មនុស្សភាគច្រើនតែងតែឮពាក្យថា «អាហារពេលព្រឹកមានសារៈសំខាន់បំផុតសម្រាប់សុខភាព» ប៉ុន្តែមានមនុស្សភាគតិចណាស់ដែលយល់ថា អាហារមួយចំនួនពុំគួរបរិភោគនៅពេលព្រឹកទេ ពីព្រោះវាមានផលប៉ះពាល់សុខភាពខ្លាំង ។ គេហទំព័រ SOHA បានចែករំលែកចំណេះដឹងពាក់ព័ន្ធនឹងសារៈសំខាន់របស់អាហារពេលព្រឹក និងវិធីបរិភោគបែបណាឱ្យសមស្របសម្រាប់សុខភាពតាមការណែនាំរបស់គ្រូពេទ្យចិន ។

លោកគ្រូពេទ្យចិនឈ្មោះ លី និយាយថា ពុំគួរបរិភោគអាហារ ចំនួន៣ប្រភេទនេះនៅពេលព្រឹកទេ ជាពិសេស មនុស្សវ័យកណ្តាល និងអ្នកមានអាយុចាប់ពី៦០ឆ្នាំឡើងទៅ ។ ការបរិភោគអាហារផ្តេសផ្តាសពេលព្រឹកនឹងប៉ះពាល់សុខភាពរយៈពេលយូរ ហើយមានមនុស្សតិចណាស់ដែលបានដឹងរឿងនេះ ។

ខាងក្រោមនេះ គឺជាអាហារ ចំនួន៣ប្រភេទពុំគួរបរិភោគនៅពេលព្រឹក រួមមាន ៖

១-អាហារសម្បូរខ្លាញ់ ៖ រួមមាន សាច់ក្រក, សាច់ជ្រូក ឬអាហារផ្ទុកខ្លាញ់ច្រើន ។ ការបរិភោគអាហារទាំងនេះ មិនត្រឹមតែមានគ្រោះថ្នាក់ដល់សុខភាពបេះដូងប៉ុណ្ណោះទេ ប៉ុន្តែយើងនឹងប្រឈមជាមួយជំងឺរ៉ាំរ៉ៃផ្សេងៗ ដូចជា ៖ ជំងឺដាច់សរសៃឈាមខួរក្បាល, ទឹកនោមផ្អែម និងជំងឺធាត់ ជាពិសេស អ្នកមានអាយុចាប់ពី៦០ឆ្នាំឡើងទៅ ។ លើសពីនេះ ការបរិភោគអាហារសម្បូរខ្លាញ់នឹងប៉ះពាល់បេះដូង និងតម្រងនោម ។

២-អាហារសម្បូរស្ករ ៖ រួមមាន នំខេក, ស្ករគ្រាប់ ឬភេសជ្ជៈរសជាតិផ្អែម ពីព្រោះវាផ្តល់នូវកាឡូរីគ្មានប្រយោជន៍ និងឆាប់ឡើងទម្ងន់, កើតជំងឺទឹកនោមផ្អែម និងបេះដូង ។ លោកគ្រូពេទ្យចិនបានណែនាំឱ្យមនុស្សចាស់កាត់បន្ថយការបរិភោគអាហារសម្បូរស្ករនៅពេលព្រឹក ។

៣-អាហារកែច្នៃ ៖ រួមមាន មីកញ្ចប់, អាហារក្លាសេ និងអាហារកំប៉ុង ដោយសារវាមានអំបិល, សារធាតុរក្សាទុកអាហារឱ្យបានយូរ និងការបន្ថែមរសជាតិច្រើន ។ អាហារទាំងនេះពុំផ្តល់ផលល្អដល់សុខភាពឡើយ ជាពិសេស មនុស្សចាស់ បើបរិភោគអំបិលច្រើនពេកអាចធ្វើឱ្យប៉ះពាល់សម្ពាធឈាម, ហើម និងតម្រងនោម ។

លោកគ្រូពេទ្យបញ្ជាក់ថា មនុស្សគ្រប់រូប ជាពិសេស មនុស្សចាស់ត្រូវតែផឹកទឹកនៅពេលព្រឹក ពីព្រោះពេលក្រោកពីដំណេក រាងកាយនឹងខ្វះទឹក ។ ការផឹកទឹកក្តៅឧណ្ឌៗពេលព្រឹកពិតជាមានសារៈសំខាន់ខ្លាំងណាស់ ពីព្រោះវាមិនត្រឹមតែជួយបំពេញបរិមាណទឹកដែលរាងកាយខ្វះខាតពេលយប់ប៉ុណ្ណោះទេ ប៉ុន្តែវានឹងជំរុញដល់ប្រព័ន្ធរំលាយអាហារ និងកាត់បន្ថយការទល់លាមក ដែលមនុស្សចាស់តែងតែប្រឈមញឹកញាប់ ។

ការបរិភោគអាហារពេលព្រឹកបានត្រឹមត្រូវ និងផ្តល់នូវអាហារូបត្ថម្ភ នឹងជួយឱ្យមនុស្សចាស់មានសុខភាពល្អ ពីព្រោះអាហារព្រឹកផ្តល់នូវថាមពលពេញមួយថ្ងៃ ។ ជាមួយគ្នានេះ វាក៏ជួយដល់ការរំលាយអាហារផងដែរ ហើយការបរិភោគអាហារមានជាតិសរសៃខ្ពស់នឹងធ្វើឱ្យរាងកាយចៀសផុតពីជំងឺរ៉ាំរ៉ៃ ដូចជា ៖ ជំងឺលើសឈាម, ទឹកនោមផ្អែម និងសរសៃឈាមបេះដូង ៕

មនុស្សគ្រប់គ្នាតែងតែប្រើប្រាស់ច្រាសដុសធ្មេញជារៀងរាល់ថ្ងៃ ហើយមានទម្លាប់ទុកវានៅក្នុងបន្ទប់ទឹក ប៉ុន្តែលោកវេជ្ជបណ្ឌិតអង់គ្លេសឯកទេសសុខភាពមាត់ធ្មេញ ហាមដាច់ខាតកុំទុកច្រាសដុសធ្មេញក្នុងបន្ទប់ទឹក ដោយសារវានឹងចម្លងមេរោគយ៉ាងច្រើនដែលយើងនឹកស្មានពុំដល់ ។ ក្រៅពីនេះ លោកវេជ្ជបណ្ឌិតក៏បានណែនាំពីវិធីប្រើប្រាស់ច្រាសផងដែរ ។

លោកវេជ្ជបណ្ឌិត Upen Vithlani មានឯកទេសផ្នែកសុខភាពមាត់ធ្មេញ និងជាស្ថាបិកអង្គការ MyMouth នៅប្រទេសអង់គ្លេស បានផ្តល់ចំណេះដឹងអំពីសុខភាពមាត់ធ្មេញ និងការជ្រើសរើសផលិតផលផ្សេងៗយកមកប្រើប្រាស់ថា ច្រាសដុសធ្មេញនីមួយៗពោរពេញទៅដោយមេរោគយ៉ាងច្រើន ដូចជា ៖ មេរោគ E. coli ធ្វើឱ្យចុកពោះ, រមួលក្រពើ, គ្រុនក្តៅស្រាល និងមានមេរោគស្បែក ។

លើសពីនេះ លោកវេជ្ជបណ្ឌិតបានដាស់តឿនថា បើទុកច្រាសដុសធ្មេញនៅកន្លែងពុំសមរម្យ គឺយើងអាចប្រឈមនឹងការឆ្លងមេរោគពីកំទេចលាមកបាន ។ កំទេចលាមកនឹងជាប់លើច្រាសដុសធ្មេញ ជាពិសេស ពេលទុកវាក្នុងបន្ទប់ទឹក ។ នៅក្នុងមាត់របស់យើងពោរពេញទៅដោយមេរោគយ៉ាងច្រើន ហើយមេរោគទាំងនេះនឹងនៅជាប់ច្រាសដុសធ្មេញផងដែរ ។

តាមការស្រាវជ្រាវបញ្ជាក់ថា នៅលើច្រាសដុសធ្មេញនីមួយៗ (ច្រាសដែលប្រើប្រាស់រួច) គឺផ្ទុកមេរោគរហូតដល់១០លានប្រភេទ ។ ដូច្នេះ លោកវេជ្ជបណ្ឌិត Upen Vithlani បានផ្តាំផ្ញើឱ្យសម្អាតវាឱ្យស្អាតបំផុត ដើម្បីថែរក្សាសុខភាពមាត់ធ្មេញ និងរាងកាយ ។

លោកវេជ្ជបណ្ឌិតបានណែនាំពីការប្រើប្រាស់ច្រាសដុសធ្មេញដូចខាងក្រោមនេះ ៖

-កុំទុកច្រាសដុសធ្មេញនៅក្បែរចានបង្គន់បើកគំរប ពីព្រោះអាចធ្វើឱ្យកំទេចលាមកនៅលាយឡំជាមួយច្រាសដុសធ្មេញ ហើយគួរទុកវានៅក្រៅបន្ទប់ទឹក
-ហាមធ្វើឱ្យច្រាសដុសធ្មេញជ្រុះលើឥដ្ឋ ពីព្រោះវានឹងលាយឡំជាមួយមេរោគ ឬកំទេចលាមកនៅលើឥដ្ឋ
-លាងសម្អាតច្រាសដុសធ្មេញដោយទឹកស្អាត និងជូតវាឱ្យស្អាតពេលប្រើប្រាស់រួច ហើយគួរគ្របគំរបឱ្យជិត ឬដាក់ក្នុងប្រអប់ជ័រ
-គួរផ្លាស់ប្តូរច្រាសដុសធ្មេញថ្មី ពេលប្រើប្រាស់ចាប់ពី៣ខែ ទៅ៤ខែ ដើម្បីកាត់បន្ថយការប្រមូលផ្តុំមេរោគ ។

សរុបមក បើទុកដាក់ច្រាសដុសធ្មេញនៅកន្លែងត្រឹមត្រូវ វាមិនត្រឹមតែមានអនាម័យប៉ុណ្ណោះទេ ប៉ុន្តែយើងនឹងចៀសផុតពីផលប៉ះពាល់សុខភាពផ្សេងៗដែលបណ្តាលមកពីទម្លាប់មិនល្អ ។ ក្រៅពីនេះ គួរតែជ្រើសរើសប្រភេទថ្នាំដុសធ្មេញផងដែរ ពីព្រោះថ្នាំដុសធ្មេញល្អ មិនត្រឹមតែមានក្លិនក្រអូបប៉ុណ្ណោះទេ ប៉ុន្តែវាផ្សំពីសារធាតុ Triclosan ដែលមានតួនាទីសំខាន់ក្នុងការសំអាតធ្មេញ ។

ចុងក្រោយ សូមកុំយកច្រាសដុសធ្មេញរបស់អ្នកដទៃមកប្រើប្រាស់ឱ្យសោះ បើទោះជាយើងស្និទ្ធស្នាលជាមួយគ្នាខ្លាំងក្តី ពីព្រោះវាជារបស់ប្រើប្រាស់ផ្ទាល់ខ្លួន ។ ការច្រឡំដៃយកច្រាសអ្នកដទៃមកដុសធ្មេញ វានឹងចម្លងមេរោគយ៉ាងច្រើនមកខ្លួនយើង ៕

មនុស្សគ្រប់រូប មិនថាប្រុស ឬស្រីនោះទេ សុទ្ធតែប្រាថ្នាចង់បានធ្មេញសភ្លឺថ្លា និងស្រស់ស្អាតជានិច្ច ដើម្បីបង្កើនសម្រស់របស់ខ្លួន។ ជាការពិតណាស់ កាលដែលមានធ្មេញលឿងគឺជាក្ដីកង្វល់របស់មនុស្សគ្រប់វ័យ ព្រោះពេលញញឹមទៅអាចធ្វើឱ្យបាត់បង់នូវភាពទាក់ទាញ និងទំនុកចិត្ត។ ដូច្នេះហើយអត្ថបទនេះនឹងនាំប្រិយមិត្តមកដឹងពីវិធីសាស្ត្រព្យាបាលធ្មេញឱ្យសស្អាត រឹងមាំ និងមានខ្យល់ដង្ហើមស្រស់ថ្លាដោយខ្លួនឯង៖

១.រមៀត៖ រមៀតមានសារធាតុ curcumin ដែលជាសមាសធាតុប្រឆាំងការរលាក ប្រឆាំងបាក់តេរី ក៏ដូចជាអាចជួយកាត់បន្ថយកំណក និងរលាកអញ្ចាញធ្មេញ។ លើសពីនេះវាក៏ជួយធ្វើឱ្យធ្មេញស មានប្រសិទ្ធភាពខ្ពស់ក្នុងការព្យាបាលបញ្ហាមាត់ធ្មេញ ដូចជាការពុកធ្មេញ និងក្លិនមាត់មិនល្អថែមទៀតផង។ ដូច្នេះអ្នកគ្រាន់តែលាយម្សៅរមៀតបន្តិចជាមួយទឹក ឬប្រេងដូង ដើម្បីបង្កើតជាម្សៅបិទភ្ជាប់ លាបល្បាយលើធ្មេញរបស់អ្នកជាមួយនឹងច្រាសដុសធ្មេញ ទុកចោលពីរបីនាទី រួចលាងទឹកចេញជាការស្រេច។

២.ផ្កាក្លាំពូ៖ ផ្កាក្លាំពូមានផ្ទុកសារធាតុ eugenol ដែលជាសារធាតុមាននៅក្នុងប្រេងផ្កាក្លាំពូ។ ប្រេងរបស់វាមានប្រសិទ្ធភាពប្រឆាំងនឹងបាក់តេរីដែលបណ្តាលឱ្យមានបន្ទះធ្មេញ និងក្លិនមាត់មិនល្អ។ ហេតុនេះអ្នកត្រូវកិនផ្កាក្លាំពូ ទៅជាម្សៅហើយលាយជាមួយប្រេងអូលីវបន្តិចដើម្បីបង្កើតជាម្សៅបិទភ្ជាប់។ ដុសធ្មេញរបស់អ្នកជាមួយនឹងល្បាយនេះ ឬគ្រាន់តែទំពារស្លឹករបស់វាពីរបីនាទីនោះធ្មេញរបស់អ្នកនឹងស មានខ្យល់ដង្ហើមស្រស់ថ្លា។ ការប្រើប្រាស់វាជាទៀងទាត់អាចជួយរក្សាអនាម័យមាត់ រួមចំណែកធ្វើឱ្យធ្មេញសក្នុងរយៈពេលខ្លី។

៣.ស្លឹកម្រះព្រៅ៖ យកស្លឹកម្រះព្រៅមួយបាច់ល្មមទៅហាលថ្ងៃឱ្យស្ងួត បន្ទាប់មកកិនឱ្យទៅជាម្សៅលាយជាមួយថ្នាំដុសធ្មេញដុសធម្មតា។ ម្រះព្រៅមានសមត្ថភាពពិសេសអាចកម្ចាត់ស្នាមលឿងធ្មេញដ៏ល្អ ហើយក៏អាចការពារជំងឺរាក់ស៊ីធ្មេញផងដែរ។

៤.អំបិល៖ អ្នកអាចយកអំបិលចំនួនមួយស្លាបព្រាតូច លាយជាមួយទឹកក្រូចឆ្មារ រួចដាក់ថ្នាំដុសធ្មេញដែលមានពណ៌សបន្តិចចូលហើយលាយវាបញ្ជូលគ្នា បន្ទាប់មកអ្នកអាចយកម្រាមដៃបៀក រួចយកមកត្រដុសលើធ្មេញ នោះវានឹងអាចសបាន។ អ្នកអាចធ្វើបែបនេះចំនួនម្តងក្នុងមួយអាទិត្យបាន នោះអ្នកនឹងអាចឃើញលទ្ធផលដ៏ល្អបំផុត៕

ការថែទាំរាងកាយឱ្យមានក្លិនក្រអូបពេញមួយថ្ងៃបានជួយបង្កើនទំនុកចិត្តនៅគ្រប់ទីកន្លែង មិនថាកន្លែងធ្វើការ ឬទីសាធារណៈ ។ នារីៗភាគច្រើនបានប្រើប្រាស់ទឹកអប់ ឬទឹកក្រអូបបាញ់ខ្លួនដើម្បីបំបាត់ក្លិនមិនល្អ ប៉ុន្តែការបរិភោគបន្លែ និងផ្លែឈើមួយចំនួន ក៏អាចជួយកាត់បន្ថយក្លិនខ្លួនបានដែរ ពីព្រោះសារធាតុចិញ្ចឹមក្នុងបន្លែ ផ្លែឈើ នឹងជួយបណ្តេញជាតិពុល ។

គួរតែបរិភោគបន្លែ និងផ្លែឈើខាងក្រោមនេះដើម្បីកាត់បន្ថយក្លិនខ្លួន ជាពិសស នារីៗ ៖

១-យ៉ាអ៊ួ ៖ យ៉ាអ៊ួមានបាក់តេរីល្អឈ្មោះ ប្រូបាយអូទិក ដែលជួយឱ្យប្រព័ន្ធរំលាយអាហារមានតុល្យភាព និងកាត់បន្ថយក្លិនមិនល្អចេញពីរាងកាយ ។ ការបរិភោគយ៉ាអ៊ួញឹកញាប់ជួយឱ្យបត់ជើងស្រួល, កាត់បន្ថយការប្រមូលផ្តុំកាកសំណល់បណ្តាលឱ្យមានក្លិនមិនល្អ និងបំបាត់ក្លិនមាត់ ។

២-ខ្ញី ៖ ខ្ចីមានសារធាតុប្រឆាំងមេរោគ, កម្ចាត់ក្លិនមិនល្អក្នុងរាងកាយ, ជួយរំលាយអាហារ និងលាងជាតិពុល ហើយការបរិភោគខ្ញីអាចជួយឱ្យក្លិនខ្លួនក្រអូបពេញមួយថ្ងៃ ។ គួរសាកល្បងផឹកទឹកខ្ញី ឬយកខ្ញីមកដាក់ក្នុងអាហារ ដូចជា ៖ ទឹកស៊ុប ឬអាហារប្រភេទឆា ដើម្បីកាត់បន្ថយក្លិនមិនល្អ ។

៣-ក្រូចឆ្មារ ៖ ក្រូចឆ្មារមានវីតាមីន C និងអាស៊ីតអាចជួយបណ្តេញជាតិពុលក្នុងខ្លួន, កម្ចាត់ក្លិនញើស និងកាត់បន្ថយការប្រមូលផ្តុំបាក់តេរីដែលជាមូលហេតុកើតក្លិនមិនល្អ ។ ការផឹកទឹកក្រូចឆ្មារស្រស់ៗ ឬផឹកក្រូចឆ្មារលាយទឹកក្តៅឧណ្ឌៗនៅពេលព្រឹក នឹងធ្វើឱ្យរាងកាយក្រអូបតាមធម្មជាតិ ។

៤-ស្លឹកជីអង្កាម ៖ ស្លឹកជីអង្កាមមានក្លិនខ្លាំង ហើយផ្នែកខាងក្នុងមានប្រេងក្រអូបតាមធម្មជាតិ ។ វាអាចកាត់បន្ថយការប្រមូលផ្តុំបាក់តេរីដែលបណ្តាលឱ្យមានក្លិនមិនល្អ ហើយក្លិនរបស់វានឹងបង្កើនអារម្មណ៍ស្រស់ថ្លា ។ គួរបរិភោគស្លឹកជីអង្កាមស្រស់ៗ ឬផឹកតែជីអង្កាម ឬដាក់វាក្នុងទឹកធម្មតា ដើម្បីឱ្យក្លិនខ្លួនក្រអូបពេញមួយថ្ងៃ ។

៥-ផ្លែក្រូច ៖ ផ្លែក្រូចសម្បូរវីតាមីន C ជួយបណ្តេញជាតិពុល, ប្រឆាំងមេរោគ ហើយថែមទាំងមានអាស៊ីតជួយដល់ការរំលាយអាហារបានល្អ ។ ការបរិភោគក្រូចញឹកញាប់បង្កើនក្លិនក្រអូបរបស់រាងកាយ និងកាត់បន្ថយក្លិនមិនល្អ ។

៦-ផ្លែប៉ោម ៖ ផ្លែប៉ោមមានជាតិសរសៃ និងសារធាតុប្រឆាំងអុកស៊ីតកម្ម ដែលអាចកាត់បន្ថយការប្រមូលផ្តុំជាតិពុលក្នុងប្រព័ន្ធរំលាយអាហារ, រាងកាយក្រអូបតាមធម្មជាតិ និងគ្រប់គ្រងកម្រិតជាតិស្ករក្នុងឈាម ។ ហេតុនេះ គួរបរិភោគផ្លែប៉ោមរាល់ថ្ងៃដើម្បីឱ្យស្បែកភ្លឺថ្លា ។

៧-ស្លឹកគ្រៃ និងស្លឹកតើយ ៖ ស្លឹកគ្រៃ និងស្លឹកតើយ ក៏អាចបំបាត់ក្លិនខ្លួនបានដែរ ពីព្រោះស្លឹកគ្រៃមានសារធាតុប្រឆាំងបាក់តេរី និងបណ្តេញជាតិពុល ខណៈស្លឹកតើយមានក្លិបក្រអូបស្រាលពីធម្មជាតិ ។ យើងអាចយកស្លឹកគ្រៃ ឬស្លឹកតើយ មកដាំទឹកផឹកដើម្បីឱ្យក្លិនខ្លួនក្រអូប ដោយពុំចាំបាច់ប្រើទឹកអប់ ។ ក្រៅពីនេះ អាចយកវាទៅដាក់ក្នុងអាហារបានដូចគ្នា ។

ក្រៅពីការបរិភោគបន្លែ និងផ្លែឈើទាំងនេះហើយ យើងគួរផឹកទឹកឱ្យបានគ្រប់គ្រាន់ គឺចាប់ពី៨កែវ ទៅ១០កែវក្នុង១ថ្ងៃ ពីព្រោះវាអាចបណ្តេញជាតិពុល និងបាក់តេរីពីរាងកាយ ។ ម្យ៉ាងទៀត គួរជ្រើសរើសសម្លៀកបំពាក់ណាមានខ្យល់ចេញ-ចូលល្អ និងសម្អាតខ្លួនជានិច្ច ៕