ប្រទេសម៉ាឡេស៊ី ៖ រដ្ឋាភិបាលម៉ាឡេស៊ីបានអនុម័តថវិកាប្រមាណ១ពាន់៥រយលានរីងហ្គីត (ឬជាង៣២០លានដុល្លារ) ដើម្បីសាងសង់របងនៅតាមបណ្តោយព្រំដែនរដ្ឋ Kelantan ជាមួយប្រទេសថៃ ដោយម៉ាឡេស៊ីរំពឹងថា របងព្រំដែនម៉ាឡេស៊ី-ថៃនឹងជួយទប់ស្កាត់ការជួ.ញដូរមនុស្ស លួចឆ្លងដែនខុសច្បាប់ ជួញដូរថ្នាំញៀន និងជារបងការពារទឹកជំនន់ ។ នេះបើតាមការចុះផ្សាយរបស់សារព័ត៌មាន Thairath កាលពីថ្ងៃទី២១ ខែតុលា ឆ្នាំ២០២៥ ។

តាមការលើកឡើងរបស់មេបញ្ជាការប៉ូលិសរដ្ឋ Kelantan គម្រោងសាងសង់របងព្រំដែនម៉ាឡេស៊ី-ថៃ គឺមានការអនុម័តពីក្រុមប្រឹក្សាសន្តិសុខជាតិ ដែលបច្ចុប្បន្ន គម្រោងសាងសង់របងព្រំដែននេះស្ថិតក្នុងដំណាក់កាលដេញថ្លៃ និងរៀបចំកិច្ចសន្យា ។ របងព្រំដែននឹងចាប់ផ្តើមសាងសង់ចាប់ពីតំបន់ទុមផាត រហូតដល់តំបន់តាន់ម៉ារ៉ក ។

កាលពីថ្ងៃទី១៣ ខែតុលា កន្លងមក មេបញ្ជាការប៉ូលិសរដ្ឋ Kelantan និយាយថា ការសាងសង់របងនៅតាមមាត់ទន្លេហ្គោលក ក្នុងតំបន់រ៉ាន់តៅប៉ាន់យាំង និងតំបន់ប៉ាស៊ីម៉ាស គឺមានភាពចាំបាច់ជាយុទ្ធសាស្ត្រ មិនមែនគ្រាន់តែជាជម្រើសទៀតទេ ដោយសារទីតាំងភូមិសាស្ត្រទន្លេហ្គោលក មានសភាពតូចចង្អៀតនិងទឹករាក់ ទើបធ្វើឱ្យពិបាកគ្រប់គ្រងសុវត្ថិភាព ។ ជាមួយគ្នានេះ របងព្រំដែននឹងជួយទប់ស្កាត់ការលួចដឹកទំនិញខុសច្បាប់ ឧក្រិដ្ឋកម្មឆ្លងដែន និងជួយការពារទឹកជំនន់ ។

គម្រោងសាងសង់របងព្រំដែនម៉ាឡេស៊ី-ថៃ គឺស្ថិតក្នុងផែនការពង្រឹងសន្តិសុខព្រំដែនដ៏ធំបំផុតរបស់ប្រទេសម៉ាឡេស៊ីកាលពីចុងឆ្នាំ២០២៤ កន្លងមក ក្រោយពីម៉ាឡេស៊ីមានបញ្ហាការលួចលក់ទំនិញខុសច្បាប់ ជួញដូរថ្នាំញៀន និងលួចឆ្លងដែនខុសច្បាប់តាមព្រំដែនម៉ាឡេស៊ី-ថៃជាបន្តបន្ទាប់ ។

គួរបញ្ជាក់ថា ម៉ាឡេស៊ីមានគម្រោងសាងសង់របងព្រំដែនជាមួយថៃ ដោយសារការលួចដឹកទំនិញខុសច្បាប់កើនឡើងខ្លាំង ដូចជា ប្រេងឥន្ធនៈ ថ្នាំញៀន និងជួញដូរមនុស្ស ហើយរបងនេះនឹងទប់ស្កាត់ក្រុមធ្វើសកម្មភាពបះបោរនៅថៃ ដែលតែងតែឆ្លងដែនទៅម៉ាឡេស៊ីរកកន្លែងសុវត្ថិភាព ។ ការជួញដូរមនុស្ស រត់ពន្ធថ្នាំញៀន និងអាវុធ គឺជាបទឧក្រិដ្ឋដែលកើតឡើងនៅតាមបណ្តោយព្រំដែនម៉ាឡេស៊ី-ថៃជាយូរមកហើយ ៕

ទីក្រុងសេអ៊ូល៖ កូរ៉េខាងត្បូងបានដាក់បម្រាមកម្រិតខ្ពស់ចំពោះការធ្វើដំណើររបស់ពលរដ្ឋកូរ៉េមកកាន់ប្រទេសកម្ពុជា ក្រោមហេតុផលក្តីបារម្ភពីការធ្លាក់ក្នុងអន្ទាក់នៃក្រុមឧក្រិដ្ឋជនអនឡាញ ដោយបានកំណត់គោលដៅមួយចំនួនថាជាតំបន់គ្រោះថ្នាក់ និងព្រ.មានបើពលរដ្ឋកូរ៉េណាម្នាក់ដែលហ៊ានល្មើសបម្រាមនេះនឹងត្រូវប្រឈមការផ្តន្ទាទោសតាមច្បាប់។

យោងតាមប្រព័ន្ធផ្សព្វផ្សាយរបស់កូរ៉េខាងត្បូងកាលពីសប្ដាហ៍មុនបានប្រកាសថា ការកំណត់កូដខ្មៅ (code-black) គឺផ្តោតលើតំបន់ជាក់លាក់មួយចំនួន រួមមានក្រុងព្រះសីហនុ ភ្នំបូកគោក្នុងខេត្តកំពត ក្រុងបាវិតក្នុងខេត្តស្វាយរៀង និងក្រុងប៉ោយប៉ែត ក្នុងខេត្តបន្ទាយមានជ័យ ថាជាសម្បុកឧក្រិដ្ឋកម្មដ៏គ្រោះថ្នាក់ ដែលពលរដ្ឋត្រូវតែជៀសវាងការធ្វើដំណើរទៅជាដាច់ខាត។

បន្ថែមពីលើបម្រាមនេះ រដ្ឋមន្ត្រីក្រសួងការបរទេសកូរ៉េខាងត្បូងបានព្រមានពលរដ្ឋខ្លួនថា ប្រសិនបើមាននរណាម្នាក់ព្យាយាមធ្វើដំណើរ ឬស្នាក់នៅតំបន់ដែលបានហាមឃាត់ នោះពួកគេនឹងត្រូវប្រឈមមុខនឹងការផ្តន្ទាទោសតាមច្បាប់ និងបទប្បញ្ញត្តិផ្សេងៗទៀត។ គួរបញ្ជាក់ថា ចំណាត់ការរបស់អជ្ញាធរកូរ៉េខាងត្បូងទាំងនេះធ្វើឡើង ក្រោយមានរបាយការណ៍ស្លា.ប់និស្សិតម្នាក់នៅលើភ្នំបូកគោក្នុងខេត្តកំពតដែលបណ្តាលមកពីការធ្វើទារុណកម្មធ្ងន់ធ្ងរពីសំណាក់ក្រុមឧក្រិដ្ឋជនអនឡាញ ជាជនជាតិចិន។

ដូចគ្នានេះដែរ ក្រសួងការបរទេសកូរ៉េខាងត្បូង ក៏បានណែនាំប្រជាជនកូរ៉េខាងត្បូងឱ្យមានការប្រុងប្រយ័ត្នខ្ពស់នៅពេលធ្វើដំណើរទៅកាន់តំបន់ផ្សេងទៀតនៃអាស៊ី ជាពិសេស ថៃ ឡាវ និងហ្វីលីពីន ខណៈបញ្ហាស្រដៀងគ្នានេះ កំពុងមានការកើនឡើងខ្លាំងនៅក្នុងតំបន់អាសុីអាគ្នេយ៍។

យ៉ាងណាក៏ដោយ ក្រោយជំនួបពិភាក្សាការងាររវាង លោកជំទាវ Kim Jin-ah អនុរដ្ឋមន្ត្រីទី២ នៃក្រសួងការបរទេសកូរ៉េខាងត្បូង និងឯកឧត្តម ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃកម្ពុជា ប្រទេសទាំងពីរបានឈានដល់កិច្ចព្រមព្រៀងនឹងបង្កើតក្រុមការងារ Task Force មួយ ដើម្បីជំរុញសន្ទុះការងារ ការបង្ការ ទប់ស្កាត់ និងបង្ក្រាបអំពើឆបោកតាមប្រព័ន្ធអនឡាញ។

បើតាមការឲ្យដឹងរបស់ឯកឧត្តម ស សុខា បានគូសបញ្ជាក់ថា ភាគីកូរ៉េ នឹងរៀបចំផ្ដល់បញ្ជីមុខសញ្ញាឧក្រិដ្ឋជន រួមទាំងជនបរទេសជាមេខ្លោង នៃអំពើឆបោកតាមប្រព័ន្ធអនឡាញ ជូនក្រសួងមហាផ្ទៃកម្ពុជា ដើម្បីកម្ពុជា ពិនិត្យទិដ្ឋភាពច្បាប់ដាក់ក្នុងបញ្ជីខ្មៅហាមប្រាមមិនចូលប្រទេស។

លើសពីនេះ ប្រទេសទាំងពីរ ក៏បានឯកភាពគ្នាបង្កើនសកម្មភាពផ្សព្វផ្សាយអប់រំដល់ប្រជាពលរដ្ឋរៀងៗខ្លួនបន្ថែមទៀត អំពីគ្រោះថ្នាក់ នៃអំពើឆបោកតាមប្រព័ន្ធអនឡាញ ព្រមទាំងជំរុញឱ្យបណ្ដាប្រទេសផ្សេងទៀត រួមគ្នាធ្វើការងារនេះឱ្យបានសកម្ម និងគ្មានទីបញ្ចប់ផងដែរ៕

ប្រទេសថៃ ៖ តាមការចុះផ្សាយរបស់សារព័ត៌មាន Khaosod នៅថ្ងៃទី២៣ ខែតុលា ឆ្នាំ២០២៥នេះ នាយករដ្ឋមន្ត្រីថៃ លោក អនុថីន ឆាន់វីរៈគូន បានកោះប្រជុំរដ្ឋមន្ត្រីសំខាន់ៗដើម្បីត្រៀមខ្លួនចូលរួមកិច្ចប្រជុំកំពូលអាស៊ាន និង APEC នាពេលខាងមុខ ប៉ុន្តែលោកមិនបានឆ្លើយសំណួរអ្នកសារព័ត៌មានដែលសួរពីការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ីទេ ។

នាវេលាម៉ោង៨និង៤០នាទីព្រឹក ថ្ងៃទី២៣ ខែតុលា លោក អនុថីន ឆាន់វីរៈគូន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ បានផ្តល់សម្ភាសន៍ជាមួយសារព័ត៌មាននៅទីលានរូបសំណាក់ព្រះមហាក្សត្រថៃជិះសេះក្នុងតំបន់ឌុស៊ីត ទីក្រុងបាងកក ថា ថ្ងៃនេះ (ថ្ងៃទី២៣ ខែតុលា) លោកបានកោះប្រជុំរដ្ឋមន្ត្រីសំខាន់ៗដើម្បីពិនិត្យមើលការងារឡើងវិញមុនធ្វើដំណើរទៅចូលរួមកិច្ចប្រជុំកំពូលអាស៊ាននៅម៉ាឡេស៊ី និងកិច្ចប្រជុំមេដឹកនាំតំបន់សេដ្ឋកិច្ច APEC នៅកូរ៉េខាងត្បូង ថាតើនឹងត្រូវចុះហត្ថលេខា ឬឯកភាពអ្វីខ្លះ ឬមានអ្វីរាំងស្ទះ ។

ប៉ុន្តែនាយករដ្ឋមន្ត្រីថៃមិនបានឆ្លើយសំណួររបស់អ្នកសារព័ត៌មានពាក់ព័ន្ធនឹងការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ី ដោយមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ជាសាក្សីទេ ។ នាវេលាម៉ោង៩និង១០នាទី លោក អនុថីន ក៏បានចាកចេញពីទីលានរូបសំណាក់ព្រះមមហាក្សត្រថៃជិះសេះក្នុងតំបន់ឌុស៊ីត និងធ្វើដំណើរទៅអគារថៃឃូហ្វានៅវិមានរដ្ឋាភិបាល ដើម្បីប្រជុំជាមួយរដ្ឋមន្ត្រីសំខាន់ៗជជែកពីការត្រៀមខ្លួនចូលរួមកិច្ចប្រជុំកំពូលអាស៊ាននៅម៉ាឡេស៊ី និងកិច្ចប្រជុំមេដឹកនាំតំបន់សេដ្ឋកិច្ច APEC នៅកូរ៉េខាងត្បូង ។

ចំណែករដ្ឋមន្ត្រីសំខាន់ៗដែលមកចូលរួមប្រជុំជាមួយនាយករដ្ឋមន្ត្រី រួមមាន ៖ រដ្ឋមន្ត្រីធនធានធម្មជាតិ និងបរិស្ថាន, រដ្ឋមន្ត្រីកសិកម្ម, រដ្ឋមន្ត្រីការបរទេស, រដ្ឋមន្ត្រីពាណិជ្ជកម្ម និងរដ្ឋមន្ត្រីជាច្រើនរូបទៀត ដែលកិច្ចប្រជុំនេះមានរយៈពេលប្រមាណ៥០នាទី ។

នាយករដ្ឋមន្ត្រីថៃបដិសេធមិននិយាយពីការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅម៉ាឡេស៊ី ធ្វើឱ្យមហាជនមានចម្ងល់យ៉ាងខ្លាំងទៅលើគោលជំហររបស់មេដឹកនាំថៃ ថាតើលោកមានផែនការ ឬអាថ៌កំបាំងអ្វីពាក់ព័ន្ធនឹងការចុះហត្ថលេខា ។ បើតាមរដ្ឋមន្ត្រីការបរទេសថៃ លោក សីហស័ក្តិ ពួងកេតកែវ និយាយនៅថ្ងៃទី២៣ ខែតុលា ថា លោកមានទំនុកចិត្តកម្ពុជា-ថៃនឹងចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ី ដើម្បីស្តារទំនាក់ទំនងប្រទេសទាំងពីរឈានទៅរកភាពប្រក្រតីឡើងវិញ ក្រោយបញ្ចប់កិច្ចប្រជុំ GBC និង JBC ។

មតិខ្លះថា រដ្ឋាភិបាលថៃហាក់បន្ទន់ឥរិយាបថរបស់ខ្លួនចំពោះស្ថានការណ៍ជម្លោះព្រំដែនជាមួយកម្ពុជា ក្រោយពីថៃខាតបង់ប្រាក់រហូតដល់ជាង៤៥០លានដុល្លារក្នុង១ខែ ដោយសារការបិទព្រំដែនធ្វើឱ្យប៉ះពាល់ដល់ពាណិជ្ជកម្មរវាងប្រទេសទាំងពីរ ។ ពេលទើបឡើងកាន់តំណែងថ្មីៗ នាយករដ្ឋមន្ត្រីថៃចង់បើកព្រំដែនឡើងវិញ និងថាមិនអាចឱ្យជម្លោះជាមួយប្រទេសជិតខាងអូសបន្លាយបែបនេះទេ ប៉ុន្តែត្រូវបានពលរដ្ឋថៃប្រឆាំង ៕

បាងកក៖ អនុរដ្ឋមន្ត្រីក្រសួងហិរញ្ញវត្ថុ លោក Vorapak Tanyawong ត្រូវបង្ខំចិត្តចុះចេញពីតំណែងភ្លាមៗ បន្ទាប់ពីមានរបាយការណ៍ជាច្រើនដែលរកឃើញថា គាត់មានជាប់ពាក់ព័ន្ធមេក្រុមឧក្រិដ្ឋជនចាប់ជំរិត ឆបោ.ក និងបណ្តាញក្រុមឧក្រិដ្ឋកម្មតាមអ៊ីនធឺណេតដ៏ធំមួយនៅក្នុងតំបន់។ នេះបើតាមទីភ្នាក់ងារព័ត៌មានអាមេរិក The New York Time។

យោងតាមការចុះផ្សាយរបស់សារព័ត៌មាន Asia Sentinel នៅថ្ងៃទី២២ ខែតុលា ឆ្នាំ២០២៥ បានឲ្យដឹងថា លោក Vorapak ដែលទើបឡើងកាន់តំណែងនាពេលថ្មីៗនេះ ក្រោមរដ្ឋាភិបាលចម្រុះដឹកនាំដោយគណបក្ស Bhumjaithai ត្រូវបានគេរាយការណ៍ថាបានផ្ទេរប្រាក់ប្រហែល 3 លានដុល្លារជារូបិយប័ណ្ណគ្រីបតូទៅឱ្យភរិយារបស់គាត់។

របាយការណ៍នេះ ត្រូវបានលោក Vorapak បដិសេធយ៉ាងដាច់អហង្ការ ដោយលោកអះអាងថា លោកមិនមានជាប់ពាក់ព័ន្ធជាមួយក្រុមបោកប្រាស់អនឡាញដូចដែលគេចោទនោះទេ ហើយលោកត្រៀមតទល់ជាមួយពាក្យបណ្តឹងទាំងឡាយ។ លោកបានច្រានចោលរាល់ការចោ.ទប្រកាន់ និងបានប្តេជ្ញាចាត់វិធានការតាមផ្លូវច្បាប់ចំពោះការផ្សាយអះអាងបំភ្លៃការពិត និងការបង្ខូចកេរ្តិ៍របសលោក។

ទន្ទឹមនឹងនេះលោក Vorapak បានធ្វើការបកស្រាយថា បានប្រកាសលាលែងពីតំណែងរបស់លោកកាលពីថ្ងៃពុធនេះ គឺដើម្បីការពារភាពស្អាតស្អំរបស់រដ្ឋាភិបាលថៃ ខណៈប្រព័ន្ធផ្សព្វផ្សាយកំពុងដាក់ឈ្មោះលោកថាជាអ្នកនយោបាយម្នាក់ក្នុងចំណោមអ្នកនយោបាយប្រាំពីរនាក់ ដែលត្រូវបានចោ.ទប្រកាន់ថាមានទំនាក់ទំនងនឹងបណ្តាញបោកប្រាស់នៅក្នុងតំបន់តែប៉ុណ្ណោះ។ ចំណែកប្រព័ន្ធផ្សព្វផ្សាយក្នុងស្រុកថៃបានបញ្ជាក់ទៀតថា ការចុះចេញពីតំណែងរបស់អនុរដ្ឋមន្ត្រីក្រសួងហិរញ្ញវត្ថុរូបនេះ មិនមានជាប់ទាក់នឹងមុខរបររកសុីខុសច្បាប់ ឬក្រុមឧក្រិដ្ឋជនអនឡាញអ្វីឡើយ។

ទោះជាយ៉ាងណា បច្ចុប្បន្នលោក Vorapak កំពុងត្រូវប្រឈមមុខនឹងការត្រួតពិនិត្យលម្អិតលើកម្ចីឥណទាន ដែលត្រូវបានចោ.ទប្រកាន់ថាមានភាពមិនប្រក្រតី កាលពីក្នុងអំឡុងពេលគាត់ធ្វើជាគ្រប់គ្រងនៅធនាគារ Krung Thai Bank និងបញ្ហាទំនាក់ទំនងរវាងលោកជាមួយនឹង Benjamin Mauerberger ជាពាណិជ្ជករបរទេស ដែលត្រូវបានចោទប្រកាន់ពីបទប្រើប្រាស់បណ្តាញគ្រីបតូ ដើម្បីជ្រៀតចូលផ្ទៃក្នុងនៃហិរញ្ញវត្ថុរបស់ថៃ។

តាមរយៈរបាយការស៊ើបអង្កេតរបស់ទីភ្នាក់ងារពិសេស Whale Hunting បានលាតត្រដាងពីភាពខ្មៅងងឹត និងរឿងអាស្រូវជាច្រើន ជុំវិញបទល្មើសឆ្លងដែន ការក្លែងបន្លំ និងឧក្រិដ្ឋកម្មតាមអុីនធឺណេត ដោយបានអូសទាញអ្នកនយោបាយថៃមួយចំនួនឲ្យចូលមកពាក់ព័ន្ធបន្តកន្ទុយគ្នា។ ក្នុងនោះរួមមានទាំងឧបនាយករដ្ឋមន្ត្រី Thammanat Prompao ក៏កំពុងស្ថិតក្រោមការសង្ស័យផងដែរ៕

ប្រទេសថៃ ៖ រដ្ឋមន្ត្រីការបរទេសថៃ លោក សីហស័ក្តិ ពួងកេតកែវ បានបង្ហាញទំនុកចិត្តនឹងមានពិធីចុះហត្ថលេខាលើកិច្ចព្រមព្រៀងសន្តិភាពនាថ្ងៃទី២៥ ខែតុលានេះក្នុងកិច្ចប្រជុំកំពូលអាស៊ាននៅប្រទេសម៉ាឡេស៊ីដើម្បីស្តារទំនាក់ទំនងប្រទេសទាំងពីរឡើងវិញ ដែលមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ធ្វើជាសាក្សី ។ នេះបើតាមការចុះផ្សាយរបស់សារព័ត៌មានថៃ Matichon នៅថ្ងៃទី២៣ ខែតុលា ឆ្នាំ២០២៥ ។

រដ្ឋមន្ត្រីការបរទេសថៃ លោក សីហស័ក្តិ ជឿជាក់កម្ពុជានឹងយល់ព្រមតាមលក្ខខណ្ឌចំនួន៤ រួមមាន ១-ដកកម្លាំងទ័ពចេញពីតំបន់ព្រំដែន ២-ដកអាវុធធុនធ្ងន់ ៣-បោសសម្អាតមីន និង៤-បង្ក្រាបឧក្រិដ្ឋកម្មឆ្លងដែន ។ ទន្ទឹមនឹងនេះ កិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ នឹងជជែកលម្អិតពីបញ្ហានៅភូមិណងចាន់ (ភូមិជោគជ័យ) និងភូមិណងយ៉ាកែវ (ភូមិព្រៃចាន់) បន្តទៀត ។

នៅថ្ងៃទី២៣ ខែតុលា រដ្ឋមន្ត្រីការបរទេសថៃបាននិយាយពីការចុះហត្ថលេខាលើកិច្ចព្រមព្រៀងសន្តិភាពក្នុងកិច្ចប្រជុំកំពូលអាស៊ាននៅម៉ាឡេស៊ី ចាប់ពីថ្ងៃទី២៥ ដល់ថ្ងៃទី២៨ ខែតុលា ឆ្នាំ២០២៥ ដើម្បីដោះស្រាយជម្លោះព្រំដែនកម្ពុជា-ថៃថា ក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) នៅទីក្រុងកូឡាឡាំពួ ប្រទេសម៉ាឡេស៊ី ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ គឺភាគីទាំងពីរបានព្រមព្រៀងក្នុងកម្រិតមួយ រួមមាន ដកថយអាវុធធុនធ្ងន់ បោសសម្អាតមីន និងបង្ក្រាបឧក្រិដ្ឋកម្មឆ្លងដែន ។ ភាគីទាំងពីរបានឯកភាពអនុវត្តផែនការជាជំហានៗ រួមទាំងជជែកពីបញ្ហានៅភូមិណងចាន់ (ភូមិជោគជ័យ) និងភូមិណងយ៉ាកែវ (ភូមិព្រៃចាន់) ។

បន្ទាប់ពីនេះ ភាគីទាំងពីរនឹងជជែកគ្នាពីតំបន់ព្រំដែនណាខ្លះដែលមានបញ្ហា និងរកដំណោះស្រាយជាបន្តបន្ទាប់ទៀត ។ រីឯកិច្ចប្រជុំពិសេសលើកទី២ គណៈកម្មាធិការព្រំដែនទូទៅកម្ពុជា-ថៃ (GBC) នៅថ្ងៃទី២៣ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី គឺលោកសង្ឃឹមថា នឹងប្រព្រឹត្តទៅដោយរលូន ពីព្រោះនឹងមានការចុះហត្ថលេខាលើកំណត់ហេតុកិច្ចប្រជុំ GBC រវាងឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងរដ្ឋមន្ត្រីការពារជាតិកម្ពុជា និងរដ្ឋមន្ត្រីការពារជាតិថៃ លោក ណាត់ថាផុង ណាកផានិច ។

បើកិច្ចប្រជុំទាំងអស់ដំណើរការដោយរលូន គឺនឹងមានពិធីចុះហត្ថលេខាលើកិច្ចព្រមព្រៀងសន្តិភាពប្រកាសពីទំនាក់ទំនងកម្ពុជា-ថៃដោយនាយករដ្ឋមន្ត្រីប្រទេសទាំងពីរ ក្នុងកិច្ចប្រជុំកំពូលអាស៊ាននៅម៉ាឡេស៊ី នាថ្ងៃទី២៥ ខែតុលា ដែលមានប្រធានាធិបតីអាមេរិក លោក Donald Trump, នាយករដ្ឋមន្ត្រីម៉ាឡេស៊ី លោក Anwar Ibrahim រួមទាំងមេដឹកនាំប្រទេសសមាជិកអាស៊ានផ្សេងទៀតធ្វើជាសាក្សី ។

ក្រោយបញ្ចប់ពិធីចុះហត្ថលេខាលើកិច្ចព្រមព្រៀងសន្តិភាពនៅម៉ាឡេស៊ី នឹងមានការដកអាវុធធុនធ្ងន់ បោសសម្អាតមីន និងបង្ក្រាបឧក្រិដ្ឋកម្មឆ្លងដែន ដោយមានផែនការ និងកំណត់ពេលវេលាច្បាស់លាស់ ។ រីឯបញ្ហានៅភូមិណងចាន់ (ភូមិជោគជ័យ) និងភូមិណងយ៉ាកែវ (ភូមិព្រៃចាន់) ដែលកងទ័ពថៃយកបន្លាសលួសមកព័ទ្ធនោះ គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ នឹងជជែកគ្នាលម្អិតឱ្យច្បាស់លាស់ និងដោះស្រាយនាពេលបន្ទាប់ ។ នេះបើតាមការលើកឡើងរបស់រដ្ឋមន្ត្រីការបរទេសថៃ ។

គួរបញ្ជាក់ថា កម្ពុជា-ថៃបានរៀបចំកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) នៅខេត្តចន្ទបុរី ប្រទេសថៃ រយៈពេល២ថ្ងៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ។ កម្ពុជា-ថៃក៏បានរៀបចំកិច្ចប្រជុំក្រុមលេខាធិការដ្ឋាននៃគណៈកម្មាធិការព្រំដែនទូទៅកម្ពុជា-ថៃ (GBC) នៅទីក្រុងកូឡាឡាំពួ ប្រទេសម៉ាឡេស៊ី ផងដែរ ចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ ហើយនៅថ្ងៃទី២៣ ខែតុលានេះ គឺជាកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅកម្ពុជា-ថៃ (GBC) ។

កម្ពុជាសង្ឃឹមយ៉ាងមុតមាំថា កិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅកម្ពុជា-ថៃ (GBC) នាថ្ងៃទី២៣ ខែតុលា នឹងទទួលបានលទ្ធផលជាវិជ្ជមានបន្ថែមទៀត ដើម្បីអនុញ្ញាតឱ្យភាគីទាំងពីរអាចបន្តជំរុញការអនុវត្តបទឈប់បាញ់មានប្រសិទ្ធភាពពេញលេញ សំដៅនាំមកនូវសន្តិភាព ស្ថិរភាព និងការវិលត្រឡប់ទៅរកប្រក្រតីភាពវិញបានឆាប់រហ័ស ៕