ប្រទេសថៃ ៖ ប្រទេសថៃនឹងចរចាជាមួយកម្ពុជា អំពីការទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេមលើកទី៣២ ដែលនឹងប្រព្រឹត្តឡើងនៅទីក្រុងភ្នំពេញ ប្រទេសកម្ពុជា ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ។ កាលពីពេលមុននេះ ថៃអះអាងថា ខ្លួនជាប្រទេសមួយដែលកម្ពុជាបានទាមទារការទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេមក្នុងតម្លៃខ្ពស់ជាងគេនៅអាស៊ាន គឺស្មើប្រមាណ៨សែនដុល្លារអាមេរិក ឬស្មើ២៨លានបាត ដោយសារកម្ពុជាពិចារណាពីតម្លៃទីផ្សាររបស់ប្រទេសនីមួយៗ ។

កាលពីថ្ងៃទី២១ ខែមីនា កន្លងមក លោក Chaiyaphak Siriwat អនុប្រធានគណៈកម្មការអូឡាំពិក និងការិយាល័យស៊ីហ្គេមប្រទេសថៃ បានធ្វើដំណើរមកប្រជុំនៅប្រទេសកម្ពុជា ។ លោក Chaiyaphak Siriwat និយាយថា ៖ «រឿងការទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេមពីកម្ពុជានោះ នៅមិនទាន់ជាក់លាក់អំពីចំនួនទឹកប្រាក់នៅឡើយទេ បន្ទាប់ពីមានព័ត៌មានថា ប្រទេសថៃត្រូវទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេម ក្នុងចំនួនទឹកប្រាក់ខ្ពស់» ។

ប្រទេសថៃបញ្ជាក់ថា គណៈកម្មការអូឡាំពិកថៃ និងទីភ្នាក់ងារទទួលខុសត្រូវផ្នែកការផ្សាយបន្តផ្ទាល់កីឡាស៊ីហ្គេមរបស់ថៃ នឹងមកចរចាជាមួយភាគីកម្ពុជា ហើយប្រទេសទាំងពីរនឹងព្រមព្រៀងគ្នាលើចំនួនទឹកប្រាក់ទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេមនេះ ។ ប្រទេសថៃបញ្ជាក់ទៀតថា ភាគីថៃ និងកម្ពុជា នឹងធ្វើការប្រជុំនៅថ្ងៃទី៥ ខែមេសា ឆ្នាំ២០២៣ ហើយភាគីថៃសង្ឃឹមថា ខ្លួននឹងដឹងអំពីចំនួនទឹកប្រាក់ការទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេម នៅថ្ងៃដដែលនេះ ។

លោក Chaiyaphak Siriwat បន្តថា លោកបានជជែកជាមួយលេខាធិការគណៈកម្មការអូឡាំពិករបស់កម្ពុជា ហើយកម្ពុជាលើកឡើងថា នៅពេលនេះ មានប្រទេសចំនួន៤ បានទិញសិទ្ធិផ្សាយបន្តផ្ទាល់ការប្រកួតកីឡាស៊ីហ្គេមលើកទី៣២ ដែលនឹងប្រព្រឹត្តឡើងនៅប្រទេសកម្ពុជា រួមមាន ប្រទេសវៀតណាម, សិង្ហបុរី, ឥណ្ឌូណេស៊ី និងម៉ាឡេស៊ី ។

លោក Chaiyaphak Siriwat បន្ថែមថា ពលរដ្ឋថៃនឹងបានទស្សនាការផ្សាយបន្តផ្ទាល់ការប្រកួតកីឡាស៊ីហ្គេមនៅកម្ពុជា ហើយលោកនឹងពិភាក្សាជាមួយអាជ្ញាធរកីឡាប្រទេសថៃ និងភ្នាក់ងារពាក់ព័ន្ធម្តងទៀត មុននឹងឈានដល់ថ្ងៃទី៥ ខែមេសា ខាងមុខនេះ នៅគណៈកម្មការអូឡាំពិកប្រទេសថៃ ។

គួរបញ្ជាក់ថា ការប្រកួតកីឡាស៊ីហ្គេមដែលកម្ពុជាធ្វើជាម្ចាស់ផ្ទះនេះ ប្រទេសថៃមិនពេញចិត្តនឹងការដាក់ឈ្មោះកីឡា «គុនខ្មែរ» នោះទេ ហើយចង់ដាក់ថា «Muay Thai» វិញ ធ្វើឱ្យអ្នកលេងបណ្តាញសង្គមកម្ពុជានិងថៃ បានជជែកគ្នាជាច្រើនអំពីការដាក់ឈ្មោះកីឡានេះ ហើយថៃលើកឡើងថា ខ្លួននឹងមិនបញ្ជូនកីឡាករមកប្រកួតកីឡាស៊ីហ្គេមនៅកម្ពុជាទេ ។ ផ្ទុយទៅវិញ ប្រទេសផ្សេងទៀតនៅអាស៊ានដូចជា វៀតណាម, សិង្ហបុរី, ឥណ្ឌូណេស៊ី និងម៉ាឡេស៊ី ពួកគេគ្មានបញ្ហាច្រើនដូចថៃទេ ៕ ប្រភព ៖ The standard

រដ្ឋធានីប៊ែរឡាំង៖ រហូតមកដល់ពេលនេះ បើទោះជា ក្រុងកៀវកំពុងតែជាប់ដៃ ធ្វើសង្គ្រាម ទប់ទល់ប្រឆាំងនឹងកម្លាំងទាហានរបស់ក្រុងមូស្គូ និង រងការវាយប្រហារ ពីមីស៊ីលរបស់រុស្ស៊ី ឥតឈប់ឈយ៉ាងណាក្ដី ក៏ក្រុមហ៊ុនផលិតគ្រឿងសឹករបស់អាល្លឺម៉ង់ ចង់សាសង់រោងចក្ររថក្រោះប្រយុទ្ធធុនធ្ងន់ នៅក្នុងប្រទេសអ៊ុយក្រែន ដែរ។

សារព័ត៌មាន Defense News បានចេញផ្សាយ កាលពីព្រឹក ថ្ងៃពុធ ទី២២ ខែមីនា ឆ្នាំ២០២៣ ថា ក្រុមហ៊ុនផលិតគ្រឿងសព្វាវុធរ៉េនមេថល (Rheinmetall) របស់អាល្លឺម៉ង់ ចង់បង្កើតរោងចក្រផលិតរថក្រោះ នៅក្នុងប្រទេសអ៊ុយក្រែន។ ប៉ុន្ដែបើរោងចក្រនោះ ចាប់ផ្ដើមដំណើរការ នឹងមានសមត្ថភាពផលិតរថក្រោះប្រយុទ្ធធុនធ្ងន់ ប្រភេទ Panther KF51 ចំនួន៤០០គ្រឿង នៅក្នុងរយៈពេលមួយឆ្នាំៗ។ ចំណែក ក្រុមអ្នកជំនាញខាងសង្គ្រាមផ្លូវគោកមួយចំនួន អះអាង ថា ផែនការទាំងនេះ ពិតជាល្អបំផុត ព្រោះបានចង្អុលបង្ហាញ អំពីបញ្ហានានា ចាប់ពីសុវត្ថិភាពទីតាំង រហូតដល់ចំណុចហានិភ័យ នៅក្នុងខ្សែសង្វាក់ផ្គត់ផ្គង់។

លោក អាមីន ផាបផឺរហ្គ័រ (Armin Papperger) នាយកប្រតិបត្ដិក្រុមហ៊ុន Rheinmetall បានផ្សព្វផ្សាយប្រធានបទនេះ ជាមួយនឹងប្រព័ន្ធផ្សព្វផ្សាយរបស់អាល្លឺម៉ង់ ជាច្រើនដងរួចមកហើយ ចាប់តាំងពីដើមឆ្នាំ២០២៣រហូតមក។ លោកនាយកប្រតិបត្ដិ បានអះអាង ថា ក្រុមហ៊ុនកំពុងតែចរចា ជាមួយនឹងអ៊ុយក្រែន អំពីលទ្ធភាពបោះទុនវិនិយោគ មានទំហំទឹកប្រាក់ ២០០លានអឺរ៉ូ (លុយតំបន់អឺរ៉ុប) ឬ ស្មើនឹង ២១៥លានដុល្លារអាមេរិក ទៅក្នុងរោងចក្រផលិតរថក្រោះថ្មីមួយ ដែលអាចបំពាក់ដល់កងទ័ពរបស់អ៊ុយក្រែន ជាមួយនឹងគ្រឿងយុទ្ធោបករណ៍ធុនធ្ងន់។

ជាមួយគ្នានេះ អ្នកនាំពាក្យ ក្រុមហ៊ុន Rheinmetall ក៏បានបញ្ជាក់ អំពីផែនការសាងសង់រោងចក្រផលិតរថក្រោះនេះមែន ប៉ុន្ដែគាត់បានបដិសេធបង្ហាញព័ត៌មានលម្អិត ដោយគ្រាន់តែចង្អុលទៅលើបទសម្ភាសន៍របស់នាយកប្រតិបត្ដិ លោក Papperger លើប្រធានបទនេះ ជាមួយនឹងកាសែត Rheinische Post (រេននីសេ ប៉ុស្ដិ៍)។

លោក ហ្សង់-ហ្វីលលីព វេសស្វេង (Jan-Phillipp Weisswange) អ្នកនាំពាក្យ របស់ក្រុមហ៊ុនមួយនេះ បានសរសេរ នៅតាមអ៊ីមែល ថា «ហេតុផលធ្វើអាជីវកម្ម និង ដោយមើលឃើញ អំពីផលប្រយោជន៍សន្តិសុខដ៏រសើបរបស់អ៊ុយក្រែន យើងមិនអាចផ្តល់ព័ត៌មានលម្អិតបន្ថែមទៀតបាននោះទេ ខណៈស្ថានភាពបច្ចុប្បន្ន កំពុងតែពិភាក្សា និង បង្កើតសមត្ថភាពផលិត នៅក្នុងប្រទេស»។

លោក ម៉ាក អេហ្វ. ខេនសៀន (Mark F. Cancian) ទីប្រឹក្សាជាន់ខ្ពស់ នៃមជ្ឈមណ្ឌលសិក្សាយុទ្ធសាស្រ្ដ និង អន្ដរជាតិ នៅសហរដ្ឋអាមេរិក បានបញ្ជាក់ ថា «ការផលិតរថក្រោះ ឲ្យបានចំនួន៤០០គ្រឿង នៅក្នុងរយៈពេលមួយឆ្នាំ គឺពិតជាមានការខិតខំប្រឹងប្រែងធំសម្បើមណាស់។ នេះបើប្រៀបធៀបទៅនឹងពេលបច្ចុប្បន្ន សហរដ្ឋអាមេរិក ផលិតរថក្រោះ បានត្រឹមតែ១០០គ្រឿង នៅក្នុងរយៈពេលមួយឆ្នាំ។ ផ្ទុយទៅវិញ កងទ័ពអ៊ុយក្រែន មានរថក្រោះសរុបប្រហែល ៨០០គ្រឿង នៅមុនពេលការផ្ទុះសង្រ្គាម។ បើសន្មត ថា អាយុកាលប្រហែល២០ឆ្នាំ មានតម្រូវឱ្យការទិញរថក្រោះ ប្រហែលត្រឹមតែ៤០គ្រឿងប៉ុណ្ណោះ នៅក្នុងរយៈពេលមួយឆ្នាំ ហើយមិនមែនទិញ រហូតដល់៤០០គ្រឿង នៅក្នុងរយៈពេល១ឆ្នាំនោះឡើយ»។

លោកទីប្រឹក្សា រូបនេះ បានបន្ថែម ថា បើស្ដាប់ទៅលើទឹកប្រាក់ទំហំ២០០លានអឺរ៉ូ បោះទុនវិនិយោគ សាងសង់សមត្ថភាពផលិតរថក្រោះបែបនេះ គឺនៅមានកម្រិតទាបណាស់ ទាំងទំហំការផលិត និង រយៈពេល។

ជាការគួរឲ្យកត់សម្គាល់នោះ ផែនការរបស់ក្រុមហ៊ុន Rheinmetall បើធ្វើឲ្យយល់ដឹងជាសាធារណៈ ប្រហែលជាមានគោលបំណងបន្ថែមទៀត សម្រាប់អ៊ុយក្រែន នៅក្រោយសង្គ្រាម។ ប៉ុន្ដែគេនៅតែមិនទាន់ច្បាស់ ថាតើគោលដៅ សាងសង់រោងចក្រផលិតពេញលេញ ឬ គ្រាន់តែកន្លែងដំឡើងរថក្រោះមួយប៉ុណ្ណោះ។

រថក្រោះប្រយុទ្ធធុនធ្ងន់ ប្រភេទ Panther KF51 មានតម្លៃប្រហែល ១,៦លានដុល្លារ ហើយវាអាចផ្ទុកប្រេងសាំង រហូតដល់ ១១០០លីត្រ និង មានទម្ងន់៥៩តោន៕

កាលពីពេលថ្មីៗនេះ ព្រះមហាក្សត្រថៃ Maha Vajiralongkorn​ បានចេញព្រះរាជក្រឹត្យ ប្រកាសរំលាយសភារបស់ប្រទេសថៃចោល។

តាមច្បាប់របស់ប្រទេសថៃ ដំណើរការបោះឆ្នោតអាចប្រព្រឹត្តិទៅបាន ក្នុងចន្លោះពេល៤៥ថ្ងៃទៅ៦០ថ្ងៃ ក្រោយពេលរំលាយសភា។

ថៃនឹងធ្វើការបោះឆ្នោតនៅថ្ងៃទី១៤ ខែឧសភា ខាងមុខនេះ ដោយអ្នកវិភាគនយោបាយបានលើកឡើងថា វាជាការប្រកួតប្រជែងដ៏ខ្លាំងក្លាបំផុតមួយនៅក្នុងរបបនយោបាយប្រទេសថៃ​ ដោយលោកប្រាយុទ្ធ ចាន់អូចា មកពីសម្ព័ន្ធគណបក្ស ត្រូវប្រឈមមុខជាមួយកូនស្រីលោកថៃសុីន គឺលោកស្រី Paetongtarn Shinawatra​។

តាមការស្ទង់មតិក្រៅផ្លូវការមួយបានបង្ហាញថា លោកលោកស្រី Paetongtarn Shinawatra មានភាគរយខ្ពស់ជាងគេបង្អស់ ដែលនឹងអាចជានាយករដ្ឋមន្រ្តីថៃបន្ទាប់៕

ប្រភព៖ BBC

មិនមែនជាលើកទី១មួយទេដែលរឿងភាគថៃមួយចំនួនបានយករូបប្រាសាទអង្គរវត្តរបស់កម្ពុជាទៅដាក់ក្នុងផ្ទាំង Poster រឿងថៃក្រោមរូបភាពច្រលំម្តងហើយម្តងទៀតដោយមិនចេះអៀនខ្មាស។ ជាក់ស្តែង ថ្មីៗនេះមហាជនផ្ទុះប្រតិកម្មយ៉ាងខ្លាំងទៅលើទូរទស្សន៍ថៃប៉ុស្តិ៍លេខ៧ ដែលបានយកប្រាសាទអង្គរវត្តទៅដាក់នៅក្នុងផ្ទាំងរូបភាពរឿងបុរាណថ្មីមួយ។

មិនដឹងថាជាចេតនា ឬមានការភាន់ច្រឡំនោះទេព្រោះមិនមែនរឿងដំបូងឡើយដែលផលិតករថៃមានចិត្តយករូបប្រាសាទអង្គរវត្តសម្បត្តិបេតិកភណ្ឌរបស់ប្រទេសកម្ពុជាយកទៅដាក់នៅផ្ទាំង Poster រឿងថៃម្តងហើយម្តងទៀត ពេលប្រជាជនកម្ពុជាផ្ទុះប្រតិកម្មខាងភាគីថៃបានត្រឹមចេញមុខសុំទោសដោយលើកហេតុផលថាគ្រាន់តែជាការយល់ច្រឡំ និងបានដករូបប្រាសាទអង្គរវត្តវិញ។

យ៉ាងណាមិញ កាលពីពេលថ្មីៗនេះស្រាប់តែទូរទស្សន៍ថៃប៉ុស្តិ៍លេខ៧ បានបង្ហោះរូបភាពប្រម៉ូតរឿងថ្មីរបស់ខ្លួនដែលមានចំណងជើងថា «ភេត្រានិរមិត (เภตรานิรมิต)»ដែលជាខ្សែរឿងបែបឆ្លងភព មានតួស្រីឆ្លងទៅកាន់រជ្ជកាលទី៣នៃក្រុងរតនកោសិន្ទ្រដែលសម្តែងដោយតួឯកស្រីល្បីឈ្មោះ Mookda Narinrak និងតួឯកប្រុស Mike Pattaradet ។ អ្វីដែលធ្វើឱ្យមហាជនផ្ទុះប្រតិកម្ម និងមានចង្ងល់យ៉ាងខ្លាំងនោះ ហេតុអ្វីបានជារឿងថ្មីនេះ បានយកប្រាសាទអង្គរវត្តរបស់ខ្មែរមកធ្វើ background poster ទៅវិញ។

ការយកប្រាសាទអង្គរវត្តរបស់ខ្មែរយកទៅដាក់ក្នុងរឿងភាគថៃម្តងហើយម្តងទៀតនេះ មហាជនក៏បានលើកឡើងដែលថា នេះជាចេតនារបស់ផ លិតករថៃដែលចង់ឱ្យជនបរទេសគិតថាប្រាសាទអង្គរវត្តជារបស់ថៃ។
គួរបញ្ជាក់ផងដែរថា កន្លងមកផលិតករថៃក្នុងទូរទស្សន៍ថៃប៉ុស្តិ៍លេខ៥ និង ប៉ុស្តិ៍លេខ៣ សុទ្ធតែមានយកប្រាសាទអង្គរវត្តរបស់ខ្មែរយកទៅដាក់ក្នុង Poster រឿងរបស់ខ្លួន តែពេលមានប្រតិកម្មពីប្រជាជនកម្ពុជាពួកគេបានដករូបភាពប្រាសាទអង្គរវត្តចេញវិញ។
យ៉ាងណារឿងថ្មីនេះ មហាជនកំពុងរង់ចាំយ៉ាងអន្ទះសារថាភាគីទូរទស្សន៍ថៃប៉ុស្តិ៍លេខ៧ ដោះស្រាយយ៉ាងណា៕

សហរដ្ឋអាមេរិក ៖ លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិក (National Security Council) បានអំពាវនាវឱ្យប្រធានាធិបតីចិន លោក ស៊ី ជិនពីង ដែលកំពុងស្ថិតនៅទីក្រុងមូស្គូ ប្រទេសរុស្ស៊ី ដាក់សម្ពាធលើប្រធានាធិបតីរុស្ស៊ី លោក វ៉្លាឌីមៀរ ពូទីន ដើម្បីបញ្ឈប់ការទម្លាក់គ្រាប់បែកនៅប្រទេសអ៊ុយក្រែន តាមមន្ទីរពេទ្យ និងសាលារៀនផ្សេងៗ ព្រមទាំងបញ្ឈប់ការធ្វើឧក្រិដ្ឋកម្មសង្គ្រាម និងដកកងទ័ពចេញពីអ៊ុយក្រែន ។

លោក John Kirby ថ្លែងថា ៖ «យើងសង្ឃឹមថា លោកប្រធានាធិបតីចិននឹងដាក់សម្ពាធលោក ពូទីន ឱ្យបញ្ឈប់ការទម្លាក់គ្រាប់បែកនៅតាមទីក្រុង មន្ទីរពេទ្យ និងសាលារៀនរបស់អ៊ុយក្រែន ហើយបញ្ឈប់ការធ្វើឧក្រិដ្ឋកម្មសង្គ្រាម និងអំពើឃោរឃៅព្រៃផ្សៃ ព្រមទាំងដកទ័ពរុស្ស៊ីចេញពីអ៊ុយក្រែនផងដែរ ខណៈការស្នើសុំឱ្យបញ្ឈប់ការបាញ់គ្នានោះមិនគ្រប់គ្រាន់ទេ» ។

លោក John Kirby បន្តថា ៖ «យើងបារម្ភថា ចិនគ្រាន់តែទាមទារឱ្យប្រទេសទាំងពីរឈប់បាញ់គ្នា ប៉ុន្តែបណ្តោយឱ្យកងទ័ពរុស្ស៊ីឈរជើងនៅទឹកដីអ៊ុយក្រែន ហើយចិនមិនបានទាមទារឱ្យរុស្ស៊ីដកទ័ពរបស់ខ្លួនចេញពីអ៊ុយក្រែនទេ និងបណ្តោយឱ្យរុស្ស៊ីគ្រប់គ្រងដែនដីរបស់អ៊ុយក្រែនដោយខុសច្បាប់» ។

សហរដ្ឋអាមេរិកលើកឡើងបែបនេះក្រោយពីលោក ស៊ី ជិនពីង និងលោក ពូទីន បានជជែកពិភាក្សាគ្នាមិនផ្លូវការអស់ជាង៤ម៉ោងកាលពីថ្ងៃទី២០ ខែមីនា កន្លងមក ហើយមេដឹកនាំប្រទេសទាំងពីរបានពិភាក្សាគ្នាជាផ្លូវការនៅថ្ងៃទី២១ ខែមីនា ។

លោក ពូទីន បានថ្លែងក្នុងអំឡុងពេលលោកជជែកគ្នាជាមួយលោក ស៊ី ជិនពីង ថា នឹងពិភាក្សាគ្នាអំពីផែនការសន្តិភាព១២ចំណុច ដែលមេដឹកនាំចិនបានស្នើសុំដើម្បីបញ្ឈប់វិបត្តិដ៏ស្រួចស្រាវនៅអ៊ុយក្រែន និងស្នើឱ្យរុស្ស៊ីព្រមចរចាបញ្ចប់សង្គ្រាម ។

ទោះយ៉ាងណា កន្លងមក អាមេរិកបានបង្ហាញការបារម្ភរឿងចិនជួយគាំទ្ររុស្ស៊ី តាមរយៈកត្តាចម្បងៗដូចជា ការគាំទ្រពាណិជ្ជកម្ម និងបច្ចេកវិទ្យា ហើយអាមេរិកបារម្ភថា ចិនអាចនឹងផ្តល់ជំនួយកងទ័ពទៅកាន់រុស្ស៊ី និងផ្តល់អាវុធនានាដូចជា កាំភ្លើងធំជាដើម ។

ចំណែកមេដឹកនាំប្រទេសអ៊ុយក្រែនកំពុងតាមដានពីការមកកាន់ប្រទេសរុស្ស៊ីរបស់មេដឹកនាំចិន ហើយមេដឹកនាំអ៊ុយក្រែនបានសង្កត់ធ្ងន់ពីជំហរដូចគ្នាជាមួយប្រទេសចិន គឺការគោរពអំណាចអធិបតេយ្យភាព និងបូរណភាពទឹកដីអ៊ុយក្រែន ។

តាមសេចក្តីរាយការណ៍ថា រដ្ឋាភិបាលទីក្រុងគៀវបានព្យាយាមបញ្ចុះបញ្ចូលឱ្យមានការប្រជុំ ឬនិយាយទូរស័ព្ទដោយផ្ទាល់រវាងលោក ស៊ី ជិនពីង, លោក ពូទីន និងប្រធានាធិបតីអ៊ុយក្រែន ។ រីឯអាមេរិកមានបំណងឱ្យលោក ស៊ី ជិនពីង ដើរតួនាទីដោះស្រាយជម្លោះនៅអ៊ុយក្រែន ដោយការជជែកគ្នាជាមួយមេដឹកនាំអ៊ុយក្រែនផងដែរ ៕ ប្រភព ៖ The standard

ប្រទេសហ្វាំងឡង់ ៖ ហ្វាំងឡង់បានជាប់ចំណាត់ថ្នាក់ទី១ អស់រយៈពេល៦ឆ្នាំជាប់ៗគ្នា ជាប្រទេសមានក្តីសុខបំផុតនៅលើពិភពលោក រីឯប្រទេសថៃវិញបានជាប់ចំណាត់ថ្នាក់ទី៦០ ។ ចំណែកប្រទេសមានក្តីសុខតិចបំផុតនៅលើពិភពលោក គឺបានទៅលើប្រទេសអាហ្វហ្គានីស្ថាន ។

ជារៀងរាល់ឆ្នាំ នៅថ្ងៃក្តីសុខអន្តរជាតិ (International Day of Happiness) ផ្នែកបណ្តាញដោះស្រាយការអភិវឌ្ឍប្រកបដោយចីរភាពរបស់អង្គការសហប្រជាជាតិ នឹងផ្សព្វផ្សាយពីការចាត់ចំណាត់ថ្នាក់ប្រទេសនានានៅទូទាំងពិភពលោកថា តើប្រទេសណាមានក្តីសុខ និងគួរចង់រស់នៅជាងគេ ។

គេបានប្រមូលផ្តុំនូវទិន្នន័យពីប្រភពជាច្រើន និងយោងតាមសូចនាករចំនួន៦ ដូចជា ការគាំទ្រផ្នែកសង្គម, ប្រាក់ចំណូលសម្រាប់មនុស្សម្នាក់, សុខភាព, សេរីភាព, ការជួយសង្គ្រោះផ្នែកសប្បុរសធម៌ និងគ្មានអំពើពុករលួយ ។ ការចាត់ចំណាត់នៅឆ្នាំ២០២៣នេះ គឺស្រដៀងគ្នានឹងឆ្នាំ២០២២ ដែរ ដោយមានប្រទេសជាច្រើនបានជាប់ចំណាត់ថ្នាក់កំពូល ។

ប្រទេសហ្វាំងឡង់បានជាប់ចំណាត់ថ្នាក់ទី១ អស់រយៈពេល៦ឆ្នាំជាប់ៗគ្នា បន្ទាប់មក គឺប្រទេសដាណឺម៉ាក និងអ៊ីស្លង់ ។ ចំណែកប្រទេសមានក្តីសុខតិចបំផុតចំនួន៥ រួមមាន ៖
១-សាធារណរដ្ឋប្រជាធិបតេយ្យកុងហ្គោ
២-ប្រទេសហ្ស៊ីមបាវ៉េ
៣-ប្រទេសសៀរ៉ាឡេអូន
៤-ប្រទេសលីបង់
៥-ប្រទេសអាហ្វហ្គានីស្ថានទោះយ៉ាងណា អ្វីដែលធ្វើឱ្យប្រទេសហ្វាំងឡង់បានជាប់ចំណាត់ថ្នាក់កំពូលជាប្រទេសមានក្តីសុខបំផុត បើតាមអ្នកជំនាញពីសាកលវិទ្យាល័យអាល់តូ ប្រទេសហ្វាំងឡង់ និយាយថា វាមកពីកត្តាជាច្រើនយ៉ាងដូចជា ប្រព័ន្ធសុខុមាលភាពដែលជួយពលរដ្ឋក្នុងប្រទេសនេះមានអារម្មណ៍ថា ពួកគេទទួលបានការយកចិត្តទុកដាក់ ។ ចំណែកប្រទេសថៃវិញជាប់ចំណាត់ថ្នាក់ទី៦០ ក្នុងចំណោម១៣៧ប្រទេស ហើយថៃទទួលបានពិន្ទុតិចបំផុត គឺត្រឹមតែ៥.៨៤៣ពិន្ទុ ។

ក្រៅពីនេះ អ្នកវិភាគលើកឡើងថា បើទោះជាពិភពលោកជួបនឹងវិបត្តិជាច្រើនលើកក្តី រួមទាំងការរាតត្បាតនៃជំងឺកូវីដ-១៩ និងសង្គ្រាមនៅប្រទេសអ៊ុយក្រែន ប៉ុន្តែមនុស្សនៅទូទាំងពិភពលោក ពេញចិត្តនឹងជីវិតរបស់ពួកគេចាប់ពីឆ្នាំ២០២០ ដល់ឆ្នាំ២០២២ ៕ ប្រភព ៖ khaosod

ប្រទេសវៀតណាម ៖ សារព័ត៌មានរ៉យទ័ររាយការណ៍ថា មន្ត្រីវៀតណាមបានរឹបអូសយកភ្លុកដំរីចំនួន៧តោន ដែលពួកឈ្មួញបានលួចនាំចូលខុសច្បាប់មកប្រទេសវៀតណាមពីប្រទេសអង់ហ្គោឡា (ជាប្រទេសស្ថិតនៅតំបន់អាហ្វ្រិកកណ្តាល) ។ រដ្ឋាភិបាលវៀតណាមចាត់ទុកថា វាជាការចាប់យកផលិតផលធ្វើពីសត្វព្រៃដ៏ធំបំផុតក្នុងរយៈពេលជាច្រើនឆ្នាំមកនេះ ។

ការទិញ-លក់ភ្លុកដំរី គឺជាអំពើខុសច្បាប់នៅប្រទេសវៀតណាម ប៉ុន្តែការជួញដូរសត្វព្រៃខុសច្បាប់នៅតែបន្តកើតមានក្នុងប្រទេសនេះ ។ ក្រៅពីការជួញដូរភ្លុកដំរីហើយ គឺនៅមានផលិតផលធ្វើពីសត្វព្រៃផ្សេងទៀត ក៏ត្រូវបានគេលួចនាំចូលមកកាន់ប្រទេសវៀតណាមផងដែរ ។

កាលពីថ្ងៃទី២០ ខែមីនា កន្លងមក មន្ត្រីគយវៀតណាមនៅខេត្តហៃផុង បានពិនិត្យឃើញភ្លុកដំរីលាក់នៅក្នុងទូរកុងតឺន័រដឹកទំនិញ ហើយឈ្មួញនាំចូលទាំងនេះប្រាប់មន្ត្រីគយវៀតណាមថា គឺជាសណ្តែកដី ។ រដ្ឋាភិបាលវៀតណាមបានបញ្ជាក់ក្នុងសេចក្តីថ្លែងការណ៍ថា ទូរកុងតឺន័រដឹកទំនិញនេះមកពីប្រទេសសិង្ហបុរី ។

ហេតុការណ៍នេះកើតឡើងក្រោយពីវៀតណាមបានប្រទះឃើញភ្លុកដំរី ដែលលួចនាំចូលពីតំបន់អាហ្វ្រិកជាង៦០០គីឡូក្រាមនៅកំពង់ផែ Lach Huyen កាលពីខែកុម្ភៈ ឆ្នាំ២០២៣ ហើយនៅខែកុម្ភៈ នេះដែរ តុលាការវៀតណាមបានកាត់ទោសបុរសម្នាក់ឱ្យជាប់ពន្ធនាគាររយៈពេល១៣ឆ្នាំ ពីបទលួចលក់ដូរផ្នែកផ្សេងៗនៃសត្វជិតផុតពូជពីអាហ្វ្រិក ចំនួនប្រមាណ១០តោន ក្នុងនោះមានភ្លុកដំរី និងស្នែងរមាសផងដែរ ៕ ប្រភព ៖ mgronline