សម្រាប់ភ្ញៀវទេសចរកម្ពុជាដែលមានបំណងធ្វើដំណើរទៅប្រទេសជប៉ុនក្នុងរយៈពេលមិនលើស ៩០ថ្ងៃកាន់តែមានភាពងាយស្រួលហើយ ដោយរដ្ឋាភិបាលជប៉ុននឹងដាក់ឱ្យប្រើប្រាស់ប្រព័ន្ឋទិដ្ឋាការអេឡិចត្រូនិច(JAPAN E-VISA System) ចាប់ពីថ្ងៃទី២៧ ខែមីនា ឆ្នាំ២០២៣នេះតទៅ។ នេះតាមសេចក្តីជូនដំណឹងរបស់ក្រសួងទេសចរណ៍ចុះនៅថ្ងៃទី១៧ ខែមីនា ឆ្នាំ២០២៣។

ក្នុងនោះដែរ ក្រសួងទេសចរណ៍ និងសមាគមទេសចរណ៍ រំពឹងថា លំហូរទេសចរទៅវិញទៅមករវាងប្រទេសកម្ពុជា និងជប៉ុន នឹងកាន់តែប្រសើរ ក្រោយជប៉ុនដាក់ឱ្យប្រើប្រាស់ប្រព័ន្ឋទិដ្ឋាការខាងលើនេះ។

សូមបញ្ជាក់ផងដែរថា ជប៉ុនបានផ្អាកទិដ្ឋាការចូលប្រទេសខ្លួន នៅទូទាំងពិភពលោករួមទាំងកម្ពុជាជាបណ្តោះអាសន្ននៅថ្ងៃទី០៣ ខែមេសា ឆ្នាំ២០២០ ដើម្បីទប់ស្កាត់ការរីករាលដាលនៃជំងឺកូវីដ-១៩។ បន្ថែមពីនេះ ជប៉ុន ប្រកាសលុបចោលវិធានការកូវីដ-១៩តឹងរឹងចំពោះគ្រប់អ្នកដំណើរចាប់ពីថ្ងៃទី១១ ខែតុលា ឆ្នាំ២០២២ ដើម្បីឱ្យមានកំណើនភ្ញៀវទេសចរឡើងវិញបន្ទាន់ពីធ្លាក់យ៉ាងគំហុកដោយសារតែជំងឺកូវីដ-១៩៕

ប្រទេសបារាំង ៖ ប្រទេសបារាំងបានចេញច្បាប់ថ្មីមួយ គឺឪពុកម្តាយគ្មានសិទ្ធិយករូបភាពកូនរបស់ខ្លួនមកបង្ហោះក្នុងបណ្តាញសង្គមទេ មិនថារូបភាពទាំងនេះបង្ហោះសម្រាប់ទុកជាអនុស្សាវរីយ៍ ឬការចងចាំ ។

គេឃើញឪពុកម្តាយមួយចំនួនចង់ចែកចាយឱ្យមិត្តភក្តិក្នុងបណ្តាញសង្គមបានឃើញពីការលូតធំធាត់របស់កូនខ្លួន ឬចង់សុំជាមតិយោបល់ពីឪពុកម្តាយផ្សេងទៀត ។ លើសពីនេះ មានអ្នកខ្លះយករូបកូនខ្លួនទៅបង្ហោះនៅតាមអនឡាញដើម្បីរកប្រាក់ចំណូលទៀតផង រហូតដល់ពេលខ្លះ ពួកគេភ្លេចគិតថា មានព័ត៌មានផ្ទាល់ខ្លួនរបស់កូននៅក្នុងបណ្តាញសង្គមច្រើនពេក ហើយមិនគិតពីសុវត្ថិភាពរបស់កូនឡើយ ។

សភាតំណាងរាស្ត្រប្រទេសបារាំងបានបោះឆ្នោតជាឯកច្ឆ័ន្ទដើម្បីអនុម័តច្បាប់ការពារសិទ្ធិកុមារ និងភាពផ្ទាល់ខ្លួនរបស់កុមារ ហើយឪពុកម្តាយនឹងត្រូវគេហាមឃាត់មិនឱ្យបង្ហោះរូបកូនខ្លួននៅក្នុងបណ្តាញសង្គមទេ ។ ច្បាប់ថ្មីនេះមានគោលបំណងផ្តល់អំណាចដល់ឪពុកម្តាយ និងអាណាព្យាបាលក្នុងការថែទាំ ប៉ុន្តែមិនត្រូវប៉ះពាល់សិទ្ធិកុមារ ។ ជាមួយគ្នានេះ ក៏បង្ហាញឱ្យយុវជនឃើញថា ឪពុកម្តាយទាំងអស់គ្មានសិទ្ធិយករូបកូនទៅបង្ហោះ ឬប្រើប្រាស់ទៅលើអ្វីផ្សេងឡើយ ។

លើសពីនេះ ប្រទេសបារាំងមានគោលដៅចម្បងក្នុងការការពារកុមារ ដើម្បីមិនឱ្យឪពុកម្តាយបង្ហាញព័ត៌មានផ្ទាល់ខ្លួនពីកូនៗច្រើនពេកតាមអ៊ីនធើរណេត និងគ្មានការដាក់កំណត់ក្នុងការបង្ហោះរូបភាព ។ ឪពុកម្តាយត្រូវតែទទួលខុសត្រូវរួមគ្នាលើសិទ្ធិរបស់កុមារ និងការបង្ហោះរូបភាពតាមអនឡាញ គឺត្រូវមានការយល់ព្រមពីកូនៗជាមុនសិន ។

លោក Bruno Studer សមាជិកសភាតំណាងរាស្ត្របានផ្តល់សម្ភាសន៍ទៅកាន់កាសែត Le Monde របស់បារាំងថា ករណីកុមារម្នាក់មានអាយុ១៣ឆ្នាំ ហើយមានរូបភាពក្នុងអ៊ីនធើរណេតប្រមាណ១.៣០០រូប ដូច្នេះ រូបទាំងនេះអាចត្រូវគេយកទៅប្រើប្រាស់ក្នុងរឿងសិច ឬប្រើប្រាស់ក្នុងផ្លូវមិនល្អ ហើយចុងក្រោយ អាចធ្វើឱ្យក្មេងនេះត្រូវមិត្តភក្តិមើលងាយនៅសាលារៀន ។

បើតាមស្ថិតិបង្ហាញថា រូបភាពចំនួន៥០% ដែលគេយកទៅចុះផ្សាយក្នុងរូបភាពអាសអាភាសរបស់កុមារ (Child Pornography) គឺជនខិលខូចបានយករូបភាពក្មេងពីបណ្តាញសង្គម ដែលឪពុកម្តាយពួកគេបង្ហោះក្នុងអនឡាញ ។ ទោះយ៉ាងណា ច្បាប់ថ្មីនេះត្រូវឆ្លងកាត់ការយល់ស្របពីព្រឹទ្ធសភាបារាំង និងមានការចុះហត្ថលេខាពីប្រធានាធិបតីបារាំងដើម្បីដាក់ឱ្យអនុវត្តជាផ្លូវការ ៕ ប្រភព ៖ khaosod

វៀតណាម៖ នៅថ្ងៃទី ២៣ ខែមីនា មជ្ឈមណ្ឌលគ្រប់គ្រងជំងឺ (CDC) Ha Tinh បាននិយាយថា ៤៦ គ្រួសារដែលមានមនុស្ស ១២៦ នាក់បានបង្ហាញខ្លួនក្នុងពេលតែមួយជាមួយនឹងរោគសញ្ញានៃជំងឺ papules, រមាស់, សំណឹកស្បែកកាលពី ១០ ថ្ងៃមុន។ ដំបូងជំងឺ papules លេចឡើងនៅលើស្បែកបើកចំហដូចជាដៃនិងជើងបន្ទាប់មករីករាលដាលពាសពេញរាងកាយ។ គ្រួសារជាច្រើននាំគ្នាទៅពិនិត្យសុខភាពនៅឯមន្ទីពេទ្យ (CDC) Ha Tinh។

លោក Nguyen Huu Thanh នាយករង CDC Ha Tinh បាននិយាយថា លោកបានធ្វើរោគវិនិច្ឆ័យមនុស្សទាំងនេះថាមានចៃខាំ ដែលនេះគឺជាប៉ារ៉ាស៊ីតនៅលើឆ្មានិងឆ្កែ។ ពួកវាអាចរីករាលដាលក្នុងចំនួនធំដោយភ្ជាប់ទៅនឹងរាងកាយរបស់មនុស្ស។
លោក ថាញ់ បាននិយាយទៀតថា មនុស្សជាច្រើននៅតែទទួលរងការរមាស់ ដែលប៉ះពាល់ដល់សកម្មភាពប្រចាំថ្ងៃរបស់ពួកគេ ប៉ុន្តែមិនមានករណីធ្ងន់ធ្ងរដែលតម្រូវឱ្យចូលមន្ទីរពេទ្យនោះទេ។
តំណាង CDC ណែនាំឲ្យប្រជាពលរដ្ឋរក្សាភាពស្ងប់ស្ងាត់ សម្អាតផ្ទះ ភួយ គ្រែ សួនច្បារ ពាក់អាវដៃវែងជាប្រចាំ និងដេកក្រោមមុង។
នៅពេលរមាស់ ការអេះអាចធ្វើឱ្យខូចស្បែក ហើយអាចនឹងមានការឆ្លងបាក់តេរីជាច្រើនទៀត។ ដូច្នេះ ប្រជាពលរដ្ឋត្រូវលាងសម្អាតកន្លែងចៃខាំជាមួយសាប៊ូ និងទឹកក្តៅឧណ្ហៗ ហើយទៅមណ្ឌលសុខភាព ប្រសិនបើដំបៅធ្ងន់ធ្ងរ។ ប្រភព៖vnexpress

ប្រទេសចិន ៖ ពលរដ្ឋនៅក្រុងប៉េកាំងបានធ្លាក់ចុះជាលើកដំបូងគិតចាប់ពីឆ្នាំ២០០៣ ដោយសារប្រទេសចិនមានអត្រាកំណើតធ្លាក់ចុះ ហើយការចំណាយលើការរស់នៅប្រចាំថ្ងៃ និងថ្លៃសិក្សាកាន់តែខ្ពស់ រួមទាំងគោលនយោបាយមានកូនតែម្នាក់របស់រដ្ឋាភិបាលចិន ។ ប៉ុន្តែអត្រាការស្លាប់បានកើនលើសអត្រាកំណើតនៅឆ្នាំ២០២២ ។

តាមសេចក្តីរាយការណ៍ពីក្រុងប៉េកាំងថា អត្រាការស្លាប់របស់ពលរដ្ឋរស់នៅក្រុងប៉េកាំង បានកើនឡើង៥,៧២នាក់ក្នុងចំណោមពលរដ្ឋ១.០០០នាក់ ខណៈអត្រាកំណើតធ្លាក់ចុះសល់ត្រឹមតែ៥,៦៧នាក់ក្នុងចំណោមពលរដ្ឋ១.០០០នាក់ ។

អ្នកប្រជាសាស្ត្រនិយាយថា អត្រាកំណើតធ្លាក់ចុះនេះស្របតាមគោលនយោបាយរបស់ប្រទេសចិន វាបង្ហាញពីកត្តាសេដ្ឋកិច្ច និងសង្គម ដែលបានគាំទ្រអត្រាកំណើតធ្លាក់ចុះនៅចិន ។ មានសេចក្តីរាយការណ៍ថា រដ្ឋាភិបាលគណបក្សកុម្មុយនិស្តចិនកំពុងព្យាយាមយ៉ាងខ្លាំងដើម្បីបញ្ច្រាសគោលនយោបាយមានកូនតែម្នាក់ ព្រមទាំងការពារផលប៉ះពាល់ផ្នែកសេដ្ឋកិច្ចដោយសារចំនួនមនុស្សចាស់កើនឡើងផងដែរ ។

តាមទិន្នន័យផ្លូវការកាលពីឆ្នាំ២០២២ បង្ហាញថា អត្រាកំណើតពលរដ្ឋចិនបានធ្លាក់ចុះនៅសល់ត្រឹមតែ៦,៧៧នាក់ក្នុងចំណោមពលរដ្ឋ១.០០០នាក់ ដែលវាជាចំនួនទាបបំផុតក្នុងប្រវត្តិសាស្ត្រ ។ ចំនួនពលរដ្ឋក្រុងប៉េកាំង គឺគិតតែអ្នករស់នៅក្នុងទីក្រុងនេះប៉ុណ្ណោះ ដោយគេមិនរាប់បញ្ចូលចំនួនពលករបរទេសជាច្រើននាក់ដែលបានមកធ្វើការក្នុងទីក្រុងនេះទេ ។

អស់រយៈពេលជាច្រើនទសវត្សរ៍មកហើយដែលគោលនយោបាយកូនតែម្នាក់របស់ចិនត្រូវបានបង្ខំឱ្យអនុវត្តយ៉ាងតឹងរ៉ឹង ហើយចិនទើបតែលុបចោលគោលនយោបាយនេះនៅឆ្នាំ២០១៦ ។ បន្ទាប់មក រដ្ឋាភិបាលចិនបានគាំទ្រឱ្យគ្រួសារនីមួយៗអាចមានកូនលើសពីម្នាក់ ប៉ុន្តែពលរដ្ឋចិនសម្រេចចិត្តមិនធ្វើតាមគោលនយោបាយថ្មីនេះទេ ដោយសារពួកគេលើកហេតុផលថា ការចំណាយលើការរស់នៅប្រចាំថ្ងៃខ្ពស់ សម្ពាធផ្នែកយេនឌ័រ តួនាទី និងវប្បធម៌ការងារ ធ្វើឱ្យពួកគេមិនចង់មានកូនច្រើន ៕ ប្រភព ៖ TNN World

ប្រទេសថៃ ៖ ឧតុនិយមបានរាយការណ៍ថា បច្ចុប្បន្ន ថៃ និងប្រទេសនានានៅជាប់ថៃ មានអាកាសធាតុក្តៅខ្លាំងរហូតដល់៤០អង្សារសេ ។ ដូច្នេះ ដោយសារអាកាសធាតុក្តៅខ្លាំងអាចធ្វើឱ្យអ្នកដែលធ្វើការក្រោមកំដៅថ្ងៃ ប្រឈមនឹងកើតជំងឺដាច់សរសៃឈាមខួរក្បាល (Heat stroke) ។ ជំងឺនេះបណ្តាលមកពីរាងកាយមិនអាចសម្របខ្លួនបានជាមួយអាកាសធាតុក្តៅ ឬរាងកាយមិនអាចគ្រប់គ្រងភាពក្តៅបាន ដែលធ្វើឱ្យរាងកាយមានសីតុណ្ហភាពកាន់តែខ្ពស់រហូតដល់៤០អង្សារសេ ។

បើរាងកាយមិនអាចគ្រប់គ្រងកំដៅបានទេ វាបណ្តាលឱ្យយើងក្តៅខ្លួន ងងិតមុខ រសាប់រសល់ ដកដង្ហើមញាប់ បេះដូងលោតខុសចង្វាក់ រហូតដល់លែងដឹងខ្លួនតែម្តង ។ ហើយបើយើងមិនទទួលបានព្យាបាលភ្លាមៗទេនោះ វាធ្វើឱ្យស្លាប់ ។

លោកវេជ្ជបណ្ឌិត Taweechai Witsanuyothin ប្រធានការិយាល័យបង្ការ និងគ្រប់គ្រងជំងឺនៅខេត្តនគររាជសីមា បានថ្លែងថា អាកាសធាតុក្តៅខ្លាំងអាចធ្វើឱ្យមនុស្សកើតជំងឺដាច់សរសៃឈាមខួរក្បាល ជាពិសេស អ្នកធ្វើការក្រោមកំដៅថ្ងៃ និងអ្នកលេងកីឡា ។ លើសពីនេះ អ្នកប្រឈមនឹងជំងឺដាច់សរសៃឈាមខួរក្បាល មានដូចជា កសិករ កម្មករសំណង់ ក្មេងអាយុក្រោម៥ឆ្នាំ មនុស្សចាស់ អ្នកមានជំងឺប្រចាំកាយដូចជា ជំងឺបេះដូង ជំងឺលើសឈាម អ្នកធាត់ និងអ្នកសម្រាកមិនគ្រប់គ្រាន់ជាដើម ។

លោកវេជ្ជបណ្ឌិតបន្តថា អ្នកផឹកភេសជ្ជៈមានជាតិអាល់កុលច្រើន គឺនឹងធ្វើឱ្យសរសៃឈាមតូចៗនៅក្រោមស្បែកពង្រីកខ្លួនកាន់តែច្រើន ហើយធ្វើឱ្យរាងកាយខ្វះជាតិទឹក និងមានជាតិរ៉ែខ្ពស់ជាងអ្នកមិនបានផឹកភេសជ្ជៈជាតិអាល់កុល ។ ហេតុនេះ នៅពេលអាកាសធាតុក្តៅខ្លាំង ជាតិអាល់កុលនឹងត្រូវបានស្រូបចូលទៅក្នុងសរសៃឈាមយ៉ាងឆាប់រហ័ស ហើយវានឹងធ្វើឱ្យបេះដូងញោតញាប់ខ្លាំង សម្ពាធឈាមកើនឡើង រួចវាអាចបណ្តាលឱ្យគ្រោះថ្នាក់រហូតដល់ស្លាប់ ។

លោកវេជ្ជបណ្ឌិតបានណែនាំទៅកាន់ពលរដ្ឋឱ្យថែទាំសុខភាពរបស់ខ្លួនដូចជា ៖
១-ស្លៀកសម្លៀកបំពាក់ពណ៌ស្រាល ព្រោះវាអាចបញ្ចេញជាតិក្តៅបានល្អ
២-ត្រូវនៅកន្លែងណាមានខ្យល់ចេញ-ចូលល្អ
៣-ចៀសវាងធ្វើសកម្មភាពណាមួយដែលត្រូវបញ្ចេញកម្លាំងនៅកណ្តាលថ្ងៃរយៈពេលយូរ
៤-ពាក់វ៉ែនតាការពារកម្តៅថ្ងៃ បាំងឆ័ត្រ និងពាក់មួកធំៗ
៥-ញ៉ាំទឹកឱ្យបានច្រើនជាងពេលធម្មតា ដើម្បីជំនួសឱ្យការខ្វះខាតទឹកក្នុងរាងកាយ
៦-មិនផឹកភេសជ្ជៈមានជាតិអាល់កុលគ្រប់ប្រភេទ
៧-កុំទុកក្មេងតូច មនុស្សចាស់ ឬសត្វចិញ្ចឹមនៅក្នុងរថយន្តដែលចតក្រោមកម្តៅថ្ងៃ ព្រោះសីតុណ្ហភាពនៅក្នុងរថយន្តនឹងខ្ពស់ជាងខាងក្រៅ ។ រីឯអ្នកហាត់ប្រាណ គួរតែហាត់នៅពេលព្រឹក ឬពេលរសៀល ។

លោកវេជ្ជបណ្ឌិតបញ្ជាក់ថា ការសង្គ្រោះបន្ទាន់សម្រាប់អ្នកជំងឺដោយសារអាកាសក្តៅមានដូចជា ៖
១-នាំអ្នកជំងឺចូលក្នុងម្លប់ ហើយឱ្យគេគេង ដោយលើកជើងទាំងពីរឡើងលើ និងដោះសម្លៀកបំពាក់ខាងក្រៅចេញ
២-ចាក់ទឹកត្រជាក់ស្រោចពីលើខ្លួនអ្នកជំងឺ ដើម្បីឱ្យសីតុណ្ហភាពក្តៅក្នុងរាងកាយឆាប់ធ្លាក់ចុះ
៣-យកក្រណាត់ទៅជ្រលក់ទឹក ឬក្រណាត់ត្រាំជាមួយទឹកកកមកដាក់លើករ ក្លៀក និងក្រលៀន
៤-មិនគួរប្រើក្រណាត់សើមគ្របលើខ្លួនអ្នកជំងឺទេ ព្រោះវានឹងស្រូបជាតិទឹកចេញពីរាងកាយ
៥-ប្រញាប់បញ្ជូនអ្នកជំងឺទៅកាន់មន្ទីរពេទ្យនៅជិតបំផុត ៕ ប្រភព ៖ khaosod