ប្រទេសចិន ៖ «ក្នុងជីវិតនេះកើតមកសម្រាប់តែឆ្មា កូនស្រីខ្ញុំអាយុ៣៨ឆ្នាំហើយ ប៉ុន្តែនាងមិនព្រមរកសង្សារ និងរកការងារទេ មួយថ្ងៃៗគិតតែពីចិញ្ចឹមឆ្មា ។ លើសពីនេះ នាងបានយកឆ្មាគ្មានម្ចាស់ចំនួន៦ក្បាលទៀតមកចិញ្ចឹមទៀតផង» ។ នេះបើតាមការរៀបរាប់របស់ស្ត្រីម្នាក់តាមទូរទស្សន៍ ដើម្បីឱ្យគេជួយកូនស្រីរបស់គាត់ ។

កាលពីពេលថ្មីៗនេះ មានស្ត្រីម្នាក់អាយុ៧០ឆ្នាំ បានបង្ហាញខ្លួនក្នុងស្ថានីយទូរទស្សន៍ Chongqing ប្រទេសចិន ហើយគាត់បានរៀបរាប់ទាំងទឹកភ្នែកថា កូនស្រីរបស់គាត់បានបញ្ចប់ការសិក្សាពីសាកលវិទ្យាល័យនាំមុខគេមួយ ហើយក៏ធ្លាប់ធ្វើការនៅទីក្រុងប៉េកាំង និងសៀងហៃ កាលពីប៉ុន្មានឆ្នាំមុន ។ ប៉ុន្តែកូនស្រីបានលាឈប់ពីការងារ និងត្រឡប់មករស់នៅផ្ទះឯស្រុកកំណើតវិញ គឺក្នុងគោលបំណងចិញ្ចឹមឆ្មា ។

ស្ត្រីជាម្តាយរៀបរាប់ថា កូនស្រីរបស់គាត់គ្មានការងារធ្វើអស់រយៈពេល៦ឆ្នាំហើយ ហើយប្រើពេលភាគច្រើនរបស់នាងដើម្បីបង្ហោះវីដេអូពីឆ្មាចិញ្ចឹមក្នុងបណ្តាញសង្គម ។ កូនស្រីប្រាប់ថា នៅថ្ងៃណាមួយ នាងនឹងអាចរកប្រាក់ចំណូលពីវីដេអូទាំងនេះ និងអាចចិញ្ចឹមខ្លួនឯងនៅថ្ងៃអនាគតបាន ។ កន្លងមក ឪពុកម្តាយឈឺក្បាលខ្លាំងណាស់ ព្រោះកូនស្រីគិតតែពីចិញ្ចឹមឆ្មាតែម្យ៉ាង ហើយមិនព្រមរកសង្សារ និងរៀបការបែកផ្ទះសោះ ។ លើសពីនេះ នាងមិនព្រមរកការងារធ្វើទេ បើទោះជាពួកគាត់ព្យាយាមបញ្ចុះបញ្ចូលឱ្យនាងរកការងារធ្វើ និងរកសង្សារក៏ដោយ ប៉ុន្តែនាងបដិសេធ ដែលធ្វើឱ្យពួកគាត់ជាឪពុកម្តាយបារម្ភថា នៅថ្ងៃអនាគត នាងមិនអាចចិញ្ចឹមខ្លួនឯងបាន ព្រោះគិតតែនៅជាមួយឆ្មាបែបនេះ ។

ស្ត្រីជាម្តាយប្រាប់ថា ៖ «ខ្ញុំ និងប្តីបារម្ភយ៉ាងខ្លាំងរឿងកូន ហើយពួកយើងមិនអាចហូបឆ្អែត ឬគេងលក់ស្រួលទេ ។ យើងសង្ឃឹមថា កូនស្រីនឹងស្វែងរកការងារធ្វើ និងរកបុរសណាម្នាក់មករៀបការជាមួយដូចអ្នកដទៃដែរ ។ បើកូនស្រីព្រមរៀបការ យើងនឹងបានគេងលក់ស្រួលហើយ» ។

ម្តាយរូបនេះបន្ថែមថា បើទោះជាគាត់នៅជិតកូនស្រីក្តី ប៉ុន្តែគាត់មានអារម្មណ៍ថានៅឆ្ងាយពីនាង ព្រោះគាត់មិនយល់ពីការរស់នៅរបស់នាង ។ កន្លងមក គាត់បានយំដោយសាររឿងនេះជាញឹកញាប់ ដោយសារនាងមិនស្តាប់គាត់ ។ គាត់ប្រាប់ថា ៖ «កូនស្រីគាត់បានយកឆ្មាគ្មានម្ចាស់មកចិញ្ចឹម ហើយគាត់ និងប្តីត្រូវលាក់ទុកការឈឺចាប់នេះមិនហ៊ានប្រាប់គេឯង ព្រោះខ្មាស់គេ» ។

ទោះយ៉ាងណា កូនស្រីរបស់គាត់និយាយថា ៖ «ខ្ញុំធ្វើវីដេអូទាក់ទងនឹងសត្វចិញ្ចឹម បើទោះជាមិនទាន់ទទួលប្រាក់នៅពេលនេះ ប៉ុន្តែខ្ញុំជឿថា នៅថ្ងៃអនាគត ខ្ញុំនឹងអាចរកចំណូលបាន ហើយខ្ញុំមិនខ្វល់នឹងការនៅលីវទេ ។ មនុស្សចាស់មានការគិតខុសពីក្មេងជំនាន់ក្រោយ ហើយពួកគាត់មិនយល់ថា ហេតុអ្វីខ្ញុំត្រូវចិញ្ចឹមឆ្មាទេ» ៕

ប្រភព ៖ chiangmainews

ប្រទេសចិន ៖ ប៉ូលិសចិនបានចាប់ខ្លួនបុរសម្នាក់ពីបទចោទប្រកាន់ថា បុរសនេះប្រើប្រាស់កម្មវិធី ChatGPT ដើម្បីផ្សព្វផ្សាយព័ត៌មានក្លែងក្លាយក្នុងបណ្តាញសង្គម ។ ដូច្នេះ វាជាលើកដំបូងដែលប្រទេសចិនចាត់ការរឿងក្តីទាក់ទងនឹង AI Chatbot ដ៏ឆ្លាតវៃនេះ ។

ប៉ូលិសក្នុងតំបន់ Gansu រាយការណ៍ថា ជនសង្ស័យត្រូវបានចោទប្រកាន់ពីបទប្រើប្រាស់ ChatGPT ដើម្បីផ្សព្វផ្សាយព័ត៌មានក្លែងក្លាយពាក់ព័ន្ធនឹងរឿងរថភ្លើងបុកគ្នា ។ បុរសនេះបានបង្ហោះព័ត៌មានរថភ្លើងបុកគ្នាក្នុងបណ្តាញសង្គម ដើម្បីរកប្រាក់ចំណេញពីព័ត៌មាន ហើយអត្ថបទនេះមានអ្នកចូលមើលរហូតដល់១៥.០០០លើក ។ បើទោះជាចិនហាមឃាត់ការប្រើប្រាស់ ChatGPT ក្តី ប៉ុន្តែអ្នកប្រើប្រាស់អ៊ីនធើរណេតជាច្រើននៅចិនបានលួចប្រើប្រាស់កម្មវិធី VPN ដើម្បីចូលទៅលេង ChatGPT ។

សារព័ត៌មាន CNN រាយការណ៍ថា ហេតុការណ៍រថភ្លើងបុកគ្នា គឺជាប្រធានបទរសើបខ្លាំងនៅចិន ដោយសារនៅឆ្នាំ២០១១ ប្រទេសចិនធ្លាប់កើតហេតុការណ៍រថភ្លើងល្បឿនលឿនបុកគ្នានៅទីក្រុង Wenzhou ខេត្ត Zhejiang ដែលបណ្តាលឱ្យមនុស្សស្លាប់ចំនួន៤០នាក់ និងរងរបួសរាប់រយនាក់ទៀត ។ ដូច្នេះ ធ្វើឱ្យពលរដ្ឋចិនខឹងសម្បារជាខ្លាំង ហើយពួកគេត្រូវការចម្លើយថា ហេតុអ្វីបានជាសារព័ត៌មានរបស់រដ្ឋាភិបាលមិនចុះផ្សាយព័ត៌មាននេះឱ្យពលរដ្ឋបានដឹង ។

ប៉ូលិសនៅតំបន់ Gansu បន្ថែមថា បុរសនេះមាននាមត្រកូល ហុង ។ កាលពីថ្ងៃទី៥ ខែឧសភា កន្លងមក គេបានស៊ើបអង្កេតបុរសនេះនៅទីក្រុង Dongguan ស្ថិតនៅភាគខាងត្បូងខេត្តក្វាងទុង រកឃើញថា បុរសនេះបានប្រើបច្ចេកវិទ្យាខាងលើធ្វើព័ត៌មានក្លែងក្លាយ និងផ្សព្វផ្សាយលើអ៊ីនធើរណេត ហើយព័ត៌មានក្លែងក្លាយនេះបានផ្សព្វផ្សាយយ៉ាងទូលំទូលាយ ។ ឥរិយាបថរបស់ជនល្មើសចាត់ទុកថា មានទោសពីបទបះបោរ និងបង្កឱ្យកើតភាពរញ៉េរញ៉ៃក្នុងសង្គម ។

របាយការណ៍បញ្ជាក់ថា ការចាប់ខ្លួនបុរសហុង គឺជាករណីដំបូងនៅតំបន់ Gansu ក្រោយពីខែមករា ឆ្នាំ២០២៣ ការិយាល័យគ្រប់គ្រងអ៊ីនធើរណេតរបស់ចិនបានប្រកាសអនុវត្តច្បាប់ថ្មី ដើម្បីកុំឱ្យមានការប្រើប្រាស់ AI បន្លំព័ត៌មានតាមរយៈវីដេអូ, រូបភាព ឬសំឡេង ។ សារព័ត៌មាន CGTN របស់រដ្ឋាភិបាលចិនរាយការណ៍ថា វាជាលើកដំបូងដែលចិនបានចាប់ខ្លួនជនល្មើសប្រើប្រាស់ ChatGPT ដើម្បីផ្សព្វផ្សាយព័ត៌មានក្លែងក្លាយ ៕

ប្រភព ៖ Thestandard

ប្រទេសកម្ពុជា ៖ សារព័ត៌មានប្រទេសថៃមួយឈ្មោះ Main Stand បានចុះផ្សាយថា ក្រុមអ្នកស្ម័គ្រចិត្តការងារស៊ីហ្គេមកម្ពុជាបានផ្តល់បាយប្រអប់ និងទឹកដល់ក្រុមការងារ Main Stand ក្រោយពីឃើញថា ពួកគេបានយកបាយមកបរិភោគនៅសង្វៀនប្រដាល់អន្តរជាតិ ប៉ុន្តែមិនអាចយកបាយនេះទៅបរិភោគនៅខាងក្នុងបាន ។

សារព័ត៌មានថៃឈ្មោះ Main Stand សរសេរថា កាលពីថ្ងៃទី៩ ខែឧសភា កន្លងមក ក្រុមការងារ Main Stand បានធ្វើដំណើរទៅយកព័ត៌មាននៅសង្វៀនប្រដាល់អន្តរជាតិ Chroy Changvar Convention Center ។ នៅពេលក្រុមការងារ Main Stand ដើរមកដល់កន្លែងពិនិត្យកាបូប ពេលនោះ ក្រុមសន្តិសុខប្រាប់ថា មិនអាចយកបាយដែលពួកយើងនាំមកចូលទៅខាងក្នុងបានទេ ។ យើងយល់ ព្រោះវាជាវិន័យរបស់កន្លែងប្រកួត ដូច្នេះ យើងក៏ទុកបាយនេះនៅខាងមុខទ្វារចូល រួចយើងក៏ដើរចូលទៅខាងក្នុងតាមធម្មតា និងគិតថា ពេលធ្វើការរួច យើងនឹងមកអង្គុយញ៉ាំបាយនៅខាងក្រៅកន្លែងប្រកួត ។

សារព័ត៌មានថៃឈ្មោះ Main Stand បន្តថា ២០នាទីក្រោយមក បុរស២នាក់ជាអ្នកស្ម័គ្រចិត្តការងារស៊ីហ្គេមកម្ពុជាបានយកបាយប្រអប់ និងទឹកមកឱ្យពួកយើង ហើយប្រាប់ថា អាចអង្គុយទទួលទានបាយនៅខាងមុខច្រកចូលបាន ព្រោះឃើញថា ពួកយើងកាន់បាយមកតែ២ប្រអប់ ប៉ុន្តែក្រុមការងារមានគ្នា៣នាក់ ព្រោះខ្លាចពួកយើងអត់ឆ្អែត ។ នៅពេលយើងបើកប្រអប់បាយមើលឃើញថា ជាម្ហូបដ៏ឆ្ងាញ់ មើលទៅស្រដៀងនឹងឆាជូរអែមដាក់ឆ្អឹងជំនីរជ្រូករបស់ថៃដែរ ហើយរសជាតិវិញ ក៏ស្រដៀងគ្នា ។

សារព័ត៌មានថៃឈ្មោះ Main Stand បន្តទៀតថា យើងបានអរគុណដល់ក្រុមអ្នកស្ម័គ្រចិត្តការងារស៊ីហ្គេមកម្ពុជា ហើយក៏បានសុំពួកគេថតរូប ហើយអ្វីដែលធ្វើឱ្យយើងកាន់តែរីករាយថែមទៀតនោះ គឺបុរសជនជាតិខ្មែរទាំងពីររូបនេះញញឹមគ្រប់ពេល ខណៈយើងសាកសួរព័ត៌មានផ្សេងៗ ។

សារព័ត៌មាននេះចុះផ្សាយបន្ថែមថា មនុស្សម្នាដែលយើងបានជួប ជាទូទៅ ពួកគេគួរឱ្យស្រឡាញ់ មានទឹកចិត្ត បើទោះជាមនុស្សមួយចំនួនមិនចេះនិយាយភាសាអង់គ្លេសក្តី ប៉ុន្តែពួកគេព្យាយាមទំនាក់ទំនងជាមួយយើងយ៉ាងពេញចិត្ត ។ ចំណុចសំខាន់ នៅពេលយើងប្រាប់ថា យើងមកពីប្រទេសថៃ ពួកគេនឹងនិយាយពាក្យថា សាវ៉ាត់ឌីខះ/ក្រាប់ រួចញញឹមដាក់យើង ។

ជាចុងក្រោយ សារព័ត៌មាននេះសរសេរថា បើក្រុមអ្នកស្ម័គ្រចិត្តការងារស៊ីហ្គេមកម្ពុជា ឬពលរដ្ឋកម្ពុជាបានឃើញការចុះផ្សាយព័ត៌មាននេះក្នុងទំព័រហ្វេសប៊ុក គឺក្រុមការងារ Main Stand សូមអរគុណម្តងទៀតសម្រាប់មិត្តភាពដែលពលរដ្ឋខ្មែរមានចំពោះថៃ ៕ ប្រភព ៖ Main Stand

លោកប៊ូខាវ ឬក៏គេទទួលស្គាល់ថាជាស្តេចប្រដាល់ថៃនោះ នឹងធ្វើដំណើរមកដល់ទឹកដីកម្ពុជានារសៀលនេះ ក្ក្នុងនាមលោកជាគណៈប្រតិភូមួយរូបដែលថៃបញ្ជូនមក និងជាអ្នកដឹកនាំអត្តពលិកថៃលើវិញ្ញាសា Kick Boxing។

តាមពិតទៅ ប្រសិនបើមិនមានភាពចម្រូងចម្រាស់រវាងគុនខ្មែរ និង Muay Thai នោះទេ លោកប៊ូខាវ នឹងធ្វើជាមន្ត្រីដឹកនាំកីឡាករប្រដាល់ថៃមកចូលរួមព្រឹត្តិការណ៍សុីហ្គេមនេះ តែដោយហេតុថាថៃមិនបានបញ្ចូនអត្តពលិកលើវិញ្ញាប្រដាល់នេះ ដូច្នេះលោកក៏ធ្វើជាគណៈប្រតិភូរបស់ថៃជំនួសវិញ។

ប្រទេសថៃ ៖ តំបន់ជាច្រើននៅខេត្តនគរាជសីម៉ា ប្រទេសថៃ មានភ្លៀងធ្លាក់ញឹកញាប់ដោយសារឥទ្ធិពលព្យុះរដូវក្តៅ ហើយធ្វើឱ្យមានទឹកលិចនៅតាមវាលស្រែ ។ ទឹកលិចក្នុងស្រែនេះ គឺជាឱកាសល្អសម្រាប់កសិករក្នុងការភ្ជួររាស់ដីត្រៀមធ្វើស្រែក្នុងរដូវភ្លៀងខាងមុខនេះ ។ លើសពីនេះ អ្នកភូមិបានបង្ហាញក្តីរីករាយដោយសារទទួលបានប្រាក់ចំណូលពីការលក់ក្តាមស្រែទៀតផង ។

លោកតា Koon Paphochanang អាយុ៧២ឆ្នាំ ជាកសិករម្នាក់រស់នៅក្នុងស្រុកណូនស៊ូង ខេត្តនគរាជសីម៉ា ប្រាប់ថា ដោយសារប្រទេសថៃទទួលរងនូវខ្យល់ព្យុះរដូវក្តៅ ទើបធ្វើឱ្យមានភ្លៀងធ្លាក់ញឹកញាប់នៅពេលនេះ និងបណ្តាលឱ្យទឹកលិចនៅតាមវាលស្រែ ។ ពេលពួកគាត់មកស្រែ ពួកគាត់បានឃើញក្តាមជាច្រើនក្បាលដែលសម្ងំលាក់ខ្លួនក្នុងរន្ធយូរមកហើយនោះ ឡើងមកលេងទឹកពេញស្រែតែម្តងក្រោយពីភ្លៀងធ្លាក់ ។ ដូច្នេះ លោក និងអ្នកភូមិផ្សេងទៀត ក៏ដើរចាប់ក្តាមស្រែទាំងនេះយកទៅធ្វើម្ហូបហូប ដើម្បីជួយកាត់បន្ថយការចំណាយទិញម្ហូបក្នុងគ្រួសារ ។

លោកតាបន្ថែមថា បើអាចរកក្តាមបានច្រើនជាងនេះ លោកតានឹងយកវាទៅលក់ព្រោះបានថ្លៃគួរសមដែរ ដោយសារក្តាមស្រែដែលចោះរន្ធសម្ងំនៅក្នុងដីពេលរដូវក្តៅ បើយើងយកវាទៅធ្វើម្ហូបនោះ វានឹងជាប់ខ្លាញ់ និងមានរសជាតិឆ្ងាញ់ជាងក្តាមនៅរដូវផ្សេងទៀត ។ អ្នកភូមិភាគច្រើនចូលចិត្តទិញក្តាមទាំងនេះយកទៅធ្វើម្ហូបឡាបក្តាមស្រែ ព្រោះវាមានរសជាតិឆ្ងាញ់ណាស់ ។

លោកតាបន្ថែមទៀតថា ៖ «ជាទូទៅ នៅរដូវប្រាំង អ្នកភូមិភាគច្រើននាំគ្នាទៅជីកក្តាមនៅតាមវាលស្រែ ហើយពិបាករកណាស់ ព្រោះក្តាមស្រែវាកាន់សីល ហើយមិនព្រមចេញពីរន្ធទេ ។ ប៉ុន្តែនៅពេលនេះ មានភ្លៀងធ្លាក់ញឹកញាប់បណ្តាលឱ្យមានទឹកលិចនៅក្នុងស្រែ ទើបក្តាមទាំងនេះចេញពីរន្ធឡើងមកលេងទឹក ។ ហេតុនេះ ពួកយើងមិនចាំបាច់ចំណាយកម្លាំងជីកដីរកវាទេ ហើយមួយថ្ងៃៗ អ្នកខ្លះអាចចាប់ក្តាមស្រែយកទៅលក់បានប្រាក់ពី២០០បាត ទៅ៣០០បាត ។ ដូច្នេះ ចាត់ទុកថា វាជាប្រាក់ចំណូលដ៏ល្អមួយសម្រាប់កសិករ បើទោះជាមុខរបរនេះមានរយៈពេលខ្លីក៏ដោយ» ៕ ប្រភព ៖ khaosod