កាលពីថ្ងៃទី១៩ ខែកញ្ញា តារាសម្តែងចិន Huang Xiaoming បានបញ្ជាក់ថាលោកកំពុងមានទំនាក់ទំនងស្នេហាជាមួយតារាម៉ូដែល Ye Ke បន្ទាប់ពីលែងលះ Angelababy ពីរឆ្នាំ។ តារាសម្តែងរូបនេះបានសរសេរនៅលើបណ្តាញសង្គមផ្ទាល់ខ្លួនថា «សូមទោសដែលបង្ករឱ្យមានភាពច្របូកច្របល់លើអ៊ីនធឺណិតក្នុងជីវិតផ្ទាល់ខ្លួនរបស់ខ្ញុំ។ សូមបញ្ឈប់ការស្មាន។ Ye Ke និងខ្ញុំនៅជាមួយគ្នា» ។ យ៉ាងណាមិញ Huang Xiaoming មិនបានបង្ហាញពីស្ថានភាពអាពាហ៍ពិពាហ៍របស់អ្នកទាំងពីរឡើយ។
តារាសម្តែងវ័យ៤៧ឆ្នាំរូបនេះ បានបង្ហាញរឿងស្នេហារបស់ខ្លួនជាសាធារណៈបន្ទាប់ពីប្រភពមួយចំនួនបាននិយាយថាលោកនិង Ye Ke ជាគូស្នេហ៍ថ្មីបានចុះបញ្ជីអាពាហ៍ពិពាហ៍របស់ពួកគេ។ កាលពីថ្ងៃទី១៨ ខែកញ្ញា មិត្តភក្តិរបស់តារាម៉ូដែលរូបនេះបានបង្ហើបថា Ye Ke បានទទួលទានអាហារពេលល្ងាចជាមួយឪពុកម្តាយ និងកូនប្រុសរបស់ Huang Xiaoming ។ រឿងស្នេហារបស់អ្នកទាំងពីរគឺស្ថិតក្នុងបញ្ជីប្រធានបទដែលពេញនិយមបំផុតនៅលើ Weibo។
បើតាម Sohu តារាសម្ដែងរូបនេះបញ្ជាក់ពីថ្ងៃណាត់ជួបគ្នាព្រោះមិនចង់ឱ្យ Ye Ke ឈឺចាប់។ អ្នកទាំងពីរស្រលាញ់គ្នាជាងមួយឆ្នាំមកហើយ Ye Ke តែងមកស្ទូឌីយោទៅលេងតារាប្រុសរូបនេះ។ 
Ye Ke ជាអតីតពិធីការិនីកម្មវិធីទូរទស្សន៍សព្វថ្ងៃមានជំនួញផ្នែកកែសម្ផស្ស និងសម្លៀកបំពាក់ ដែលតែងតែLiveលក់។ នាងចូលរួមក្នុងការរចនាម៉ូតសំលៀកបំពាក់ និងក៏ជាម៉ូដែលសម្រាប់ផលិតផលម៉ូតរបស់ក្រុមហ៊ុនផងដែរ។
Huang Xiaoming និង Angelababy បានបញ្ជាក់ទំនាក់ទំនងស្នេហាជាសាធារណៈនៅក្នុងឆ្នាំ ២០១៤ និងបានរៀបការនៅឆ្នាំ២០១៥។ អ្នកទាំងពីរបានស្វាគមន៍កូនប្រុសដំបូងរបស់ពួកគេនៅឆ្នាំ ២០១៧ ខណៈបានប្រកាសលែងលះគ្នា ក្នុងខែមករា ឆ្នាំ២០២២៕
