ប្រទេសចិន ៖ ប្រព័ន្ធផ្សព្វផ្សាយចិនបានរាយការណ៍ កាលពីថ្ងៃទី២៦ ខែវិច្ឆិកា ឆ្នាំ២០២៤ ថា គម្រោងដំឡើងពន្ធទំនិញចិនខ្ពស់របស់មេដឹកនាំអាមេរិកថ្មី លោក Donald Trump អាចធ្វើឱ្យមហាប្រទេសអំណាចទាំងពីរឈានទៅមានសង្គ្រាមពន្ធយ៉ាងធ្ងន់ធ្ងរ ហើយប្រទេសទាំងពីរនឹងរងផលប៉ះពាល់ខ្លាំងដូចគ្នា ។

លោក Trump ដែលគ្រោងស្បថចូលកាន់តំណែងជាប្រធានាធិបតីអាមេរិកថ្មី នៅថ្ងៃទី២០ ខែមករា ឆ្នាំ២០២៥ បាននិយាយកាលពីថ្ងៃទី២៥ ខែវិច្ឆិកា កន្លងមកថា លោកនឹងដំឡើងពន្ធទំនិញចិន ១០%ទៀត រហូតដល់ទីក្រុងប៉េកាំង អនុវត្តវិធានការជាក់លាក់ក្នុងការទប់ស្កាត់ថ្នាំញៀនហ្វេនតានីល (Fentanyl) ដែលជាបញ្ហាធំនៅអាមេរិក ។

កាសែត China Daily និង Global Times បានផ្សព្វផ្សាយវិចារណកថា កាលពីថ្ងៃទី២៦ ខែវិច្ឆិកា កន្លងមក ថា សូមមេដឹកនាំអាមេរិកថ្មីកុំធ្វើឱ្យចិនក្លាយជាសត្វពពែទទួលទោសដោយសារបញ្ហាថ្នាំញៀនហ្វេនតានីល នៅអាមេរិក ឬមើលរំលងបំណងល្អរបស់ចិន ។ មេដឹកនាំអាមេរិកគំរាមដំឡើងពន្ធទំនិញចិន គឺជារឿងពុំសមហេតុផល ពីព្រោះសង្គ្រាមពន្ធ គ្មានអ្នកណាឈ្នះទេ ។ បើអាមេរិកនៅតែយកបញ្ហាសេដ្ឋកិច្ចមកលាយឡំជាមួយនយោបាយ និងយកការដំឡើងពន្ធជាអាវុធ វានឹងធ្វើឱ្យប្រទេសទាំងពីរខាតបង់ ។

សេដ្ឋវិទូជាច្រើនរូបចាប់ផ្តើមទម្លាក់ការព្យាករកំណើនសេដ្ឋកិច្ចចិន ចាប់ពីឆ្នាំ២០២៥ ដល់ឆ្នាំ២០២៦ ដោយសារពិចារណាពីការដំឡើងពន្ធរបស់លោក Trump ហើយពួកគេបានដាស់តឿនឱ្យពលរដ្ឋអាមេរិកត្រៀមខ្លួនជាមួយទំនិញឡើងថ្លៃនៅអាមេរិក ។

កាលពីថ្ងៃទី២៤ ខែវិច្ឆិកា ប្រធានសេដ្ឋវិទ្យានៅតំបន់អាស៊ី មកពីស្ថាប័ន S&P Global Ratings បញ្ជាក់ថា បច្ចុប្បន្ន យើងដឹងថា ផលប៉ះពាល់ដោយសារការដំឡើងពន្ធទំនិញនឹងកើតឡើង ។ ដូច្នេះ ស្ថាប័ន S&P បានកាត់បន្ថយការព្យាករសេដ្ឋកិច្ចចិន នៅឆ្នាំ២០២៥ និងឆ្នាំ២០២៦ គឺនឹងកើនឡើងត្រឹមតែ៤.១% និង៣.៨% ប៉ុណ្ណោះ ។

លោក Trump ធ្លាប់បានប្រកាសថា អាមេរិកនឹងដំឡើងពន្ធទំនិញចិនខ្ពស់ជាងមុន ខណៈកន្លងមក អាមេរិកយកពន្ធទំនិញចិន ចាប់ពី៧.៥% ទៅ២៥% ប៉ុណ្ណោះ ។

លោក Gao Lingyun អ្នកវិភាគសេដ្ឋកិច្ចមកពី Chinese Academy of Social Sciences នៅទីក្រុងប៉េកាំង ឱ្យដឹងថា ចិនមានវិធានការទប់ស្កាត់ការដំឡើងពន្ធទំនិញរបស់អាមេរិក ។ ការយកបញ្ហាប្រឆាំងថ្នាំញៀនមកធ្វើជាមូលហេតុដំឡើងពន្ធទំនិញចិន គឺចិនពុំអាចទទួលយកបានទេ ហើយក៏ស្តាប់មិនចូលត្រចៀកដែរ ៕

ប្រទេសឥណ្ឌូណេស៊ី ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ប្រទេសឥណ្ឌូណេស៊ីកំពុងតែពិចារណាលើសំណើវិនិយោគស្មើទឹកប្រាក់ ១០០លានដុល្លារអាមេរិករបស់ Apple Inc បន្ទាប់ពីក្រុមហ៊ុននេះព្យាយាមបញ្ចុះបញ្ចូលរដ្ឋាភិបាលឥណ្ឌូណេស៊ីឱ្យបញ្ឈប់ការហាមឃាត់ការលក់ទូរស័ព្ទ iPhone 16 ។

ក្រសួងឧស្សាហកម្មឥណ្ឌូណេស៊ីបញ្ជាក់ថា បានទទួលសំណើសុំវិនិយោគសាងសង់រោងចក្រផលិតឧបករណ៍ទូរស័ព្ទរបស់ក្រុមហ៊ុន Apple ខណៈលោក Agus Gumiwang Kartasasmita រដ្ឋមន្ត្រីក្រសួងឧស្សាហកម្ម បានហាមឃាត់ការលក់ទូរស័ព្ទ iPhone 16 កាលពីខែតុលា ឆ្នាំ២០២៤ ។ យើងនឹងរៀបចំកិច្ចប្រជុំមួយ ដើម្បីពិភាក្សាគ្នាពីសំណើសុំវិនិយោគរបស់ Apple ។

បើតាមលោក Febri Hendri Antoni Arif មន្ត្រីនាំពាក្យក្រសួងឧស្សាហកម្ម គឺការប្រជុំលើកនេះជាសញ្ញាវិជ្ជមាន ហើយរដ្ឋមន្ត្រីក្រសួងឧស្សាហកម្មឥណ្ឌូណេស៊ីនឹងស្វាគមន៍ការវិនិយោគនេះ ។

ក្រុមហ៊ុន Apple បានស្នើសុំវិនិយោគនៅឥណ្ឌូណេស៊ីបន្ថែមទៀត ស្មើទឹកប្រាក់១០០លានដុល្លារអាមេរិក ដែលទឹកប្រាក់នេះស្មើជិត១០ដង បើធៀបទឹកប្រាក់វិនិយោគកន្លងមករបស់ Apple ស្មើត្រឹមតែជិត១០លានដុល្លារអាមេរិកប៉ុណ្ណោះ ដោយសារក្រុមហ៊ុនមានបំណងឱ្យឥណ្ឌូណេស៊ីឈប់ហាមឃាត់ការលក់ទូរស័ព្ទ iPhone 16 របស់ខ្លួន ។ នេះបើតាមសេចក្តីរាយការណ៍របស់ Bloomberg News ។

គួរបញ្ជាក់ថា រដ្ឋាភិបាលឥណ្ឌូណេស៊ីបានហាមឃាត់ការលក់ទូរស័ព្ទ iPhone 16 ដោយសារបុគ្គលិក Apple នៅឥណ្ឌូណេស៊ី ពុំអនុវត្តតាមលក្ខខណ្ឌកំណត់ឱ្យទូរស័ព្ទស្មាតហ្វូនត្រូវតែផលិតឧបករណ៍នៅឥណ្ឌូណេស៊ី យ៉ាងហោចណាស់ ៤០% ។ យោងតាមទិន្នន័យរបស់មន្ត្រីរដ្ឋាភិបាលរកឃើញថា Apple វិនិយោគនៅឥណ្ឌូណេស៊ី ត្រឹមតែ៩៥លានដុល្លារអាមេរិក ដែលជាទឹកប្រាក់តិចជាងក្រុមហ៊ុននេះធ្លាប់សន្យា ។

ក្រៅពីនេះ ឥណ្ឌូណេស៊ីក៏បានហាមឃាត់ការលក់ទូរស័ព្ទម៉ាក Google Pixel ផងដែរ ដោយសារពុំបានវិនិយោគតាមទឹកប្រាក់កំណត់ ។ គេចាត់ទុកថា ការហាមឃាត់ការលក់ទូរស័ព្ទទាំងនេះ គឺជាវិធានការក្តៅលោក Prabowo Subianto ប្រធានាធិបតីឥណ្ឌូណេស៊ីថ្មី ដែលព្យាយាមដាក់សម្ពាធក្រុមហ៊ុនបរទេសឱ្យចូលមកផលិតឧបករណ៍នៅឥណ្ឌូណេស៊ីកាន់តែច្រើន ៕

ប្រទេសថៃ ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា ក្រសួងគមនាគមន៍បានសហការជាមួយក្រុមហ៊ុនអាកាសចរណ៍នានា បញ្ចុះតម្លៃសំបុត្រយន្តហោះ៣០% ស្មើនឹង៥ម៉ឺនកៅអី សម្រាប់ឱ្យពលរដ្ឋធ្វើដំណើរកម្សាន្ត ឬទៅស្រុកកំណើតក្នុងអំឡុងពេលចូលឆ្នាំសកល ឬឆ្លងឆ្នាំ ។

លោក សុរិយ៉ាក់ ជឹងរុងរឿងកិច្ច ឧបនាយករដ្ឋមន្ត្រី និងរដ្ឋមន្ត្រីក្រសួងគមនាគមន៍ បានលើកឡើងនៅថ្ងៃទី២៧ ខែវិច្ឆិកា កន្លងមកថា លោកបានប្រជុំជាមួយសមាគមអាកាសចរណ៍ថៃ ដើម្បីសហការគ្នាដោះស្រាយបញ្ហាសំបុត្រយន្តហោះឡើងថ្លៃពេលបុណ្យទាន ជាពិសេស ពេលចូលឆ្នាំសកលឆាប់ៗនេះ ។ យើងចង់ឱ្យសំបុត្រយន្តហោះមានតម្លៃថោក និងសមរម្យ ដើម្បីជាកាដូចុងឆ្នាំសម្រាប់ពលរដ្ឋធ្វើដំណើរកម្សាន្តទៅកាន់ទីជិតឆ្ងាយអាចកាត់បន្ថយចំណាយ, ងាយស្រួល និងសុវត្ថិភាពក្នុងការធ្វើដំណើរ ។

កិច្ចប្រជុំជាមួយសមាគមអាកាសចរណ៍ថៃ រួមមាន ៖ ក្រុមហ៊ុនអាកាសចរណ៍ Bangkok Airways, Thai AirAsia, Nok Air, Thai Lion Air និង Thai Vietjet Air ។ លទ្ធផលកិច្ចប្រជុំ គឺក្រសួងគមនាគមន៍ និងក្រុមហ៊ុនអាកាសចរណ៍ទាំងអស់នឹងសហការបង្កើតវិធានការលក់សំបុត្រយន្តហោះតម្លៃពិសេស ។

យើងនឹងផ្តល់ជូនសំបុត្រយន្តហោះតម្លៃថោកសរុបចំនួន៥ម៉ឺនសំបុត្រ សម្រាប់ការធ្វើដំណើរចេញពីទីក្រុងបាងកក ទៅកាន់បណ្តាខេត្ត-ក្រុងនានា ។ វាជាការបើកឱកាសឱ្យពលរដ្ឋថៃធ្វើដំណើរកម្សាន្តពេលចូលឆ្នាំសកល ឬឆ្លងឆ្នាំ (គិតចាប់ពីថ្ងៃទី២៦ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥) ជាមួយការបញ្ចុះតម្លៃសំបុត្រយន្តហោះ៣០% ខណៈកន្លងមក តម្លៃសំបុត្របានកើនឡើងខ្ពស់ពេលមានបុណ្យទានម្តងៗ ។

លោក សុរិយ៉ាក់ បន្តទៀតថា ៖ «ក្រសួងគមនាគមន៍ និងស្ថាប័នពាក់ព័ន្ធទាំងរដ្ឋ និងឯកជនជឿជាក់ថា វាផ្តល់ភាពងាយស្រួលដល់ពលរដ្ឋអាចទិញសំបុត្រយន្តហោះតម្លៃសមរម្យដើម្បីធ្វើដំណើរទៅលេងស្រុកកំណើត ជួបជុំសាច់ញាតិ ប្រកបដោយសុវត្ថិភាពពេលឆ្លងឆ្នាំ» ។

ក្រៅពីនេះ ស្ថាប័នពាក់ព័ន្ធទាំងអស់ និងក្រុមហ៊ុនអាកាសចរណ៍នានាគួរចាត់វិធានការបង្កលក្ខណៈងាយស្រួលដល់អ្នកដំណើរក្នុងឱកាសចូលឆ្នាំសកល ព្រមទាំងគ្រប់គ្រងសម្ភារៈអ្នកដំណើរ និងកំណត់ពេលវេលាបើក-បិទអាកាសយានដ្ឋានតាមបណ្តាខេត្តឱ្យច្បាស់លាស់ ។ រីឯអាជ្ញាធរអាកាសចរណ៍ស៊ីវិលត្រូវតាមដានស្ថានការណ៍ថ្លៃធ្វើដំណើរជានិច្ច ដើម្បីកុំឱ្យក្រុមហ៊ុននានាឆ្លៀតឱកាសដំឡើងថ្លៃសំបុត្រ ៕

ឃើញហៃសូក្នុងបណ្តាញសង្គមស្មានតែមានលុយ តារា TikTok ដ៏មានឥទ្ធិពលម្នាក់របស់អាមេរិក ស្រាប់តែត្រូវបានប៉ូលិស.ចាប់ខ្លួនដោយសារលួ.ចអ៊ីវ៉ាន់ក្នុងហាងទំនើបមួយ។ Marlena Velez អាយុ ២២ ឆ្នាំមានអ្នកតាមដាន TikTok ជាង ៣៩០K ប្រមាណជាង ៣៩០.០០០ នាក់ត្រូវបានចាប់ខ្លួន និងចោ.ទប្រកាន់ពីបទលួ.ចរបស់របរមានតម្លៃប្រហែល ៥០០ ដុល្លារពី Target។

យោងតាមសារព័ត៌មានបរទេស NBC News ចុះផ្សាយថា Influencer ម្នាក់នេះតែងតែបង្ហោះខ្លឹមសារអំពីជីវិតរបស់នាងក្នុងនាមជាម្តាយកូនពីរ នៅលើគណនី TikTok របស់នាង ជាមួយនឹងសម្លៀកបំពាក់ប្រណីត និងរបស់ប្រើប្រាស់ថ្លៃៗ។ ថ្មីៗនេះនាងក៏បានបង្ហោះវីដេអូមួយនៅលើបណ្តាញសង្គម ដោយពាក់អាវពណ៌សាច់ ខោជើងវែង ដើរទិញរបស់របរនៅហាងមួយកន្លែងក្នុងទីក្រុង Cape Coral រដ្ឋ Florida។

ខណៈឈុតដែលនាងស្លៀកគឺដូចគ្នាបេះបិទទៅនឹងស្ត្រីដែលលួចឥវ៉ាន់ ក្នុងហាង Target ដែលបានបាត់កាលពីថ្ងៃ ៣០ ខែតុលា ត្រូវបានគេឃើញក្នុងកាមេរ៉ាសុវត្ថិភាព។ នៅពេលដែលគេយកវីដេអូនាងទៅដាក់ជិតជាមួយវីដេអូកាមេរ៉ាសុវត្ថិភាពឃើញថា ចោរក្នុងកាមេរ៉ាសុវត្ថិភាពនោះគឺជារូបនាងតែម្តង។ មិនយូរប៉ុន្មាននាយកដ្ឋានប៉ូលីស Cape Coral ក៏បានទៅផ្ទះនាង ចុះឆែកឆេរ និងចាប់ខ្លួននាងតាមសន្តិវិធី។

Marlena Velez បានសារភាពថា នាងពិតជាបានលួចរបស់គេពិតមែន Influencer ម្នាក់នេះក៏ត្រូវបានគេចោតប្រកាន់ថា លួចរបស់របរគេច្រើនដងហើយ។ មន្ត្រីដែលបានចាប់ខ្លួននាងបានសួរនាងនៅនៅក្នុងពន្ធនាគារថា តើនាងនៅមានទំនិញដែលលួចពីមុនៗច្រើនទៀតទេ Marlena Velez ឆ្លើយតបថានាងប្រហែលជានៅតែមានរបស់របរមួយចំនួនទៀត។ បច្ចុប្បន្នស្ត្រីរូបនេះត្រូវបានឃុំខ្លួនជាបណ្តោះអាសន្ន និងត្រូវឡើងតុលាការនៅថ្ងៃទី ១០ ខែធ្នូខាងមុខនេះ៕

ប្រទេសន័រវេស៖ ព្រះនាង Martha Louise ដែលជាបុត្រីច្បងរបស់ស្តេច Harald ដែលជាស្តេចគ្រប់គ្រងប្រទេសន័រវេសនាពេលបច្ចុប្បន្ននេះ ត្រូវបានគេនិយាយថា ព្រះនាងនិងស្វាមីមិនបានបង់ថ្លៃអាពាហ៍ពិពាហ៍របស់ពួកគេចំនួន ៩ ម៉ឺនដុល្លារកាលពីបីខែមុន។
ព្រះនាង Louise និងស្វាមីរបស់នាងគឺលោក Verrett បានរៀបអភិសេកដ៏ប្រណីតកាលពីចុងខែសីហា ឆ្នាំ២០២៤ នៅសណ្ឋាគារភ្នំមួយក្នុងទីក្រុងឆ្នេរសមុទ្រ Geiranger ប្រទេសន័រវេស ដោយមានភ្ញៀវចូលរួមចំនួន ៣៥០ នាក់ រួមទាំងព្រះមហាក្សត្រ ព្រះមហាក្សត្រី និងព្រះអង្គម្ចាស់នៃប្រទេសន័រវេសជាច្រើនទៀតផងដែរ។

ប៉ុន្តែបីខែក្រោយមក អ្នករៀបចំព្រឹត្តិការណ៍នៅតែមិនបានទទួលការបង់ប្រាក់នេះ។ ម្ចាស់អាជីវកម្មដែលរៀបចំពិធីមង្គលការបាននិយាយថា គូស្នេហ៍មួយគូនេះជំពាក់ប្រាក់ច្រើនជាងមួយលានក្រូន (ប្រមាណ ៩ ម៉ឺនដុល្លារអាមេរិក) ដោយពួកគេថែមទាំងបានស្នើសុំការប្រមូលបំណុលជាផ្លូវការទៀតផង។ អ្នករៀបចំពិធីមង្គលការបានបន្តថា “យើងទទួលស្គាល់ថា យើងបានរៀបចំពិធីមង្គលការសម្រាប់ព្រះនាង និងស្វាមីយ៉ាងប្រុងប្រយ័ត្ន និងល្អឥតខ្ចោះ ប៉ុន្តែជាអកុសលអ្វីដែលយើងទទួលបាន គឺព្រះនាងកំពុងគេចពីបំណុល” ។

បច្ចុប្បន្នព្រះនាងនិងស្វាមី រួមទាំងគ្រួសាររាជវង្សន័រវេស មិនទាន់បានធ្វើអត្ថាធិប្បាយលើព័ត៌មាននេះនៅឡើយទេ។ គួរបញ្ជាក់ដែរថា នេះជាលើកទី ២ ហើយដែលព្រះនាង Louise អាយុ ៥២ ឆ្នាំបានរៀបអភិសេក។ ពិធីមង្គលការលើកទី ២ របស់នាងគឺបានទាក់ទាញការចាប់អារម្មណ៍យ៉ាងខ្លាំងពីសារព័ត៌មានធំៗ ដោយសារព្រះនាងគឺជាបុត្រីច្បងរបស់ស្តេច Harald ដែលជាស្តេចគ្រប់គ្រងប្រទេសន័រវេសនាពេលបច្ចុប្បន្ននេះ។

ទោះជាយ៉ាងណា ព្រះនាងមិនមែនជាអ្នកគ្រងរាជ្យបន្ទាប់ពីព្រះបិតារបស់នាងនោះទេ ដោយសារមានហេតុផលជាច្រើន។ គួររំលឹកដែរថា កាលពីមុននាងធ្លាប់អះអាងថា នាងមានសមត្ថភាពខាងប្រាជ្ញា និងអាចនិយាយជាមួយទេវតាបាន នាងថែមទាំងសរសេរសៀវភៅមួយក្បាល ហើយបើកវគ្គសិក្សាមួយស្តីពី “សមត្ថភាព” នេះទៀតផង៕

ប្រទេសថៃ ៖ ភ្ញៀងធ្លាក់ខ្លាំងជាប់ៗគ្នាជាច្រើនថ្ងៃបណ្តាលឱ្យបណ្តាខេត្តភាគខាងត្បូងរបស់ប្រទេសថៃលិចលង់យ៉ាងធ្ងន់ធ្ងរ ជាពិសេស ខេត្តយ៉ាឡា មានភ្លៀងធ្លាក់មិនឈប់ឈរ រហូតដល់កម្ពស់ទឹកកើនឡើងដល់ដំបូលផ្ទះពលរដ្ឋ ។ រីឯខេត្តភាគខាងត្បូងចំនួន៧ទៀត មានភ្លៀងធ្លាក់ និងផ្គររន្ទះប្រមាណ៧០% ។

កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា ស្ថានការណ៍នៅបណ្តាខេត្តភាគខាងត្បូងមានភ្លៀងធ្លាក់យ៉ាងខ្លាំងក្នុងតំបន់ជាច្រើន ព្រមទាំងមានទឹកហូរពីតំបន់ព្រៃភ្នំផងដែរ ។ ពលរដ្ឋជាច្រើននាក់ជួបការលំបាកយ៉ាងខ្លាំង ហើយពួកគេពុំធ្លាប់ជួបគ្រោះទឹកជំនន់ធ្ងន់ធ្ងរបែបនេះទេ កន្លងមក ។

ខេត្តភាគខាងត្បូងជាច្រើនមានភ្លៀងធ្លាក់ខ្លាំង និងផ្គររន្ទះ ប្រមាណ៧០% រួមមាន ៖ ខេត្តយ៉ាឡា, សុរ៉ាជថានី, ណាខន ស្រីថាំម៉ារ៉ាជ, ផាត់ថាលុង, សុងក្លា, ប៉ាតានី និងណារ៉ា ធីវ៉ាត ។ ហ្វេសប៊ុកផេករបស់ភ្នាក់ងារឧតុនិយមថៃ បានរាយការណ៍ពីអាកាសធាតុនៅខេត្តយ៉ាឡា ថា កម្រិតទឹកជំនន់ក្នុងខេត្តនេះកើនឡើងជាបន្តបន្ទាប់ និងមានភ្លៀងធ្លាក់មិនឈប់ឈរ ក្នុងនោះនៅទីរួមស្រុកយ៉ាឡា ទឹកបានលិចខ្លាំងរហូតដល់ដំបូលអគារ ។

ពលរដ្ឋរស់នៅខេត្តភាគត្បូងនិយាយថា ភ្លៀងបានធ្លាក់យ៉ាងខ្លាំង ចាប់ពីថ្ងៃទី២៦ ខែវិច្ឆិកា ដល់ថ្ងៃទី២៧ ខែវិច្ឆិកា ហើយបណ្តាលឱ្យតំបន់ជាច្រើនរបស់ខេត្តយ៉ាឡា លិចលង់ខ្លាំង ជាពិសេស នៅមុខស្ថានីយរថភ្លើង និងមុខសណ្ឋាគារ មានកម្ពស់ទឹកកើនឡើង ចាប់ពី៦០សង់ទីម៉ែត្រ ទៅ៨០សង់ទីម៉ែត្រ ។ រីឯហាងលក់ដូរផ្សេងៗបានជញ្ជូនសម្ភារៈដាក់នៅទីខ្ពស់ ខណៈរថយន្តជាច្រើនគ្រឿងលិចក្នុងទឹក ។

ម្ចាស់ហាងលក់សម្ភារៈអេឡិចត្រូនិកប្រាប់ថា ខេត្តយ៉ាឡា ធ្លាប់មានទឹកជំនន់លិចខ្លាំងកាលពីឆ្នាំ១៩៨៨ ប៉ុន្តែនៅឆ្នាំ២០២៤ ទឹកបានលិចយ៉ាងឆាប់រហ័យ ស្ទើរតែប្រមូលសម្ភារៈមិនទាន់ ហើយបើមើលតាមអាកាសធាតុ ទឹកនឹងកាន់តែលិចខ្លាំងជាងនេះ ។ ពលរដ្ឋពិបាកណាស់ ហើយពុំដឹងថា ទឹកនឹងស្រកវិញពេលណាទេ ពីព្រោះពុំធ្លាប់ឃើញទឹកលិចខ្លាំងបែបនេះតាំងពីកើតមក ។

អាជ្ញាធរខេត្តយ៉ាឡា បានរៀបចំជម្រកឱ្យពលរដ្ឋរស់នៅបណ្តោះអាសន្ន ក្រោយពីផ្ទះពួកគេលិចដល់ដំបូល ព្រមទាំងបញ្ជូនអ្នកជំងឺ, ជនពិការ, កុមារ និងមនុស្សចាស់មកកាន់តំបន់សុវត្ថិភាព ដោយចែកថ្នាំពេទ្យ និងម្ហូបអាហារ ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានសរសេរក្នុងបណ្តាញសង្គម X ឱ្យគ្រប់ស្ថាប័នទាំងអស់បង្កើនកម្លាំងការពារសុវត្ថិភាពពលរដ្ឋនៅភាគខាងត្បូង និងត្រៀមទប់ទល់ បើប្រទេសថៃជួបខ្យល់ព្យុះ និងភ្លៀងធ្លាក់ខ្លាំងបន្ថែមទៀត ។ លោកស្រីក៏បានផ្តល់កម្លាំងចិត្តដល់ជនរងគ្រោះដោយសារទឹកជំនន់ និងអាជ្ញាធរផងដែរ ដែលប្រឹងប្រែងបំពេញការងារយ៉ាងលំបាកដើម្បីផ្តល់សុវត្ថិភាពឱ្យពលរដ្ឋ ៕