ជឿជាក់ថាអ្នកទាំងអស់ប្រាកដជាបានជ្រាបហើយ លោកអ៊ុក វណ្ណដេ ស្ថានិកសាលាដូងលើភ្នំគិរីរម្យ ដែលបានធ្វើយុទ្ធនាការណ៍ទេសចរណ៍អំណានកាលពីឆ្នាំ២០២៤ ខណៈក៏ទទួលបានភាពជោគជ័យបន្តក្នុងឆ្នាំ២០២៥នេះទៀត។

កម្មវិធីទេសចរណ៍អំណាន ឬបណ្ណាល័យចល័ត ដែលបានធ្វើឡើងតាមរយៈរថយន្តចល័តតូចមួយ ដែលមានផ្ទុកសៀវភៅជាង ២០០០ ក្បាល ធ្វើដំណើរឆ្ពោះទៅកាន់បណ្តាខេត្តក្រុងនានា ក្រោមឆន្ទៈដ៏មុះមាត់របស់លោក អ៊ុក វណ្ណដេ លើកកម្ពស់ការអាននៅកម្ពុជា។

បណ្ណាល័យចល័តនេះគឺបានរំលេចចេញនូវភាពទាក់ទាញ ជាមួយនឹងរថយន្តកែច្នៃពណ៌ទឹកក្រូចមួយគ្រឿង ហើយក៏បានរៀបចំនូវកន្លែងអង្គុយ ព្រមជាមួយនឹងសៀវភៅចម្រុះយ៉ាងច្រើនសម្បូរបែប អានដោយឥតគិតថ្លៃ។ តាមរយៈគំនិតផ្តួចផ្តើមរបស់លោកអ៊ុក វណ្ណដេ គឺពិតជាជួយលើកទឹកចិត្តដល់សិស្សានុសិស្សនិងសាធារណជន ទំនេរពីការសិក្សាឬការងារ បានមកក្រេបយកចំណេះដឹងថ្មីៗពីសៀវភៅ និងរីករាយជាមួយនឹងបរិយាកាសស្ងប់ស្ងាត់ខាងក្រៅ។ បន្ថែមពីនេះ ដោយសង្កេតឃើញថា ក៏មានការបរិច្ចាគសៀវភៅពីសប្បុរសជននានាជាហូរហែរ ជូនចំពោះអ្នកអាននៅកម្ពុជា តាមរយៈកម្មវិធីនេះផងដែរ។

សូមជម្រាបថា កាលពីឆ្នាំ ២០២៤ បេសកម្មទេសចរណ៍អំណានលើកទី ១ ដែលធ្វើឡើងត្រឹមតែ ៣ ខេត្តក្រុងប៉ុណ្ណោះ គឺរាជធានីភ្នំពេញ កំពត និងកែប ហាក់ទទួលបានជោគជ័យ ដោយសង្កេតឃើញថាប្រជាពលរដ្ឋខ្មែរជាច្រើនបានងាកមកចាប់អារម្មណ៍នឹងការអានសៀវភៅកាន់តែច្រើន។

យ៉ាងណា នៅដើមឆ្នាំ ២០២៥នេះ ទេសចរណ៍អំណានបានបង្ហាញខ្លួនសារជាថ្មី ដោយផ្តើមចេញពីខេត្តព្រះសីហនុរយៈពេល ១២ ថ្ងៃ ចន្លោះថ្ងៃទី ៧-១៨ ខែមករា។ ហើយនៅថ្ងៃទី ១៩-២៨ ក៏បានមកដល់លើទឹកដីនៃខេត្តកំពត ហើយក៏នឹងចាកចេញពីខេត្តកំពត ឆ្ពោះទៅកាន់ខេត្តផ្សេងៗជាបន្តបន្ទាប់ទៀត៕

ជាលើកទីមួយហើយ ដែលប្រទេសកាហ្សាក់ស្ថានបានជ្រើសរើសខេត្តសៀមរាបនៃប្រទេសកម្ពុជា ជាទីតំាងសម្តែងក្នុងខ្សែភាពយន្តខ្នាតធំមួយ ក្រោមចំណងជើងថា “Kazakh Vibe” របស់ផលិតកម្ម Daubay។

ភាពយន្តមួយនេះផងដែរ ត្រូវបានគេឲ្យដឹងថានិយាយជាភាសារុស្សី ដែលប្លង់ថតក៏ដូចជាសាច់រឿងសម្តែងគឺប្រព្រឹត្តិទៅលើខេត្តសៀមរាប បរិវេនក្រុងអង្គរ ជាពិសេសនោះគឺប្រាសាទអង្គរវត្តខ្មែរ ខ្លោងទ្វារអង្គរធំ ម្តុំ Pup Street ជាដើម សុទ្ធតែបានបង្ហាញវត្តមានក្នុងភាពយន្តដ៏ធំមួយនេះ។ បន្ថែមពីនេះ វប្បធម៌ខ្មែរជាច្រើន រួមមានទាំងសិល្បៈភ្លេងបុរាណ សាសនា ប្រពៃណី ទំនៀមទម្លាប់ខ្មែរ ក៏បានរំលេចមកជាមួយក្នុងរឿងនេះផងដែរ។ បើក្រឡេកទៅកាន់តួសម្តែងនិងក្រុមការងារវិញ ទឹកមុខប្រកបដោយស្នាមញញឹមនិងសប្បាយរីករាយលើទឹកដីអច្ឆរិយនេះណាស់។

ថ្មីៗនេះ ប្រភពក្រសួងទេសចរណ៍បានគូសបញ្ជាក់ថា ក្រុមការងារផលិតខ្សែភាពយន្តកាហ្សាក់ស្ថានកំពុងផ្តិតយកសម្រស់ដ៏អស្ចារ្យនៃខេត្តសៀមរាប ដើម្បីផលិតខ្សែភាពយន្តលក្ខណៈពិសេសរបស់ Kazakh Vibe , បន្ទាប់ពីបានទទួលការស្វាគមន៍ដ៏កក់ក្តៅពីសំណាក់ឯកឧត្តមរដ្ឋមន្ត្រីទេសចរណ៍ កាលពីថ្ងៃទី១០ ខែមករា ឆ្នាំ២០២៥។

គម្រោងភាពយន្តនេះកំពុងបង្ហាញពីសោភ័ណភាពដ៏អស្ចារ្យនៃប្រទេសកម្ពុជា តាមរយៈការនិទានរឿងបង្កប់ដោយអត្ថន័យយ៉ាងស៊ីជម្រៅ។ ខ្សែភាពយន្តនេះ គឺបាន ផ្សព្វផ្សាយអំពីប្រទេសកម្ពុជា ជាពិសេសសៀមរាប-អង្គរ ជាទីកន្លែងមួយដែលភ្ញៀវទេសចរមកពីកាហ្សាក់ស្ថាន ប្រទេសនិយាយភាសារុស្សី និងប្រទេសជិតខាង អញ្ជើញមកទស្សនា ដោយមានជើងហោះហើរថ្មីដោយផ្ទាល់ពីកាហ្សាក់ស្ថានមកកាន់កម្ពុជា៕

កាលពីថ្ងៃទី ២១ ខែមករា ឆ្នាំ ២០២៥ សារព័ត៌មានអាមេរិក CNN Science គឺបានចុះផ្សាយអំពីឧទ្យានជាតិវីរៈជ័យ ស្ថិតនៅភាគឦសាន្តនៃប្រទេសកម្ពុជា ដែលសម្បូរដោយធនធានចម្រុះយ៉ាងសម្បូរបែប និងសត្វកម្រៗជាច្រើនប្រភេទ។

ឧទ្យានជាតិវីរៈជ័យ ដែលលាតសន្ធឹងនៅលើផ្ទៃដីជាង ៣០០០ គីឡូម៉ែត្រការ៉េ ស្ថិតនៅក្នុងស្រុកតាវែង និងស្រុកវើនសៃ ខេត្តរតនគិរី ហើយបន្តភ្ជាប់នៅដល់ស្រុកសៀមប៉ាង ខេត្តស្ទឹងត្រែង។ ឧទ្យាននេះ គឺឧទ្យានដ៏ធំជាងគេនៅក្នុងព្រះរាជាណាចក្រកម្ពុជា ហើយក៏ធំជាងនៅទូទាំងតំបន់រួមទាំងប្រទេសឡាវ និងវៀតណាមទៀតផង ដែលត្រូវបានគេរាប់បញ្ចូលថា ជាតំបន់អភិរក្សធំជាងគេនៅទ្វីបអាស៊ី។

អ្នកជំនាញសត្វព្រៃ លោក Pablo Sinovas បានចែករំលែកថា ឧទ្យានជាតិវីរៈជ័យ បើទោះបីជារាប់បញ្ចូលជាតំបន់ការពារក៏ដោយ តែក៏នូវតែមិនទាន់ទទួលបានសិក្សាស្រាវជ្រាវឲ្យបានលម្អិតនៅឡើយទេ។ យ៉ាងណា ភាពលេចធ្លោនៃឧទ្យានមួយនេះ ដែលធ្វើឲ្យពិភពលោកចាប់អារម្មណ៍គឺថា សម្បូរទៅដោយប្រភេទសត្វកម្រនិងជិតផុតពូជជាច្រើន ដូចជាពពួកសត្វពង្រូល Sunda, ខ្លារខិនពពក, ខ្លាឃ្មុំSun Penda ជាដើម ព្រមជាមួយជីវចម្រុះយ៉ាងសម្បូរបែប។ តែយ៉ាងណា បច្ចុប្បន្នឧទ្យានជាតិមួយនេះ ក៏កំពុងតែប្រឈមនឹងការគំរាមកំហែងដល់ដែនជម្រក ធម្មជាតិ ដោយសារតែការកាប់បំផ្លាញព្រៃឈើ និងការដាក់អន្ទាក់សត្វខុសច្បាប់ផងដែរ។

លោក Sinovas សង្ឃឹមថា ឧទ្យានជាតិមួយនេះនឹងទទួលបានការកែប្រែ និងសិក្សាស្រាវជ្រាវបន្ថែម ជាពិសេសគឺទាក់ទងជាមួយនឹងទិន្នន័យជីវចម្រុះ ក៏ដូចជាដាក់ចេញនូវយុទ្ធសាស្រ្តអភិរក្សដ៏មានប្រសិទ្ធភាព។ ឧទ្យានជាតិវីរៈជ័យ អាចនិយាយបានថាជាដែនជម្រកសត្វព្រៃ និងគម្របព្រៃឈើដ៏ធំប្រចាំអាស៊ីអាគ្នេយ៍ ជាកន្លែងស្រូបយកកាបូន និងថែមទំនាក់ទំនងយ៉ាងស៊ីជម្រៅជាមួយនឹងក្រុមជនជាតិដើមភាគតិចផងដែរ។ ដូច្នេះហើយការថែរក្សាការពារទីនេះពិតជាសំខាន់សម្រាប់មនុស្សទូទាំងពិភពលោក៕

ថ្មីៗនេះ អ្នកលេងបណ្តាញសង្គមជាច្រើនហាក់មានការចាប់អារម្មណ៍យ៉ាងខ្លាំងលើទិដ្ឋភាពក្នុងពិធីមង្គលការមួយ ដែលកូនកំឡោះនិងកូនក្រមុំកំពុងតែធ្វើកិច្ចពិធីបង់នំ ខណៈក៏មានញាតិមិត្តបងប្អូនចោមរោមមើលយ៉ាងសប្បាយរីករាយ។

ពិធីមង្គលការនេះត្រូវបានគេឲ្យដឹងថា បានប្រារព្ធឡើងកាលពីថ្ងៃទី ១២ ខែមករា ឆ្នាំ ២០២៥ នៅឯឃុំត្បែង ស្រុកបន្ទាយស្រី ខេត្តសៀមរាប។ ជាមួយគ្នានោះ គណនីកូនក្រមុំសំ ស្រីនិត ក៏បានចែករំលែកនូវចំណាប់អារម្មណ៍ថា «បំណងប្រាថ្នារបស់ខ្ញុំយូរហើយ ពេលនេះបានដូចបំណង»។ យ៉ាងណា បន្ទាប់ពីមានការដាក់បង្ហោះខាងលើរួចមក ក៏មានបងប្អូនប្រជាពលរដ្ឋខ្មែរមួយចំនួនហាក់មិនដែលប្រទះឃើញពិធីនេះពីមុនមកនោះឡើង និងបានផ្ទុះឡើងជាចម្ងល់ថាតើគេប្រារព្ធឡើងដើម្បីអ្វី?

ជាការពិតណាស់ នេះគឺជាពិធីបង់នំទ្រាំ ឬនំកន្ទ្រំា គឺជាប្រពៃណីតាមតំបន់ យោងតាមការចែករំលែកតៗគ្នាមកបានឲ្យដឹងថា «ពិធីបង់នំទ្រាំមានន័យថា ពេលយើងបានក្លាយជាប្តីប្រពន្ធនិងគ្នាហើយ គឺបង្គប់ន័យអោយនិងអត់ធ្មត់ ចេះអត់អោនអោយគ្នា។ ការហើយត្រូវតែមានកូនដែលយើងជាម្ដាយត្រូវតែមានតួនាទីថែរក្សាកូនអោយល្អ«។

ចំណែកអ្នកដែលរស់នៅខេត្តស្វាយរៀងម្នាក់បានឲ្យដឹងទៀតថា «ស្រុកខ្ញុំកាលពី ២០ ឆ្នាំមុនគេការហើយគេអោយកូនក្រមុំកូនកំលោះធ្វើនំនេះទៅលេងផ្ទះសាច់ញ្ញាតិទាំងសងខាង ហើយបងប្អូនខ្លះគួចដៃជាអង្ករ ស្រូវ គ្រាប់ពូជ ចានឆ្នាំង មាន់ទា ជ្រូក លុយ ដើម្បីបង្កើតគ្រួសារថ្មី តែឥលូវបាត់បង់អស់ហើយ»។

សូមជម្រាបថា នំទ្រាំឬនំកន្រ្ទាំ គឺជានំខ្មែរមួយប្រភេទ ដែលតែងលេចឡើងសម្រាប់ធ្វើជាអាហារសម្រន់ឬបង្អែម ក្នុងឱកាសសំខាន់ៗ ដូចជាពិធីមង្គលការ បុណ្យទាន ឬក៏ទៅវត្តប្រគេនព្រះសង្ឃជាដើម៕

គេហទំព័រ SEA Infographics បានធ្វើគូសបញ្ជាក់អំពីទីក្រុងទាំង ៣១ នៅអាស៊ី ដែលមានតម្លៃសមរម្យបំផុត សម្រាប់អ្នកដំណើរឆ្នាំ ២០២៥។ ក្នុងនោះ កម្ពុជានិងប្រទេសក្បែរខាង បានជាប់ក្នុងចំណោមទីក្រុងមានតម្លៃសមរម្យ ដែលការចាយវាយសរុបប្រចាំថ្ងៃ ប្រហាក់ប្រហែលគ្នាផងដែរ។

ប្រភពខាងលើបានគូសបញ្ជាក់ថា នៅតំបន់អាស៊ី កន្លែងដែលអ្នកទេសចរណ៍ចាយប្រាក់តិចបំផុតនោះគឺ ក្រុងវៀងច័ន្ទ ប្រទេសឡាវ ម្នាក់ចំណាយត្រឹមតែ ១៨.២៨ ដុល្លារ សប្បាយបានពេញមួយថ្ងៃ។ រីឯក្រុងហូជីមិញ និងក្រុងហាណូយប្រទេសវៀតណាមវិញក៏ថោកដែរ មនុស្សម្នាក់ មួយថ្ងៃចាយត្រឹមតែ ២០.៣៧ ដុល្លារប៉ុណ្ណោះ។ ខណៈក្រុងភ្នំពេញ ប្រទេសកម្ពុជា មនុស្សម្នាក់ចាយខ្ទង់ ២៨.៥៨ ដុល្លារ និងក្រុងបំាងកក ប្រទេសថៃ ប្រមាណ ២៩.២៦ ដុល្លារក្នុងមួយថ្ងៃ។

ក្រឡេកទៅកាន់ទីក្រុងសិង្ហបុរីវិញ មានការចំណាយរៀងខ្ពស់ជាងគេបន្តិចក្នុងតំបន់អាស៊ី ដែលមនុស្សម្នាក់ ក្នុងមួយថ្ងៃចាយប្រាក់ ៧៩.៤០ ដុល្លារ។ បន្ទាប់មកគឺ ក្រុងហុងកុង ៧២.១៦ ដុល្លារក្នុងមួយថ្ងៃ និងតូក្យូ ប្រទេសជប៉ុន ៦៨.០២ ដុល្លារ ក្នុងមួយថ្ងៃផងដែរ។

សូមជម្រាបថា ការចំណាយនេះគឺផ្តោតទៅលើ តម្លៃសណ្ឋាគារល្អប្រណិតនិងធូរថ្លៃមួយយប់, អាហារ ៣ ពេល , មធ្យោបាយធ្វើដំណើរ, ទៅកម្សាន្តកន្លែងវប្បធម៌ចំនួន១ និងកន្លែងផឹកស្រាកម្សាន្តជាដើម ដែលទាំងនេះគឺជាសកម្មភាពរបស់មនុស្សម្នាក់ក្នុងមួយថ្ងៃៗ នៅពេលដែលពួកគេស្ថិតក្នុងទីក្រុងទាំងនោះ៕

«រមណីយដ្ឋានទឹកឆា» ដែលមានទីតាំងស្ថិតនៅភូមិថ្មី ឃុំក្រូច និងភូមិថ្មដា ឃុំបឹងណាយ ស្រុកព្រៃឈរ ខេត្តកំពង់ចាម គឺជាតំបន់ដ៏មានសក្ដានុពលយ៉ាងសំខាន់សម្រាប់ភ្ញៀវទេសចរជាតិ និងអន្តរជាតិ។ រមណីយដ្ឋាននេះមានបឹងធម្មជាតិដ៏ធំមួយ ដែលមានប្រភពទឹកផុសពីក្នុងដី អាចឱ្យភ្ញៀវទេសចររីករាយ ក្នុងការលេងទឹកកម្សាន្ត បានគ្រប់រដូវកាលតែម្តង។ ក្រៅពីលេងទឹកកម្សាន្ត ភ្ញៀវក៏អាចសិក្សាស្រាវជ្រាវពីប្រវត្តិសាស្ត្រខ្មែរនៅទីនេះបានផងដែរ។

ដោយសារតែតំបន់ទឹកឆានេះ ខាងជើងគឺជាខ្ពង់រាប មានកូនភ្នំមួយចំនួននៅជាប់មាត់ទឹក និងមានព្រែកធំៗជាច្រើន ហូរចាក់ដូចជាព្រែកកំពង់សាជាដើម។ លើសពីនេះរមណីយដ្ឋានទឹកឆា ក៏បានរៀបចំជាកន្លែងលក់ម្ហូបអាហារចម្រុះបែបស្រុកស្រែជាច្រើន រួមទាំងមានកញ្ចុះសម្រាប់អង្គុយលេង និងសម្រាកលម្ហែកាយស្រូបយកខ្យល់អាកាសពីធម្មជាតិ ជាមួយទីធ្លាធំទូលាយទៀតផង។

បច្ចុប្បន្ន «រមណីយដ្ឋានទឹកឆា» គឺមានភាពលេចធ្លោជាងគេនៅក្នុងខេត្តកំពង់ចាម ដោយនៅតាមផ្លូវចូលគឺមានប្រាសាទបុរាណមួយ ប៉ុន្តែភាគច្រើនភ្ញៀវគឺតែងតែនិយមទៅដល់រមណីយដ្ឋានទឹកឆាតែម្តង ដែលមានចម្ងាយពីប្រាសាទបុរាណប្រហែល ២ គីឡូម៉ែត្រ ក្រាលដោយផ្លូវកៅស៊ូ ដែលជាផ្លូវល្អងាយស្រួលក្នុងការធ្វើដំណើរ។ រមណីយដ្ឋាននេះក៏បានអភិវឌ្ឍនិងប្រែប្រួលស្អាតជាងមុនពីមួយថ្ងៃទៅមួយថ្ងៃ ដែលអាចទាក់ទាញភ្ញៀវទេសចរបានយ៉ាងច្រើន និងជាទីពេញចិត្តរបស់ភ្ញៀវទេសចរទៅម្ដងហើយចង់ទៅម្ដងទៀត។

ទោះជាយ៉ាងណាប្រសិនបើលោកអ្នកបានទៅលេង «រមណីយដ្ឋានទឹកឆា» សូមមានការទទួលខុសត្រូវខ្ពស់ចំពោះបញ្ហាសំរាម និងកាកសំណល់ផង ដោយវេចខ្ចប់ និងទុកដាក់នៅក្នុងធុងសំរាមឱ្យបានត្រឹមត្រូវ ដើម្បីអនាម័យក្នុងសង្គមរបស់យើង ក៏ដូចជាជៀសវាងការបោះសំរាមចូលទៅក្នុងទឹក ដែលឱ្យខូចសោភ័ណភាពទឹកនៅទីនោះ៕