សុខ ស្រីមុំ តារាជើងចាស់ឯនាយសមុទ្រចូលរួមស្រែករកយុត្តិធម៌ជូនប្រទេសកំណើតតាមបណ្តាញសង្គម

សុខ ស្រីមុំ ជាតារាភាពយន្តម្នាក់មានឈ្មោះបោះសម្លេងខ្លាំងនាទសវត្សរ៍ ៩០ ដែលបានបន្សាត់ខ្លួនចេញទៅរស់នៅកសាងគ្រួសារលើទឹកដីប្រទេសអាមេរិកអស់ជាយូរឆ្នាំមកហើយនោះ កាលពីពេលថ្មីៗកន្លងមកនេះ អ្នកស្រីបានផ្សព្វផ្សាយរូបភាព និងវីដេអូមួយចំនួនចូលរួមទាមទាររកយុត្តិធម៌ជូនប្រទេសកំណើតរបស់ខ្លួន ទាក់ទងនឹងសង្គ្រាមឈ្លានពានតាមព្រំដែនពីសំណាក់ប្រទេសថៃ។

សំណេរជាភា English អមដោយរូបភាពចុងក្រោយគេដែលបង្ហាញអំពីវត្តមានរបស់ប្រាសាទព្រះវិហារ អ្នកស្រី ស្រីមុំ បានបញ្ជាក់យ៉ាងច្បាស់ប្រាប់ដល់ជនបរទេសថា ប្រាសាទបុរាណនានាដែលស្ថិតក្នុងទឹកដីប្រទេសកម្ពុជា គឺជាចំណុចស្នូលនៃវប្បធម៌ និងជាព្រលឹងរបស់ជនជាតិខ្មែរគ្រប់រូប។

ដោយឡែកប្រាសាទអង្គរវត្តក៏ស្ថិតនៅជាមជ្ឈមណ្ឌលនៃអរិយធម៌ អស់រយៈពេលជាង ៦០០ឆ្នាំ នៃបណ្តាប្រទេសមួយចំនួន រួមមានប្រទេសវៀតណាម ឡាវ ម៉ាឡេស៊ី និងប្រទេសថៃផងដែរ។ អ្នកស្រី ក៏បានអះអាងដែរថា ប្រាសាទព្រះវិហារបានបញ្ចូលក្នុងបញ្ជីបេតិកភណ្ឌពិភពលោកនៃអង្គការយូណេស្កូរួចរាល់ហើយ ដូច្នេះបុគ្គលគ្រប់រូបរៀបអំពីប្រវត្តិសាស្ត្រ ហើយព្រមទទួលស្គាល់ការពិត។

ក្នុងនាមពលរដ្ឋអាមេរិកដែលមានដើមកំណើតជាជនជាតិខ្មែរ តារាភាពយន្តជើងចាស់រូបនេះ បានផ្ញើសារសន្តិភាពទៅកាន់មនុស្សគ្រប់គ្នា ហើយសូមគោរពអញ្ជើញ ភ្ញៀវទាំងអស់ធ្វើដំណើរទៅទស្សនាប្រាសាទបុរាណរបស់ខ្មែរផងដែរ។

សូមបញ្ជាក់ថា ប្រាសាទព្រះវិហារ ស្ថិតនៅលើខ្ពង់រាបនៃជួរភ្នំដងរែក ដែលមានរយៈកម្ពស់ ៦២៥ម៉ែត្រ ធៀបនឹង កម្ពស់ទឹកសមុទ្រ ស្ថិតក្នុងស្រុកជាំក្សាន្ត ខេត្តព្រះវិហារ ។ ប្រាសាទនេះ បានចាប់ផ្តើមកសាងក្នុង រាជព្រះបាទយសោវរ្ម័នទី១ និងបញ្ចប់ការសាងសង់នៅក្នុងរាជព្រះបាទសូរ្យវរ្ម័នទី២ ដើម្បីឧទ្ទិសដល់ព្រះឥសូរក្នុងសាសនាហិណ្ឌូ៕