មួយរយៈពេលមកហើយដែល រ៉េត ស៊ូហ្សាណា បានជ្រកក្នុងទ្រនំបារមីបន្ទាប់ពីចាកចេញពីផលិតកម្មរស្មីហង្សមាសដោយបានចេញបទចម្រៀងទោលចំនួន២បទនៅលើទីផ្សារ។ ចំណែកគម្រោងធំដែល ហ្សាណា បង្ហើបកាលពីកាលកន្លងមកនេះទើបនឹងចេញដូចគ្នាជាការសហការដំបូងរបស់នាងជាមួយសិល្បករក្នុងទ្រនំនេះគឺជាកញ្ញា ឡូរ៉ា ម៉ម ដែលជានាយកប្រត្តិបត្តិផ្ទាល់តែម្តង។ លើសពីនេះការសហការលើកដំបូងរបស់អ្នកទាំងពីរគឺបំផុសគំនិតពីតម្លៃស្រ្តីអស្ចារ្យដូចទៅនឹងប្រាង្គប្រាសាទខ្មែរ។
នៅយប់ថ្ងៃទី២៦ ខែកញ្ញា រ៉េត ស៊ូហ្សាណា បានទម្លាក់បទទី៣របស់ខ្លួនក្នុងទ្រនំបារមីជាមួយនឹងចំណងជើងថា «ស្រ្ដីសេរី» សហការជាមួយនឹងកញ្ញា ឡូរ៉ា ម៉ម។ MV ដ៏ត្រជាក់ភ្នែកនេះគឺជាការដឹកនាំសម្តែងដោយកញ្ញា រិទ្ធី លំអរពេជ្រ ហៅយូគី ហើយការថតនេះគឺស្ថិតនៅខេត្តសៀមរាបដែលមានទីតាំងនៅតំបន់ប្រាសាទ ដូចជា ប្រាសាទអង្គរវត្ត ប្រាសាទតាព្រហ្ម ប្រាសាទបន្ទាយស្រី ជាមួយនឹងសំលៀកបំពាក់ប្រពៃណីខ្មែរ។ ចេញកាលដំបូងនៃបទចម្រៀងនេះគឺបានបង្ហាញពីប្រាសាទអង្គរវត្ត ចម្លាក់អប្សរា ដែលឆ្លាក់ជាប់នៅប្រាសាទដ៏អស្ចារ្យរបស់ខ្មែរ។
ក្នុង MV នេះគឺគេបានឃើញស្រ្តីអាចធ្វើបានគ្រប់យ៉ាងរាប់តាំងពីការពរពោះ រហូតធ្វើការផ្សេងៗមិនថាជាការងារតូចឬធំនោះទេ ពោលស្រ្តីគឺអាចធ្វើបានដូចជាបុរសដែរ។ MV នេះម្តាយរបស់រ៉េត ស៊ូហ្សាណា ក៏មានវត្តមានដូចគ្នា ដែលរំលេចទៅដោយទិដ្ឋភាពជាច្រើនពីស្រ្តីទស្សនាហើយពិតជាធ្វើឱ្យមនុស្សស្រីមានកម្លាំងចិត្តនិងសរសើរថាមនុស្សស្រីពិតជាអស្ចារ្យមែនអាចធ្វើអ្វីៗគ្រប់យ៉ាងបាន។ 
ក្រោយពីទម្លាក់ស្នាដៃនេះ កញ្ញា ឡូរ៉ា ម៉ម បានបង្ហាញពីអារម្មណ៍របស់ខ្លួនថារូបនាងពិតជាមានភាពរីករាយនិងមោទនភាពក្នុងការចែករំលែកបទចម្រៀងនេះ។ ចាប់តាំងពីថ្ងៃដំបូង នៃ project នេះ ការផ្ដើមធ្វើភ្លេង និពន្ធចម្រៀង និង ថតវីដេអូចម្រៀង គឺ ជាដំណើរមួយដែលពោរពេញទៅដោយ អារម្មណ៍ផ្សះផ្សា និង ការព្យាបាលដួងចិត្តពីខាងក្នុង។ 
CEO រូបនេះថា ឆ្នាំនេះគឺពោរពេញទៅដោយ ឧបសគ្គ តែក៏ពោរពេញទៅដោយភាពស្រស់ស្អាតដែរ ហើយរូបនាងពិតជារំភើបខ្លាំងជាមួយនឹង project នេះ ជាពិសេសក្នុង នាមជា ស្ត្រីម្នាក់។ កញ្ញា ឡូរ៉ា ថានាងពិតជាមានមោទនភាព ចំពោះ ស៊ូហ្សាណា ដែលជានារីម្នាក់ដ៏រឹងមាំ និង ក្លាហាន ក្នុងការដើរតាមក្ដីស្រមៃ និង ក្ដីស្រលាញ់របស់ខ្លួន។ ហើយការថតនេះក៏បានបំពេញក្តីស្រមៃរបស់នាងដូចគ្នាដែលបានថតនៅតំបន់ប្រាសាទលើទឹកដីខេត្តសៀមរាប។ 
កញ្ញា ឡូរ៉ា សង្ឃឹមថា បទចម្រៀងមួយបទនេះ នឹងបំផុសគំនិត ក៏ដូចជាការទទួលស្គាល់ពីពិភពលោកថា តម្លៃរបស់ស្ត្រីខ្មែរ គឺថ្លៃថ្លា និង អស្ចារ្យដូចនឹងប្រាង្គប្រាសាទដ៏អស្ចារ្យរបស់យើងដែរ៕
