សហរដ្ឋអាមេរិក ៖ តើធ្លាប់ឆ្ងល់ទេថា ហេតុអ្វីពលរដ្ឋអាមេរិកពុំសូវនិយមសាងសង់របងព័ទ្ធជុំវិញលំនៅឋាន? បើមានអ្នកណាម្នាក់មករក គឺគ្រាន់តែដើរតាមវាលស្មៅ និងអាចគោះទ្វារលំនៅឋានតែម្តង ពុំចាំបាច់ឈរនៅមុខរបងទេ ។ វាខុសគ្នាពីលំនៅឋាននៅបណ្តាប្រទេសក្នុងតំបន់អាស៊ីអាគ្នេយ៍ ដែលមានរបងខ្ពស់ៗព័ទ្ធជុំវិញស្ទើរទាំងអស់ ខណៈលំនៅឋានខ្លះមានរបងជិតដល់ដំបូល ។

មនុស្សភាគច្រើនគិតថា វាគ្មានអ្វីប្លែកទេ ដោយសារនៅអាមេរិកមានសុវត្ថិភាព និងពុំចាំបាច់សាងសង់របងព័ទ្ធជុំវិញលំនៅឋាន ។ ការគិតបែបនេះក៏ត្រឹមត្រូវដែរ ប៉ុន្តែប្រទេសផ្សេងៗទៀតដែលមានការប្រព្រឹត្តល្មើសច្បាប់តិចបំផុតលើពិភពលោក ដូចជា ៖ ជប៉ុន និងសិង្ហបុរី បែរជាពលរដ្ឋសាងសង់របងជុំវិញលំនៅឋាន ។ ដូច្នេះ វាអាចមកពីមូលហេតុផ្សេងពីនេះ ដែលធ្វើឱ្យពលរដ្ឋអាមេរិកពុំនិយមសាងសង់របង ។

លំនៅឋានពលរដ្ឋអាមេរិក ជាពិសេស លំនៅឋាននៅកណ្តាលក្រុង គឺមានភាពទូលំទូលាយ ល្ហល្ហេវ និងគ្មានរបង ។ វាបង្ហាញពីការរាប់អានមិត្តរបស់ម្ចាស់លំនៅឋានជាមួយសហគមន៍ និងបង្ហាញពីពលរដ្ឋរស់នៅក្នុងសហគមន៍ទុកចិត្តគ្នាទៅវិញទៅមក ។ រីឯការសាងសង់របងខ្ពស់ៗបង្ហាញថា គឺជាការផ្តាច់ខ្លួនពីអ្នកជិតខាង និងពុំខ្វាយខ្វល់ពីអ្នកដទៃ ។

ម្យ៉ាងទៀត លំនៅឋានពលរដ្ឋអាមេរិកដែលសាងសង់ដោយគម្រោង ឬមានគណៈកម្មការសហគមន៍គ្រប់គ្រង គឺបានបង្កើតច្បាប់ក្នុងសហគមន៍ហាមម្ចាស់លំនៅឋានសាងសង់របង ដើម្បីរក្សាបរិស្ថានដ៏ស្រស់ស្អាតជុំវិញលំនៅឋានឱ្យមើលទៅធំទូលាយ ដែលគម្រោងលំនៅឋានបានរៀបចំតាំងពីដំបូង ។ រីឯសុវត្ថិភាព ក៏ជាមូលហេតុធ្វើឱ្យពលរដ្ឋអាមេរិកពុំសាងសង់របង ដោយសារពួកគេមានទំនុកចិត្តលើអាជ្ញាធរអាចការពារសុវត្ថិភាពឱ្យពលរដ្ឋ ។

ពលរដ្ឋអាមេរិកចូលចិត្តដាំស្មៅលើទីវាល ឬដាំដើមឈើមុខលំនៅឋាន និងថែទាំដើមឈើ ឬកាត់ស្មៅដោយខ្លួនឯង ។ ប៉ុន្តែបើសាងសង់របងធ្វើឱ្យពួកគេពិបាកកាត់ស្មៅ និងថែទាំសួនច្បារ ហើយការមានរបង គឺត្រូវចំណាយប្រាក់សាងសង់ និងជួសជុលរបង ដូច្នេះ ពួកគេពុំចាំបាច់មានរបងទេ ។ ពលរដ្ឋអាមេរិកចង់ឱ្យមនុស្សទូទៅឃើញវាលស្មៅ និងសួនច្បារដ៏ស្រស់ស្អាតនៅមុខលំនៅឋានរបស់ខ្លួន ។ ក្រៅពីនេះ ពួកគេចេះគោរពសិទ្ធិអ្នកដទៃ បើទោះជាគ្មានរបងការពារ ក៏ពួកគេពុំដើរឆ្លងកាត់មុខលំនៅឋានអ្នកផ្សេងទេ ។

ប៉ុន្តែដោយសារមានជាតិសាសន៍ជាច្រើនចូលមករស់នៅអាមេរិក បានធ្វើឱ្យតំបន់ជាច្រើនរបស់អាមេរិកចាប់ផ្តើមមានបញ្ហាក្នុងសង្គម មនុស្សគ្មានកន្លែងរស់នៅ និងមានការប្រព្រឹត្តល្មើស ។ ហេតុនេះ ពលរដ្ឋអាមេរិកមួយចំនួនក៏សាងសង់របងជុំវិញលំនៅឋានដើម្បីការពារការប្រព្រឹត្តបទល្មើស និងមានអាវុធការពារខ្លួន ៕

ចក្រភពអង់គ្លេស ៖ មន្ត្រីសុខាភិបាលចក្រភពអង់គ្លេសបានរកឃើញវីរុស West Nile នៅក្នុងសត្វមូសចក្រភពអង់គ្លេសជាលើកដំបូងបំផុត បន្ទាប់ពីមេរោគនេះត្រូវបានគេស្គាល់ និងរកឃើញនៅទន្លេ Idle ក្នុង Nottinghamshire ដោយការប្រមូលសំណាកវីរុសដែលមាននៅក្នុងសត្វមូស។

តើវីរុស West Nile ជាអ្វី? វីរុស WNV ឬ West Nile Virus គឺជាវីរុសដែលមានផ្ទុកនៅក្នុងសត្វមូស និងឆ្លងចេញតាមរយៈវដ្តជីវិតមូស។ សត្វពាហនៈមួយចំនួន និងមនុស្សអាចឆ្លងវីរុសនេះបានតាមរយៈការប៉ះពាល់ដោយផ្ទាល់ ឬត្រូវវាខាំ ប៉ុន្តែគេកំណត់ថានៅពេលសត្វមូសងា.ប់ វីរុសនោះក៏នឹងងា.ប់ដូចគ្នា។

ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បាននិយាយថា ទោះបីជាពេលខ្លះវីរុសនេះអាចធ្វើឱ្យមនុស្សឈឺធ្ងន់ធ្ងរក៏ដោយ ក៏ប៉ុន្តែការរីករាលដាលរបស់វានៅក្នុងចក្រភពអង់គ្លេស គឺមានហានិភ័យចំពោះសាធារណជនទូទៅ “ទាបណាស់” ។ គេក៏បានបញ្ជាក់ផងដែរថា បើទោះវាជាករណីកម្រក្ដី ប៉ុន្តែ 1 ក្នុងចំណោម 150 វាបង្ករជាផលប៉ះពាល់ធ្ងន់ធ្ងរដល់អាយុជីវិតរបស់មនុស្ស។

វីរុស West Nile បញ្ចេញរោគសញ្ញាតិចតួចបំផុត ឬមិនមានអ្វីទាំងអស់ ប្រហែល 20% នៃអ្នកឆ្លងអាចកើតមានការឈឺក្បាល ក្តៅខ្លួនខ្លាំង ហើមកូនកណ្ដុរក រាគ ក្អួត និងបញ្ហាស្បែក។ ក្នុងករណីកម្រខ្លះទៀត វាអាចសម្លា..ប់អ្នកជំងឺតាមរយៈជំងឺខួរក្បាលធ្ងន់ធ្ងរ រួមមានជំងឺរលាកខួរក្បាល ឬរលាកស្រោមខួរ។

គួរបញ្ជាក់ថា វីរុសនេះត្រូវបានគេរកឃើញដំបូងនៅក្នុងទ្វីបអាហ្រិច បន្ទាប់មកវាការចាប់ផ្ដើមរាលដាលដល់តំបន់មួយចំនួននៅលើពិភពលោកដូចជា អាមេរិកខាងត្បូង និងអឺរ៉ុបដីគោក។ ដោយឡែកគេបានដាក់ការសន្និដ្ឋានថា អាចបណ្ដាមកពីបម្រែបម្រួលអាកាសធាតុ និងកត្តាផ្សេងៗទៀត ដែលជំរុញឲ្យមូស និងវីរុសនេះមកដល់ចក្រភពអង់គ្លេសដែលនៅភាគខាងជើងនេះ។

លោកវេជ្ជបណ្ឌិត Meera Chand អនុប្រធានផ្នែកសុខភាពធ្វើដំណើរ និងការឆ្លងមេរោគនៅ UKHSA បាននិយាយថា “ខណៈពេលដែលនេះគឺជាការរកឃើញដំបូងនៃមេរោគ West Nile Virus នៅមូសក្នុងចក្រភពអង់គ្លេស រហូតមកដល់ពេលនេះវាមិនទាន់មានការព្យាបាលជាក់លាក់ ឬវ៉ាក់សាំងការពារសម្រាប់មនុស្សទេ។ ចំណែកអ្នកជំនាញផ្សេងទៀត ណែនាំឱ្យកម្ចាត់ប្រភពទឹកដែលពួកវាបង្ករកំណើត ហើយស្វែងរកវិធានការការពារខ្លួន ដូចជាការប្រើប្រាស់ថ្នាំបាញ់មូស លាបឡេការពារមូស និងប្រើប្រាស់មុងជាដើម។

គួររំលឹកថា កាលពីឆ្នាំមុន មានការតវ៉ាមួយត្រូវបានធ្វើឡើងនៅទីក្រុង Seville ប្រទេសអេស្ប៉ាញ បន្ទាប់ពីមានការរាយការណ៍ជា 60ករណីអំពីការឆ្លង និងមានមនុស្ស 5នាក់បានស្លា..ប់បន្ទាប់កើតមានជំងឺដែលរួមផ្សុំដោយវីរុសនេះ៕

ប្រទេសថៃ ៖ ការទស្សន៍ទាយគឺជាអាជីពដ៏ពេញនិយម និងជាវប្បធម៌ដ៏សំខាន់មួយនៅក្នុងប្រទេសថៃ ដែលបច្ចុប្បន្នសូម្បីតែនៅក្នុងសកលវិទ្យាល័យក៏មានថ្នាក់បរិញ្ញាបត្រមុខជំនាញទស្សន៍ទាយផងដែរ ដែលតម្រូវឲ្យនិស្សិតរៀនរយៈពេល៤ឆ្នាំ និងទទួលបានសញ្ញាបត្រក្លាយជាគ្រូទាយដោយស្របច្បាប់។

យោងតាមការបង្ហើបរបស់ប្រធានសមាគមន៍ហោរាសាស្រ្តអន្តរជាតិនៅថៃបានបង្ហើបថា ៖ បច្ចុប្បន្នមានសលវិទ្យាល័យមួយបានអនុម័តឲ្យមានការសិក្សាកម្រិតបរិញ្ញាបត្រខាងព្យាករណ៍ទស្សន៍ទាយ ដើម្បីឲ្យអ្នកដែលចង់រៀនជំនាញនេះអាចក្លាយខ្លួនជាគ្រូទាយស្របច្បាប់។ លោកមិនបានបញ្ចេញឈ្មោះឲ្យដឹងថាជាសកលវិទ្យាល័យណាមួយទេ ប៉ុន្តែលោកបានបន្ថែមទៀតថា ផ្នែកនេះត្រូវរៀនចំនួន ៤ឆ្នាំ និងតម្រូវឲ្យសិស្សត្រូវរៀនមុខវិជ្ជាដូចជា តារាសាស្រ្ត ចិត្តវិទ្យា គណិតវិទ្យា និងភូមិវិទ្យាផងដែរ បន្ទាប់ពីមុខវិជ្ជាហោរាសាស្រ្ត។

ទោះបីជាមិនមានកម្មវិធីសិក្សាដែលមានឈ្មោះថា “ការទស្សន៍ទាយ” ជាផ្លូវការនៅសាកលវិទ្យាល័យណាមួយក៏ដោយ ប៉ុន្តែមានស្ថាប័នខ្លះផ្តល់ជូននូវវគ្គសិក្សា និងកម្មវិធីដែលទាក់ទងនឹងផ្នែកតារាសាស្រ្ត ការទស្សន៍ទាយ និងអនុវត្តន៍ជំនឿប្រពៃណីផ្សេងៗ។

មនុស្សជាច្រើនបានចាប់អារម្មណ៍ និងបានសន្និដ្ឋានថានោះជា សាកលវិទ្យាល័យ Eastern University of Management and Technology ព្រោះតែនៅសកលវិទ្យាល័យនោះ មានកម្មវិធីសិក្សា វិញ្ញាបនបត្ររយៈពេលខ្លីក្នុងផ្នែកតារាសាស្រ្ត (Astrology) និងការទស្សន៍ទាយ។ វគ្គសិក្សានេះត្រូវបានរចនាឡើងដើម្បីបង្កើនចំណេះដឹងសម្រាប់បុគ្គលដែលចង់ក្លាយជាអ្នកទស្សន៍ទាយអាជីព ។

ក្រៅពីនេះក៏មានសកលវិទ្យាល័យមួយចំនួនទៀតដូចជា សាកលវិទ្យាល័យ King Mongkut’s Institute of Technology Ladkrabang (KMITL), សាកលវិទ្យាល័យ Assumption University (AU) និង Uranian Astrologers Club Thailand (UACT) ក៏មានកម្មវិធីសិក្សាស្ដីពីការសង្កេតពីតារាសាស្រ្ត គោលការណ៍មើលហុងស៊ុយ ហោរាសាស្ត្របែបចិន ឬបែបថៃ និងវិធីសាស្ត្រទស្សន៍ទាយស្ថិតិស៊ីស្ទេម ដែលសិស្សានុសិស្សអាចយកមកប្រើក្នុងជីវិតប្រចាំថ្ងៃបាន។

ព័ត៌មាននេះ ទទួលបានចំណាប់អារម្មណ៍យ៉ាងខ្លាំងពីមហាជន និងមានអ្នកចង់សិក្សាពីជំនាញនេះច្រើនផងដែរ ព្រោះអាជីពទស្សន៍ទាយនៅក្នុងប្រទេសថៃបច្ចុប្បន្នកំពុងមានការពេញនិយមខ្លាំង។ បើតាមសេដ្ឋកិច្ចវិទូរដែលបានធ្វើការវិភាគលើការចំណាយរបស់ប្រជាជនថៃជាប្រចាំរកឃើញថា មានថវិកាប្រមាណ5 ពាន់លានបាត (ប្រហែល 150 លានដុល្លារ) ដែលគេអាចប្រមូលបានពីវិស័យមួយនេះ។

វិជ្ជាជីវៈនេះក៏បានសម្របខ្លួនទៅនឹងសម័យទំនើបផងដែរ ដោយមានគ្រូទាយជាច្រើនផ្តល់សេវាកម្មរបស់ពួកគេតាមអ៊ីនធឺណិតដូចជា ការអានបាតដៃ, ការទាយដោយសន្លឹកបៀ ឬកាត Tarot , ការមើលហោរាសាស្រ្ត ដែលធ្វើឱ្យពួកគេអាចទទួលបានចំណូលកាន់តែទូលំទូលាយ៕

សហរដ្ឋអាមេរិក ៖ តាមការចុះផ្សាយរបស់សារព័ត៌មានបរទេសកាលពីថ្ងៃទី២២ ខែឧសភា ឆ្នាំ២០២៥ ឱ្យដឹងថា អ្នកគ្រូបង្រៀនម្នាក់នៅអាមេរិកទ្រាំលែងបាន ក៏ដាក់ពាក្យលាឈប់ពីការងារ ដោយសារកូនសិស្សប្រើប្រាស់បច្ចេកវិទ្យា AI ធ្វើកិច្ចការសាលា រហូតលែងចេះអាន និងសរសេរអក្សរ ។ អ្នកគ្រូរូបនេះបារម្ភពីបច្ចេកវិទ្យា AI ធ្វើឱ្យប៉ះពាល់ដល់វិស័យអប់រំនាថ្ងៃអនាគត និងសំណូមពរឱ្យហាមឃាត់កូនសិស្សប្រើប្រាស់ រហូតដល់ចូលរៀនសាកលវិទ្យាល័យ ។

អ្នកនាង ហេនណា ម៉ារៀ គឺជាគ្រូបង្រៀននៅវិទ្យាល័យមួយកន្លែងនៅអាមេរិកធ្វើឱ្យមហាជនចាប់អារម្មណ៍យ៉ាងខ្លាំង ក្រោយពីនាងបង្ហោះវីដេអូក្នុង TikTok និយាយថា នាងបានលាឈប់ពីការងារជាគ្រូបង្រៀនក្រោយពីបង្រៀនកូនសិស្សរយៈពេលជាង៣ឆ្នាំ ដោយសារបច្ចេកវិទ្យា AI កំពុងបំផ្លាញការអប់រំរបស់កុមារនាពេលបច្ចុប្បន្ន ដោយវីដេអូរបស់នាងមានចំនួនទស្សនារហូតដល់ជាង១លានលើក ។

បច្ចេកវិទ្យា AI បានក្លាយជាផ្នែកមួយនៃជីវិតប្រចាំថ្ងៃ និងធ្វើឱ្យការបង្រៀនសិស្សកាន់តែពិបាក ដោយសារសិស្សពឹងផ្អែកលើបច្ចេកវិទ្យាឱ្យជួយធ្វើលំហាត់ និងឆ្លើយសំណួរផ្សេងៗជំនួស ។ ពួកគេពុំព្យាយាមប្រើប្រាស់សមត្ថភាពរបស់ខ្លួនទេ ហើយវាធ្វើឱ្យការសិក្សាធ្លាក់ចុះ ។ បច្ចេកវិទ្យាធ្វើឱ្យក្មេងៗលែងចេះអានអក្សរ និងចាប់អារម្មណ៍លើមេរៀនតិចជាងមុន ដោយពួកគេប្រើប្រាស់ឧបករណ៍អានជាសំឡេង ។ ក្រៅពីនេះ ពួកគេប្រើប្រាស់បច្ចេកវិទ្យាសម្រាប់ការកម្សាន្តប៉ុណ្ណោះ ប៉ុន្តែពុំរៀនសូត្រពីបច្ចេកវិទ្យា ។

អ្នកនាង ម៉ារៀ បានផ្តល់សម្ភាសន៍ជាមួយសារព័ត៌មាន Fox News ថា នាងទើបតែលាឈប់ពីការងារគ្រូបង្រៀន ក្រោយពីបានបំពេញការងារនេះរយៈពេលជាង៣ឆ្នាំ ពីព្រោះនាងយល់ថា ការរៀនសូត្ររបស់សិស្សពុំល្អប្រសើរ ដោយសារពឹងផ្អែកលើបច្ចេកវិទ្យាខ្លាំងពេក ។ ពីដំបូង AI ជួយឱ្យការងារបង្រៀនមានប្រសិទ្ធភាព បើយើងបង្រៀនក្មេងៗឱ្យចេះប្រើប្រាស់វាយ៉ាងត្រឹមត្រូវ ប៉ុន្តែបើអនុញ្ញាតឱ្យពួកគេប្រើប្រាស់វាដោយសេរីក្នុងបន្ទប់រៀន ពួកគេនឹងពឹងលើវាជានិច្ច ហើយឈប់ធ្វើកិច្ចការសាលាដោយខ្លួនឯង ។

អ្នកនាងបានឱ្យកូនសិស្សសរសេរអត្ថបទវែងៗ ហើយសង្កេតឃើញថា អត្ថបទដែលកូនសិស្សសរសេរប្រើប្រាស់ភាសាយ៉ាងត្រឹមត្រូវ ធ្វើឱ្យនាងឆ្ងល់យ៉ាងខ្លាំង ។ នាងក៏ប្រើប្រាស់ AI ឱ្យកែតម្រូវអត្ថបទសិស្ស គឺពួកគេយកអត្ថបទចេញពីកម្មវិធី ChatGPT ទាំងស្រុង បន្ទាប់មក នាងក៏ឱ្យពួកគេសរសេរអត្ថបទជាថ្មី ។ ប៉ុន្តែក៏មានកូនសិស្សខ្លះសរសេរអត្ថបទដោយខ្លួនឯងដែរ អ្នកនាងពុំបន្ទោសសិស្សទេ ប៉ុន្តែបច្ចេកវិទ្យាផ្តល់គុណវិបត្តិ ច្រើនជាងគុណសម្បត្តិ ។

ហេតុនេះ យើងគួរហាមឃាត់សិស្សកុំឱ្យប្រើប្រាស់បច្ចេកវិទ្យា រហូតដល់ពួកគេចូលរៀននៅសាកលវិទ្យាល័យ ។ គ្រូបង្រៀនគួរគិតពីបញ្ហានេះ ដោយតាមដានលទ្ធផលការសិក្សារបស់សិស្ស និងប្រៀបធៀបជាមួយសម័យពុំទាន់មានបច្ចេកវិទ្យា ។ បច្ចេកវិទ្យា AI ធ្វើឱ្យប៉ះពាល់ដល់ការសិក្សារបស់សិស្សយ៉ាងខ្លាំង ដូចជា ៖ ប៉ះពាល់ជំនាញការសរសេរ ការអាន និងវិភាគ ៕

សហរដ្ឋអាមេរិក ៖ រដ្ឋបាលលោក Trump បានបញ្ចប់សិទ្ធិសកលវិទ្យាល័យ Harvard ក្នុងការទទួលចុះឈ្មោះនិស្សិតបរទេសឲ្យចូលរៀននៅសាលាតទៅទៀត ក្រោមហេតុផលថាខាងសាលាមិនបានអនុវត្តតាមសំណើររបស់រដ្ឋាភិបាល។ នេះបើយោងតាមសារព័ត៌មានបរទេស BBC ។

កាលពីថ្ងៃទី 22 ខែឧសភា ឆ្នាំ 2025 រដ្ឋមន្រ្តីសន្តិសុខក្នុងស្រុក អ្នកស្រី Kristi Noem បានប្រកាសថា សាកលវិទ្យាល័យ Harvard ត្រូវបានដកសិទ្ធិចូលរួមកម្មវិធីនិស្សិត និងការផ្លាស់ប្តូរអន្តរជាតិ (SEVP)។ នេះមានន័យថា Harvard មិនមែនជាកន្លែងសម្រាប់ទទួលនិស្សិតអន្តរជាតិបានទៀតទេ។ អំពើនេះប៉ះពាល់ដល់និស្សិតបរទេសប្រហែល 6,800នាក់ ដែលត្រូវប្តូរទៅសាកលវិទ្យាល័យផ្សេងទៀត ព្រោះបើមិនដូច្នេះទេពួកគេនឹងបាត់បង់សិទ្ធិស្របច្បាប់នៅក្នុងសហរដ្ឋអាមេរិក។

រដ្ឋបាល Trump បានអះអាងពីមូលហេតុជាច្រើនដែលនាំឲ្យមានសេចក្តីសម្រេចនេះ គឺបណ្ដាលពីសាកលវិទ្យាល័យ Harvard បានបដិសេធមិនផ្ដល់ដល់រដ្ឋាភិបាលនូវបណ្ដាព័ត៌មានដែលទាក់ទងនឹងសកម្មភាពខុសច្បាប់ជាយថាហេតុរបស់ពួកនិស្សិតបរទេស។

គួរបញ្ជាក់ដែរថា ការសម្រេចច្បាប់រឹតបន្តឹងការទទួលសិស្សនេះ មិនមែនសម្រាប់តែនិស្សិតបរទេសក្រោយៗដែលត្រៀមនឹងចូលមករៀនក្នុងសាលាប៉ុណ្ណោះទេ ប៉ុន្តែគឺជាការកាត់ផ្ដា.ច់និស្សិតបរទេសចេញពីសាលាតែម្ដង រួមទាំងនិស្សិតចាស់ៗដែលកំពុងរៀនផងដែរ។ វាបង្ករឱ្យមានការភ័យខ្លាច និងការខកចិត្តក្នុងចំណោមសិស្សរាប់ពាន់នាក់ដែលអនាគតរបស់ពួកគេស្ថិតក្នុងភាពទន់ខ្សោយនៅឡើយ។ និស្សិតវ័យ 22ឆ្នាំម្នាក់មកពីប្រទេសស៊ុយអែត បាននិយាថា ៖ ខ្ញុំចងចាំថ្ងៃដែលខ្ញុំបានទទួលឳកាសចូលរៀននៅសាកលវិទ្យាល័យ Harvard វាជាថ្ងៃល្អបំផុតនៃជីវិតរបស់ខ្ញុំ ប៉ុន្តែពេលនេះខ្ញុំមិននឹកស្មានថាពេលវេលារបស់ខ្ញុំនៅក្នុងសាលាមួយនេះ ត្រូវបញ្ចប់ដូចនេះទេ។

ចំពោះស្ថានភាពនេះ Harvard បាននិយាយថា ៖ សកម្មភាពរបស់រដ្ឋបាល Trump គឺមិនសមស្របនឹងច្បាប់វាប៉ះពាល់ដល់បេសកកម្ម និងសហគមន៍សាកលវិទ្យាល័យ។ កន្លងមកមាននិស្សិតបរទេសដែលមកពីជាង 140ប្រទេស បានចូលមករៀន និងប្រើប្រាស់ចំណេះដឹងរបស់ពួកគេក្នុងជួយប្រទេសនេះឲ្យកាន់តែរីកចម្រើនមកដល់សព្វថ្ងៃ តើនេះជាអ្វីដែលពួកគេត្រូវទទួលបានឬ?

ការផ្ទុះការប្រឆាំងនេះ គឺជាផ្នែកមួយនៃជម្លោះដ៏ធំ រវាងរដ្ឋបាលលោក Trump និងសាកលវិទ្យាល័យឈានមុខមួយចំនួន ដែលទទួលរងការគំរា.មកាត់ថវិកាជំនួយ ការទទួលបណ្ដឹ.ងពីសាលាដំបូង ការកៀបសង្កត់សេរីភាពក្នុងការនិយាយ និងឯករាជ្យភាពរបស់វិទ្យាស្ថាននីមួយៗ៕

ប្រទេសវៀតណាម ៖ រដ្ឋាភិបាលវៀតណាមបានអនុញ្ញាតឱ្យបើកក្រុមហ៊ុនអាកាសចរណ៍ថ្មី ឈ្មោះ «Sun PhuQuoc Airways» ដើម្បីទទួលភ្ញៀវទេសចរមកលេងនៅកោះ Phu Quoc (កោះត្រល់) ដោយកំណត់គោលដៅឱ្យក្រុមហ៊ុននេះមានយន្តហោះ រហូតដល់ជាង៣០គ្រឿង ក្នុងឆ្នាំ២០៣០ ។ នេះបើតាមការអះអាងរបស់ Sun Group គឺជាក្រុមហ៊ុនអាកាសចរណ៍មេរបស់ក្រុមហ៊ុន Sun PhuQuoc Airways មកកាន់សារព័ត៌មាន AFP កាលពីថ្ងៃទី២១ ខែឧសភា ឆ្នាំ២០២៥ ។

វិស័យអាកាសចរណ៍របស់ប្រទេសវៀតណាម បានរីកចម្រើនយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ ដោយសារកំណើនពលរដ្ឋវៀតណាមមានជីវិតធូរធាកើនឡើង ហើយពួកគេមានប្រាក់គ្រប់គ្រាន់សម្រាប់ការធ្វើដំណើរតាមយន្តហោះ ។

ក្រុមហ៊ុនអាកាសចរណ៍ Sun PhuQuoc Airways (SPA) នឹងទាក់ទាញភ្ញៀវទេសចរបរទេសមកកម្សាន្តនៅកោះ Phu Quoc (កោះត្រល់) ដែលស្ថិតនៅភាគខាងត្បូងប្រទេសវៀតណាមឱ្យបានច្រើន ហើយកោះ Phu Quoc នឹងក្លាយជាគោលដៅទេសចរណ៍ដ៏ពេញនិយមរបស់ភ្ញៀវទេសចរវៀតណាម និងបរទេស ។ នេះបើតាមការអះអាងរបស់ក្រុមហ៊ុនអាកាសចរណ៍ Sun Group ។

លើសពីនេះ ក្រុមហ៊ុនអាកាសចរណ៍ថ្មីនឹងផ្តោតគោលដៅទាក់ទាញទេសចរណ៍ និងក្រុមហ៊ុនអាជីវកម្មធំៗជាច្រើននៅប្រទេសវៀតណាម និងទូទាំងពិភពលោក ។ ក្រុមហ៊ុន Sun Group បានវិនិយោគប្រាក់ក្នុងវិស័យអាកាសចរណ៍ ស្មើជិត១០០លានដុល្លារ និងមានគម្រោងបង្កើនយន្តហោះឱ្យបានចំនួន៣១គ្រឿង នៅឆ្នាំ២០៣០ ។ យន្តហោះដឹកអ្នកដំណើរដំបូងរបស់ក្រុមហ៊ុន Sun PhuQuoc Airways គឺនឹងចាប់ផ្តើមនៅត្រីមាសទី៤ ឆ្នាំ២០២៥ ។

ក្រៅពីវិស័យអាកាសចរណ៍ Sun Group គឺជាក្រុមហ៊ុនអចលនទ្រព្យ និងការកម្សាន្តដ៏ល្បីល្បាញ ហើយក្រុមហ៊ុននេះមានគម្រោងអភិវឌ្ឍន៍អចលនទ្រព្យជាច្រើនកន្លែងទៀតនៅទូទាំងប្រទេស ។

គួរបញ្ជាក់ថា ប្រទេសវៀតណាមមានក្រុមហ៊ុនអាកាសចរណ៍ជាតិ ដូចជា ៖ ក្រុមហុម Vietnam Airlines និងក្រុមហ៊ុនអាកាសចរណ៍តម្លៃទាប Vietjet Air ។ ក្រៅពីនេះ ក៏មានក្រុមហ៊ុនអាកាសចរណ៍ Bamboo Airways និង Vietravel Airlines ៕

ប្រទេសអ៊ីរ៉ង់ ៖ តាមការចុះផ្សាយរបស់សារព័ត៌មានបរទេសកាលពីថ្ងៃទី២២ ខែឧសភា ឆ្នាំ២០២៥ ឱ្យដឹងថា បុរសអ៊ីរ៉ង់ម្នាក់បានបំបែកកំណត់ត្រាពិភពលោកជាលើកទី៣ ដោយឈរឱ្យគេដាក់ស្លាបព្រាបាយ ចំនួន៩៦ លើរាងកាយ និងគ្មានស្លាបព្រាបណាមួយជ្រុះសោះ ។ បុរសរូបនេះនិយាយថា ខ្លួនប្រាណខ្ញុំដូចគ្នានឹងដែកឆក់ ហើយរបស់អ្វីក៏ដោយ ក៏អាចដាក់លើខ្លួនខ្ញុំបានទាំងអស់ ។

បុរសអ៊ីរូបនេះឈ្មោះ Abolfazl Saber Mokhtari អាយុ៥៤ឆ្នាំ បានធ្វើឱ្យមហាជនភ្ញាក់ផ្អើលម្តងទៀត ក្រោយពីឈរឱ្យគេដាក់ស្លាបព្រាបាយរហូតដល់៩៦ លើរាងកាយ ដោយគ្មានស្លាបព្រាណាមួយជ្រុះសោះ ។ វាជាសមត្ថភាពផ្ទាល់ខ្លួនយ៉ាងពិសេស និងពិតជាមិនធម្មតា ដែលអ្នកដទៃពុំអាចធ្វើបាន ហើយនេះជាការបំបែកកំណត់ត្រាពិភពលោក លើកទី៣ ដែលបានចុះក្នុង Guinness World Records ។

លោក Mokhtari រស់នៅទីក្រុងខារ៉ាជ ប្រទេសអ៊ីរ៉ង់ ធ្លាប់បានបំបែកកំណត់ត្រាពិភពលោក លើកដំបូងកាលពីឆ្នាំ២០២១ ដោយការដាក់ស្លាបព្រា ចំនួន៨៥ លើរាងកាយ ។ ២ឆ្នាំក្រោយមក លោកក៏បានបំបែកកំណត់ត្រាពិភពលោកម្តងទៀត ដោយការដាក់ស្លាបព្រាចំនួន៨៨ លើរាងកាយ ហើយនៅឆ្នាំ២០២៥នេះ លោកបានបំបែកកំណត់ត្រាពិភពលោកជាលើកទី៣ ដោយដាក់ស្លាបព្រាចំនួន៩៦ លើរាងកាយ ។

លោក Mokhtari និយាយថា ៖ «ខ្ញុំចាប់ផ្តើមដាក់ស្លាបព្រា និងរបស់ផ្សេងៗលើរាងកាយតាំងពីនៅក្មេងមកម៉្លេះ ។ ក្រោយពីបានហ្វឹកហាត់ និងព្យាយាមអស់រយៈពេលជាច្រើនឆ្នាំមក ខ្ញុំក៏អាចបង្កើនសមត្ថភាពឱ្យកាន់តែពិសេសខ្លាំងឡើង រហូតដល់អាចបំបែកកំណត់ត្រាពិភពលោក ចំនួន៣លើក ។ ខ្ញុំអាចដាក់របស់ផ្សេងៗលើខ្លួនបានទាំងអស់ មិនថាផ្លាស្ទិក កែវ ផ្លែឈើ ថ្ម និងកំណាត់ឈើ» ។

លោកជឿជាក់ថា សមត្ថភាពពិសេសនេះកើតឡើងដោយសារលោកអាចបញ្ចេញថាមពលពីរាងកាយបញ្ជូនទៅកាន់វត្ថុទាំងនេះ ដោយផ្តោតអារម្មណ៍ទៅលើវត្ថុ បន្ទាប់មក ប្រើប្រាស់សមាធិឱ្យខ្លាំងបំផុត ។ បច្ចុប្បន្ន លោក Mokhtari ត្រូវបានមហាជនទទួលស្គាល់ថា ជាស្តេចស្លាបព្រានៅលើពិភពលោក ៕