សហរដ្ឋអាមេរិក ៖ ឆ្កែយន្តដែលបានផលិតឡើងនៅអាមេរិកបានក្លាយជាជម្រើសគួរឱ្យចាប់អារម្មណ៍សម្រាប់ការធ្វើកសិកម្មនាពេលបច្ចុប្បន្ន ដោយឆ្កែយន្តនេះមានតួនាទីកម្ចា.ត់ ឫសស្មៅ និងសត្វល្អិតស៊ីដំណាំ ។ ហេតុនេះ កសិករពុំចាំបាច់ប្រើប្រាស់ថ្នាំគីមីកម្ចា.ត់ សត្វល្អិតធ្វើឱ្យប៉ះពាល់សុខភាព និងពុំប្រើប្រាស់កម្លាំងមនុស្សទេ ខណៈចំនួនកសិករអាមេរិកធ្លាក់ចុះនាពេលបច្ចុប្បន្ន ។

ឆ្កែយន្តជួយការងារក្នុងផ្នែកកសិកម្មនេះ បានផលិតឡើងដោយក្រុមអ្នកស្រាវជ្រាវមកពីសាកលវិទ្យាល័យ Texas A&M ដែលយកគំរូតាមឆ្កែយន្ត Spot របស់ក្រុមហ៊ុន Boston Dynamics ។ ឆ្កែយន្តនឹងប្រើប្រាស់កំដៅ ឬបាញ់ភ្លើងចេញមកក្រៅដើម្បីកម្ចាត់ឫសស្មៅ និងសត្វល្អិតបំផ្លាញដំណាំ ។

អ្នកស្រាវជ្រាវមកពីសាកលវិទ្យាល័យ Texas A&M និយាយថា ឆ្កែយន្តនេះពុំទាន់អាចកម្ចាត់ស្មៅបានទាំងអស់ទេ ប៉ុន្តែគោលដៅរបស់យើង គឺចង់ឱ្យឆ្កែយន្តបំផ្លាញឫសស្មៅ ដើម្បីការពារកុំឱ្យឫសស្មៅដុះលឿន ។ ហេតុនេះ ឫសស្មៅនឹងពុំអាចដណ្តើមសារធាតុចិញ្ចឹមក្នុងដី ឬដណ្តើមពន្លឺថ្ងៃពីដំណាំទេ ហើយឆ្កែយន្តនឹងកម្ចាត់ស្មៅណាដែលពុំងាប់ដោយសារការបាញ់ថ្នាំ ។

លើសពីនេះ ការប្រើប្រាស់ឆ្កែយន្តបានជួយឱ្យកសិករកាត់បន្ថយការប្រើប្រាស់សារធាតុគីមីផងដែរ ស្របនឹងការដាស់តឿនរបស់អង្គការសហប្រជាជាតិពាក់ព័ន្ធនឹងការកម្ចាត់ស្មៅបំផ្លាញដំណាំថា ការប្រើប្រាស់សារធាតុគីមីធ្វើឱ្យប៉ះពាល់ដី និងប្រភពទឹក ឬប៉ះពាល់ការផលិតអាហារ ។ ដូច្នេះ ការប្រើប្រាស់ឆ្កែយន្តបានក្លាយជាជម្រើសថ្មីមួយ ដោយសារវាពុំប៉ះពាល់បរិស្ថាន ។

ក្រៅពីនេះ អ្នកស្រាវជ្រាវសង្ឃឹមថា ឆ្កែយន្តនឹងអាចជួយការងារកសិកម្មបានច្រើន ដោយសារចំនួនកសិករអាមេរិកបានធ្លាក់ចុះជាបន្តបន្ទាប់ ។ បើតាមទិន្នន័យរបស់ក្រុមសិទ្ធិមនុស្សរបស់អង្គការពលកម្មអន្តរជាតិអាមេរិកប៉ាន់ស្មានថា អ្នកធ្វើការផ្នែកកសិកម្មបានធ្លាក់ចុះពី៤៤% នៅឆ្នាំ១៩៩១ មកនៅត្រឹមតែ២៦% ប៉ុណ្ណោះនៅឆ្នាំ២០២៤ ។

ក្នុងរយៈពេលយូរ ក្រុមសិទ្ធិមនុស្សរបស់អង្គការពលកម្មអន្តរជាតិអាមេរិកសង្ឃឹមថា ការផលិតឆ្កែយន្តប្រភេទនេះ រួមទាំងការផលិតគ្រឿងយន្តផ្នែកកសិកម្មផ្សេងទៀត ដូចជា ៖ ត្រាក់ទ័រស្កេនផ្ទៃដីកសិកម្មដើម្បីបញ្ជាក់ទីតាំង និងគណនាការប្រើប្រាស់ថ្នាំកម្ចាត់សត្វល្អិតដោយស្វ័យប្រវត្តិ នឹងអាចជួយកាត់បន្ថយកម្លាំងពលកម្មជាមនុស្ស ក៏ដូចជាកាត់បន្ថយការចំណាយដើមទុន ៕

សហរដ្ឋអាមេរិក ៖ មនុស្សភាគច្រើនយល់ថា ស៊ុតមាន់ពណ៌ក្រហមមានកូឡេស្តេរ៉ូលខ្ពស់ ហើយការបរិភោគស៊ុតមាន់ច្រើនក្នុងរយៈពេលយូរនឹងបណ្តាលឱ្យមានបញ្ហាសរសៃឈាមបេះដូង ។ ហេតុនេះ និស្សិតពេទ្យម្នាក់នៅអាមេរិកបានសម្រេចចិត្តសាកល្បងបរិភោគស៊ុតមាន់ ចំនួន៧២០គ្រាប់ត្រឹមតែរយៈពេល១ខែ និងទទួលបានលទ្ធផលគួរឱ្យភ្ញាក់ផ្អើល ។

លោក Nick Norwitz បានបញ្ចប់ការសិក្សាថ្នាក់បណ្ឌិតផ្នែកសរីរាង្គ នៅសាកលវិទ្យាល័យ Oxford សហរដ្ឋអាមេរិក ហើយបច្ចុប្បន្ន លោកកំពុងសិក្សាថ្នាក់បណ្ឌិតផ្នែកវេជ្ជសាស្ត្រ នៅសាកលវិទ្យាល័យ Harvard និយាយថា ៖ «ខ្ញុំគិតថា ការបរិភោគស៊ុតមាន់ ៧២០គ្រាប់ក្នុងរយៈពេល១ខែ ឬស្មើនឹងកូឡេស្តេរ៉ូល ១៣៣.២០០មីល្លីក្រាម នឹងមិនធ្វើឱ្យកូឡេស្តេរ៉ូលមិនល្អ កើនឡើងទេ ។ វាពុំបានកើនឡើងសូម្បីតែបន្តិច បើទោះជាខ្ញុំបានបរិភោគកូឡេស្តេរ៉ូលលើសមុន៥ដងក្តី ប៉ុន្តែកូឡេស្តេរ៉ូលមិនល្អ បែរជាធ្លាក់ចុះ» ។

លោក Nick បន្តថា កូឡេស្តេរ៉ូលមិនល្អរបស់លោក ឬហៅថា LDL (Low-Density Lipoprotein) បានធ្លាក់ចុះរហូតដល់១៨% ឯណោះ ។ ក្រោយសាកល្បងបាន២សប្តាហ៍ លោកក៏ចាប់ផ្តើមបរិភោគអាហារមានជាតិកាបូអ៊ីដ្រាត៦០ក្រាម និងបរិភោគផ្លែឈើផ្សេងៗ ដូចជា ៖ ចេក, Blueberry និង Cherry ព្រមទាំងប័រ Macadamia ។ ប៉ុន្តែគេពុំដឹងច្បាស់ថា តើលោក Nick បានហាត់ប្រាណកម្រិតណា និងហាត់របៀបណាទេ ហើយតើលោកបានបរិភោគអាហារផ្សេងអ្វីខ្លះ ក្រៅពីស៊ុតមាន់ ។

លោក Nick បន្តទៀតថា រីឯអ្នកបរិភោគអាហារមានជាតិកាបូអ៊ីដ្រាតទាប នឹងធ្វើឱ្យកូឡេស្តេរ៉ូលមិនល្អកើនឡើង ពីព្រោះរាងកាយចាប់ផ្តើមបំផ្លាញជាតិខ្លាញ់ ដើម្បីបង្កើតជាថាមពលជំនួសកាបូអ៊ីដ្រាត ។ ប៉ុន្តែបើបរិភោគអាហារមានជាតិកាបូអ៊ីដ្រាតកាន់តែច្រើន រាងកាយនឹងទទួលថាមពលពីកាបូអ៊ីដ្រាតជំនួសវិញ និងធ្វើឱ្យកូឡេស្តេរ៉ូសមិនល្អធ្លាក់ចុះ ។

តាមការចុះផ្សាយរបស់សារព័ត៌មាន Daily Mail បញ្ជាក់ថា ស៊ុតនីមួយៗមានកូឡេស្តេរ៉ូលប្រមាណ១៨៦មីល្លីក្រាម ហើយអ្នកជំនាញវេជ្ជសាស្ត្រខ្លះជឿថា ការបរិភោគស៊ុតនឹងមិនធ្វើឱ្យកូឡេស្តេរ៉ូលកើនឡើងទេ ដោយសារកូឡេស្តេរ៉ូលនឹងភ្ជាប់ជាមួយកោសិកាក្នុងពោះវៀន ។ វានឹងជំរុញការបញ្ចេញអរម៉ូនឈ្មោះ «Cholesin» ដែលអរម៉ូននេះធ្វើដំណើរតាមចរន្តឈាមទៅកាន់ថ្លើម និងភ្ជាប់ជាមួយកោសិកា GPR146 ដើម្បីបញ្ជូនសញ្ញាទៅថ្លើមឱ្យកាត់បន្ថយការផលិតកូឡេស្តេរ៉ូលមិនល្អ (ឬ LDL) ៕

តារាចម្រៀង នាយចឺម បានទម្លាក់ MV ថ្មីរបស់ខ្លួនមានចំណងជើងថា «ព្រោះលុយ» ដើរតួជាប្តីម្នាក់មានមុខរបរជាអ្នកដឹកជញ្ជូនហើយប្រពន្ធនៅផ្ទះមើលកូនតូចហើយគ្រួសារត្រូវបំផ្លាញព្រោះតែលុយ។ ទោះយ៉ាងណា វីដេអូចម្រៀងមួយនេះបានធ្វើឱ្យអ្នកលេងបណ្តាញសង្គមជាច្រើនចូលទៅខម្មិនរិះគន់ នាយចឺម ទាំងផលិតកម្មនិងអ្នកនិពន្ធដោយបានចោទថាយករឿងគ្រួសាររបស់អ្នកដទៃមកផលិត។

ល្ងាចថ្ងៃទី២៥ ខែកញ្ញា ផលិតកម្មសាន់ដេ បានទម្លាក់បទថ្មីរបស់ នាយចឺម មានចំណងជើងថា «ព្រោះលុយ» និពន្ធទំនុកច្រៀង និង Melody ដោយ តាន់ វ៉ារឹន ។MV មានរយៈពេល៦នាទីនេះជាកាដឹកនាំសម្តែងដោយ Makara Cool។ ទោះយ៉ាងណាស្នាដៃថ្មីនេះរបស់ នាយចឺម ហាក់ខុសពីការរំពឹងទុកខណៈសាធារណជនអ្នកប្រើប្រាស់បណ្តាញសង្គមចូលទៅខម្មិនរិះគន់ចាស់ដៃ។ អ្នកខ្លះថែមទាំងលើកឡើងថា អ្នកនិពន្ធធ្វើឱ្យតែ នាយចឺម ត្រូវគេជេរទក់សាច់។

MV «ព្រោះលុយ» បានទាក់ទាញការចូលខម្មិនថា «រឿងគេសោះយកមកនិពន្ធដែរ, ទោះបីអាយដលដែលខ្ញុំស្រឡាញ់ប៉ុណ្ណាក៏ដោយ តែបើចេញមកធ្វើទង្វើដែលមិនសមរម្យ អត់សីលធម៌ក្នុងសង្គមមួយដែលមិនត្រឹមត្រូវដាច់ខាតគឺខ្ញុំមិនគាំទ្រ, ធ្វើដល់អ្នកនិពន្ធ អ្នកដឹកនាំតែគ្មានសីលធម៌, ហេតុអ្វីយករឿងគេសម្ដែង»។

គណនីផ្សេងទៀតលើកឡើងថា «អត់មានអីនិពន្ធមែនបានយករឿងផ្ទាល់ខ្លួនគេមកសម្ដែងចឹង ?? ដើម្បីផលប្រយោជន៍ខ្លួនឯងមែន មិនគួរណាយករឿងពិតរបស់គេយកមកធ្វើអ៊ីចឹងទេ សូមមិនគាំទ្រ, សំខាន់តួសាហាយមុខដូចទៀត , ធ្វើបាបចឺមណាស់ចេញតែបទគេជេរមកឱ្យគ្នាច្រៀង»។

គួរឱ្យដឹងថា កាលពីកន្លងទៅនេះ ផលិតកម្មសាន់ដេ បានទម្លាក់ Poster បទរបស់ នាយចឺម មានចំណងជើងថា «កន្លះកេសម្នាក់ឯង» សម្រាប់អបអរពិធីបុណ្យចូលឆ្នាំខ្មែរ។ ទោះយ៉ាងណាគ្រាន់តែចេញត្រឹមចំណងជើងនេះបានធ្វើឱ្យមានការរិះគន់ នាយចឺម ភ្លូកទឹកភ្លូកដី រហូតដល់ខាងផលិតកម្មសម្រេចចិត្តលុប Poster នោះចេញ។ យ៉ាងណាមិញ នៅពេលផលិតកម្មទម្លាក់វីដេអូចម្រៀងពេញបទ«កន្លះកេសម្នាក់ឯង»របស់ នាយចឺម មិនបានផឹកស្រានោះទេ តែគឺចេញរូបភាពផឹកទឹកសុទ្ធ៕

ជារៀងរាល់រដូវរងា នៅពេលដែលពន្លឺព្រះអាទិត្យប៉ះមុំខាងស្តាំ តំបន់វាលភក់នៃឧទ្យាន First Landing State Park ក្នុងរដ្ឋ Virginia ប្រទេសសហរដ្ឋអាមេរិក តែងតែលេចចេញជាពណ៌ឥន្ទធនូយ៉ាងស្រស់ស្អាតបំផុត ត្រូវបានគេហៅថាជា Rainbow Swamp។

Rainbow Swamp គឺជាព្រៃលិចទឹកដែលមានពណ៌ឥន្ទធនូដ៏អស្ចារ្យបំផុតក្នុងរដូវរងារ។ នៅក្រោមលក្ខខណ្ឌទាំងនេះ វាលភក់ក៏បានប្រែទៅជាពណ៌ឥន្ទធនូដ៏ធំសម្បើមមួយ អមដោយដើមឈើធំតូចជាច្រើនដុះជុំវិញនោះ ធ្វើឱ្យតំបន់នេះទទួលបានការចាប់អារម្មណ៍យ៉ាងខ្លាំងពីសំណាកភ្ញៀវទេសចរជុំវិញពិភពលោក។

នៅរដូវក្តៅវាលភក់នៃឧទ្យាន First Landing State Park មិនមានពណ៌ឥន្ទធនូនោះទេ ប៉ុន្តែនៅពេលដល់រដូវរងារវិញ តំបន់ព្រៃលិចទឹកនេះក៏បានប្រែទៅជាពណ៌ឥន្ទធនូបង្កើតពន្លឺភ្លឺចែងចាំងយ៉ាងស្រស់ស្អាតបំផុតមិនធ្លាប់មាន។ មូលហេតុដែលតំបន់នេះមានពណ៌ឥន្ទធនូ គឺដោយសារឥទ្ធិពលឥន្ទធនូបានមកពីការរលួយនៃស្លឹកនៅក្នុងវាលភក់ក្នុងរដូវស្លឹកឈើជ្រុះ និងរដូវរងា។ អ្នកតំណាងឧទ្យានបាននិយាយថា “នៅរដូវស្លឹកឈើជ្រុះ ស្លឹកនឹងរលួយនៅក្នុងវាលភក់ ហើយកាកសំណល់នេះ នៅពេលដែលត្រូវពន្លឺព្រះអាទិត្យនៅមុំខាងស្តាំ ក៏បានបង្កើតទៅជាឥទ្ធិពលពណ៌ឥន្ទធនូនេះតែម្តង”។

លោក Jeff Ripple អតីតមគ្គុទ្ទេសក៍ដើរតាមវាលភក់នៅរដ្ឋផ្លរីដាបានប្រាប់ BBC កាលពីពេលថ្មីៗនេះថា ដំណើរការជីវសាស្រ្តនៅក្នុងដីដែលបណ្តាលមកពីបាក់តេរីដែលបំផ្លាញជាតិដែកក៏អាចរួមចំណែកដល់ឥទ្ធិពលឥន្ទធនូផងដែរ។ កាលណាវាលភក់មានអាយុកាលយូរ ឥទ្ធិពលកាន់តែខ្លាំង ដែលឥទ្ធិពលនេះត្រូវបានគេឃើញជាញឹកញាប់នៅក្នុងភក់តូចៗ។ Ripple ក៏បានបន្តទៀតថា “ចលនាដែលបណ្តាលមកពីចរន្ត ឬខ្យល់ក៏អាចបំផ្លាញភ្នាសឥន្ទធនូផងដែរ”។

គួរបញ្ជាក់ដែរថា First Landing State Park គឺជាកន្លែងដ៏ល្បីល្បាញបំផុតមួយនៅក្នុងរដ្ឋ Virginia សហរដ្ឋអាមេរិក។ ជាមួយនឹងផ្ទៃដីប្រហែល ១១.៧ លានម៉ែត្រការ៉េ ឧទ្យាននេះមានសកម្មភាពជាច្រើនសម្រាប់ភ្ញៀវទេសចរចូលរួម៕

យោងតាមអ្នកជំនាញជាច្រើនបានណែនាំថា កន្លែងទាំងនេះសុទ្ធតែជាតំបន់ទេសចរណ៍ល្បីៗ ទោះជាយ៉ាងណាអ្នកមិនគួរទៅលេងតំបន់ទាំងនេះឡើយព្រោះវាជាកន្លែងដែលមានតម្លៃថ្លៃនិងមានមនុស្សច្រើនកកកុញពេក ធ្វើឱ្យពិបាកក្នុងការទស្សនា ក៏ដូចជាខ្វះវប្បធម៌ជ្រៅជ្រះ។ លោក Alex Cornici នាយកប្រតិបត្តិនៃ The Traveler ដែលជាទស្សនាវដ្តីទេសចរណ៍ដ៏ល្បីល្បាញមានទីស្នាក់ការកណ្តាលនៅក្នុងប្រទេសអ៊ីតាលីបាននិយាយថាការធ្វើដំណើរគឺភ្ជាប់ទៅនឹងបទពិសោធន៍ប្រកបដោយគុណភាព ស្វែងយល់កាន់តែស៊ីជម្រៅអំពីវប្បធម៌ និងការរកឃើញថ្មីៗ មិនមែនគ្រាន់តែ “សម្គាល់កន្លែងដែលធ្លាប់បានទៅនោះទេ”។ ដូច្នេះនៅក្នុងអត្ថបទនេះយើងនឹងនាំប្រិយមិត្តមកស្គាល់តំបន់ទេសចរណ៍ល្បីៗចំនួន ៦ ដែលអ្នកគួរជៀសវាង៖

១.ភូកេត ឬប៉ាតាយ៉ាប្រទេសថៃ៖ អ្នកជំនាញបរទេសជាច្រើនបានណែនាំអ្នកទេសចរឱ្យរំលងកន្លែងទាំងនេះ ដោយសារចំនួនអ្នកទេសចរលើសកម្រិត ធ្វើឱ្យតំបន់នេះមានការកកស្ទះជារៀងរាល់ថ្ងៃ និងតែងតែមានហ្វូងមនុស្សច្រើនជារៀងរាល់ឆ្នាំ។ នេះនាំឱ្យមានអតិផរណា ការបំពុលកើនឡើង និងការធ្លាក់ចុះនៃគុណភាពជីវិតរបស់ប្រជាជនក្នុងតំបន់។

២.ទីក្រុងឆ្នេរសមុទ្រ Dubrovnik ដ៏ល្បីល្បាញរបស់ប្រទេសក្រូអាត៖ យោងតាមក្រុមហ៊ុន Holidu ដែលជាកម្មវិធីកក់សណ្ឋាគារ បានឱ្យដឹងថា ឆ្នេរសមុទ្រ Dubrovnik គឺជាទីក្រុងដែលមានមនុស្សច្រើនជាងគេនៅអឺរ៉ុ។ ដោយសារភាពចង្អៀតនៃអ្នកទេសចរបង្កបញ្ហាជាច្រើនសម្រាប់ទីក្រុងដែលមានផ្ទៃដីប្រហែល ១៤២ គីឡូម៉ែត្រការ៉េ ដូចជាការកកស្ទះនិងការកើនឡើងតម្លៃ។ តម្លៃនៃការធ្វើដំណើរនៅទីនេះសម្រាប់មួយសប្តាហ៍គឺប្រហែលជាង ៧០០ ដុល្លារក្នុងម្នាក់ ដោយមិនរាប់បញ្ចូលថ្លៃសំបុត្រយន្តហោះឡើយ។

៣.ទីក្រុងញូវយ៉កសហរដ្ឋអាមេរិក៖ Jamis Diaz អ្នកជំនាញទេសចរណ៍ និងទីផ្សារនៅ Smoky Mountains បាននិយាយថា ទីក្រុងញូវយ៉កគឺជាទីក្រុងដែលមានតម្លៃថ្លៃបំផុតក្នុងលោក។ តម្លៃខ្ពស់ មានមនុស្សច្រើន និងការបំពុលខ្យល់ រួមទាំងកាកសំណល់កើនឡើង គឺអាចប៉ះពាល់ដល់បទពិសោធន៍ភ្ញៀវទេសចរ។ បច្ចុប្បន្នតម្លៃបន្ទប់សណ្ឋាគារនៅទីក្រុងញូវយ៉កជាមធ្យមប្រហែល ៣៧៥ ដុល្លារក្នុងមួយយប់ ហើយសេវាកម្សាន្ត និងអាហារខាងក្រៅក៏មានតម្លៃថ្លៃផងដែរ។

៤.ទីក្រុង Cancun ប្រទេសម៉ិកស៊ិក៖ យោងទៅតាម Cornici ទីក្រុងនេះមានតម្លៃថ្លៃនិងមានមនុស្សច្រើន។ អ្នកជំនាញនិយាយថា បទពិសោធន៍សំខាន់ៗគឺឆ្នេរសមុទ្រ និងជីវិតពេលយប់ ទោះជាយ៉ាងណាដោយសារមនុស្សច្រើន និងតម្លៃថ្លៃ វាអាចធ្វើឱ្យភ្ញៀវទេសចរពិបាកទទួលយកបទពិសោធន៍ល្អៗណាស់។ លើសពីនេះការចំណាយលើការធ្វើដំណើរនៅទីក្រុង Cancun គឺប្រហែល ៨០០-២,៥០០ ដុល្លារក្នុងម្នាក់។

៥.ទីក្រុងឌូបៃប្រទេសអារ៉ាប់រួម៖ លោក Alonso Marly អ្នកជំនាញទេសចរណ៍ពី SkyLux Travel បានឱ្យដឹងថា ទីក្រុងឌូបៃមានតម្លៃថ្លៃពេក មិនសមនឹងអ្នកទេសចរធម្មតានោះទេ។ លោកបានបន្តថា ទីក្រុងនេះមានអាគារខ្ពស់ៗ រថយន្តទំនើបៗ និងភោជនីយដ្ឋានថ្លៃៗ ហើយក៏ខ្វះភាពស៊ីជម្រៅនៃវប្បធម៌ធៀបនឹងកន្លែងផ្សេងទៀតផងដែរ ដូច្នេះភ្ញៀវទេសចរគួរជៀសវាងកន្លែងនេះ។

៦.ទីក្រុង Venice ប្រទេសអ៊ីតាលី៖ ទីក្រុង Venice បានក្លាយជាគោលដៅទេសចរណ៍ដ៏ពេញនិយមមួយ ជាមួយនឹងការកើនឡើងនៃតម្លៃ និងផ្លូវដែលមានមនុស្សច្រើន។ Cornici បាននិយាយថា នេះធ្វើឱ្យបាត់បង់ភាពទាក់ទាញនៃទីក្រុង Venice ហើយអ្នកទេសចរគួរតែពិចារណា ព្រោះការធ្វើដំណើរនៅទីនេះមានតម្លៃថ្លៃណាស់។ យោងតាម Budget Your Trip អ្នកទេសចរនឹងចំណាយប្រហែល ១,៧០០ ដុល្លារសម្រាប់មួយសប្តាហ៍នៅទីក្រុង Venice ដោយអ្នកខ្លះចំណាយជិត ៤,៥០០ ដុល្លារឯណោះក្នុងរយៈពេលដូចគ្នានេះ៕