នៅអាស៊ីគឺសម្បូរទៅដោយរមណីយដ្ឋានទេសចរល្បីៗជាច្រើន ក៏ដូចជាកន្លែងដែលមានទេសភាពស្រស់ស្អាត ធម្មជាតិស្រស់បំព្រង ប្លែក និងអស្ចារ្យក្នុងការរុករក មិនចាញ់ទ្វីបអឺរ៉ុបនោះទេ។ នេះបើយោងតាម Agoda.com ដែលជាភ្នាក់ងារទេសចរណ៍អនឡាញដ៏ធំមួយនៅក្នុងតំបន់អាស៊ីប៉ាស៊ីហ្វិក បានណែនាំគោលដៅធម្មជាតិកំពូលទាំង ៩ ដែលពេញនិយមបំផុតនៅអាស៊ី សម្រាប់អ្នកដំណើរក្នុងការភ្ជាប់ទំនាក់ទំនងជាមួយធម្មជាតិ តាមរយៈព្រៃឈើបុរាណ ជ្រលងជ្រៅ និងបឹងដ៏ស្ងប់ស្ងាត់។ ដូច្នេះក្នុងរដូវភ្ជុំបិណ្ឌដែលជារដូវឈប់សម្រាកបានច្រើនថ្ងៃ បងប្អូនដែលមានបំណងដើរលេងក្រៅប្រទេស កុំរំលងកន្លែងទេសចរណ៍ធម្មជាតិទាំងនេះឱ្យសោះ។

១.ឧទ្យានជាតិ Khao Yai ប្រទេសថៃ៖ Khao Yai គឺជាកន្លែងសម្រាកលំហែធម្មជាតិដ៏ស្ងប់ស្ងាត់មួយនៅជិតទីក្រុងបាងកក និងជាឧទ្យានជាតិដំបូងគេរបស់ប្រទេសថៃដែលត្រូវបានទទួលស្គាល់ដោយអង្គការយូណេស្កូ។ កន្លែងនេះលេចធ្លោដោយសារព្រៃឈើត្រូពិចដ៏ធំ និងទឹកធ្លាក់ល្បីៗដូចជា Haew Narok និង Haew Suwat។ លើសពីនេះឧទ្យានជាតិក៏ជាជម្រកនៃចំនួនសត្វព្រៃដ៏សម្បូរបែប រួមទាំងដំរីព្រៃ និងខ្លាឃ្មុំអាស៊ីផងដែរ។

២.ទីក្រុង Ooty ប្រទេសឥណ្ឌា៖ Ooty គឺជាគោលដៅដែលគេស្គាល់ថាជា “Queen of the Hills” គឺជាជម្រើសសម្រាប់អ្នកស្រលាញ់ធម្មជាតិនៅពេលមកប្រទេសឥណ្ឌា។ ទីក្រុងនេះស្ថិតនៅក្នុងចំណោមភ្នំខៀវស្រងាត់នៃជួរ Nilgiris ដែលនៅទីនេះភ្ញៀវទេសចរអាចចូលរួមជាមួយធម្មជាតិ តាមរយៈបទពិសោធន៍ជាច្រើន ដូចជាការអង្គុយលើទូកមើលបឹង Ooty ទស្សនាសួនរុក្ខសាស្ត្រ ឬទៅ “Dolphin Nose” ដើម្បីមើលទេសភាពទីក្រុងពីខាងលើ។

៣. កោះ Lombok ប្រទេសឥណ្ឌូនេស៊ី៖ Lombok គឺជាកោះមួយនៅភាគខាងលិច Nusa Tenggara ក្នុងប្រទេសឥណ្ឌូនេស៊ី។ កោះនេះមានភាពល្បីល្បាញសម្រាប់ការដើរកម្សាន្តបែបផ្សងព្រេងទៅកាន់កំពូលភ្នំភ្លើង និងវាលស្រែពណ៌បៃតងរាប់មិនអស់។ ជាងនេះទៅទៀត ភ្ញៀវទេសចរដែលមកលេងកោះនេះក៏អាចរីករាយនឹងសម្រស់ឆ្នេរខ្សាច់សក្បោះផងដែរ។

៤.ទីក្រុង Hakone ប្រទេសជប៉ុន៖ Hakone ដែលជាទីក្រុងរមណីយដ្ឋានដ៏ល្បីល្បាញក្នុងប្រទេសជប៉ុន ក៏ស្ថិតក្នុងបញ្ជីគោលដៅទេសចរណ៍ដ៏ល្អបំផុតសម្រាប់អ្នកស្រឡាញ់ធម្មជាតិផងដែរ។ កន្លែងនេះមានរមណីយដ្ឋានទឹកក្ដៅចំនួនប្រាំពីរ សណ្ឋាគារ Fujiya និងទីតាំងដ៏ងាយស្រួលរបស់វាក្នុងការឡើងទៅដល់ភ្នំ Fuji រួមទាំងម្ហូបចម្រុះជាច្រើនប្រភេទទៀត។

៥.ទីក្រុង Miri ប្រទេសម៉ាឡេស៊ី៖ ទីក្រុង Miri គឺជាច្រកចូលទៅកាន់ឧទ្យានជាតិ Gunung Mulu ដែលជាតំបន់បេតិកភណ្ឌពិភពលោករបស់អង្គការយូណេស្កូ ដែលមានព្រៃឈើត្រូពិច សត្វព្រៃដ៏សម្បូរបែប និងល្អាងដ៏អស្ចារ្យជាច្រើន។ នៅទីនេះ ភ្ញៀវទេសចរអាចរុករកភ្នំថ្មកំបោរ និងយកឈ្នះលើភ្នំ Api ដើម្បីគយគន់ទេសភាពដ៏អស្ចារ្យពីខាងលើ។ លើសពីនេះ ល្អាង Deer Cave ក៏ជាទិសដៅដ៏គួរឱ្យចាប់អារម្មណ៍មួយដែលអ្នកទស្សនាអាចសង្កេតមើលការធ្វើចំណាកស្រុករបស់សត្វប្រចៀវ។

៦.កោះ Siquijor ប្រទេសហ្វីលីពីន៖ កោះ Siquijor ត្រូវបានគេស្គាល់ថាជា “កោះអាថ៌កំបាំងនៃ Central Visayas” ដែលទាក់ទាញអ្នកទេសចរជាមួយនឹងទេសភាពភ្នំដ៏អស្ចារ្យ និងទឹកជ្រោះដ៏ស្រស់ស្អាត។ មកទីនេះ ភ្ញៀវទេសចរអាចចំណាយពេលរុករក “ដំបូលកោះ” នៃភ្នំ Bandilaan ដែលមានរុក្ខជាតិដើមចម្រុះ និងមេអំបៅជាង ១០០ ប្រភេទ។

៧.តំបន់ Jeongseon ប្រទេសកូរ៉េខាងត្បូង៖ តំបន់ដ៏ល្បីល្បាញសម្រាប់ទេសភាពភ្នំដ៏ស្ងប់ស្ងាត់ Jeongseon ក្នុងខេត្ត Gangwon ប្រទេសកូរ៉េខាងត្បូង គឺជាគោលដៅដ៏ល្អមួយក្នុងការរួមផ្សំជាមួយធម្មជាតិ។ អ្នកទស្សនាអាចជួបប្រទះនូវសកម្មភាពក្រៅតាមរដូវជាច្រើន ដូចជាការឡើងភ្នំ Hambaeksan ក្នុងរដូវរងារ ឬរុករកទេសភាពដ៏អស្ចារ្យនៃភ្នំ Gariwangsan ក្នុងរដូវស្លឹកឈើជ្រុះ។ កន្លែងនេះក៏មានសកម្មភាពជាច្រើនសម្រាប់ភ្ញៀវដែលចូលចិត្តភាពរំភើបដូចជា ziplining, ជួបប្រទះស្ពានកញ្ចក់ដើម្បីមើលទន្លេ Donggang និងភ្នំរមៀល។

៨.តំបន់ Hualien ប្រទេសតៃវ៉ាន់៖ Hualien គឺមានភាពល្បីល្បាញដោយសារកំពូលភ្នំដ៏ខ្ពស់ មេឃពណ៌ខៀវស្រឡះ សមុទ្រដ៏ធំ និងជ្រលងភ្នំដ៏រ៉ូមែនទិក។ នេះជាកន្លែងទេសចរណ៍កំពូលមួយសម្រាប់ភ្ញៀវជាតិ និងអន្តរជាតិក្នុងប្រទេសតៃវ៉ាន់។ តាមរយៈការថែរក្សាយ៉ាងពេញលេញនូវភាពស្រស់ស្អាតធម្មជាតិរបស់វា Hualien មានទេសភាពជាច្រើនសម្រាប់ភ្ញៀវទេសចរក្នុងការរុករក។

៩.ទីក្រុង Da Lat ប្រទេសវៀតណាម៖ ដាឡាត គឺជាគោលដៅធម្មជាតិកំពូលដែលមានអាកាសធាតុត្រជាក់ពេញមួយឆ្នាំ ព្រៃស្រល់ពណ៌បៃតង និងទឹកជ្រោះដ៏អស្ចារ្យជាច្រើន។ កន្លែងនេះក៏ជាគោលដៅដ៏ល្អសម្រាប់សកម្មភាពឡើងភ្នំបែបផ្សងព្រេង ជិះក្បូនទឹកស ដើម្បីរីករាយនឹងសម្រស់នៃសួនផ្កាដ៏ត្រចះត្រចង់។ លើសពីនេះ ទីក្រុង Da Lat ក៏បានក្លាយជាកន្លែងវិស្សមកាលដែលមិនអាចបំភ្លេចបានសម្រាប់អ្នកស្រលាញ់ធម្មជាតិជុំវិញពិភពលោកផងដែរ៕

អាល្លឺម៉ង់៖ ប្រទេសអាល្លឺម៉ង់បានរៀបចំពិធីបុណ្យស្រាបៀរដ៏ធំបំផុតរបស់ខ្លួន រយៈពេល ១៦ ថ្ងៃចាប់ពីថ្ងៃទី២១ ខែកញ្ញារហូតដល់ថ្ងៃទី ៦ ខែតុលា ឆ្នាំ២០២៤ នៅទីក្រុង Munich ដោយប្រើប្រាស់ស្រាបៀរចំនួន ៧ លានលីត្រ និងរំពឹងថាទាក់ទាញភ្ញៀវទេសចរចំនួន ៦ លាននាក់ជុំវិញពិភពលោក។

នេះជាលើកទី ១៨៩ ហើយដែលមហោស្រពស្រាបៀរដ៏ធំមួយនេះបានបើកដំណើរការ ត្រូវបានគេចាត់ទុកថា ជាពិធីបុណ្យប្រជាប្រិយដ៏ធំបំផុតក្នុងពិភពលោក។ អភិបាលក្រុង Bavarian លោក Dieter Reiter បាននិយាយថា ពិធីនេះនឹងមានតង់ធំៗចំនួន ១៧ ក៏ដូចជាតង់តូចៗចំនួន ២១ ក្នុងទីលាន Theresienwiese។

Dieter Reiter បានបន្តទៀតថា ក្រៅពីស្រាបៀរកម្មពិធីក៏មានតូបលក់អាហារចម្រុះជាច្រើន ក៏ដូចជាអាហារប្រពៃណីជាតិ ដែលមានរសជាតិឆ្ងាញ់ ដើម្បីបម្រើជាមួយស្រាបៀរដូចជាសាច់ក្រក សាច់មាន់ដុត និងជាពិសេស brezel ដែលមិនអាចខ្វះបាន។

Brezel គឺជានំប៉័ងរាងជារង្វង់ដែលពេញនិយមជាពិសេសនៅភាគខាងត្បូងប្រទេសអាល្លឺម៉ង់ អូទ្រីស និងអាលសាស ដែលមានរសជាតិប្រៃ។ គេរំពឹងថាពិធីបុណ្យស្រាបៀរប្រចាំឆ្នាំ ២០២៤ នឹងមានមនុស្សប្រហែល ៦ លាននាក់ រួមទាំងជនជាតិអាល្លឺម៉ង់ និងភ្ញៀវទេសចរបរទេសចូលរួមពិធីបុណ្យដ៏សប្បាយរីករាយនេះរយៈពេល ១៦ ថ្ងៃ។

វាត្រូវបានគេប៉ាន់ស្មានថាមនុស្សម្នាក់ៗនឹងចំណាយពី ១៣.៦ ទៅ ១៥.៣ អឺរ៉ូសម្រាប់ស្រាបៀរមួយលីត្រ ដែលជាពែងប្រពៃណីនៃពិធីបុណ្យ។ ខណៈតម្លៃស្រាបៀរនៅឆ្នាំនេះគឺខ្ពស់ជាងឆ្នាំមុន ៤% ហើយការប្រើប្រាស់ស្រាបៀរត្រូវបានគេរំពឹងថានឹងឈានដល់ ៧ លានលីត្រ ច្រើនជាង ៦.៥ លាននៅឆ្នាំ ២០២៣។

គួរបញ្ជាក់ដែរថា Oktoberfest ឬពិធីបុណ្យស្រាបៀរត្រូវបានប្រារព្ធឡើងជាលើកដំបូងនៅថ្ងៃទី ១៧ ខែតុលាឆ្នាំ ១៨១០ ដើម្បីរំលឹកដល់ការរៀបអភិសេករបស់ព្រះអង្គម្ចាស់ Ludwig នៃ Bavaria ជាមួយ Theresa of Saxony ក្នុងកន្លែងវាលស្មៅមួយនៅជាយក្រុង Munich៕

ប្រទេសន័រវេសគឺបានក្លាយជាប្រទេសដំបូងគេនៅលើពិភពលោកដែលមានរថយន្តអគ្គិសនីច្រើនជាងរថយន្តសាំងនៅលើដងផ្លូវ។

នេះបើយោងតាមទិន្នន័យចុះបញ្ជីយានយន្តដែលចេញផ្សាយដោយសហព័ន្ធផ្លូវន័រវេស (OFV) បានឱ្យដឹងថា ក្នុងចំណោមប្រទេសទាំងអស់នៅលើពិភពលោក មានតែប្រទេសន័រវេសទេដែលមានប្រជាជនប្រើប្រាស់រថយន្តអគ្គិសនីច្រើនជាងគេ ខណៈប្រទេសចិនគឺជាអ្នកផលិតរថយន្ត EV ធំបំផុត ប៉ុន្តែប្រជាជននៅទីនេះមិនមែនជាអ្នកប្រើប្រាស់រថយន្តអគ្គិសនីច្រើនជាងគេនោះទេ។

យោងតាមរបាយការណ៍ រថយន្តអគ្គិសនីនៅក្នុងប្រទេសន័រវេសបច្ចុប្បន្នគឺមានចំនួន ២.៨ លានគ្រឿងស្មើនឹង ២៦.៣% ច្រើនជាងរថយន្តសាំង។ នាយក Oyvind Solberg Thorsen បាននិយាយថា “ការប្រើប្រាស់អគ្គិសនីកំពុងរក្សាបាននូវល្បឿនខ្ពស់ ដោយប្រទេសន័រវេសកំពុងឆ្ពោះទៅរកការក្លាយជាប្រទេសដំបូងគេនៅលើពិភពលោកហើយ ដែលមានរថយន្តអគ្គិសនីច្រើនជាងគេ»។ លោកបានព្យាករថាចំនួនរថយន្តអគ្គិសនីនឹងលើសរថយន្តម៉ាស៊ូតនៅឆ្នាំ ២០២៦។

បច្ចុប្បន្នប្រទេសន័រវេសគឺជាប្រទេសនាំមុខគេលើពិភពលោកក្នុងការប្រើប្រាស់រថយន្តអគ្គិសនី។ នេះគឺជាការលើកទឹកចិត្តពីរដ្ឋាភិបាល រួមទាំងការលើកលែងពន្ធលើការលក់ និងពន្ធលើការបំភាយឧស្ម័នសម្រាប់រថយន្តអគ្គិសនី ក៏ដូចជារថយន្តដឹកទំនិញ ការកាត់បន្ថយថ្លៃឈ្នួល និងថ្លៃចតរថយន្តសម្រាប់យានជំនិះទាំងនេះ ដែលបានអនុញ្ញាតឱ្យអ្នកបើកបរយានយន្តប្រើប្រាស់អគ្គិសនីនៅលើផ្លូវរថយន្តក្រុង។

ក្នុងនាមជាប្រទេសមានជាងគេទី ១០ ក្នុងពិភពលោកប្រទេសន័រវែសក៏ជួយទូទាត់ថ្លៃដើមខ្ពស់សម្រាប់រថយន្តអគ្គិសនីផងដែរ។ រថយន្តអគ្គិសនីឥឡូវនេះមានចំនួនជាង ៩០% ហើយនៃការលក់រថយន្តថ្មី។ រដ្ឋាភិបាលន័រវេសបាននិយាយថា ខ្លួនសង្ឃឹមថាការលើកទឹកចិត្តពន្ធរបស់ខ្លួននឹងអនុញ្ញាតឱ្យប្រទេសន័រវេសបញ្ចប់ការលក់រថយន្តសាំង និងម៉ាស៊ូតទាំងអស់នៅឆ្នាំក្រោយ៕

ប្រទេសចិន ៖ យើងបានជ្រាបហើយថា ប្រព័ន្ធរ៉ាដាពុំអាចតាមចាប់ការហោះហើរយន្តហោះប្រភេទ F-22 និង F-35 របស់អាមេរិកបានទេ ទើបធ្វើឱ្យយន្តហោះទាំងនេះហាក់ដូចជាយន្តហោះបំបាំងកាយ ។

ប៉ុន្តែបច្ចុប្បន្ន ប្រទេសចិនបានអភិវឌ្ឍន៍ឧបករណ៍តាមចាប់ការហោះហើររបស់យន្តហោះទាំងនេះបាន ដោយការប្រើប្រាស់បច្ចេកវិទ្យាផ្កាយរណប Starlink ។

នេះជាភាពជោគជ័យមួយរបស់ប្រទេសចិន ដែលអាចប្រើប្រាស់បច្ចេកវិទ្យាទំនើបតាមដានការហោះហើររបស់យន្តហោះអាមេរិកប្រភេទ F-22 និង F-35 ។ កន្លងមក គេចាត់ទុកថា យន្តហោះទាំងនេះ គឺជាយន្តហោះបំបាំងកាយ ដោយសារវាអាចគេចផុតពីការតាមចាប់ទាំងអស់របស់ប្រព័ន្ធរ៉ាដា ។

ការសាកល្បងនេះ អ្នកជំនាញចិនបានប្រើប្រាស់ដ្រូនប្រភេទ DJI Phantom 4 Pro ដែលមានទំហំប៉ុនសត្វស្ទាំង ដើម្បីបន្លំធ្វើជាយន្តហោះបំបាំងកាយ ។ ដ្រូននេះនឹងវិភាគសញ្ញាអេឡិចត្រូម៉ាញ៉េទិច (ឬមេដែកអគ្គិសនី) ពីផ្កាយរណប Starlink ឆ្លងកាត់ប្រទេសហ្វីលីពីន ។

ដ្រូន DJI Phantom 4 Pro នឹងតាមដាន ព្រមទាំងបញ្ជាក់ពីទីតាំងយន្តហោះប្រភេទ F-22 និង F-35 របស់អាមេរិក ។ បច្ចេកវិទ្យានេះពុំចាំបាច់តម្រូវឱ្យប្រព័ន្ធរ៉ាដាបញ្ចេញសញ្ញាទេ ពីព្រោះនឹងធ្វើឱ្យពិបាកតាមដានការហោះហើរលើអាកាស ។ ផ្កាយរណបជាង៦.០០០គ្រឿង ដែលស្ថិតក្នុងបណ្តាញផ្កាយរណប Starlink សុទ្ធតែមានទំហំធំៗ ហើយផ្កាយរណបទាំងនេះនឹងបញ្ចេញសញ្ញាប្រេកង់ខ្ពស់អាចគ្របដណ្តប់លើតំបន់ធំទូលាយ ។

ការសាកល្បងរបស់ប្រទេសចិនបង្ហាញឱ្យឃើញថា ការប្រើប្រាស់សញ្ញាផ្កាយរណប Starlink ធ្វើឱ្យចិនអាចតាមដានយន្តហោះបំបាំងកាយរបស់អាមេរិកបានយ៉ាងងាយស្រួល ។ ប៉ុន្តែបើអាមេរិកចង់ឱ្យយន្តហោះរបស់ខ្លួនគេចផុតពីការតាមដានរបស់ចិន គឺអាមេរិកត្រូវតែផលិតយន្តហោះមិនបញ្ចេញរលករំខានអ្វីទាំងអស់ ប៉ុន្តែវាពុំអាចទៅរួចឡើយ ៕

Lionel Messi បានប្រកាសពីវិថីអាជីពថ្មីជាមួយនឹងការបើកដំណើរការក្រុមហ៊ុនកម្សាន្តពិភពលោក ក្នុងគោលបំណងដើម្បីលើកទឹកចិត្ត និងភ្ជាប់ទំនាក់ទំនងជាមួយអ្នកគាំទ្រជុំវិញពិភពលោកតាមអាជីពថ្មីនេះ នៅពេលដែលលោកចូរនិវត្តន៍ពីវិស័យកីឡាបាល់ទាត់។

ប្រិយមិត្តប្រាកដជាដឹងហើយថា ខ្សែប្រយុទ្ធអាហ្សង់ទីនរូបនេះគឺជាមនុស្ស Introvert មិនសូវចូលចិត្តបង្ហាញខ្លួនក្នុងព្រឹត្តិការណ៍ផ្សេងៗក្រៅពីបាល់ទាត់ឡើយ ដូច្នេះនៅពេលដែលលោកចូរនិវត្តន៍ពីវិស័យកីឡាបាល់ទាត់ លោកអ្នកប្រហែលជាគិតថា នឹងលែងបានឃើញវត្តមានរបស់កំពូលកីឡាករឆ្នើមរូបនេះទៀតហើយ។

ទោះជាយ៉ាងណាបើយោងតាមគេហទំព័រ The Sun កីឡាករវ័យ ៣៧ ឆ្នាំរូបនេះគ្រោងបើកក្រុមហ៊ុនកម្សាន្តពិភពលោក ដែលជាអាជីពថ្មីមួយទៀតរបស់ Lionel Messi នៅពេលដែលលោកចូរនិវត្តន៍ពីវិស័យកីឡាបាល់ទាត់ ដោយលោកនឹងចាប់យកអាជីពថ្មីមួយនេះ។ ដូច្នេះវាជាអាជីពថ្មីទី ២ បន្ទាប់ពីអាជីពបាល់ទាត់។ យោងតាមប្រព័ន្ធផ្សព្វផ្សាយអាហ្សង់ទីន បានបញ្ជាក់ថា កំពូលតារាឆ្នើម Lionel Messi បានសហការជាមួយសាជីវកម្មកម្សាន្តដ៏ធំមួយ ដើម្បីបង្កើតក្រុមហ៊ុនផលិតមាតិកា ដែលមានឈ្មោះថា 525 Rosario។

525 Rosario គឺជាក្រុមហ៊ុនគ្រប់គ្រងដោយ Messi ផ្ទាល់ផ្តោតលើការផលិតមាតិកាទូរទស្សន៍ និងភាពយន្តល្បីៗ ក៏ដូចជាការផ្សាយបន្តផ្ទាល់ពីកីឡា និងព្រឹត្តិការណ៍សហគមន៍ផ្សេងៗ ដោយសង្កត់ធ្ងន់យ៉ាងខ្លាំងលើកម្មវិធីគ្រួសារ។ លើសពីនេះ 525 Rosario ក៏មានគោលបំណងផលិតមាតិកាយីហោ និងការផ្សាយពាណិជ្ជកម្មសម្រាប់អត្តពលិកជុំវិញពិភពលោក ដែលពង្រីកឥទ្ធិពលរបស់ Messi លើសពីឧស្សាហកម្មកីឡាផងដែរ។

Messi បាននិយាយថា គោលដៅគឺដើម្បីបន្តលើកទឹកចិត្ត និងភ្ជាប់ទំនាក់ទំនងជាមួយអ្នកគាំទ្រជុំវិញពិភពលោកតាមរយៈអាជីពថ្មីនេះ បន្ទាប់ពីលោកចូលនិវត្តន៍។ ទោះបីជាយ៉ាងណាក៏ដោយ បច្ចុប្បន្នខ្សែប្រយុទ្ធអាហ្សង់ទីននៅតែផ្តោតលើអាជីពបាល់ទាត់របស់លោកនៅ Inter Miami ។ កាលពីចុងសប្តាហ៍មុន Messi បានវិលចូលទីលានប្រកួតវិញបន្ទាប់ពីសម្រាកព្យាបាលរបួសកជើងអស់ ២ ខែ។ ភ្លាមៗនោះ តារាឆ្នើមវ័យ ៣៧ ឆ្នាំរូបនេះបានស៊ុតបញ្ចូលទីបាន ២ គ្រាប់ និង assist ដើម្បីជួយក្រុមម្ចាស់ផ្ទះឈ្នះ ៣-១ ទល់នឹង Philadelphia Union៕

Dune-dwelling De Winton គឺជាសត្វម្យ៉ាងដែលគ្មានភ្នែក មានរូបរាងតូចច្រឡឹងស្រដៀងនឹងសត្វកណ្តុរ ពិបាកក្នុងការចូលទៅជិត ឬដាក់អន្ទាក់ណាស់ ព្រោះពួកវាកម្រចាកចេញពីផ្លូវរូងក្រោមដីរបស់ពួកវាណាស់។ សត្វនេះត្រូវបានគេចាត់ទុកថា ជាសត្វដ៏កម្របំផុតមួយរបស់ពិភពលោក ដោយសារវាមិនងាយបង្ហាញខ្លួនឱ្យមនុស្សបានឃើញឡើយ អស់រយៈពេល ៨៧ ឆ្នាំហើយ ស្រាប់តែថ្មីៗនេះពួកវាបានលេចមុខម្តងទៀតនៅទ្វីបអាហ្វ្រិក ធ្វើឱ្យក្រុមអ្នកស្រាវជ្រាវភ្ញាក់ផ្អើលយ៉ាងខ្លាំង។

ដំបូងឡើយអ្នកស្រាវជ្រាវគិតថា ពួកវាបានផុតពូជបាត់ទៅហើយ ដោយសារសត្វនេះត្រូវបានគេរកឃើញដំបូងក្នុងឆ្នាំ ១៩៣៦ បន្ទាប់មកក៏បាត់ខ្លួនរហូតមកដល់ឆ្នាំ ២០២៣ ទើបពួកវាបានលេចមុខមកម្តងទៀត ដែលលក្ខណៈចម្លែកទាំងនេះធ្វើឱ្យពួកវាក្លាយជាសត្វដែលពិបាកយល់បំផុតនៅក្នុងពិភពលោក។ សត្វ De Winton ត្រូវបានគេរកឃើញនៅ Port Nolloth នៃឆ្នេរសមុទ្រភាគពាយព្យអាហ្វ្រិកខាងត្បូង និងនៅតាមបណ្តាប្រទេសផ្សេងៗក៏មានដែរ ប៉ុន្តែពួកវាមិនងាយបង្ហាញខ្លួនឱ្យមនុស្សបានឃើញនោះទេ ព្រោះពួកវាជាសត្វដែលរស់នៅក្រោមដី ដូច្នេះហើយទើបគេហៅវាថា ជាសត្វកម្របំផុតរបស់ពិភពលោក។

ទោះបីជាសត្វនេះមិនមានភ្នែកក៏ដោយ ក៏សមត្ថភាពនៃការស្តាប់ដ៏អស្ចារ្យរបស់ពួកវា អាចទទួលសំឡេងបានយ៉ាងលឿនពីចលនាសត្វទាំងអស់នៅលើដី ជាហេតុធ្វើឱ្យពួកវាអាចលាក់ខ្លួនក្នុងដីដ៏ជ្រៅបានយ៉ាងល្អបំផុត។ លើសពីនេះនៅពេលរំកិលចុះក្រោមខ្សាច់ ពួកវាក៏មានភាពរហ័សរហួនខ្លាំងផងដែរ។ ការរកឃើញសត្វដ៏កម្រនេះ ត្រូវបានគេចាត់ទុកថាជាការរកឃើញដ៏អស្ចារ្យមួយ ដែលបញ្ជាក់ថា ពួកវាមិនទាន់ផុតពូជពីផែនដីនោះទេ។

ទោះជាយ៉ាងណាពួកវាក៏ស្ថិតក្នុងចំណោមសត្វដែលជិតផុតពូជផងដែរ ដោយសារពួកវាអាចនឹងបាត់ខ្លួនម្តងទៀតក្នុងពេលឆាប់ៗនេះ នៅពេលដែលការជីកយករ៉ែត្បូងពេជ្រទ្រង់ទ្រាយធំ និងការរំលោភលើការអភិវឌ្ឍន៍លំនៅដ្ឋាននៅលើទីជម្រករបស់ពួកវាបានបន្តគំរាមកំហែងដល់ជីវិតសត្វទាំងនេះ៕