អ្នកបង្កើតមាតិកាដ៏ល្បីឈ្មោះ Q Win បានលាតត្រដាងរឿងកាលពីអតីតកាលធ្លាប់ត្រូវ បានគ្រូទាយទាយថាលោកជាកូនចង្រៃធ្វើឱ្យទំនាក់ទំនងលោកនិងម្តាយលែងដូចមុន។ ទោះយ៉ាងណាបច្ចុប្បន្ន Q Win បានបញ្ជាក់ឱ្យដឹងថាលោកមិនមែនជាកូនចង្រៃនោះទេថែមទាំងជាកូនកតញ្ញូ។

ជឿជាក់ថាអ្នកលេងបណ្តាញសង្គមអាចនឹងពើបប្រទះវីដេអូបែបកំប្លែងៗរបស់អ្នកបង្កើតមាតិកា Q Win ដែលលោកមានស្រុកកំណើតនៅខេត្តបាត់ដំបង។ ជាមួយនឹងប្រជាប្រិយភាពរបស់ខ្លួន Q Win គឺបានសាងភាពល្បីល្បាញសម្រាប់ខ្លួនក្នុងវិស័យ Content Creator លេចមុខតាមកម្មវិធីជាច្រើន។

ទោះយ៉ាងណាទស្សនិកជនធ្លាប់តែឃើញវីដេអូកំប្លែងៗរបស់ Q Win ប៉ុន្តែខ្សែជីវិតរបស់ អ្នកបង្កើតមាតិការូបនេះអ្នកគាំទ្រអាចនឹងមិនទាន់បានដឹងទេថា Q Win ធ្លាប់ត្រូវបានគ្រូទាយទាយថាលោកជាកូនចង្រៃ។

Q Win បានបញ្ចេញអារម្មណ៍របស់ខ្លួននៅលើបណ្តាញសង្គមហ្វេកប៊ុកកាលពីពេលថ្មីៗនេះដោយបានរៀបរាប់ថា «សូមទោសម៉ាក់ កូនពិតជាសូមទោសមែន កូន share ឱ្យម៉ាក់ឃើញ កូនចាំមិនភ្លេចទេ។ បន្ទាប់ពីនឹងម៉ាក់ពិបាកចិត្ត ហើយទៅរកគ្រូទាយ គ្រូទាយ ទាយថាកូនធំឡើងគឺកូនចង្រៃ បំផ្លាញគ្រួសារ កូនខឹងគ្រូទាយនឹងណាស់ ដែលធ្វើឱ្យទំនាក់ទំនងយើង លែងដូចមុន ព្រោះកូនលួចស្ដាប់ឮកូនដឹងថាម៉ាក់មិនជឿទាំងស្រុងទេ តែក៏មានការសង្ស័យដែរ ព្រោះកូនខូចមែនកាលហ្នឹង»។

Q Win បានបន្តទៀតថា តែឥឡូវនេះលោកមិនមែនកូនចង្រៃទេ ជាកូនដែលមើលថែម៉ាក់ ហើយនឹងលោកយាយ បានល្អណាស់។ Q Win ថា «កូនតស៊ូកាត់ទៅរកម៉ាក់ រឹងមាំ ដូចម៉ាក់ វាសានាកូនខុសពីការទាយរបស់គ្រូទាយនោះ ១០០% រយះពេល ៦ ឆ្នាំនេះកូនខំម្នាក់ឯង ដើម្បីឱ្យម៉ាក់ និងលោកយាយ រស់នៅស្រួលមិនបាច់ហត់ ធ្វើការលក់ដូរទៀត កូនធានាចិញ្ចឹមម៉ាក់ ហើយនិងលោកយាយអស់មួយជីវិត…»។

ជាមួយនឹងការលើកឡើងរបស់ Q Win បានធ្វើឱ្យអ្នកគាំទ្រជាច្រើនបញ្ចេញមតិយោបល់របស់ខ្លួនដោយអ្នកខ្លះក៏បាននិយាយថាកុំសូវជឿគ្រូទាយពេក អ្នកខ្លះក៏រំជួលចិត្តចំពោះសំណេររបស់ Q Win ផងដែរ៕

អ្នកនិពន្ធបទចម្រៀងនិងប្រលោមលោកដ៏ល្បីល្បាញលោក សុខ ចាន់ផល បានបង្ហោះសំណេរមួយលើកឡើងអំពីវិស័យភាពយន្តខ្មែរនាពេលបច្ចុប្បន្ននិយាយឆ្គងខ្លាចតែគេមិនដឹងថាសម្តែង។ មតិរបស់លោកត្រូវបានទស្សនិកជនជាច្រើនបង្ហាញការគាំទ្រខណៈមានអ្នកមួយចំនួនថាមិនមែនពេលខ្លះមិនចង់គាំទ្រភាពយន្តខ្មែរនោះទេប៉ុន្តែវាពិបាកក្នុងការគាំទ្រ។

នៅថ្ងៃទី២៤ មិថុនា អតីតអ្នកនិពន្ធចម្រៀងក្នុងផលិតកម្មរស្មីហង្សមាសបានបង្ហោះសំណេរនៅលើបណ្តាញសង្គមថា «ភាពយន្តខ្មែរនាពេលបច្ចុប្បន្ន គេដឹកនាំឱ្យតួសម្ដែងនិយាយស្ទីលល្ខោន ស្ដាប់ទៅឆ្គងណាស់! បើនិយាយធម្មតា ធម្មជាតិៗទៅថី? សម្ដែងឱ្យដូចមែនទែន បានល្អមើល —ខ្លាចតែគេមិនដឹងថា កំពុងសម្ដែង!»។

សំណេររបស់កវីនិពន្ធ សុខ ចាន់ផល ដ្បិតថាមិនច្រើនបន្ទាត់ក្តីប៉ុន្តែមានអ្នកគាំទ្រជាច្រើនបង្ហាញការយល់ស្របនូវអ្វីដែលលោកបានលើកឡើងព្រោះវិស័យភាពយន្តខ្មែរមួយចំនួនវាពិបាកក្នុងការឱ្យទស្សនិកជនគាំទ្រព្រោះតែការសម្តែងនៅមិនទាន់បានល្អនៅឡើយ។

អ្នកលេងបណ្តាញសង្គមបានបញ្ចេញមតិថា «នេះជាពាក្យដែលខ្ញុំចង់និយាយ ដូចមិនទាន់ចែកដាច់ អ្វីទៅហៅថាភាសានិយាយ អ្វីទៅហៅថាភាសាសរសេរ ( សូមធ្វើការស្វែងយល់ឱ្យច្បាស់ ការនិយាយមិនដូចការសរសេរទេ ) សូមអ្នកដឹកនាំរឿងសម័យថ្មី មេត្តាយល់ពីបញ្ហានេះផង»។ «រឿងកុនខ្មែរបច្ចុប្បន្នផ្តោតសំខាន់លើតួអង្គសា្អតៗច្រើនពេកមើលទៅបាត់រូបារម្មណ៍(បាត់រសជាតិខ្មែរ)»។

អ្នកផ្សេងទៀតបានបញ្ចេញមតិថា «ការសំដែង ខ្វះភាពប្រទាក់ក្រឡាគ្នា និយាយទៅអ្នកដឹកនាំរឿងខ្សែភាពយន្តខ្សោយអក្សរសាស្ត្រ អក្សរសិល្បិ៍ខ្មែរ។ នាំគ្នាមើលរឿងថៃនិងរឿងឥណ្ឌូណេស៊ីច្រើនពេក ដឹកនាំរឿងលំនាំតាមគេ ទាំងតួអង្គនិងបរិយាកាស», «តួច្រើនស្អាត! តែស្អាតហើយរវល់ គ្មានពេលទន្ទេញប៉ារ៉ូលទេ»។ «ពិតៗបង ចឹងមែនតាសតាសសាច់រឿងល្អមើលតែគេ ឱ្យតួនិយាយបែបដូចល្ខោន អ្នកមើលរាងចង់តឹងទ្រូង»…៕

តារាចម្រៀង ទេព បូព្រឹក្ស បានធ្វើឱ្យទស្សនិកជនទាំងក្នុងស្រុកនិងក្រៅស្រុកចាប់អារម្មណ៍យ៉ាងខ្លាំងបន្ទាប់ពីបានសម្តែងនៅឯប្រទេសម៉ាឡេស៊ី។ ជាមួយនឹងឱកាសបង្ហាញខ្លួននៅលើឆាកអន្តរជាតិលើកនេះ ទេព បូព្រឹក្ស បាននិយាយប្តេជ្ញាថាបើនាងមានឱកាសសម្តែងនៅក្រៅស្រុកនឹងពាំនាំសិល្បៈវប្បធម៌ខ្មែរទៅជាមួយ។

ថ្មីៗនេះមានវីដេអូមួយចែករំលែកនៅលើបណ្តាញសង្គមអំពីតារាចម្រៀង ទេព បូព្រឹក្ស និយាយពីគ្រឿងបុរាណខ្មែរដែលមិនអាចមានអ្នកណា Copy ដូចដោយនាងបញ្ជាក់ថាមិនអាចCopy បានដោយសារតែក្បាច់ គេធ្វើជ័រ ប៉ុន្តែខ្មែរគឺធ្វើរបស់ពិត ធ្វើចេញពីស្ពាន់ជាដើម។ តារាចម្រៀងរូបនេះថាត្រឹមការសម្តែងក្នុងស្រុកនៅពាក់របស់ពិត ហើយក៏មិនដែលសិល្បៈវប្បធម៌ខ្មែរណាពាក់គ្រឿងលម្អជាជ័រនោះទេ។ ទេព បូព្រឹក្ស ក៏សង្កត់ធ្ងន់ថា ក្នុងនាមជាកូនខ្មែរមានឈាមជ័រជាខ្មែរត្រូវស្វែងយល់ចំណុចនេះឱ្យបានច្បាស់មិនអាចចេះតែនិយាយបាននោះទេ។

ភរិយា ជី ដេវីត បាននិយាយទៀតថា នាងបានឃើញខម្មិនខ្លះថាធ្វើឱ្យពិបាកខ្លួនធ្វើអ្វី មិចមិនធ្វើពីជ័រទៅ ត្រង់ចំណុចនេះ ទេព បូព្រឹក្ស ថាសម្រាប់មកុដគ្រឿងនៅលើខ្លួនរបស់ខ្មែរគឺស្អាតណាស់តាំងពីដើមមក។

ទេព បូព្រឹក្ស បាននិយាយថា ជីវិតក្នុងអាជីពសិល្បៈគឺនាងឆ្អែតហើយនៅក្នុងស្រុកគេស្គាល់ថាជា ទេព បូព្រឹក្ស ហើយបើសិនជានាងទៅសម្តែងនៅក្រៅប្រទេសក្នុងលក្ខខណ្ឌណាមួយក៏ដោយគ្រប់ឆាកឱ្យតែគេបើកឱកាសឱ្យនាងសម្តែងគឺនាងត្រូវតែនាំយករវប្បធម៌ខ្មែរទៅផ្សព្វផ្សាយ។ ម្ចាស់បទ «ទេវរាជ» ថាអ្វីដែលនាងធ្វើរាល់ថ្ងៃចង់ឱ្យដល់គោលដៅឱ្យគេដឹងថាវប្បធម៌ខ្មែរយ៉ាងមិច។

គួរបញ្ជាក់ផងដែរថា ការសម្តែងរបស់តារាចម្រៀង ទេព បូព្រឹក្ស នៅក្នុងកម្មវិធី Round Festival នៅឯប្រទេសម៉ាឡេស៊ីកាលពីថ្ងៃទី២២ មិថុនា គឺពិតជាមិនឱ្យអ្នកគាំទ្រខកចិត្តនោះទេដោយនាងបានសម្តែងបែបសហសម័យរំលេចនូវសិល្បៈវប្បធម៌ខ្មែរមកជាមួយធ្វើឱ្យទស្សនិកជនដែលចូលរួមផ្ទាល់ស្រែកហ៊ោរយ៉ាងខ្លាំង៕

បទចម្រៀងសម្រាប់ឱកាសពិធីបុណ្យចូលឆ្នាំខ្មែររបស់តារាចម្រៀង សុគន្ធ និសា និង រ៉ូ លីន កាលពីកន្លងទៅនេះទទួលបាននូវការចាប់អារម្មណ៍ផ្ទុះការគាំទ្រយ៉ាងខ្លាំងពីទស្សនិកជន។ ជាមួយនឹងភាពជោគជ័យនៃការសហការលើកដំបូងរវាងតារាចម្រៀង សុគន្ធ និសា និង រ៉ូលីន គឺជាស្នាដៃរបស់អ្នកនិពន្ធ សោម ដូរ៉េ ខណៈតារាចម្រៀងទាំងពីរដួងមានចិត្តចង់ធ្វើបទចម្រៀងចូលឆ្នាំដូចគ្នា។

រ៉ូលីន បាននិយាយនៅក្នុងកម្មវីធី «អ្នកជិតខាង» ដោយបានរៀបរាប់ពីប្រវត្តិនៃបទ «ចាក់ក្រឡេកទយ»។ រ៉ូលីន បាននិយាយថា មានថ្ងៃមួយលោកទៅខួបកំណើតមិត្តភក្តិហើយបានអង្គុយជិត សុគន្ធ និសា ខណៈដែល អ្នកទាំងពីរមានបំណងចង់ធ្វើបទចូលឆ្នាំដូចគ្នា ហើយនាគ្រានោះ និសា គឺជាតារាចម្រៀងឯករាជ្យហើយ។ លោក បន្តថា និសា បានផ្តើមគំនិតខ្លួនលោកក៏បន្ថែមក៏ត្រូវគ្នាហើយការនិពន្ធបទចម្រៀងចូលឆ្នាំបែបកំប្លែងបែបនេះគឺមានតែមួយទេគឺលោក សោម ដូរ៉េ។

ក្នុងការធ្វើបទចម្រៀងនេះ រ៉ូលីន បានបញ្ជាក់ថាចំណាយពេលចំនួន១ខែរហូតដល់ថត ប៉ុន្តែគឺបាននិយាយគ្នាតាំងពីខែ១១ មកម្ល៉េះ។ ក្នុងការនិពន្ធចម្រៀងពីសំណាកលោក សោម ដូរ៉េ រ៉ូលីន ថាគឺមានការពេញចិត្តតែម្តងប៉ុន្តែពាក្យខ្លះពិបាកច្រៀងគឺត្រូវការកែខ្លះ ហើយបទនេះជារួមគឺមានការកែបន្តិចបន្តួចប៉ុណ្ណោះ។

ក្នុងនោះដែរ រ៉ូលីន ក៏បានកោតសរសើរទៅកាន់អ្នកសម្រួលតន្រ្តីដោយបានបន្ថែមទ្រខ្មែរធ្វើឱ្យ ភ្លេងកាន់តែឆ្ងាញ់។ ការនិពន្ធបទ ចាក់ក្រឡេកទយ» តាមបែបចង្វាក់កន្រ្តឹមនេះ ទាំងអ្នកនាង សុគន្ធ និសា និង រ៉ូលីន គឺប្រគល់ឱ្យលោក សោម ដូរ៉េ ដោយក្តីទុកចិត្តតែម្តង។ ការសម្រេចចិត្តធ្វើបទចម្រៀងចង្វាក់បែបនេះគឺរម្លឹកទៅដល់ឆ្នាំ២០១៤ ២០១៥ ដោយសារតែខានឮយូរហើយដោយសម័យកាលនេះគឺផ្តោតទៅលើសិល្បៈរ៉េប។ ជាមួយនឹងការរៀបរាប់នេះ រ៉ូលីន ក៏មិនភ្លេចសរសើរទៅកាន់តារាចម្រៀង សុគន្ធ និសា ដែលពូកែឱ្យកាត់កន្លែង Teaser ហើយផ្ទុះការគាំទ្រភ្លូកទឹកភ្លូកដីតែម្តង។

គួរបញ្ជាក់ផងដែរថា «ចាក់ក្រឡេកទយ» បានចេញជាផ្លូវការកាលពីថ្ងៃទី២៣ មីនា ឆ្នាំ២០២៥ ដែលមកទល់ពេលនេះមានការស្តាប់ជាង៧លានដងនៅលើឆាណែលយូធូប សុគន្ធ និសា។ អាចនិយាយបានថានេះជាបទដ៏ជោគជ័យបំផុតមួយរបស់តារាចម្រៀងរូបនេះបន្ទាប់ពីក្លាយជាតារាចម្រៀងឯករាជ្យមក៕