ប្រទេសហូឡង់ ៖ ប្រទេសហូឡង់បានបង្កើតសហគមន៍ឈ្មោះ Minitopia ដែលអនុញ្ញាតឱ្យពលរដ្ឋអាចសាងសង់ផ្ទះរស់នៅមានទំហំសមល្មមតាមចំណង់ចំណូលចិត្តរបស់ខ្លួន នៅលើដីដែលរដ្ឋាភិបាលជួលឱ្យដើម្បីដោះស្រាយបញ្ហាខ្វះខាតជម្រក ។ ប៉ុន្តែរដ្ឋាភិបាលបានកំណត់លក្ខខណ្ឌ គឺពលរដ្ឋត្រូវសង់ផ្ទះពុំប៉ះពាល់បរិស្ថាន ។

រដ្ឋាភិបាលបានជួលដីទំនេរក្នុងទីក្រុងជាច្រើនឱ្យពលរដ្ឋរស់នៅបង្កើតសហគមន៍ Minitopia ក្នុងតម្លៃចាប់ពី២៩៤ដុល្លារ ទៅ៤៤១ដុល្លារអាមេរិកក្នុង១ខែ ហើយតម្លៃជួលខុសៗគ្នាអាស្រ័យលើទំហំផ្ទះ ។ ពលរដ្ឋអាចសង់ផ្ទះរស់នៅបណ្តោះអាសន្នដោយខ្លួនឯង ចាប់ពី១៥ឆ្នាំ ទៅ៣០ឆ្នាំ ។

លក្ខខណ្ឌការសង់ផ្ទះនៅសហគមន៍នេះ គឺជាផ្ទះ២ជាន់មានទំហំសមល្មម និងមិនធំពេក ។ ផ្ទះត្រូវតែរចនាឱ្យមានពណ៌បៃតង និងមិនយកគំរូតាមផ្ទះផ្សេង ដោយប្រើប្រាស់សម្ភារៈសាងសង់ពុំប៉ះពាល់បរិស្ថាន ប៉ុន្តែមានសភាពរឹងមាំបំផុត ។ ក្រៅពីនេះ ក៏ត្រូវតែចំណាយថាមពលតិចក្នុងផ្ទះ និងមានស័ក្តិសមជាមួយបរិយាកាសជុំវិញ ។

ការជួលដីឱ្យពលរដ្ឋសង់ផ្ទះរស់នៅ គឺចាប់ផ្តើមពីទីក្រុង Den Bosch មុនគេ រួចហើយរដ្ឋាភិបាលក៏បានជួលដីក្នុងទីក្រុងផ្សេងៗ ដូចជា ៖ Eindhoven និង Roosendaal ។ ផ្ទះភាគច្រើនក្នុងសហគមន៍មានទំហំតូចៗត្រូវបានសង់លើដីមានកំណត់ដោយដំឡើងបន្ទះសូឡា និងអាចផ្លាស់ប្តូរទៅកាន់ទីតាំងថ្មី ឬដោះឧបករណ៍ផ្សេងៗបាន ។

ក្រៅពីនេះ ពលរដ្ឋបានជួយគ្នាដាំបន្លែបង្ការ, ធ្វើជីកសិកម្ម និងចិញ្ចឹមមាន់ ខណៈអ្នកខ្លះទៀត ត្រងទឹកភ្លៀងទុកប្រើប្រាស់ ។ បច្ចុប្បន្ន ចំនួនពលរដ្ឋហូឡង់បានកើនឡើងច្រើន ខណៈផ្ទៃដីសម្រាប់សាងសង់ផ្ទះមានចំនួនតិចតួច ។ វាធ្វើឱ្យដីធ្លី និងឈ្នួលផ្ទះនៅហូឡង់មានតម្លៃខ្ពស់ ទើបពលរដ្ឋទូទៅ ជាពិសេស អ្នកធ្វើការ និងយុវជន គ្មានផ្ទះសម្បែងផ្ទាល់ខ្លួន ក៏សម្រេចចិត្តមករស់នៅទីនេះ ។

ម្យ៉ាងទៀត ផ្ទៃដីភាគច្រើននៅប្រទេសហូឡង់ គឺជាផ្ទៃដីសម្រាប់បង្កបង្កើនផលកសិកម្ម និងតំបន់អភិរក្ស ទើបរដ្ឋាភិបាលជួលដីឱ្យពលរដ្ឋរស់នៅក្នុងសហគមន៍ និងសង់ផ្ទះពុំប៉ះពាល់បរិស្ថានដោយខ្លួនឯង ៕

ប្រទេសជប៉ុន ៖ យោងតាមក្រុមហ៊ុនស្រាវជ្រាវជប៉ុនបង្ហាញថា ក្រុមហ៊ុនផ្នែកអាហារនៅប្រទេសជប៉ុន រួមមាន ៖ ភោជនីយដ្ឋាន, ផ្សារទំនើប និងហាងទំនិញ នឹងដំឡើងថ្លៃអាហាររហូតដល់ជាង៣,៩០០មុខ នៅដើមឆ្នាំ២០២៥ ដោយសារក្រុមហ៊ុនទាំងនេះត្រូវចំណាយថ្លៃដើមខ្ពស់ ។ ប៉ុន្តែវាធ្វើឱ្យពលរដ្ឋបារម្ភខ្លាំងពីតម្លៃអាហារកើនឡើងម្តងទៀត ក្រោយពីក្រុមហ៊ុនទាំងនេះទើបតែដំឡើងថ្លៃអាហារចំនួន១២,៥២០មុខ នៅឆ្នាំ២០២៤ ។

ក្រុមហ៊ុនស្រាវជ្រាវ Teikoku Databank ឱ្យដឹងថា តម្លៃអាហារនៅជប៉ុនបានកើនឡើងជាបន្តបន្ទាប់ រហូតដល់ឆ្នាំ២០២៥ ។ បើតាមការសាកសួរទៅកាន់ភោជនីយដ្ឋាន, ផ្សារទំនើប និងហាងទំនិញជាច្រើនកន្លែងឱ្យដឹងថា ពួកគេនឹងដំឡើងថ្លៃអាហាររហូតដល់ជាង៣,៩០០មុខ គិតចាប់ពីខែមករា ដល់ខែមេសា ឆ្នាំ២០២៥ ។

ក្រុមហ៊ុនស្រាវជ្រាវបញ្ជាក់ថា បើទោះជាការដំឡើងថ្លៃអាហារបានជួយឱ្យក្រុមហ៊ុនទាំងនេះពុំរងផលប៉ះពាល់ដោយសារការចំណាយដើមទុនខ្ពស់ ប៉ុន្តែវានឹងប៉ះពាល់ពលរដ្ឋ ដោយសារពួកគេត្រូវចំណាយប្រាក់ច្រើនជាងមុន ។ ម្យ៉ាងទៀត បើតម្លៃអាហារ និងទំនិញកើនឡើងខ្ពស់ វាមិនងាយធ្លាក់ចុះវិញទេ ហើយពលរដ្ឋនឹងកាត់បន្ថយការចំណាយ ។

ក្រុមហ៊ុនអាហារជប៉ុន ចំនួន១៩៥ក្រុមហ៊ុន បានប្រកាសកាលពីចុងខែវិច្ឆិកា ឆ្នាំ២០២៤ ថា ពួកគេនឹងដំឡើងថ្លៃអាហារចំនួន៣,៩៣៣មុខ រួមមាន ៖ គ្រឿងស្រវឹង, ភេសជ្ជៈផ្អែមមានជាតិហ្គាស, នំប៉័ង, អាហារកែច្នៃ, អាហារក្លាសេ និងនំចណីជាច្រើនមុខ ។
ការចំណាយថ្លៃដើមខ្ពស់ក្នុងការទិញបន្លែបង្ការ និងត្រីសាច់ គឺជាមូលហេតុចម្បងដែលធ្វើឱ្យថ្លៃអាហារកើនឡើងនៅជប៉ុន ។ រីឯការចំណាយដើមទុនលើការដឹកជញ្ជូនអាហារ និងកម្លាំងពលកម្មកើនឡើង ក៏បានជំរុញឱ្យថ្លៃអាហារកើនឡើងផងដែរ ។ កត្តាទាំងនេះនឹងធ្វើឱ្យក្រុមហ៊ុនអាហារជប៉ុនដំឡើងថ្លៃអាហារកាន់តែខ្ពស់ នៅឆ្នាំ២០២៥ ។

តាមរបាយការណ៍បញ្ជាក់ថា ពេញមួយឆ្នាំ២០២៤នេះ អាហារជប៉ុនចំនួន១២,៥២០មុខ បានឡើងថ្លៃជាបន្តបន្ទាប់ ហើយអាហារចំនួន១០៩មុខ នឹងឡើងថ្លៃ នៅខែធ្នូ ឆ្នាំ២០២៤ ។ ដូច្នេះ វាធ្វើឱ្យពលរដ្ឋជប៉ុនបង្ហាញក្តីបារម្ភ ដោយសារពួកគេត្រូវចំណាយប្រាក់ច្រើនជាងមុនសម្រាប់ទិញទំនិញ និងអាហារប្រចាំថ្ងៃ ៕

ប្រទេសម៉ាឡេស៊ី ៖ សមាជិកសភាតំណាងរាស្ត្រគណបក្សប្រឆាំងមួយរូបនៅប្រទេសម៉ាឡេស៊ី ត្រូវបានមហាជនរិះ.គន់ ពេញបណ្តាញសង្គម ក្រោយពីស្នើរដ្ឋាភិបាលគាំទ្រឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាចំនួនពលរដ្ឋធ្លាក់ចុះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២ ខែធ្នូ ឆ្នាំ២០២៤ ។

លោក Dato Rosol Wahid ជាសមាជិកសភាប្រចាំខេត្តទ្រាំងកានូ មកពីគណបក្សឥស្លាមម៉ាឡេស៊ី បានលើកឡើងក្នុងកិច្ចពិភាក្សាពីសេចក្តីព្រាងថវិកាឆ្នាំ២០២៥ នៅរដ្ឋសភា កាលពីថ្ងៃទី២៨ ខែវិច្ឆិកា កន្លងមកថា រដ្ឋាភិបាលគួរតែលើកទឹកចិត្តឱ្យយុវជនសម័យថ្មីរៀបការ និងមានកូនឱ្យច្រើន ពីព្រោះពួកគេពុំព្រមរៀបការបង្កើតគ្រួសារទេ ។

លោកបន្តថា តើក្រសួងកិច្ចការនារី និងអភិវឌ្ឍន៍សហគមន៍អាចធ្វើអ្វីបានខ្លះ ដើម្បីជំរុញឱ្យយុវជនម៉ាឡេស៊ីរៀបការមានកូន ដើម្បីឱ្យប្រទេសរបស់យើងមានចំនួនពលរដ្ឋកើនឡើង? ហេតុនេះ រដ្ឋាភិបាលគួរតែសាកល្បងជំរុញឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាអត្រាកំណើតធ្លាក់ចុះ នាពេលបច្ចុប្បន្ន ។

ក្រោយការលើកឡើងបែបនេះ បានធ្វើឱ្យសមាជិកសភាផ្សេងៗក្នុងរដ្ឋសភាសើចចំអក និងរិះគន់យ៉ាងច្រើន ។ លើសពីនេះ ក៏មានការជជែកវែកញែកពីមហាជនពេញបណ្តាញសង្គមផងដែរ ពាក់ព័ន្ធនឹងសំណើឱ្យពលរដ្ឋមានប្តី-ប្រពន្ធច្រើន ។ ប៉ុន្តែលោក Dato បញ្ជាក់ថា ប្រទេសមហាអំណាច ដូចជា ៖ ចិន, ឥណ្ឌា និងឥណ្ឌូណេស៊ី សុទ្ធតែមានពលរដ្ឋច្រើនទាំងអស់ ហើយដើម្បីក្លាយជាប្រទេសមួយអស្ចារ្យ ម៉ាឡេស៊ីត្រូវតែមានពលរដ្ឋច្រើនដូចគ្នា ។

រដ្ឋាភិបាលម៉ាឡេស៊ីក្រោមការដឹកនាំរបស់អតីតនាយករដ្ឋមន្ត្រី លោក Mahathir Mohamad ដែលធ្លាប់កំណត់គោលដៅកាលពីឆ្នាំ១៩៨២ ឱ្យម៉ាឡេស៊ីមានពលរដ្ឋរហូតដល់៧០លាននាក់ ប៉ុន្តែអត្រាកំណើតបានធ្លាក់ចុះជាបន្តបន្ទាប់ ។ ជាក់ស្តែង កាលពីឆ្នាំ២០១០ ស្ត្រីម្នាក់មានកូន២នាក់ ប៉ុន្តែនៅឆ្នាំ២០២០ ពួកនាងមានកូនតែម្នាក់ប៉ុណ្ណោះ ។

នេះជាបញ្ហាគួរឱ្យបារម្ភយ៉ាងខ្លាំង ហើយនៅឆ្នាំ២០៤៣ ម៉ាឡេស៊ីនឹងសម្បូរពលរដ្ឋអាយុច្រើន គឺពលរដ្ឋ១៥% នឹងមានអាយុលើស៦៥ឆ្នាំ ។ យើងប្រឈមនឹងបញ្ហាអត្រាកំណើតធ្លាក់ចុះខ្លាំង ហើយវានឹងប៉ះពាល់ដោយផ្ទាល់ចំពោះការអភិវឌ្ឍសង្គម និងសេដ្ឋកិច្ចជាតិ ។ នេះបើតាមការលើកឡើងរបស់លោក Dato ។

មហាជនពុំយល់ស្របនឹងការលើកឡើងរបស់សមាជិកសភារូបនេះទេ ដោយពួកគេនិយាយថា មូលហេតុធ្វើឱ្យអត្រាកំណើតធ្លាក់ចុះ ដោយសារបញ្ហាសេដ្ឋកិច្ច និងការចំណាយក្នុងជីវភាពរស់នៅខ្ពស់ ។ រីឯការមានប្តី-ប្រពន្ធច្រើននាក់ពុំអាចជួយអ្វីឡើយ ហើយរដ្ឋាភិបាលគួរតែលើកទឹកចិត្តឱ្យវិនិយោគិនបរទេសមកវិនិយោគនៅម៉ាឡេស៊ីឱ្យបានច្រើន ដើម្បីឱ្យពលរដ្ឋមានការងារធ្វើ និងបង្កើនឱកាសអាជីវកម្ម ៕

ប្រទេសប៉ាគីស្ថាន៖ គ្រូបង្រៀន AI ដំបូងបង្អស់របស់ប៉ាគីស្ថានដែលមានឈ្មោះថា Miss Aini បានធ្វើឱ្យសិស្សជាច្រើនមានការចាប់អារម្មណ៍យ៉ាងខ្លាំង នៅពេលដែលនាងបានបង្ហាញខ្លួននៅក្នុងសាលារៀន Happy Palace ក្នុងទីក្រុង Karachi ប្រទេសប៉ាគីស្ថាន។

យោងតាមសារព័ត៌មានបរទេសចុះផ្សាយថា Miss Aini ដែលជាគ្រូបង្រៀន AI ដំបូងបង្អស់របស់ប៉ាគីស្ថានមានសមត្ថភាពឆ្លើយសំណួរជាង ២០ ភាសាឯណោះរួមមាន ភាសាអ៊ូឌូ អង់គ្លេស ស៊ីនឌី បារាំង ចិន និងផ្សេងៗទៀត។ សិស្សដែលចូលរួមក្នុងថ្នាក់រៀនជាមួយកញ្ញា Aini បានសម្តែងការរំភើបចិត្តយ៉ាងខ្លាំង ដោយបញ្ជាក់ថាគ្រូ AI ឆ្លើយសំណួររបស់ពួកគេភ្លាមៗ ដែលធ្វើឱ្យថ្នាក់រៀនមួយនេះក្លាយជាបទពិសោធន៍ពិសេស និងរីករាយបំផុត។

វិស្វករ Hassan Siddiqui ដែលជាអ្នកបង្កើតកញ្ញា Aini បាននិយាយថា មនុស្សយន្តមួយនេះត្រូវបានបង្កើតឡើងដោយមានធាតុផ្សំដូចជាខ្សែភ្លើង សរសៃកញ្ចក់ ប្លាស្ទិក សក់សំយោគដែលមានប្រភពមកពីទីផ្សារក្នុងស្រុក និងបំពាក់ដោយបញ្ញាសិប្បនិម្មិត។ Hassan Siddiqui បានបន្តថា លោកបានចំណាយពេលប្រាំពីរខែ ដើម្បីអភិវឌ្ឍនាងឱ្យក្លាយជាគ្រូបង្រៀនរ៉ូបូតដ៏អស្ចារ្យម្នាក់។

នាយកសាលា Happy Palace បាននិយាយថា Aini គឺជាគ្រូបង្រៀន AI ដំបូងគេដែលត្រូវបានណែនាំនៅក្នុងប្រទេសប៉ាគីស្ថាន និងជាមនុស្សយន្តដំបូងដែលបានបង្ហាញខ្លួនក្នុងសាលារៀននេះ។ មូលហេតុដែលសាលាដាក់ដំណើរការគ្រូបង្រៀន AI គឺដើម្បីជួយសិស្សអភិវឌ្ឍចំណេះដឹងបន្ថែមទាក់ទងនឹងបច្ចេកវិទ្យា ដូច្នេះសិស្សានុសិស្សនឹងអាចអភិវឌ្ឍជំនាញជាច្រើនតាមរយៈការអនុវត្តន៍នៅក្នុងមន្ទីរពិសោធន៍ដូចជា មនុស្សយន្ត និងបញ្ញាសិប្បនិម្មិតជាដើម។

អ្នកតំណាងសាលាក៏បាននិយាយដែរថា “បទពិសោធន៍ទាំងនេះនឹងជួយឱ្យយើងដឹងពីសក្តានុពលនៃ AI” ។ គួរបញ្ជាក់ដែរថា ការដាក់ដំណើរការគ្រូបង្រៀន AI នៅក្នុងសាលារៀននាពេលបច្ចុប្បន្ននេះគឺមានការកើនឡើងខ្លាំងគួរឱ្យកត់សម្គាល់។ កាលពីដើមឆ្នាំនេះឥណ្ឌាក៏បានដាក់ដំណើរការគ្រូបង្រៀន AI ដំបូងបង្អស់នៅក្នុងសាលារៀនរបស់ខ្លួនផងដែរ ក្នុងគោលបំណងដូចគ្នាគឺចង់ឱ្យសិស្សមានការយល់ដឹងកាន់តែច្បាស់ពីបច្ចេកវិទ្យាពិភពលោក៕

ប្រទេសវៀតណាម ៖ កាលពីថ្ងៃទី១ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា រដ្ឋសភាវៀតណាមបានអនុម័តគម្រោងកសាងផ្លូវរថភ្លើងល្បឿនលឿន ដើម្បីតភ្ជាប់ពីទីក្រុងហាណូយនៅភាគខាងជើង ទៅកាន់ទីក្រុងហូជីមិញភាគខាងត្បូង ។ គម្រោងនេះនឹងចំណាយថវិកាកសាងប្រមាណ៦៧,០០០លានដុល្លារអាមេរិក ។

ផ្លូវរថភ្លើងល្បឿនលឿនតភ្ជាប់ទីក្រុងធំៗរបស់វៀតណាម គឺមានប្រវែងសរុប១,៥៤១គីឡូម៉ែត្រ ហើយរថភ្លើងថ្មីនេះមានល្បឿន៣៥០គីឡូម៉ែត្រក្នុង១ម៉ោង ។ ដូច្នេះ វានឹងកាត់បន្ថយរយៈពេលធ្វើដំណើរពី៣០ម៉ោង មកនៅត្រឹមតែ៥ម៉ោងប៉ុណ្ណោះ ។

វៀតណាមនឹងចាប់ផ្តើមកសាងផ្លូវរថភ្លើងនេះនៅដើមឆ្នាំ២០២៧ ហើយរំពឹងថា រថភ្លើងនឹងដំណើរការនៅឆ្នាំ២០៣៥ ។ រថភ្លើងល្បឿនលឿននឹងធ្វើដំណើរឆ្លងកាត់ខេត្ត-ក្រុង ចំនួន២០ និងមានស្ថានីយរថភ្លើង២៣កន្លែង, ស្ថានីយដឹកទំនិញ៥កន្លែង ហើយរថភ្លើងនឹងដឹកទាំងអ្នកដំណើរ, ទំនិញ ព្រមទាំងផ្តល់សេវាកម្មផ្នែកការពារជាតិផងដែរ ។

លោក Nguyen Danh Huy អនុរដ្ឋមន្ត្រីក្រសួងគមនាគមន៍ថ្លែងថា គម្រោងនេះសម្រាប់បំពេញតម្រូវការដឹកជញ្ជូនទំនិញកើនឡើង ពីព្រោះបើតាមការស្ទង់មតិជាច្រើនបង្ហាញថា ពលរដ្ឋវៀតណាមចង់មានផ្លូវធ្វើដំណើរឆាប់រហ័សជាងមុនពីភាគខាងជើងមកភាគខាងត្បូង ។ ដូច្នេះ វាជាគម្រោងដ៏សំខាន់សម្រាប់ហេដ្ឋារចនាសម្ព័ន្ធដឹកជញ្ជូន និងបំពេញតួនាទីជួយវៀតណាមឱ្យឈានទៅរកការរីកចម្រើនយ៉ាងឆាប់រហ័ស ។

ប្រទេសវៀតណាមនឹងចំណាយដើមទុនក្នុងស្រុកសម្រាប់អនុវត្តគម្រោងនេះ ព្រមទាំងខ្ចីថវិកាបន្ថែមពីក្រៅប្រទេសមិនលើសពី៣០% ឬស្មើប្រមាណ២០,១០០លានដុល្លារអាមេរិក ។ បច្ចុប្បន្ន វៀតណាមកំពុងពិចារណាជ្រើសរើសរូបរាងរថភ្លើងល្បឿនលឿនរបស់ជប៉ុន និងចិន ។

អ្នកវិភាគផ្នែកដឹកជញ្ជូននិយាយថា គម្រោងនេះនឹងមានសារៈសំខាន់ ព្រមទាំងបង្កើនសមត្ថភាពប្រកួតប្រជែងផ្នែកដឹកជញ្ជូនវៀតណាម ដោយសារការដឹកជញ្ជូនក្នុងស្រុកមានកំណត់ ។ ពេលកសាងផ្លូវរថភ្លើងល្បឿនលឿនរួចរាល់ វានឹងអាចកាត់បន្ថយថ្លៃដឹកជញ្ជូនទំនិញពីភាគខាងជើងមកខាងត្បូង ។

គួរបញ្ជាក់ថា ការធ្វើដំណើរពីទីក្រុងហាណូយ ទៅទីក្រុងហូជីមិញតាមរថភ្លើងធម្មតា គឺចំណាយពេលចាប់ពី៣៤ម៉ោង ទៅ៣៨ម៉ោង ខណៈថ្លៃធ្វើដំណើរ គឺពី៦៤ដុល្លារ ទៅ៩២ដុល្លារអាមេរិក ។ រីឯថ្លៃធ្វើដំណើរតាមយន្តហោះ ចាប់ពី១០០ដុល្លារ ទៅ៣៦០ដុល្លារអាមេរិក ៕