វីដេអូ៤ឆ្នាំមុនរបស់ Justin Bieber ផ្ទុះឡើងជាថ្មីក្រោយតារាចម្រៀងរ៉េប Diddy ត្រូវបានចា.ប់ខ្លួន

យោងតាម New york post កិច្ចសម្ភាសន៍របស់ Justin Bieber ជាមួយ Music Zane Lowe របស់ Apple ក្នុងខែកុម្ភៈ ឆ្នាំ២០២០ កំពុងទាក់ទាញការចាប់អារម្មណ៍ម្តងទៀតពីទស្សនិកជន។ ហេតុផលគឺថាអ្នកដែលគាំទ្រតារាចម្រៀងរូបនេះក្នុងដំណាក់កាលដំបូងនៃអាជីពចម្រៀងគឺជាតារាចម្រៀងរ៉េប «Diddy» ទើបតែត្រូវបានចាប់ខ្លួនពីបទជួញដូរផ្លូវភេទ។ ទស្សនិកជនជាច្រើនបានគិតថា នៅក្នុងបទសម្ភាសន៍នោះ Justin Bieber បានបង្ហើបថាលោកត្រូវបាន Diddy ប្រព្រឹត្តយ៉ាងធ្ងន់ធ្ងរ។

ការសន្ទនាកាលពី៤ឆ្នាំមុនបានវិលជុំវិញអាល់ប៊ុម Changes ដែលជារឿងនៃការចូលប្រឡូកក្នុងឧស្សាហកម្មកម្សាន្តរបស់ Justin Bieber កាលពីក្មេង។ នៅពេលដែលពិធីករសួរថាតើលោកគិតយ៉ាងណាចំពោះ Billie Eilish ដែលជាតារាចម្រៀងដែលកំពុងលេចធ្លោនៅឆ្នាំ២០២០ តារាចម្រៀងរូបនេះបានប្រើខ្លួនឯងជាឧទាហរណ៍ ដោយសង្ឃឹមថានឹងក្លាយជាគំរូដ៏ល្អសម្រាប់អ្នកជំនាន់ក្រោយ។ «ខ្ញុំចង់ការពារនាង ខ្ញុំមិនចង់ឱ្យ Eilish ទទួលរងនូវអ្វីដែលខ្ញុំបានជួបប្រទះនោះទេ។ ខ្ញុំក៏មិនចង់ឱ្យនរណាម្នាក់ជួបប្រទះនោះដែរ។ នាងអាចទូរស័ព្ទមកខ្ញុំគ្រប់ពេលដែលនាងត្រូវការខ្ញុំ»។

Justin Bieber បាននិយាយថា កាលពីអតីតកាលលោកត្រូវតែតស៊ូដើម្បីរស់ក្នុងវិស័យសិល្បៈ ពេលខ្លះមានអារម្មណ៍ថាជីវិត «អាក្រក់ និងងងឹត»។ លោកមិនបានពន្យល់ច្បាស់ថាមានរឿងអាក្រក់អ្វីកើតឡើងនោះទេ ប៉ុន្តែតារាចម្រៀងរូបនេះបាននិយាយថាលោក«រស់នៅក្នុងភាពខ្មាសគេ» ដោយសារតែបញ្ហាកន្លងមក។
ទោះបីជា Justin Bieber មិនបានរៀបរាប់ឈ្មោះ Diddy ក៏ដោយ ក៏គណនីប្រព័ន្ធផ្សព្វផ្សាយសង្គមជាច្រើនបានគិតថា Justin Bieber កំពុងសំដៅទៅលើរបួសដែលទាក់ទងនឹង «មហាសេដ្ឋីរ៉េប Diddy »។ ក្នុងឆ្នាំ ២០០៨ Justin បានចុះកិច្ចសន្យាជាមួយផលិតកម្ម RBMG Music ។ ចាប់តាំងពីពេលនោះមក អ្នកទាំងពីរត្រូវបានគេនិយាយថាមានទំនាក់ទំនងស្និទ្ធស្នាលនឹងគ្នាដោយបានសហការគ្នាលើបទចម្រៀង Moments ដែលចេញកាលពីឆ្នាំ២០២៣។

អ្នកគាំទ្រជាច្រើនក៏បានបង្ហោះវីដេអូសម្ភាសន៍របស់តារាចម្រៀងរ៉េប Diddy និង Justin ក្នុងឆ្នាំ ២០០៨ ឡើងវិញផងដែរ ដែលពេលនោះ Diddy បាននិយាយថា លោកនឹងនៅម្នាក់ឯងជាមួយតារាចម្រៀងដែលមានអាយុប្រហែល ១៤ឆ្នាំ សម្រាប់រយៈពេល ៤៨ម៉ោង និងធ្វើរឿងដែលមិនបានបង្ហាញ។ អ្នកគាំទ្រព្រួយបារម្ភថាទំនាក់ទំនងនេះអាចជះឥទ្ធិពលអវិជ្ជមានដល់សុខភាពផ្លូវចិត្តរបស់ Justin Bieber ។

សំណួរអំពីមុំលាក់កំបាំងនៃទំនាក់ទំនងរវាង Justin Bieber និង Diddy មិនបានឈប់ទេ នៅពេលដែលមនុស្សជាច្រើនជឿថា MV Yummy (2020) ពីអាល់ប៊ុម Changes របស់ Justin Bieber មានសារថ្កោលទោសឧក្រិដ្ឋកម្មផ្លូវភេទនៅក្នុងឧស្សាហកម្មកម្សាន្ត។ ភាគច្រើននៃវីដេអូចម្រៀងនេះបង្ហាញពីក្រុមអ្នកមានកំពុងរីករាយជាមួយពិធីជប់លៀងមួយ ខណៈពេលដែលតួអង្គរបស់ Bieber មិនមែនជាភ្ញៀវទេ ប៉ុន្តែជា «អាហារ» ដែលរង់ចាំដើម្បីរីករាយ។ បច្ចុប្បន្ន Justin Bieber មិនបានធ្វើអត្ថាធិប្បាយជុំវិញការរំពឹងទុក និងការព្រួយបារម្ភរបស់អ្នកគាំទ្រឡើយ។

គួរបញ្ជាក់ថា តារាចម្រៀងរ៉េប Diddy ត្រូវបានចាប់ខ្លួនកាលពីថ្ងៃទី១៦ ខែកញ្ញា ដោយចោទប្រកាន់ពីបទ ឧក្រិដ្ឋចំនួនបី គឺ ការសមគំនិតជំរិតទារប្រាក់ ការជួញដូរផ្លូវភេទដោយបង្ខំ និងការដឹកជញ្ជូនទៅធ្វើពេស្យាចារ។ យោងតាម សារព័ត៌មាន Daily Mail ព្រះរាជអាជ្ញាបានសម្ភាសន៍ជនរងគ្រោះ និងសាក្សីជាង ៥០នាក់ ហើយចំនួននេះត្រូវបានគេរំពឹងថានឹងបន្តកើនឡើង៕