កាលពីព្រឹកមិញ ព្រះរាជាណាចក្រកម្ពុជា ក្នុងឋានៈជាម្ចាស់ផ្ទះរៀបចំការប្រកួតព្រឹត្តិការណ៍អាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ បានរៀបចំ ព្រះរាជពិធីប្រោសព្រះរាជទាន ព្រះអគ្គិជ័យកីឡា ដើម្បីចាប់ផ្ដើមការដង្ហែភ្លើងគប់ ទៅកាន់បណ្ដាប្រទេសជាសមាជិកប្រចាំតំបន់អាស៊ីអាគ្នេយ៍ ដែលជាប្រពៃណីរបស់ព្រឹត្តិការណ៍កីឡាស៊ីហ្គេម។
នៅក្នុងនោះអត្តពលិកកម្ពុជា ២រូប បានឡើងទៅទទួល ព្រះអគ្គិជ័យកីឡា ពីព្រះករុណាព្រះបាទសម្ដេចព្រះបរមនាថ នរោត្តម សីហមុនី ដោយអ្នកទាំងពីរនោះរួមមានកីឡាករតេក្វាន់ដូ វ៉ា មិថុនា គឺនិងកីឡាការិនីជនពិការ លោតចម្ងាយ វិត ចន្ថាដែលទើបតែទទួលបានមេដាយមាសកាលពីឆ្នាំទៅ នៅប៉ារ៉ាហ្គេមប្រទេសវៀតណាម។
អ្នកទាំងពីរនឹងត្រូវមានកាតព្វកិច្ចចាំបាច់នាំមុខមាត់ឱ្យកម្ពុជា ដោយកីឡាករ វ៉ា មិថុនា នឹងចូលរួមប្រកួតសុីហ្គេម ផ្នែកតេក្វាន់ដូ ខណៈកីឡាការិនីជនពិការ លោតចម្ងាយ វិត ចន្ថា នឹងចូលរួមព្រឹត្តិការណ៍ប៉ារ៉ាហ្គេមដែលកម្ពុជាធ្វើជាម្ចាស់ផ្ទះនាពេលដ៏ខ្លីខាងមុខនេះ៕
