រាជធានីភ្នំពេញ៖ កិច្ចប្រជុំរបស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ទទួលបានលទ្ធផលជាវិជ្ជមាន ដោយភាគីទាំងពីរបានឯកភាពសាងសង់ឡើងវិញនូវបង្គោលព្រំដែនចំនួន១៥ តាមគំរូដើមបង្គោលជំនាន់បារាំង នៅទីតាំងដែលភាគីទាំងពីរបានឯកភាពគ្នាកាលពីមុន និងឯកភាពបោះបង្គោលបណ្ដោះអាសន្ននៅភូមិជោគជ័យ និងភូមិព្រៃចាន់ ផងដែរ។

យោងតាមសេចក្ដីប្រកាសព័ត៌មានរួមក្រោយកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ នៅថ្ងៃទី២១-២២ ខែតុលា ឆ្នាំ២០២៥។ គណៈប្រតិភូកម្ពុជាដឹកនាំដោយ ឯកឧត្តម ឡាំ ជា រដ្ឋមន្ត្រី ទទួលបន្ទុករដ្ឋលេខាធិការដ្ឋានកិច្ចការព្រំដែននៃព្រះរាជាណាចក្រកម្ពុជា និង គណៈប្រតិភូថៃដឹកនាំដោយឯកឧត្តម Prasas Prasasvinitchai ទីប្រឹក្សាក្រសួងការបរទេសនៃព្រះរាជាណាចក្រថៃ បានឯកភាពគ្នាលើចំណុចសំខាន់ៗមួយចំនួន ក្នុងការគាំទ្រដល់ដំណើរការវាស់វែង ខណ្ឌសីមាព្រំដែនគោករវាងប្រទេសទាំងពីរប្រកបដោយតម្លាភាព។

ក្នុងនោះ កម្ពុជា-ថៃ បានឯកភាពគ្នាប្រគល់ភារកិច្ចជូនគណៈកម្មការបច្ចេកទេសជម្រុះព្រំដែនកម្ពុជា-ថៃ (JTSC) ដើម្បីសាងសង់ឡើងវិញនូវបង្គោលព្រំដែនចំនួន១៥ តាមគំរូដើមបង្គោលជំនាន់បារាំងនៅទីតាំងដែលភាគីទាំងពីរបានឯកភាពគ្នាលើទីតាំងដើម។ បន្ថែមលើពីនេះ ភាគីទាំងពីរក៏បានឯកភាពគ្នាសាងសង់ឡើងវិញនូវបង្គោលព្រំដែនលិចទឹកចំនួន៣ នៅទីតាំងដែលភាគីទាំងពីរបានឯកភាពគ្នា។នេះបើយោងតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំពិសេសJBC នៅខេត្តចន្ទបុរី ប្រទេសថៃ កាលពីថ្ងៃទី២១-២២ ខែតុលា។

ពាក់ព័ន្ធនឹងព្រំដែនចំណុចភូមិជោគជ័យ និងភូមិព្រៃចាន់ ភាគីទាំងពីរបានឯកភាពបោះបង្គោលបណ្ដោះអាសន្ននៅចន្លោះបង្គោលលេខ ៤២-៤៧ និងពិនិត្យសម្រេចលើការបង្កើតយន្តការសមស្របណាមួយ សម្រាប់ធ្វើការកែសម្រួលការកាន់កាប់ និងអាស្រ័យផលរបស់ភាគីទាំងពីរ។

ជាមួយគ្នានេះ ភាគីទាំងពីរបានឯកភាពសម្របសម្រួលណែនាំដល់អាជ្ញាធរមូលដ្ឋាន ជនស៊ីវិល ដើម្បីចូលរួមធានាសុវត្ថិភាព និងមិនរារាំងដល់ក្រុមវាស់វែងចម្រុះ ព្រមទាំងត្រូវចៀសវាង រាល់សកម្មភាពបង្កហេតុ ដែលអាចបង្កើតភាពតានតឹងបន្ថែមទៀតនៅក្នុងតំបន់នេះ ហើយត្រូវធានា សុវត្ថិភាពពីគ្រាប់មីន ដោយអនុលោមតាមមាត្រា ៣ នៃ MOU ឆ្នាំ ២០០០។

សេចក្តីប្រកាសព័ត៌មានដដែលនេះក៏បង្ហាញដែរថា ភាគីទាំងពីរបានឯកភាពពន្លឿនការកែសម្រួលបែបបទបច្ចេកទេស (TOR) ឆ្នាំ២០០៣ ទាក់ទងនឹង ការផលិតផែនទីអ័រតូហ្វូតូ (ចំណុចទី ៤ ជំហានទី ២ នៃ TOR ឆ្នាំ ២០០៣) ដោយប្រើប្រាស់បច្ចេកវិទ្យាថ្មី ដូចជា LiDAR (Light Detection and Ranging) ដើម្បីពន្លឿនការងារវាស់វែង និងខណ្ឌសីមាព្រំដែន៕

កិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ បានធ្វើឡើងនៅខេត្តចន្ទបុរី ប្រទេសថៃ ចាប់ពីថ្ងៃទី២១ ដល់ថ្ងៃទី២២ ខែតុលា ឆ្នាំ២០២៥ ដែលគណៈប្រតិភូកម្ពុជាដឹកនាំដោយឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែនកម្ពុជា និងជាសហប្រធានគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ និងគណៈប្រតិភូថៃដឹកនាំដោយលោក Prasas Prasasvinitchai ទីប្រឹក្សាក្រសួងការបរទេសថៃ និងជាសហប្រធានគណៈកម្មការចម្រុះខណ្ឌសីមាព្រំដែនគោក (JBC) ថៃ-កម្ពុជា បានបញ្ចប់ហើយក្នុងបរិយាកាសមិត្តភាព និងស្និទ្ធស្នាល ។

ខឹ្លមសារក្នុងសេចក្តីប្រកាសព័ត៌មានរួមកិច្ចប្រជុំ JBC កម្ពុជា-ថៃ រួមមាន ៖

-ភាគីទាំងពីរបានឯកភាពប្រគល់ភារកិច្ចជូនអនុគណៈកម្មការបច្ចេកទេសចម្រុះព្រំដែន (JTSC) កម្ពុជា-ថៃ ដើម្បីសាងសង់ឡើងវិញនូវបង្គោលព្រំដែនចំនួន១៥ តាមគំរូដើមបង្គោលជំនាន់បារាំងនៅទីតាំងដែលភាគីទាំងពីរបានឯកភាពគ្នាលើទីតាំងដើម ។

-ភាគីទាំងពីរបានឯកភាពសាងសង់ឡើងវិញនូវបង្គោលព្រំដែនលិចទឹកចំនួន៣ នៅទីតាំងដែលភាគីទាំងពីរនឹងឯកភាពគ្នា ។

-ភាគីទាំងពីរបានឯកភាពពន្លឿនការកែសម្រួលបែបបទបច្ចេកទែស (TOR) ឆ្នាំ២០០៣ ទាក់ទងនឹងការផលិតផែនទីអ័រតូហ្វូតូ (ចំណុចទី៤ ជំហានទី២ នៃ TOR ឆ្នាំ២០០៣) ដោយប្រើប្រាស់បច្ចេកវិទ្យាថ្មី ដូចជា LiDAR (Light Delection and Ranging) ដើម្បីពន្លឿនការងារវាស់វែង និងខណ្ឌសីមាព្រំដែន ។

-ពាក់ព័ន្ធនឹងករណីការចុះវាស់វែង និងខណ្ឌសីមាព្រំដែននៅលើដីជាក់ស្តែងក្នុងកំណាត់ខ្សែព្រំដែនចន្លោះបង្គោលលេខ 42-47 នៅក្នុងតំបន់ភូមិជោគជ័យ-ណងចាន់ និងតំបន់ភូមិព្រៃចាន់-ណងយ៉ាកែវ គឺ ៖

ក.ភាគីទាំងពីរបានឯកភាពពិនិត្យកែសម្រួលបញ្ចប់បែបបទណែនាំបច្ចេកទេស (TI) សម្រាប់ការវាស់វែងរួមគ្នា និងបោះបង្គោលបណ្តោះអាសន្ននៅកំណាត់ខ្សែព្រំដែនអាទិភាពនៅចន្លោះបង្គោលលេខ 42-47 ។

ខ.បន្ទាប់ពីបញ្ចប់ការវាស់វែងនិងបោះបង្គោលបណ្តោះអាសន្ន ព្រមទាំងទទួលបានការយល់ព្រមពីរដ្ឋាភិបាលរៀងខ្លួន ភាគីទាំងពីរនឹងស្នើសុំយោបល់ពីរដ្ឋាភិបាលរៀងៗខ្លួន ដើម្បីពិនិត្យសម្រេចលើការបង្កើតយន្តការសមស្របណាមួយ សម្រាប់ធ្វើការកែសម្រួលការកាន់កាប់និងអាស្រ័យផលរបស់ភាគីទាំងពីរ ។

គ.ការបោះបង្គោលបណ្តោះអាសន្ន គឺធ្វើឡើងក្នុងគោលបំណងបម្រើឱ្យការវាស់វែងប៉ុណ្ណោះ ដោយមិនត្រូវប៉ះពាល់ដល់ខ្សែព្រំដែនអន្តរជាតិកម្ពុជា-ថៃ ។

ឃ.ភាគីទាំងពីរបានឯកភាពសម្របសម្រួលណែនាំដល់អាជ្ញាធរមូលដ្ឋាន រួមទាំងកងកម្លាំងយោធា និងជនស៊ីវិល ដើម្បីចូលរួមធានាសុវត្ថិភាព និងមិនរារាំងដល់ក្រុមវាស់វែងចម្រុះ ព្រមទាំងត្រូវចៀសវាងរាល់សកម្មភាពបង្កហេតុ ដែលអាចបង្កើតភាពតានតឹងបន្ថែមទៀតនៅក្នុងតំបន់នេះ ហើយត្រូវធានាសុវត្ថិភាពពីគ្រាប់មីន ដោយអនុលោមតាមមាត្រា៣ នៃ MOU ឆ្នាំ២០០០ ។

ភាគីទាំងពីរបានឯកភាពថា កិច្ចប្រជុំបន្ទាប់របស់គណៈកម្មការចម្រុះខណ្ឌសីមាព្រំដែនគោក (JBC) នឹងប្រព្រឹត្តទៅនៅសប្តាហ៍ទី១ នៃខែមករា ឆ្នាំ២០២៦ នៅខេត្តសៀមរាប ប្រទេសកម្ពុជា ៕

ទីក្រុងហ្សឺណេវ៖ ឯកឧត្តម អ៊ុច បូរិទ្ធ អនុប្រធានទី១នៃព្រឹទ្ធសភាកម្ពុជា បានលាត្រដាងពីសកម្មភាពរបស់ប្រទេសថៃដែលមិនគោរពច្បាប់អន្តរជាតិ និងកិច្ចព្រមព្រៀងនានា ដោយនៅតែបន្តប្រើគ្រប់វិធីដើម្បីឈ្លានពានលើទឹកដីកម្ពុជា ប្រាប់ទៅកាន់មហាសន្និបាតសហភាពអន្តរសភា (IPU) នៅប្រទេសស្វីស។ បន្ថែមលើនេះ ឯកឧត្តមក៏បានបង្ហាញសាលក្រម ICJ នៅចំពោះមុខគណប្រតិភូថៃផងដែរ។

ក្នុងអំឡុងពេលនៃកិច្ចប្រជុំមហាសន្និបាតសហភាពអន្តរសភា (IPU) លើកទី១៥១ នៅទីក្រុងហ្សឺណែវ ប្រទេសស្វីស កាលពីថ្ងៃទី២១ ខែតុលា លោក អ៊ុច បូរិទ្ធ បានពន្យល់ពីរបៀបដែលប្រទេសថៃមិនគោរពច្បាប់ និងកិច្ចព្រមព្រៀងអន្តរជាតិនានា ដែលជាហេតុនាំឱ្យមានការប៉ះទង្គិចគ្នាយ៉ាងបង្ហូរឈាមនៅថ្ងៃទី២៤-២៨ ខែកក្កដា កន្លងមក។
លោកបានស្រាយបំភ្លឺនៅចំពោះមុខអង្គមហាសន្និបាតថា ព្រំដែនរវាងប្រទេសទាំងពីរ “មិនមែនមិនទាន់បានកំណត់នោះទេ” តែមានមូលដ្ឋានក្នុង “លិខិតុបករណ៍អន្តរជាតិដែលចងកាតព្វកិច្ចអនុវត្ត” រួមទាំងអនុសញ្ញាបារាំង-សៀម ឆ្នាំ១៩០៤, សន្ធិសញ្ញា ឆ្នាំ១៩០៧ និងផែនទីឧបសម្ព័ន្ធ ដែលត្រូវបានបញ្ជាក់អះអាងឡើងវិញ ដោយសាលក្រមរបស់តុលាការយុត្តិធម៌អន្តរជាតិ (ICJ) ក្នុងឆ្នាំ១៩៦២ និងឆ្នាំ២០១៣ ។ លោកបានសង្កត់ធ្ងន់ថា ជម្លោះកើតឡើង “កើតចេញពីការមិនគោរពលិខិតុបករណ៍ច្បាប់ ដែលត្រូវបានទទួលស្គាល់ជាអន្តរជាតិទាំងនេះ” ។

ជាងនេះទៅទៀត លោកក៏បានលើកឡើងពី ការហ៊ុមព័ទ្ធ និង ការគំរាមកំហែងបណ្តេញពលរដ្ឋខ្មែរចេញពីទីលំនៅ ខណៈដែលទាហានកម្ពុជា ១៨ រូប កំពុងជាប់ឃុំដោយខុសច្បាប់ ដែលរំលោភលើអនុសញ្ញាទីក្រុងហ្សឺណែវទី៣ រួមទាំង “ការបំភិតបំភ័យផ្លូវចិត្ត” ដូចជា “ការចាក់បន្លឺសំឡេងខ្មោច និងសំឡេងស្រែកត្រហូរយំនៅពេលយប់” ថាជា “ការវាយប្រហារលើសេចក្តីថ្លៃថ្នូររបស់មនុស្ស” ដែលរំលោភលើអនុសញ្ញាទីក្រុងហ្សឺណែវទី៤ ។

ជាមួយគ្នានេះ ឯកឧត្តម បូរិទ្ធ ក៏បានបដិសេធការចោ.ទប្រកាន់របស់ថៃផងដែរ ដែលថាកម្ពុជាបានធ្វើ”យោធូបនីយកម្ម” ប្រាសាទព្រះវិហារ ដែលជាបេតិកភណ្ឌពិភព ដោយលោកថាជាការមិនពិត។ លោកបានកត់សម្គាល់ថា កម្ពុជាការពារប្រាសាទនេះមិនមែនដោយអាវុធទេ ប៉ុន្តែតាមរយៈបេតិកភណ្ឌ ច្បាប់ និងការអត់ធ្មត់ ខណៈកងទ័ពថៃបានបាញ់ផ្លោងវា និងគំរាមកំហែងថ្មប្រាសាទ និងព្រលឹងនៃប្រាសាទ។

លោកក៏បានច្រានចោលការចោទប្រកាន់ម្តងហើយម្តងទៀតរបស់ថៃថា កងកម្លាំងកម្ពុជាបានដាក់មីនថ្មី ដោយចាត់ទុកការចោទប្រកាន់នេះថាមិនមានមូលដ្ឋាន។ ផ្ទុយទៅវិញ លោកបានកត់សម្គាល់ថា កម្ពុជាបានបំផ្លាញមីនជាង៣លានគ្រាប់ បានបើកទឹកដីរបស់ខ្លួនឱ្យអធិការកិច្ចអន្តរជាតិ និងបន្តបម្រើជាអ្នកតស៊ូមតិឈានមុខគេនៃការបោសសម្អាតមីនក្រោមអនុសញ្ញាអូតាវ៉ា។ លោកបានអះអាងថា៖ «ប្រសិនបើមីនត្រូវបានរកឃើញនៅតំបន់ព្រំដែន ពួកវាជាសំណល់នៃជម្លោះកាលពីអតីតកាល មិនមែនជាសកម្មភាពថ្មីៗរបស់កម្ពុជានោះទេ»។

លោកបានគូសបញ្ជាក់ប្រាប់អន្តរជាតិថា កម្ពុជាជាប្រជាជាតិដែល “បានរងទុក្ខវេទនាយ៉ាងខ្លាំងកាលពីអតីតកាល” ហើយ “ស្រឡាញ់និងការពារសុខសន្តិភាព” ជាមូលដ្ឋានគ្រឹះនៃការអភិវឌ្ឍជាតិ ។ កម្ពុជា “គ្មានបំណងចង់មានទំនាស់ជាមួយប្រទេសណាមួយឡើយ ជាពិសេសថៃ” ប៉ុន្តែ “ដើម្បីការពិត យើងខ្ញុំមានភាពចាំបាច់ត្រូវធ្វើការឆ្លើយតប” ។ យ៉ាងណាក៏ដោយ កម្ពុជានៅតែប្រកាន់ជំហរដោះស្រាយជម្លោះដោយសន្តិវិធី តាមរយៈការសន្ទនា ការទូត និងការគោរពច្បាប់អន្តរជាតិ” ។ “ការពិត និងតម្លាភាព” គឺចាំបាច់ដើម្បីស្តារទំនុកចិត្ត។

បន្ទាប់ពីរឿង «The Legend of Zang Hai» Xiao Zhan បន្តចូលរួមក្នុងគម្រោងភាពយន្ត ថ្មីមានចំណងជើងថា «A Small Town Remedy »។ ចាប់ផ្ដើមថតនៅថ្ងៃទី១៨ ខែតុលា ការថតភាពយន្តនេះទទួលបានការចាប់អារម្មណ៍ខ្លាំងព្រោះផលិតករមានគុណភាព និងតារាល្បីៗបានចូលរួម។ Xiao Zhan ដើរតួជាវេជ្ជបណ្ឌិតដែលបានឆ្លងកាត់ការផ្លាស់ប្តូរជាច្រើននៅជនបទ។

Xiao Zhan និយាយថាលោកបានស្រក ៤ គីឡូក្រាមក្នុងរយៈពេល២សប្តាហ៍មុនពេលថត។ ដោយសារតែមមាញឹកខ្លាំងពេក តារាសម្ដែងរូបនេះមិនមានពេលហាត់ប្រាណច្រើនឡើយ។ទោះជាយ៉ាងណាក៏ដោយ ដោយសាររបបអាហារសមហេតុផល តារាសម្តែងរូបនេះនៅតែអាចស្រកទម្ងន់ដែលចង់បាន ហើយពេញចិត្តនឹងស្ថានភាពរបស់ខ្លួនមុនពេលត្រឡប់មកអេក្រង់វិញជាផ្លូវការ។ នេះមិនត្រឹមតែបញ្ជាក់ពីវិជ្ជាជីវៈរបស់ Xiao Zhan ប៉ុណ្ណោះទេ ថែមទាំងបង្ហាញពីការលត់ដំខ្លួនរបស់លោកផងដែរ។

តារាប្រុសរូបនេះ មិនស្ទាក់ស្ទើរក្នុងការលះបង់រូបរាង សូម្បីតែផ្នែកសុខភាពរបស់លោក ដើម្បីដើរតួនាទីផ្សេងៗ ផ្លាស់ប្តូរមុខមាត់ជាសាធារណៈជានិច្ច។ «A Small Town Remedy»គឺជាការត្រឡប់មកវិញជាលើកដំបូងរបស់ Xiao Zhan ក្នុងនាមជាវេជ្ជបណ្ឌិតបន្ទាប់ពីបានរយៈពេល ៣ ឆ្នាំចាប់តាំងពីរឿង «The Oath of Love »។ ជាមួយនឹងភាពចាស់ទុំទាំងរូបរាង និងការសម្តែងអ្នកគាំទ្ររំពឹងថាតារារូបនេះនឹងបញ្ចេញស្នាដៃប្រកបដោយគុណភាព។ គេចាំបានថាកាលពីមុនពេលថតរឿង «The Legend of Zang Hai» តារាសម្តែងវ័យ៣៤ឆ្នាំរូបនេះក៏បានស្រកទម្ងន់ដូចគ្នាដើម្បីឱ្យសមក្នុងតួនាទីសម័យបុរាណ។

«A Small Town Remedy» គឺជាសាច់រឿងរៀបរាប់ពីដំណើរជីវិតនៅទីក្រុងតូចមួយរបស់តួឯកប្រុសដែលជាវេជ្ជបណ្ឌិត។ ក្នុងខ្សែភាពយន្តដែលមាន Xiao Zhan បានជំរុញឱ្យទស្សនិកជនជាច្រើនទន្ទឹមរង់ចាំរឿងមួយនេះ៕

សហរដ្ឋអាមេរិក ៖ កាលពីថ្ងៃទី២០ ខែតុលា ឆ្នាំ២០២៥ ប្រធានាធិបតីអាមេរិក លោក Donald Trump បានបដិសេធចំពោះការលើកឡើងថា ចិននឹងដណ្តើមយកតៃវ៉ាន់នៅឆ្នាំ២០២៧ ​ពីព្រោះចិនដឹងយ៉ាងច្បាស់ កងទ័ពអាមេរិកមានអំណាចខ្លាំង ។ លោកមានទំនុកចិត្តលើទំនាក់ទំនងដ៏ល្អជាមួយលោក Xi Jinping ប្រធានាធិបតីចិន មុនពេលមេដឹកនាំប្រទេសមហាអំណាចទាំង២រូបជួបគ្នាក្នុងកិច្ចប្រជុំកំពូលអាស៊ីប៉ាស៊ីហ្វិកនាចុងខែតុលា នៅប្រទេសកូរ៉េខាងត្បូង ។

ក្នុងជំនួបជាមួយនាយករដ្ឋមន្ត្រីអូស្ត្រាលី លោក Trump និយាយថា អាមេរិកមានទំនាក់ទំនងល្អជាមួយចិន ទើបលោកជឿជាក់លើចិនមិនឈ្លានពានតៃវ៉ាន់ទេ ។ លោក Trump និយាយបែបនេះក្រោយពីមានមតិមួយចំនួនលើកឡើងថា លោក Xi ប្រធានាធិបតីចិននឹងព្យាយាមដណ្តើមយកតៃវ៉ាន់នៅឆ្នាំ២០២៧ ។

មតិនានាថា លោក Xi ប្រធានាធិបតីចិននឹងវាយដណ្តើមយកតៃវ៉ាន់ ដែលចិនតែងតែអះអាងជាទឹកដីរបស់ខ្លួន ប៉ុន្តែលោក Trump ថា តៃវ៉ាន់លែងជាកែវភ្នែករបស់ចិនទៀតហើយ វាគ្មានអ្វីកើតឡើងទេ ។ ប៉ុន្តែលោកពុំបាននិយាយឱ្យច្បាស់លាស់ តើលោកនឹងសម្រេចឱ្យអាមេរិកប្រើប្រាស់កម្លាំងទ័ពការពារតៃវ៉ាន់ឬយ៉ាងណា ដោយគ្រាន់តែនិយាយថា ចិនដឹងច្បាស់ពីអាមេរិកមានអំណាចកងទ័ពខ្លាំងបំផុតលើពិភពលោក គ្មានប្រទេសណាហ៊ានទេ ប្រធានាធិបតីចិនមិនធ្វើបែបនេះឡើយ យើងកំពុងមានទំនាក់ទំនងល្អរឿងតៃវ៉ាន់ និងប្រធានបទផ្សេងៗ ។

លោក Trump នឹងជួបលោក Xi ជាលើកដំបូងនៅប្រទេសកូរ៉េខាងត្បូងនាចុងខែតុលានេះក្នុងកិច្ចប្រជុំកំពូលអាស៊ីប៉ាស៊ីហ្វិក ហើយគោលបំណងសំខាន់របស់លោក Trump គឺធ្វើកិច្ចព្រមព្រៀងពាណិជ្ជកម្មដោយស្មើភាពជាមួយចិន ។ លោក Trump ចង់មានទំនាក់ទំនងល្ពជាមួយចិន និងចូលចិត្តទំនាក់ទំនងរវាងលោកជាមួយប្រធានាធិបតីចិន លោកនឹងធ្វើដំណើរទស្សនកិច្ចទៅប្រទេសចិននាដើមឆ្នាំ២០២៦ តាមការអញ្ជើញរបស់លោក Xi ។

គួរបញ្ជាក់ថា សហរដ្ឋអាមេរិកទទួលស្គាល់តែទីក្រុងប៉េកាំងប៉ុណ្ណោះ មិនទទួលស្គាល់តៃវ៉ាន់ ប៉ុន្តែច្បាប់របស់អាមេរិកតម្រូវឱ្យផ្តល់ជំនួយសព្វាវុធដល់តៃវ៉ាន់ដើម្បីការពារខ្លួន ទើបទីក្រុងវ៉ាស៊ីនតោនអនុវត្តគោលនយោបាយមិនច្បាស់លាស់ ថាតើអាមេរិកនឹងប្រើប្រាស់កម្លាំងទ័ពការពារតៃវ៉ាន់ឬអត់ ។ កន្លងមក អតីតប្រធានាធិបតីអាមេរិក លោក Joe Biden បាននិយាយដដែលៗពីការបញ្ជាឱ្យកងទ័ពអាមេរិកជួយការពារតៃវ៉ាន់ ប្រសិនបើចិនឈ្លានពាន ៕

ប្រទេសថៃ ៖ សារព័ត៌មានរ៉យទ័របានរាយការណ៍កាលពីថ្ងៃទី២១ ខែតុលា ឆ្នាំ២០២៥ ថា សហរដ្ឋអាមេរិកបានដាក់សម្ពាធឱ្យក្រុមហាម៉ាស់ទម្លាក់អាវុ.ធដើម្បីគោរពបទឈប់បា.ញ់នៅតំបន់កាហ្សា ខណៈប្រធានាធិបតីអាមេរិក លោក Donald Trump ជំរុញឱ្យបញ្ចប់សង្គ្រា.មជាស្ថាពររវាងអ៊ីស្រាអែល និងក្រុមហាម៉ាស់ ហើយលោកអាចនឹងកំទេ.ច បើក្រុមហាម៉ាស់មិនព្រមទម្លាក់អាវុ.ធ។

ពេលធ្វើដំណើរមកប្រទេសអ៊ីស្រាអែលនៅថ្ងៃទី២១ ខែតុលា កន្លងមក អនុប្រធានាធិបតីអាមេរិក លោក JD Vance និយាយថា កិច្ចព្រមព្រៀងឈប់បាញ់ដំណើរការល្អជាងការរំពឹងទុក ប៉ុន្តែបើក្រុមហាម៉ាស់មិនសហការទេ ពួកគេនឹងរងការកំទេចមិនខាន ។ ពាក្យសម្តីរបស់អនុប្រធានាធិបតីអាមេរិក គឺដូចគ្នានឹងលោក Trump និយាយមុននេះថា នឹងប្រើប្រាស់កម្លាំងទ័ពយ៉ាងខ្លាំងក្លា និងដាច់ខាត បើក្រុមហាម៉ាស់មិនព្រមទម្លាក់អាវុធ ។

អ៊ីស្រាអែល និងក្រុមហាម៉ាស់បានចោទប្រកាន់គ្នាទៅវិញទៅមកថា ល្មើសកិច្ចព្រមព្រៀងបទឈប់បាញ់ ដែលបានចូលជាធរមានរយៈពេល៨ថ្ងៃហើយ ។ ភាគីទាំងពីរនៅតែប៉ះទង្គិចគ្នាជាបន្តបន្ទាប់ ព្រមទាំងមានជម្លោះពាក់ព័ន្ធនឹងការបញ្ជូនសាកសពឈ្លើយសឹក ការបើកព្រំដែន និងការជួយសង្គ្រោះក្នុងតំបន់ ។

អនុប្រធានាធិបតីអាមេរិក លោក JD Vance មានគម្រោងជួបលោកនាយករដ្ឋមន្ត្រីអ៊ីស្រាអែល Beniamin Netanyahu នៅថ្ងៃទី២២ ខែតុលា ដោយលោក JD Vance រំពឹងថា កិច្ចព្រមព្រៀងឈប់បាញ់នឹងជំរុញការស្តារទំនាក់ទំនងរវាងអ៊ីស្រាអែល និងប្រទេសនៅឈូងសមុទ្រអារ៉ាប់នាថ្ងៃអនាគត ។ ទោះយ៉ាងណា លោកទទួលស្គាល់ការប្រគល់សាកសពឈ្លើយសឹកទាំងអស់ចំណាយពេលយូរ និងការអនុវត្តតាមផែនការឈប់បាញ់របស់លោក Trump ត្រូវតែព្យាយាម ។

ផែនការឈប់បាញ់របស់លោក Trump បានអំពាវនាវឱ្យក្រុមប្រដាប់អាវុធហាម៉ាស់ទម្លាក់អាវុធ រីឯអ៊ីស្រាអែលត្រូវដកកងកម្លាំងចេញពីតំបន់កាហ្សា ព្រមទាំងកំណត់ការបង្កើតរដ្ឋាភិបាលប៉ាឡេស្ទីន ។ លោក Trump ស្នើបង្កើតក្រុម Technocrats ដើម្បីគ្រប់គ្រងតំបន់កាហ្សាស្ថិតក្រោមការមើលការខុសត្រូវរបស់គណៈកម្មការអន្តរជាតិ ព្រមទាំងបង្កើតកងកម្លាំងពហុជាតិមិនពាក់ព័ន្ធជាមួយក្រុមហាម៉ាស់ ។

លោក JD Vance បាននិយាយក្នុងពេលស្ថិតនៅមូលដ្ឋានកងទ័ពភាគខាងត្បូងរបស់អ៊ីស្រាអែលថា អាមេរិក អ៊ីស្រាអែល និងប្រទេសនៅឈូងសមុទ្រអារ៉ាប់យល់ស្របលើកលែងទោសឱ្យក្រុមហាម៉ាស់ ប៉ុន្តែពួកគេត្រូវតែព្រមទម្លាក់អាវុធ ។ បើមិនទម្លាក់អាវុធទេ យើងនឹងអនុវត្តតាមលោក Trump និយាយ គឺកំទេចតែម្តង ។

តាមការអះអាងរបស់ជនជាតិប៉ាឡេស្ទីន គឺក្រុមហាម៉ាស់រីករាយក្នុងការបង្កើតក្រុម Technocrats ដើម្បីគ្រប់គ្រងតំបន់កាហ្សាដោយពុំចាំបាច់មានអ្នកតំណាងរបស់ខ្លួន ប៉ុន្តែត្រូវតែមានការឯកភាពទាំងក្រុមហាម៉ាស់ និងមេដឹកនាំប៉ាឡេស្ទីន ៕