លោក ហេង វិសាល និង ជា ស្រីនា រួមទាំងក្រុមគ្រួសារនិងក្រុមការងារបានដឹកដៃគ្នាយ៉ាងសកម្មក្នុងការជួយទៅដល់ជនភៀសសឹកដែលរងគ្រោះដោយសារតែថៃឈ្លានពានទឹកដីកម្ពុជា។ វិលត្រឡប់មកពីផ្តល់ស្បៀង ហេង វិសាល បានបញ្ជាក់ពីស្ថានភាពនៅទីនោះគឺទទួលបានស្បៀងគ្រប់គ្រាន់ ប៉ុន្តែតំបន់ដែលទើបបង្កើតថ្មីអាចខ្វះស្បៀងតិចតួចប៉ុន្តែមិនដាច់អាហារនោះទេ។ influencer រូបនេះបានសង្កត់ធ្ងន់សូមឱ្យទុកចិត្តនិងជឿជាក់លើរដ្ឋាភិបាលមិនទុកឱ្យប្រជាពលរដ្ឋនិងកងទ័ពចោលនោះទេ។
នៅព្រឹកថ្ងៃទី២៨ កក្កដា លោក ហេង វិសាល បានចេញមករៀបរាប់ពីស្ថានភាពយ៉ាងដូច្នេះថា «ខ្ញុំនិងក្រុមការងារបានត្រឡប់មកពីផ្តល់ស្បៀងវិញហើយ។ រយៈពេល២ថ្ងៃនេះ ពួកយើងបានផ្តល់ស្បៀងនិងសម្ភារៈប្រើប្រាស់ ថ្នាំសង្កូវសរុបចូលគ្នាគឺជាង ១៥០តោន ដល់បងប្អូនជនភៀសសឹក និងបងៗជួរមុខនៅខាងព្រះវិហារ, ពោធិ៍សាត់, សៀមរាប, ឧត្តរមានជ័យ, បន្ទាយមានជ័យក៏ដូចជាបាត់ដំបង។
លោក ហេង វិសាល បានបញ្ជាក់ពីស្ថានភាពថា កំឡុងពេលដែលលោកទៅតំបន់ខ្លះគឺទទួលបានស្បៀងគ្រប់គ្រាន់ ប៉ុន្តែតំបន់ខ្លះជាពិសេសដូចជាតំបន់ដែលទើបតែបង្កើតថ្មីខ្វះស្បៀងតិចតួច ប៉ុន្តែមិនដល់ដាច់អាហារទេ ព្រោះរាជរដ្ឋាភិបាលបានចាត់ចែងជូនពួកគាត់ ហើយពួកយើងក៏ដូចជាបងប្អូនខ្មែរជាច្រើនទៀត ក៏បានទៅផ្តល់ជូនជំនួយបន្ថែមដល់ពួកគាត់ផងដែរ ហើយម្សិលមិញពេលយប់នេះពួកលោកក៏បានផ្ញើទៅសរុបជាង៨០តោន ទៅកាន់ ព្រះវិហារ, ស្រីស្នំ,បាត់ដំបង(បងប្អូនពលករ) , បន្ទាយមានជ័យ, ពោធិ៍សាត់បន្ថែមទៀតផងដែរ។
influencer រូបនេះបានបញ្ជាក់ទៀតថា តាមកន្លែងនីមួយៗគឺមានក្រុមគ្រូពេទ្យប្រចាំការដើម្បីមើលបងប្អូនយើង ហើយកន្លែងបងប្អូនភាសសឹកភាគច្រើនគឺនៅតាមភូមិ ដូច្នេះអ្នកភូមិយើងគឺគាត់ជួយគ្នា មានតែព្រះវិហារពោ៥០០០ប៉ុណ្ណោះដាច់ស្រយាល។ ចំណែកឯ
តាមខេត្តនីមួយៗក៏មានបងប្អូនយើងតាមខេត្ត និងខេត្តជិតនោះបានរ៉ៃអង្គាសផ្តល់នៅស្បៀងជូនបងប្អូនជនភៀសសឹកដូចគ្នា។
សា្វមី ជា ស្រីនា បានបញ្ជាក់ទៀតថា ភាគច្រើនអ្នកដែលខ្វះខាតគឺបងប្អូនដែលទើបនឹងភៀសមកថ្មី មូលហេតុមានច្រើន តែ២ធំៗគឺ ១. គឺដោយសារតែជំលៀសមកច្រើនលឿនពេកក្នុងពេលតែមួយ ២. ខ្វះសម្ភារៈ ភាគច្រើនគឺតង់កៅស៊ូ។ ការបញ្ជាក់ពីស្ថានភាពខាងលើនេះ ហេង វិសាល បានអះអាងថាគឺជាអ្វីដែលលោកនិងក្រុមការងារបានចុះទៅដល់ហើយបានសាកសួរផ្ទាល់ជាមួយនឹងមន្រ្តីប្រចាំការក៏ដូចជា បងប្អូនដែលនៅទីនោះ។
ជាមួយគ្នានេះ ហេង វិសាល បានស្នើឱ្យពលរដ្ឋទុកចិត្តហើយនឹងជឿជាក់ទៅលើរាជរដ្ឋាភិបាល ថាពួកគាត់នឹងមិនទុកបងប្អូន និងកងទ័ពយើងចោលនោះទេ គ្រាន់តែពេលខ្លះគឺពួកគាត់ត្រូវការពេលវេលាចាត់ចែង ដូច្នេះពួកយើងត្រូវមានភាពអំណត់ ហើយអ្វីដែលយើងធ្វើបានគឺនៅតែចូលរួមជួយអ្វីដែលយើងអាចជួយបាន។ លោកក៏បានបញ្ជាក់ចុងក្រោយដែរថា លោកនឹងនៅតែបន្តការប្រមូលស្បៀង និងផ្គត់ផ្គង់ស្បៀងដល់បងប្អូននិងបងៗកងទ័ពយើងបន្តទៀត ដែលកន្លែងបរិច្ចាគគឺនៅ Eat More Eden Garden ៕
