ក្រៅពីល្បែងប្រជាប្រិយខ្មែរដូចជា ចោលឈូង បោះអង្គញ់ ទាញព្រ័ត្រ លាក់កន្សែង និងល្បែងជាច្រើនទៀត ប្រជាជនកម្ពុជាមួយផ្នែកក៏និយមលេងជះទឹក បាញ់កាំភ្លើងទឹកដាក់គ្នា នៅក្នុងពិធីបុណ្យចូលឆ្នាំខ្មែរផងដែរ ព្រោះអាកាសធាតុអំឡុងពេលនោះមានសភាពក្តៅខ្លាំង។

អស់រយៈពេល២ឆ្នាំមកហើយដែលប្រទេសកម្ពុជាខកខានប្រារព្ធពិធីសង្ក្រាន្តដើម្បីអបអរឆ្នាំថ្មីដោយសារតែជំងឺកូវីដ១៩។ ដោយឡែកក្នុងឆ្នាំ២០២៣នេះ ប្រជាជនកម្ពុជាអាចរៀបចំនឹងចូលរួមបុណ្យចូលឆ្នាំខ្មែរយ៉ាងទូលំទូលាយវិញបានហើយតាមការប្រកាសរបស់សម្តេចនាយករដ្ឋមន្រ្តី។

ក្នុងនោះតាមខេត្តមួយចំនួនក៏ត្រៀមរៀបចំពិធីបុណ្យសង្ក្រាន្តដើម្បីឱ្យបងប្អូនប្រជាពលរដ្ឋចូលរួមកម្សាន្តទៅតាមការរៀបចំប្រចាំខេត្តផងដែរ។ កាន់តែពិសេសនោះ នៅខេត្តបាត់ដំបងក៏ត្រៀមរៀបចំកាំភ្លើងធំពពុះសាប៊ូទៀតផងសម្រាប់សង្ក្រាន្តឆ្នាំនេះ នឹងកំពុងតែធ្វើឱ្យអ្នកត្រៀមដើរលេងសង្ក្រាន្តរំភើបញាប់ញ័រ។

តាមរយៈគណនីហ្វេកប៊ុក កាណុល ពិទូរ្យ បានសរសេរថា «កាំភ្លើងធំពពុះសាប៊ូ បានមកដល់ ខេត្តបាត់ដំបងហើយ សំរាប់សង្ក្រាន្តបាត់ដំបង2023 តំបន់ត្រជាក់ចិត្ត ឆ្នាំនេះសប្បាយទៀតហើយ ….»។ យ៉ាងណាទន្ទឹមនឹងអារម្មណ៍សប្បាយចិត្តក៏មានបងប្អូនមួយចំនួនសំដែងនូវភាពព្រួយបារម្ភខ្លាចមានបញ្ហាណាមួយកើតឡើង។

គូសបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិ នឹងប្រព្រឹត្តទៅនៅថ្ងៃទី១៤ ,១៥ ,១៦ ខែមេសា ឆ្នាំ២០២៣ខាងមុខនេះ៕

ពិធីបុណ្យចូលឆ្នាំខ្មែរ កាន់តែកៀកជិតមកដល់តាមប្រពៃណីទំនៀមទម្លាប់ខ្មែរពីបុរាណ ក្រៅពីលេងល្បែងប្រជាប្រិយខ្មែរ ពុទ្ធសាសនិកក៏និយមទៅវត្តអារាម ដើម្បីធ្វើបុណ្យឧទ្ធិសកុសលជូនញាតិសណ្តានដែលបានចែកឋានទៅ និងបួងសួងសុំសេចក្តីសុខចម្រើន។ ទន្ទឹមនឹងនេះ ក្រសួងធម្មការ និងសាសនា អគ្គនាយកដ្ឋានកិច្ចការសាសនាបានជម្រាបជូនថា គិតត្រឹមខែមីនា នេះប្រទេសកម្ពុជាមានវត្ត សរុបចំនួន ៥ ១៣៣ វត្ត និងមានព្រះសង្ឃសរុបចំនួន ៦៨ ៩៦៧ អង្គ។

ក្នុងសេចក្តីប្រកាសខាងលើបានបង្ហាញថា ខេត្តព្រៃវែង ជាខេត្តមួយដែលមានវត្តច្រើនជាងគេ មានចំនួនសរុប ៥១៩ វត្តក្នុងចំណោម២៥ ខេត្ត/រាជធានី។ តាមតួលេខនេះចំនួនវត្តមហានិកាយមានចំនួន៥០០វត្ត និងចំនួនវត្តធម្មយុត្តមានចំនួន១៩វត្ត។ ចំណែកចំនួនសង្ឃសរុបទាំងពីរគណៈ មហានិកាយ និងធម្មយុត្តមានចំនួន ៤ ១៦៩ អង្គ។

សូមបញ្ជាក់ផងដែរថា កាលពីខែកញ្ញា ឆ្នាំ២០២២ វត្តនៅប្រទេសកម្ពុជាមានចំនួនសរុប ៥ ១០៤វត្ត ក្នុងនោះវត្តគណៈមហានិកាយមានចំនួន ៤ ៨៤៣ និងគណៈធម្មយុត្តមានចំនួន២៦១វត្ត និងមានព្រះសង្ឃសរុបទាំងពីរគណៈចំនួន ៧០ ៩០៥អង្គ៕

កាលពីព្រឹកមិញ ព្រះ​រាជា​ណា​​ចក្រ​កម្ពុជា ក្នុងឋានៈជាម្ចាស់​ផ្ទះ​​រៀប​ចំ​​ការប្រកួតព្រឹត្តិការណ៍អាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ បានរៀបចំ ព្រះរាជពិធីប្រោសព្រះរាជទាន ព្រះអគ្គិជ័យកីឡា ដើម្បីចាប់ផ្ដើមការដង្ហែភ្លើងគប់ ទៅកាន់បណ្ដាប្រទេសជាសមាជិកប្រចាំតំបន់អាស៊ីអាគ្នេយ៍ ដែលជាប្រពៃណីរបស់ព្រឹត្តិការណ៍កីឡាស៊ីហ្គេម។

នៅក្នុងនោះអត្តពលិកកម្ពុជា ២រូប បានឡើងទៅទទួល ព្រះអគ្គិជ័យកីឡា ពីព្រះករុណាព្រះបាទសម្ដេចព្រះបរមនាថ នរោត្តម សីហមុនី ដោយអ្នកទាំងពីរនោះរួមមានកីឡាករ​តេក្វាន់ដូ​ វ៉ា មិថុនា គឺ​និង​កីឡាការិនីជនពិការ ​លោត​ចម្ងាយ​ វិត ចន្ថាដែលទើបតែទទួលបានមេដាយមាសកាលពីឆ្នាំទៅ នៅប៉ារ៉ាហ្គេមប្រទេសវៀតណាម។

អ្នកទាំងពីរនឹងត្រូវមានកាតព្វកិច្ចចាំបាច់នាំមុខមាត់ឱ្យកម្ពុជា ដោយកីឡាករ​ វ៉ា មិថុនា នឹងចូលរួមប្រកួតសុីហ្គេម ផ្នែកតេក្វាន់ដូ ខណៈកីឡាការិនីជនពិការ ​លោត​ចម្ងាយ​ វិត ចន្ថា នឹងចូលរួមព្រឹត្តិការណ៍ប៉ារ៉ាហ្គេមដែលកម្ពុជាធ្វើជាម្ចាស់ផ្ទះនាពេលដ៏ខ្លីខាងមុខនេះ៕

មិនមែនផ្កាទាំងអស់សុទ្ធតែដាក់លើអាសនៈបានរហូតនោះទេ តាមជំនឿបុរាណផ្កាទាំង៥ប្រភេទនេះមានអត្ថន័យមិនល្អ ដូច្នេះគួរចៀសវាងដាក់នៅលើអាសនៈ ដើម្បីបូជាដូនតា និងព្រះ។ ដែលផ្កាទាំង៥ប្រភេទនោះមានដូចជា៖

១.ផ្កាសិប្បនិម្មិត ផ្កាប្លាស្ទិក៖ ក្នុងការថ្វាយបង្គំ មនុស្សភាគច្រើនហាមមិនឲ្យដាក់ផ្កាក្លែងក្លាយ និងផ្កាផ្លាស្ទិចនៅលើអាសនៈនោះទេ ព្រោះការថ្វាយផ្កាបង្ហាញពីទឹកចិត្តម្ចាស់ចំពោះបុព្វការីជន និងព្រះ ដូច្នេះ តង្វាយមិនពិតមិនត្រូវប្រើទេ ព្រោះមិនអាចបង្ហាញពីភាពស្មោះត្រង់។ ២.ផ្កាស្បៃលឿង៖ មានឈ្មោះល្អពណ៌លឿងភ្លឺស្រស់ជានិមិត្តរូបភាពរុងរឿងនិងសំណាង ទោះជាយ៉ាងណាក៏ដោយយោងទៅតាមគោលគំនិតនៃហុងស៊ុយ ម្ចាស់ផ្ទះមិនគួរដាក់ផ្កាស្បៃលឿង នៅលើអាសនៈនោះទេ ព្រោះផ្កានេះមានក្លិនមិនល្អ ធ្វើឱ្យបាត់បង់ភាពបរិសុទ្ធនៃកន្លែងសក្ការៈបូជា។៣.ផ្ការំយោល៖ ផ្កានេះស្រស់ស្អាតមានពណ៌ក្រហម តែមិនស័ក្តិសមដាក់ក្នុងទីសក្ការៈ ព្រោះឈ្មោះមិនសម លើសពីនេះទៀតផ្ការំយោល ត្រូវបានដាំជាញឹកញាប់នៅក្នុង Bush និង hedges ដែលអាចនាំមកនូវសំណាងអាក្រក់។៤.ផ្កាអ័រគីដេ៖ ផ្កានេះមានឈ្មោះដ៏ស្រស់ស្អាតប៉ុន្តែវារសាត់យ៉ាងឆាប់រហ័ស ហើយត្រូវបានផ្សារភ្ជាប់ជាមួយនឹងរឿងអាក្រក់នៅក្នុងរឿងព្រេងនិទាន ដូច្នេះវាមិនត្រូវបានគេណែនាំអោយប្រើក្នុងការគោរពបូជាដូនតា ឬដាក់នៅលើអាសនៈនោះទេ។៥.ផ្កាចំប៉ី៖ គឺជាផ្កាដែលមានក្លិនក្រអូប និងស្រស់ស្អាត ប៉ុន្តែយោងទៅតាមគំនិតបុរាណ ផ្កានេះមិនគួរដាក់នៅលើអាសនៈទេ ព្រោះរូបរាងរបស់វាប្រហាក់ប្រហែលនឹងផ្នែកខាងក្រោមរបស់មនុស្សស្រី៕ ប្រភព៖ phuntoday.com

តម្លៃប្រេងនៅកម្ពុជាបានចុះថ្លៃហើយចាប់ពីថ្ងៃទី២១ មីនា ដល់ថ្ងៃទី៣១ ខែមីនា ឆ្នាំ២០២៣ ដោយក្នុងនោះតម្លៃប្រេងសាំងធម្មតាចុះថ្លៃ១០០រៀលនៅសល់ត្រឹម ៤ ២០០រៀលក្នុងមួយលីត្រ និងប្រេងម៉ាស៊ូតចុះថ្លៃ២០០រៀលនៅត្រឹម ៤ ០៥០ រៀលក្នុងមួយលីត្រ។ នេះបើយោងតាមសេចក្តីប្រកាសរបស់ក្រសួងពាណិជ្ជកម្មនៅថ្ងៃទី២១ ខែមីនា ។

តាមសេចក្តីជូនដំណឹងដដែលបានបន្ថែមថា ការកំណត់តម្លៃប្រេងនេះ គឺផ្អែកទៅលើទីផ្សារអន្តរជាតិ ប៉ុន្តែដើម្បីជួយសម្រួលដល់ជីវភាពរបស់ប្រជាពលរដ្ឋ ប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានសម្រេចបញ្ចុះតម្លៃលក់រាយប្រេងឥន្ទនៈនេះចំនួន៦,៥ សេនដុល្លារ ក្នុងមួយលីត្ររួចទៅហើយ៕