រាជធានីភ្នំពេញ៖ ចាប់ពីពេលនេះតទៅ បេក្ខជនទាំងអស់ ដែលដាក់ពាក្យសុំទិដ្ឋាការមិនមែនអន្តោប្រវេសន៍ប្រភេទ F, M, ឬ J ត្រូវបានស្នើសុំឱ្យកែសម្រួលការកំណត់ឯកជនភាពលើគណនីបណ្តាញសង្គមទាំងអស់របស់ពួកគេទៅជា «សាធារណៈ ឬ Public» ដើម្បីសម្រួលដល់ការត្រួតពិនិត្យជាចាំបាច់ទៅលើអត្តសញ្ញាណ និងការអនុញ្ញាតឱ្យចូលសហរដ្ឋអាមេរិក តាមច្បាប់របស់សហរដ្ឋអាមេរិក។

យោងតាមការបង្ហោះនៅលើទំព័រហ្វេសប៊ុករបស់ស្ថានទូតអាមេរិកប្រចាំនៅកម្ពុជាបានឲ្យដឹងថា ការតម្រូវបែបនេះ គឺដើម្បីវិនិច្ឆ័យលើបេក្ខជនទាំងឡាយណា ដែលពុំអាចអនុញ្ញាតឱ្យចូលទៅកាន់សហរដ្ឋអាមេរិកបាន ក្នុងនោះរួមមានអ្នកដែលបង្កគ្រោះថ្នាក់ដល់សន្តិសុខជាតិអាមេរិកជាដើម។

គួរឲ្យដឹងផងដែរថា ចាប់តាំងពីឆ្នាំ 2019 មក សហរដ្ឋអាមេរិកបានទាមទារឱ្យអ្នក ដែលបានដាក់ពាក្យសុំទិដ្ឋាការទាំងអស់ផ្តល់ឱ្យនូវអត្តសញ្ញាណក្នុងបណ្តាញសង្គមរបស់ពួកគេ ដោយបញ្ជាក់នៅលើទម្រង់ពាក្យសុំទិដ្ឋាការអន្តោប្រវេសន៍ និងមិនមែនជាជនអន្តោប្រវេសន៍។

ជាងនេះទៅទៀត អ្នកដាក់ពាក្យសុំទិដ្ឋាការទាំងអស់ត្រូវតែរាយការណ៍អំពីឈ្មោះគណនីបណ្តាញសង្គមទាំងអស់ ដែលពួកគេបានប្រើប្រាស់ក្នុងរយៈពេល 5 ឆ្នាំចុងក្រោយ លើទម្រង់ដាក់ពាក្យសុំទិដ្ឋាការ DS-160។ អ្នកដាក់ពាក្យត្រូវតែបញ្ជាក់ថាព័ត៌មានក្នុងពាក្យសុំទិដ្ឋាការរបស់ពួកគេ គឺព័ត៌មានពិត និងត្រឹមត្រូវមុនពេលពួកគេចុះហត្ថលេខា និងបញ្ជូន។ ការមិនបញ្ជាក់ព័ត៌មានអំពីបណ្តាញសង្គមនៅក្នុងពាក្យសុំទិដ្ឋាការ អាចនាំឱ្យមានការបដិសេធមិនអោយទទួលបានទិដ្ឋាការ និងមិនអាចមានសិទ្ធិទទួលបានទិដ្ឋាការនាពេលអនាគត។

គួរបញ្ជាក់ថា ការកំណត់លក្ខខណ្ឌក្នុងការត្រួតពិនិត្យលើគណនីបណ្ដាញសង្គមរបស់បេក្ខជនដែលស្នើសុំទិដ្ឋាការនេះ គឺសំដៅលើទិដ្ឋាការដែលមិនមែនទិដ្ឋាការអន្តោប្រវេសន៍ប្រភេទ F, M, ឬ J។ ទិដ្ឋាការប្រភេទ F គឺសំដៅលើទិដ្ឋាការសម្រាប់និស្សិតបរទេសដែលចង់សិក្សានៅសហរដ្ឋអាមេរិក, ទិដ្ឋាការប្រភេទ M គឺសម្រាប់និស្សិតដែលចង់សិក្សានៅគ្រឹះស្ថានមិនសិក្សាដូចជាសាលាបច្ចេកទេស ឬវិជ្ជាជីវៈ, ហើយទិដ្ឋាការប្រភេទ J គឺសម្រាប់អ្នកចូលរួមក្នុងកម្មវិធីផ្លាស់ប្តូរវប្បធម៌ និងអប់រំ។ ទិដ្ឋាការទាំងនេះមានលក្ខខណ្ឌ និងតម្រូវការខុសៗគ្នា អាស្រ័យលើគោលបំណងនៃការស្នាក់នៅ និងប្រភេទនៃកម្មវិធីសិក្សា។

ដូចនេះ រាល់ការស្នើសុំទិដ្ឋការផ្សេងក្រៅពីទិដ្ឋាការប្រភេទទាំងបីខាងលើនេះ នឹងតម្រូវឲ្យមានការត្រួតពិនិត្យតឹងរឹងលើរបៀបប្រើប្រាស់បណ្ដាញសង្គមរបស់បេក្ខជនដែលស្នើសុំជាមុនសិន នោះទើបខាងទូតអាមេរិកអាចសម្រេចបានថា បេក្ខជនរូបនោះគួរទទួលបានទិដ្ឋាការដើម្បីចូលទឹកដីអាមេរិកដែរឬទេ៕

ប្រទេសថៃ ៖ កាលពីថ្ងៃទី២៤ ខែមិថុនា ឆ្នាំ២០២៥ លោក ថាណាឆាត ណុមនុន នាយកវិទ្យាស្ថាន IMC និងជាបុគ្គលល្បីនៅប្រទេសថៃ បានសរសេរក្នុងហ្វេសប៊ុកឈ្មោះ «Thanachart Numnonda» ពីករណីរដ្ឋាភិបាល លោកស្រី ផេថងថាន ស៊ីណាវ៉ាត់ អះអាងថា ថៃចាត់វិធានការបង្ក្រាបឧក្រិដ្ឋ.កម្មឆ្លងដែននៅកម្ពុជា ដើម្បីការពារកុំឱ្យពលរដ្ឋថៃក្លាយជាជនរងគ្រោះ ។ ហេតុអ្វីនាយករដ្ឋមន្ត្រីថៃទើបតែចាត់វិធានការបង្ក្រាបឧក្រិដ្ឋ.កម្មឆ្លងដែន ពីព្រោះនាយករដ្ឋមន្ត្រីថៃបណ្តោយឱ្យមានឧក្រិដ្ឋកម្មយូរហើយ គួរបង្ក្រាបតាំងពីដំបូង មិនមែនបង្ក្រាបពេលបែកធ្លាយកិច្ចសន្ទនាទេ ។

លោកស្រី ផេថងថាន និយាយថា រដ្ឋាភិបាលថៃនឹងពុំព្រមឱ្យពលរដ្ឋថៃចាញ់បោកឧក្រិដ្ឋកម្មឆ្លងដែនបន្តទៀត ហើយលោក ថាណាឆាត បាននិយាយពីការបែកធ្លាយកិច្ចសន្ទនារបស់លោកស្រី ផេថងថាន ជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថា គ្មានឧក្រិដ្ឋកម្មឆ្លងដែនអ្វីទេ ប៉ុន្តែជាការជជែករឿងផ្ទាល់ខ្លួនដោយយកផលប្រយោជន៍ជាតិមកចរចា ។ លោកស្រី ផេថងថាន ពុំបានចាញ់បោកឧក្រិដ្ឋកម្មឆ្លងដែនទេ ប៉ុន្តែដៃគូសន្ទនារបស់លោកស្រីជាអ្នកបង្ហាញកិច្ចសន្ទនានេះ ។

លោក ថាណាឆាត បន្តថា ការបង្ក្រាបឧក្រិដ្ឋកម្មឆ្លងដែន ឬកាត់ផ្តាច់សេវាអ៊ីនធើរណេត គឺនាយករដ្ឋមន្ត្រីថៃគួរតែធ្វើតាំងពីពេលចិនមកបង្ក្រាបក្រុមឆបោកតាមអនឡាញនៅប្រទេសមីយ៉ាន់ម៉ា ។ យើងគ្រប់គ្នាជ្រាបច្បាស់ថា ជនរងគ្រោះដែលត្រូវចាប់យកទៅធ្វើការនៅមីយ៉ាន់ម៉ា គឺជាជនបរទេស ជាពិសេស ជនជាតិចិន ហើយមានពលរដ្ឋថៃខ្លះត្រូវបង្ខំឱ្យធ្វើការនៅកម្ពុជា ប៉ុន្តែនាយករដ្ឋមន្ត្រីពុំបង្ក្រាបពេលនោះ ។

លោកពុំដឹងពីមូលហេតុអ្វីដែលថៃពុំបង្ក្រាបក្រុមឆបោកតាមអនឡាញ និងគ្មានការកាត់ផ្តាច់សេវាអ៊ីនធើរណេតពេលនោះ ប៉ុន្តែនាយករដ្ឋមន្ត្រីថៃទើបតែប្រកាសចាត់វិធានការបង្ក្រាបក្រុមឆបោកអនឡាញ និងឧក្រិដ្ឋកម្មឆ្លងដែនក្រោយពីទំនាក់ទំនងផ្ទាល់ខ្លួនមានបញ្ហា ។ វាអាចដោយសារដល់ពេលវេលាកាត់ផ្តាច់ផលប្រយោជន៍របស់ភាគីម្ខាងទៀត ។

ចុងក្រោយ លោកសំណូមពរកុំគ្រប់គ្រងប្រទេសដោយយកទំនាក់ទំនងផ្ទាល់ខ្លួនមកសម្រេចចិត្ត ។ អ្នកដឹកនាំល្អត្រូវតែប្រកាន់ខ្ជាប់នូវគោលការណ៍ និងនិយាយត្រង់ទៅត្រង់មក ថៃគួរតែបង្ក្រាបក្រុមឆបោកតាមអនឡាញនៅមីយ៉ាន់ម៉ាមកម៉្លេះ ពុំមែនរង់ចាំរហូតដល់ពេលនេះ ទើបនិយាយថា ពុំព្រមឱ្យពលរដ្ឋថៃក្លាយជាជនរងគ្រោះបន្តទៀត ។

គួរបញ្ជាក់ថា កម្ពុជាពុំមែនជាទីតាំងឧក្រិដ្ឋកម្មឆ្លងដែនដូចនាយករដ្ឋមន្ត្រីថៃ និងមន្ត្រីថៃចោទប្រកាន់ បំភ្លៃ មួលបង្កាច់ លាបពណ៌ និងទម្លាក់កំហុសនោះទេ ។ រដ្ឋាភិបាលថៃតែងតែបង្វែររឿងអាក្រក់ៗរបស់ខ្លួនមកឱ្យកម្ពុជា ក្នុងចេតនាធ្វើឱ្យប៉ះពាល់កិត្តិយស និងសេចក្តីថ្លៃថ្នូររបស់រាជរដ្ឋាភិបាលកម្ពុជា និងពលរដ្ឋខ្មែរ ប៉ុន្តែថៃទៅវិញទេ គឺជាទីតាំងជួញដូរមនុស្សឆ្លងដែន និងបោកប្រាស់តាមអ៊ីនធើរណេតក្នុងតំបន់អាស៊ីអាគ្នេយ៍ ហើយអង្គការសហប្រជាជាតិ (UN) បានកោះហៅរដ្ឋាភិបាលថៃទៅបកស្រាយករណីជួញដូរមនុស្ស និងការឆបោកតាមអនឡាញ ៕

ថៃ ៖ ចេះតែចោ.ទខ្មែរ ថាជាជម្រករបស់ក្រុមឧក្រិដ្ឋជនឆ្លងដែនពាក់ព័ន្ធនឹងករណីឆបោ.ក និងជួញដូរមនុស្សតាមអនឡាញ ពេលនេះស្រាប់តែរដ្ឋាភិបាលថៃ ជាអ្នកដែលត្រូវបានភ្នាក់ងារអង្កការសហប្រជាជាតិ ទាមទារឲ្យទៅស្រាយបំភ្លឺអំពីការលើកឡើងទាក់ទងនឹងកិច្ចខិតខំប្រឹងប្រែងរបស់ខ្លួន ក្នុងការប្រយុទ្ធប្រឆាំងនឹងការជួញដូរមនុស្សឆ្លងដែន និងការបោកប្រាស់តាមអ៊ីនធឺណិតនៅក្នុងតំបន់អាស៊ីអាគ្នេយ៍។

លិខិតរបស់អង្គការសហប្រជាជាតិ បានចង្អុលបង្ហាញឲ្យឃើញពីតួនាទីដ៏សំខាន់របស់ប្រទេសថៃថាជាមជ្ឈមណ្ឌលសម្រាប់នាំយកជនរងគ្រោះ ដែលមកពីប្រទេសជិតខាង ជាពិសេសនៅតំបន់ព្រំដែនជាមួយរដ្ឋ Karen របស់មីយ៉ាន់ម៉ា។ លិខិតនេះបានបង្ហាញពីការព្រួយបារម្ភយ៉ាងធ្ងន់ធ្ងរ លើការស៊ើបការណ៍សម្ងាត់ ដែលបានទទួលអំពីបុគ្គលមកពីជុំវិញពិភពលោក រួមទាំងអាស៊ីបូព៌ា អាស៊ីខាងត្បូង អាហ្វ្រិក មជ្ឈិមបូព៌ា អាមេរិកខាងជើង និងអាមេរិកខាងត្បូង ដែលត្រូវគេលួចចូលធ្វើការដោយបង្ខំនៅក្នុងមជ្ឈមណ្ឌលបោកប្រាស់តាមអ៊ីនធឺណិតដ៏ទំនើប។ ហើយកាន់តែគួរឱ្យព្រួយបារម្ភទៀតនោះ ប្រតិបត្តិការទាំងនេះមួយចំនួន ត្រូវបានគេនិយាយថាពឹងផ្អែកលើធនធានពីភាគីថៃ រួមទាំងថាមពល ទំនាក់ទំនង និងនៅជិតបណ្តាញហិរញ្ញវត្ថុ។

ជនរងគ្រោះត្រូវបានគេរាយការណ៍ថា ត្រូវបានទាក់ទាញដោយការផ្សាយពាណិជ្ជកម្មបោ.កបញ្ឆោតតាមអ៊ីនធឺណិតដែលសន្យាថានឹងរកប្រាក់ចំណូលបានច្រើន ប៉ុន្តែជាក់ស្ដែងពួកគេត្រូវបានគេយកទៅកេងប្រ័ញ្ចកម្លាំងពលកម្ម ដាក់ឃុំឃាំងដោយមានអ្នកយាម ដកហូតលិខិតឆ្លងដែន និងរបស់របរផ្ទាល់ខ្លួនជាដើម។

ជាមួយគ្នានេះ លិខិតផ្លូវការរបស់អង្គការសហប្រជាជាតិ ស្នើឱ្យរដ្ឋាភិបាលថៃ ផ្តល់ការបំភ្លឺលម្អិតលើចំណុចខាងក្រោមរួមមាន៖
១. អំពីជំហររបស់រដ្ឋាភិបាល៖ ត្រូវបង្ហាញពីជំហរផ្លូវការរបស់ប្រទេសថៃ លើការចោទប្រកាន់ទាំងអស់ដែលមានចែងក្នុងលិខិតរបស់អង្គការសហប្រជាជាតិ។
២. អំពីវិធានការទ្វេភាគី/ពហុភាគី៖ រដ្ឋាភិបាលថៃត្រូវបង្ហាញពីព័ត៌មានលម្អិតនៃកិច្ចខិតខំប្រឹងប្រែងរួមគ្នាជាមួយប្រទេសផ្សេងទៀត ដើម្បីទប់ស្កាត់ និងដោះស្រាយទម្រង់ជាក់លាក់នៃការជួញដូរមនុស្សនេះ។
៣. អំពីបញ្ហាប្រឈមក្នុងការកំណត់អត្តសញ្ញាណជនរងគ្រោះ៖ លើកឡើងពីឧបសគ្គដែលត្រូវប្រឈមមុខ ក្នុងការកំណត់អត្តសញ្ញាណជនរងគ្រោះដែលត្រូវបានបង្ខិតបង្ខំឱ្យប្រព្រឹត្តបទឧក្រិដ្ឋ និងយុទ្ធសាស្ត្រដែលត្រូវប្រើដើម្បីយកឈ្នះលើបញ្ហាទាំងនេះ។
៤. អំពីគោលការណ៍មិនដាក់ទណ្ឌកម្ម៖ ត្រូវបង្ហាញពីជំហានដែលប្រទេសថៃបានអនុវត្ត ដើម្បីធានាថាជនរងគ្រោះពីការជួញដូរមនុស្សមិនត្រូវបានពិន័យសម្រាប់បទល្មើសដែលកើតចេញពីការកេងប្រវ័ញ្ចរបស់ពួកគេ។ ឧ. ពួកគេត្រូវបានបង្ខំឲ្យប្រើប្រាស់ ឬចែកចាយថ្នាំញៀន នោះប្រទេសថៃត្រូវប្រាកដថាខ្លួននឹងមិនដាក់ទណ្ឌកម្មលើជនរងគ្រោះឡើយ។
៥. អំពីការបណ្តុះបណ្តាលផ្នែកកុងស៊ុល៖ ព័ត៌មានស្តីពីការបណ្តុះបណ្តាលផ្តល់ដល់បុគ្គលិកកុងស៊ុល និងស្ថានទូតថៃ ដើម្បីកំណត់អត្តសញ្ញាណ និងជួយជនរងគ្រោះ៕

ប្រទេសវៀតណាម ៖ កាលពីថ្ងៃទី២១ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា រដ្ឋាភិបាលវៀតណាមមានគម្រោងជំរុញឱ្យទីក្រុងដាណាង ក្លាយជាមជ្ឈមណ្ឌលហិរញ្ញវត្ថុ និងពាណិជ្ជកម្មពិភពលោក តាមរយៈការបង្កើតតំបន់ពាណិជ្ជកម្មសេរីដែលលាតសន្ធឹងលើផ្ទៃដីយ៉ាងធំទូលាយ ។ ថ្ងៃអនាគត ខេត្តដាណាង ក៏ក្លាយជាមជ្ឈមណ្ឌលការផលិត និងទីតាំងដឹកជញ្ជូនអន្តរជាតិតភ្ជាប់ដែលជាមួយកំពង់ផែលៀនជៀវ, អាកាសយានដ្ឋានអន្តរជាតិដាណាង និងច្រករបៀងសេដ្ឋកិច្ចខាងកើត-ខាងលិច ។

លោក Nguyen Hoa Binh ឧបនាយករដ្ឋមន្ត្រីវៀតណាមបានចុះហត្ថលេខាលើការបង្កើតតំបន់ពាណិជ្ជកម្មសេរីនៅទីក្រុងដាណាង ដែលនឹងតភ្ជាប់ជាមួយហេដ្ឋារចនាសម្ព័ន្ធសំខាន់ៗដើម្បីបើកឱកាសឱ្យមានការអភិវឌ្ឍថ្មីៗសម្រាប់ទីក្រុងឆ្នេរសមុទ្រមួយនេះ ។ តំបន់ពាណិជ្ជកម្មសេរីលាតសន្ធឹងលើផ្ទៃដីចំនួន១,៨៨១ហិកតា សម្រាប់ធ្វើជាទីតាំងការផលិតទំនិញ ពាណិជ្ជកម្ម សេវាកម្ម ឧស្សាហកម្មបច្ចេកវិទ្យាឌីជីថល បច្ចេកវិទ្យាព័ត៌មាន និងការច្នៃប្រឌិត ។ រដ្ឋាភិបាលវៀតណាមសង្ឃឹមថា ទីក្រុងដាណាង នឹងក្លាយជាមជ្ឈមណ្ឌលសេដ្ឋកិច្ចក្នុងតំបន់ និងមជ្ឈមណ្ឌលកំណើនយុទ្ធសាស្ត្រ ។

រដ្ឋាភិបាលវៀតណាមមានគោលដៅរយៈពេលវែង គឺកំណត់ឱ្យតំបន់ពាណិជ្ជកម្មសេរីនេះជាកន្លែងតភ្ជាប់ដ៏សំខាន់ក្នុងខ្សែសង្វាក់ផ្គត់ផ្គង់សកល និងអាស៊ី-ប៉ាស៊ីហ្វិក ហើយខេត្តដាណាង នឹងក្លាយជាមជ្ឈមណ្ឌលការផលិត និងទីតាំងដឹកជញ្ជូនអន្តរជាតិតភ្ជាប់ជាមួយកំពង់ផែលៀនជៀវ, អាកាសយានដ្ឋានអន្តរជាតិដាណាង និងច្រករបៀងសេដ្ឋកិច្ចខាងកើត-ខាងលិច ។ វានឹងចូលរួមចំណែកអភិវឌ្ឍន៍ឧស្សាហកម្មបច្ចេកវិទ្យាខ្ពស់ និងច្នៃប្រឌិត ការផ្លាស់ប្តូរឌីជីថល រួមទាំងរៀបចំរចនាសម្ព័ន្ធសេដ្ឋកិច្ចទីក្រុងដាណាងឆ្ពោះទៅរកនិរន្តរភាព ក្រោយពីសហការជាមួយខេត្តក្វាងណាម ។

លើសពីនេះ តំបន់ពាណិជ្ជកម្មសេរីនឹងតភ្ជាប់ជាមួយមជ្ឈមណ្ឌលហិរញ្ញវត្ថុអន្តរជាតិដែលស្ថិតនៅក្នុងទីក្រុង ដោយការបង្កើតបណ្តាញសេដ្ឋកិច្ចដ៏ទំនើប និងមានការប្រកួតប្រជែងខ្ពស់ ។ វានឹងជួយលើកកម្ពស់មុខមាត់ប្រទេសវៀតណាមក្នុងតំបន់ និងលើពិភពលោក ស្របតាមសាកលភាវូបនីយកម្ម (គឺជាចលនាបម្លាស់ប្តូរដោយសេរីនៃទំនិញ សេវាកម្ម ព្រមទាំងការផ្លាស់ប្តូរសេវាផ្សេងៗរវាងប្រទេសមួយទៅប្រទេសមួយ និងតំបន់មួយទៅតំបន់មួយ) ។

ការអភិវឌ្ឍតំបន់ពាណិជ្ជកម្មសេរីនៅខេត្តដាណាង នឹងអនុវត្តតាមផែនការស្របតាមយុទ្ធសាស្ត្រអភិវឌ្ឍន៍សេដ្ឋកិច្ច និងសង្គម ផែនការមេរបស់ទីក្រុងដាណាង រួមទាំងគោលដៅបានអនុម័តសម្រាប់ការបង្កើតតំបន់ពាណិជ្ជកម្មសេរី ៕

ប្រទេសថៃ ៖ សភាពាណិជ្ជកម្មប្រចាំខេត្តសុរិន្ទ និងខេត្តស្រះកែវ ប្រទេសថៃ បានបង្ហាញក្តីបារម្ភចំពោះការបិទព្រំដែនកម្ពុជា-ថៃ ធ្វើឱ្យប៉ះពាល់ដល់សេដ្ឋកិច្ចនៅតំបន់ព្រំដែន និងសំណូមពរឱ្យរាជរដ្ឋាភិបាលទាំងពីរចរចារកដំណោះស្រាយដើម្បីផលប្រយោជន៍សេដ្ឋកិច្ចរួម ពីព្រោះការបិទព្រំដែនដាក់សម្ពាធលើកម្ពុជាពុំទទួលបានលទ្ធផលទេ ។ នេះបើតាមការផ្សព្វផ្សាយរបស់សារព័ត៌មានថៃ Daily News កាលពីថ្ងៃទី២៣ ខែមិថុនា ឆ្នាំ២០២៥ ។

បច្ចុប្បន្ន ស្ថានការណ៍តានតឹងកើតឡើងរវាងប្រទេសកម្ពុជា និងថៃ មិនថាផ្នែកកងទ័ព នយោបាយ ការទូត និងសេដ្ឋកិច្ច បានធ្វើមេបញ្ជាការកងទ័ពថៃភូមិភាគទី២ លោក ប៊ុនស៊ីន ផាកក្លាង បញ្ជាឱ្យបិទព្រំដែនកម្ពុជា-ថៃជាបន្តបន្ទាប់ និងឈានទៅបិទព្រំដែនជាប់កម្ពុជាទាំងអស់កាលពីល្ងាចថ្ងៃទី២៣ ខែមិថុនា ។ ក្រៅពីនេះ ក្រសួងពាណិជ្ជកម្មថៃបានប្រកាសទៅកាន់ឈ្មួញឱ្យឈប់នាំចូលដំឡូងមីពីកម្ពុជា ក្រោមហេតុផលដំឡូងមីកម្ពុជាមានគុណភាពអន់ និងធ្វើឱ្យតម្លៃដំឡូងមីកសិករថៃកើនឡើង ហើយក្រសួងពាណិជ្ជកម្មសម្រេចនាំចូលដំឡូងមីពីឡាវជំនួសវិញ ។

ការហាមឃាត់នាំចូលដំឡូងមីកម្ពុជាបានធ្វើឱ្យប៉ះពាល់ដល់សេដ្ឋកិច្ចថៃនៅតំបន់ព្រំដែន ហើយវាពុំត្រឹមតែប៉ះពាល់សេដ្ឋកិច្ចថៃប៉ុណ្ណោះទេ ប្រាក់ចំណូលពលរដ្ឋថៃដែលប្រកបមុខរបរលក់ដូរ និងបើកអាជីវកម្មនៅព្រំដែនក៏ប៉ះពាល់ដែរ ដោយសារគ្មានពលរដ្ឋខ្មែរទិញទំនិញដូចមុន ។ ការរកស៊ីនានារបស់ពលរដ្ឋថៃខាតបង់ដើមទុន ហើយពួកគេស្នើឱ្យនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ ជួយដោះស្រាយផលប៉ះពាល់នេះ ប៉ុន្តែនាយករដ្ឋមន្ត្រីគ្មានដំណោះស្រាយអ្វី បែរជាផ្តល់អំណាចឱ្យកងទ័ពជាអ្នកកំណត់វិធានការគ្រប់គ្រង និងបិទព្រំដែន ។

លោក វីរ៉ាត់ សេតថាវី ផាត់ថៈណាឆ័យ ប្រធានសភាពាណិជ្ជកម្មប្រចាំខេត្តសុរិន្ទ និយាយថា បច្ចុប្បន្ន តម្លៃនៃការនាំចូល ឬនាំចេញទំនិញរបស់ខេត្តសុរិន្ទ បានធ្លាក់ចុះរហូតដល់ជាង៨០% ។ ក្នុងនាមលោកជាតំណាងឱ្យវិស័យអាជីវកម្មក្នុងតំបន់យល់ឃើញថា ជម្លោះដែលបានកើតឡើងពុំផ្តល់ផលល្អដល់សេដ្ឋកិច្ចប្រទេសទាំងពីរទេ ពីព្រោះការបិទព្រំដែនបានប៉ះពាល់ដល់ច្រកព្រំដែនអូរស្មាច់-ឆងចម (ខេត្តឧត្តរមានជ័យ-ខេត្តសុរិន្ទ) ដែលជាច្រកដ៏សំខាន់សម្រាប់ថៃនាំចេញទំនិញទៅកម្ពុជា ខណៈកម្ពុជានាំចេញទិន្នផលកសិកម្មមកថៃ ជាពិសេស ដំឡូងមី ។

ហេតុនេះ ការបិទព្រំដែននឹងប៉ះពាល់ដល់សេដ្ឋកិច្ចប្រទេសទាំងពីរ ហើយលោកសំណូមពរឱ្យរាជរដ្ឋាភិបាលកម្ពុជា និងថៃចរចារកដំណោះស្រាយដើម្បីឱ្យភាគីទាំងពីរទទួលបានផលប្រយោជន៍ ពីព្រោះយ៉ាងណាក៏ដោយ យើងនៅតែជាប្រទេសជិតខាងគ្នា ។ យើងត្រូវការតភ្ជាប់សេដ្ឋកិច្ចគ្រប់ពេលវេលា សំខាន់បំផុត គឺការចរចា ។ ពេលនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ចុះមកផ្តល់កម្លាំងចិត្តដល់កងទ័ពនៅខេត្តសុរិន្ទ លោក វីរ៉ាត់ បានធ្វើជាតំណាងគណៈកម្មការរួមវិស័យឯកជនប្រគល់លិខិតទៅនាយករដ្ឋមន្ត្រីថៃ ដើម្បីស្នើសុំបង្កើតទីតាំងគយថ្មីស្តារសេដ្ឋកិច្ចខេត្តសុរិន្ទ ជាពិសេស ពាណិជ្ជកម្មព្រំដែនកម្ពុជា-ថៃ ។

ចំណែកអនុប្រធានសភាពាណិជ្ជកម្មខេត្តស្រះកែវ លោក សារ៉ាវុធ វង្សសាំរ៉ាន និយាយថា វិធានការដាក់សម្ពាធលើកម្ពុជាពុំទទួលបានលទ្ធផលទេ ថៃនឹងរងផលប៉ះពាល់ខ្លួនឯង ពីព្រោះកម្ពុជា គឺជាប្រទេសអភិវឌ្ឍន៍យ៉ាងឆាប់រហ័ស ទាន់សម័យ សូមរដ្ឋាភិបាលថៃដោះស្រាយបញ្ហាទំនិញថៃកកស្ទះនៅព្រំដែន ។ ក្រោយពីកងទ័ពអនុវត្តវិធានការបិទព្រំដែនជាមួយកម្ពុជា ឃើញថា មានរថយន្តដឹកទំនិញថៃ ចំនួន៥០០គ្រឿង ពុំអាចនាំចេញទំនិញទៅកម្ពុជាតាមច្រកទ្វារព្រំដែនអន្តរជាតិប៉ោយប៉ែត (ខេត្តបន្ទាយមានជ័យ-ខេត្តស្រះកែវ) ហើយរថយន្តដឹកទំនិញថៃនៅខេត្តចាន់បុរី និងខេត្តត្រាត ក៏មានបញ្ហាដែរ ៕

ប្រទេសថៃ ៖ កាលពីថ្ងៃទី២៣ ខែមិថុនា ឆ្នាំ២០២៥ សារព័ត៌មានថៃ Khaosod រាយការណ៍ថា គណបក្សនយោបាយមួយរបស់ថៃបានបន្ទោសរដ្ឋាភិបាលរបស់លោកស្រី ផេថងថាន ស៊ីណាវ៉ាត់ បណ្តោយឱ្យកងទ័ពបិទព្រំដែនជាប់កម្ពុជាទាំងអស់តាមចិត្តជាឯកតោភាគី ដែលប៉ះពាល់ដល់សេដ្ឋកិច្ចថៃ និងធ្វើឱ្យស្ថានការណ៍កាន់តែធ្ងន់ធ្ងរខ្លាំងឡើង ។ ប្រធានគណបក្សនេះថា រដ្ឋាភិបាលថៃប្រគល់អំណាចឱ្យកងទ័ពមានសិទ្ធិសម្រេចបិទព្រំដែនកម្ពុជា-ថៃ គឺខុសពីគោលការណ៍ប្រជាធិបតេយ្យ លោកស្រី ផេថងថាន ធ្វើបែបនេះព្រោះតែចង់បានប្រជាប្រិយភាព ។

នៅថ្ងៃទី២៣ ខែមិថុនា លោក ណាត់ថាផុង រឿងបញ្ញាវុធ ប្រធានគណបក្សប្រជាជននៅប្រទេសថៃ បានសរសេរក្នុងបណ្តាញសង្គមពីកងទ័ពថៃបិទព្រំដែនកម្ពុជា-ថៃទាំងអស់ថា ការអនុវត្តវិធានការលើកម្ពុជាត្រូវតែមានគោលដៅដើម្បីឱ្យប្រទេសទាំងពីររួមរស់ជាមួយគ្នាយ៉ាងសន្តិវិធី ពុំមែនគ្រាន់តែដោះស្រាយបញ្ហាប្រជាប្រិយភាពរបស់នាយករដ្ឋមន្ត្រី លោកស្រី ផេថងថាន ទេ ។

លោក ណាត់ថាផុង បញ្ជាក់ថា ខ្ញុំយល់ស្របយ៉ាងខ្លាំងចំពោះការអនុវត្តវិធានការបង្ក្រាបឧក្រិដ្ឋកម្មឆ្លងដែន ដែលលោកស្រី ផេថងថាន បាននិយាយទៅកាន់សារព័ត៌មានថា បទល្មើសឆ្លងដែនមានទីតាំងនៅកម្ពុជា ប៉ុន្តែអ្វីគួរឱ្យបារម្ភ គឺលោកស្រី ផេថងថាន បានប្រគល់អំណាចគ្រប់គ្រងព្រំដែនកម្ពុជា-ថៃទៅឱ្យកងទ័ព ។ រដ្ឋាភិបាលថៃបណ្តោយឱ្យកងទ័ពមានអំណាចសម្រេចចិត្តកំណត់វិធានការគ្រប់គ្រងព្រំដែនកម្ពុជា-ថៃជាឯកតោភាគី គឺពុំត្រឹមត្រូវទេ ពីព្រោះខុសពីគោលការណ៍ប្រជាធិបតេយ្យ ដែលកងទ័ពត្រូវស្ថិតក្រោមការគ្រប់គ្រងរបស់រដ្ឋាភិបាល ។

ការដោះស្រាយបញ្ហាជម្លោះព្រំដែនកម្ពុជា-ថៃ គឺកងទ័ពថៃមានតួនាទីត្រឹមទទួលខុសត្រូវអនុវត្តវិធានការកងទ័ពដើម្បីការពារប្រទេសប៉ុណ្ណោះ ខណៈនាយករដ្ឋមន្ត្រីថៃត្រូវមានតួនាទីដឹកនាំ និងទទួលខុសត្រូវជារួម ទាំងវិធានការកងទ័ព ការទូត សេដ្ឋកិច្ច និងព័ត៌មានផ្សេងៗដោយឯករាជ្យ និងគិតពីផលប៉ះពាល់សន្តិសុខ បញ្ហាសេដ្ឋកិច្ច និងទំនាក់ទំនងអន្តរជាតិ ។

រដ្ឋាភិបាលថៃយល់ព្រមឱ្យកងទ័ពមានអំណាចកំណត់វិធានការគ្រប់គ្រងព្រំដែនកម្ពុជា-ថៃជាឯកតោភាគី ហើយកងទ័ពមានសិទ្ធិសម្រេចចិត្តដោយខ្លួនឯង ប៉ុន្តែកងទ័ពពុំបានគិតពីផលប៉ះពាល់ផ្សេងៗទេ ក្រៅពីអ្វីដែលខ្លួនទទួលខុសត្រូវ ដែលធ្វើឱ្យការគ្រប់គ្រងស្ថានការណ៍ពុំឯកភាពគ្នា ។ កាលពីថ្ងៃទី២៣ ខែមិថុនា កងទ័ពបានសម្រេចចិត្តបិទព្រំដែនកម្ពុជា-ថៃទាំងអស់ ដែលជាវិធានការប៉ះពាល់ធ្ងន់ធ្ងរ មិនត្រឹមតែប៉ះពាល់ពលរដ្ឋខ្មែរប៉ុណ្ណោះទេ ប៉ុន្តែវាប៉ះពាល់សេដ្ឋកិច្ចថៃ និងពលរដ្ឋថៃ ហើយធ្វើឱ្យស្ថានការណ៍កាន់តែអាក្រក់ ។

កុំភ្លេចថា វិធានការដាក់សម្ពាធផ្នែកសេដ្ឋកិច្ច ដូចជា ៖ វិធានការឹតបន្តឹងការនាំចេញ-នាំចូលទំនិញមួយចំនួន ឬវិធានការគ្រប់គ្រងព្រំដែន គឺមានគោលដៅសំខាន់ដើម្បីកាត់បន្ថយការប្រឈមមុខកងទ័ព ។ វិធានការទាំងនេះអាចផ្លាស់ប្តូរ ឬធូរស្រាលបាន បើស្ថានការណ៍តានតឹងផ្នែកកងទ័ពល្អប្រសើរ ដូចពេលថ្មីៗនេះ ត្រឹមតែ២ថ្ងៃក្រោយពីថៃមានវិធានការគ្រប់គ្រងព្រំដែន ធ្វើឱ្យស្ថានការណ៍តានតឹងរវាងកងទ័ពកម្ពុជា-ថៃធូរស្រាល ហើយកងទ័ពទាំងពីរក៏ល្បាតរួមគ្នាដោយគ្មានអាវុធ ខណៈកម្ពុជាដកកងទ័ពចេញពីតំបន់ជម្លោះ ។ ប៉ុន្តែគួរឱ្យស្តាយ រដ្ឋាភិបាលថៃបែរជាពុំកែសម្រួលវិធានការគ្រប់គ្រងព្រំដែនឱ្យស្របនឹងស្ថានការណ៍ប្រែប្រួល រហូតបែកធ្លាយកិច្ចសន្ទនារវាងនាយករដ្ឋមន្ត្រីថៃជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។

ការដោះស្រាយបញ្ហាជម្លោះ គឺនាយករដ្ឋមន្ត្រីពុំត្រឹមដោះស្រាយបញ្ហាឱ្យខ្លួនមានប្រជាប្រិយភាពទេ ប៉ុន្តែគួរពិចារណាពីគោលដៅចរចាទ្វេភាគីជាមួយកម្ពុជា ដោយធ្វើកិច្ចព្រមព្រៀងដែលប្រទេសនានាទទួលស្គាល់ និងឱ្យប្រទេសជិតខាងអាចរួមរស់ជាមួយថៃយ៉ាងសន្តិភាព ។ រដ្ឋាភិបាលថៃគួរពិចារណាពីស្ថានការណ៍ និងគោលដៅ ពុំមែនបណ្តោយឱ្យកងទ័ពមានសិទ្ធិសម្រេចទេ ព្រោះកងទ័ពដឹងពីផលប៉ះពាល់តែផ្នែកដែលខ្លួនទទួលខុសត្រូវប៉ុណ្ណោះ ។ រដ្ឋាភិបាលគួរពិនិត្យឡើងវិញ កុំទុកឱ្យកងទ័ពសម្រេចចិត្តលើជម្លោះកម្ពុជា-ថៃជាឯកតោភាគី ព្រោះវាជាការសម្រេចចិត្ត និងទទួលខុសត្រូវរបស់រដ្ឋាភិបាលដែលធ្វើឱ្យស្ថានការណ៍ធូរស្រាល ។ នេះជាការលើកឡើងរបស់លោក ណាត់ថាផុង រឿងបញ្ញាវុធ ប្រធានគណបក្សប្រជាជននៅប្រទេសថៃ ៕

វ៉ាស៊ីនតោន៖ តុលាការកំពូលរបស់សហរដ្ឋអាមេរិកបានសម្រេចឱ្យ រដ្ឋបាល Trump អាចនិរទេសជនអន្តោប្រវេសន៍មួយចំនួនទៅកាន់ប្រទេសទីបី ដែលមិនមែនប្រទេសកំណើតរបស់ពួកគេ ដោយមិនចាំបាច់ផ្តល់សវនាការជាមុន ដើម្បីឱ្យពួកគេពន្យល់ពីមូលហេតុដែលពួកគេអាចនឹងមានគ្រោះ.ថ្នាក់នៅទីនោះឡើយ។ នេះបើតាមប្រភព NBC News។

សេចក្តីសម្រេចនេះធ្វើឡើងកាលថ្ងៃទី ២៣ ខែមិថុនា ឆ្នាំ ២០២៥ ដោយបានបដិសេធសេចក្តីសម្រេចរបស់តុលាការជាន់ទាប ដែលបានរារាំងគោលនយោបាយនេះកាលពីដើមឆ្នាំ។ ចៅក្រមតុលាការជាន់ទាប លោក Brian Murphy បាននិយាយថា ជនអន្តោប្រវេសន៍គួរតែត្រូវបានអនុញ្ញាតឱ្យពួកគេបានពន្យល់ពីមូលហេតុដែលពួកគេខ្លាចត្រូវបានបញ្ជូនទៅប្រទេសមួយផ្សេងទៀត ជាពិសេសប្រសិនបើពួកគេអាចប្រឈមមុខនឹងអំពើហិ.ង្សា ឬការធ្វើទា.រុណកម្មផ្សេងៗ។

ករណីនេះជាប់ពាក់ព័ន្ធនឹងជនចំណាកស្រុកចំនួន ៨ នាក់ ដែលរដ្ឋាភិបាលចង់បញ្ជូនទៅកាន់ប្រទេសស៊ូដង់ខាងត្បូង ដែលជាប្រទេសល្បីល្បាញខាងសង្រ្គាម និងការរំ.លោភសិទ្ធិមនុស្ស។ ចៅក្រមបានផ្ដល់ការការពារបណ្ដោះអាសន្នដល់មនុស្សទាំង ៨ នាក់នោះ ពីការនិរទេសខ្លួន ហើយការការពារនោះក៏នៅតែមាន។ ទោះជាយ៉ាងណាក៏ដោយ សេចក្តីសម្រេចថ្មីរបស់តុលាការកំពូលមានន័យថា រដ្ឋបាល Trump ឥឡូវនេះអាចប្រើប្រាស់គោលនយោបាយដែលទើបតែសម្រេចនេះលើជនអន្តោប្រវេសន៍ផ្សេងៗទៀត។

គួរបញ្ជាក់ថា ការសម្រេចនេះត្រូវបានធ្វើឡើងដោយសំឡេង ៦ ទល់នឹង ៣ ដោយមានអ្នកយុត្តិធម៌អភិរក្សភាគច្រើន។ ប៉ុន្តែអ្នកយុត្តិធ៌មសេរីរបស់តុលាការមិនយល់ស្របយ៉ាងខ្លាំង។ ចៅក្រម Sonia Sotomayor បានសរសេរការជំទាស់លើការសម្រេចថ្មីៗនេះថា តុលាការមិនអើពើនឹងការឈឺចាប់ និងទុក្ខលំបាកពិតប្រាកដរបស់មនុស្សទេ ហើយធ្វើឲ្យពួកគេស្ថិតក្នុងគ្រោះ.ថ្នាក់។ អ្នកស្រីបាននិយាយថាការគើលនយោបាយនេះអាចនាំឱ្យជនអន្តោប្រវេសន៍ជាច្រើននាក់ ត្រូវបានបញ្ជូនទៅប្រទេសដែលមិនមានសុវត្ថិភាព ដែលពួកគេអាចប្រឈមមុខនឹងការធ្វើទា.រុណកម្ម ឬអាចសូម្បីតែត្រូវស្លា.ប់។

ផ្ទុយទៅវិញ រដ្ឋបាល Trump បាននិយាយថាគោលនយោបាយនេះមានសារៈសំខាន់ណាស់ ជាពិសេសនៅពេលដែលប្រទេសកំណើតរបស់ជនអន្តោប្រវេសន៍បដិសេធមិនទទួលយកពួកគេត្រឡប់មកវិញ។ វាអនុញ្ញាតឱ្យសហរដ្ឋអាមេរិកអាចបញ្ជូនពួកគេទៅកន្លែងផ្សេងជំនួសវិញ។

ពួកគេក៏បានអះអាងដែរថា ពួកគេកំពុងធ្វើតាមច្បាប់ និងផ្តល់ឲ្យមនុស្សនូវដំណើរការដែលពួកគេត្រូវការ។ ប៉ុន្តែក្រុមសិទ្ធិជនអន្តោប្រវេសន៍និយាយថាទង្វើនេះបានបំពានលើកិច្ចព្រមព្រៀងអន្តរជាតិនិងស្តង់ដារសិទ្ធិមនុស្ស ដូចជាអនុសញ្ញាប្រឆាំងនឹងការធ្វើទារុណកម្មដែលនិយាយថាមនុស្សមិនគួរត្រូវបានបញ្ជូនទៅប្រទេសដែលពួកគេអាចរងគ្រោះ.ថ្នាក់នោះទេ៕