ប្រទេសថៃ ៖ កាលពីថ្ងៃទី២៦ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ភ្នាក់ងារអាកាសយានដ្ឋានសុវណ្ណភូមិបានត្រួតពិនិត្យវ៉ាលិស និងសម្ភារៈរបស់អ្នកដំណើរទាំងអស់នៅបាតយន្តហោះ ក្រោយពីអ្នកដំណើរស្រីម្នាក់គំរា.ម ថា នឹងបំ.ផ្ទុះគ្រាប់បែ.ក នៅលើយន្តហោះរបស់ក្រុមហ៊ុនអាកាសចរណ៍ Thai VietJet Air ។ ប៉ុន្តែហេតុការណ៍នេះពុំប៉ះពាល់ការផ្តល់សេវាកម្មរបស់អាកាសយានដ្ឋានសុវណ្ណភូមិទេ ។

លោក Kittiphong Kittikachorn នាយកអាកាសយានដ្ឋានសុវណ្ណភូមិនិយាយថា កាលពីថ្ងៃទី២៦ ខែកញ្ញា ភ្នាក់ងារសន្តិសុខអាកាសយានដ្ឋានសុវណ្ណភូមិបានទទួលដំណឹងពីមជ្ឈមណ្ឌលគ្រប់គ្រងចរាចរណ៍ផ្លូវអាកាសថា អ្នកដំណើរម្នាក់គំរាមបំផ្ទុះគ្រាប់បែកនៅលើយន្តហោះរបស់ក្រុមហ៊ុនអាកាសចរណ៍ Thai VietJet Air ជើងហោះហើរ VZ961 ដែលធ្វើដំណើរមកពីទីក្រុងដាណាង ប្រទេសវៀតណាម ។ យន្តហោះនេះមានអ្នកដំណើរចំនួន១២១នាក់ ក្នុងនោះមានទារកម្នាក់ ព្រមទាំងអ្នកបើកយន្តហោះ និងបុគ្គលិកបម្រើការលើយន្តហោះ ៦នាក់ទៀត ។

ហេតុនេះ អាកាសយានដ្ឋានសុវណ្ណភូមិ ក៏បានជូនដំណឹងទៅកាន់ផ្នែកពាក់ព័ន្ធ, ភ្នាក់ងារសន្តិសុខអាកាសយានដ្ឋាន, ភ្នាក់ងារពន្លត់ភ្លើង និងសង្គ្រោះបន្ទាន់ ព្រមទាំងក្រុមគ្រូពេទ្យអាកាសយានដ្ឋានឱ្យត្រៀមបំពេញតួនាទីរបស់ខ្លួន ដើម្បីដោះស្រាយស្ថានការណ៍នេះជាបន្ទាន់ ។

ជំហានដំបូង ភ្នាក់ងារអាកាសយានដ្ឋានសុវណ្ណភូមិបានបញ្ជាឱ្យយន្តហោះនេះចុះចតនៅចំណុច Isolate Aircraft Parking Position នៅភាគខាងកើត ព្រមទាំងឱ្យអ្នកដំណើរ និងភ្នាក់ងារអាកាសចរណ៍ចុះពីលើយន្តហោះជាបន្ទាន់ ។ បន្ទាប់មក ក៏នាំអ្នកដំណើរទៅកាន់ស្ថានីយពន្លត់អគ្គិភ័យ និងសង្គ្រោះរបស់អាកាសយានដ្ឋានសុវណ្ណភូមិ ដើម្បីឱ្យភ្នាក់ងារសន្តិសុខត្រួតពិនិត្យរាងកាយ និងសម្ភារៈទាំងអស់ ដោយសហការជាមួយភ្នាក់ងារកម្ចាត់អាវុធជាតិផ្ទុះ ប៉ុន្តែភ្នាក់ងារសន្តិសុខអាកាសយានដ្ឋានរកពុំឃើញគ្រាប់បែកទេ ។

លោក Kittiphong Kittikachorn នាយកអាកាសយានដ្ឋានសុវណ្ណភូមិ បន្តទៀតថា អ្នកដំណើរស្រីម្នាក់ជនជាតិប៉ូឡូញបានគំរាមថា នាងនឹងបំផ្ទុះគ្រាប់បែកលើយន្តហោះ ទើបអាកាសយានដ្ឋានបញ្ជាឱ្យចាត់វិធានការបន្ទាន់ ។ អាកាសយានដ្ឋានបានបញ្ជូននារីប៉ូឡូញទៅឱ្យសមត្ថកិច្ច ដើម្បីស៊ើបអង្កេតរកមូលហេតុពិតប្រាកដ និងចាត់វិធានការតាមផ្លូវច្បាប់បន្តទៀត ហើយអាកាសយានដ្ឋាននឹងរក្សាស្តង់ដារផ្តល់សុវត្ថិភាពខ្ពស់ និងទំនុកចិត្តដល់អ្នកដំណើរគ្រប់រូបឱ្យបានល្អបំផុត ៕

ប្រទេសវៀតណាម ៖ រដ្ឋាភិបាលវៀតណាមបានប្រកាសកាលពីថ្ងៃទី២៦ ខែកញ្ញា ឆ្នាំ២០២៤ ថា ក្រុមហ៊ុនអវកាសយក្ស SpaceX របស់មហាសេដ្ឋីលំដាប់ពិភពលោក គឺលោក Elon Musk មានគម្រោងពង្រីកសេវាកម្មអ៊ីនធើរណេតតាមផ្កាយរណប Starlink នៅវៀតណាមនាពេលឆាប់ៗ ។ គម្រោងនេះស្មើទឹកប្រាក់ចំនួន១.៥០០លានដុល្លារអាមេរិក ហើយវៀតណាមរីករាយយ៉ាងខ្លាំង ដែលក្រុមហ៊ុនលំដាប់ពិភពលោកចាប់អារម្មណ៍វៀតណាម ។

សេចក្តីប្រកាសរបស់រដ្ឋាភិបាលវៀតណាមបានកើតឡើង ក្រោយពីប្រធានាធិបតីវៀតណាម លោក To Lam បានពិភាក្សាជាមួយអនុប្រធានជាន់ខ្ពស់របស់ក្រុមហ៊ុន SpaceX ក្នុងកិច្ចប្រជុំនៅទីក្រុងញូវយ៉ក សហរដ្ឋអាមេរិក កាលពីថ្ងៃទី២៥ ខែកញ្ញា កន្លងមក ។

ប្រធានាធិបតីវៀតណាម លោក To Lam បានស្នើឱ្យក្រុមហ៊ុន SpaceX ធ្វើការសហការជាមួយផ្នែកពាក់ព័ន្ធផ្សេងៗនៅប្រទេសវៀតណាមយ៉ាងជិតស្និទ្ធ ដើម្បីឱ្យគម្រោងវិនិយោគរបស់ក្រុមហ៊ុនដំណើរការយ៉ាងរលូន ។ ប៉ុន្តែរដ្ឋាភិបាលវៀតណាមពុំបានបញ្ជាក់ព័ត៌មានលម្អិតពីការវិនិយោគរបស់ក្រុមហ៊ុន SpaceX ទេ ហើយខាងក្រុមហ៊ុនក៏ពុំទាន់លើកឡើងពីគម្រោងវិយោគនេះដែរ ។

កាលពីឆ្នាំ២០២៣ រដ្ឋាភិបាលវៀតណាមធ្លាប់ប្រកាសថា ក្រុមហ៊ុនលំដាប់ពិភពលោក SpaceX ចាប់អារម្មណ៍ផ្តល់សេវាផ្កាយរណបកម្រិតទាបនៅវៀតណាម ប៉ុន្តែគម្រោងនេះបានផ្អាកវិញ ដោយសារមានការខ្វែងគំនិតគ្នារឿងការកាន់កាប់ភាគហ៊ុនរបស់ជនបរទេសនៅវៀតណាម ។ ក្រៅពីនេះ ដោយសារវៀតណាមស្នើឱ្យរក្សាទុកព័ត៌មាននៅវៀតណាម ហើយរដ្ឋាភិបាលវៀតណាមនឹងគ្រប់គ្រងយ៉ាងតឹងរ៉ឹង ។

ប្រទេសវៀតណាមមានពលរដ្ឋប្រមាណ១០០លាននាក់ និងជាប្រទេសដែលប្រើប្រាស់ហ្វេសប៊ុករបស់ក្រុមហ៊ុន Meta និង Alphabet យ៉ាងច្រើន ។ ប៉ុន្តែដោយសារវៀតណាមប្រើប្រាស់ឧបករណ៍ចាស់ៗ គឺវាអាចនឹងរំខានដល់ដំណើរការខ្សែកាបអុបទិកនៅក្រោមទឹក ហើយតំបន់ភ្នំក៏ប៉ះពាល់ដល់សេវាអ៊ីនធើរណេតនៅវៀតណាមផងដែរ ។ ហេតុនេះ ការប្រើប្រាស់អ៊ីនធើរណេតតាមផ្កាយរណបនឹងធ្វើឱ្យវៀតណាមងាយស្រួលយាមល្បាតនៅតំបន់ដែនទឹកជម្លោះក្នុងសមុទ្រចិនខាងត្បូង ។

ចំណែកអនុប្រធានជាន់ខ្ពស់របស់ក្រុមហ៊ុន SpaceX និយាយថា ការផ្តល់សេវាអ៊ីនធើរណេតនៅប្រទេសវៀតណាម គឺក្រុមហ៊ុនមានគោលដៅចម្បងសម្រាប់ផ្តល់ប្រយោជន៍ដល់ការសិក្សា និងការពារគ្រោះធម្មជាតិ ៕

ប្រទេសចិន ៖ រដ្ឋាភិបាលចិនប្រកាសថា នឹងចែកប្រាក់ឱ្យពលរដ្ឋក្រីក្រ ចាប់ពីចុងខែកញ្ញា រហូតដល់ថ្ងៃទី១ ខែតុលា ឆ្នាំ២០២៤ ។ ការប្រកាសចែកប្រាក់ដោយផ្ទាល់ដើម្បីឱ្យពលរដ្ឋដោះស្រាយជីវភាពនេះ គឺក្រោយពីរដ្ឋាភិបាលចិនទើបតែប្រកាសអនុវត្តវិធានការផ្សេងៗដើម្បីជំរុញសេដ្ឋកិច្ចជាតិបានរយៈពេល១ថ្ងៃ ។

សារព័ត៌មាន CCTV របស់ចិនរាយការណ៍ថា ក្រសួងហិរញ្ញវត្ថុ និងក្រសួងកិច្ចការស៊ីវិលនឹងចែកប្រាក់ទៅពលរដ្ឋក្រីក្រមានជីវភាពខ្វះខាត ព្រមទាំងក្មេងកំព្រាផងដែរ ឱ្យបានមុនថ្ងៃបុណ្យជាតិ ។ ប៉ុន្តែក្រសួងពុំបានបញ្ជាក់ព័ត៌មានលម្អិតអំពីការចែកប្រាក់ទេ ។

អាជ្ញាធរមូលដ្ឋានត្រូវតែធានាថា នឹងចែកប្រាក់ដល់ដៃពលរដ្ឋក្រីក្រពិតប្រាកដ ឱ្យបានមុនថ្ងៃទី១ ខែតុលា ឆ្នាំ២០២៤ ដែលជាថ្ងៃបុណ្យជាតិរបស់ចិន ។ ការចែកប្រាក់នេះដោយសារចង់ឱ្យពលរដ្ឋមើលឃើញថា គណបក្សកុម្មុយនិស្ស និងរដ្ឋាភិបាលចិនស្រឡាញ់ និងបារម្ភពីសុខទុក្ខពលរដ្ឋក្រីក្រជានិច្ច ។ ម្យ៉ាងទៀត ការប្រកាសចែកប្រាក់ គឺក្រោយពីមន្ត្រីជាន់ខ្ពស់ផ្នែកហិរញ្ញវត្ថុកាត់បន្ថយអត្រាការប្រាក់ និងវិធានការហិរញ្ញវត្ថុផ្សេងៗដើម្បីដោះស្រាយបញ្ហាសេដ្ឋកិច្ចធ្លាក់ចុះ ។

ចំណែកសារព័ត៌មាន Xinhua News Agency បានរាយការណ៍ដោយយោងតាមគោលការណ៍ណែនាំរបស់រដ្ឋាភិបាលថា ក្រៅពីចែកប្រាក់ឱ្យពលរដ្ឋក្រីក្រ រដ្ឋាភិបាលនឹងចែកប្រាក់ឱ្យនិស្សិតទើបបញ្ចប់ការសិក្សារយៈពេល២ឆ្នាំផងដែរ ករណីនិស្សិតពុំទាន់រកការងារធ្វើបានដើម្បីជំរុញវិស័យការងារ ។

នីអូ វាំង មន្ត្រីស្ថាប័ន Evercore ISI បាននិយាយមកកាន់សារព័ត៌មាន Bloomberg ថា ការចែកប្រាក់ឱ្យពលរដ្ឋបង្ហាញថា ប្រធានាធិបតីចិន លោក ស៊ី ជីនពីង បានផ្តល់ភាពសំខាន់លើក្រុមពលរដ្ឋគ្មានឱកាស មុនខួបលើកទី៧៥ឆ្នាំ នៃពិធីបុណ្យជាតិ ។ ក្រៅពីនេះ រដ្ឋាភិបាលចង់រក្សាស្ថិរភាពសង្គមមុនពេលឈប់សម្រាកយូរថ្ងៃ ។

តាមទិន្នន័យរដ្ឋាភិបាលកាលពីខែមេសា ឆ្នាំ២០២៤ បញ្ជាក់ថា នៅឆ្នាំ២០២៤ រដ្ឋាភិបាលចិនបានត្រៀមប្រាក់ចំនួន១៥៤.៧០០លានយាន់ សម្រាប់ចែកឱ្យពលរដ្ឋក្រីក្រ, ក្មេងកំព្រា និងអ្នកគ្មានផ្ទះសម្បែង ។ រីឯទិន្នន័យក្រសួងកិច្ចការស៊ីវិលឱ្យដឹងថា នៅខែមិថុនា ឆ្នាំ២០២៤ ពលរដ្ឋចិនក្រីក្របានកើនឡើងដល់៤លាន៧សែន៤ម៉ឺននាក់ ។

គួរបញ្ជាក់ថា ពិធីបុណ្យជាតិ គឺជាថ្ងៃឈប់សម្រាកដ៏សំខាន់នៅចិន ហើយពលរដ្ឋចិនតែងតែធ្វើដំណើរកម្សាន្ត និងចាយវាយប្រាក់ច្រើន ប៉ុន្តែដោយសារវិស័យអចលនទ្រព្យ និងទីផ្សារការងារធ្លាក់ចុះបានប៉ះពាល់ដល់ការចំណាយរបស់ពលរដ្ឋ ទើបសេដ្ឋវិទូមួយចំនួនអំពាវនាវឱ្យរដ្ឋាភិបាលជួយអន្តរាគមន៍ និងផ្តល់ទំនុកចិត្តដល់ពលរដ្ឋ ។

ហួង អ៊ីផិង មន្ត្រីគណៈកម្មាធិការគោលនយោបាយហិរញ្ញវត្ថុរបស់ធនាគារប្រជាជនចិន បានអំពាវនាវឱ្យរដ្ឋាភិបាលដោះស្រាយបញ្ហាការចំណាយធ្លាក់ចុះរបស់ពលរដ្ឋ ហើយមន្ត្រីរូបនេះបញ្ជាក់ថា ការចែកប្រាក់ឱ្យពលរដ្ឋនឹងជួយជំរុញការចំណាយ ៕

សហរដ្ឋអាមេរិក ៖ ឆ្កែយន្តដែលបានផលិតឡើងនៅអាមេរិកបានក្លាយជាជម្រើសគួរឱ្យចាប់អារម្មណ៍សម្រាប់ការធ្វើកសិកម្មនាពេលបច្ចុប្បន្ន ដោយឆ្កែយន្តនេះមានតួនាទីកម្ចា.ត់ ឫសស្មៅ និងសត្វល្អិតស៊ីដំណាំ ។ ហេតុនេះ កសិករពុំចាំបាច់ប្រើប្រាស់ថ្នាំគីមីកម្ចា.ត់ សត្វល្អិតធ្វើឱ្យប៉ះពាល់សុខភាព និងពុំប្រើប្រាស់កម្លាំងមនុស្សទេ ខណៈចំនួនកសិករអាមេរិកធ្លាក់ចុះនាពេលបច្ចុប្បន្ន ។

ឆ្កែយន្តជួយការងារក្នុងផ្នែកកសិកម្មនេះ បានផលិតឡើងដោយក្រុមអ្នកស្រាវជ្រាវមកពីសាកលវិទ្យាល័យ Texas A&M ដែលយកគំរូតាមឆ្កែយន្ត Spot របស់ក្រុមហ៊ុន Boston Dynamics ។ ឆ្កែយន្តនឹងប្រើប្រាស់កំដៅ ឬបាញ់ភ្លើងចេញមកក្រៅដើម្បីកម្ចាត់ឫសស្មៅ និងសត្វល្អិតបំផ្លាញដំណាំ ។

អ្នកស្រាវជ្រាវមកពីសាកលវិទ្យាល័យ Texas A&M និយាយថា ឆ្កែយន្តនេះពុំទាន់អាចកម្ចាត់ស្មៅបានទាំងអស់ទេ ប៉ុន្តែគោលដៅរបស់យើង គឺចង់ឱ្យឆ្កែយន្តបំផ្លាញឫសស្មៅ ដើម្បីការពារកុំឱ្យឫសស្មៅដុះលឿន ។ ហេតុនេះ ឫសស្មៅនឹងពុំអាចដណ្តើមសារធាតុចិញ្ចឹមក្នុងដី ឬដណ្តើមពន្លឺថ្ងៃពីដំណាំទេ ហើយឆ្កែយន្តនឹងកម្ចាត់ស្មៅណាដែលពុំងាប់ដោយសារការបាញ់ថ្នាំ ។

លើសពីនេះ ការប្រើប្រាស់ឆ្កែយន្តបានជួយឱ្យកសិករកាត់បន្ថយការប្រើប្រាស់សារធាតុគីមីផងដែរ ស្របនឹងការដាស់តឿនរបស់អង្គការសហប្រជាជាតិពាក់ព័ន្ធនឹងការកម្ចាត់ស្មៅបំផ្លាញដំណាំថា ការប្រើប្រាស់សារធាតុគីមីធ្វើឱ្យប៉ះពាល់ដី និងប្រភពទឹក ឬប៉ះពាល់ការផលិតអាហារ ។ ដូច្នេះ ការប្រើប្រាស់ឆ្កែយន្តបានក្លាយជាជម្រើសថ្មីមួយ ដោយសារវាពុំប៉ះពាល់បរិស្ថាន ។

ក្រៅពីនេះ អ្នកស្រាវជ្រាវសង្ឃឹមថា ឆ្កែយន្តនឹងអាចជួយការងារកសិកម្មបានច្រើន ដោយសារចំនួនកសិករអាមេរិកបានធ្លាក់ចុះជាបន្តបន្ទាប់ ។ បើតាមទិន្នន័យរបស់ក្រុមសិទ្ធិមនុស្សរបស់អង្គការពលកម្មអន្តរជាតិអាមេរិកប៉ាន់ស្មានថា អ្នកធ្វើការផ្នែកកសិកម្មបានធ្លាក់ចុះពី៤៤% នៅឆ្នាំ១៩៩១ មកនៅត្រឹមតែ២៦% ប៉ុណ្ណោះនៅឆ្នាំ២០២៤ ។

ក្នុងរយៈពេលយូរ ក្រុមសិទ្ធិមនុស្សរបស់អង្គការពលកម្មអន្តរជាតិអាមេរិកសង្ឃឹមថា ការផលិតឆ្កែយន្តប្រភេទនេះ រួមទាំងការផលិតគ្រឿងយន្តផ្នែកកសិកម្មផ្សេងទៀត ដូចជា ៖ ត្រាក់ទ័រស្កេនផ្ទៃដីកសិកម្មដើម្បីបញ្ជាក់ទីតាំង និងគណនាការប្រើប្រាស់ថ្នាំកម្ចាត់សត្វល្អិតដោយស្វ័យប្រវត្តិ នឹងអាចជួយកាត់បន្ថយកម្លាំងពលកម្មជាមនុស្ស ក៏ដូចជាកាត់បន្ថយការចំណាយដើមទុន ៕

សហរដ្ឋអាមេរិក ៖ មនុស្សភាគច្រើនយល់ថា ស៊ុតមាន់ពណ៌ក្រហមមានកូឡេស្តេរ៉ូលខ្ពស់ ហើយការបរិភោគស៊ុតមាន់ច្រើនក្នុងរយៈពេលយូរនឹងបណ្តាលឱ្យមានបញ្ហាសរសៃឈាមបេះដូង ។ ហេតុនេះ និស្សិតពេទ្យម្នាក់នៅអាមេរិកបានសម្រេចចិត្តសាកល្បងបរិភោគស៊ុតមាន់ ចំនួន៧២០គ្រាប់ត្រឹមតែរយៈពេល១ខែ និងទទួលបានលទ្ធផលគួរឱ្យភ្ញាក់ផ្អើល ។

លោក Nick Norwitz បានបញ្ចប់ការសិក្សាថ្នាក់បណ្ឌិតផ្នែកសរីរាង្គ នៅសាកលវិទ្យាល័យ Oxford សហរដ្ឋអាមេរិក ហើយបច្ចុប្បន្ន លោកកំពុងសិក្សាថ្នាក់បណ្ឌិតផ្នែកវេជ្ជសាស្ត្រ នៅសាកលវិទ្យាល័យ Harvard និយាយថា ៖ «ខ្ញុំគិតថា ការបរិភោគស៊ុតមាន់ ៧២០គ្រាប់ក្នុងរយៈពេល១ខែ ឬស្មើនឹងកូឡេស្តេរ៉ូល ១៣៣.២០០មីល្លីក្រាម នឹងមិនធ្វើឱ្យកូឡេស្តេរ៉ូលមិនល្អ កើនឡើងទេ ។ វាពុំបានកើនឡើងសូម្បីតែបន្តិច បើទោះជាខ្ញុំបានបរិភោគកូឡេស្តេរ៉ូលលើសមុន៥ដងក្តី ប៉ុន្តែកូឡេស្តេរ៉ូលមិនល្អ បែរជាធ្លាក់ចុះ» ។

លោក Nick បន្តថា កូឡេស្តេរ៉ូលមិនល្អរបស់លោក ឬហៅថា LDL (Low-Density Lipoprotein) បានធ្លាក់ចុះរហូតដល់១៨% ឯណោះ ។ ក្រោយសាកល្បងបាន២សប្តាហ៍ លោកក៏ចាប់ផ្តើមបរិភោគអាហារមានជាតិកាបូអ៊ីដ្រាត៦០ក្រាម និងបរិភោគផ្លែឈើផ្សេងៗ ដូចជា ៖ ចេក, Blueberry និង Cherry ព្រមទាំងប័រ Macadamia ។ ប៉ុន្តែគេពុំដឹងច្បាស់ថា តើលោក Nick បានហាត់ប្រាណកម្រិតណា និងហាត់របៀបណាទេ ហើយតើលោកបានបរិភោគអាហារផ្សេងអ្វីខ្លះ ក្រៅពីស៊ុតមាន់ ។

លោក Nick បន្តទៀតថា រីឯអ្នកបរិភោគអាហារមានជាតិកាបូអ៊ីដ្រាតទាប នឹងធ្វើឱ្យកូឡេស្តេរ៉ូលមិនល្អកើនឡើង ពីព្រោះរាងកាយចាប់ផ្តើមបំផ្លាញជាតិខ្លាញ់ ដើម្បីបង្កើតជាថាមពលជំនួសកាបូអ៊ីដ្រាត ។ ប៉ុន្តែបើបរិភោគអាហារមានជាតិកាបូអ៊ីដ្រាតកាន់តែច្រើន រាងកាយនឹងទទួលថាមពលពីកាបូអ៊ីដ្រាតជំនួសវិញ និងធ្វើឱ្យកូឡេស្តេរ៉ូសមិនល្អធ្លាក់ចុះ ។

តាមការចុះផ្សាយរបស់សារព័ត៌មាន Daily Mail បញ្ជាក់ថា ស៊ុតនីមួយៗមានកូឡេស្តេរ៉ូលប្រមាណ១៨៦មីល្លីក្រាម ហើយអ្នកជំនាញវេជ្ជសាស្ត្រខ្លះជឿថា ការបរិភោគស៊ុតនឹងមិនធ្វើឱ្យកូឡេស្តេរ៉ូលកើនឡើងទេ ដោយសារកូឡេស្តេរ៉ូលនឹងភ្ជាប់ជាមួយកោសិកាក្នុងពោះវៀន ។ វានឹងជំរុញការបញ្ចេញអរម៉ូនឈ្មោះ «Cholesin» ដែលអរម៉ូននេះធ្វើដំណើរតាមចរន្តឈាមទៅកាន់ថ្លើម និងភ្ជាប់ជាមួយកោសិកា GPR146 ដើម្បីបញ្ជូនសញ្ញាទៅថ្លើមឱ្យកាត់បន្ថយការផលិតកូឡេស្តេរ៉ូលមិនល្អ (ឬ LDL) ៕