ប្រទេសអាហ្វ្រិកខាងត្បូង ៖ កាលពីថ្ងៃទី២២ ខែកញ្ញា ឆ្នាំ២០២៤ សារព័ត៌មាន AFP រាយការណ៍ថា ក្រោយពីព្រិលធ្លាក់យ៉ាងខ្លាំងខុសពីធម្មតានៅតាមផ្លូវសំខាន់ៗ ដែលតភ្ជាប់រវាងទីក្រុង Johannesburg ជាមួយទីក្រុងឆ្នេរសមុទ្រ Durban បានធ្វើឱ្យពលរដ្ឋអាហ្វ្រិកខាងត្បូងភ្ញាក់ផ្អើល និងបើករថយន្តមកមើលព្រិលនៅតាមផ្លូវ រហូតដល់ស្ទះចរាចរណ៍រាប់ម៉ោង ។

ព្រិលធ្លាក់ខ្លាំងបានធ្វើឱ្យអ្នកដំណើរជាច្រើននាក់ជាប់នៅលើផ្លូវអស់រហូតដល់យប់ជ្រៅ ។ ពលរដ្ឋអាហ្វ្រិកពុំធ្លាប់បានឃើញព្រិលធ្លាក់ខ្លាំងបែបនេះទេ ហើយពួកគេបាននាំក្រុមគ្រួសារជិះរថយន្តពីទីក្រុង Johannesburg រហូតដល់៣ម៉ោង មកមើលព្រិល ។ នេះជាលើកដំបូងហើយដែលប្រទេសអាហ្វ្រិកខាងត្បូងមានព្រិលធ្លាក់ខ្លាំង ដោយសារអាកាសធាតុប្រែប្រួល ។

សារព័ត៌មាន AFP រាយការណ៍ថា កាលពីថ្ងៃទី២១ ខែកញ្ញា កន្លងមក មានព្រិលធ្លាក់ខុសពីធម្មតាពាសពេញទីក្រុង Varden ខេត្ត Free State ប្រទេសអាហ្វ្រិកខាងត្បូង ដែលបណ្តាលឱ្យស្ទះធ្វើចរាចរនៅតាមផ្លូវ ។ អ្នកដំណើរជាច្រើននាក់ដែលធ្វើដំណើរតាមផ្លូវលេខ N3 តភ្ជាប់រវាងទីក្រុង Johannesburg ជាមួយទីក្រុងឆ្នេរសមុទ្រ Durban បានជាប់ក្នុងរថយន្តពេញមួយយប់ ដោយសារសមត្ថកិច្ចបិទផ្លូវនៅតំបន់ខ្លះ ។

អាជ្ញាធរអាហ្វ្រិកខាងត្បូងបានប្រកាសឱ្យពលរដ្ឋប្រុងប្រយ័ត្នពេលធ្វើដំណើរ និងគួរធ្វើដំណើរនៅតាមផ្លូវផ្សេងដែលគ្មានព្រិលដើម្បីសុវត្ថិភាព ដោយសារតំបន់ជាច្រើនបានគ្របដណ្តប់ដោយអាកាសធាតុត្រជាក់ខ្លាំង គឺមានសីតុណ្ហភាពចាប់ពី១អង្សារសេ ទៅ៤អង្សារសេ ។ អាជ្ញាធរសន្និដ្ឋានថា អាកាសធាតុត្រជាក់ខ្លាំងនឹងគ្របដណ្តប់អាហ្វ្រិកខាងត្បូងជាច្រើនថ្ងៃទៀត ។ ក្រៅពីនេះ ក៏មានភ្នាក់ងារសង្គ្រោះបន្ទាន់ផងដែរ ក្នុងករណីកើតហេតុការណ៍បន្ទាន់ ។

គួរបញ្ជាក់ថា នៅទីក្រុងជាច្រើនរបស់អាហ្វ្រិកខាងត្បូងធ្លាប់មានព្រិលធ្លាក់ ដូចជា ៖ ទីក្រុងនៅជួរភ្នំ Drakensberg ខេត្ត Eastern Cape, តំបន់ខ្លះនៅខេត្ត Free State និងតំបន់ខ្ពស់នៅខេត្ត KwaZulu-Natal មានព្រិលធ្លាក់ខ្លាំងនៅរដូវរងា (ចាប់ពីខែមិថុនា ដល់ខែសីហា) ។ រីឯនៅតំបន់ខ្ពស់អាចមានព្រិលធ្លាក់ជាច្រើនលើកក្នុង១ឆ្នាំ ខណៈតំបន់ទំនាបកម្រមានព្រិលធ្លាក់ណាស់ ។

កាលពីខែកក្កដា ឆ្នាំ២០២៣ សារព័ត៌មាន Xinhua រាយការណ៍ថា ទីក្រុង Johannesburg របស់ប្រទេសអាហ្វ្រិកខាងត្បូងមានព្រិលធ្លាក់លើកដំបូងក្នុងរយៈពេលជាង១០ឆ្នាំ ។ ទីក្រុងនេះធ្លាប់មានព្រិលធ្លាក់នៅឆ្នាំ១៩៩៦ និងឆ្នាំ២០១២ ៕

មនុស្សនៅលើពិភពលោកគឺតែងតែមានសម្រស់ខុសៗគ្នា ដូច្នេះមិនមានអ្វីប្លែកទេ ដែលប្រទេសនីមួយៗមានស្តង់ដារសម្រស់ផ្ទាល់ខ្លួន ជាឧទាហរណ៍ដូចជាប្រទេសកម្ពុជាយើងជាដើម ដែលជនជាតិខ្មែរគឺគេតែងសម្គាល់ទៅលើរូបសម្បត្តិដូចជាសក់រួញអង្គារដី សម្បុរខ្មៅស្រអែម បើជាមនុស្សប្រុសមានមាឌធំក្រាស់ ខ្ពស់ ហើយបើជាមនុស្សមានរូបរាងសមល្មម ដែលនេះគឺជាស្តង់ដារសម្រស់របស់ប្រជាជនកម្ពុជា។ ទោះជាយ៉ាងណាក្រៅពីប្រទេសយើង ក៏មានប្រទេសមួយចំនួនទៀតក៏បានកំណត់ស្តង់ដារសម្រស់របស់ពួកគេដែរដូចជា៖

១.ប្រទេសកូរ៉េខាងត្បូង៖ ជាទូទៅស្តង់ដារសម្រស់របស់ប្រទេសនេះ គឺស្រ្តីត្រូវតែមានទម្រង់មុខ V ស្បែកសភ្លឺថ្លា ជ្រមុះស្រួច ត្របកភ្នែកពីរជាន់ ចិញ្ចើមត្រង់ និងបបូរមាត់បេះដូង។ ដូច្នេះដើម្បីទទួលបាននូវស្តង់ដារសម្រស់ដូចកូរ៉េខាងត្បូង ស្ត្រីជនជាតិនេះភាគច្រើនតែងចំណាយប្រាក់រាប់រយដុល្លារទៅលើការវះកាត់កែសម្ផស្សមិនតិចនោះទេ។

២.ប្រទេសចិន៖ ស្តង់ដារសម្រស់របស់នារីប្រទេសចិនវិញ គឺត្រូវតែមានស្បែកសស្លេក ប្រសិនបើស្បែកស្រអាប់មានន័យថា មនុស្សនោះធ្វើការនៅចម្ការ ហើយក្រ។ ដូច្នេះនារីចិនតែងតែព្យាយាមធ្វើគ្រប់វិធីដើម្បីបានស្បែកសដូចព្រិល ឱ្យមើលទៅស្អាត ទាន់សម័យ និងជាអ្នកមាន។

៣.ប្រទេសជប៉ុន៖ រីឯស្តង់ដារសម្រស់របស់នារីប្រទេសជប៉ុនវិញ គឺសម្គាល់ទៅលើធ្មេញជំពើស ដែលរូបរាងធ្មេញបែបនេះ ត្រូវបានប្រជាជនក្នុងស្រុកចាត់ទុកថា គួរឱ្យស្រលាញ់ ព្រោះជនជាតិជប៉ុនជឿថា វាជានិមិត្តរូបនៃសម្រស់ធម្មជាតិពិតៗ។ ខណៈនៅក្នុងបណ្តាប្រទេសនានាក្នុងលោក ស្នាមញញឹមដែលមានធ្មេញរាបស្មើ ត្រូវបានចាត់ថាជាភាពស្រស់ស្អាត ប៉ុន្តែសម្រាប់ជប៉ុនបែរជាផ្ទុយពីនេះ។

៤.ប្រទេសអារ៉ាប់ប៊ីសាអូឌីត៖ ស្ត្រីអារ៉ាប់ប៊ីសាអូឌីតផ្តល់អត្ថន័យលើភ្នែកថាជាកញ្ចក់នៃដួងចិត្តរបស់មនុស្ស។ ដោយសារតែសាសនាពួកគេមិនអនុញ្ញាតឱ្យបង្ហាញមុខមាត់ ទើបពួកគេយកចិត្តទុកដាក់ចំពោះសម្រស់ភ្នែកលើសអ្វីទាំអស់។ ដើម្បីធ្វើឱ្យពួកគេកាន់តែមានភាពទាក់ទាញ ស្ត្រីនៅប្រទេសនេះ ចំណាយប្រាក់យ៉ាងច្រើនលើគ្រឿងតុបតែងភ្នែកឱ្យមើលទៅស្អាតប្លែកខុសពីគេ។

៥.ប្រទេសអេត្យូពី៖ ស្តង់ដារសម្រស់របស់ប្រទេសនៅទ្វីបអាហ្វ្រិកនេះវិញ ហាក់ចម្លែកជាងគេបន្តិច ដោយសារគ្រប់ស្ត្រីពេញវ័យទាំងអស់ ត្រូវតែដកធ្មេញខាងមុខចំនួន ២ ចេញ ហើយចាក់ត្រង់បបូរមាត់ខាងក្រោមបន្ទាប់មកបញ្ចូលដីឥដ្ឋ ឬថាសឈើនៅក្នុងរន្ធនេះ។ នៅពេលរន្ធរីក គេយកថាសដាក់នៅទីនោះ ដើម្បីពង្រីកបបូរមាត់ឱ្យកាន់តែធំ ដែលបបូរមាត់នេះត្រូវបានប្រជាជន Surma ចាត់ទុកថាជានិមិត្តរូបនៃភាពចាស់ទុំរបស់ស្ត្រី ដែលទាក់ទាញបុរសឱ្យរៀបការជាមួយ៕

រដូវវស្សា គឺជារដូវដែលតែងតែមានភ្លៀងធ្លាក់ញឹកញាប់ ហើយក្នុងស្ថានភាពខ្លះក៏មានព្យុះ និងទឹកជំនន់ផងដែរ។ ទោះជាយ៉ាងណាសម្រាប់អ្នកចូលចិត្តធ្វើដំណើរបែបផ្សងព្រេងក្នុងរដូវនេះ អ្នកគួរតែអនុវត្តគន្លឹះ ៥ យ៉ាងដូចខាងក្រោមដើម្បីជួយឱ្យការធ្វើដំណើរកម្សាន្តរបស់លោកអ្នកកាន់តែល្អប្រសើរ និងមានសុវត្ថិភាព។

១.ជ្រើសរើសទីតាំង៖ នៅក្នុងរដូវវស្សាបែបនេះ យើងនៅតែមានសិទ្ធិជ្រើសរើសកន្លែងដែលយើងចង់ធ្វើដំណើរដូចជាទៅ វាលស្មៅ ឡើងភ្នំ ដើរចូលព្រៃ ទៅសមុទ្រ ទឹកជ្រោះ ឬទៅក្រៅប្រទេសជាដើម។ ប៉ុន្តែទោះជាយ៉ាងណា អ្នកត្រូវជ្រើសរើសទីតាំងមួយដែលស្ថិតនៅជិតហាងកាហ្វេ ភោជនីយដ្ឋាន ឬនៅជិតតំបន់ទីប្រជុំជន ជៀសវាងការដើរព្រៃឆ្ងាយ ឬកន្លែងដាច់ស្រយាល ព្រោះរដូវធ្លាក់ភ្លៀងអាចនាំឱ្យអ្នកមានគ្រោះថ្នាក់ផ្សេងៗ។

២.មើលឧតុនិយម៖ បើលោកអ្នកពិតជាមានបំណងចង់ដើរកំសាន្តក្នុងរដូវវស្សានេះមែន អ្នកគួរតែតាមដានឧតុនិយមឱ្យបានដិតដល់បំផុត ព្រោះវាក៏អាចជួយដល់ការធ្វើដំណើរបស់អ្នកប្រកបដោយសុវត្ថិភាពផងដែរ។

៣.ពិនិត្យស្ថានភាពរថយន្ត៖ វាជារឿងសំខាន់ណាស់ ដែលអ្នកចាំបាច់ត្រូវតែពិនិត្យមើលស្ថានភាពរថយន្តគ្រប់ផ្នែកទាំងអស់មុនពេលធ្វើដំណើរ ជៀសវាងហានិភ័យនៃការអស់សាំង ឬខូចសំបកកង់ឡានជាដើម…ព្រោះបើកាលណាខូចឧបករណ៍ទាំងនេះវាអាចធ្វើឱ្យលោកអ្នកជួបបញ្ហាស្មុគស្មាញច្រើន។

៤.ត្រូវចេះបត់បែន៖ ក្រៅពីត្រូវប្រុងប្រយ័ត្ន អ្នកក៏គួរយកចិត្តទុកដាក់ជាពិសេសលើការបត់បែន ព្រោះអាកាសធាតុអាចប្រែប្រួលយ៉ាងលឿនដែលយើងមិនអាចកំណត់បាន ដូច្នេះបើអ្នកមើលទៅស្ថានភាពហាក់ដូចជាមានគ្រោះថ្នាក់ សូមត្រឡប់មកផ្ទះវិញភ្លាមៗ។

៥.ឥវ៉ាន់ដែលត្រូវយក៖ នៅពេលមានគម្រោងធ្វើដំណើរកម្សាន្តក្នុងរដូវវស្សាលោកអ្នកគួររៀបចំសម្ភារៈសំខាន់ៗដូចជា តង់, ឆ័ត្រ, អាវភ្លៀង, មួក, កាបូបដែលមិនជ្រាបទឹក, ជ្រើសរើសសំលៀកបំពាក់ និងស្បែកជើងដែលស្រួលពាក់, ភ្លើងពិល, ទូរស័ព្ទ, Power Bank, ថង់ផ្លាស្ទិក ហើយសំខាន់ជាងគេបំផុតនោះកុំភ្លេចថ្នាំដូចជា ថ្នាំសំលាប់សត្វល្អិត ថ្នាំលេបផ្ទាល់ខ្លួន និងឧបករណ៍សង្គ្រោះបឋម ត្រូវតែរៀបចំឱ្យបានរួចរាល់ ទើបការធ្វើដំណើរក្នុងរដូវវស្សានឹងប្រកបដោយសុវត្ថិភាពជានិច្ច៕

ពិភពលោកកំពុងមានការព្រួយបារម្ភយ៉ាងខ្លាំង ខណៈទន្លេអាម៉ាហ្សូនដែលធ្លាប់តែជាកន្លែងសម្បូរទៅដោយទឹកធម្មជាតិ ព្រៃឈើយ៉ាងក្រាស់ ឥឡូវនេះស្រាប់តែជួបប្រទះនឹងគ្រោះរាំងស្ងួតខ្លាំងបំផុតក្នុងប្រវត្តិសាស្ត្រ ដោយសារកម្រិតទឹកបានធ្លាក់ចុះដល់កម្រិតទាបបំផុតមិនធ្លាប់មាននៅទូទាំងតំបន់ក្នុងប្រទេសប្រេស៊ីល។

យោងតាមសារព័ត៌មានបរទេស BBC បានឱ្យដឹងថា កម្រិតទឹកនៅក្នុងទន្លេជាច្រើនរបស់ Amazon បានឈានដល់កម្រិតទាបបំផុតក្នុងកំណត់ត្រា ចំពេលមានគ្រោះរាំងស្ងួតជាបន្តបន្ទាប់។ ទិន្នន័យផ្លូវការបានបង្ហាញថា ទឹកទន្លេ Madeira ដែលជាដៃទន្លេដ៏សំខាន់របស់ Amazon បានធ្លាក់ចុះ ៤៨ សង់ទីម៉ែត្រនៅក្នុងទីក្រុង Porto Velho កាលពីសប្តាហ៍មុន ហើយបន្តធ្លាក់ចុះរហូតដល់ ៣.៣២ ម៉ែត្រសម្រាប់ថ្ងៃនេះ។

រីឯទឹកទន្លេ Solimões ក៏បានធ្លាក់ដល់កម្រិតទាបបំផុតក្នុងកំណត់ត្រាផងដែរនៅ Tabatinga ជាប់ព្រំដែនប្រេស៊ីលជាមួយប្រទេសកូឡុំប៊ី។ ទីភ្នាក់ងារឃ្លាំមើលគ្រោះមហន្តរាយធម្មជាតិរបស់ប្រេស៊ីល Cemaden បានពណ៌នាអំពីគ្រោះរាំងស្ងួតបច្ចុប្បន្នថា “ធ្ងន់ធ្ងរបំផុត និងរីករាលដាលខ្លាំងបំផុត” ដែលបញ្ហានេះបង្កឱ្យមានការព្រួយបារម្ភយ៉ាងខ្លាំង ដោយអ្នកវិទ្យាសាស្ត្រ និងអ្នកស្រាវជ្រាវជាច្រើនបាននិយាយថា “វាជិតដល់ថ្ងៃអវសានរបស់ពិភពលោកហើយ”។

ខណៈបច្ចុប្បន្ននេះតំបន់ជាច្រើនជិតទន្លេអាម៉ាហ្សូនក៏ទទួលបានទឹកភ្លៀងតិចជាងមុនផងដែរ ចាប់តាំងពីខែមិថុនាមក ដោយសារការប្រែប្រួលអាកាសធាតុ។ លើសពីនេះសីតុណ្ហភាពកាន់តែក្តៅឡើងៗទោះបីស្ថិតក្នុងរដូវធ្លាក់ខ្យល់ក៏ដោយ ក៏តំបន់ជាច្រើននៅតែប្រឈមនឹងអាកាសធាតុក្តៅខ្លាំង ជាហេតុធ្វើឱ្យតំបន់ទាំងនោះបាត់បង់ទឹកកាន់តែច្រើន។ នៅឆ្នាំ ២០២៣ អាងអាម៉ាហ្សូនបានទទួលរងគ្រោះរាំងស្ងួតធ្ងន់ធ្ងរបំផុតក្នុងរយៈពេលយ៉ាងតិច ៤៥ ឆ្នាំ ដែលវិបត្តិបរិស្ថាននេះឆ្ពោះទៅបង្កផលប៉ះពាល់ភ្លាមៗ និងកាន់តែខ្លាំងពីការប្រែប្រួលអាកាសធាតុ។

ស្របពេលដែលអាងទន្លេអាម៉ាហ្សូនជួបប្រទះនឹងគ្រោះរាំងស្ងួតដ៏ធ្ងន់ធ្ងរបែបនេះក្នុងរយៈពេលពីរឆ្នាំជាប់ៗគ្នាមក ការព្រួយបារម្ភក៏កំពុងកើនឡើងអំពីផលប៉ះពាល់រយៈពេលវែងសម្រាប់ប្រព័ន្ធអេកូឡូស៊ី ជីវចម្រុះក្នុងតំបន់ និងសហគមន៍ដែលពឹងផ្អែកលើផ្លូវទឹកសំខាន់ៗទាំងនេះផងដែរ។ ទន្លេអាម៉ាហ្សូនគឺជាទន្លេដែលមានលំហូរ និងតំបន់បង្ហូរទឹកធំជាងគេបំផុតនៅលើពិភពលោក ដែលចិញ្ចឹមជីវិតមនុស្សសត្វរុក្ខជាតិរាប់រយប្រភេទ ប្រសិនបើទន្លេជួបប្រទះនឹងគ្រោះរាំងស្ងួតជាបន្តបន្ទាប់រយៈពេលយូរ វាបញ្ជាក់ថា ពិភពលោកនឹងជិតដល់ថ្ងៃអវសានហើយ៕

ប្រទេសឥណ្ឌា ៖ បើនិយាយពីអាហារឥណ្ឌាដែលភ្ញៀវទេសចរបរទេសចាប់អារម្មណ៍ និងចង់ធ្វើដំណើរទៅបរិភោគនៅឥណ្ឌានោះ គឺ «Pani Puri» គឺជាអាហារសម្បូរលក់នៅតាមផ្លូវ ។ អាហារនេះល្បីល្បាញក្នុងបណ្តាញសង្គមយ៉ាងខ្លាំង រហូតដល់ជនបរទេសចង់ដឹងថា តើវាជាអ្វី បរិភោគរបៀបណា និងបរិភោគជាមួយអ្វី ទើបឆ្ងាញ់?

សារព័ត៌មាន KBN នឹងបង្ហាញលោកអ្នកឱ្យស្គាល់ពីអាហារ Pani Puri ដ៏ពេញនិយមមួយនេះ ពីព្រោះមិនត្រឹមតែជនជាតិឥណ្ឌាប៉ុណ្ណោះទេដែលចូលចិត្ត ជនបរទេសក៏ចូលចិត្តដែរ ។ ពលរដ្ឋឥណ្ឌារស់នៅភាគខាងត្បូងហៅថា «Pani Puri» រីឯអ្នកនៅភាគខាងជើងហៅថា «Golgappe» ។

អត្ថន័យរបស់ឈ្មោះអាហារនេះបែងចែកជា២ប្រភេទ គឺ ៖

១-Pani ៖ សំដៅលើទឹកជ្រលក់សម្រាប់ដាក់ក្នុង Puri ដែលមានរាងមូលផលិតពីម្សៅសាឡី ។ ទឹកជ្រលក់នេះមានរសជាតិជូរ ហឹរតិចៗ ប្រៃ និងខ្លាញ់ ។
២-Puri ៖ មានរាងមូលដូចនំគ្រក់ ប៉ុន្តែប្រហោងក្នុង ដែលផលិតពីម្សៅស្រូវសាលីស្រួយជាវត្ថុធាតុផ្សំសំខាន់ ។ ឥណ្ឌានិយមបរិភោគវាជាមួយដំបូងបារាំងស្ងោរ, ខ្ទឹមបារាំង និងសណ្តែកសៀង ។

ហេតុអ្វី Pani Puri ក្លាយជាអាហារពេញនិយមបំផុតនៅប្រទេសឥណ្ឌា?

អ្វីដែលធ្វើឱ្យអាហារនេះពេញនិយមបំផុត និងល្បីល្បាញរហូតដល់ក្រៅប្រទេស ដោយសារក្នុងពេលជំងឺកូវីដ-១៩ ឆ្លងរាតត្បាត ឥណ្ឌាបានបិទប្រទេស ហើយភោជនីយដ្ឋានធំៗបិទទ្វារអស់ ទើបពលរដ្ឋឥណ្ឌាពិបាករកទិញអាហារផ្សេងៗ ។ ប៉ុន្តែពួកគេងាយស្រួលរកទិញ Pani Puri មកបរិភោគ ដោយសារសម្បូរលក់នៅតាមផ្លូវ ។

ចំណុចពិសេសរបស់អាហារនេះ គឺពេលមានអ្នកទិញ ទើបអ្នកលក់យក Puri មានរាងមូលប្រហោងក្នុង ទៅជ្រលក់ក្នុងទឹកជ្រលក់ហុចឱ្យអ្នកទិញ ហើយពេលអ្នកទិញបរិភោគអស់ ទើបអ្នកលក់យក Puri មួយទៀតជ្រលក់ក្នុងទឹកជ្រលក់ ។ ហេតុនេះ អ្នកលក់ពុំអាចយក Puri ទាំងអស់មកជ្រលក់ក្នុងទឹកជ្រលក់តែម្តងទេ ដោយសារវាបាត់ស្រួយ និងលែងឆ្ងាញ់ ។

បច្ចុប្បន្ន Pani Puri កាន់តែពេញនិយមខ្លាំងឡើង ទើបធ្វើឱ្យភោជនីយដ្ឋានឥណ្ឌាក្នុងស្រុក និងក្រៅស្រុក បានផ្លាស់ប្តូរវិធីបរិភោគអាហារនេះឱ្យស្រួលជាងមុន ។ ពួកគេនឹងដាក់ស្លាបព្រាបទុកឱ្យអតិថិជនដួសទឹកជ្រលក់ដាក់ក្នុងនំដោយខ្លួនឯងយកមកបរិភោគម្តងមួយៗ ។

នេះជាវិធីបរិភោគ Pani Puri តាមជនជាតិឥណ្ឌា ៖

១-យក Puri ដែលមានរាងមូលមកចោះប្រហោងតូចល្មមនៅចំណុចកណ្តាល សម្រាប់ដាក់ទឹកជ្រលក់ និងគ្រឿងផ្សំ
២-យកគ្រឿងផ្សំផ្សេងៗ ព្រមទាំងដំឡូងបារាំងស្ងោរ, ខ្ទឹមបារាំង និងសណ្តែកសៀងដាក់ក្នុងប្រហោង Puri ។ រីឯការដាក់គ្រឿងតិច ឬច្រើន គឺអាស្រ័យលើចំណង់ចំណូលចិត្តរៀងៗខ្លួន
៣-បន្ទាប់ពីដាក់គ្រឿងផ្សំទាំងអស់ក្នុងប្រហោង Puri រួចហើយ ត្រូវយកវាជ្រលក់ក្នុងទឹកជ្រលក់ ឬអាចយកស្លាបព្រាដួសទឹកជ្រលក់ដាក់ចូល Puri ក៏បាន ប៉ុន្តែត្រូវដួសដាក់ឱ្យពេញប្រហោងខាងក្នុង ទើបបរិភោគឆ្ងាញ់
៤-ពេលដាក់ទឹកជ្រលក់រួចហើយ យើងអាចដាក់ចូលមាត់បាន ប៉ុន្តែពុំចាំបាច់កាច់ Puri ជា២ផ្នែកទេ គឺដាក់វាទាំងមូលចូលមាត់ ។

ហេតុនេះ លោកអ្នកគួរតែសាកល្បងបរិភោគ Pani Puri ពេលបានទៅប្រទេសឥណ្ឌា បើទោះជាគិតថា អាហារឥណ្ឌាមានក្លិនគ្រឿងខ្លាំងក្តី ។ ប៉ុន្តែពេលបានបរិភោគអាហារនេះហើយ លោកអ្នកនឹងទទួលបាននូវរសជាតិថ្មីៗ ប្លែក ហើយធានាថា លោកអ្នកនឹងចូលចិត្តអាហារនេះមិនខាន ៕

នៅអាស៊ីគឺសម្បូរទៅដោយរមណីយដ្ឋានទេសចរល្បីៗជាច្រើន ក៏ដូចជាកន្លែងដែលមានទេសភាពស្រស់ស្អាត ធម្មជាតិស្រស់បំព្រង ប្លែក និងអស្ចារ្យក្នុងការរុករក មិនចាញ់ទ្វីបអឺរ៉ុបនោះទេ។ នេះបើយោងតាម Agoda.com ដែលជាភ្នាក់ងារទេសចរណ៍អនឡាញដ៏ធំមួយនៅក្នុងតំបន់អាស៊ីប៉ាស៊ីហ្វិក បានណែនាំគោលដៅធម្មជាតិកំពូលទាំង ៩ ដែលពេញនិយមបំផុតនៅអាស៊ី សម្រាប់អ្នកដំណើរក្នុងការភ្ជាប់ទំនាក់ទំនងជាមួយធម្មជាតិ តាមរយៈព្រៃឈើបុរាណ ជ្រលងជ្រៅ និងបឹងដ៏ស្ងប់ស្ងាត់។ ដូច្នេះក្នុងរដូវភ្ជុំបិណ្ឌដែលជារដូវឈប់សម្រាកបានច្រើនថ្ងៃ បងប្អូនដែលមានបំណងដើរលេងក្រៅប្រទេស កុំរំលងកន្លែងទេសចរណ៍ធម្មជាតិទាំងនេះឱ្យសោះ។

១.ឧទ្យានជាតិ Khao Yai ប្រទេសថៃ៖ Khao Yai គឺជាកន្លែងសម្រាកលំហែធម្មជាតិដ៏ស្ងប់ស្ងាត់មួយនៅជិតទីក្រុងបាងកក និងជាឧទ្យានជាតិដំបូងគេរបស់ប្រទេសថៃដែលត្រូវបានទទួលស្គាល់ដោយអង្គការយូណេស្កូ។ កន្លែងនេះលេចធ្លោដោយសារព្រៃឈើត្រូពិចដ៏ធំ និងទឹកធ្លាក់ល្បីៗដូចជា Haew Narok និង Haew Suwat។ លើសពីនេះឧទ្យានជាតិក៏ជាជម្រកនៃចំនួនសត្វព្រៃដ៏សម្បូរបែប រួមទាំងដំរីព្រៃ និងខ្លាឃ្មុំអាស៊ីផងដែរ។

២.ទីក្រុង Ooty ប្រទេសឥណ្ឌា៖ Ooty គឺជាគោលដៅដែលគេស្គាល់ថាជា “Queen of the Hills” គឺជាជម្រើសសម្រាប់អ្នកស្រលាញ់ធម្មជាតិនៅពេលមកប្រទេសឥណ្ឌា។ ទីក្រុងនេះស្ថិតនៅក្នុងចំណោមភ្នំខៀវស្រងាត់នៃជួរ Nilgiris ដែលនៅទីនេះភ្ញៀវទេសចរអាចចូលរួមជាមួយធម្មជាតិ តាមរយៈបទពិសោធន៍ជាច្រើន ដូចជាការអង្គុយលើទូកមើលបឹង Ooty ទស្សនាសួនរុក្ខសាស្ត្រ ឬទៅ “Dolphin Nose” ដើម្បីមើលទេសភាពទីក្រុងពីខាងលើ។

៣. កោះ Lombok ប្រទេសឥណ្ឌូនេស៊ី៖ Lombok គឺជាកោះមួយនៅភាគខាងលិច Nusa Tenggara ក្នុងប្រទេសឥណ្ឌូនេស៊ី។ កោះនេះមានភាពល្បីល្បាញសម្រាប់ការដើរកម្សាន្តបែបផ្សងព្រេងទៅកាន់កំពូលភ្នំភ្លើង និងវាលស្រែពណ៌បៃតងរាប់មិនអស់។ ជាងនេះទៅទៀត ភ្ញៀវទេសចរដែលមកលេងកោះនេះក៏អាចរីករាយនឹងសម្រស់ឆ្នេរខ្សាច់សក្បោះផងដែរ។

៤.ទីក្រុង Hakone ប្រទេសជប៉ុន៖ Hakone ដែលជាទីក្រុងរមណីយដ្ឋានដ៏ល្បីល្បាញក្នុងប្រទេសជប៉ុន ក៏ស្ថិតក្នុងបញ្ជីគោលដៅទេសចរណ៍ដ៏ល្អបំផុតសម្រាប់អ្នកស្រឡាញ់ធម្មជាតិផងដែរ។ កន្លែងនេះមានរមណីយដ្ឋានទឹកក្ដៅចំនួនប្រាំពីរ សណ្ឋាគារ Fujiya និងទីតាំងដ៏ងាយស្រួលរបស់វាក្នុងការឡើងទៅដល់ភ្នំ Fuji រួមទាំងម្ហូបចម្រុះជាច្រើនប្រភេទទៀត។

៥.ទីក្រុង Miri ប្រទេសម៉ាឡេស៊ី៖ ទីក្រុង Miri គឺជាច្រកចូលទៅកាន់ឧទ្យានជាតិ Gunung Mulu ដែលជាតំបន់បេតិកភណ្ឌពិភពលោករបស់អង្គការយូណេស្កូ ដែលមានព្រៃឈើត្រូពិច សត្វព្រៃដ៏សម្បូរបែប និងល្អាងដ៏អស្ចារ្យជាច្រើន។ នៅទីនេះ ភ្ញៀវទេសចរអាចរុករកភ្នំថ្មកំបោរ និងយកឈ្នះលើភ្នំ Api ដើម្បីគយគន់ទេសភាពដ៏អស្ចារ្យពីខាងលើ។ លើសពីនេះ ល្អាង Deer Cave ក៏ជាទិសដៅដ៏គួរឱ្យចាប់អារម្មណ៍មួយដែលអ្នកទស្សនាអាចសង្កេតមើលការធ្វើចំណាកស្រុករបស់សត្វប្រចៀវ។

៦.កោះ Siquijor ប្រទេសហ្វីលីពីន៖ កោះ Siquijor ត្រូវបានគេស្គាល់ថាជា “កោះអាថ៌កំបាំងនៃ Central Visayas” ដែលទាក់ទាញអ្នកទេសចរជាមួយនឹងទេសភាពភ្នំដ៏អស្ចារ្យ និងទឹកជ្រោះដ៏ស្រស់ស្អាត។ មកទីនេះ ភ្ញៀវទេសចរអាចចំណាយពេលរុករក “ដំបូលកោះ” នៃភ្នំ Bandilaan ដែលមានរុក្ខជាតិដើមចម្រុះ និងមេអំបៅជាង ១០០ ប្រភេទ។

៧.តំបន់ Jeongseon ប្រទេសកូរ៉េខាងត្បូង៖ តំបន់ដ៏ល្បីល្បាញសម្រាប់ទេសភាពភ្នំដ៏ស្ងប់ស្ងាត់ Jeongseon ក្នុងខេត្ត Gangwon ប្រទេសកូរ៉េខាងត្បូង គឺជាគោលដៅដ៏ល្អមួយក្នុងការរួមផ្សំជាមួយធម្មជាតិ។ អ្នកទស្សនាអាចជួបប្រទះនូវសកម្មភាពក្រៅតាមរដូវជាច្រើន ដូចជាការឡើងភ្នំ Hambaeksan ក្នុងរដូវរងារ ឬរុករកទេសភាពដ៏អស្ចារ្យនៃភ្នំ Gariwangsan ក្នុងរដូវស្លឹកឈើជ្រុះ។ កន្លែងនេះក៏មានសកម្មភាពជាច្រើនសម្រាប់ភ្ញៀវដែលចូលចិត្តភាពរំភើបដូចជា ziplining, ជួបប្រទះស្ពានកញ្ចក់ដើម្បីមើលទន្លេ Donggang និងភ្នំរមៀល។

៨.តំបន់ Hualien ប្រទេសតៃវ៉ាន់៖ Hualien គឺមានភាពល្បីល្បាញដោយសារកំពូលភ្នំដ៏ខ្ពស់ មេឃពណ៌ខៀវស្រឡះ សមុទ្រដ៏ធំ និងជ្រលងភ្នំដ៏រ៉ូមែនទិក។ នេះជាកន្លែងទេសចរណ៍កំពូលមួយសម្រាប់ភ្ញៀវជាតិ និងអន្តរជាតិក្នុងប្រទេសតៃវ៉ាន់។ តាមរយៈការថែរក្សាយ៉ាងពេញលេញនូវភាពស្រស់ស្អាតធម្មជាតិរបស់វា Hualien មានទេសភាពជាច្រើនសម្រាប់ភ្ញៀវទេសចរក្នុងការរុករក។

៩.ទីក្រុង Da Lat ប្រទេសវៀតណាម៖ ដាឡាត គឺជាគោលដៅធម្មជាតិកំពូលដែលមានអាកាសធាតុត្រជាក់ពេញមួយឆ្នាំ ព្រៃស្រល់ពណ៌បៃតង និងទឹកជ្រោះដ៏អស្ចារ្យជាច្រើន។ កន្លែងនេះក៏ជាគោលដៅដ៏ល្អសម្រាប់សកម្មភាពឡើងភ្នំបែបផ្សងព្រេង ជិះក្បូនទឹកស ដើម្បីរីករាយនឹងសម្រស់នៃសួនផ្កាដ៏ត្រចះត្រចង់។ លើសពីនេះ ទីក្រុង Da Lat ក៏បានក្លាយជាកន្លែងវិស្សមកាលដែលមិនអាចបំភ្លេចបានសម្រាប់អ្នកស្រលាញ់ធម្មជាតិជុំវិញពិភពលោកផងដែរ៕