ប្រទេសថៃ ៖ សារព័ត៌មានថៃ 3Plus News រាយការណ៍ថា កាលពីថ្ងៃទី១១ ខែមិថុនា ឆ្នាំ២០២៥ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានធ្វើដំណើរមកខេត្តសុរិន្ទ ហើយលោកស្រីក៏បើកកិច្ចប្រជុំនៅមន្ទីរពេទ្យកាបឈើង និងស្តាប់សេចក្តីរាយការណ៍បញ្ហាព្រំដែនពីមន្ត្រីពាក់ព័ន្ធ និងអភិបាលខេត្តសុរិន្ទ ។ លោកស្រី ផេថងថាន បានបញ្ជាទៅមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ចរចាជាមួយកម្ពុជារឿងម៉ោងបើក-បិទទ្វារច្រកព្រំដែនឱ្យត្រូវគ្នាដើម្បីផលប្រយោជន៍ពាណិជ្ជកម្ម ។

លោកអភិបាលខេត្តសុរិន្ទបានរាយការណ៍ពីស្ថានការណ៍ព្រំដែនកម្ពុជា-ថៃទៅកាន់នាយករដ្ឋមន្ត្រីថៃក្នុងកិច្ចប្រជុំថា ក្រោយពីថៃបានផ្លាស់ប្តូរម៉ោងបើក-បិទទ្វារច្រកព្រំដែននៅខេត្តសុរិន្ទ ឃើញថា វាខុសពេលវេលាជាមួយកម្ពុជា គឺថៃបើកទ្វារច្រកព្រំដែននៅម៉ោង៨ព្រឹក និងបិទម៉ោង៣ល្ងាច ប៉ុន្តែកម្ពុជាបើកម៉ោង៩ព្រឹក និងបិទម៉ោង៤ល្ងាច ។ បើកម្ពុជា-ថៃបើក-បិទទ្វារច្រកព្រំដែននាពេលវេលាដូចគ្នា វានឹងផ្តល់ភាពងាយស្រួលដល់ពលរដ្ឋប្រទេសទាំងពីរឆ្លងដែន ហើយអភិបាលខេត្តសុរិន្ទពុំជ្រាបពីមូលហេតុដែលកម្ពុជាបើក-បិទទ្វារច្រកព្រំដែនខុសពីថៃទេ ។

លោកស្រី ផេថងថាន ថ្លែងថា តើខាងថៃអាចទំនាក់ទំនងទៅកម្ពុជាបានទេ ដើម្បីឱ្យប្រទេសទាំងពីរបើក-បិទទ្ចារច្រកព្រំដែនក្នុងពេលវេលាដូចគ្នា? លោកស្រីក៏បញ្ជាឱ្យមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ដែលបានចូលរួមប្រជុំដែរនោះទៅចរចាជាមួយកម្ពុជា ដោយសុំឱ្យកម្ពុជាបើក-បិទទ្វារច្រកព្រំដែនត្រូវគ្នាជាមួយថៃ ។

លោកស្រី ផេថងថាន បន្តថា បើយើងប្រកាន់យកផលប្រយោជន៍របស់ពលរដ្ឋ ការបើក-បិទទ្វារព្រំដែនដូចគ្នានឹងទទួលបានផលប្រយោជន៍ពាណិជ្ជកម្មស្មើគ្នា ។ សូមឱ្យថៃសាកល្បងជជែកពីពេលវេលាបើក-បិទទ្វារច្រកព្រំដែនជាមួយកម្ពុជា ពុំគួរមានបញ្ហាជាមួយគ្នាទេ ។

ក្រៅពីនេះ នាយករដ្ឋមន្ត្រីថៃបានសំណូមពរឱ្យស្ថាប័នទាំងអស់សហការការងារ និងផ្តល់ដំណឹងទៅពលរដ្ឋឱ្យដឹងថា ស្ថាប័ននីមួយៗធ្វើអ្វីខ្លះដើម្បីឱ្យពលរដ្ឋយល់ ពីព្រោះពេលខ្លះ មានការផ្សព្វផ្សាយព័ត៌មានក្លែងក្លាយធ្វើឱ្យពលរដ្ឋយល់ខុសបង្កភាពច្របូកច្របល់ក្នុងសង្គម ។

សារព័ត៌មានថៃរាយការណ៍ថា ការបើកទ្វារច្រកព្រំដែនរបស់កម្ពុជាយឺតជាងថៃ គឺធ្វើឱ្យរថយន្តដឹកទំនិញថៃចូលមកកម្ពុជាកកស្ទះនៅព្រំដែនរាប់រយគ្រឿង ។ ការផ្លាស់ប្តូរម៉ោងបើក-បិទទ្វារច្រកព្រំដែនអូរស្មាច់-ឆងចម គឺថៃបានអនុវត្តដើម្បីឆ្លើយតបស្ថានការណ៍ព្រំដែនជាមួយកម្ពុជា ដោយថៃបើកព្រំដែនចំនួន៣ថ្ងៃក្នុង១សប្តាហ៍ (ថ្ងៃចន្ទ ពុធ និងសុក្រ) ចាប់ពីម៉ោង៨ព្រឹក ដល់ម៉ោង៣ល្ងាច ៕

ប្រទេសថៃ ៖ ប្រធានសហព័ន្ធឧស្សាហកម្មថៃ (FTI) លោក Kriengkrai Thiennukul បានលើកឡើងថាវិធានការដែលពាក់ព័ន្ធនឹងការបើក និងបិទច្រកព្រំដែន តាមកាលវិភាគរបស់យោធា នឹងធ្វើឱ្យមានការរំខានដល់ការដឹកជញ្ជូនទំនិញឆ្លងកាត់ព្រំដែន ដែលសរុបជាទឹកប្រាក់ប្រហែល 500លានបាត ឬជាង 15លានដុល្លារក្នុងមួយថ្ងៃ។ នេះបើយោងតាមការចុះផ្សាយរបស់សារព័ត៌មានថៃ The Nation Thailand។

លោក Kriengkrai លោកបានពន្យល់ថា ពាណិជ្ជកម្មតាមព្រំដែនរបស់ប្រទេសថៃជាមួយកម្ពុជា មានតម្លៃប្រមាណ ១៧០ពាន់លានបាតក្នុងមួយឆ្នាំ ដោយប៉ុស្តិ៍ត្រួតពិនិត្យ Aranyaprathet នៃខេត្តស្រះកែវ គ្រប់គ្រងពាណិជ្ជកម្មច្រើនបំផុត ដែលស្មើនឹងប្រមាណ ១១០ ពាន់លានបាត ឬប្រហែល ៦៤% នៃតម្លៃសរុប។

លោកបានបន្តថា៖ «នៅពេលនេះ វាពិបាកក្នុងការវាយតម្លៃពីផលប៉ះពាល់ទាំងស្រុង ប៉ុន្តែប្រសិនបើយើងគណនាដោយផ្អែកលើតម្លៃនាំចេញសរុបប្រចាំថ្ងៃ វានឹងមានចំនួនទឹកប្រាក់ប្រហែល ៥០០ លានបាតក្នុងមួយថ្ងៃ»។ “ទោះជាយ៉ាងណាក៏ដោយ វាគួរតែត្រូវបានយល់ថា មិនមែនទាំងស្រុងនៃ 500 លានបាតនេះត្រូវបានប៉ះពាល់ទាំងអស់នោះទេ។ មានតែផ្នែកមួយនៃវាប៉ុណ្ណោះដែលត្រូវបានប៉ះពាល់ ដូច្នេះយើងអាចនិយាយបានថាវាប៉ះពាល់ខ្លះៗ”។

លោក Kriengkrai បញ្ជាក់ថា៖ មិនមានវិធានការដោះស្រាយបញ្ហានៅពេលនេះទេ ដោយសារ FTI កំពុងរង់ចាំលទ្ធផលនៃការចរចាដែលកំពុងបន្តសិន។ យ៉ាងណាក៏ដោយសង្ឃឹមថា ស្ថានការណ៍នឹងមិនអូសបន្លាយយូរពេកទេ ព្រោះការពន្យារពេលកាន់តែយូរ នឹងបង្កើនឥទ្ធិពលកាន់តែខ្លាំង។

ទន្ទឹមនឹងការអនុវត្តវិធានការកែសម្រួលម៉ោងបើក និងបិទ ក៏ដូចជាលក្ខខណ្ឌនៃការចូល និងចេញតាមច្រកព្រំដែនថៃ-កម្ពុជាបែបនេះ នឹងបង្កការខូចខាតយ៉ាងសំខាន់ដល់ភាគីទាំងសងខាង ព្រមទាំងរំខានដល់ជីវភាពប្រចាំថ្ងៃ និង ពាណិជ្ជកម្មរវាងពលរដ្ឋទាំងសងខាងយ៉ាងធ្ងន់ធ្ងរ ដែលនឹងធ្វើឱ្យខូចដល់ភាគីពាក់ព័ន្ធទាំងអស់។

គួរបញ្ចាក់ថា ថ្មីៗនេះរដ្ឋាភិបាលថៃដឹកនាំដោយនាយករដ្ឋមន្ត្រី Paetongtarn Shinawatra បានាទៅមេបញ្ជាការទៅកាន់កងទ័ពភូមិភាគទី២ ឲ្យចរចាជាមួយកម្ពុជាដើម្បីបើក-បិទទ្វារច្រកព្រំដែនឱ្យស្របពេលគ្នា ដើម្បីការពារពាណិជ្ជកម្មរបស់ពលរដ្ឋ និងដើម្បីឲ្យទទួលបានផលប្រយោជន៍ពាណិជ្ជកម្មស្មើគ្នា ។ ជាងនេះទៅទៀត រដ្ឋាភិបាលថៃកំពុងត្រៀមចូលរួមក្នុងកិច្ចប្រជុំគណៈកម្មការព្រំដែនចម្រុះ (JBC) ជាមួយកម្ពុជា ដែលនឹងធ្វើឡើងនៅថ្ងៃទី១៤ ខែមិថុនា ខណៈដែលកម្ពុជារក្សាជំហរក្នុងការដោះស្រាយបញ្ហាព្រំដែនតាមរយៈតុលាការយុត្តិធម៌អន្តរជាតិ (ICJ)៕

បុរសវ័យ ៣៥ ឆ្នាំម្នាក់នៅប្រទេសចិន ដែលមិនជឿលើការរៀបការ និងគិតថាការងារជារឿងគ្មានប្រយោជន៍ បានបោះបង់ពីជីវិតក្នុងសង្គមស៉ីវិល័យទៅរស់នៅក្នុងរូងភ្នំអស់រយៈពេល ៤ ឆ្នាំ។ បុរសនោះឈ្មោះ Min Hengcai មកពីខេត្ត Sichuan ភាគនិរតីនៃប្រទេសចិន។ គាត់បានកែប្រែរូងភ្នំមួយនៅភូមិដើមកំណើតរបស់គាត់ឲ្យក្លាយជាផ្ទះរបស់ខ្លួន។

នៅចុងឆ្នាំ ២០២១ Min បានបោះបង់ការងារជាអ្នកបើករថយន្តសេវាកម្មតាមកម្មវិធី ដែលធ្លាប់រកចំណូលបានដល់ ១០,០០០ យន់ ឬប្រហែល ១៤០០ ដុល្លារ ក្នុងមួយខែនៅទីក្រុង។ គាត់បានសម្រេចចិត្តត្រលប់ទៅភូមិកំណើតវិញ ដើម្បីរស់នៅដោយឯកឯង។ គាត់និយាយថា ការងារមិនមានន័យអ្វីឡើយ បើទោះបីជា កាលពីមុនគាត់ធ្វើការ ១០ ម៉ោង ក្នុងមួយថ្ងៃ ដើម្បីសងបំណុលដែលជំពាក់សាច់ញាតិរបស់គាត់ក៏ដោយ។

បច្ចុប្បន្ន គាត់នៅតែជំពាក់ធនាគារ និងក្រុមហ៊ុនផ្តល់ប្រាក់កម្ចីប្រហែល ៣០០,០០០ យន់ (៤២,000 ដុល្លារ) ទៀត។ គាត់បានបោះបង់ក្តីសង្ឃឹមក្នុងការសងប្រាក់បំណុល ដោយនិយាយថា ទ្រព្យសម្បត្តិដែលគាត់អាចលក់សងបាន ត្រូវសាច់ញាតិរបស់គាត់លក់អស់ហើយ។

លោក Min បានប្តូរដីធំរបស់គាត់ជាមួយដីតូចរបស់អ្នកភូមិរួមម្នាក់ ដើម្បីអាចរស់នៅជិតរូងភ្នំនោះ។ គាត់បានចំណាយ ៤០,០០០ យន់ (៦,000 ដុល្លារ) ដើម្បីកែលម្អរូងភ្នំនេះឲ្យក្លាយជាផ្ទះដែលមានទំហំប្រហែល ៥០ ម៉ែត្រការ៉េប៉ុណ្ណោះ។ ជីវិតប្រចាំថ្ងៃរបស់គាត់គឺ ភ្ញាក់នៅម៉ោង ៨ ព្រឹក ហើយចំណាយពេលពេញមួយថ្ងៃដើម្បី អានសៀវភៅ ដើរលេងជុំវិញផ្ទះ និងធ្វើកសិកម្មលើដី។ គាត់ចូលគេងម៉ោង ១០ យប់ ហើយភាគច្រើនហូបបន្លែដែលគាត់ដាំបាន។ គាត់និយាយថា គាត់ចំណាយលើតែរឿងចាំបាច់ប្រចាំថ្ងៃបន្តិចបន្តួចប៉ុណ្ណោះ។

បើតាមប្រភពសារព័ត៌មាន South China Morning បានឱ្យដឹងថា នេះជារបៀបរស់នៅក្នុងក្ដីសុបិនរបស់គាត់ ចាប់តាំងពីនៅទីក្រុងមកម្លះ។ គាត់ក៏ចែករំលែកជីវិតលើបណ្តាញសង្គម ដែលមានអ្នកតាមដានប្រមាណ ៤០,០០០ នាក់។ ការផ្សាយផ្ទាល់ក៏អាចជួយគាត់រកចំណូលបានផងដែរ។ គាត់បានដាក់ឈ្មោះផ្ទះរូងភ្នំរបស់គាត់ថា “Black Hole” ឬ (ប្រហោងខ្មៅ) ដើម្បីបង្ហាញថា នេះជាពិភពលោកទាំងមូលរបស់គាត់ ហើយជារបៀបនៃការរំលឹកដល់ខ្លួនឯងថា មនុស្សគឺតូចតាចក្នុងពិភពលោកដ៏ធំនេះ។

Min បានប្រាប់ស្ថានីយ៍ទូរទស្សន៍ Sichuan ថា គាត់បដិសេធការរៀបការ ពីព្រោះគាត់គិតថា វាជាការខ្ជះខ្ជាយពេលវេលា និងប្រាក់។ គាត់និយាយថា «ឱកាសនៃការស្វែងរកស្នេហាដែលពិតប្រាកដ គឺទាបណាស់។ ហេតុអ្វីខ្ញុំត្រូវខិតខំធ្វើការដើម្បីអ្វីដែលកម្រមានដូចនោះ?»

ជីវិតរបស់គាត់បានបង្កការចាប់អារម្មណ៍យ៉ាងខ្លាំងលើបណ្តាញអ៊ីនធឺណិត។ មនុស្សមួយចំនួនបាននិយាយថា គាត់ជាអ្នក “Tang Ping” ដែលជាពាក្យចិនមានន័យថា “ដេកផ្អៀង” និងសំដៅទៅលើរបៀបរស់នៅបែបធម្មតា មិនប្រកួតប្រជែង និងគ្រាន់តែរស់នៅឲ្យតែមានជីវិតទៅតែប៉ុណ្ណោះ។

អ្នកមួយចំនួនទៀតសរសើរថា ទោះបីគាត់មិនបានរៀនចប់មធ្យមសិក្សាក៏ដោយ Min គឺជាទស្សនវិទូពិតម្នាក់។ ចំណែកអ្នកប្រើអ៊ីនធឺណិតម្នាក់សរសើរថា «នេះហើយ ជាជីវិតនៅស្ថានសួគ៌»។ រីឯអ្នកខ្លះផ្សេងទៀតវិញ មានការសង្ស័យថា តើ Min ពិតជារស់នៅឯកឯងដែរឬទេ ពីព្រោះគាត់នៅតែធ្វើការផ្សាយផ្ទាល់ និងទទួលសម្ភាសន៍ជារឿយៗ៕

ថៃ៖ ទីបញ្ជាការកងយោធពលភូមិន្ទថៃ កាលពីថ្ងៃទី ១១ ខែមិថុនា បានចេញផ្សាយលទ្ធផលស្ទង់មតិពីវិធានការកំណត់ពេលវេលាឆ្លងកាត់ព្រំដែនរវាងថៃនិងកម្ពុជា ដោយបង្ហាញថា ក្នុងរយៈពេលត្រឹមតែ៣ថ្ងៃដំបូង ចំនួនករណីឆបោក និងការជួ.ញដូរមនុស្សបានថយចុះ ៣១,៤៥% គួរឱ្យកត់សម្គាល់នៃករណីឧក្រិដ្ឋកម្មឆ្លងដែន។

យោងតាមការជូនដំណឹងដោយ ទីបញ្ជាការកងយោធពលភូមិន្ទថៃ (RTAFH) នៅថ្ងៃទី៩ ខែមិថុនា ឆ្នាំ២០២៥ បានឲ្យដឹងថា ចំនួនករណីឆបោក និងការជួ.ញដូរមនុស្សនៅក្នុងប្រទេសថៃ ត្រូវបានកាត់បន្ថយក្នុងរយៈពេល 3 ថ្ងៃចុងក្រោយនេះ ជាមួយនឹងការបង្កើនការត្រួតពិនិត្យញឹកញាប់ និងការសម្របសម្រួលជាមួយភ្នាក់ងារសន្តិសុខ និងប៉ូលីសព្រំដែន ដែលជាលទ្ធផលវាបានជះឥទ្ធិពលយ៉ាងខ្លាំងដល់ស្ថានភាពឧក្រិដ្ឋក.ម្មឆ្លងប្រទេស។

ប្រភពដដែលបានបន្ថែមទៀតថា សម្រាប់ចំនួនករណីការក្លែងបន្លំតាមអ៊ីនធឺណិត (Scammer) និងការជួ.ញដូរមនុស្សបានធ្លាក់ចុះរហូត 31.45% បើធៀបនឹងរយៈពេលដូចគ្នា មុនពេលការអនុវត្តការរឹតបន្តឹងព្រំដែនថៃ-កម្ពុជា។ ការថយចុះនូវបទល្មើសឆ្លងដែននេះ គឺតំណាងឱ្យភាពជោគជ័យមួយសម្រាប់វិធានការល្បាតរបស់ប៉ូលីសថៃ។

RTAFH បានបញ្ជាក់ថា ការធ្លាក់ចុះនៃស្ថិតិបែបនេះ មិនមែនគ្រាន់តែជាសមិទ្ធិផលនៃយុទ្ធសាស្ត្រព្រំដែនប៉ុណ្ណោះទេ ប៉ុន្តែវាឆ្លុះបញ្ចាំងពីសុវត្ថិភាពសាធារណៈ និងរូបភាពសន្តិសុខរបស់ប្រទេសនៅលើឆាកពិភពលោកផងដែរ។ ជាងនេះទៅទៀត វិធានការទាំងនេះគឺជាឧទាហរណ៍នៃកិច្ចសហប្រតិបត្តិការដ៏ខ្លាំងក្លារវាងភ្នាក់ងារសន្តិសុខ ក្រោមពាក្យស្លោក “រួមគ្នាតែមួយយើងនឹងឈ្នះ” ព្រោះបេសកកម្មគឺការពារជាតិ យើងត្រូវរស់នៅដោយចិត្តសាមគ្គី។

គួររំលឹកថា កាលពីពេលថ្មីៗនេះថៃបានសម្រេចផ្លាស់ម៉ោងចេញ-ចូលតាមច្រកព្រំដែនជាមួយកម្ពុជាជាឯកតោភាគី និងកំណត់រយៈពេលស្នាក់នៅសម្រាប់ពលរដ្ឋ ឬភ្ញៀវទេសចរកាន់ទិដ្ឋការខ្មែរតាមច្រកព្រំដែន ឲ្យនៅត្រឹមរយៈពេល៧ថ្ងៃប៉ុណ្ណោះ។ អ្នកនាំពាក្យក្រសួងការបរទេសថៃបាននិយាយកាលពីថ្ងៃទី៩ ខែមិថុនា កន្លងមកថា ថៃនៅមិនទាន់ប្រាកដចិត្តថា នឹងអនុវត្តគោលការណ៍ថ្មីនេះ រហូតដល់ពេលណានោះទេ ។ ថៃនឹងរង់ចាំឱ្យស្ថានការណ៍ល្អប្រសើរឡើងវិញ និងរង់ចាំឱ្យភាគីទាំងពីរបានជជែកគ្នាពីគោលការណ៍អន្តោប្រវេសន៍ម្តងទៀតជាមុនសិន ៕

ប្រទេសថៃ ៖ សារព័ត៌មានថៃ Khaosod រាយការណ៍កាលពីថ្ងៃទី១២ ខែមិថុនា ឆ្នាំ២០២៥ ថា បច្ចុប្បន្ន មុខរបរលក់ចំណីអាហារតាមផ្លូវ១ក្នុងចំណោម៣មុខរបរនៅប្រទេសថៃបានបិទលែងដំណើរការ ដោយសារពុំទទួលប្រាក់ចំណូល និងពុំអាចជួយផ្គត់ផ្គង់ជីវភាពគ្រួសារឱ្យល្អប្រសើរក្រោយពីបាត់បង់ភ្ញៀវទេសចរចិន ។ សេដ្ឋកិច្ចថៃធ្លាក់ចុះបណ្តាលឱ្យការលក់ចំណីអាហារស្ងប់ស្ងាត់គ្មានអ្នកទិញ ពលរដ្ឋ​ជំពាក់បំណុល ដែលបញ្ហានេះនឹងមានផលប៉ះពាល់ដល់សហគ្រាសធុនតូច និងមធ្យមផងដែរ ។

កាលពីថ្ងៃទី១២ ខែមិថុនា ឆ្នាំ២០២៥ លោក សរ៉ាថេប រ៉ូផាត់ចាណារ៉ាត់សាទីព នាយកសមាគមអាជីវកម្មភោជនីយដ្ឋាន និងទីប្រឹក្សាកិត្តិយសនៃសមាគមសណ្ឋាគារថៃនិយាយថា អាជីវកម្មភោជនីយដ្ឋាននៅត្រីមាសទី២ ឆ្នាំនេះធ្លាក់ចុះខ្លាំងជាងត្រីមាសទី១ ។ ក្រៅពីនេះ អាជីវកម្មភោជនីយដ្ឋានបានជាប់ចំណាត់ថ្នាក់ក្នុងអាជីវកម្មដែលបិទលែងដំណើរការច្រើនបំផុត ។

អ្វីគួរឱ្យភ្ញាក់ផ្អើល និងបារម្ភបំផុត គឺអាជីវកម្មលក់ចំណីអាហារតាមផ្លូវ (Street foods) បានបិទលែងដំណើរការ ឬរកស៊ីខាតច្រើនបំផុត ហើយបញ្ហានេះនឹងរាលដាលដល់សហគ្រាសធុនតូច និងមធ្យម (SMEs ) ។ យើងសង្កេតឃើញថា ហាងលក់ចំណីអាហារតាមតំបន់ទេសចរណ៍ និងកន្លែងផ្សេងៗបានដាក់ស្លាកលក់អាជីវកម្មជាច្រើន ។ ផលប៉ះពាល់សម្រាប់អាជីវកម្មភោជនីយដ្ឋាន គឺសមាគមម្ចាស់អាជីវកម្មម្ហូបអាហារបានស្នើឱ្យរដ្ឋាភិបាលដោះស្រាយតាំងពីចុងឆ្នាំ២០២៤ ពីព្រោះអាជីវកម្មអាហារនឹងបិទទ្វារបន្តបន្ទាប់ទៀត ប៉ុន្តែរដ្ឋាភិបាលគ្មានគោលនយោបាយជំរុញសេដ្ឋកិច្ច ឬជួយអាជីវកម្មអាហារទេ ។ បញ្ហាធំដែលអាជីវកម្មភោជនីយដ្ឋានប្រឈម គឺការទិញអាហាររបស់ពលរដ្ឋធ្លាក់ចុះ១៤% និងភ្ញៀវទេសចរចិនធ្លាក់ចុះ៣៥% ។

បញ្ហាសំខាន់មួយទៀត គឺតម្លៃបន្លែ ត្រីសាច់ និងគ្រឿងផ្សំអាហារកើនឡើងខ្ពស់ រហូតដល់អ្នកលក់អាហារជាច្រើនពុំអាចប្រកបរបរលក់ដូរបន្តទៀត និងបិទទ្វារជាច្រើន ហើយគ្មានភោជនីយដ្ឋានបើកថ្មី ។ បញ្ហានេះដោយសារគ្រឿងផ្សំឡើងថ្លៃ ដូចជា ៖ ប្រេងសណ្តែក ស្ករ បន្លែ សាច់ជ្រូក ស៊ុត ហើយសូម្បីតែអគ្គិសនីក៏ឡើងថ្លៃដែរ ។

មិនមែនមានតែអាជីវកម្មភោជនីយដ្ឋាន និងមុខរបរលក់ចំណីអាហារតាមផ្លូវទេដែលប្រឈមនឹងការខាតបង់ គឺអ្នកលក់ដូរទំនិញក្នុងផ្សារក៏រងផលប៉ះពាល់ដូចគ្នា ពីព្រោះភោជនីយដ្ឋានគ្មានភ្ញៀវ ទំនិញក្នុងផ្សារក៏លក់លែងដាច់ ។ លើសពីនេះ វាប៉ះពាល់ដល់បុគ្គលិកធ្វើការផ្នែកអាហារ ដូចជា ៖ បុគ្គលិកដឹកជញ្ជូនតាមម៉ូតូ ខណៈរ៉ឺម៉កកង់៣គ្មានអ្នកជិះ ឬមានភ្ញៀវតិចតួច ។

បច្ចុប្បន្ន អាជីវកម្មភោជនីយដ្ឋានពុំជួលបុគ្គលិកបន្ថែមទៀត ហើយបើមានបុគ្គលិកណាឈប់ ភោជនីយដ្ឋានពុំជ្រើសរើសបុគ្គលិកថ្មីទេ ។ វាគួរឱ្យបារម្ភណាស់ ពីព្រោះពលរដ្ឋថៃជំពាក់បំណុលរហូតដល់១០៤% ហើយពេលពលរដ្ឋគ្មានការងារធ្វើកាន់តែច្រើន វាមិនត្រឹមតែធ្វើឱ្យថៃមានបញ្ហាសេដ្ឋកិច្ចប៉ុណ្ណោះទេ ប៉ុន្តែវាក្លាយជាបញ្ហាសង្គម ។ នេះបើតាមការលើកឡើងរបស់លោក សរ៉ាថេប នាយកសមាគមអាជីវកម្មភោជនីយដ្ឋាន ៕

ប្រទេសចិនគ្រោងនឹងប្រែក្លាយទីក្រុង Shenzhen ភាគខាងត្បូងទៅជាមជ្ឈមណ្ឌលដ៏សំខាន់មួយសម្រាប់បញ្ញាសិប្បនិម្មិត (AI) និងអាកាសចរណ៍ ដែលជាផ្នែកនៃកិច្ចខិតខំប្រឹងប្រែងធំជាងមុន ដើម្បីក្លាយជាប្រទេសផ្អែកលើខ្លួនឯងបន្ថែមទៀតនៅក្នុងវិស័យបច្ចេកវិទ្យា។ ការផ្លាស់ប្តូរនេះកើតឡើងនៅពេលដែលសហរដ្ឋអាមេរិកបន្តដាក់កម្រិតលើក្រុមហ៊ុនបច្ចេកវិទ្យាចិន។ នេះបើតាមប្រភព South China Morning Post។

Shenzhen ត្រូវបានគេស្គាល់ថាជាទីក្រុងបច្ចេកវិទ្យាកំពូលមួយរបស់ប្រទេសចិន។ ឥឡូវនេះរដ្ឋាភិបាលចង់ប្រែក្លាយទៅជាទីក្រុងនាំមុខគេក្នុងការអភិវឌ្ឍម៉ាស៊ីនឆ្លាតវៃ ប្រព័ន្ធកុំព្យូទ័រដែលមានសម្ថភាពចង់ចាំខ្ពស់ និងបច្ចេកវិទ្យាយន្តហោះទំនើប។ មន្ត្រីក្នុងតំបន់បានប្រកាសផែនការថ្មីក្នុងការជំរុញឧស្សាហកម្មដូចជា AI, មនុស្សយន្ត, គ្រឿងអេឡិចត្រូនិក និងឧស្សាហកម្មផលិតយន្តហោះជាដើម។

ផ្នែកសំខាន់មួយនៃផែនការគឺការកសាងបណ្តាញកុំព្យូទ័រទំនើបមួយដែលមានឈ្មោះថា “Pengcheng Cloud Brain”។ ប្រព័ន្ធនេះនឹងជួយអ្នកវិទ្យាសាស្ត្រ និងក្រុមហ៊ុនក្នុងតំបន់ក្នុងការបណ្តុះបណ្តាលកម្មវិធី AI កាន់តែលឿន និងមានប្រសិទ្ធភាព។ កម្មវិធីទាំងនេះអាចរួមបញ្ចូលអ្វីៗដូចជា chatbots ជំនួយការឆ្លាតវៃ រថយន្តបើកបរដោយខ្លួនឯង និងជាច្រើនទៀត។

ក្រៅពីបច្ចេកវិទ្យា AI ទីក្រុង Shenzhen ក៏នឹងផ្តោតទៅលើការក្លាយជាមជ្ឈមណ្ឌលអាកាសចរណ៍ពិភពលោកផងដែរ។ នេះមានន័យថា ទីក្រុងនឹងពង្រីកអាកាសយានដ្ឋានរបស់ខ្លួន និងគាំទ្រការរចនា ព្រមទាំងការសាងសង់យន្តហោះ ប្រព័ន្ធម៉ាស៊ីន និងប្រព័ន្ធរុករកផងដែរ។ ក្នុងគោលបំណងគឺដើម្បីធ្វើឱ្យ Shenzhen ក្លាយជាមជ្ឈមណ្ឌលសម្រាប់ទាំងការស្រាវជ្រាវអាកាសចរណ៍ និងការដឹកជញ្ជូនតាមផ្លូវអាកាសអន្តរជាតិ។

ដើម្បីជួយដល់ការផ្លាស់ប្តូរនេះ រដ្ឋាភិបាលនឹងផ្តល់ការគាំទ្រ ដូចជាការបញ្ចុះពន្ធ ដីពិសេសសម្រាប់រោងចក្រ និងកម្មវិធីបណ្តុះបណ្តាលសម្រាប់បុគ្គលិកជំនាញ។ រដ្ឋាភិបាលក៏ចង់ឱ្យឧស្សាហកម្មផ្សេងៗមានទំនាក់ទុះនងគ្នាដូចជា AI ,ឧស្សាហកម្មអាកាសចរណ៍ និងមនុស្សយន្ត ធ្វើការយ៉ាងជិតស្និទ្ធជាមួយគ្នា ដូច្នេះទើបពួកគេអាចរីកចម្រើនបានលឿនជាងមុន។

កិច្ចខិតខំប្រឹងប្រែងនេះគឺជាយុទ្ធសាស្រ្តដ៏ធំមួយរបស់ប្រទេសចិនក្នុងការកាត់បន្ថយការពឹងផ្អែកលើបច្ចេកវិទ្យាបរទេស។ ចាប់តាំងពីសហរដ្ឋអាមេរិកបានរារាំងក្រុមហ៊ុនចិនពីការទិញផលិតផលបច្ចេកវិទ្យាខ្ពស់មួយចំនួន ឥឡូវនេះប្រទេសចិនកំពុងផ្តោតការយកចិត្តទុកដាក់បន្ថែមទៀតលើការបង្កើតបច្ចេកវិទ្យាទំនើបផ្ទាល់ខ្លួន។ តាមរយៈការធ្វើឱ្យទីក្រុង Shenzhen ក្លាយជាមជ្ឈមណ្ឌលបច្ចេកវិទ្យា AI ប្រទេសចិនសង្ឃឹមថានឹងរក្សាភាពរឹងមាំនៅក្នុងការប្រកួតប្រជែងបច្ចេកវិទ្យាពិភពលោក និងបន្តពង្រីកសេដ្ឋកិច្ចរបស់ខ្លួន បើទោះបីជាមានសម្ពាធពីខាងក្រៅក៏ដោយ៕