បរទេស៖ ក្រុមអ្នកស្រាវជ្រាវ ប្រទេសក្រូអាត បានរកឃើញផ្លូវដែលមានអាយុកាល ៧,០០០ ឆ្នាំជាប់នឹងកន្លែងបុរាណមួយនៅលើកោះ Korčula ដែលនៅកណ្តាលសមុទ្រ Adriatic ។
នៅថ្ងៃទី ៨ ខែឧសភា សាកលវិទ្យាល័យ Zadar បានប្រកាសពីការរកឃើញផ្លូវបុរាណមួយដែលមានទទឹងប្រហែល ៤ ម៉ែត្រ ពីបន្ទះឈើដែលប្រមូលបានពីភក់នៅបាតសមុទ្រ។ អ្នកស្រាវជ្រាវជឿថាផ្លូវនេះត្រូវបានសាងសង់នៅចន្លោះឆ្នាំ ៣៩០០ដល់ ៤៩០០ មុនគ.ស។

សាស្ត្រាចារ្យ Igor Borzić ដែលជាអ្នកដឹកនាំគម្រោងនេះ បាននិយាយថា គាត់បានកត់សម្គាល់ឃើញរចនាសម្ព័ន្ធចម្លែកនៅក្នុង Gradina Bay ហើយបានហៅក្រុមមុជទឹកទៅកាន់កន្លែង Soline ។ នៅជម្រៅជាច្រើនម៉ែត្រ អ្នកមុជទឹកបានរកឃើញកាំបិត និងពូថៅថ្ម ដែលទាំងអស់នេះគឺជារបស់ប្រើប្រាស់ដែលបន្សល់ទុកដោយកសិករដំបូងគេនៅប្រទេសក្រូអាត។ ការកើនឡើងកម្រិតទឹកសមុទ្របានបណ្តាលឱ្យទីតាំងនៅឆ្នេរសមុទ្រក្រូអាតលិចក្នុងជម្រៅ ៤-៥ ម៉ែត្រ បន្ទាប់មក អ្នកបុរាណវត្ថុវិទូនឹងផ្តោតទៅលើការសិក្សាទីតាំងនេះឱ្យបានស៊ីជម្រៅបន្ថែមទៀត។ ប្រវត្តិសាស្រ្តនៃកោះ Korčula មានទំនាក់ទំនងយ៉ាងជិតស្និទ្ធជាមួយអ្នករុករក Marco Polo និងអ្នកឈ្លានពានក្រិក។ ស្ថាបត្យកម្មគួរឱ្យចាប់អារម្មណ៍នៅលើកោះមួយនេះរួមមានព្រះវិហារ St. ម៉ាកុស និងជញ្ជាំងនៃទីក្រុងចាស់ ដែលមានអាយុកាលតាំងពីឆ្នាំ ១២១៤៕

ប្រភព៖vnexpress

ប្រទេសចិន៖ ទិន្នន័យគយរបស់ប្រទេសចិនដែលចេញផ្សាយនៅថ្ងៃទី ៩ ខែឧសភា បានបង្ហាញថាការនាំចូលរបស់ប្រទេសក្នុងខែមេសាបានថយចុះ ៧.៩% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន នេះគឺអាក្រក់ជាងការធ្លាក់ចុះ ១.៤% កាលពីខែមុន។
ការនាំចេញបានកើនឡើងត្រឹមតែ ៨.៥ ភាគរយប៉ុណ្ណោះ ដែលជាការធ្លាក់ចុះពីការកើនឡើងជិត ១៥ ភាគរយនៅក្នុងខែមីនា។

លោក Zichun Huang សេដ្ឋវិទូប្រចាំតំបន់នៃក្រុមហ៊ុន Capital Economics បាននិយាយថា ការនាំចេញពីប្រទេសចិនទៅអាស៊ីអាគ្នេយ៍បានកើនឡើងត្រឹមតែ៤,៥%ប៉ុណ្ណោះក្នុងខែមេសា ហើយការកើនឡើងក្នុងខែមីនាមាន៣៥,៤%។ ខណៈដែលការនាំចេញពីកូរ៉េខាងត្បូងទៅចិនបានធ្លាក់ចុះក្នុងរយៈពេល១០ខែជាប់គ្នា។ ការនាំចូលធ្យូងថ្មបានធ្លាក់ចុះយ៉ាងខ្លាំង ដែលបង្ហាញពីតម្រូវការខ្សោយនៅក្នុងប្រទេសដែលមានសេដ្ឋកិច្ចធំជាងគេទីពីររបស់ពិភពលោក ហើយការនាំចូលស្ពាន់ និងឧស្ម័នក៏បានធ្លាក់ចុះផងដែរ។

យោងតាមប្រភពព័ត៌មាន Reuters បានព្យាករណ៍ថា ការធ្លាក់ចុះយ៉ាងខ្លាំងនៃលំហូរពាណិជ្ជកម្មកាលពីខែមុននឹងបង្កើនការព្រួយបារម្ភអំពីតម្រូវការខាងក្រៅ និងហានិភ័យដល់សេដ្ឋកិច្ចចិន។ ជាពិសេសនៅក្នុងបរិបទដែលសន្ទុះនៃការងើបឡើងវិញនៅក្នុងប្រទេសចិននៅតែមានភាពផុយស្រួយនៅពេលដែលការនាំចូល និងការនាំចេញត្រូវបានរងផលប៉ះពាល់ដោយវិធានការប្រឆាំងនឹងការរីករាលដាល។
ទោះជាយ៉ាងណាក៏ដោយការធ្លាក់ចុះនៃការនាំចូលរបស់ចិនបង្ហាញថាសេដ្ឋកិច្ចពិភពលោកមិនអាចពឹងផ្អែកលើម៉ាស៊ីនកំណើននេះបានទេ។ អ្នកវិភាគនិយាយថា យុទ្ធនាការរឹតបន្តឹងរូបិយវត្ថុសកលជិតពីរឆ្នាំ និងចលាចលនៅក្នុងឧស្សាហកម្មធនាគារលោកខាងលិចនឹងធ្វើឱ្យមានភាពស្មុគស្មាញកាន់តែខ្លាំងទាំងប្រទេសចិន និងពិភពលោក៕ ប្រភព៖vnexpress

រដ្ឋធានីកៀវ៖ ថៅកែក្រុមហ៊ុនទាហានស៊ីឈ្នួល Wagner Group បានវាយប្រហារដោយពាក្យសម្ដីធ្ងន់ៗ ទៅលើប្រមុខការពារជាតិរបស់រុស្ស៊ី ក្រោយពេលទាហានរបស់ក្រុងមូស្គូ បានរត់ចោលទីតាំងឈរជើងជាច្រើនកន្លែង នៅជិតទីក្រុងបាកមូត ដែលជាសមរភូមិក្ដៅ វាយប្រយុទ្ធគ្នាយ៉ាងបង្ហូរឈាម ជាមួយនឹងកងទ័ពក្រុងកៀវ អស់រយៈពេលជាច្រើនខែកន្លងមកនេះ ដោយបានរងការខូចខាត ស្លាប់ និង របួសរាប់ម៉ឺននាក់។

សារព័ត៌មាន Al Jazeera បានចេញផ្សាយ កាលពីល្ងាច ថ្ងៃអង្គារ ទី៩ ខែឧសភា ឆ្នាំ២០២៣ ថា លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ស្ថាបនិករបស់ក្រុមហ៊ុនទាហានស៊ីឈ្នួលរបស់រុស្ស៊ី Wagner Group ហើយក៏ជាមនុស្សជំនិតបំផុតមួយរូបរបស់ប្រធានាធិបតីរុស្ស៊ី លោក វ៉្លាឌីមៀ ពូទីន បានចោទប្រកាន់ ដល់កងកម្លាំងទាហានរុស្ស៊ី អំពីការរត់ចោលទីតាំងឈរជើងជាច្រើនកន្លែងរបស់ពួកគេ នៅជិតទីក្រុងបាកមូត នាភាគខាងកើតរបស់ប្រទេសអ៊ុយក្រែន។ នេះជាការវាយប្រហារ ដោយសង្គ្រាមពាក្យសម្ដី ប្រឆាំងនឹងមេដឹកនាំយោធារបស់ក្រុងមូស្គូ។

លោក យ៉ែវហ្គេនី ព្រីហ្គោហ្ស៊ីន ប្រធានក្រុមហ៊ុនទាហានស៊ីឈ្នួល បានបញ្ជាក់ ថា «នៅថ្ងៃនេះ អ្វីៗកំពុងតែបានធ្វើរួចមកហើយ ដើម្បីធ្វើឲ្យសមរភូមិជួរមុខ ដួលរលំ។ នៅថ្ងៃនេះ អង្គភាពយោធាមួយ នៃក្រសួងការពារជាតិរុស្ស៊ី បានរត់ចោលពីសមរភូមិមួយផ្នែករបស់យើង ដោយការបោះបង់ចោលទីតាំងឈរជើងរបស់ពួកគេ»។

ប្រធានក្រុមហ៊ុនទាហានស៊ីឈ្នួលរបស់រុស្ស៊ី រូបនេះ កាលពីប៉ុន្មានថ្ងៃមុននេះ បានគំរាមដកកម្លាំងទាហានរបស់គាត់ ចេញពីទីក្រុងបាកមូត នៅត្រឹមថ្ងៃទី១០ ខែឧសភា ប្រសិនបើគាត់មិនទទួលបានគ្រាប់រំសេវ តាមតម្រូវការចាំបាច់ សម្រាប់ទាហាន Wagner Group បន្ដប្រយុទ្ធ។ បើតាមឃ្លីបវីដេអូមួយ ត្រូវបានបង្ហោះ នៅលើបណ្ដាញសង្គមតេឡេក្រាម កាលពីថ្ងៃអង្គារ លោក ព្រីហ្គោហ្ស៊ីន បានសង្កត់ធ្ងន់ ថា កម្លាំងទាហានរបស់រុស្ស៊ី កំពុងតែរត់ភៀសខ្លួន ចេញពីទីតាំងឈរជើងរបស់ពួកគេ ដោយសារតែមេបញ្ជាការរុស្ស៊ី មានភាពឆោតល្ងង់។

លោក យ៉ែវហ្គេនី ព្រីហ្គោហ្ស៊ីន បានវាយប្រហារ ដោយពាក្យសម្ដីធ្ងន់ៗ ទៅលើមេដឹកនាំយោធារបស់រុស្ស៊ី ថា «ទាហានរុស្ស៊ី មិនគួរស្លាប់ ដោយសារតែមេបញ្ជាការរបស់ពួកគេ ឆោតល្ងង់នោះឡើយ។ បទបញ្ជា ដែលពួកគេទទួលបាន មកពីមេបញ្ជាការកំពូលៗ គឺជាបទឧក្រិដ្ឋដ៏ធ្ងន់ធ្ងរបំផុត»។

ក្រសួងការពារជាតិរុស្ស៊ី បានបញ្ជាក់ នៅក្នុងសេចក្ដីថ្លែងការណ៍មួយ នៅលើល្ងាច ថ្ងៃអង្គារដដែលនោះ ថា កម្លាំងទាហានវាយលុក ដោយធម្មតាសម្ដៅទៅលើក្រុមទាហានស៊ីឈ្នួលរបស់រុស្ស៊ី Wagner Group កំពុងតែបន្ដប្រយុទ្ធ នៅតំបន់ភាគខាងលិច ទីក្រុងបាកមូត។ រីឯទាហានបារ៉ា បានផ្ដល់ជំនួយ ដល់ការប្រយុទ្ធនេះផងដែរ។ ប៉ុន្ដែក្រសួងការពារជាតិរុស្ស៊ី មិនបាននិយាយសម្ដៅ ទៅលើការចោទប្រកាន់របស់លោក ព្រីហ្គោហ្ស៊ីន អំពីបញ្ហាទាហាន កំពុងតែរត់ចោលទីតាំងឈរជើងរបស់ពួកគេនោះទេ។

កម្លាំងទាហានស៊ីឈ្នួល Wagner បានដឹកនាំការប្រយុទ្ធដ៏សំខាន់បំផុត នៅក្នុងសង្គ្រាមរបស់ក្រុងមូស្គូ នៅទីក្រុងបាកមូត ដែលមានផ្ទៃដី ទំហំ ៤១,៦គីឡូម៉ែត្រការ៉េ។ ទីក្រុងដ៏តូចរបស់អ៊ុយក្រែន មួយនេះ មានប្រជាពលរដ្ឋ ប្រហែល ៧០ ០០០នាក់ រស់នៅមុនពេលសង្គ្រាមផ្ទុះឡើង ហើយទីក្រុងមួយនេះ បានក្លាយជាសមរភូមិ វាយប្រយុទ្ធគ្នាយ៉ាងបង្ហូរឈាម ដោយបានបណ្ដាលឲ្យទាហានទាំងសងខាង រាប់ម៉ឺននាក់ បានស្លាប់ និង រងរបួស។

ប្រធានក្រុមហ៊ុនស៊ីឈ្នួលរបស់រុស្ស៊ី រូបនេះ បានស្ដីបន្ទោសម្ដងហើយម្ដងទៀត ទៅលើប្រមុខការពារជាតិ និង មេទ័ពកំពូលរបស់រុស្ស៊ី នៅក្នុងរយៈពេលប៉ុន្មានសប្ដាហ៍កន្លងទៅថ្មីៗនេះ។ សកម្មភាពបែបនេះ កំពុងតែបង្ហាញ អំពីការបែកបាក់ផ្ទៃក្នុង កាន់តែជ្រៅទៅៗ ក្រោយពេលរដ្ឋាភិបាលក្រុងមូស្គូ បានខកខាន បញ្ជូនគ្រាប់រំសេវឲ្យមានចំនួនគ្រប់គ្រាន់ សម្រាប់ក្រុមទាហានស៊ីឈ្នួល Wagner Group បន្ដវាយប្រយុទ្ធ ដណ្ដើមកាន់កាប់ទីក្រុងបាកមូត។

ដោយឡែក លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានបញ្ជាក់ ថា ក្រុងមូស្គូ បានទទួលបរាជ័យ នៅក្នុងការរឹបអូសទីក្រុងបាកមូត តាមផែនការគ្រោងទុករបស់លោក វ៉្លាឌីមៀ ពូទីន ប្រធានាធិបតីរុស្ស៊ី ដោយបានកំណត់ ថា នឹងត្រូវតែដណ្ដើមកាន់កាប់ទីក្រុងបាកមូតឲ្យខាងតែបាន នៅត្រឹមថ្ងៃទី៩ ខែឧសភា ដែលជាជ័យជម្នះរបស់សូវៀត នៅលើរបបណាហ្ស៊ីអាល្លឺម៉ង់ នៅក្នុងសង្គ្រាមលោកលើកទី២ ខណៈរុស្ស៊ី តែងតែប្រាព្ធពិធីនេះឡើង ជារៀងរាល់ឆ្នាំ សម្រាប់ជាថ្ងៃជ័យជម្នះរបស់ខ្លួន ក្រោយពេលសហភាពសូវៀតដួលរលំមក៕

បរទេស៖ ក្រុមហ៊ុន FORD របស់សហរដ្ឋអាមេរិក បានប្រកាសលទ្ធផលអាជីវកម្មរថយន្តអគ្គិសនីរបស់ខ្លួនជាលើកដំបូងជាមួយនឹងការខាតបង់ចំនួនជាង ៣ ពាន់លានដុល្លារក្នុងរយៈពេលពីរឆ្នាំចុងក្រោយនេះ។
របាយការណ៍ប្រាក់ចំណូលគឺគួរឱ្យកត់សម្គាល់សម្រាប់ការខាតបង់ជាមធ្យម ៥៨,៣៣៣ ដុល្លារក្នុងមួយរថយន្តអគ្គិសនីដែលបានលក់ក្នុងរយៈពេល ៣ ខែដំបូងនៃឆ្នាំនេះ។ នៅក្នុងត្រីមាសទីមួយ ក្រុមហ៊ុន Ford បានចែកចាយរថយន្តអគ្គិសនីត្រឹមតែ ១២,០០០ គ្រឿងដល់អតិថិជន ។ ហើយអាជីវកម្មរថយន្តថ្មរកចំណូលបានត្រឹមតែ ៧០០ លានដុល្លារប៉ុណ្ណោះ បើធៀបនឹង ១.៦ ពាន់លានដុល្លារក្នុងត្រីមាសចុងក្រោយនៃឆ្នាំ ២០២២។

ក្រុមហ៊ុនរថយន្ត Ford បានពន្យល់ពីកត្តាមួយចំនួនដែលនាំទៅរកលទ្ធផលដ៏ក្រៀមក្រំ រួមទាំងការចំណាយខ្ពស់ បច្ចេកវិទ្យាដែលមានតម្លៃថ្លៃជាង និងការចំណាយពាក់ព័ន្ធ ព្រមទាំងសម្ពាធពីអតិផរណា។ ការលក់ទាបគឺដោយសារតែការផ្អាកផលិតកម្មសម្រាប់ការធ្វើឱ្យប្រសើរឡើងនៅរោងចក្រ Cuautitlan ក្នុងប្រទេសម៉ិកស៊ិកដើម្បីបង្កើនការផលិតរថយន្ត Mustang Mach-E ដែលត្រូវបានរំពឹងថានឹងកើនឡើងដល់ ២៧០,០០០ គ្រឿងនៅឆ្នាំ ២០២៣ ។

ទោះជាយ៉ាងណាក៏ដោយក្រុមហ៊ុនរថយន្តអគ្គីសនី Ford រួមគ្នាជាមួយក្រុមហ៊ុន Ford Pro និងក្រុមហ៊ុន Ford Blue ជួយឱ្យក្រុមហ៊ុនផលិតរថយន្តអាមេរិកសម្រេចបានប្រាក់ចំណេញសុទ្ធ ៤.២% ដែលជាកម្រិតខ្ពស់បំផុតក្នុងរយៈពេលជាងមួយឆ្នាំ ដែលជាកត្តាមួយសម្រាប់ក្រុមហ៊ុន Ford បន្តប្រើប្រាស់រថយន្តអគ្គិសនីរហូតដល់វាអាចរកប្រាក់ចំណេញបាន៕

ប្រភព៖vnexpress