តារាចម្រៀង Oliver Tree បាត់បង់ជីវិតក្រោយធ្លាក់ឧទ្ធម្ភាគចក្រនៅប្រេស៊ីល

តារាចម្រៀងអាម៉េរិក Oliver Tree ម្ចាស់បទ «Life Goes On» បានទទួលមរណភាពក្នុងអាយុ ៣២ ឆ្នាំនៅក្នុងគ្រោះថ្នាក់ឧទ្ធម្ភាគចក្រមួយគ្រឿងនៅទីក្រុង Rio de Janeiro ប្រទេសប្រេស៊ីល ដែលបានសម្លាប់មនុស្ស ៦ នាក់។ យោងតាមប្រព័ន្ធផ្សព្វផ្សាយអាម៉េរិកតារាចម្រៀងរូបនេះបានជួបគ្រោះថ្នាក់នៅថ្ងៃទី១៤  ខែមិថុនា ឆ្នាំ២០២៦។
 
 
ហេតុការណ៍នេះបានកើតឡើងនៅពេលដែលឧទ្ធម្ភាគចក្រពីរគ្រឿងបានបុកគ្នានៅលើអាកាសនៅក្នុងតំបន់ Recreio dos Bandeariantes ភាគខាងលិចទីក្រុង Rio de Janeiro មុនពេលធ្លាក់ចូលទៅក្នុងចំណតរថយន្តរបស់ក្រុមហ៊ុនលក់រថយន្តមួយ។ ការប៉ះទង្គិចគ្នានេះបានបណ្តាលឱ្យយន្តហោះទាំងពីរគ្រឿងផ្ទុះឆេះ ហើយក៏បានបំផ្លាញរថយន្តអគ្គិសនីប្រហែល ២០ គ្រឿងនៅខាងក្រោមផងដែរ។ នាយកដ្ឋានពន្លត់អគ្គីភ័យយោធានៃទីក្រុង Rio de Janeiro បានបញ្ជាក់ថា អគ្គីភ័យត្រូវបានគ្រប់គ្រងយ៉ាងឆាប់រហ័ស។ ទោះជាយ៉ាងណាក៏ដោយ មនុស្សទាំង៦នាក់នៅលើឧទ្ធម្ភាគចក្រទាំងពីរមិនបានរស់រានមានជីវិតទេ។
 
យោងតាមប្រភពព័ត៌មានពីប៉ូលិស Oliver Tree បានធ្វើដំណើរទៅកាន់ប្រទេសប្រេស៊ីលជាផ្នែកមួយនៃដំណើរទេសចរណ៍ពិភពលោក ហើយលោកគឺជាអ្នកដំណើរម្នាក់ក្នុងចំណោមអ្នកដំណើរនៅលើឧទ្ធម្ភាគចក្រដែលបានធ្លាក់។ អត្តសញ្ញាណរបស់ជនរងគ្រោះនៅតែត្រូវបានផ្ទៀងផ្ទាត់ជាផ្លូវការដោយអាជ្ញាធរ ដោយសារតែសាកសពត្រូវបានឆេះយ៉ាងធ្ងន់ធ្ងរបន្ទាប់ពីគ្រោះថ្នាក់។

ក្រៅពីតារាចម្រៀង Oliver Tree បញ្ជីអ្នកដំណើរត្រូវបានគេរាយការណ៍ថារួមមានផលិតករតន្ត្រីប្រេស៊ីលម្នាក់ អ្នកដឹកនាំវីដេអូជនជាតិអាហ្សង់ទីន។ ឧទ្ធម្ភាគចក្រមួយក្នុងចំណោមឧទ្ធម្ភាគចក្រទាំងពីរបានដឹកមនុស្ស៥នាក់ ខណៈដែលឧទ្ធម្ភាគចក្រមួយទៀតមានតែអ្នកបើកយន្តហោះប៉ុណ្ណោះ។ មន្ត្រីប្រេស៊ីលបាននិយាយថា ការស៊ើបអង្កេតលើមូលហេតុនៃការប៉ះទង្គិចគ្នាកំពុងដំណើរការ។
 
Oliver Tree គឺជាសិល្បករល្បីឈ្មោះម្នាក់ ដែលត្រូវបានគេស្គាល់ដោយសាររចនាប័ទ្មតន្ត្រីដ៏ប្លែក ស្ទីលម៉ូតសក់របស់លោក។ លោកមានមូលដ្ឋានអ្នកគាំទ្រយ៉ាងច្រើននៅទូទាំងវេទិកាអនឡាញ ហើយត្រូវបានគេស្គាល់តាមរយៈបទចម្រៀងល្បីៗជាច្រើនដូចជា «Life Goes On»,«Miss You»,និង «Alien Boy»។ សិល្បករប្រុសរូបនេះមានអ្នកស្តាប់ប្រចាំខែជាង ១១ លាននាក់នៅលើ Spotify។ បទចម្រៀងជាច្រើនរបស់លោកបានឈានដល់ការស្តាប់រាប់រយលានដង ដោយខ្លះមានអ្នកស្តាប់លើសពី ៧០០ លានដង។
 
មុនពេលមានគ្រោះថ្នាក់នេះ Oliver Tree បានធ្វើដំណើរទេសចរណ៍ទ្រង់ទ្រាយធំមួយដែលមានការសម្តែងជាង ៧០ដងនៅក្នុងប្រទេសចំនួន ៣០ ទូទាំងទ្វីបចំនួន ៧ ។ នៅថ្ងៃទី ៤ ខែមិថុនា លោកបានសម្តែងនៅទីក្រុង Buenos Aires ប្រទេសអាហ្សង់ទីន។ ត្រឹមតែមួយថ្ងៃមុនហេតុការណ៍នេះ តារាចម្រៀងរូបនេះបានបង្ហោះវីដេអូមួយនៅលើ Instagram អំពីខ្លួនលោកកំពុងលេងបាល់ទាត់ជាមួយអ្នកស្រុកនៅក្នុងសង្កាត់មួយក្នុងប្រទេសប្រេស៊ីល។
 
មិនត្រឹមតែល្បីល្បាញដោយសារតន្ត្រីរបស់ខ្លួនប៉ុណ្ណោះទេ Oliver Tree ក៏ត្រូវបានគេស្គាល់ដោយសារគំនិតមិនធម្មតា និងច្នៃប្រឌិតរបស់លោកផងដែរ។ នៅឆ្នាំ ២០២០ Oliver Tree បានបង្កើតកំណត់ត្រាពិភពលោក Guinness សម្រាប់ស្កូតឺធំបំផុតដែលមិនធ្លាប់មានពីមុនមក ដែលមានកម្ពស់ ៤,១៦ ម៉ែត្រ និងបណ្តោយ ៣,១៣ ម៉ែត្រ។ យោងតាមកំណត់ត្រាពិភពលោក Guinness សមិទ្ធផលនេះបានជួយលោកឱ្យសម្រេចក្តីសុបិន្តពេញមួយជីវិត៕