នុងខែកក្កដា ចំនួនប្រជាជនជប៉ុនបានធ្លាក់ចុះ ១៥ ឆ្នាំជាប់ៗគ្នាចាប់តាំងពីឆ្នាំ២០០៩ ដល់ ២០២៤។ ទោះបីជាប្រទេសនេះមានកំណើនជនបរទេសរស់នៅក៏ដោយ ក៏ស្ថិតិបានបញ្ជាក់ថា ចំនួនប្រជាជនជប៉ុននៅតែមានអាត្រាទាប។ ដូច្នេះបច្ចុប្បន្ននេះរដ្ឋាភិបាលមិនទាន់មានដំណោះស្រាយត្រឹមត្រូវណាមួយដែលអាចដោះស្រាយបញ្ហាទាំងអស់នេះបាននោះទេ៕

Deep Sleep Hotel គឺជាសណ្ឋាគារដ៏អាថ៌កំបាំងមួយដែលសាងសង់នៅក្នុងរូងភ្នំ Snowdonia ប្រទេសអង់គ្លេស មានទីតាំងនៅជម្រៅ ៤១៩ ម៉ែត្រ ត្រូវបានគេស្គាល់ថាជា “សណ្ឋាគារជ្រៅបំផុតនៅលើភពផែនដី”។
សណ្ឋាគារនេះបានបើកដំណើរការតាំងពីខែមេសា ឆ្នាំ២០២៣ មកម្លេះ ប៉ុន្តែទើបតែទទួលបានការចាប់អារម្មណ៍ខ្លាំងពីភ្ញៀវទេសចរបរទេសក្នុងរយៈពេលប៉ុន្មានខែថ្មីៗនេះទេ។

នៅក្នុង Deep Sleep Hotel មានកន្លែងទទួលទានអាហារ, បន្ទប់ទឹកដ៏ទំនើប, បន្ទប់គេងបែបរ៉ូមែនទិក ដោយប្រើឧបករណ៍បំភ្លឺជាប្រភេទវ៉ុលទាប ដំណើរការដោយថ្ម 12v លើសពីនេះក៏មាន Wifi និងស្ទ្រីមតូចមួយនៅក្នុងអណ្តូងរ៉ែផងដែរ។ Deep Sleep Hotel គឺពិតជាសក្តិសមខ្លាំងណាស់ចំពោះភ្ញៀវទេសចរណាដែលចូលចិត្តការផ្សងព្រេង ដោយសារតែវាស្ថិតនៅក្នុងដីដ៏ជ្រៅ និងមានសីតុណ្ហភាពជុំវិញគឺត្រជាក់ខ្លាំងរហូតដល់ ១០ អង្សាសេ។

ទោះជាយ៉ាងណាម្ចាស់សណ្ឋាគារបានសាងសង់ស្រទាប់ការពារយ៉ាងក្រាស់ ដូច្នេះហើយនៅខាងក្នុងបន្ទប់គេងគឺមានភាពកក់ក្តៅខ្លាំង ប៉ុន្តែភ្ញៀវនៅតែត្រូវបានណែនាំឱ្យយកសម្លៀកបំពាក់ក្រាស់ៗ ដែលងាយស្រួលសម្រាប់ផ្លាស់ទី។ ដើម្បីអាចទៅដល់សណ្ឋាគារនេះ ភ្ញៀវត្រូវតែឆ្លងកាត់ ដំណើរផ្សងព្រេងក្រោមដីជាមុនសិន ដោយការធ្វើដំណើរចាប់ផ្តើមនៅម៉ោង ៥ ល្ងាចនៅឯមូលដ្ឋាន Tanygrisiau ជិតទីក្រុង Blaenau Ffestiniog ប្រទេសអង់គ្លេស។

បន្ទាប់ពីដើររយៈពេល ៤៥ នាទីរួច ភ្ញៀវគ្រប់រូបត្រូវតែពាក់មួកសុវត្ថិភាព ពាក់ឧបករណ៍ការពារដូចជាភ្លើង ខ្សែពួរ និងស្បែកជើងកវែង ដើម្បីឆ្លងកាត់ផ្លូវងងឹត រអិល ផ្លូវរដិបរដុប និងឡើងជណ្តើរ ក៏ដូចជាឆ្លងកាត់ស្ពានចាស់ជាច្រើនទៀតផង។ ហេតុនេះសម្រាប់ភ្ញៀវដែលមានបំណងដើរកម្សាន្តបែបផ្សងព្រេង អាចទទួលយកបទពិសោធន៍ប្លែកៗនៅទីនេះបាន។

គួរបញ្ជាក់ដែរថា សណ្ឋាគារមិនទទួលយកកុមារអាយុក្រោម ១៤ ឆ្នាំទេ ហើយមនុស្សដែលមានអាយុ ១៤ ឆ្នាំឡើងទៅទើបអនុញ្ញាតឱ្យទស្សនា ម្យ៉ាងវិញទៀតចំពោះការកក់ត្រូវតែធ្វើឡើងតាមអ៊ីនធឺណិតជាមុនសិន ព្រោះកន្លែងមានកំណត់។ ទោះជាយ៉ាណាក៏ដោយ សណ្ឋាគារនេះបើកតែម្តងក្នុងមួយសប្តាហ៍ប៉ុណ្ណោះ គឺចាប់ពីយប់ថ្ងៃសៅរ៍ ដល់ព្រឹកថ្ងៃអាទិត្យ ចំពោះតម្លៃបន្ទប់វិញគឺជាង ៤០០ ដុល្លារអាមេរិកឡើងទៅ៕

ប្រទេសចិន ៖ យុវជនចិនម្នាក់បានចំណាយប្រាក់ផ្ទាល់ខ្លួនធ្វើស្ពានឆ្លងទន្លេទៅកាន់ភូមិឆ្ងាយដាច់ស្រយាលមួយដើម្បីឱ្យអ្នកភូមិងាយស្រួលធ្វើដំណើរ ប៉ុន្តែបែរជាសមត្ថកិច្ចចាប់ខ្លួ.ន បញ្ជូនទៅតុលាការ ហើយតុលាការបានកាត់ទោ.ស ឱ្យជាប់ពន្ធនា.គារ រយៈពេល២ឆ្នាំ ។

កាលពីថ្ងៃទី១៩ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា យុវជនចិនម្នាក់បានធ្វើស្ពានឆ្លងទន្លេទៅកាន់ភូមិមួយក្នុងខេត្តជីលីន ស្ថិតនៅភាគខាងជើងប្រទេសចិន ដោយសារមើលឃើញថា អ្នកភូមិបានចំណាយពេលធ្វើដំណើររហូតដល់៧០គីឡូម៉ែត្រ ដើម្បីទៅកាន់ស្ពាននៅជិតបំផុត ។ ប៉ុន្តែអាជ្ញាធប្រាប់ឱ្យយុវជននេះរុះរើស្ពាន ។

កាលពីឆ្នាំ២០០៥ លោក ហួង បានប្រកបមុខរបរដឹកអ្នកភូមិឆ្លងទន្លេតាមសាឡាង ។ ក្រោយមក លោកក៏សម្រេចចិត្តធ្វើស្ពានឆ្លងទន្លេ និងពុំបានសុំការអនុញ្ញាតពីអាជ្ញាធរទេ ។ លោកបានប្រមូលប្រាក់បន្តិចបន្តួចពីអ្នកឆ្លងស្ពាន ហើយអ្នកភូមិរីករាយនឹងប្រគល់ប្រាក់ឱ្យលោក ពីព្រោះប្រាក់នេះតិច បើធៀបនឹងពួកគេចំណេញពេលច្រើនក្នុងការធ្វើដំណើរទៅឆ្លងស្ពានមួយទៀត ។

នៅឆ្នាំ២០១៤ លោក ហួង និងអ្នកភូមិ១៧នាក់បានជួយគ្នាជួសជុលស្ពាន ព្រមទាំងតភ្ជាប់លោហៈផងដែរ ដើម្បីឱ្យស្ពានអាចទ្រទ្រង់ទម្ងន់យានជំនិះកាន់តែច្រើន ។ ប៉ុន្តែនៅឆ្នាំ២០១៨ អាជ្ញាធរបានប្រាប់ឱ្យលោក ហួង រុះរើស្ពានចោល និងចោទប្រកាន់ថា លោក និងគ្រួសារទទួលផលប្រយោជន៍ពីស្ពានយ៉ាងខុសច្បាប់ ។ បន្ទាប់មក សមត្ថកិច្ចក៏បានចាប់ខ្លួនលោក និងគ្រួសារ ដោយចោទប្រកាន់ជាច្រើនករណី ។

តាមការស៊ើបអង្កេតឃើញថា លោក ហួង និងគ្រួសារបានយកប្រាក់ពីរថយន្តបើកឆ្លងស្ពាន ចំនួន៥២.០០០យាន់ (ឬស្មើជាង៧ពាន់ដុល្លារអាមេរិក) ទើបតុលាការកាត់ទោសឱ្យលោកជាប់ពន្ធនាគារ២ឆ្នាំ ។ លោក ហួង បានប្តឹងទៅតុលាការឧទ្ធរណ៍កាលពីឆ្នាំ២០២១ ហើយលោកទទួលស្គាល់ថា លោកពុំបានសុំការអនុញ្ញាតសាងសង់ស្ពាន គឺលោកគ្រាន់តែចង់ជួយអ្នកភូមិប៉ុណ្ណោះ ។

រីឯតុលាការចោទប្រកាន់ថា លោកបានយកប្រាក់យ៉ាងច្រើនពីអ្នកដំណើរឆ្លងស្ពាននោះ គឺពុំត្រឹមត្រូវទេ ។ លោកបានចំណាយប្រាក់អស់ជាង១៣ម៉ឺនយាន់ (ឬស្មើជិត២ម៉ឺនដុល្លារអាមេរិក) ដើម្បីសាងសង់ស្ពានឆ្លងទន្លេ ។ ក្រោយតុលាការឧទ្ធរណ៍បានបដិសេធពាក្យបណ្តឹង លោកក៏ប្តឹងទៅតុលាការប្រជាជនកណ្តាល នៅខែមិថុនា ឆ្នាំ២០២៣ ហើយនៅឆ្នាំ២០២៤ តុលាការពុំទាន់កាត់ក្តីរឿងនេះចប់សព្វគ្រប់ទេ ។

ក្រោយពីរឿងស្ពានល្បីល្បាញក្នុងបណ្តាញសង្គម ធ្វើឱ្យមហាជនបញ្ចេញមតិផ្សេងៗគ្នា ។ អ្នកលេងបណ្តាញសង្គមខ្លះយល់ស្របជាមួយតុលាការ ដែលកាត់ទោសលោក ហួង ឱ្យជាប់ពន្ធនាគារ ដោយសារលោកបានប្រមូលប្រាក់ពីអ្នកឆ្លងស្ពាន និងធ្វើស្ពានគ្មានការអនុញ្ញាត ។

មតិខ្លះពុំយល់ស្របទេ ដោយសារលោកធ្វើស្ពានដើម្បីជួយសហគមន៍ ហើយអាជ្ញាធរពុំអនុញ្ញាតឱ្យលោកធ្វើស្ពាន ។ រីឯអ្នកភូមិឆ្លងស្ពានរីករាយនឹងបង់ប្រាក់ឱ្យលោក ហួង ដោយសារវាអស់តិចជាង បើធៀបនឹងការធ្វើដំណើរផ្លូវឆ្ងាយ ។ ប៉ុន្តែមតិខ្លះសួរថា បើស្ពាននេះមានគ្រោះថ្នាក់ តើអ្នកណាទទួលខុសត្រូវ? ក្រោយពីមហាជនជជែកគ្នាមក អាជ្ញាធរក៏ប្រកាសថា នឹងសាងសង់ស្ពានឆ្លងទន្លេនៅក្បែរភូមិ ប៉ុន្តែរហូតមកដល់ពេលនេះ ការសាងសង់ស្ពានរបស់អាជ្ញាធរពុំទាន់ដំណើរការទេ ៕

ប្រទេសថៃ ៖ កាលពីថ្ងៃទី១៧ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា រដ្ឋាភិបាលនឹងចាប់ផ្តើមចែកប្រាក់ឱ្យពលរដ្ឋ ចំនួន១៤លាន៥សែននាក់ ដែលមានប័ណ្ណក្រីក្រ និងប័ណ្ណជនពិការ ហើយពលរដ្ឋនឹងទទួលបានប្រាក់ម្នាក់១ម៉ឺនបាត ។ នេះជាការចែកប្រាក់ជំហ៊ានដំបូង ហើយរដ្ឋាភិបាលនឹងចែកប្រាក់ជាបន្តបន្ទាប់ទៀត ដើម្បីជំរុញសេដ្ឋកិច្ចជាតិ និងជួយសម្រួលដល់ការចំណាយរបស់ពលរដ្ឋ ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ថ្លែងថា គណៈរដ្ឋមន្ត្រីថៃបានមើលឃើញពីវិធានការជំរុញសេដ្ឋកិច្ចនៅឆ្នាំ២០២៤ ដោយការចែកប្រាក់ឱ្យពលរដ្ឋដែលមានប័ណ្ណក្រីក្រ និងប័ណ្ណជនពិការ តាមរយៈការស្នើរបស់ក្រសួងហិរញ្ញវត្ថុ ។ រដ្ឋាភិបាលនឹងចាប់ផ្តើមចែកប្រាក់ពលរដ្ឋ ចាប់ពីថ្ងៃទី២៥ ខែកញ្ញា ឆ្នាំ២០២៤ តទៅ ។

រដ្ឋាភិបាលនឹងចំណាយប្រាក់សរុបចំនួន១៤៥.៥០០លានបាត ដើម្បីចែកប្រាក់ដល់ពលរដ្ឋដែលមានជីវភាពខ្វះខាត ចំនួន១៤លាន៥សែននាក់ រួមមាន ៖ ពលរដ្ឋមានប័ណ្ណក្រីក្រ និងមានប័ណ្ណជនពិការ ។ ពលរដ្ឋនឹងអាចបើកប្រាក់ចំនួន១ម៉ឺនបាត (ឬស្មើជាង៣០០ដុល្លារអាមេរិក) ពីកុងធនាគាររបស់ខ្លួនតែម្តង និងពុំចាំបាច់ដកប្រាក់ច្រើនដងទេ ។

ចំណែកក្រសួងហិរញ្ញវត្ថុប៉ាន់ប្រមាណថា គម្រោងជំរុញសេដ្ឋកិច្ច ឆ្នាំ២០២៤ តាមរយៈការចែកប្រាក់ពលរដ្ឋម្នាក់១ម៉ឺនបាត សម្រាប់អ្នកមានប័ណ្ណក្រីក្រ និងប័ណ្ណជនពិការនេះ នឹងធ្វើឱ្យប្រាក់ហូរចូលក្នុងប្រព័ន្ធសេដ្ឋកិច្ចជាតិទាំងមូល ។ លើសពីនេះ វានឹងជួយជំរុញដល់សេដ្ឋកិច្ចថៃឱ្យកើនឡើង០,៣៥% បើធៀបនឹងអំឡុងពេលដែលថៃពុំបានអនុវត្តគម្រោង ។

ការចែកប្រាក់នេះ គឺក្នុងគោលបំណងជួយសម្រាលការចំណាយក្នុងជីវភាពរស់នៅរបស់ពលរដ្ឋឱ្យកាន់តែល្អប្រសើរ ។ ហេតុនេះ ពេលពលរដ្ឋមានលទ្ធភាពទិញទំនិញច្រើន វានឹងជំរុញដល់ការផលិតទំនិញ ការលក់ដូរ និងការជួលកម្លាំងពលកម្ម ។ ជំហានបន្ទាប់ រដ្ឋាភិបាលនឹងចែកប្រាក់ពលរដ្ឋចំនួន ៣៦លាននាក់ទៀត ដោយពលរដ្ឋម្នាក់ៗនឹងទទួលបានប្រាក់១ម៉ឺនបាត ដូចគ្នា ។

គួរបញ្ជាក់ថា ពលរដ្ឋថៃបានរង់ចាំប្រាក់១ម៉ឺនបាតពីរដ្ឋាភិបាលយូរមកហើយ តាំងពីលោក ស្រេតថា ថាវីស៊ីន ធ្វើជានាយករដ្ឋមន្ត្រីមកម៉្លេះ ប៉ុន្តែពេលនោះ រដ្ឋាភិបាលបានកំណត់លក្ខខណ្ឌច្រើនពេក ទើបពលរដ្ឋពិបាកទទួលបានប្រាក់នេះ ។ ពលរដ្ឋថៃបានអរគុណដល់នាយករដ្ឋមន្ត្រីថ្មីយ៉ាងខ្លាំងដែលដឹងពីសុខទុក្ខ និងការលំបាករបស់ពួកគេ ហើយពលរដ្ឋអាចបើកប្រាក់នេះពីកុងធនាគារ និងពុំចាំបាច់បំពេញលក្ខខណ្ឌច្រើនដូចមុន ៕

ប្រទេសកូរ៉េខាងត្បូង ៖ ស្របពេលបច្ចេកវិទ្យាកាន់តែរីកចម្រើនខ្លាំងបានធ្វើឱ្យសមត្ថកិច្ចអាចចា.ប់ ខ្លួនជនល្មើ.ស មុនពេលពួកគេធ្វើសកម្មភាពទៅទៀត ។ វាដូចគ្នានឹងក្នុងខ្សែភាពយន្តដែរ ដែលយើងបានឃើញក្រុមសមត្ថកិច្ចដេញចាប់ជនល្មើ.ស ពេលទទួលព័ត៌មានតាមរយៈបច្ចេកវិទ្យាថា ជនល្មើ.ស ណាមួយចង់ធ្វើសកម្មភាព ។

ប្រទេសកូរ៉េខាងត្បូងមានគម្រោងប្រើប្រាស់បច្ចេកវិទ្យា AI ដើម្បីជូនដំណឹងពីបទល្មើ.ស ផ្សេងៗដែលបម្រុងនឹងកើតឡើង តាមរយៈការត្រួតពិនិត្យក្នុងកាមេរ៉ាសុវត្ថិភាពប្រភេទ Realtime ។ ការប្រើប្រាស់កាមេរ៉ាសុវត្ថិភាពភ្ជាប់បច្ចេកវិទ្យា AI ដើម្បីឱ្យសមត្ថកិច្ចអាចត្រៀមខ្លួនទប់ស្កាត់ហេតុការណ៍ជាមុន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៧ ខែកញ្ញា ឆ្នាំ២០២៤ ។

វិទ្យាស្ថានស្រាវជ្រាវអេឡិចត្រូនិក និងទូរគមនាគមន៍កូរ៉េខាងត្បូងបានបង្ហាញ «Dejaview» គឺជាប្រព័ន្ធវិភាគរូបភាពពីកាមេរ៉ាសុវត្ថិភាព ដើម្បីចាប់ការប្រព្រឹត្តបទល្មើសជាមុន ។ ប្រព័ន្ធនេះអាចវិភាគពីថ្ងៃ, ពេលវេលា, ទីកន្លែង និងសរុបព្រឹតិ្តការណ៍អតីតកាល ដើម្បីវិភាគពីគ្រោះថ្នាក់ផ្សេងៗ ។

ពេលប្រព័ន្ធវិភាគរូបភាពពីកាមេរ៉ាសុវត្ថិភាពនេះបង្ហាញពីតំបន់គ្រោះថ្នាក់ សមត្ថកិច្ចនឹងតាមដានតំបន់នេះយ៉ាងដិតដល់, ពិនិត្យក្នុងកាមេរ៉ាសុវត្ថិភាព ព្រមទាំងត្រៀមកម្លាំងជាមុន ដើម្បីទប់ស្កាត់បទល្មើសទាន់ពេលវេលា ។

ប្រព័ន្ធនេះនឹងរាយការណ៍ពីបុគ្គលគ្រោះថ្នាក់ ដើម្បីឱ្យសមត្ថកិច្ចតាមដានបុគ្គលនោះថា តើពិតជាប្រព្រឹត្តបទល្មើសដែរឬទេ ។ ប្រព័ន្ធនេះនឹងវិភាគពីអត្តចរិត និងតាមដានគ្រប់សកម្មភាពបុគ្គលសង្ស័យ ហើយបើទោះជាបុគ្គលសង្ស័យស្ថិតនៅកន្លែងណាក៏ដោយ ក៏ AI នឹងតាមដានគ្រប់ពេលវេលា ។

បច្ចុប្បន្ន ប្រទេសកូរ៉េខាងត្បូងបានបំពាក់កាមេរ៉ាសុវត្ថិភាពភ្ជាប់បច្ចេកវិទ្យា AI នៅតាមទីសាធារណៈ ដូចជា ៖ អាកាសយានដ្ឋាន, រោងចក្រថាមពល និងរោងចក្រផ្សេងៗ ហើយកូរ៉េខាងត្បូងនឹងលក់កាមេរ៉ានេះ នៅចុងឆ្នាំ២០២៥ ។

ក្រៅពីកូរ៉េខាងត្បូង ប្រទេសអាហ្សង់ទីន ក៏បានបំពាក់កាមេរ៉ាសុវត្ថិភាពប្រភេទនេះដែរ ដើម្បីជូនដំណឹងពីហេតុការណ៍អាក្រក់បម្រុងកើតឡើង ហើយអាហ្សង់ទីនមិនត្រឹមតែយកព័ត៌មានពីកាមេរ៉ាសុវត្ថិភាពប៉ុណ្ណោះទេ ប៉ុន្តែក៏បានយកពីបណ្តាញសង្គម និងវែបសាយផងដែរ ៕

ប្រទេសថៃ ៖ វត្តរ៉ាឆាបូភីត សាក់ធិត មហាស៊ីម៉ារ៉ាម (Rajabopit Sathitmahasimaram) ស្ថិតនៅទីក្រុងបាងកក ប្រទេសថៃ បានចេញសេចក្តីប្រកាសហាមពលរដ្ឋថតរូបរៀបការ (Pre-wedding), ចុះសំបុត្រអាពាហ៍ពិពាហ៍ និងបំពាក់ចិញ្ចៀនក្នុងបរិវេណវត្តដាច់ខាត ។

ក្រៅពីនេះ វត្តក៏បានហាមថតរូបភាព ឬថតវីដេអូផ្សាយពាណិជ្ជកម្មផលិតផលផងដែរ ហើយវត្តអនុញ្ញាតឱ្យតែពលរដ្ឋមកធ្វើបុណ្យ និងរៀបចំពិធីផ្សេងៗតាមពុទ្ធសាសនាប៉ុណ្ណោះ ។

កាលពីថ្ងៃទី១៧ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ក្រោយពីមានការផ្សព្វផ្សាយរូបភាពមួយចំនួនក្នុងបណ្តាញសង្គមធ្វើឱ្យមានការយល់ច្រឡំ និងប៉ះពាល់យ៉ាងខ្លាំងដល់ព្រះពុទ្ធសាសនា និងវត្តរ៉ាឆាបូភីត ទើបខាងវត្តបានចេញសេចក្តីប្រកាសមួយ ដែលមានខ្លឹមសារលម្អិតដូចខាងក្រោម ៖

១-វត្តនឹងអនុញ្ញាតឱ្យពលរដ្ឋមកធ្វើបុណ្យ ឬរៀបចំពិធីតាមព្រះពុទ្ធសាសនាតែប៉ុណ្ណោះ ដោយពលរដ្ឋត្រូវសុំការអនុញ្ញាតតាមលក្ខខណ្ឌកំណត់របស់វត្ត
២-វត្តនឹងអនុញ្ញាតសម្រាប់តែការធ្វើពិធីប្រគេនចង្ហាន់ និងសូត្រធម៌ ។ ហេតុនេះ ពលរដ្ឋពុំអាចរៀបការ, បំពាក់ចិញ្ចៀន ឬធ្វើពិធីផ្សេងៗដែលប៉ះពាល់ដល់ព្រះពុទ្ធសាសនាទេ
៣-វត្តពុំអនុញ្ញាតឱ្យយកបរិវេណវត្តធ្វើជាកន្លែងថតរូប ឬថតវីដេអូដើម្បីផ្សព្វផ្សាយពាណិជ្ជកម្មផលិតផល ឬសេវាកម្ម ឬធ្វើអ្វីផ្សេង ដើម្បីស្វែងរកប្រយោជន៍អាជីវកម្ម ។ ក្រៅពីនេះ ការចូលក្នុងបរិវេណវត្តត្រូវតែស្លៀកពាក់ឱ្យបានត្រឹមត្រូវ សមរម្យតាមប្រពៃណីថៃ និងរក្សាអាកប្បកិរិយាឱ្យបានសមរម្យ ដើម្បីកុំឱ្យរំខានដល់ព្រះសង្ឃគង់ក្នុងវត្ត
៤-វត្តពុំពាក់ព័ន្ធជាមួយក្រុមហ៊ុន, ហាងលក់ទំនិញ ឬភ្នាក់ងារណាមួយដើម្បីរៀបចំពិធីសាសនា, ពិធីរៀបការ ឬពិធីផ្សេងដែលធ្វើឱ្យប៉ះពាល់ពុទ្ធសាសនាទេ
៥-បើឃើញបុគ្គលណាទទួលបានប្រយោជន៍ ឬធ្វើឱ្យខូចខាតតាមវិធីណាមួយ ឬប្រព្រឹត្តខុសឆ្គង សូមរាយការណ៍រឿងនេះទៅក្រុមការងារពិសេសប្រចាំការិយាល័យសម្តេចព្រះសង្ឃរាជ ។

ការប្រកាសនេះបានធ្វើឱ្យអ្នកលេងបណ្តាញសង្គមថៃជាច្រើននាក់គាំទ្រ ពីព្រោះកន្លងមក មានមនុស្សមួយចំនួនបានប្រើប្រាស់បរិវេណវត្តថតរូប និងនិយាយស្តីពុំសមរម្យ ដែលផ្ទុយពីវិន័យព្រះពុទ្ធសាសនា ។ ដូចគ្នានេះ កូនកំលោះ និងកូនក្រមុំ ដែលមកថតរូប Pre-wedding ក្នុងបរិវេណវត្ត ពួកគេបានឱបថើបគ្នានៅចំពោះមុខព្រះសង្ឃទៀតផង៕

ប្រទេសថៃ ៖ ក្រោយពីស្ថានការណ៍ទឹកជំនន់នៅស្រុកមេសាយ ខេត្តឈៀងរ៉ៃ ប្រទេសថៃ បានធូរស្រាល អ្នកស្រុក និងក្រុមអាជីវករលក់ដូរទំនិញក្នុងផ្សារបានជួយគ្នាលាងសម្អាតផ្ទះ និងតូបលក់ដូរឱ្យមានសភាពធម្មតាវិញ ។ ប៉ុន្តែពួកគេនៅតែជួបការលំបាកយ៉ាងខ្លាំងក្រោយពេលទឹកស្រក ហើយតំបន់ជាច្រើនខ្វះខាតទឹកស្អាតប្រើប្រាស់ ជាពិសេស បញ្ហាគំនរភក់ខ្ពស់ៗដែលហូរមកជាមួយទឹកជំនន់ ។

ការលាងសម្អាតផ្ទះ និងសម្ភារៈប្រើប្រាស់ផ្សេងៗ គឺជាបញ្ហាលំបាកយ៉ាងខ្លាំងរបស់ពលរដ្ឋរស់នៅស្រុកមេសាយ ខេត្តឈៀងរ៉ៃ មិនចាញ់ទឹកជំនន់ទេ ។ ពេលទឹកជំនន់ស្រកអស់ ប៉ុន្តែផ្ទះពលរដ្ឋជាច្រើនខ្នងពាសពេញទៅដោយគំនរភក់ខ្ពស់ដូចភ្នំ ខណៈផ្ទះខ្លះទៀតមានគំនរភក់ខ្ពស់ជិតដល់ពិដាន ។

អ្នកលេងហ្វេសប៊ុកម្នាក់នៅខេត្តឈៀងរ៉ៃ បានថតរូបភាពផ្ទះរបស់ខ្លួនក្រោយទឹកជំនន់ស្រក ស្ថិតនៅម្តុំផ្សារសាយលុងចយ ដែលជាតំបន់ទឹកលិចខ្លាំង ។ ក្នុងរូបភាពនេះ គេឃើញម្ចាស់ផ្ទះកាយគំនរភក់យ៉ាងខ្ពស់ចេញពីក្នុងផ្ទះ ។ រីឯអាជីវករលក់ដូរក្នុងផ្សារក៏ជួបបញ្ហានេះដូចគ្នាដែរ គឺមានគំនរភក់ខ្ពស់ៗនៅតូបលក់ដូរ ដែលធ្វើឱ្យមនុស្សភាគច្រើនឃើញហើយនឿយហត់ជាមុន និងពុំអាចទទួលយកបាន ។

ពលរដ្ឋនិយាយថា ទឹកជំនន់បានបណ្តាលឱ្យពួកគេជួបការលំបាកយ៉ាងខ្លាំង ប៉ុន្តែក្រោយពេលទឹកស្រករឹតតែធ្វើឱ្យពួកគេលំបាកខ្លាំងថែមទៀតជាមួយការលាងសម្អាតផ្ទះឱ្យមានសភាពធម្មតាវិញ ។ ពួកគេទើបតែឃើញគំនរភក់ខ្ពស់បែបនេះជាលើកទី១ តាំងពីកើតមក តើគួរយកគំនរភក់ចេញពីផ្ទះតាមវិធីណា? រីឯផ្ទះខ្លះទៀតមានគំនរភក់កម្ពស់ចាប់ពី១ម៉ែត្រ ដល់២ម៉ែត្រ ឬស្មើពាក់កណ្តាលជញ្ជាំងផ្ទះ ។

ក្រោយពេលអ្នកលេងហ្វេសប៊ុកនៅខេត្តឈៀងរ៉ៃត្អូញត្អែរពីការលំបាកក្រោយទឹកជំនន់ស្រក មហាជននិយាយផ្តល់កម្លាំងចិត្តថា ការសម្អាតផ្ទះក្រោយទឹកជំនន់ស្រក គឺត្រូវតែចំណាយពេលយូរបន្តិច និងមានភាពអត់ធ្មត់ផងដែរ ពីព្រោះវាជាគ្រោះថ្នាក់ធម្មជាតិ ។ ពលរដ្ឋថៃម្នាក់និយាយថា ខេត្តកាឡាក់ស៊ីនបានបញ្ជូនត្រាក់ទ័រឈូសដីជាច្រើនគ្រឿងមកជួយសម្អាតគំនរភក់ក្នុងផ្ទះពលរដ្ឋនៅខេត្តឈៀងរ៉ៃ ។

កាលពីថ្ងៃទី១៩ ខែកញ្ញា កន្លងមក អាជ្ញាធរក្រុងបាងកក ក៏បានបញ្ជូនភ្នាក់ងារសង្គ្រោះ និងរថយន្តសម្អាតភក់ជាច្រើនគ្រឿងទៅជួយពលរដ្ឋរងគ្រោះដោយទឹកជំនន់នៅខេត្តឈៀងរ៉ៃ ផងដែរ ៕

ប្រទេសវៀតណាម ៖ វៀតណាមបានវ៉ាដាច់ប្រទេសជិតខាង ដូចជា ៖ ថៃ សិង្ហបុរី និងឥណ្ឌូណេស៊ី ដោយក្លាយជាគោលដៅទេសចរណ៍ដ៏ទាក់ទាញបំផុតនៅតំបន់អាស៊ាន ។ លើសពីនេះ វៀតណាមបានទទួលពានរង្វាន់ «Asia’s Leading Destination» នៅឆ្នាំ២០២៤ ពី World Travel Awards ផងដែរ ហើយវាជាឆ្នាំទី៤ ជាប់ៗគ្នា ដែលវៀតណាមបានទទួលពានរង្វាន់ ។ នេះបើយោងតាមការចុះផ្សាយរបស់សារព័ត៌មានបរទេស កាលពីថ្ងៃទី១៩ ខែកញ្ញា ឆ្នាំ២០២៤ ។

ភាពជោគជ័យរបស់ប្រទេសវៀតណាមមួយផ្នែក គឺដោយសារគោលនយោបាយបន្ធូរបន្ថយលក្ខខណ្ឌទិដ្ឋាការដល់ភ្ញៀវទេសចរបរទេស ព្រមទាំងយុទ្ធសាស្ត្រជំរុញវិស័យទេសចរណ៍ដ៏មានប្រសិទ្ធភាពរបស់រដ្ឋាភិបាល ។ ហេតុនេះ ទើបធ្វើឱ្យវៀតណាមក្លាយជាគោលដៅទេសចរណ៍ដ៏ពេញនិយមបំផុតរបស់ភ្ញៀវទេសចរបរទេសនៅអាស៊ាន ។

ក្នុងរយៈពេល៨ខែ (ចាប់ពីខែមករា ដល់ខែសីហា) ឆ្នាំ២០២៤ ប្រទេសវៀតណាមបានទទួលភ្ញៀវទេសចរបរទេស ស្មើជាង១១លាននាក់ កើនឡើងរហូតដល់៤៥,៨% បើធៀបនឹងរយៈពេលដូចគ្នាកាលពីឆ្នាំ២០២៣ ។ ចំនួនភ្ញៀវទេសចរបរទេសមកវៀតណាមរយៈពេល៨ខែនេះ គឺខ្ពស់ជាងអំឡុងពេលមុនជំងឺកូវីដ-១៩ ឆ្លងរាតត្បាត ១% ក្នុងនោះភ្ញៀវទេសចរកូរ៉េខាងត្បូង និងចិនបានមកលេងវៀតណាមច្រើនជាងគេ ។

ដោយឡែក កាលពីចុងខែសីហា ឆ្នាំ២០២៤ ប្រទេសវៀតណាមបានទទួលភ្ញៀវទេសចរបរទេសជាក្រុមធំ គឺក្រុមហ៊ុនឈានមុខរបស់ឥណ្ឌា ឈ្មោះ Sun Pharmaceuticals ដែលមានលោក Dilip Shanghvi ជានាយកក្រុមហ៊ុន និងជាមហាសេដ្ឋីមានទ្រព្យសម្បត្តិច្រើនបំផុតលំដាប់ទី៥ នៅឥណ្ឌា បាននាំបុគ្គលិកចំនួន៤.៥០០នាក់ មកកម្សាន្តនៅវៀតណាម ។

បុគ្គលិកចំនួន៤.៥០០នាក់របស់ក្រុមហ៊ុនឥណ្ឌា Sun Pharmaceuticals បានធ្វើដំណើរទៅទីក្រុងហាណូយ, ទីក្រុងនីនបិញ និងឆ្នេរសមុទ្រហាឡុងរបស់វៀតណាម សម្រាប់ដំណើរកម្សាន្តប្រចាំឆ្នាំរបស់ក្រុមហ៊ុន ។ ពីដំបូង ក្រុមហ៊ុននេះមានគម្រោងនាំបុគ្គលិករបស់ខ្លួនទៅកម្សាន្តប្រទេសសិង្ហបុរី ប៉ុន្តែក្រោយមក ក្រុមហ៊ុនក៏បានផ្លាស់ប្តូរមកលេងនៅវៀតណាមវិញ ដោយសារវៀតណាមមានតំបន់ទេសចរណ៍ស្អាតៗជាច្រើនកន្លែង ។

គួរបញ្ជាក់ថា ពានរង្វាន់ «Asia’s Leading Destination» នៅឆ្នាំ២០២៤ ដែល World Travel Awards ប្រគល់ឱ្យប្រទេសវៀតណាមនោះ គឺជាពានរង្វាន់អូស្កានៃវិស័យទេសចរណ៍ ។ ពានរង្វាន់នេះកើតឡើងដោយសារការដាក់ពិន្ទុរបស់បណ្តាអ្នកជំនាញវិស័យទេសចរណ៍ និងភ្ញៀវទេសចរបរទេសមកពីជុំវិញពិភពលោក ៕

ប្រទេសជប៉ុន ៖ នៅប្រទេសជប៉ុនពុំសូវមានធុងសំរាមនៅគ្រប់ទីកន្លែងទេ ពីព្រោះជនជាតិជប៉ុនមានទម្លាប់ទុកដាក់ និងបែងចែកសំរាមតាមប្រភេទបានត្រឹមត្រូវល្អណាស់ ។ ហេតុនេះ វាបានក្លាយជាទម្លាប់ល្អមួយរបស់ពួកគេ ដែលគ្មានការបោះចោលសំរាមតាមទីសាធារណៈផ្តេសផ្តាសនាំឱ្យប៉ះពាល់បរិស្ថាន និងមានបញ្ហាដល់សង្គម ។

ពលរដ្ឋជប៉ុនមានទម្លាប់បែងចែកសំរាមតាមប្រភេទដាច់ៗពីគ្នា ហើយពួកគេចាត់ទុកថា វាជារឿងសំខាន់ខ្លាំងណាស់ ដើម្បីឱ្យភ្នាក់ងារប្រមូលសំរាមងាយស្រួលគ្រប់គ្រង និងចាត់ការបន្តទៀត ។ ខាងក្រោមនេះ គឺជាការបែងចែកសំរាមតាមប្រភេទរបស់ជនជាតិជប៉ុន ៖

១-សំរាមដុតបាន ៖ គឺជាកាកសំណល់ចេញពីផ្ទះបាយ និងសំរាមតូចៗក្នុងផ្ទះ ។ សំរាមអាចដុតបាន គឺមានទំហំមិនធំខ្លាំងពេក និងអាចដាក់ក្នុងថង់ផ្លាស្ទិកដែលរដ្ឋាភិបាលជប៉ុនបានកំណត់ឱ្យពលរដ្ឋប្រើប្រាស់នៅទូទាំងប្រទេស ។
២-សំរាមពុំអាចដុតបាន ៖ គឺជាប្រភេទកែវ, សម្ភារៈផលិតពីកែវ, កំប៉ុងភេសជ្ជៈ, កំប៉ុងដាក់ម្ហូបអាហារ, ដបផ្លាស្ទិកស្តើង និងក្រាស់ ព្រមទាំងសម្ភារៈផលិតពីជ័រ និងស្បែក ។
៣-សំរាមប្រភេទទី៣ ៖ គឺជាសម្ភារៈធំៗ ដូចជា ៖ សម្ភារៈអគ្គិសនី, គ្រឿងសង្ហារិម, ពូក ខ្នើយ, កង់ និងម៉ាស៊ីនដេរ ។
៤-សំរាមពុល ឬគ្រោះថ្នាក់ ៖ ឡឺជាសម្ភារៈផ្ទុកសារធាតុគីមីពុល, សំរាមឆ្លងមេរោគចេញពីមន្ទីរពេទ្យ, កំប៉ុងមានក្បាលបាញ់អាចផ្ទុះ, វត្ថុមុតស្រួច ដូចជា ៖ កាំបិត និងកំទេចកែវ ។
៥-សំរាមត្រូវជូនដំណឹងទៅអាជ្ញាធរ ៖ សំរាមមួយចំនួនតម្រូវឱ្យពលរដ្ឋជប៉ុនជូនដំណឹងទៅកាន់ភ្នាក់ងាររដ្ឋាភិបាល ឬអាជ្ញាធរមកប្រមូល ឬដឹកវាទៅប្រគល់ឱ្យផ្នែកទទួលខុសត្រូវ ដូចជា ៖ កុំព្យូទ័រ និងគ្រឿងកុំព្យូទ័រ, គ្រឿងតន្ត្រីធំៗ, ម៉ូតូ និងខ្មោចសត្វ ។

ក្រៅពីការបែងចែកសំរាមតាមប្រភេទហើយ ប្រទេសជប៉ុនក៏បានកំណត់ពេលវេលាសម្រាប់រថយន្តមកប្រមូលសំរាមនីមួយៗផងដែរ ។ រថយន្តទាំងនេះនឹងមកប្រមូលសំរាមតាមផ្ទះដោយគ្មានការយឺតយ៉ាវ និងគ្មានថ្ងៃឈប់សម្រាកទេ ។

នៅប្រទេសជប៉ុនមានកម្មវិធីប្រមូលសម្ភារៈចាស់ៗ ប៉ុន្តែនៅមានគុណភាពល្អ ដែលម្ចាស់ផ្ទះលែងត្រូវការ ដូចជា ៖ សម្ភារៈអគ្គិសនីតូចៗ, ម៉ាស៊ីនអាំងនំប៉័ង, វិទ្យុ, ឧបករណ៍តន្ត្រីទំហំតូច, កង្ហារ, ឆ្នាំងដាំបាយ, ចង្ក្រានហ្គាស, តុ កៅអី, ធ្នើរដាក់អីវ៉ាន់ ឬសៀវភៅ ។

នៅថ្ងៃព្រហស្បតិ៍ សប្តាហ៍ទី២ និងសប្តាហ៍ទី៤ របស់ខែនីមួយៗ គឺជាថ្ងៃប្រមូលសំរាមដែលមានទំហំធំៗ និងសំរាមពុំអាចដុតបាន ។ រីឯសម្ភារៈអគ្គិសនី និងគ្រឿងសង្ហារិមដែលនៅមានគុណភាពល្អ គឺពលរដ្ឋត្រូវទុកវានៅខាងមុខផ្ទះ មុនថ្ងៃរថយន្តប្រមូលសំរាមមកដល់ ។ បើអ្នកណាចង់បានយកទៅប្រើប្រាស់បន្ត គឺអាចមកជ្រើសរើសបាន ។

គោលការណ៍បែងចែកកាកសំណល់ និងការអប់រំពលរដ្ឋឱ្យយល់ដឹងពីការទុកដាក់ និងបែងចែកប្រភេទសំរាម បានទទួលជោគជ័យយ៉ាងខ្លាំងនៅប្រទេសជប៉ុន ។ បើទោះជាការចោលសំរាមមានភាពស្មុគស្មាញ និងការកំណត់លក្ខខណ្ឌជាច្រើនក្តី ប៉ុន្តែជនជាតិជប៉ុនយល់ឃើញថា វាជាការទទួលខុសត្រូវរួមគ្នារបស់មនុស្សគ្រប់រូប ៕