ប្រទេសប្រេស៊ីល ៖ បច្ចុប្បន្ន ពលរដ្ឋរស់នៅគ្រប់ទីកន្លែងលើពិភពលោក ពេញនិយមផឹកកាហ្វេយ៉ាងខ្លាំង មិនថាពេលព្រឹក ឬពេលថ្ងៃ ហើយអ្នកខ្លះតែងតែនឹកដល់ក្លិនឈ្ងុយរបស់កាហ្វេ ពេលក្រោកពីដំណេកជារៀងរាល់ថ្ងៃ ។ ប៉ុន្តែតម្លៃកាហ្វេបានកើនឡើងខ្ពស់ក្នុងរយៈពេល៤៧ឆ្នាំមកនេះ ដោយសារគ្រោះរាំងស្ងួតនៅប្រទេសប្រេស៊ីល ។

កាលពីថ្ងៃទី២៨ ខែវិច្ឆិកា ឆ្នាំ២០២៤ សារព័ត៌មាន AFP រាយការណ៍ថា ប្រេស៊ីល គឺជាប្រទេសផលិតកាហ្វេយ៉ាងច្រើននៅលើពិភពលោក និងនាំចេញកាហ្វេមានគុណភាពល្អទៅកាន់ប្រទេសជាច្រើន បានជួបនឹងគ្រោះរាំងស្ងួតធ្វើឱ្យតម្លៃកាហ្វេកើនឡើងខ្ពស់ក្នុងរយៈពេល៤៧ឆ្នាំ ។ ហេតុនេះ អ្នកនិយមផឹកកាហ្វេទាំងឡាយនឹងចំណាយប្រាក់ច្រើនជាងមុនដើម្បីទឹកកាហ្វេផឹក ។

តម្លៃគ្រាប់កាហ្វេអារ៉ាប៊ីកា បានកើនឡើងខ្ពស់ជាងពេលណាៗទាំងអស់ ឬគិតចាប់ពីឆ្នាំ១៩៧៧ មក ហើយតម្លៃនឹងកើនឡើងបន្តទៀត ដោយសារប្រេស៊ីលជួបនឹងគ្រោះរាំងស្ងួតនៅឆ្នាំ២០២៤ ។ វាគួរឱ្យបារម្ភយ៉ាងខ្លាំងសម្រាប់ការផលិតកាហ្វេនៅឆ្នាំ២០២៥ និងឆ្នាំ២០២៦ ស្របពេលការផ្គត់ផ្គង់កាហ្វេកំពុងប្រឈមនឹងបញ្ហានាពេលបច្ចុប្បន្ន ។

តម្លៃកាហ្វេកើនឡើងខ្ពស់ធ្វើឱ្យក្រុមហ៊ុននានាស្វែងរកដំណោះស្រាយរៀងៗខ្លួន សម្រាប់លក់កាហ្វេនៅដើមឆ្នាំ២០២៥ ដូចជា ៖ ក្រុមហ៊ុន Nestlé ត្រៀមដំឡើងថ្លៃកាហ្វេសម្រាប់អតិថិជន ខណៈក្រុមហ៊ុន The Swiss Group បានប្រកាសនៅខែវិច្ឆិកា ឆ្នាំ២០២៤ ថា នឹងដំឡើងថ្លៃកាហ្វេ ព្រមទាំងច្រកកាហ្វេក្នុងថង់តូចជាងមុនដើម្បីទទួលបានប្រាក់ចំណេញ ។

ពលរដ្ឋរស់នៅទីក្រុងឡុងដ៍ ប្រទេសអង់គ្លេស បានប្រាប់សារព័ត៌មាន AFP ថា ពួកគេចាប់ផ្តើមទិញកាហ្វេក្នុងហាងតិចជាងមុន ដោយសារតម្លៃកាហ្វេកើនឡើងកាលពីពេលថ្មីៗនេះ ។ រីឯអ្នកខ្លះទៀតបានទិញកាហ្វេកញ្ចប់មកឆុងផឹកនៅផ្ទះ ដើម្បីកាត់បន្ថយការចំណាយ ។

ដោយឡែក នៅប្រទេសវៀតណាម ក៏មានបញ្ហាផ្គត់ផ្គង់កាហ្វេនៅឆ្នាំ២០២៤ ដែរ ជាពិសេស គ្រាប់កាហ្វេរ៉ូបឺសស្តា សម្រាប់ផលិតជាកាហ្វេកញ្ចប់ ដោយសារគ្រោះរាំងស្ងួតក្នុងរដូវកាលដាំដុះ ។ កាហ្វេរ៉ូបឺសស្តា ស្មើនឹង៥,២០០ដុល្លារអាមេរិកក្នុង១តោន ក្រោយពីវាបានឡើងថ្លៃខ្លាំងរហូតដល់៥,៨២៩ដុល្លារអាមេរិកក្នុង១តោន កាលពីខែកញ្ញា ឆ្នាំ២០២៤ ។

អ្នកវិភាគនិយាយថា ការផ្អាកដឹកជញ្ជូនតាមសមុទ្រ, ពន្ធទំនិញកើនឡើងក្នុងសម័យលោក Donald Trump និងបទប្បញ្ញត្តិរបស់សហភាពអឺរ៉ុបកាន់តែតឹងរ៉ឹងពាក់ព័ន្ធនឹងការកាប់បំផ្លាញព្រៃឈើ គឺសុទ្ធតែជាកត្តាជំរុញឱ្យកាហ្វេឡើងថ្លៃខ្លាំង ៕

ប្រទេសទួរគី៖ វិមានក្រោមដី Basilica Cistern នៅក្នុងទីក្រុងអ៊ីស្តង់ប៊ុល ប្រទេសទួរគីបច្ចុប្បន្នគឺបានកំពុងក្លាយជាកន្លែងទាក់ទាញភ្ញៀវទេសចររាប់ពាន់នាក់ទាំងជាតិ និងអន្តរជាតិ។
វិមាននេះកាលពីមុនគឺជាអាងទឹកក្រោមដី ត្រូវបានសាងសង់ឡើងក្នុងឆ្នាំ ៥៤២ ក្រោមអធិរាជ Byzantine Justinian I. ក្នុងគោលបំណងដើម្បីផ្តល់ទឹកសម្រាប់ព្រះរាជវាំងរបស់អធិរាជ និងផ្ទុករបស់របរសំខាន់ៗជាច្រើននៅក្នុងទីក្រុង Constantinople នៃចក្រភពអ៊ីស្តង់ប៊ុល គឺជាអាងទឹកមានសារៈសំខាន់ និងធំបំផុត។។

ប៉ុន្តែនៅពេលដែលទីក្រុងនេះបានធ្លាក់ដល់ចក្រភពអូតូម៉ង់ក្នុងសតវត្សទី ១៥ អាងទឹក Basilica Cistern លែងមានតួនាទីសំខាន់ទៀតហើយ មិនយូរប៉ុន្មានវាក៏ត្រូវបានគេបំភ្លេចចោល។ នៅសតវត្សទី ១៦ អ្នករុករកជនជាតិបារាំង Petrus Gyllius បានរកឃើញអាងក្រោមដីនេះ។ បន្ទាប់ពីនោះមក គម្រោងនេះក៏បានឆ្លងកាត់ការជួសជុលជាច្រើន ហើយបានបើកដំណើរការនៅឆ្នាំ ១៩៨៧ ដោយបានទាក់ទាញអ្នកទស្សនាយ៉ាងច្រើនជុំវិញពិភពលោក។

បច្ចុប្បន្នអាងទឹក Basilica Cistern ត្រូវបានគេប្រដូចទៅនឹងវិមានក្រោមដីដោយសារស្ថាបត្យកម្មអស្ចារ្យគ្មានពីរ។ Basilica Cistern មានប្រវែង ១៤០ ម៉ែត្រ និងទទឹង ៧០ ម៉ែត្រ ត្រូវបានគេប៉ាន់ស្មានថាអាចផ្ទុកទឹកបានជាង ៨០,០០០ m3 ដែលគ្រប់គ្រាន់សម្រាប់បំពេញតម្រូវការរបស់អ្នករស់នៅទីក្រុងបានប្រហែលមួយខែ។ ពិដាននៃវិមានក្រោមដីនេះ ត្រូវបានគាំទ្រដោយសសរថ្មម៉ាបធំៗចំនួន ៣៣៦ ជាមួយកំពស់ប្រហែល ១០ ម៉ែត្រ។ ជួរនៃសសរនីមួយៗបង្កើតបានជាសម្រស់ដ៏អាថ៌កំបាំងដូចប្រាសាទបុរាណ។

ដោយសាររចនាសម្ព័ន្ធបុរាណ ដ៏ស្រស់ស្អាត និងអស្ចារ្យរបស់វា វិមានក្រោមដី Basilica Cistern ត្រូវបានជ្រើសរើសដោយអ្នកដឹកនាំរឿងល្បីៗជាច្រើន សម្រាប់ធ្វើជាទីតាំងថតភាពយន្តបែបផ្សងព្រេង និងភ័យរន្ធត់។ ខ្សែភាពយន្តទាំងបីគឺ James Bond (១៩៦៣), The International (២០០៩) និង Brotherhood of Tears (២០១៣) សុទ្ធតែមានឈុតឆាកថតនៅទីនេះ៕

ប្រទេសម៉ាឡេស៊ី ៖ កាលពីថ្ងៃទី២៨ ខែវិច្ឆិកា ឆ្នាំ២០២៤ សារព័ត៌មាន Reuters រាយការណ៍ថា ពលរដ្ឋជាង៣៧,០០០នាក់ រស់នៅខេត្តចំនួន៦ របស់ប្រទេសម៉ាឡេស៊ី បានរងផលប៉ះពាល់ដោយសារទឹកជំនន់ធ្ងន់ធ្ងរ ។ វាបណ្តាលមកពីភ្លៀងធ្លាក់ខ្លាំងជាប់ៗគ្នាជាច្រើនថ្ងៃនាចុងខែវិច្ឆិកានេះ ក្នុងនោះខេត្តកាឡាន់តាន់ ស្ថិតនៅជាប់ប្រទេសថៃ លិចខ្លាំងជាងគេ ។

នាយករដ្ឋមន្ត្រីម៉ាឡេស៊ី លោក Anwar Ibrahim បានថ្លែងនៅថ្ងៃទី២៨ ខែវិច្ឆិកា ថា អាជ្ញាធរបានធ្វើជម្រកស្នាក់នៅបណ្តោះអាសន្នក្នុងខេត្តទាំង៦ រួមមាន ៖ ខេត្តកាឡាន់តាន់, ត្រាំងកានូ, ខេដាស់, ប៉េលិស, យ៉ាក់ហូ និងប៉េរ៉ាក់ ស្មើនឹង៣២២កន្លែង សម្រាប់ឱ្យពលរដ្ឋរងផលប៉ះពាល់ស្នាក់នៅ ។ ខេត្តកាឡាន់តាន់ ស្ថិតនៅភាគឦសានម៉ាឡេស៊ី និងជាប់ប្រទេសថៃ លិចលង់ខ្លាំងជាងគេ ដែលខេត្តនេះមានពលរដ្ឋ៣០,៥៨២នាក់ មកពី៩,២២៣គ្រួសារ រងផលប៉ះពាល់ ។

ទឹកជំនន់តែងតែលិចនៅបរិវេណឆ្នេរសមុទ្រភាគខាងកើតប្រទេសម៉ាឡេស៊ីនៅរដូវវស្សា ដែលធ្វើឱ្យពលរដ្ឋរាប់ពាន់នាក់ជម្លៀសចេញពីលំនៅឋានជារៀងរាល់ឆ្នាំ ចាប់ពីខែតុលា រហូតដល់ខែមីនា ។ កាលពីថ្ងៃទី២៨ ខែវិច្ឆិកា កន្លងមក ភ្នាក់ងារជាតិគ្រប់គ្រងគ្រោះមហន្តរាយបានបង្ហោះរូបភាពក្នុងហ្វេសប៊ុកផេក ដែលបង្ហាញពីអាជ្ញាធរកំពុងជួយជម្លៀសពលរដ្ឋចេញពីតំបន់ទឹកជំនន់ក្នុងខេត្តកាឡាន់តាន់ ដោយមានទាំងទូក និងឧបករណ៍ផ្សេងៗ ។

ចំណែកភ្នាក់ងារឧតុនិយមម៉ាឡេស៊ីបានប្រកាសអាសន្នឱ្យពលរដ្ឋជ្រាបពីភ្លៀងធ្លាក់ខ្លាំងជាបន្តបន្ទាប់ដែលអាចបង្កគ្រោះថ្នាក់ផ្សេងៗ ជាពិសេស ពលរដ្ឋរស់នៅខេត្តកាឡាន់តាន់, ប៉ាហាំង និងត្រាំងកានូ ។ ដូចគ្នានេះ ភ្នាក់ងារជាតិគ្រប់គ្រងគ្រោះមហន្តរាយបានទទួលបញ្ជាឱ្យត្រៀមកម្លាំងដើម្បីផ្តល់សុវត្ថិភាពដល់ពលរដ្ឋទាំងអស់ ។

ខេត្តត្រាំងកានូ បានបិទផ្លូវចំនួន៣២ខ្សែ មិនឱ្យពលរដ្ឋធ្វើដំណើរតាមយានជំនិះគ្រប់ប្រភេទ ដោយសារស្ថានការណ៍ទឹកជំនន់កាន់តែធ្ងន់ធ្ងរ ។ រីឯតូបលក់ម្ហូបអាហារបណ្តែតទឹក បានរសាត់តាមទឹកជំនន់អស់ ម្ចាស់តូបនិយាយថា ទឹកជំនន់លើកនេះបំផ្លាញសម្ភារៈលក់ដូរ, តុកៅអី និងស្បៀងអស់មួយចំនួនធំ ៕

ផ្កាឈូករ័ត្នមានរាងមូល ពណ៌លឿងស្រដៀងនឹងកាំរស្មីនៃពន្លឺព្រះអាទិត្យ ត្រូវបានគេស្គាល់ថា ជាផ្កាដែលមានសារៈសំខាន់ខាងវប្បធម៌ និងស្មារតីចំពោះមនុស្សជុំវិញពិភពលោក។ ជាមួយនឹងសម្រស់ដ៏ស្រស់ត្រកាល ផ្កានេះមានអត្ថន័យល្អជាច្រើនដូចជា តំណាងឱ្យសុភមង្គល, សុទិដ្ឋិនិយម, ភាពស្មោះត្រង់, សន្តិភាព និងអាយុយឺនយូរ។ ក្រៅពីភាពស្រស់ស្អាត និងអត្ថន័យល្អ ផ្កាឈូករ័ត្នក៏មានអត្ថប្រយោជន៍ច្រើនផងដែរ។

ផ្កាឈូករ័ត្នមានគុណសម្បត្តិគ្រប់ផ្នែកទាំងអស់ទាំងឬស ដើម ស្លឹក ផ្កា និងគ្រាប់។ ជាទូទៅស្លឹករបស់វាត្រូវបានគេប្រើជាថ្នាំព្យាបាលអាការៈផ្សេងៗដូចជា៖ ឈឺពោះ បន្ធូការចុកណែនទ្រូង ហើម ជាំ ព្រមទាំងជាថ្នាំបញ្ចុះដ៏ល្អ ទាំងបញ្ចុះទឹកនោម បញ្ចុះមេរោគ រួមទាំងព្យាបាលអាការៈរោគទឹកនោមផ្អែម និងហឺតបានផងដែរ។ រីឯដើមរបស់វាវិញ ត្រូវបានគេយកមកធ្វើថ្នាំបញ្ចុះទឹកនោម ថ្នាំបន្ថយអាការៈក្អក រួមទាំងបុកឱ្យម៉ត់យកទៅបិទរបួស ឬដំបៅផ្សេងៗបានទៀតផង។

ចំណែកផ្ការបស់វា ប្រើជាថ្នាំសម្រាប់ព្យាបាលអាការៈឈឺក្បាល វិលមុខ ឈឺធ្មេញ ឈឺក្រពះ និងឈឺចាប់ពេលមករដូវ។ ជាមួយគ្នានេះដែរ គ្រាប់របស់ផ្កាឈូករ័ត្នក៏ត្រូវបានគេយកមកចម្រាច់ធ្វើប្រេងផង និងធ្វើជាគ្រាប់ធញ្ញជាតិផង។ គ្រាប់ផ្កាឈូករ័ត្នផ្តល់អត្ថប្រយោជន៍យ៉ាងច្រើនដល់សុខភាពរាងកាយដូចជា ជួយលើកកម្ពស់សុខភាពបេះដូង និងស្បែក ជួយជំរុញដល់ការលូតលាស់សក់ ជួយសម្រកទម្ងន់ បញ្ចុះកូឡេស្តេរ៉ូល ប្រឆាំងជំងឺមហារីក និងធ្វើឱ្យមានតុល្យភាពកម្រិតអរម៉ូន។

លើសពីនេះប្រេងផ្កាឈូករ័ត្នក៏ជួយធ្វើឱ្យប្រសើរឡើងនូវសុខភាពបេះដូង ការពារជំងឺរលាកសន្លាក់ ការពារជំងឺហឺត ក៏ដូចជាការពារជំងឺមហារីក ធ្វើឱ្យប្រសើរឡើងនូវប្រព័ន្ធភាពស៊ាំ កាត់បន្ថយការធ្លាក់ទឹកចិត្ត និងថប់បារម្ភ រួមទាំងជំនួយស្បែកឱ្យក្មេងជាងវ័យទៀតផង។ សរុបមកវិញផ្កាឈូករ័ត្នមិនត្រឹមតែស្រស់ស្អាតគួរឱ្យគយគន់ប៉ុណ្ណោះទេ វាក៏មានអត្ថប្រយោជន៍ច្រើន ដែលមនុស្សមួយចំនួនមិនដែលដឹងផងដែរ៕