ប្រទេសស៊ុយអែត ៖ នៅទីក្រុង Malmo ស្ថិតនៅភាគខាងត្បូងរបស់ប្រទេសស៊ុយអែត មានភោជនីយដ្ឋានមួយឈ្មោះ «Spill» ដែលមានអត្ថន័យជាភាសារបស់ស៊ុយអែតថា «កាកសំណល់» ។ ហាងនេះបានតាំងចិត្តលក់ម្ហូបអាហារទៅឱ្យអតិថិជនរបស់ពួកគេ ដែលធ្វើពីកាកសំណល់បន្លែផ្លែឈើ ហើយហាងបានដើរប្រមូលទិញបន្លែដែលគេប្រុងបោះចោល ដូចជា បន្លែជិតដល់ថ្ងៃផុតកំណត់ និងផ្លែឈើមើលទៅមិនស្រស់ ដែលតូបលក់បន្លែនានាត្រៀមយកចេញពីកន្លែងលក់ ។ ប៉ុន្តែចំណុចសំខាន់ គឺបន្លែ និងផ្លែឈើទាំងនេះនៅអាចបរិភោគបាន និងមិនធ្វើឱ្យប៉ះពាល់ដល់សុខភាពអ្នកបរិភោគ ។

ភោជនីយដ្ឋាន Spill បានបើកបម្រើអតិថិជនតាំងពីឆ្នាំ២០១៨ មកម៉្លេះ ហើយនៅពេលបច្ចុប្បន្ន មានអតិថិជនជាច្រើននាក់បានគាំទ្រភោជនីយដ្ឋាននេះ ។ អតិថិជនដែលមកបរិភោគអាហារនៅភោជនីយដ្ឋាន Spill និយាយថា ពួកគេមានអារម្មណ៍ល្អ ដោយសារបានញ៉ាំអាហារជាមិត្តជាមួយបរិស្ថានកាន់តែច្រើន ព្រមទាំងជួយកាត់បន្ថយបញ្ហាសំរាមមកពីកាកសំណល់អាហារផងដែរ ។

ចំណែក Eurostat ជាភ្នាក់ងារស្ថិតិរបស់សហភាពអឺរ៉ុបបានប៉ាន់ស្មានថា ក្នុង១ឆ្នាំៗ នៅប្រទេសស៊ុយអែតនឹងមានសំរាមពីកាកសំណល់អាហារប្រមាណ៥៧លានតោន ឬស្មើ១២៧គីឡូក្រាមសម្រាប់ពលរដ្ឋស៊ុយអែតម្នាក់ ។

គួរបញ្ជាក់ថា «ម្ហូបបរិស្ថាន» គឺជាឈ្មោះម្ហូបនៅភោជនីយដ្ឋានមួយកន្លែងឈ្មោះ «Spill» នៅប្រទេសស៊ុយអែត ដែលក្រុមការងារ KBN News Cambodia បានដាក់ឈ្មោះឡើង ។ ភោជនីយដ្ឋាននេះបានជ្រើសយកបន្លែ និងផ្លែឈើជិតផុតកំណត់មកច្នៃធ្វើជាម្ហូបអាហារដ៏ឆ្ងាញ់ និងលក់ទៅឱ្យភ្ញៀវ ។ គំនិតច្នៃប្រឌិតនេះទទួលបានការគាំទ្រពីភ្ញៀវជាច្រើននៅប្រទេសស៊ុយអែត ខណៈពួកគេអាចបរិភោគអាហារឆ្ងាញ់ និងចូលរួមកាត់បន្ថយកាកសំណល់អាហារផងដែរ ៕ ប្រភព ៖ Tnn earth

រដ្ឋធានីកៀវ៖ ចាប់តាំងពីការផ្ទុះសង្គ្រាម កាលពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ថ្ងៃទី២៣ ខែមីនា ឆ្នាំ២០២៣ គឺមានរយៈពេល៣៩៣មកហើយ ខណៈការវាយប្រយុទ្ធគ្នា រវាងកងទ័ពរបស់អ៊ុយក្រែន និង កម្លាំងទាហានរុស្ស៊ី កំពុងតែបន្ដ រកពន្លឺចរចាសន្ដិភាព នៅមិនទាន់ឃើញ ហើយការបំផ្លិចបំផ្លាញ និង ការឆក់យកអាយុជីវិតមនុស្ស កំពុងតែបន្ដ ប៉ុន្ដែធនាគារពិភពលោក បានអះអាង ថា នៅក្នុងរយៈពេលជាង១០ឆ្នាំទៅមុខទៀត ប្រទេសអឺរ៉ុបមួយនេះ នឹងត្រូវការចំណាយថវិកា សាងសង់ប្រទេសឡើងវិញ រហូតដល់៤១១ពាន់លានដុល្លារអាមេរិក។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី២៣ ខែមីនា ឆ្នាំ២០២៣ ថា របាយការណ៍របស់ធនាគារពិភពលោក បានប៉ាន់ប្រមាណ ថា សង្គ្រាមនេះ នឹងធ្វើឲ្យអ៊ុយក្រែន ចំណាយថវិកា រហូតដល់៤១១ពាន់លានដុល្លារ សម្រាប់រយៈពេលជាង១០ឆ្នាំទៅមុខ ដើម្បីស្ដារ និង ស្ថាបនាប្រទេសឡើងវិញ ក្រោយការងើប ចេញពីសង្គ្រាមរបស់រុស្ស៊ី ជាមួយនឹងការចំណាយ លើការបោសសម្អាតកម្ទេចកម្ទី ពីទីក្រុងដែលបានរងនូវគ្រោះមហន្ដរាយ ហើយទីក្រុងនានា នឹងត្រូវចំណាយ រហូតដល់៥ពាន់លានដុល្លារ។

របាយការណ៍ដែលបានចេញផ្សាយ កាលពីថ្ងៃពុធ បានបញ្ជាក់ ថា ការប៉ាន់ប្រមាណ គួរតែត្រូវចាត់ទុក ជាអប្បបរមា ស្របពេលតម្រូវការ នឹងបន្តកើនឡើងជាដរាប ដោយសារសង្រ្គាម កំពុងតែបន្ត។ របាយការណ៍នេះ បានធ្វើឡើងរួមគ្នា ដោយរដ្ឋាភិបាលអ៊ុយក្រែន ធនាគារពិភពលោក គណៈកម្មការអឺរ៉ុប និង អង្គការសហប្រជាជាតិ។ ចំណែកការវាយតម្លៃ រហូតដល់៤១១ពាន់លានដុល្លារអាមេរិកនេះ បានបង្ហាញនូវការកត់សម្គាល់នូវការកើនឡើង អំពីការប៉ាន់ប្រមាណ នៅក្នុងរបាយការណ៍របស់ធនាគារពិភពលោក ត្រូវបានចេញផ្សាយ នៅក្នុងអំឡុងខែកញ្ញា ឆ្នាំ២០២២ មានចំនួន ៣៤៩ពាន់លានដុល្លារ។

របាយការណ៍ដដែលនោះ បានរៀបរាប់លម្អិត អំពីចំនួនខូចខាតផ្នែកសេដ្ឋកិច្ច និង មនុស្ស ដោយរាប់បញ្ចូល ទាំងផ្ទះសម្បែង ជិត២លានខ្នងត្រូវបានបំផ្លិចបំផ្លាញ ស្ថាប័នសុខភាពសាធារណៈជាច្រើនក៏ត្រូវបានរងការខូចខាត រថយន្តសង្គ្រោះចំនួន៦៥០គ្រឿង បានខូចខាត ឬ ត្រូវបានគេលួច ហើយជនស៊ីវិល យ៉ាងហោចណាស់ ចំនួន ៩ ៦៥៥នាក់ បានស្លាប់ ដោយរួមទាំងកុមារ ចំនួន៤៦១នាក់ផងដែរ។

លោកស្រី អានណា ប៊ីជើរដេ (Anna Bjerde) អនុប្រធាន ធនាគារពិភពលោក ប្រចាំតំបន់អឺរ៉ុប និង អាស៊ីកណ្ដាល បានបញ្ជាក់ កាលពីថ្ងៃពុធ ថា «ការស្ថាបនាប្រទេសឡើងវិញរបស់អ៊ុយក្រែន នឹងត្រូវចំណាយពេលវេលា ជាច្រើនឆ្នាំ»។

រហូតមកដល់ពេលនេះ របាយការណ៍ដដែលនោះ បានគណនា អំពីទំហំខូចខាត ដោយផ្ទាល់ ចំនួន១៣៥ពាន់លានដុល្លារ សម្រាប់សំណង់អគារ និង ហេដ្ឋារចនាសម្ព័ន្ធ នៅក្នុងប្រទេស ដោយមិនបានរាប់បញ្ចូលទាំងការដួលរលំសេដ្ឋកិច្ចទាំងមូល នៅក្នុងជម្លោះ បានអូសបន្លាយ អស់រយៈពេលជាងមួយឆ្នាំមកនេះឡើយ។ ប៉ុន្តែការខូចខាត អាចនឹងកាន់តែអាក្រក់ទៅៗ ប្រសិនបើមិនមានការការពារ ពីកងទ័ពអ៊ុយក្រែន ខិតខំរារាំងដល់ការបំផ្លិចបំផ្លាញយ៉ាងធ្ងន់ធ្ងរបំផុត នៅក្នុងសមរភូមិតំបន់ដូណែស្ក៍ (Donetsk), ខាគីវ (Kharkiv), លូហានស្ក៍ (Luhansk) និង ខឺរសុន (Kherson)។ នេះបើតាមលោកស្រី អនុប្រធាន ធនាគារពិភពលោក ប្រចាំតំបន់អឺរ៉ុប និង អាស៊ីកណ្ដាល បានថ្លែង នៅក្នុងការហៅតាមទូរស័ព្ទ ជាមួយនឹងក្រុមអ្នកសារព័ត៌មាន។

ការវាយតម្លៃនេះ រំពឹង ថា ក្រុងកៀវ នឹងត្រូវការថវិកា រហូតដល់១៤ពាន់លានដុល្លារ សម្រាប់ការកសាងឡើងវិញ សម្រាប់វិស័យសំខាន់ៗ និង មានអាទិភាព ព្រមទាំងការវិនិយោគ ទៅលើការស្តារឡើងវិញ សម្រាប់ត្រឹមតែនៅក្នុងឆ្នាំ២០២៣។ ជាមួយគ្នានេះ មូលនិធិរូបិយវត្ថុអន្តរជាតិ (IMF) បានអះអាង កាលពីថ្ងៃអង្គារ ថា IMF បានឈានដល់កិច្ចព្រមព្រៀងមួយ ជាកម្រិតបុគ្គលិក ជាមួយអ៊ុយក្រែន សម្រាប់កញ្ចប់ហិរញ្ញប្បទាន រយៈពេល៤ឆ្នាំ ដោយមានតម្លៃប្រហែល ១៥,៦ពាន់លានដុល្លារអាមេរិក។

ធនាគារពិភពលោក បានអះអាង កាលពីខែកុម្ភៈ ថា បើទោះជាមានការវាយលុកយ៉ាងខ្លាំងក្លាពីទាហានរុស្ស៊ី យ៉ាងណាក៏ដោយ ក៏អ៊ុយក្រែន នៅតែបន្តរក្សាសេវាសាធារណៈសំខាន់ៗ រួមទាំងការបើកសាលារៀន មន្ទីរពេទ្យ ការបើកប្រាក់បៀវត្សរ៍របស់គ្រូបង្រៀន និង មន្ត្រីរដ្ឋការ ព្រមទាំងប្រាក់សោធននិវត្តន៍ ផងដែរ។

លោកស្រី អានណា ប៊ីជើរដេ (Anna Bjerde) អនុប្រធាន ធនាគារពិភពលោក ប្រចាំតំបន់អឺរ៉ុប និង អាស៊ីកណ្ដាល បានសរសេរ នៅពេលនោះ ថា «ការគាំទ្រសេវាកម្មសំខាន់ៗ ទាំងនេះ នឹងនៅតែបន្ត ជាអាទិភាព ហើយអ៊ុយក្រែន ត្រូវការថវិកា ប្រហែល ៣-៤ ពាន់លានដុល្លារ នៅក្នុងរយៈពេលមួយខែ សម្រាប់ទ្រទ្រង់ដល់រដ្ឋាភិបាលក្រុងកៀវ»៕

សម្រាប់អ្នកដែលចូលចិត្តទៅលេងព្រៃគឺពួកគេគិតថាព្រៃគ្មានអ្វីគួរឱ្យខ្លាចនោះទេ ប៉ុន្តែបើអ្នកទៅលេងព្រៃចំកន្លែងទាំង៧នេះ ច្បាស់ណាស់គឺអ្នកនឹងមិនអាចត្រលប់មកផ្ទះវិញបានទៀតទេ។ ដូច្នេះហើយតើព្រៃណាខ្លះដែលជាប់ឈ្មោះជាព្រៃដ៏គ្រោះថ្នាក់បំផុតលើពិភពលោក? ខាងក្រោមនេះគឺជាព្រៃដ៏គ្រោះថ្នាក់បំផុតទាំង៧នៅលើពិភពលោក ដែលមានដូចជា៖

១.Amazon Rainforest៖ មានទីតាំងនៅតំបន់អាមេរិកខាងត្បូង ដែលនេះគឺជាព្រៃដ៏គ្រោះថ្នាក់បំផុតលើលោក ព្រៃនេះមានផ្ទៃដី៥,៥០០,០០០គីឡូម៉ែត្រក្រឡា ដែលស្ថិតនៅប្រទេសប្រេស៊ីល៦០% ប្រទេសប៉េរូ១៣% និងប្រទេសកូឡុំប៊ី១០% នៅក្នុងព្រៃនេះគឺសម្បូរទៅដោយសត្វមានពិសនិងសត្វដ៏កាចសាហាវជាច្រើនថែមទាំងមានរុក្ខជាតិស៊ីមនុស្សទៀតផង។

២.Aokigahara Forest៖ គឺជាព្រៃដ៏កាចសាហាវដែលមានទីតាំងស្ថិតនៅប្រទេសជប៉ុន មនុស្សដែលចូលព្រៃនេះភាគច្រើនសុទ្ធតែត្រូវបានបាត់បង់ជីវិត ព្រៃនេះត្រូវបានគេដាក់ឈ្មោះថាជាព្រៃអត្តឃាតឬព្រៃខ្មោច ព្រៃនេះត្រូវបានគ្រប់គ្រងទៅដោយព្រលឹងខ្មោចឬក៏ព្រលឹងនៃពិភពដទៃ បច្ចុប្បន្នព្រៃនេះបានត្រូវរដ្ឋាភិបាលជប៉ុនហាមឃាត់មិនឱ្យប្រជាជនជប៉ុនឬជនបរទេសណាឆ្លងកាត់ព្រៃនេះទេ។

៣.Congo Rainforest៖ ព្រៃនេះមានផ្ទៃដីយ៉ាងធំធេងដែលស្ថិតនៅសាធារណៈរដ្ឋកុងហ្គោ និងគ្របដណ្តប់ទៅដោយរុក្ខជាតិនិងសត្វដែលមានពិសកាចសាហាវជាច្រើន ហើយក៏ជាទីជម្រករបស់ពួកកុលសម្ព័ន្ធសាហាវៗដែលស៊ីសាច់មនុស្សជាអាហារផងដែរ។

៤.Dering Woods៖ គឺជាព្រៃដែលស្ថិតនៅប្រទេសអង់គ្លេស មនុស្សជាច្រើនបានដាក់ឈ្មោះព្រៃនេះថាព្រៃស្រែក នៅពេលមនុស្សចូលទៅក្នុងព្រៃនេះពួកគេតែងតែឮសំឡេងចម្លែកៗជាច្រើនដូចជាការស្រែកខ្លាំងៗឬក៏ទ្រហោយំជាដើម ក៏ប៉ុន្តែអ្នកស្រាវជ្រានៅមិនទាន់បានរកឃើញប្រភពនៃការស្រែកនេះឃើញទេ។

៥.Freetwon-Fall River State៖ គឺជាព្រៃដែលស្ថិតនៅប្រទេសសហរដ្ឋអាមេរិក មនុស្សភាគច្រើនបានដាក់ឈ្មោះព្រៃនេះថាព្រៃឃាតកម្មឬព្រៃជាប់បណ្តាសា ព្រោះគេបានប្រទះឃើញសាកសពក្មេងនិងមនុស្សចាស់ជាច្រើនបានស្លាប់យ៉ាងសាហាវព្រៃផ្សៃនៅទីនោះ។

៦.Maoists-Naxalites៖ ព្រៃនេះគឺសំបូរទៅដោយក្រុមចោរដ៏សាហាវ ពួកគេតែងតែប្លន់និងសម្លាប់មនុស្សជាច្រើននាក់ដែលបានមកដល់ព្រៃនេះ។

៧.Tsingy Forest៖ គឺជាព្រៃដែលមានផ្ទៃដី៦៦៦គីឡូមែត្រក្រឡា និងមានអាយុកាលជាង២០០លានឆ្នាំមកហើយ មនុស្សគ្រប់គ្នាតែងតែដាក់ឈ្មោះព្រៃនេះថាព្រៃកាំបិត ព្រោះព្រៃនេះបានគ្របដណ្តប់ទៅដោយរុក្ខជាតិមុតស្រួចយ៉ាងច្រើន ដែលអាចធ្វើឱ្យមនុស្សមានគ្រោះថ្នាក់ផងដែរ៕

ប្រទេសចិន ៖ ខេត្តហៃណាន គឺជាខេត្តមួយដែលបានដាំដុះផ្លែជម្ពូដ៏សំខាន់របស់ចិន ហើយក្រៅពីពូជជម្ពូដែលចិនបានដាំពីមុនដូចជា ពូជ Black King Kong, ពូជ Black Pearl និងពូជ Milk wax apple នោះ ផ្ទៃដីដាំដុះនៅតំបន់សាន់យ៉ា ខេត្តហៃណានបានទទួលជោគជ័យក្នុងការអភិវឌ្ឍពូជជម្ពូថ្មីមួយទៀតឈ្មោះថា ពូជ Nanlu លេខ១ ។ ពួកគេបានដាំជម្ពូ Nanlu និងទទួលបានទិន្នផលជាច្រើនកាលពីឆ្នាំ២០២២ កន្លងមក ។

ក្នុងរយៈពេល១០ថ្ងៃដំបូងរបស់ខែមីនា ឆ្នាំ២០២៣នេះ ប្រទេសចិនបាននាំចេញជម្ពូ Nanlu ទៅក្រៅប្រទេសជាលើកដំបូង និងបញ្ជូនទៅប្រទេសកាណាដាតាមផ្លូវអាកាស ។ បរិមាណការនាំចេញជម្ពូពីតំបន់សាន់យ៉ាក្នុងពេលបច្ចុប្បន្ន គឺស្មើនឹង១៥០ឡាំង/១សប្តាហ៍ ហើយមកដល់ខែមីនានេះ ចិនបាននាំចេញជម្ពូទៅទីផ្សារក្រៅប្រទេសចំនួន៣លើក ហើយចិននឹងនាំចេញជាបន្តបន្ទាប់រហូតដល់ខែកក្កដា ឆ្នាំ២០២៣ ជាពេលដែលជម្ពូឈប់ចេញផ្លែ ។

ជម្ពូរបស់ចិនពូជ Nanlu លេខ១ មានផ្លែធំៗ ដោយជម្ពូ១ផ្លែ មានទម្ងន់ប្រមាណ១៥០ក្រាម និងមានទំហំធំជាង២ដងនៃជម្ពូពូជ Black King Kong ។ ជម្ពូ Nanlu មានរសជាតិជូរអែម និងគ្មានរសជាតិចត់ទេ ។ វាមានសម្បកក្រាសជាងពូជ Black King Kong ដូច្នេះ ធ្វើឱ្យជម្ពូ Nanlu ងាយស្រួលប្រមូលផលទុកដាក់ ។ លើសពីនេះ វាមានប្រៀបក្នុងការប្រកួតប្រជែងលើទីផ្សារក្រៅប្រទេសផងដែរ ។

ផ្លែជម្ពូដែលដាក់លក់នៅលើទីផ្សារក្រៅប្រទេសភាគច្រើន គឺជាជម្ពូរបស់វៀតណាម ថៃ និងតៃវ៉ាន់ ។ បច្ចុប្បន្ន តម្លៃជម្ពូ Nanlu របស់ចិន ដែលលក់នៅប្រទេសកាណាដា គឺស្មើប្រមាណ៦០ដុល្លារអាមេរិក/១ប្រអប់ ដែលតម្លៃនេះខ្ពស់ជាងពូជជម្ពូផ្សេងៗរហូតដល់២០% ។ ម្យ៉ាងទៀត ដោយសារមានតម្រូវការជម្ពូលើទីផ្សារក្រៅប្រទេស ចិនបានពង្រីកការនាំចេញជម្ពូរបស់ខ្លួនទៅកាន់ទីក្រុងឌូបៃ ។

ចំណែកទីផ្សារក្នុងស្រុកវិញ ជម្ពូ Nanlu លេខ១ ទទួលបានការពេញនិយមពីអតិថិជនក្នុងរយៈពេលប៉ុន្មានឆ្នាំកន្លងមកនេះ ប៉ុន្តែបរិមាណដាំដុះតិចបានធ្វើឱ្យចិនខ្វះខាតជម្ពូលក់នៅលើទីផ្សារ ហើយតម្លៃវិញ ក៏ខ្ពស់ជាងជម្ពូផ្សេងៗដែរ ។ ប៉ុន្តែសម្រាប់ឆ្នាំ២០២៣នេះ ចិនបានបង្កើនផ្ទៃដីដាំដុះជម្ពូលើសមុន២ដង និងលក់បានថ្លៃជាងឆ្នាំ២០២២ បន្តិច ។ រីឯរដូវប្រមូលផលជម្ពូ Nanlu គឺចាប់ពីខែមីនា រហូតដល់ខែកក្កដា ។

បើតាមសេចក្តីរាយការណ៍ថា ខេត្តហៃណានបានដាំផ្លែឈើផ្សេងទៀតដូចជា ម្នាស់ពណ៌មាស ចេក និងផ្លែគូលែន ។ ក្រៅពីនេះ គឺផ្លែមៀន និងស្វាយពូជ Kui Fei ដែលចិនកំពុងបង្កើនការនាំចេញទៅកាន់ទីផ្សារក្រៅប្រទេសដូចគ្នា ៕ ប្រភព ៖ The durian times

រដ្ឋធានីកៀវ៖ ក្រោយពេលលោក ពូទីន បានទៅកាន់តំបន់វាយដណ្ដើមកាន់កាប់របស់ទាហានរុស្ស៊ី នៅទីក្រុងម៉ារីយ៉ូប៉ូល (Mariupol) មិនបានប៉ុន្មានថ្ងៃផង ប្រធានាធិបតីអ៊ុយក្រែន លោក ហ្សេឡែនស្គី បានទៅសួរសុខទុក្ខ និង លើកទឹកចិត្តដល់កងកម្លាំងរបស់ខ្លួន នៅសមរភូមិក្ដៅ ដែលកំពុងតែវាយប្រយុទ្ធ រវាងកងទ័ពក្រុងកៀវ និង ក្រុងមូស្គូ។

សារព័ត៌មាន CNA បានចេញផ្សាយ កាលពីព្រឹក ថ្ងៃព្រហស្បតិ៍ ទី២៣ ខែមីនា ឆ្នាំ២០២៣ ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានអះអាង កាលពីថ្ងៃពុធ (ទី២២ ខែមីនា) ថា គាត់បានទៅធ្វើដំណើរទៅសួរសុខទុក្ខ និង លើកទឹកចិត្ដដល់កងទ័ព នៅលើទីតាំងឈរជើង នៅជិតសមរភូមិទីក្រុងបាកមូត (Bakhmut) នាភាគខាងកើត ប្រទេសអ៊ុយក្រែន ខណៈកម្លាំងទាហានរុស្ស៊ី កំពុងតែវាយប្រហារយ៉ាងខ្លាំង ទៅលើសំណង់អគារ ហើយបានបង្កឲ្យមានមនុស្ស រងរបួសជាច្រើននាក់។

លោកប្រធានាធិបតី ហ្សេឡែនស៊ី បានទទួលស្គាល់ នៅក្នុងអំឡុងពេលទៅសួរសុខទុក្ខ និងលើកទឹកចិត្ដដល់កងទ័ព នៅលើសមរភូមិ ជិតទីក្រុងបាកមូត ដែលជាសមរភូមិដ៏វែងបំផុត និង ជាសមរភូមិជាវាយប្រយុទ្ធគ្នាយ៉ាងបង្ហូឈាម ជាមួយរុស្ស៊ី ថា «កងទ័ពការពារទឹកដីរបស់អ៊ុយក្រែន កំពុងតែតស៊ូពុះពារយ៉ាងលំបាកបំផុត។ ដូច្នេះខ្ញុំមានកិត្តិយសខ្លាំងណាស់ បានមកកាន់ទីនេះ នៅថ្ងៃនេះ ដើម្បីផ្តល់រង្វាន់ ជូនដល់វីរបុរសរបស់យើង។ ខ្ញុំបានចាប់ដៃ និង អរគុណពួកគាត់ សម្រាប់ការការពារអធិបតេយ្យភាព នៃប្រទេសជាតិរបស់យើង»។

កម្លាំងអ៊ុយក្រែន និង ទាហានរុស្ស៊ី បានចំណាយកម្លាំងទាហានយ៉ាងធ្ងន់ធ្ងរបំផុត នៅលើសមរភូមិបាកមូត បើទោះជាក្រុមអ្នកវិភាគ បានអះអាង ថា ទីក្រុងមួយនេះ មានតម្លៃ សម្រាប់យុទ្ធសាស្ត្រតិចតួចយ៉ាងណាក៏ដោយ។ ទីក្រុងបាកមូត មានប្រជាជន ប្រហែល ៨០ ០០០នាក់ រស់នៅមុនពេលសង្គ្រាមផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២។ ប៉ុន្ដែឥឡូវនេះ មានប្រជាជនតិចតួចណាស់ នៅតែបន្ដរស់នៅ។

ដោយឡែក រដ្ឋាភិបាលក្រុងកៀវ បានអះអាង ថា ការវាយប្រយុទ្ធគ្នា សម្រាប់ទីក្រុងឧស្សាហកម្មមួយនេះ មានសារៈសំខាន់យ៉ាងខ្លាំង ត្រូវតែបណ្ដេញទាហានរុស្ស៊ី ចេញពីសមរភូមិទាំងអស់ នៅតំបន់ភាគខាងកើត។

ជាមួយការវាយប្រយុទ្ធគ្នាយ៉ាងក្រាញននៀលរៀងៗខ្លួន រវាងកងទ័ពរបស់អ៊ុយក្រែន និង ទាហានរបស់រុស្ស៊ី កំពុងតែបន្ដ នៅតំបន់ភាគខាងកើត ប្រទេសនោះ តុលាការឧក្រិដ្ឋកម្មអន្ដរជាតិ (ICC) បានចេញដីកាចាប់ខ្លួនប្រធានាធិបតី វ្ល៉ាឌីមៀ ពូទីន ពីបទឧក្រិដ្ឋកម្មសង្គ្រាម។ បើទោះជាយ៉ាងណាក៏ដោយ ICC មិនមានកម្លាំង សម្រាប់ចុះទៅចាប់លោក ពូទីន នោះដែរ ហើយការអនុវត្ដដីកានេះ លុះត្រាតែមានកិច្ចសហប្រតិបត្ដិការជាអន្ដរជាតិ មកពីបណ្ដាប្រទេសជាសមាជិក។

ការធ្វើដំណើរទៅលើកទឹកចិត្តដល់កងទ័ពរបស់លោក ហ្សេឡែនស្គី បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពេលលោក វ៉្លាឌីមៀ ពូទីន ប្រធានាធិបតីរុស្ស៊ី បានទៅកាន់ទីក្រុងម៉ារីយ៉ូប៉ូល ដែលទាហានរបស់ក្រុងមូស្គូ បានដណ្ដើមកាន់កាប់ ពីអ៊ុយក្រែន កាលពីអំឡុងខែឧសភា ឆ្នាំ២០២២៕

ប្រទេសរុស្ស៊ី ៖ ចាប់ពីថ្ងៃទី២០ ដល់ថ្ងៃទី២២ ខែមីនា កន្លងមក ប្រធានាធិបតីប្រទេសចិន លោក ស៊ី ជិនពីង បានធ្វើដំណើរមកកាន់ប្រទេសរុស្ស៊ីជាផ្លូវការ ដោយបានជួបពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ។ គេចាត់ទុកថា នេះជាការជួបគ្នាលើកដំបូងរបស់មេដឹកនាំប្រទេសទាំងពីររូបក្នុងរយៈពេល៤ឆ្នាំ ចាប់តាំងពីកើតសង្គ្រាមនៅប្រទេសអ៊ុយក្រែន ។

សង្គ្រាមនៅអ៊ុយក្រែនបានអូសបន្លាយអស់រយៈពេលជាង១ឆ្នាំ ដែលបានធ្វើឱ្យមានភាពចលាចលក្នុងទីផ្សារថាមពលលើពិភពលោក និងធ្វើឱ្យប្រទេសចិនក្លាយជាអតិថិជនសំខាន់មួយដែលបានជួយទិញប្រេង ឧស្ម័នធម្មជាតិ និងធ្យូងថ្មរបស់រុស្ស៊ី ហើយការទិញផលិតផលពីរុស្ស៊ីបានកើនឡើងយ៉ាងឆាប់រហ័ស ។

សារព័ត៌មាន Bloomberg រាយការណ៍ថា យោងតាមទិន្នន័យរបស់នាយកដ្ឋានគយប្រទេសចិនថា ចិនបាននាំចូលប្រេងឆៅ, ផលិតផលថាមពល, ធ្យូងថ្ម និងឧស្ម័នធម្មជាតិ ស្មើនឹងទឹកប្រាក់៨៨.០០០លានដុល្លារអាមេរិក គិតចាប់តាំងពីកើតសង្គ្រាមនៅអ៊ុយក្រែន រហូតដល់ចុងខែកុម្ភៈ ឆ្នាំ២០២៣ នេះ ។

នាយកដ្ឋានគយប្រទេសចិនបន្តថា ចិនបានជួយទិញផលិតផលនានាពីរុស្ស៊ីកើនឡើងរហូតដល់៣ដង បើធៀបនឹងកាលពីឆ្នាំ២០២២ កន្លងមក ដែលចិនធ្លាប់បានទិញផលិតផលថាមពលពីរុស្ស៊ី ស្មើទឹកប្រាក់ត្រឹមតែ៥៧.០០០លានដុល្លារអាមេរិក ។ ចំពោះព័ត៌មានថា ចិនជាអតិថិជនសំខាន់មួយរបស់រុស្ស៊ីនេះ គឺបានចុះផ្សាយមុនពេលប្រធានាធិបតីចិន លោក ស៊ី ជិនពីង ធ្វើដំណើរមកកាន់ប្រទេសរុស្ស៊ីជាផ្លូវការ ។

ចិនជាប្រទេសមួយដែលបានផ្តល់ហិរញ្ញវត្ថុដល់រុស្ស៊ី តាមរយៈការជួយទិញប្រេង ឧស្ម័នធម្មជាតិ និងថាមពលនានា ដើម្បីឱ្យរុស្ស៊ីមានប្រភពចំណូលអាចធ្វើសង្គ្រាមជាមួយអ៊ុយក្រែនបន្តទៀត ហើយចិនក៏មិនចាប់អារម្មណ៍នឹងការដាក់ទណ្ឌកម្មលើរុស្ស៊ីពីបណ្តាប្រទេសផ្សេងដែរ ។ ប៉ុន្តែចិនប្រកាសថា ខ្លួនប្រកាន់ជំហរកណ្តាលចំពោះជម្លោះរវាងរុស្ស៊ី និងអ៊ុយក្រែន ។

គួរបញ្ជាក់ថា កាលពីឆ្នាំ២០២២ រុស្ស៊ីបានក្លាយជាប្រទេសផ្គត់ផ្គង់ប្រេងឆៅដ៏ធំបំផុតរបស់ចិន ជំនួសប្រទេសអារ៉ាប៊ីសាអូឌីត ។ លើសពីនេះ រុស្ស៊ីក៏ជាអ្នកលក់ធ្យូងថ្មទៅកាន់ទីផ្សារចិនស្ថិតក្នុងលំដាប់ទី២ បន្ទាប់ពីប្រទេសឥណ្ឌូណេស៊ី ហើយរុស្ស៊ីក៏បានលក់ឧស្ម័នធម្មជាតិរាវទៅកាន់ចិនផងដែរ បន្ទាប់ពីប្រទេសអូស្ត្រាលី និងកាតា ៕ ប្រភព ៖ The better