តើមានភេសជ្ជៈ និងចំណីអាហារអ្វីខ្លះដែលហាមបរិភោគជាមួយទុរេន?

ភេសជ្ជៈ និងចំណីអាហារផ្អែមមួយចំនួនពុំអាចបរិភោគក្នុងពេលតែមួយជាមួយទុរេនទេ វាពុំមែនបណ្តាលមកលើសជាតិផ្អែម ប៉ុន្តែការបរិភោគទុរេនជាមួយចំណីអាហារទាំងនេះអាចប៉ះពាល់សុខភាពខ្លាំង ឬរហូតបាត់បង់ជីវិតក៏មាន ។ ហេតុនេះ ដើម្បីបរិភោគទុរេនយ៉ាងមានសុវត្ថិភាព គួរចៀសវាងភេសជ្ជៈ និងចំណីអាហារដូចខាងក្រោមនេះ ។

១-ស្រា ៖ ផ្លែទុរេនមានសារធាតុស្ពាន់ធ័ររារាំងដល់ដំណើរការរបស់អង់ស៊ីមក្នុងថ្លើ មដែលមានតួនាទីបំបែកជាតិអាល់កុល ។ ការបរិភោគទុរេនក្នុងពេលផឹកស្រាបណ្តាលឱ្យជាតិពុលប្រមូលផ្តុំក្នុងរាងកាយ, ក្តៅក្នុង, បេះដូងលោតញាប់ ឬគ្រោះថ្នាក់ដល់ជីវិត ។ គួរផឹកទឹកឱ្យច្រើន និងប្រញាប់ទៅមន្ទីរពេទ្យ បើមានអាការៈខុសប្រក្រតី ។

២-ភេសជ្ជៈហ្គាស ៖ ទាំងទុរេន និងភេសជ្ជៈហ្គាស សុទ្ធតែមានជាតិស្ករខ្ពស់ បើបរិភោគទាំងពីរមុខនេះចូលគ្នា វានឹងបង្កើនកម្រិតស្ករក្នុងឈាមយ៉ាងឆាប់រហ័ស ជាពិសេស អ្នកកើតជំងឺទឹកនោមផ្អែម គួរប្រុងប្រយ័ត្ន ។ រីឯមនុស្សទូទៅ ប្រឈមនឹងជំងឺធាត់ ទឹកនោមផ្អែម និងជំងឺបេះដូង ។

៣-នំផ្អែម និងបង្អែម ៖ ការបរិភោគនំផ្អែម និងបង្អែម ដែលមានស្ករច្រើនជាមួយទុរេនកាន់តែធ្វើឱ្យរាងកាយទទួលយកជាតិស្ករច្រើន រួមទាំងប្រឈមជាមួយជំងឺរ៉ាំរ៉ៃ និងប្រមូលផ្តុំជាតិខ្លាញ់ ។

៤-ផ្លែឈើមានជាតិស្ករខ្ពស់ ៖ ផ្លែមៀន សាវម៉ាវ ស្វាយទុំ និងខ្នុរ សុទ្ធតែមានជាតិស្ករខ្ពស់ បើបរិភោគផ្លែឈើទាំងនេះជាមួយទុរេន វានឹងកាន់តែបង្កើនបរិមាណស្ករក្នុងឈាម ។ ក្រៅពីនេះ យើងនឹងប្រឈមនឹងជំងឺទឹកនោមផ្អែម និងឡើងទម្ងន់ ។

៥-ភេសជ្ជៈប៉ូវកម្លាំង ៖ ការផឹកភេសជ្ជៈប៉ូវកម្លាំងដែលមានកាហ្វេអ៊ីនខ្ពស់ក្នុងពេលបរិភោគទុរេន គឺជំរុញឱ្យបេះដូងលោតខ្លាំងបណ្តាលឱ្យក្អួតចង្អោរ និងក្តៅខ្លួន ។ គួរចៀសវាងផឹកភេសជ្ជៈប៉ូវកម្លាំង និងបរិភោគទុរេនក្នុងពេលតែមួយគ្នា ។

៦-កាហ្វេ ៖ កាហ្វេ និងទុរេន ផ្ទុកនូវសារធាតុជំរុញការរំលាយអាហារ ហើយការបរិភោគទុរេនផង ផឹកកាហ្វេផង នឹងធ្វើឱ្យរាងកាយក្តៅខ្លាំង ខ្វះខាតទឹក និងអំបិលរ៉ែ ។ ផលប៉ះពាល់ គឺអាចវឹលមុខ និងបាត់បង់ស្មារតី ។

៧-អាហាររសជាតិឌិត ៖ ការបរិភោគអាហាររសជាតិឌិត ឬអាហារហឹរជាមួយទុរេនដែលជាផ្លែឈើក្តៅ គឺធ្វើឱ្យហើមពោះ ឬក្តៅក្នុង ។

មនុស្សខ្លះគ្មានផលប៉ះពាល់អ្វីទេ ក្រោយពេលបរិភោគទុរេនជាមួយអាហារ និងភេសជ្ជៈទាំងនេះ ប៉ុន្តែអ្នកផ្សេងទៀតប៉ះពាល់សុខភាពយ៉ាងខ្លាំង ។ ដូច្នេះ គួរពិនិត្យអាការៈរបស់ខ្លួនក្រោយពេលបរិភោគ ចំណុចសំខាន់ ត្រូវបរិភោគទុរេនក្នុងបរិមាណសមល្មម មិនបរិភោគច្រើនពេក ដើម្បីមានសុខភាពល្អយូរអង្វែង ៕