ថៃ ៖ លោកស្រី Paetongtarn Shinawatra នាយករដ្ឋមន្ត្រីថៃ ក្នុងដំណើរចុះសួរសុខទុក្ខប្រជាពលរដ្ឋនៅតាមតំបន់ព្រំដែនរវាងកម្ពុជា-ថៃ កាលពីថ្ងៃពុធម្សិលមិញនេះ ត្រូវបានអ្នកលេងបណ្ដាញសង្គមក្នុងប្រទេសថៃបានបញ្ចេញមតិរិះគ.ន់ជាថ្មីម្ដងទៀត ពាក់ព័ន្ធនឹងការពាក់ស្បែកជើងដែលមានតម្លៃថ្លៃខ្ទង់ពាន់ដុល្លារ។ នេះបើយោងតាមសារព័ត៌មានថៃ Khaosod បានចុះផ្សាយ។

នាយករដ្ឋមន្ត្រីថៃ លោកស្រី Paetongtarn Shinawatra កាលពីថ្ងៃពុធ ទី១១ ខែមិថុនា បានចុះទៅបំពេញទស្សនកិច្ចនៅខេត្ត Surin ដើម្បីបង្ហាញការគាំទ្រដល់កងកម្លាំងយោធា ចំពេលមានភាពតានតឹងកើនឡើងជាមួយកម្ពុជាជុំវិញតំបន់ជម្លោះព្រំដែន។ នេះជាដំណើរទស្សនកិច្ចលើកដំបូងរបស់លោកស្រីចាប់តាំងពីមានការប៉ះទង្គិចគ្នាកាលពីថ្ងៃទី២៨ ខែឧសភា នៅតំបន់ចុងបូក។

ក្រៅពីសកម្មភាពចុះសួរសុខទុក្ខប្រជាជននៅតាមសហគមន៍ និងពិនិត្យមើលស្ថានភាពតាមព្រំដែន មហាជនថៃមួយចំនួនបែរជានាំគ្នាកត់សម្គាល់ទៅលើការតុបតែងខ្លួនរបស់លោកស្រី Paetongtarn ជាពិសេសពួកគេបានចាប់អារម្មណ៍ទៅលើស្បែកជើង ដែលពួកគេស្គាល់ថាជាស្បែកជើងប្រេនមានតម្លៃថ្លៃទៅវិញ។

សារព័ត៌មានថៃ Khaosod បានសរសេថា ៖ វាជារឿងដែលពិបាកនៅពេលដែលអ្នកក្លាយជានាយករដ្ឋមន្ត្រីដ៏មានម្នាក់ ហើយវាកាន់តែពិបាកថែមទៀត នៅពេលដែលឪពុករបស់អ្នកដែលជាអតីតនាយករដ្ឋមន្ត្រីក៏ជាមហាសេដ្ឋីដែរនោះ ព្រោះមនុស្សជាច្រើននឹងយកចិត្តទុកដាក់កាន់ខ្លាំងលើអ្វីដែលអ្នកពាក់។

សារព័ត៌មានដដែលនេះ បានបន្ថែមទៀតថា នាយករដ្ឋមន្ត្រីថៃ Paetongtarn Shinawatra ត្រូវបានគេប្រទះឃើញនៅថ្ងៃនេះ ខណៈពេលកំពុងបំពេញទស្សនកិច្ចនៅព្រំដែនកម្ពុជា-ថៃ ក្នុងខេត្តសុរិន្ទ ដោយពាក់ស្បែកជើងប៉ាតាមួយគូ មានតម្លៃចន្លោះពី ៣៨,០០០ ទៅ ៤០,០០០បាត ឬជាងប្រហែល ១,២០០ដុល្លារអាមេរិក ។ ស្បែកជើងនេះ គឺជាផលិតផលមកពីប្រទេសបារាំងរបស់យីហោ Roger Vivier ហើយវាត្រូវបានគេរចនាលម្អដោយត្បូងគ្រីស្តាល់។

យ៉ាងណាមិញ នៅក្នុងផ្នែកមតិយោបល់របស់ការចុះផ្សាយខាងលើនេះ ក៏មានប្រជាជនថៃមួយចំនួនឈរខាងលោកស្រីនាយករដ្ឋមន្រ្តីផងដែរ ដោយពួកគេលើកឡើងថា«វាប្រាកដណាស់ គ្មាននរណាទៅពាក់ស្បែកជើងតម្លៃត្រឹម ២០០បាត ឬ ៤-៥ដុល្លារដែលទិញមកពីផ្សារនោះទេ។» ឯអ្នកខ្លះទៀតនិយាយថា «ខ្ញុំមិនយល់ថាហេតុអ្វីបានជាមនុស្សទាំងនោះខ្វល់យ៉ាងនេះ? វាជាលុយរបស់គាត់ ហើយគាត់ចង់ចំណាយយ៉ាងម៉េចក៏បានដែរ។»៕

នៅក្នុងកិច្ចប្រជុំជាតិដ៏សំខាន់មួយប្រព្រឹត្តទៅនៅទីក្រុង Saskatoon នាយករដ្ឋមន្រ្តីកាណាដា លោក Mark Carney បានជួបជាមួយមេរដ្ឋមន្រ្តីទាំង ១០ រដ្ឋ ដើម្បីពិភាក្សា និងផ្ដួចផ្ដើមផែនការជាតិថ្មី សម្រាប់ដំណើរការនិងអនុម័តគម្រោងឧស្សាហកម្មធំៗ ដោយគោលបំណងចម្បងដើម្បីកាត់បន្ថយការពឹងផ្អែកលើការនាំចេញទៅសហរដ្ឋអាមេរិក និងជម្រុញការលូតលាស់សេដ្ឋកិច្ចក្នុងស្រុក។នេះបើតាមប្រភពសារព័ត៌មាន រ៉យទ័រ។

លោក Carney បាននិយាយថា ពេលវេលានៃការអនុម័តបច្ចុប្បន្នសម្រាប់គម្រោងធំៗដូចជា អភិវឌ្ឍន៍ថាមពល ការរុករករ៉ែ និងបណ្តាញដឹកជញ្ជូន អាចត្រូវការរយៈពេលពី ៥ ទៅ ១០ ឆ្នាំ មុននឹងអាចដំណើរការបាន។ ដោយឡែក លោកបានស្នើឲ្យកាត់បន្ថយពេលវេលានេះចុះមកត្រឹម ២ ឆ្នាំប៉ុណ្ណោះ សម្រាប់គម្រោងដែលត្រូវបានកំណត់ថាជាគម្រោង “ផលប្រយោជន៍ជាតិ”។ រដ្ឋាភិបាលសហព័ន្ធនឹងមានតួនាទីក្នុងការជ្រើសរើសគម្រោងទាំងនេះ ហើយសហការជាមួយរដ្ឋាភិបាលខេត្តនីមួយៗសម្រាប់ការអនុវត្ត។

លោក Carney បានបញ្ជាក់ថា ការបញ្ចេញយុទ្ធសាស្ត្រថ្មីនេះមិនត្រឹមតែផ្តោតលើសេដ្ឋកិច្ចប៉ុណ្ណោះទេ ប៉ុន្តែជាជំហានមួយក្នុងការរឹតបន្តឹងឯករាជ្យភាពនយោបាយ និងពាណិជ្ជកម្មរបស់ប្រទេសកាណាដាផងដែរ។ ការជួបប្រជុំនេះកើតឡើងក្នុងស្ថានភាពដែលសហរដ្ឋអាមេរិកកំពុងដាក់ពន្ធលើទំនិញនាំចេញពីកាណាដាជាច្រើនប្រភេទ រួមទាំងថាមពល និងធនធានធម្មជាតិ។

ទោះជាយ៉ាងណា ការខ្វែងគំនិតគ្នាខាងផ្នែកនយោបាយ ក្នុងចំណោមខេត្តនានាបានលេចឡើងយ៉ាងឆាប់រហ័ស។ ខេត្ត Alberta បានបញ្ជាក់ជាច្បាស់ថាពួកគេចង់អោយមានការជម្រុញនិងគាំទ្រគម្រោងបំពង់បង្ហូរប្រេង (bitumen pipeline) ទៅឆ្នេរសមុទ្រខាងលិច ដើម្បីបង្កើនសមត្ថភាពនាំចេញទៅទីផ្សារពិភពលោក។ ផ្ទុយទៅវិញ រដ្ឋ British Columbia បានសម្ដែងការប្រឆាំង ដោយលើកឡើងពីការព្រួយបារម្ភខាងបញ្ហាបរិស្ថាន និងសិទ្ធិរបស់សហគមន៍ជនជាតិដើមភាគតិច

ក្រុមជនជាតិដើមនៅក្នុងប្រទេសកាណាដា ក៏បានលើកឡើងពីការបារម្ភថា ការពន្លឿនដំណើរការនេះប្រហែលជាអាចរំលោ.ភសិទ្ធិដីធ្លីដូនតារបស់ពួកគេ បើគ្មានការពិភាក្សាដែលសមរម្យនិងមានការចូលរួមពិតប្រាកដ។ ពួកគេចង់ឲ្យរដ្ឋាភិបាលធានាឲ្យមានការចូករួមប្រកបដោយអត្ថន័យ និងការគោរពយ៉ាងពេញលេញចំពោះសន្ធិសញ្ញា និងសិទ្ធិរដ្ឋធម្មនុញ្ញ

លោក Carney បានសង្កត់ធ្ងន់ថា “កាណាដាចង់ក្លាយជាប្រទេសដែលអាចផ្គត់ផ្គង់ធនធានជាស្របច្បាប់ និងច្បាស់លាស់ទៅឲ្យពិភពលោក ប៉ុន្តែយើងត្រូវធ្វើវាក្នុងរយៈពេលសមស្រប។ យើងមិនអាចបន្តរង់ចាំរយៈពេលជាច្រើនឆ្នាំនោះទៀតទេ។”

គួរបញ្ជាក់ថា ការចាប់ផ្ដើមនៃផែនការនេះអាចក្លាយជាចំណុចប្រែប្រួលសំខាន់មួយសម្រាប់ទិសដៅសេដ្ឋកិច្ចរបស់កាណាដា។ ទោះជាយ៉ាងណាក៏ដោយ សមត្ថភាពក្នុងការសម្របសម្រួលនយោបាយ ការគោរពសិទ្ធិជនជាតិដើម និងការជ្រើសរើសគម្រោងយ៉ាងយកចិត្តទុកដាក់ នឹងជាសក្តិភាពសំខាន់សម្រាប់ភាពជោគជ័យរបស់គម្រោងទាំងនេះនៅពេលអនាគត៕

អាជ្ញាធរចិនបានអនុវត្តយុទ្ធនាការបរិស្ថានដ៏ធំបំផុតមួយ ដោយសម្អាតសំរាមដែលជាប់នៅក្នុងរូងភ្នំ និងរូងថ្មតូចៗជាច្រើនតោននៅភ្នំ Tianzi ដែលជាចំណុចសំខាន់នៃឧទ្យានជាតិ Zhangjiajie។ តំបន់នេះត្រូវបានអង្គការ UNESCO ចុះបញ្ជីជាបេតិកភណ្ឌពិភពលោក ហើយមានឈ្មោះល្បីថាជា “ភ្នំ Avatar” ដោយសារត្រូវបានគេប្រើជាមូលដ្ឋានសម្រាប់ទីតាំងក្នុងខ្សែភាពយន្ត Avatar ឆ្នាំ ២០០៩។

ក្នុងរយ:ពេលជាច្រើនទសវត្សរ៍មកនេះ មានភ្ញៀវទេសចររាប់លាននាក់បានចូលទស្សនាភ្នំនេះ។ ប៉ុន្តែការធូរលុងនៃគោលការណ៍គ្រប់គ្រងសំរាមបាននាំឲ្យសំណល់ដូចជា ដបផ្លាស្ទិច ប្រអប់អាហារ និងសំណល់សម្ភារៈមិនរលាយផ្សេងៗ កកកុញក្នុងរូងភ្នំ និងជ្រោះជ្រៅជាច្រើន។ អាជ្ញាធរខេត្ត Hunan បានជម្រះបញ្ហានេះដោយចាប់ផ្ដើមយុទ្ធនាការដែលប្រើរយៈពេលជាច្រើនខែចាប់តាំងពីក្នុងឆ្នាំ ២០២៤ ហើយបានបញ្ចប់នៅដើមឆ្នាំ ២០២៥។

ប្រតិបត្តិការនៃការសម្អាតនេះ បានរៀបចំ និងការសហការរវាងរដ្ឋាភិបាល មណ្ឌលអភិរក្ស និងក្រុមស្ម័គ្រចិត្តក្នុងស្រុក និងអន្តរជាតិ។ ប៉ុន្តែតំបន់មួយចំនួនមិនអាចចូលដល់បានទេ លើកលែងតែប្រើខ្សែជំនួយ និងឧបករណ៍សម្អាតពិសេស ដើម្បីយកសំណល់ដែលជាប់នៅក្នុងច្រកភ្នំតូចៗ និងរូងភ្នំបាន។

រូងភ្នំជាច្រើននៅក្នុងតំបន់នេះមានអាយុកាលរាប់រយឆ្នាំមកហើយ ហើយសម្រាប់អ្នកអភិរក្ស វាជាប្រភពវប្បធម៌ និងប្រវត្តិសាស្ត្រដែលមិនអាចជំនួសបាន។ ការបំពុលដ៏សម្បូរបែបនេះបានជះឥទ្ធិពលទៅលើប្រព័ន្ធអេកូឡូស៊ីក្រោមដី ដូចជា កំណើនសារធាតុគីមី និងការប៉ះពាល់ដល់ប្រភពទឹកធម្មជាតិ។ អ្នកជំនាញបានព្រមានថា ប្រសិនបើគ្មានការអន្តរាគមន៍នោះទេ តំបន់នេះនឹងមានហានិភ័យរលាយផ្ទាំងថ្ម និងបាត់បង់សម្បត្តិប្រវត្តិសាស្ត្រទាំងមូល។

ជាការឆ្លើយតប អាជ្ញាធរចិនបានសម្រេចបង្កើនវិធានការទប់ស្កាត់សំណល់ទេសចរណ៍ជាថ្មី ដោយចេញបទប្បញ្ញត្តិហាមចោលសំរាម បង្កើនការឃ្លាំមើល និងបង្កើតកម្មវិធីអប់រំទៅកាន់ភ្ញៀវទេសចរណដែលមកទស្សនា។ អ្នកតំណាងអាជ្ញាធរបាននិយាយថា គោលបំណងនេះមិនមែនត្រឹមតែសម្អាតរម្មណីយដ្ឋានដ៏ស្រស់ស្អាតនេះប៉ុណ្ណោះទេ ប៉ុន្តែជាការបង្កើតទំនួលខុសត្រូវសង្គម និងការយល់ដឹងអំពីការអភិរក្សជាប្រព័ន្ធ។ លើសពីនេះសហគមន៍មូលដ្ឋានបានស្នើឱ្យអាជ្ញាធរជួយជំរុញការអភិវឌ្ឍទេសចរណ៍ចីរភាព ដូចជា បង្ហាញទស្សនកិច្ចអភិរក្ស ឬបង្កើតប្រព័ន្ធតាមដានសំណល់ដែលមានស្រាប់ និងសកម្មភាព ចេញ-ចូលក្នុងតំបន់ដ៏ចម្រូងចម្រាសនេះ។

យ៉ាងណាមិញ ការសម្អាតដោយជោគជ័យនៅភ្នំ Tianzi នេះ មិនត្រឹមជាកិច្ចប្រឹងប្រែងបរិស្ថានទេ ប៉ុន្តែជាការសំដែងនូវភាពរួមចំណែករបស់សាធារណៈក្នុងការពារបេតិកភណ្ឌពិភពលោក។ វាបង្ហាញពីតម្រូវការដែលកាន់តែចាំបាច់នៃការគ្រប់គ្រងទេសចរណ៍ដោយការយល់ដឹង និងការទទួលខុសត្រូវសង្គម ដើម្បីធានាថាផលប្រយោជន៍ធម្មជាតិនេះអាចរក្សាបានសម្រាប់ជំនាន់ក្រោយៗ៕

ប្រទេសថៃ ៖ រដ្ឋមន្ត្រីក្រសួងការពារជាតិ លោក Phumtham Wechayachai បាននិយាយកាលពីថ្ងៃពុធថា រដ្ឋាភិបាលថៃបានត្រៀមផែនការដោះស្រាយជាមួយបណ្ដឹ.ងICJរបស់កម្ពុជា។ លោកបានបញ្ជាក់ថា រដ្ឋាភិបាលនឹងដោះស្រាយវិវាទតាមលទ្ធភាពដែលអាចធ្វើទៅបានតាមរយៈយន្តការគណៈកម្មការព្រំដែនរួម (JBC) ហើយថៃនៅតែរក្សាជំហរមិនទទួលយកយុត្តាធិការរបស់ ICJ ដដែល។ នេះបើយោងតាមសារព័ត៌មានថៃ The Nation Thailand ។

ជាការឆ្លើយតបនឹងពាក្យបណ្ដឹ.ងកម្ពុជាទៅកាន់តុលាការ ICJ ជុំវិញតំបន់ជម្លោះព្រំដែន រួមមានតំបន់មុំបី ប្រាសាទតាមាន់ធំ តាមាន់តូច និងប្រាសាទតាក្របី លោក Phumtham បាននិយាយថា វាជាសិទ្ធិរបស់កម្ពុជាក្នុងដំណើរការនីតិវិធីផ្លូវច្បាប់ ប៉ុន្តែសូមរំលឹកឡើងវិញថា ប្រទេសថៃមិនបានទទួលយកយុត្តាធិការរបស់ ICJ ក្នុងរឿងបែបនេះទេ ចាប់តាំងពីការគ្រប់គ្រងរបស់អតីតនាយករដ្ឋមន្ត្រីលោកស្រី Srettha Thavisin មកម្ល៉េះ។

នៅពេលត្រូវបានសួរថា «តើបញ្ហានេះនឹងប៉ះពាល់ដល់កិច្ចប្រជុំ (JBC) ដែលនឹងគ្រោងធ្វើនៅថ្ងៃសៅរ៍ ទី14 មិថុនា ដែរឬទេ?» លោក Phumtham បានទទួលស្គាល់ថាជម្លោះនេះទំនងជាមិនត្រូវបានដោះស្រាយបានឆាប់រហ័សឡើយ។ រីឯចំពោះសំណួរដែលសួរថា «តើការដាក់ឯកសារឯកតោភាគីរបស់កម្ពុជានឹងមានផលប៉ះពាល់ឬយ៉ាងណានោះ?» លោកបានឆ្លើយតបថា វាពិបាកនឹងទស្សន៍ទាយដែរ។ លោកបានបន្ថែមថា ៖ លោកមិនអាចបកស្រាយព័ត៌មានលម្អិតបានទេ ព្រោះរាល់បញ្ហាផ្លូវច្បាប់នឹងត្រូវចាត់ចែងដោយនាយកដ្ឋានសន្ធិសញ្ញា និងកិច្ចការច្បាប់។

ដោយឡែក ពាក់ព័ន្ធនឹងបញ្ហាច្រកទ្វារអន្តរជាតិ លោក Phumtham បានសង្កត់ធ្ងន់ថា ៖ ចំពោះច្រកព្រំដែនជាមួយប្រទេសកម្ពុជា នៅមិនទាន់ត្រូវបានបិទទាំងស្រុងនោះទេ ប៉ុន្តែត្រូវបើកតាមកាលវិភាគ និងការកំណត់ចំនួនមនុស្សឆ្លងកាត់។ លោកបានបង្ហាញទំនុកចិត្តថា ស្ថានការណ៍នឹងប្រសើរឡើងជាបណ្តើរៗ ដោយលើកឡើងពីការបង្កើនទំនាក់ទំនងរវាងកងទ័ពថៃ និងកម្ពុជានៅលើតំបន់ព្រំដែន រួមជាមួយសំណើសម្រាប់ការល្បាតរួមគ្នា និងសកម្មភាពសហការ។

យ៉ាងណាមិញ បើទោះជាបានប្រកាសសារជាថ្មីអំពីការមិនទទួលយកយុត្តាធិការរបស់តុលាការយុត្តិធម៌អន្តរជាតិក្ដី ប៉ុន្តែប្រទេសថៃនឹងនៅតែដោះស្រាយជាមួយកម្ពុជា ព្រមទាំងបានត្រៀមរួចរាល់ជាមួយនឹងវិធានការឆ្លើយតបដ៏សមស្របផងដែរ។ ជាមួយគ្នានេះ លោក Phumtham បានបញ្ជាក់ប្រាប់អ្នកការសែតវិញថា«តើមិនឲ្យយើងត្រៀមឲ្យរួចរាល់ម៉េចនឹងកើតក្នុងពេលមានវិបត្តិជាតិដូចនេះ?»

Khaby Lame ដែលគេស្គាល់យ៉ាងទូលំទូលាយថាជាតារា TikTok ដ៏ល្បី មានអ្នកតាមដានច្រើនជាងគេនៅលើពិភពលោក ត្រូវបានបង្ខំឱ្យចាកចេញពីសហរដ្ឋអាមេរិក បន្ទាប់ពីការឃុំខ្លួនដោយអាជ្ញាធរអន្តោប្រវេសន៍។ តារាឌីជីថលជនជាតិអ៊ីតាលី ដើមកំណើតសេណេហ្គាល់រូបនេះ ត្រូវបានជាប់គាំងនៅអាកាសយានដ្ឋានអន្តរជាតិ Harry Reid ក្នុងទីក្រុង Las Vegas ដោយមន្ត្រីអន្តោប្រវេសន៍ និងគយសហរដ្ឋអាមេរិក (ICE) ក្រោមសេចក្តីអះអាងថាគាត់បានបំពានលើលក្ខខណ្ឌទិដ្ឋាការ។ នេះបើតាមការចុះផ្សាយរបស់សារព័ត៌មាន The New York Times។

Khaby បានចូលសហរដ្ឋអាមេរិកនៅថ្ងៃទី ៣០ ខែមេសា ប៉ុន្តែបានស្នាក់នៅលើសរយៈពេលដែលកំណត់ក្នុងទិដ្ឋាការ។ ICE បានបញ្ជាក់ថា គាត់បានចាកចេញពីប្រទេសដោយស្ម័គ្រចិត្តកាលពីថ្ងៃសុក្រ ក្រោយពេលត្រូវចាប់ខ្លួន។

ហេតុការណ៍នេះកើតឡើងក្នុងបរិបទនៃការកើនឡើងនៃការអនុវត្តច្បាប់អន្តោប្រវេសន៍យ៉ាងតឹងរ៉ឹងក្រោមរដ្ឋបាលរបស់ប្រធានាធិបតី Donald Trump។ Bo Loudon ដែលជាសកម្មជនវ័យក្មេង (Gen Z) និងអ្នកគាំទ្ររបស់ Trump បានអះអាងថាគាត់មានជាប់ពាក់ព័ន្ធក្នុងការប្រាប់អាជ្ញាធរអំពីស្ថានភាពអន្តោប្រវេសន៍របស់ Khaby។ Loudon ដែលធ្លាប់ជួយ Trump ក្នុងការប្រមូលសំឡេងឆ្នោតពីយុវជន បានអះអាងថា Lame បានរស់នៅក្នុងសហរដ្ឋអាមេរិកដោយខុសច្បាប់ ហើយបានអួតអាងអំពីតួនាទីរបស់គាត់ក្នុងការចាប់ផ្តើមដំណើរការនិរទេសនេះ។

នៅក្នុងបទសម្ភាសន៍តាមប្រព័ន្ធផ្សព្វផ្សាយមួយ Loudon បាននិយាយថា៖ “រឿងនេះកើតឡើងលឿនជាងអ្វីដែលខ្ញុំរំពឹងទុក”។ គាត់ក៏បានបន្ថែមថា Khaby មានទំនាក់ទំនងជាមួយមិត្តភក្តិដែលមានទស្សនៈឆ្វេងនិយម ប៉ុន្តែគ្មានភស្តុតាងសាធារណៈណាមួយបញ្ជាក់ថា Lame មានសកម្មភាពនយោបាយឬជាសមាជិកក្រុមនយោបាយឆ្វេងនិយមឡើយ។

បើទោះជាលោក Lame មិនបានឆ្លើយតបផ្លូវការចំពោះស្ថានភាពនេះនោះក៏ដោយ គាត់នៅតែសកម្មលើបណ្តាញសង្គម។ ការបង្ហោះចុងក្រោយនៅលើ TikTok បង្ហាញថាគាត់កំពុងស្ថិតនៅទីក្រុងសៅប៉ូឡូ ប្រទេសប្រេស៊ីល។ ទោះបីគាត់នៅក្រៅសហរដ្ឋអាមេរិកក៏ដោយ Lame នៅតែបន្តទទួលការគាំទ្រច្រើនពីអ្នកប្រើប្រាស់ជាច្រើន ជាពិសេសមានអ្នកតាមដានលើ TikTok ជាង ១៦០ លាននាក់។

បើទោះបីស្ថានភាពនេះនឹងមានផលប៉ះពាល់ខ្លះទៅលើវត្តមានផ្ទាល់របស់គាត់នៅសហរដ្ឋអាមេរិក ក៏ដោយ កេរ្តិ៍ឈ្មោះ និងឥទ្ធិពលរបស់គាត់លើវិស័យឌីជីថលនៅតែខ្លាំង។ ការសហការជាមួយម៉ាកយីហោម៉ូដ ក្រុមហ៊ុនផលិតភាពយន្ត និងអ្នកផ្សាយពាណិជ្ជកម្មធំៗ បានធ្វើឲ្យ Khaby Lame បន្តជារូបតំណាងសំខាន់ម្នាក់នៃវ័យឌីជីថលជាសកល៕

កាលពីថ្ងៃទី១០ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា យន្តហោះរបស់ក្រុមហ៊ុនអាកាសចរណ៍ American Airlines ដែលមានគោលដៅហោះហើរទៅទីក្រុងណេប៉ូស ប្រទេសអ៊ីតាលី ត្រូវផ្លាស់ប្តូរគោលដៅភ្លាមៗ ដោយគោលដៅថ្មីស្ថិតនៅឆ្ងាយពីគោលដៅចាស់ប្រមាណជាង២២៥គីឡូម៉ែត្រ ។ ការផ្លាស់ប្តូរគោលដៅនេះ ដោយសារយន្តហោះមានទំហំធំជាងផ្លូវ Runway ហើយធ្វើឱ្យអ្នកដំណើរត្រូវជិះរថយន្តក្រុងជាង៣ម៉ោង ដើម្បីមកកាន់គោលដៅចាស់ ។

តាមទិន្នន័យតាមដានរបស់ FlightAware បញ្ជាក់ថា ជើងហោះហើរលេខ៧៨០ របស់ក្រុមហ៊ុនអាកាសចរណ៍ American Airlines បានផ្លាស់ប្តូរគោលដៅភ្លាមៗទៅកាន់អាកាសយានដ្ឋាន Fiumicino ទីក្រុងរ៉ូម ប្រទេសអ៊ីតាលី ពេលកំពុងហោះលើសមុទ្រ Tyrrhenian ។ គោលដៅថ្មីស្ថិតនៅឆ្ងាយពីគោលដៅចាស់ក្នុងទីក្រុងណេប៉ូស ប្រទេសអ៊ីតាលី ចម្ងាយជាង២២៥គីឡូម៉ែត្រ ដោយសារយន្តហោះមានទំហំធំពេកពិបាកចុះចតលើផ្លូវ Runway ។

វាជាយន្តហោះប្រភេទ Boeing 787-9 ដែលស្លាបយន្តហោះមានទំហំធំជាងស្លាបយន្តហោះ Boeing 787-8 ។ ហេតុនេះ ទើបធ្វើឱ្យយន្តហោះនេះពិបាកចុះចតនៅអាកាសយានដ្ឋានក្នុងទីក្រុងណេប៉ូស ហើយក៏ប្តូរទៅចុះចតនៅអាកាសយានដ្ឋាន Fiumicino នៅទីក្រុងរ៉ូម ជំនួសវិញ ។

យន្តហោះបានដឹកអ្នកដំណើរចំនួន២៣១នាក់ ហើយអ្នកដំណើរទាំងអស់ត្រូវជិះរថយន្តក្រុងរយៈពេលជាង៣ម៉ោង ក្នុងចម្ងាយផ្លូវជាង២២៥គីឡូម៉ែត្រ ដើម្បីចាកចេញពីអាកាសយានដ្ឋាន Fiumicino ទីក្រុងរ៉ូម ទៅកាន់អាកាសយានដ្ឋានក្នុងទីក្រុងណេប៉ូស ។ ក្រុមហ៊ុនអាកាសចរណ៍ American Airlines បានចេញសេចក្តីថ្លែងការណ៍ថា ក្រុមហ៊ុនសូមអភ័យទោសយ៉ាងខ្លាំងចំពោះអ្នកដំណើរទាំងអស់សម្រាប់ហេតុការណ៍ដែលកើតឡើងនេះ ។

ការធ្វើដំណើរទៅប្រទេសអ៊ីតាលីជួបឧបសគ្គ ពុំមែនទើបតែកើតឡើងលើកទី១ទេ នាពេលថ្មីៗនេះ យន្តហោះក្រុមហ៊ុនអាកាសចរណ៍ Ryanair មានគោលដៅទៅកាន់ទីក្រុង Milan ប្រទេសអ៊ីតាលី ក៏បានផ្លាស់ប្តូរគោលដៅដែរ ដោយសារមានខ្យល់ព្យុះ និងផ្គររន្ទះ ។ ខ្យល់ព្យុះធ្វើឱ្យអ្នកដំណើររងរបួស៨នាក់ ដោយអ្នកដំណើរបានខកជើងហោះហើរនៅប្រទេសអាល្លឺម៉ង់ និងត្រូវជិះរថយន្តក្រុងជាង៤ម៉ោង ដើម្បីទៅទីក្រុង Milan៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃកាលពីថ្ងៃទី៨ ខែមិថុនា ឆ្នាំ២០២៥ ឱ្យដឹងថា ក្រោយកើតបញ្ហាព្រំដែនរវាងកម្ពុជា-ថៃ និងកងទ័ពថៃផ្លាស់ប្តូរម៉ោងបើក-បិទទ្វារច្រកព្រំដែនឃើញថា ការលក់ដូរទំនិញក្នុងផ្សារឆងចម ស្រុកកាបឈើង ខេត្តសុរិន្ទ មានភាពស្ងប់ស្ងាត់ខ្លាំង ។ ពលរដ្ឋខ្មែរ និងភ្ញៀវទេសចរលែងមកទិញទំនិញដូចមុន ដែលធ្វើឱ្យអាជីវករថៃបារម្ភពីស្ថានការណ៍កើតឡើងធ្វើឱ្យបាត់បង់ចំណូល ។ រីឯអាជីវករខ្មែរលក់ដូរទំនិញនៅផ្សារឆងចមបានបិទទ្វារតូប និងប្រមូលរបស់របរត្រឡប់មកកម្ពុជារង់ចាំឱ្យស្ថានការណ៍ធូរស្រាល ។

ទោះជាផ្សារឆងចមមានសភាពស្ងប់ស្ងាត់ក្តី ប៉ុន្តែអាជីវករថៃភាគច្រើននៅតែបើកតូបលក់ដូរធម្មតា ដោយរំពឹងថា រាជរដ្ឋាភិបាលកម្ពុជា និងថៃនឹងចរចាដោះស្រាយបញ្ហាព្រំដែនដោយសន្តិវិធី ។ អាជីវករថៃត្អូញត្អែរពីប្រាក់ចំណូលធ្លាក់ចុះយ៉ាងខ្លាំង ដោយសារកាលពីថ្ងៃទី៧ ខែមិថុនា កន្លងមក មេបញ្ជាការកងទ័ពថៃភូមិភាគទី២ លោក ប៊ុនស៊ីន ផាគក្លាង បានបញ្ជាឱ្យកងទ័ពគ្រប់គ្រងការបើក-បិទទ្វារច្រកព្រំដែនទាំងអស់ជាប់កម្ពុជាដើម្បីសុវត្ថិភាពពលរដ្ឋថៃ ។

អាជីវករថៃ អ្នកស្រី វ៉ាន់ឌី អាយុ៦២ឆ្នាំ និយាយថា ការលក់ដូរទំនិញស្ងាត់ខ្លាំងណាស់ មិនដឹងលក់ដូរឱ្យអ្នកណាទេ ។ អ្នកស្រីចង់ឱ្យប្រទេសទាំងពីរមានទំនាក់ទំនងល្អឡើងវិញ និងជាប្រទេសជិតខាងល្អ ពីព្រោះពេលកើតបញ្ហា ពលរដ្ឋថៃពិបាកប្រកបមុខរបរ ហើយពុំដឹងជម្លៀសទៅណាបើមានសង្គ្រាម ។ ការបិទព្រំដែនជាឯកតោភាគីរបស់ថៃធ្វើឱ្យផ្សារឆងចមមានភាពស្ងប់ស្ងាត់ ។

ចំណែកច្រកព្រំដែនអូរស្មាច់-ឆងចម (នៅសង្កាត់អូរស្មាច់ ក្រុងសំរោង ខេត្តឧត្តរមានជ័យ) ដែលស្ថិតនៅឆ្ងាយពីផ្សារឆងចមប្រមាណ៣គីឡូម៉ែត្រ គឺមានពលរដ្ឋខ្មែរ-ថៃធ្វើដំណើរឆ្លងកាត់ព្រំដែនជាហូរហែ ប៉ុន្តែចំនួនពលរដ្ឋខ្មែរដែលឆ្លងដែនតាមច្រកអូរស្មាច់បានធ្លាក់ចុះជាងពាក់កណ្តាល ។

ភាគីថៃបានសម្រេចជាឯកតោភាគីឱ្យដំណើរការច្រកព្រំដែនអូរស្មាច់-ឆងចម តែ៣ថ្ងៃប៉ុណ្ណោះក្នុង១សប្តាហ៍ គឺថ្ងៃច័ន្ទ ពុធ និងសុក្រ ចាប់ពីវេលាម៉ោង៨ព្រឹក រហូតដល់ម៉ោង៣រសៀល ខណៈកាលពីមុន ច្រកនេះបើកជារៀងរាល់ថ្ងៃ និងបិទនៅម៉ោង១០យប់ ។

គួរបញ្ជាក់ថា ច្រកអូរស្មាច់-ឆងចមអនុញ្ញាតឱ្យពលរដ្ឋខ្មែរ-ថៃឆ្លងដែន ដោយប្រើប្រាស់លិខិតឆ្លងដែន (Passport) និងប័ណ្ណព្រំដែន (Border Pass) ប៉ុណ្ណោះ ដោយថៃរឹតបន្តឹងការដឹកទំនិញចេញ-ចូល រួមទាំងចាត់វិធានការផ្នែកថាមពលផ្អាកការបញ្ជូនអគ្គិសនីទៅកម្ពុជា ករណីកម្ពុជាបង្កើនកម្លាំងកងទ័ព ដែលថៃចាត់ទុកថាប៉ះពាល់សុវត្ថិភាពពលរដ្ឋខ្លួន ៕