អូជី ហ្គូលឌិន បានក្លាយជាម្ចាស់ពានកម្មវិធីប្រលងចម្រៀងរ៉េបដំបូងគេដែលហក់ចូលប្រឡូកក្នុងវិស័យសម្តែងដោយបង្ហាញខ្លួនតាមរយៈខ្សែភាពយន្តខ្នាតធំបន្ទាប់ពីក្លាយជាម្ចាស់ជ័យលាភីក្នុងរយៈពេលខ្លី។ ដ្បិតតែសកម្មភាពកន្លងមករបស់ អូជី ត្រូវរងការរិះគន់ប៉ុន្តែតារារ៉េបរូបនេះខ្នះខ្នែងបង្ហាញអ្វីដែលជាទេពកោសល្យរបស់ខ្លួនទៅកាន់មហាជន។
«ជើងកប» គឺជាភាពយន្តដែល អូជី បានបង្ហាញការសម្តែងក្នុងនាមជាតួអង្គសំខាន់។ មែនទែនទៅ អូជី ធ្លាប់បង្ហាញដំរួយកាលពីខែកក្កដា ឆ្នាំ២០២៥ ដោយបានបង្ហាញរូបភាពក្រៅឆាកមួយចំនួន ខណៈរឿងនេះគ្រោងចាក់បញ្ចាំងក្នុងរោងកុននៅថ្ងៃទី៩ ខែមេសា ឆ្នាំ២០២៦ នេះ។ វត្តមានរបស់ អូជី បានធ្វើឱ្យទស្សនិកជនមានការភ្ញាក់ផ្អើលពីព្រោះលោកគឺជាអ្នកចម្រៀងរ៉េប ប៉ុន្តែបានសម្រេចចិត្តបង្ហាញទេពកោសល្យសិល្បៈរបស់ខ្លួនថែមទៀតតាមរយៈភាពយន្ត។
បង្ហាញខ្លួនលើកដំបូងក្នុងនាមជាតារាសម្តែង អូជី បាននិយាយថាការថតនេះពុំមែនជារឿងងាយស្រួលនោះទេដោយសារតែការច្រៀងគឺមានអារម្មណ៍ផ្សេងហើយនៅពេលសម្តែងគឺមានអារម្មណ៍ផ្សេង។ អ្វីដែលជាចំណុចលំបាកសម្រាប់លោកដំបូងគឺជាឈុតឆាកយំ ដោយសារតែលោកពុំធ្លាប់សម្តែងយំនោះទេ។ ចំពោះឈុតដែលធ្វើឱ្យ អូជី អៀនក្នុងការថតគឺជាការថតតួស្រី និងឈុតដែលជិះកង់ដឹកគ្នាជាដើម។
ជាមួយនឹងស្នាដៃថ្មីនេះក៏បានធ្វើឱ្យមនុស្សជាច្រើនជាពិសេសអ្នកគាំទ្ររបស់លោកចាប់អារម្មណ៍ជាច្រើននិងមានគោលបំណងចង់ទៅទស្សនាភាពយន្តខាងលើនេះហើយក៏ចង់ឃើញពីការសម្តែងរបស់ អូជី ផងដែរ។
គូសបញ្ជាក់ថា OG Golden គឺជាកូនក្រុមរបស់ Ruthko បានក្លាយជាម្ចាស់ជ័យលាភីក្នុងកម្មវិធី Rapper Fighter កាលពីថ្ងៃទី២ កុម្ភៈ ឆ្នាំ២០២៥។ ចាប់តាំងក្លាយជាម្ចាស់ពាន អូជី បានរងភាពចម្រូងចម្រាសជាច្រើនលើកហើយថែមទាំងមានបំណងចង់ចាកចេញពីសិល្បៈថែមទៀត។ ទោះជាយ៉ាងណា តាមរយៈស្នាដៃបទចម្រៀងថ្មី រួមទាំងភាពយន្តផង អាចបញ្ជាក់បានថា អូជី មានចិត្តស្រលាញ់ចំពោះវិស័យសិល្បៈយ៉ាងខ្លាំងទោះបីប្រឈមនឹងរឿងជាច្រើនក្តី៕
