ប្រទេសឥណ្ឌា ៖ នាយករដ្ឋមន្ត្រីឥណ្ឌា លោក Narendra Modi បាននិយាយកាលពីថ្ងៃទី៧ ខែសីហា ឆ្នាំ២០២៥ ថា លោកនឹងពុំបោះបង់ផលប្រយោជន៍របស់កសិករទេ បើទោះជាអាមេរិកឱ្យឥណ្ឌាបង់ពន្ធទំនិញខ្ពស់យ៉ាងណាក៏ដោយ ។ នេះជាការឆ្លើយតបរបស់ឥណ្ឌាលើកដំបូងក្រោយពីប្រធានាធិបតីអាមេរិក លោក Donald Trump កំណត់ឱ្យមន្ត្រីដំឡើងពន្ធទំនិញឥណ្ឌារហូតដល់៥០% ដែលជាអត្រាពន្ធខ្ពស់ជាងបណ្តាប្រទេសដៃគូពាណិជ្ជកម្មរបស់អាមេរិក ។

លោក Narendra Modi នាយករដ្ឋមន្ត្រីឥណ្ឌាបាននិយាយនៅទីក្រុងញូវដេលីថា ៖ «ការរស់នៅល្អប្រសើររបស់កសិករឥណ្ឌា គឺសំខាន់បំផុតសម្រាប់យើង ។ ឥណ្ឌានឹងពុំបោះបង់ផលប្រយោជន៍របស់កសិករ អ្នកចិញ្ចឹមគោយកទឹកដោះ និងអ្នកនេសាទទេ ខ្ញុំដឹងយ៉ាងច្បាស់ថា ឥណ្ឌានឹងបង់ពន្ធទំនិញនាំចូលអាមេរិកខ្ពស់» ។

អាមេរិក និងឥណ្ឌាបានចរចាពាណិជ្ជកម្មជាមួយគ្នារហូតដល់៥លើក ប៉ុន្តែពុំទទួលជោគជ័យ ដោយសារអាមេរិកអំពាវនាវឱ្យឥណ្ឌាបើកទីផ្សារទិន្នផលកសិកម្ម និងទឹកដោះគោ ព្រមទាំងឈប់ទិញប្រេងឥន្ធនៈពីរុស្ស៊ី ។ ប៉ុន្តែឥណ្ឌានៅតែបន្តទិញប្រេងឥន្ធនៈរុស្ស៊ី ដោយសារចង់ឱ្យកសិករឥណ្ឌាបានប្រើប្រាស់ប្រេងឥន្ធនៈតម្លៃថោក ។

លោក Trump ថ្លែងថា អត្រាពន្ធថ្មីស្មើ៥០% នឹងអនុវត្តចាប់ពីថ្ងៃទី២៨ ខែសីហា ដែលនេះការដាក់ទោសដោយសារឥណ្ឌានៅតែទិញប្រេងឥន្ធនៈពីរុស្ស៊ី ។ រីឯក្រសួងការបរទេសឥណ្ឌាថ្លែងថា ការសម្រេចចិត្តរបស់អាមេរិកជារឿងគួរឱ្យសោកស្តាយយ៉ាងខ្លាំង ឥណ្ឌានឹងអនុវត្តគ្រប់វិធានការចាំបាច់ដើម្បីការពារផលប្រយោជន៍ជាតិ ។

អាមេរិកបានប្រកាសដំឡើងពន្ធទំនិញចិនផងដែរ ដោយសារចិននៅតែបន្តនាំចូលប្រេងឥន្ធនៈរុស្ស៊ី ។ អាមេរិកយល់ព្រមជាមួយចិនកន្លងមក ដោយសារចិនមានរ៉ែផ្សេងៗសម្រាប់ចរចាជាមួយអាមេរិក ខណៈឥណ្ឌាគ្មានរ៉ែសម្រាប់ចរចាជាមួយអាមេរិកទេ ។ នេះបើតាមការលើកឡើងរបស់អ្នកជំនាញ ។

លោក Dammu Ravi លេខាធិការទំនាក់ទំនងសេដ្ឋកិច្ចនៃក្រសួងការបរទេសឥណ្ឌានិយាយថា អាមេរិកដំឡើងពន្ធទំនិញឥណ្ឌារហូតដល់៥០% គ្មានហេតុផលសមស្របសោះ នេះជាបញ្ហាបណ្តោះអាសន្នដែលឥណ្ឌាត្រូវប្រឈម ហើយមិនយូរទេ នឹងមានដំណោះស្រាយ ។ រដ្ឋាភិបាលឥណ្ឌាបានស្វែងរកដៃគូពាណិជ្ជកម្មថ្មីដើម្បីទប់ទល់នឹងអត្រាពន្ធរបស់លោក Trump ហើយជាមូលហេតុធ្វើឱ្យទំនាក់ទំនងរវាងអាមេរិក-ឥណ្ឌាតានតឹងខ្លាំងក្នុងរយៈពេលជាច្រើនឆ្នាំ ។

លោក Narendra Modi គ្រោងធ្វើដំណើរទស្សនកិច្ចទៅចិនដើម្បីរឹតចំណងមិត្តភាពជាថ្មី ស្របពេលមិត្តភាពរវាងឥណ្ឌាជាមួយអាមេរិកធ្លាក់ចុះ ។ រីឯប្រធានាធិបតីប្រេស៊ីល លោក Lula da Silva គ្រោងប្រជុំជាមួយមេដឹកនាំក្រុមប្រទេស BRICS ដើម្បីពិភាក្សារកដំណោះស្រាយការដំឡើងពន្ធរបស់លោក Trump ហើយលោកបានទូរស័ព្ទមកកាន់នាយករដ្ឋមន្ត្រីឥណ្ឌា, ប្រធានាធិបតីចិន លោក ស៊ី ជិនពីង និងមេដឹកនាំប្រទេសផ្សេងៗ ៕

ប្រទេសថៃ ៖ នៅថ្ងៃទី៨ ខែសីហា ឆ្នាំ២០២៥ សារព័ត៌មានថៃ Khaosod រាយការណ៍ថា សមាជិកព្រឹទ្ធសភាថៃបានស្នើឱ្យរដ្ឋាភិបាលផ្តល់ប្រាក់ឧបត្ថម្ភដល់គ្រួសារកងទ័ព សមត្ថកិច្ច គ្រូបង្រៀន និងពលរដ្ឋនៅបណ្តាខេត្តភាគខាងត្បូងដែលបានស្លា.ប់ដោយសារការពារទឹកដីផង គឺពួកគេគួរតែទទួលបានប្រាក់ឧបត្ថម្ភពីរដ្ឋាភិបាលដូចគ្នានឹងគ្រួសាររបស់កងទ័ពដែលស្លា.ប់នៅព្រំដែនកម្ពុជា-ថៃ ដើម្បីឱ្យស្មើភាពគ្នា ។

សមាជិកព្រឹទ្ធសភា លោក ឆៃយ៉ុង ម៉ានីរុងសាគុន បាននិយាយនៅថ្ងៃទី៨ ខែសីហា ថា កងទ័ព សមត្ថកិច្ច និងពលរដ្ឋជាច្រើននាក់បានសុំភាពយុត្តិធម៌ពីសមាជិកព្រឹទ្ធសភារឿងរដ្ឋាភិបាលមានគោលការណ៍ផ្តល់ប្រាក់ឧបត្ថម្ភ ចំនួន១០លានបាតសម្រាប់កងទ័ព និងសមត្ថកិច្ចដែលស្លាប់ដោយសារសង្គ្រាមជាមួយកម្ពុជា ។ រីឯពលរដ្ឋស្លាប់ដោយសារសង្គ្រាមនេះ រដ្ឋាភិបាលត្រៀមផ្តល់ប្រាក់ចំនួន៨លានបាត ។

ពលរដ្ឋថៃនៅបណ្តាខេត្តភាគខាងត្បូងបានសុំភាពយុត្តិធម៌ ដែលពួកគេជាគ្រួសាររបស់អ្នកស្លាប់ ជនពិការ និងអ្នករងរបួស ដោយសារការពារទឹកដីនៅភាគខាងត្បូង ។ ពួកគេយល់ស្របដែលរដ្ឋាភិបាលផ្តល់ប្រាក់ឱ្យគ្រួសារសាកសពដែលស្លាប់ដោយសារធ្វើសង្គ្រាមជាមួយកម្ពុជា ប៉ុន្តែរដ្ឋាភិបាលក៏ត្រូវផ្តល់ប្រាក់ឧបត្ថម្ភឱ្យគ្រួសារកងទ័ព សមត្ថកិច្ច អ្នកស្ម័គ្រចិត្ត និងពលរដ្ឋ ដែលបានស្លាប់ដោយសារការពារទឹកដីភាគខាងត្បូងផងដែរ ។

សមាជិកព្រឹទ្ធសភា លោក ឆៃយ៉ុង បានអំពាវនាវឱ្យរដ្ឋាភិបាលផ្តល់ប្រាក់ឧបត្ថម្ភដល់គ្រួសារសាកសពដែលស្លាប់ដោយសារការពារទឹកដីដូចគ្នានៅទូទាំងប្រទេស ដោយសារពលរដ្ឋនៅខេត្តភាគខាងត្បូងបានស្លាប់ ពិការ និងរងរបួស គឺពលរដ្ឋតម្លៃស្មើៗគ្នា ។ បើរដ្ឋាភិបាលផ្តល់ប្រាក់ឱ្យកងទ័ព និងពលរដ្ឋស្លាប់ រងរបួសដោយសារសង្គ្រាមជាមួយកម្ពុជាស្មើទឹកប្រាក់ប៉ុន្មាន ក៏ត្រូវផ្តល់ឱ្យពលរដ្ឋនៅភាគខាងត្បូងក្នុងទឹកប្រាក់ស្មើគ្នា ឬប្រហាក់ប្រហែលគ្នាដើម្បីភាពយុត្តិធម៌ ។

រយៈពេល២១ឆ្នាំមកនេះ ពលរដ្ឋនៅភាគខាងត្បូងបានស្លាប់រហូតដល់ជាង៧,០០០នាក់ និងរងរបួសរាប់ម៉ឺននាក់ ។ ដូច្នេះ សូមរដ្ឋាភិបាលពិចារណារឿងការផ្តល់ប្រាក់ឧបត្ថម្ភដល់កងទ័ព សមត្ថកិច្ច និងពលរដ្ឋនៅភាគខាងត្បូងក្នុងចំនួនស្មើគ្នាដូចពលរដ្ឋរស់នៅបណ្តាខេត្តជាប់កម្ពុជា ដោយសារពលរដ្ឋនៅភាគខាងត្បូងពុំពេញចិត្តជាមួយរដ្ឋាភិបាលយ៉ាងខ្លាំង ។ នេះបើតាមការលើកឡើងរបស់លោក ឆៃយ៉ុង ៕

ប្រទេសថៃ ៖ នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ មើលឃើញថា វាជាសញ្ញាល្អក្រោយមានកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) ដែលប្រទេសទាំងពីរបានចរចាកិច្ចព្រមព្រៀងបទឈប់បា.ញ់ ។ លោកថា ប្រសិនបើកម្ពុជាបំពានកិច្ចព្រមព្រៀងឈប់បា.ញ់ នឹងមានការជជែកថ្នាក់មេបញ្ជាការទាំងពីរភាគី ក្រោមការសង្កេតការណ៍ពីអនុព័ន្ធយោធាម៉ាឡេស៊ី ប៉ុន្តែបើកម្ពុជានៅតែបំពានទៀត ថៃនឹងប្តឹងអាស៊ានឱ្យធ្វើជាសាក្សីតាមច្បាប់អន្តរជាតិ ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយក្រោយកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (Extraordinary GBC Meeting) ថា ៖ «នេះជាសញ្ញាល្អដែលប្រទេសទាំងពីរអាចចរចាគ្នា ហើយវាគួរឱ្យរីករាយដែលបានឃើញកិច្ចព្រមព្រៀងសម្រេចបានក្នុងកិច្ចប្រជុំ ។ បើមានភាពស្មោះត្រង់ និងអនុវត្តកិច្ចព្រមព្រៀងយ៉ាងម៉ឺងម៉ាត់នឹងធ្វើឱ្យបទឈប់បាញ់មានប្រសិទ្ធភាពស្របតាមកិច្ចព្រមព្រៀង» ។

ប៉ុន្តែប្រសិនបើកម្ពុជាបំពានកិច្ចព្រមព្រៀងឈប់បាញ់ គឺមេបញ្ជាការកងទ័ពទាំងពីរភាគីត្រូវតែជជែកគ្នា ដោយមានអនុព័ន្ធយោធាអាស៊ាននៅប្រទេសថៃ និងអនុព័ន្ធយោធាអាស៊ាននៅប្រទេសកម្ពុជា ព្រមទាំងអនុព័ន្ធយោធាម៉ាឡេស៊ីចូលរួមសង្កេតការណ៍ ។ បើកម្ពុជានៅតែបំពានកិច្ចព្រមព្រៀងបទឈប់បាញ់ទៀត ថៃនឹងប្តឹងអាស៊ានឱ្យធ្វើជាសាក្សី ដែលនេះជាការដំណើរការតាមច្បាប់អន្តរជាតិ ។ នេះបើតាមការលើកឡើងរបស់លោក ភូមិថាំ វីឆាយ៉ាឆៃ ។

ចំណែកសំណួរសួរថា តើថៃនឹងលុបចោលកិច្ចព្រមព្រៀងឆ្នាំ២០០០ ដែរឬទេ? លោក ភូមិថាំ វីឆាយ៉ាឆៃ និយាយថា កិច្ចព្រមព្រៀងឆ្នាំ២០០០ ពុំពាក់ព័ន្ធនឹងកិច្ចព្រមព្រៀងបទឈប់បាញ់ទេ ។ ការធ្វើកិច្ចព្រមព្រៀងឈប់បាញ់ គឺដើម្បីកុំឱ្យជម្លោះរាលដាលរហូតដល់ប៉ះទង្គិចគ្នា ខណៈកិច្ចព្រមព្រៀងឆ្នាំ២០០០ ជារឿងផ្សេង ហើយបើជជែកពីកិច្ចព្រមព្រៀងឆ្នាំ២០០០ ត្រូវតែជជែកតាមច្បាប់ទាំងអស់ ។

គួរបញ្ជាក់ថា កម្ពុជា និងថៃ ទទួលបានជោគជ័យនៃកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ ដោយមានការចូលរួមសង្កេតការណ៍ពីម៉ាឡេស៊ី សហរដ្ឋអាមេរិក និងចិន កាលពីថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី ។ ភាគីទាំងពីរបានពិភាក្សា និងឯកភាពគ្នាលើលក្ខខណ្ឌនៃការអនុវត្តបទឈប់បាញ់ និងបង្កើនការប្រាស្រ័យទាក់ទងគ្នារវាងកងទ័ពទាំងពីរ ។

កម្ពុជាបានគោរពកិច្ចព្រមព្រៀងបទឈប់បាញ់រហូតមក ហើយកម្ពុជាសង្ឃឹមថា ថៃនឹងគោរពកិច្ចព្រមព្រៀងឈប់បាញ់ដូចគ្នាដែរ ដោយថៃត្រូវដោះលែងកងទ័ពកម្ពុជាទាំង១៨រូប ដែលស្ថិតនៅក្រោមការឃុំគ្រងរបស់កងទ័ពថៃឱ្យបានឆាប់រហ័ស ៕

ថៃ៖ បញ្ហាសុខភាពផ្លូវចិត្តកំពុងក្លាយជាបញ្ហាធ្ងន់ធ្ងរកាន់តែខ្លាំងឡើងនៅក្នុងប្រទេសថៃ ដែលប៉ះពាល់ដល់មនុស្សជាង 13លាននាក់ មានចាប់ពីវ័យជំទង់ ដល់វ័យចំណាស់។ ការរកឃើញនេះបានផ្ដល់ជាក្ដីកង្វល់ធំមួយបន្ថែមទៀតសម្រាប់ប្រទេសថៃ ខណៈមានការអំពាវនាវឲ្យរដ្ឋាភិបាលយកចិត្តទុកដាក់លើការគាំទ្រសហគមន៍ ដើម្បីកែលម្អសុខុមាលភាពផ្លូវចិត្តរបស់ប្រជាជនទូទាំងប្រទេស។

នៅថ្ងៃទី8 ខែសីហា ឆ្នាំ2025 សារព័ត៌មាន បាងកកប៉ុស្តិ៍ បានរាយការណ៍ថា៖ បច្ចុប្បន្ន មានប្រជាជនថៃចំនួនជាង 13.4 លាននាក់ កំពុងជួបប្រទះនឹងបញ្ហាសុខភាពផ្លូវចិត្ត នេះបើយោងតាមរបាយការណ៍សុខភាពថៃឆ្នាំ 2025 ដែលចេញផ្សាយរួមគ្នាដោយមូលនិធិលើកកម្ពស់សុខភាពថៃ (ThaiHealth) និងវិទ្យាស្ថានស្រាវជ្រាវប្រជាជន និងសង្គមនៃសាកលវិទ្យាល័យ Mahidol ។

របាយការណ៍នេះបានកំណត់លើមនុស្សដែលមានអាយុពី 45 ដល់ 59 ឆ្នាំ ដែលជាក្រុមអាយុ “មុនវ័យចំណាស់” ថាមានកម្រិតសុភមង្គលទាបបំផុតទូទាំងប្រទេស ដែលបង្ហាញពីភាពងាយរងគ្រោះខាងផ្លូវចិត្តកាន់តែខ្លាំងនៅពេលដែលពួកគេចូលនិវត្តន៍។ ចំណែកក្រុមមនុស្សវ័យក្មេងដែលមានអាយុពី 15 ទៅ 29 ឆ្នាំក៏មានហានិភ័យខ្ពស់ផងដែរ ជាមួយនឹងការកើនឡើងនៃភាពតានតឹង ការថប់បារម្ភ ការធ្លាក់ទឹកចិត្ត និងគំនិតចង់ធ្វើអត្តឃាត។

អ្នកជំនាញផ្នែកផ្លូវចិត្តថៃ បានលើកឡើងថា៖ បញ្ហាទាំងនេះគឺជាប់ពាក់ព័ន្ធទៅនឹងសម្ពាធផ្នែកសិក្សា អំពើហិង្សាក្នុងគ្រួសារ ផលប៉ះពាល់នៃប្រព័ន្ធផ្សព្វផ្សាយសង្គម ការភ័យខ្លាចថាខ្លួនដើរមិនទាន់សង្គម (FOMO) និងការរំពឹងទុកខ្ពស់ពេកក្នុងការរស់នៅ។

របាយការណ៍នេះក៏បានលើកឡើងពីកង្វល់សុខភាពសំខាន់ៗចំនួន 10 សម្រាប់ឆ្នាំ 2025 ចាប់ពីផលប៉ះពាល់នៃការកែប្រែច្បាប់គ្រឿងស្រវឹង ការកើនឡើងអំពីចំនួនគ្រោះថ្នាក់លើការប្រើប្រាស់បារីអេឡិចត្រូនិច និងភាពមិនច្បាស់លាស់លើគោលនយោបាយថ្នាំជក់របស់រដ្ឋាភិបាលថៃ និងការពិភាក្សាជុំវិញការបង្កើតសិទ្ធិស្របច្បាប់នៃកាស៊ីណូ ជាហេតុធ្វើឲ្យពលរដ្ឋថៃដែលបានចូលពាក់ព័ន្ធនឹងរឿងទាំងនោះ ចាប់ផ្ដើមជួបនឹងវិបត្តិផ្លូវចិត្ត។

គួរជម្រាថា គិតមកត្រឹមឆ្នាំ2025នេះ ប្រទេសថៃមានប្រជាជនសរុបចំនួន 70លាននាក់ ក្នុងនោះបើធៀបនឹង 13.4 លាននាក់នៅក្នុងទិន្នន័យខាងលើបង្ហាញថា ជិត20% នៃប្រជាជនថៃទាំងមូលគឺកំពុងជួបបញ្ហាផ្លូវចិត្ត។ កត្តានេះក៏ត្រូវបានគេពិនិត្យឃើញថា មានជាប់ពាក់ព័ន្ធនឹងការថយចុះនៃអត្រាកំណើតរបស់ប្រទេសថៃផងដែរ ដែលជំរុញឲ្យមានព្រមានអំពីផលប្រឈមផ្នែកប្រជាសាស្រ្ត និងបញ្ហាសេដ្ឋកិច្ចរយៈពេលវែង៕

ប្រទេសវៀតណាម ៖ សមាគមអ្នកនាំចេញអង្ករថៃឱ្យដឹងថា វៀតណាមបានក្លាយជាប្រទេសនាំចេញអង្ករច្រើនទៅកាន់ពិភពលោក ស្ថិតក្នុងលំដាប់ទី២ ក្នុងរយៈពេល៦ខែដំបូងនៃឆ្នាំ២០២៥ ។ រីឯឥណ្ឌានៅតែជាប្រទេសនាំចេញអង្ករច្រើនជាងគេលំដាប់ទី១ ខណៈថៃធ្លាក់មកលំដាប់ទី៣ ដោយសារពុំអាចប្រកួតប្រជែងតម្លៃអង្ករជាមួយឥណ្ឌា និងវៀតណាមលើទីផ្សារពិភពលោក ។ នេះបើតាមការផ្សព្វផ្សាយរបស់សារព័ត៌មានថៃ កាលពីថ្ងៃទី៧ ខែសីហា ឆ្នាំ២០២៥ ។

បើតាមទិន្នន័យ គឺចាប់ពីខែមករា ដល់ខែមិថុនា ឆ្នាំ២០២៥ (រយៈពេល៦ខែ) បរិមាណការនាំចេញអង្ករទៅកាន់ពិភពលោករបស់ឥណ្ឌា ស្ថិតក្នុងលំដាប់ទី១ ស្មើនឹង១១លាន៦សែន៨ម៉ឺនតោន កើនឡើង៣៦.៥% បើធៀបនឹងរយៈពេលដូចគ្នាកាលពីឆ្នាំ២០២៤ ។

បន្ទាប់មក គឺវៀតណាមបាននាំចេញអង្ករទៅកាន់ពិភពលោក លំដាប់ទី២ ស្មើនឹង៤លាន៧សែន២ម៉ឺនតោន កើនឡើង៣.៦% រីឯការនាំចេញអង្កររបស់ថៃ លំដាប់ទី៣ ស្មើនឹង៣លាន៧សែន៣ម៉ឺនតោន ធ្លាក់ចុះ២៧.៣% ។ ក្រៅពីនេះ ការនាំចេញអង្កររបស់ប៉ាគីស្ថាន ស្មើនឹង២លាន៧សែន៦ម៉ឺនតោន ធ្លាក់ចុះ២០.២% និងការនាំចេញអង្ករអាមេរិក ស្មើជាង១លានតោន ធ្លាក់ចុះ២៣.៥% ។

បច្ចុប្បន្ន វៀតណាមបានបង្កើតពូជស្រូវជាច្រើនប្រភេទ និងអាចលក់អង្ករតម្លៃថោកជាងគូប្រជែងក្នុងតំបន់ ដូចជាថៃ ដោយសារវៀតណាមចំណាយដើមទុនផលិតស្រូវទាប ហើយកសិករវៀតណាមផលិតស្រូវជាច្រើនប្រភេទ និងអាចប្រមូលផលស្រូវច្រើនលើកក្នុង១ឆ្នាំៗ ។ វៀតណាមបាននាំចេញអង្ករទៅកាន់ទីផ្សារសំខាន់ៗ រួមមាន ៖ ហ្វីលីពីន អាហ្វ្រិក និងចិន ខណៈតម្លៃអង្ករនាំចេញរបស់វៀតណាមក្នុងរយៈពេល៦ខែឆ្នាំនេះ គឺជាមធ្យមស្មើ៥១៧ដុល្លារក្នុង១តោន ។

ដោយឡែក ប្រទេសដែលនាំចូលអង្ករថៃ រួមមាន ៖ អ៊ីរ៉ាក់បាននាំចូលអង្ករថៃ ចំនួន៥៨២,៧០៣តោន ស្មើ១៥.៦% បន្ទាប់មក សហរដ្ឋអាមេរិកបាននាំចូលអង្ករថៃ ចំនួន៤៣០,៦០៣តោន ស្មើ៧.៤% និងអាហ្វ្រិកនាំចូលអង្ករថៃ ចំនួន៣៥៩,០៣១តោន ស្មើ២.៥% ។

តាមការលើកឡើងរបស់នាយកសមាគមអ្នកនាំចេញអង្ករថៃ លោក ចារឺន ឡាំថាំម៉ាថាត់ គឺតម្លៃការនាំចេញអង្ករថៃរយៈពេល៦ខែដំបូងនៃឆ្នាំ២០២៥ ស្មើទឹកប្រាក់ជាង៧ម៉ឺនលានបាត ធ្លាក់ចុះ៣៦.៤% បើធៀបនឹងរយៈពេលដូចគ្នាកាលពីឆ្នាំ២០២៤ ។ កាលពីខែកក្កដាកន្លងមក ថៃបាននាំចេញអង្ករជាង៦សែនតោន ដោយសារអ៊ីរ៉ាក់ ចិន ជប៉ុន និងប្រទេសមួយចំនួននៅអាហ្វ្រិកបានបង្កើនការកុម្ម៉ង់ទិញអង្ករថៃមានតម្លៃធ្លាក់ចុះ ។

ប៉ុន្តែតម្លៃអង្ករថៃនៅចុងខែកក្កដា បានធ្លាក់ចុះជាបន្តបន្ទាប់ ស្របពេលនៅលើទីផ្សារពិភពលោកមានអង្ករលើសតម្រូវការ ដោយសារប្រទេសផលិតអង្ករសំខាន់ៗបានផលិតអង្ករកាន់តែច្រើន ទើបធ្វើឱ្យតម្រូវការនាំចូលអង្កររបស់ប្រទេសនានាធ្លាក់ចុះ ។ ហេតុនេះ នៅលើទីផ្សារពិភពលោកមានការប្រកួតប្រជែងតម្លៃអង្ករយ៉ាងខ្លាំង ៕