សហរដ្ឋអាមេរិក ៖ តាំងពីលោក Donald Trump បានឡើងកាន់តំណែងជាប្រធានាធិបតីអាមេរិក លោកចាប់ផ្តើមបញ្ជូនជនអន្តោប្រវេសន៍ខុសច្បាប់ត្រឡប់ទៅប្រទេសកំណើតវិញជាបន្តបន្ទាប់ ។ ប៉ុន្តែពេលអាមេរិកបញ្ជូនជនអន្តោប្រវេសន៍កូឡុំប៊ីទៅប្រទេសវិញដោយដឹកតាមយន្តហោះ២គ្រឿង ខាងអាកាសយានដ្ឋានកូឡុំប៊ី បែរជាពុំអនុញ្ញាតឱ្យយន្តហោះអាមេរិកចុះចត ។

កាលពីថ្ងៃទី២៦ ខែមករា ឆ្នាំ២០២៥ ប្រធានាធិបតីអាមេរិក លោក Donald Trump បានចេញបទបញ្ជាឱ្យមន្ត្រីរដ្ឋាភិបាលរបស់លោក ដំឡើងពន្ធទំនិញនាំចូលពីប្រទេសកូឡុំប៊ី ស្មើនឹង២៥% ដើម្បីឆ្លើយតបនឹងកូឡុំប៊ី ដែលពុំព្រមទទួលយកពលរដ្ឋរបស់ខ្លួន ។ លោក Trump បានបង្ហោះក្នុងបណ្តាញសង្គមឈ្មោះ Truth Social ថា លោកបានដំឡើងពន្ធទំនិញកូឡុំប៊ីគ្រប់ប្រភេទ ស្មើ២៥% ហើយវានឹងកើនឡើងរហូតដល់៥០% ត្រឹមតែ១សប្តាហ៍ ។

នេះជាការអនុវត្តវិធានការឆ្លើយតបលើកដំបូងរបស់លោក Trump ចំពោះប្រទេសផ្សេងៗ ដែលរារាំងផែនការបណ្តេញជនអន្តោប្រវេសន៍ខុសច្បាប់របស់លោក ។ យន្តហោះអាមេរិក ចំនួន២គ្រឿង ដែលដឹកជនអន្តោប្រវេសន៍កូឡុំប៊ីត្រឡប់ទៅប្រទេសកំណើត បែរជាធ្វើដំណើរត្រឡប់មកអាមេរិកវិញ កាលពីយប់ថ្ងៃទី២៦ ខែមករា កន្លងមក ដោយសារប្រធានាធិបតីកូឡុំប៊ី លោក Gustavo Petro ពុំអនុញ្ញាតឱ្យយន្តហោះអាមេរិចុះចតនៅអាកាសយានដ្ឋាន ។

លោក Petro បានថ្លែងកាលពីថ្ងៃទី២៦ ខែមករា កន្លងមកថា លោកបញ្ជាទៅខាងអាកាសយានដ្ឋាន កុំឱ្យយន្តហោះអាមេរិកដឹកពលរដ្ឋកូឡុំប៊ីចុះចត ។ អាមេរិកពុំអាចធ្វើបែបនេះដាក់ពលរដ្ឋកូឡុំប៊ីដូចឧក្រិដ្ឋជនទេ ។

កន្លងមក លោក Trump បានថ្កោលទោសចំពោះបទបញ្ជារបស់លោក Petro ថា គឺជាការគំរាមកំហែងសន្តិសុខ និងសុវត្ថិភាពសាធារណៈរបស់អាមេរិក ហើយលោកចោទប្រកាន់ថា ការបដិសេធពុំទទួលយកជនអន្តោប្រវេសន៍នេះ គឺល្មើសនឹងកតិកាសញ្ញាអន្តរជាតិក្នុងការទទួលយកជនអន្តោប្រវេសន៍ខុសច្បាប់ដែលអាមេរិកបណ្តេញចេញ ៕

តើលោកអ្នកធ្លាប់ឆ្ងល់ទេថា ហេតុអ្វីកប៉ាល់ទេសចរណ៍ភាគច្រើនតែងតែលាបថ្នាំពណ៌ស? បើទោះជាកប៉ាល់ទេសចរណ៍ខ្លះលាបពណ៌ចម្រុះគ្នាដើម្បីឱ្យមើលទៅទាក់ទាញភ្នែកក្តី ប៉ុន្តែកប៉ាល់ភាគច្រើនបានជ្រើសរើសពណ៌ស ដ៏សាមញ្ញបំផុត ។ វាមិនមែនមកពីក្រុមហ៊ុនទេសចរណ៍ជ្រើសរើសពណ៌ខុសទេ ប៉ុន្តែមានមូលហេតុជាច្រើនដែលធ្វើឱ្យក្រុមហ៊ុនជ្រើសរើសពណ៌នេះ ។

ខាងក្រោមនេះគឺជាមូលហេតុដែលធ្វើឱ្យកប៉ាល់ទេសចរណ៍ភាគច្រើនជ្រើសរើសពណ៌ស រួមមាន ៖

១-ផ្នែកអាជីវកម្ម ៖ ការប្រើប្រាស់ពណ៌ស គឺតំណាងឱ្យភាពបរិសុទ្ធ និងស្អាតស្អំ ហើយពណ៌ស នឹងជួយឱ្យភ្ញៀវទេសចរដែលធ្វើដំណើរតាមកប៉ាល់ទទួលបានបទពិសោធន៍ដូចគ្នា បើទោះជាមតិខ្លះយល់ថា ពណ៌ស សាមញ្ញក្តី ។ ប៉ុន្តែវាជាណ៌ផ្តល់នូវអារម្មណ៍រីករាយ និងស្រស់ថ្លា ទើបគេចាត់ទុកថា ពណ៌ស មានសុវត្ថិភាពជាងពណ៌ផ្សេង ។ ក្រៅពីនេះ វាដូចគ្នានឹងផ្ទាំងក្រណាត់សម្រាប់ឱ្យក្រុមហ៊ុនទេសចរណ៍បង្ហាញឈ្មោះ និងឡូហ្គូក្រុមហ៊ុនកាន់តែច្បាស់ ។

២-សន្សំសំចៃថាមពល ៖ បើតាមផ្នែកវិទ្យាសាស្ត្រ គឺពណ៌ស ពុំស្រូបកំដៅថ្ងៃដូចពណ៌ខ្មៅទេ ទើបក្រុមហ៊ុនទេសចរណ៍នានាជ្រើសរើសថ្នាំពណ៌ស មកលាបកប៉ាល់ ។ វានឹងជួយរក្សាសីតុណ្ហភាពឱ្យធ្លាក់ចុះ ព្រមទាំងកាត់បន្ថយការប្រើប្រាស់ថាមពលក្នុងប្រព័ន្ធម៉ាស៊ីនត្រជាក់ ។

៣-ការមើលឃើញ ៖ ក្រុមហ៊ុនទេសចរណ៍ជ្រើសរើសពណ៌ស លាបកប៉ាល់ ដើម្បីឱ្យគេមើលឃើញវាពីទីឆ្ងាយ និងកន្លែងងងឹត ដើម្បីកាត់បន្ថយគ្រោះថ្នាក់ដោយសារកប៉ាល់បុកគ្នានៅសមុទ្រ ។ ម្យ៉ាងទៀត ការលាបកប៉ាល់ពណ៌ស គឺកុំឱ្យវាដូចគ្នាជាមួយពណ៌ខៀវរបស់ទឹកសមុទ្រ ហើយពេលវាត្រូវពន្លឺថ្ងៃ ពណ៌សនឹងធ្វើឱ្យយើងកាន់តែមើលឃើញកប៉ាល់ច្បាស់ ទោះបីវាស្ថិតក្នុងអាកាសធាតុពុំល្អក្តី ។

៤-ងាយស្រួលលាបពណ៌បន្ថែមទៀតនៅចំណុចរបកថ្នាំ ៖ គុណសម្បត្តិនៃការលាបកប៉ាល់ពណ៌ស គឺងាយស្រួលលាបពណ៌កប៉ាល់បន្ថែមទៀតនៅចំណុចរបកថ្នាំ ។ វាពុំពិបាកដូចពណ៌ផ្សេង ដូចជា ៖ បើយើងលាបកប៉ាល់ពណ៌ឈូក ហើយពេលពណ៌ឈូកស្លេក ឬរបកថ្នាំនៅចំណុចណាមួយ គឺត្រូវតែរកថ្នាំលាបណាដែលមានពណ៌ឈូក ឱ្យត្រូវគ្នាជាមួយពណ៌កប៉ាល់ ។

ផ្ទុយទៅវិញ ការលាបកប៉ាល់ពណ៌ស គឺពុំពិបាករើសប្រភេទថ្នាំលាបច្រើន ។ ហេតុនេះ ពណ៌របស់កប៉ាល់ភាគច្រើនពុំត្រឹមតែផ្តោតលើសោភ័ណភាពប៉ុណ្ណោះទេ ប៉ុន្តែគេក៏ត្រូវគិតពីកត្តាផ្សេងៗផងដែរ ៕

ប្រទេសចិន៖ ក្នុងរយៈពេល ១២ ឆ្នាំកន្លងមកនេះប្រទេសចិននៅតែបន្តរក្សាជំហររបស់ខ្លួនជាទីផ្សារលក់ទំនិញតាមអនឡាញធំបំផុតរបស់ពិភពលោក ជាមួយនឹងការលក់រាយតាមអ៊ីនធឺណិតឈានដល់ ១៥,៥០០ ពាន់លានយន់ (ប្រមាណ ២.១៦ ពាន់ពាន់លានដុល្លារ) ក្នុងឆ្នាំ ២០២៤ ខណៈប្រទេសដទៃទៀតមិនមានទីផ្សារអនឡាញជោគជ័យដូចប្រទេសចិននោះទេ។

នេះបើយោងតាមការចុះផ្សាយរបស់ China Daily ប្រទេសចិនគឺជាទីផ្សារលក់រាយតាមអ៊ីនធឺណិតដ៏ធំបំផុតរបស់ពិភពលោកក្នុងរយៈពេល ១២ ឆ្នាំជាប់ៗគ្នា ដោយមិនមានប្រទេសណាអាចប្រកួតប្រជែងបានឡើយ។ នេះបញ្ជាក់ថាអីវ៉ាន់ ឬទំនិញក្នុងប្រទេសចិនគឺមានគុណភាពល្អ និងតម្លៃសមរម្យ អាចបំពេញតម្រូវការរបស់មនុស្សភាគច្រើន។

ជាការពិតណាស់មិនថាប្រទេសកម្ពុជាយើង ឬបណ្តាប្រទេសជុំវិញពិភពលោកនោះទេ ពួកគេសុទ្ធតែចូលចិត្តទិញអីវ៉ាន់ ឬទំនិញនៅក្នុង App របស់ចិន ដែលមានដូចជា Alibaba ឬ Taobao ជាដើម ខណៈផលិតផលនៅទីនោះគឺមានសុវត្ថិភាព មិនមានការបោកប្រាស់ឡើយ ជាហេតុធ្វើឱ្យទីផ្សារអនឡាញរបស់ចិនមានភាពល្បីល្បាញ និងកាន់កាប់តំណែងនេះរហូតមកដល់បច្ចុប្បន្ន។

យោងតាមអនុរដ្ឋមន្ត្រីក្រសួងពាណិជ្ជកម្មលោក Sheng Qiuping បាននិយាយថា ឧស្សាហកម្មលក់ដុំ និងរាយរបស់ប្រទេសចិនគឺមានការរីកចម្រើនជាលំដាប់ ដោយសារគោលនយោបាយផ្សេងៗ ផ្តល់ការគាំទ្រយ៉ាងរឹងមាំសម្រាប់ការពង្រីកតម្រូវការក្នុងស្រុក និងបង្កើតគំរូអភិវឌ្ឍន៍ថ្មីៗ។

លោក Sheng បានបន្តទៀតថា តម្លៃបន្ថែមនៃឧស្សាហកម្មលក់ដុំ និងរាយបានកើនឡើងដល់ ១៣,៨០០ ពាន់លានយន់ដែលស្មើនឹង ១០.២% នៃផលិតផលក្នុងស្រុកសរុប ក៏ដូចជាបានដើរតួនាទីយ៉ាងសំខាន់ក្នុងការធ្វើឱ្យដំណើរការចរាចររលូន រួមទាំងបង្កើតការងារ និងកាត់បន្ថយថ្លៃដឹកជញ្ជូនផងដែរ។ ដូច្នេះក្រសួងនឹងបន្តពង្រឹងគោលនយោបាយគាំទ្រទាំងនេះ ដើម្បីអនុវត្តវិធានការលម្អិត និងពន្លឿនការលើកកម្ពស់ការអភិវឌ្ឍន៍គុណភាពខ្ពស់នៃឧស្សាហកម្មលក់ដុំ និងរាយ ក្នុងគោលបំណងគាំទ្រដល់ដំណើរការចរាចរនៃសេដ្ឋកិច្ចជាតិ៕

សហរដ្ឋអាមេរិក ៖ កាលពីថ្ងៃទី២៦ ខែមករា ឆ្នាំ២០២៥ សារព័ត៌មាន AFP រាយការណ៍ថា រដ្ឋាភិបាលប្រេស៊ីលបង្ហាញការមិនពេញចិត្តយ៉ាងខ្លាំងចំពោះអាជ្ញាធរអាមេរិក ដែលបញ្ជូនពលរដ្ឋប្រេស៊ីលរស់នៅអាមេរិកខុសច្បាប់ត្រឡប់មកប្រទេសវិញ តាមយន្តហោះគ្មានម៉ាស៊ីនត្រជាក់ និងដាក់ខ្នោះ ដៃជើង។ លើសពីនេះ ពលរដ្ឋប្រេស៊ីលដែលអាមេរិកបញ្ជូនមកវិញ គឺពុំអនុញ្ញាតឱ្យផឹកទឹក ឬចូលបន្ទប់ទឹកលើយន្តហោះទេ ។

រដ្ឋាភិបាលប្រេស៊ីលហៅទង្វើនេះថា ជាការរំលោភសិទ្ធិជនអន្តោប្រវេសន៍ ដែលអាមេរិកបានបណ្តេញចេញពីទឹកដីរបស់ខ្លួន ។ ជាមួយគ្នានេះ ក៏មានសេចក្តីរាយការណ៍ថា ក្រោយពីយន្តហោះអាមេរិកចុះចតនៅអាកាសយានដ្ឋានទីក្រុង Manaus ខេត្ត Amazonas ស្ថិតនៅភាគខាងជើងប្រទេសប្រេស៊ីស អាជ្ញាធរប្រេស៊ីលបានប្រាប់ឱ្យអាជ្ញាធរអាមេរិកដោះខ្នោះដៃចេញពីពលរដ្ឋប្រេស៊ីលជាបន្ទាន់ ។

លោក Ricardo Lewandowski រដ្ឋមន្ត្រីក្រសួងយុត្តិធម៌ប្រេស៊ីល បានជូនដំណឹងទៅប្រធានាធិបតីប្រេស៊ីល លោក Luiz Inácio Lula da Silva អំពីការល្មើសសិទ្ធិពលរដ្ឋប្រេស៊ីល ។ រីឯក្រសួងការបរទេសប្រេស៊ីលបានអំពាវនាវឱ្យមានការបកស្រាយពីអាមេរិកថា ហេតុអ្វីធ្វើបែបនេះដាក់ពលរដ្ឋប្រេស៊ីល ចំនួន៨៨នាក់ ដែលអាមេរិកបញ្ជូនពួកគេត្រឡប់មកប្រទេសវិញ កាលពីថ្ងៃទី២៤ ខែមករា កន្លងមក ។

លោក Edgar da Silva Moura អាយុ៣១ឆ្នាំ អ្នកជំនាញបច្ចេកទេសកុំព្យូទ័រ គឺជាជនអន្តោប្រវេសន៍ម្នាក់ដែលត្រូវបានឃុំខ្លួននៅអាមេរិកជាង៧ខែ មុនពេលអាមេរិកបញ្ជូនមកប្រទេសវិញ និយាយថា ៖ «ពួកគេមិនឱ្យយើងផឹកទឹកលើយន្តហោះទេ យើងត្រូវដាក់ខ្នោះដៃជើង ហើយពួកគេហាមឃាត់យើងចូលបន្ទប់ទឹក ។ អាកាសធាតុក្តៅខ្លាំងណាស់ រហូតដល់អ្នកខ្លះខ្យល់គរ» ។

ជនអន្តោប្រវេសន៍ប្រេស៊ីលម្នាក់ទៀត គឺលោក Luis Antonio Rodriguez Santos អាយុ២១ឆ្នាំ អ្នកនិពន្ធឯករាជ្យ បានរៀបរាប់ពីហេតុការណ៍ដូចសុបិនអាក្រក់ថា ៖ «រយៈពេល៤ម៉ោងលើយន្តហោះ ពួកគេពុំបើកម៉ាស៊ីនត្រជាក់ទេ ដោយសារមានបញ្ហាបច្ចេកទេស ។ អ្វីគ្រប់យ៉ាងផ្លាស់ប្តូរអស់ហើយពេលលោក Donald Trump ត្រឡប់មកកាន់តំណែងប្រធានាធិបតីអាមេរិក ពួកគេធ្វើដាក់ជនអន្តោប្រវេសន៍ដូចឧក្រិដ្ឋជន» ។

គួរបញ្ជាក់ថា លោក Donald Trump បានសន្យាពេលរកសំឡេងឆ្នោតថា លោកនឹងបណ្តេញជនអន្តោប្រវេសន៍ខុសច្បាប់ចេញពីទឹកដីអាមេរិកឱ្យអស់បើលោកជាប់ឆ្នោតក្លាយជាប្រធានាធិបតី ពីព្រោះលោកយល់ថា អធិបតេយ្យភាពអាមេរិកកំពុងរងការវាយប្រហារពីជនអន្តោវេសន៍ខុសច្បាប់ ៕

ក្រុមអ្នកជំនាញសរសៃប្រសាទបានរកឃើញទិន្នន័យដែលអាចជួយឱ្យយើងដឹងពីនាទីចុងក្រោយមុនពេលលាចាកលោករបស់មនុស្សថា តើមានអ្វីកើតឡើងក្នុងខួរក្បាលរបស់មនុស្សជិតស្លា.ប់? កាលពីឆ្នាំ២០២២ គេហទំព័រ Frontiers in Aging Neuroscience បានផ្សព្វផ្សាយពីលទ្ធផលការស្រាវជ្រាវមួយថា រលកខួរក្បាលរបស់មនុស្សទើបតែស្លា.ប់ នៅតែដំណើរការ ។ រីឯមនុស្សភាគច្រើនជឿថា មនុស្សស្លា.ប់ ថ្មីៗ ខួរក្បាលនឹងលែងដំណើរការ គឺពុំពិតឡើយ ។

ក្រុមអ្នកជំនាញសរសៃប្រសាទនៅសាកលវិទ្យាល័យ Tartu ប្រទេសអេស្តូនី បានស្រាវជ្រាវស៊ីជម្រៅពីខួរក្បាលរបស់អ្នកជំងឺឆ្កួតជ្រូកម្នាក់ ដោយពួកគេប្រើប្រាស់ឧបករណ៍ត្រួតពិនិត្យរលកខួរក្បាល ព្រមទាំងព្យាយាមត្រួតពិនិត្យសញ្ញាប្រកាច់របស់អ្នកជំងឺ ។ បើទោះជាទទួលការព្យាបាលយ៉ាងដិតដល់ក្តី ប៉ុន្តែអ្នកជំងឺរូបនេះបានស្លាប់បាត់បង់ជីវិតដោយសារគាំងបេះដូង ។

ពួកគេនៅតែត្រួតពិនិត្យខួរក្បាលរបស់អ្នកជំងឺបន្តទៀត ដែលជាការស្រាវជ្រាវលើកដំបូង ។ អ្នកស្រាវជ្រាវនិយាយថា យើងបានវាស់សកម្មភាពខួរក្បាល ចំនួន៩០០វិនាទី ពេលអ្នកជំងឺជិតផុតដង្ហើម ហើយយើងកំណត់គោលដៅថា តើមានអ្វីកើតឡើងក្នុងរយៈពេល ៣០វិនាទីមុន និងក្រោយពេលបេះដូងឈប់លោត ។

លទ្ធផលការស្រាវជ្រាវបង្ហាញថា រយៈពេលមុន និងក្រោយពេលបេះដូងឈប់លោត គឺរលកខួរក្បាលផ្លាស់ប្តូរ ហើយរលកខួរក្បាលរបស់អ្នកជំងឺដែលទើបផុតដង្ហើម មានលក្ខណៈស្រដៀងគ្នានឹងរលកខួរក្បាលដែលកើតឡើងពេលយើងដេកសុបិន គិតពីការចងចាំរឿងរ៉ាវអតីតកាល ឬដូចអង្គុយសមាធិ ។ ពេលជិតផុតដង្ហើម អ្នកជំងឺធ្ងន់តែងតែនឹកឃើញដល់ជីវិតកាលពីអតីតកាល ។

រលកខួរក្បាលពាក់ព័ន្ធនឹងការរំលឹកឡើងវិញនូវការចងចាំពីអតីតកាល គឺអាចធ្វើឱ្យខួរក្បាលគិតដល់ហេតុការណ៍សំខាន់ៗក្នុងជីវិតជាលើកចុងក្រោយ ។ អ្វីដែលយើងអាចរៀនសូត្រពីការស្រាវជ្រាវនេះ គឺបើទោះជាមនុស្សជាទីស្រឡាញ់របស់យើងបិទភ្នែក និងត្រៀមលាចាកលោក ជារៀងរហូតគ្មានថ្ងៃវិលត្រឡប់ ប៉ុន្តែខួរក្បាលរបស់ពួកគេអាចកំពុងគិតពីរឿងរ៉ាវល្អៗក្នុងជីវិតម្តងហើយម្តងទៀត ៕