តារាចម្រៀង ទេព បូព្រឹក្ស និង តារាចម្រៀង ជី ដេវីត បានប្រកាសរំសាយកម្មវិធីជួបជុំអ្នកគាំទ្រជាលើកទី២ដោយសារតែថៃបានបើកការវាយប្រហារទាំងកំរោលមកលើកម្ពុជា។ ជាមួយនឹងការប្រកាសលុបចោលកម្មវិធីអ្នកទាំងពីរនឹងបន្តជួយដល់ជនភៀសសឹកនៅតាមបណ្តោយព្រំដែនទៅតាមលទ្ធភាពរបស់ពួកគេ។
នៅរសៀលថ្ងៃទី៨ ខែធ្នូ តារាចម្រៀងទាំងពីររូបបានបង្ហោះវីដេអូដោយភ្ជាប់មកជាមួយនឹងចំណងជើងថា « សេចក្តីជូនដំណឹងស្តីពីការរំសាយការប្រគំតន្រ្តី ‘TBP FAN PARTY’ ជូនដល់អ្នកគាំទ្រជាទីរាប់អានព្រមទាំងជនរួមជាតិដោយមូលហេតុយើងត្រូវបានឈ្លានពានជាថ្មីនូវ ថ្ងៃទី៨ ខែធ្នូ ឆ្នាំ2025 ពីពូជតិរច្ឆានតៃ»។ នៅក្នុងវីដេអូ ជី ដេវីត បានបញ្ជាក់ថាការរំសាយលើកទី១ គឺធ្វើឡើងដោយសារតែសៀមបានវាយប្រហារប្រជាពលរដ្ឋនៅភូមិព្រៃចាន់ ហើយការរំសាយជាលើកទី២នេះគឺធ្វើឡើងដោយសារតែសៀមបានវាយប្រហារតាមតំបន់នានានៅតាមបន្ទាត់ព្រំដែនដូច្នេះទើបសម្រេចចិត្តរំសាយការប្រគំតន្រ្តី។
តារាចម្រៀង ទេព បូព្រឹក្ស បានបញ្ជាក់ផងដែរថាសម្រាប់ការធ្វើបន្តទៀតនាងពុំទាន់ច្បាស់លាស់ថាធ្វើនៅពេលណានោះទេ ដោយនឹងមើលទៅតាមស្ថានភាព ចាំប្រទេសជាតិបានសុខសាន្តវិញ។ ចំពោះតម្លៃសំបុត្រដែលអ្នកគាំទ្របានទិញ ទេព បូព្រឹក្ស ថានឹងផ្ទេរជូនវិញដោយមិនឱ្យបាត់សូម្បីតែមួយកាក់មួយសេន។ លើសពីការប្រកាសរំសាយកម្មវិធីជួបជុំអ្នកគាំទ្ររបស់ខ្លួន តារាចម្រៀង ជី ដេវីត និង ទេព បូព្រឹក្ស បានប្រកាសថានឹងបន្តជួយដល់ប្រជាពលរដ្ឋនៅតាមបណ្តោយព្រំដែនទៅតាមលទ្ធភាពរបស់អ្នកទាំងពីរ។
ស្ថានភាពដែលឃើញប្រជាជនរត់ភៀសសឹក សិស្សានុសិស្ស រត់ចេញពីសាលា ជី ដេវីត ថាគឺជាការឈឺចាប់ហួសថ្លែង ដោយសង្ឃឹមថាប្រជាជនខ្មែរបន្តពួតដៃក្រោកឈរសាមគ្គីគ្នាជាធ្លុងមួយ។
បើតាមរដ្ឋមន្រ្តីក្រសួងព័ត៌មាន នៅរសៀលថ្ងៃទី៨ ខែធ្នូនេះ តួលេខបឋមបានបង្ហាញថាពលរដ្ឋ បានស្លាប់៤នាក់, របួស៩នាក់និងភៀសខ្លួនច្រើនម៉ឺននាក់ ដោយសារការវាយប្រហាររបស់ថៃ៕
