រដ្ឋធានីវ៉ាស៊ីនតោន៖ ចិន ក៏ដូចជាបណ្ដាប្រទេសផ្សេងៗជាច្រើន ជាពិសេស ប្រទេសមហាអំណាចលោកខាងលិច នៅតែរក្សាភាពស្ងៀមស្ងាត់ ជុំវិញវិបត្ដិដ៏ធ្ងន់ធ្ងរ ផ្ទុះឡើង នៅក្នុងប្រទេសរុស្ស៊ី កាលពីថ្ងៃទី២៤ ខែមិថុនា ហើយចិនក៏ទំនងជាមិនសូវព្រួយបារម្ភច្រើន អំពីការចុះខ្សោយរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន ក្រោយការបះបោររបស់កម្លាំងទាហានស៊ីឈ្នួល Wagner ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី២៩ ខែមិថុនា ថា ទំនាក់ទំនង រវាងចិន និង រុស្ស៊ី នៅតែរឹងមាំ ថ្វីបើមានការផ្ទុះឡើងនូវព្រឹត្ដិការណ៍បះបោរបស់កម្លាំងទាហានស៊ីឈ្នួល Wagner កាលថ្ងៃសៅរ៍ចុងសប្ដាហ៍កន្លងទៅនេះ បានរងបរាជ័យយ៉ាងណាក្ដី។ ប៉ុន្ដែក្រុមអ្នកវិភាគ បានយល់ឃើញ ថា ក្រុងប៉េកាំង ទំនងជាមានការប្រុងប្រយ័ត្នកាន់តែខ្លាំងឡើង សម្រាប់មេដឹកនាំរុស្ស៊ី លោក វ្ល៉ាឌីមៀ ពូទីន និង ស្ថិរភាពសម្រាប់រដ្ឋាភិបាលរបស់គាត់ នាពេលអនាគត។

រដ្ឋាភិបាលក្រុងប៉េកាំង ក៏ដូចជា បណ្ដារដ្ឋាភិបាលជាច្រើនទៀត កាលពីថ្ងៃសៅរ៍ មានការប្រុងប្រយ័ត្នបំផុត នៅក្នុងការធ្វើអត្ថាធិប្បាយ ស្របពេលលោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) បានដឹកនាំកម្លាំងទាហានឯកជនរបស់គាត់ ធ្វើដំណើរតម្រង់ ឆ្ពោះទៅកាន់រដ្ឋធានីមូស្គូ ប្រទេសរុស្ស៊ី ក្រោយពេលរឹបអូសបានទីក្រុងរ៉ូស្ដូវ-អន-ដុន ស្ថិតនៅភាគខាងត្បូងរបស់ប្រទេសរុស្ស៊ី។

ចិន បានចេញសេចក្ដីថ្លែងការណ៍មួយ នៅថ្ងៃបន្ទាប់ ក្រោយការបះបោរនោះ បានស្ងប់ស្ងាត់ទៅវិញ ហើយលោក ព្រីហ្គោហ្ស៊ីន បានព្រមព្រៀងនិរទេសខ្លួន ទៅកាន់ប្រទេសបេឡារុស។ ក្រសួងការបរទេសចិន បានចាត់ទុកឧបទ្ទវហេតុនោះ ជាកិច្ចការផ្ទៃក្នុងរបស់រុស្ស៊ី។ ក្រុងប៉េកាំង បានបញ្ជាក់ ថា ចិន នៅតែគាំទ្រដល់គោលបំណងរបស់រុស្ស៊ី នៅក្នុងការថែរក្សាស្ថិរភាពជាតិ ហើយសម្រេចបាននូវវឌ្ឍនភាព និង វិបុលភាព។

លោកស្រី អេលីហ្សាបេត វីស្និក (Elizabeth Wishnick) អ្នកវិទ្យសាស្រ្ដស្រាវជ្រាវជាន់ខ្ពស់ មកពីសាកលវិទ្យាល័យ Columbia (កូឡុមប៊ៀ) បានបញ្ជាក់ ថា «សម្រាប់ប្រធានាធិបតីចិន លោក ស៊ី ជិនពីង គឺការវិវឌ្ឍស្ថានការណ៍ នៅក្នុងប្រទេសរុស្ស៊ី នៅចុងសប្ដាហ៍នេះ ត្រូវតែមានការព្រួយបារម្ភយ៉ាងខ្លាំង ខណៈពួកគេបានលើកឡើងនូវសំណួរ អំពីបញ្ហាសន្តិសុខរបស់របបគ្រប់គ្រងមួយនេះ អាចក្លាយជាក្តីកង្វល់ដ៏ធំបំផុត សម្រាប់មេដឹកនាំចិន»។

លោក ស៊ី ជិនពីង ប្រធានាធិបតីចិន បានបង្កើតចំណងទំនាក់ទំនងដ៏រឹងមាំ ជាមួយនឹងមេដឹកនាំវិមានក្រឹមឡាំង លោក ពូទីន នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ខណៈគាត់កំពុងតែពង្រីកនូវការគ្រប់គ្រងរបស់គាត់ នៅក្នុងប្រទេសចិន នៅក្នុងនាមជាមេដឹកនាំដ៏មានឥទ្ធិពលបំផុត ចាប់តាំងពីលោក ម៉ៅ សេទុង រហូតមក។

សម្រាប់រដ្ឋាភិបាល ផ្ដោតយ៉ាងសំខាន់លើស្ថិរភាព ហ៊ានចំណាយគ្រប់បែបយ៉ាង សូម្បីតែបិទខ្ទប់លើមនុស្សរាប់សិបលាន សម្រាប់ទប់ស្កាត់ជំងឺកូវីដ-១៩ និង ធ្វើឱ្យសេដ្ឋកិច្ចសម្រេចបានតាមគោលដៅ ហើយស្ថានភាព ដូចជា ការប្រឈមមុខរបស់លោក ពូទីន ស្របពេលក្រុម Wagner បានបះបោរតម្រង់ទិសដៅកាន់ទីក្រុងមូស្គូ នឹងក្លាយជាសុបិនដ៏អាក្រក់បំផុតមួយរបស់មេដឹកនាំចិន លោក ស៊ី ជិនពីង។

ប្រទេសចិន និង រុស្ស៊ី មានទំនាក់ទំនងដ៏ចាក់ស្រេះជាមួយគ្នា អស់រយៈពេលជាយូរមកហើយ ប៉ុន្តែភាគីទាំងពីរ កាន់តែជិតស្និទ្ធនឹងគ្នាបន្ថែមទៀត ចាប់តាំងពីលោក ស៊ី បានឡើងកាន់អំណាច នៅក្នុងអំឡុងឆ្នាំ២០១៣ ដោយសារតែមិត្តភាពដ៏ជិតស្និទ្ធរបស់គាត់ ជាមួយលោក ពូទីន និង ការមិនងាកទៅសហរដ្ឋអាមេរិក។ ចិន និង រុស្ស៊ី តែងតែចាត់ទុកសហរដ្ឋអាមេរិក ជ្រៀតជ្រែក ចូលកិច្ចការផ្ទៃក្នុងរបស់ពួកគេ ទាំងតាមរយៈសង្គ្រាម នៅអ៊ុយក្រែន និង អង្គការណាតូ ឬ តៃវ៉ាន់ ហើយជប៉ុន។ រុស្ស៊ី និង ចិន បានប្រឆាំងនឹងការពង្រីកឥទ្ធិពលរបស់សហរដ្ឋអាមេរិក នៅក្នុងតំបន់របស់ពួកគេរៀងៗខ្លួន។

លោក វ៉ែន-ទី ស៊ុង (Wen-ti Sung) អ្នកវិទ្យាសាស្រ្ដនយោបាយ នៃសាកលវិទ្យាល័យអូស្រ្ដាលី បានបញ្ជាក់ ថា «មេដឹកនាំចិន លោក ស៊ី ជិនពីង នៅតែចូលចិត្តលោក ពូទីន ព្រោះគ្មានជម្រើសជំនួស។ ប៉ុន្តែឥឡូវនេះ ក្រុងប៉េកាំង មានហេតុផល សម្រាប់កក់ទុក កាន់តែច្រើន និងក្លាយជាប្រតិបត្តិការ កាន់តែច្រើន សម្រាប់ទំនាក់ទំនង ជាមួយនឹងលោក ពូទីន។ ប្រសិនបើពូទីន ចុះខ្សោយជាង នឹងក្លាយទៅជាមិនសូវមានប្រយោជន៍ សម្រាប់ប្រទេសចិន។ ពូទីន ចុះទន់ខ្សោយ នឹងមិនសូវជំរុញដល់បុព្វហេតុរួមរបស់រុស្ស៊ី ជាមួយចិននោះឡើយ»៕

រដ្ឋធានីមូស្គូ៖ ក្រោយការបះបោរ ប្រដាប់អាវុធធុនធ្ងន់របស់កម្លាំងទាហានស៊ីឈ្នួលរបស់រុស្ស៊ី Wagner កាលពីថ្ងៃសៅរ៍ ទី២៤ ខែមិថុនា នោះមក ឥឡូវនេះ ប្រធានាធិបតីរុស្ស៊ី លោក វ៉្លាឌីមៀ ពូទីន ក៏បានប្រកាស អំពីរដ្ឋាភិបាលក្រុងមូស្គូ បានបង់ប្រាក់របស់ជាតិយ៉ាងច្រើនសន្ធឹកសន្ធាប់ សម្រាប់ការប្រយុទ្ធរបស់ពួកទាហានស៊ីឈ្នួល ដឹកនាំដោយលោក យ៉ែវហ្គេនី ព្រីហ្គោហ្ស៊ីន។

សារព័ត៌មានរបស់ចក្រភពអង់គ្លេស Daily Mail បានចេញផ្សាយ កាលពីថ្ងៃអង្គារ ទី២៧ ខែមិថុនា ថា លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ស្ថាបនិកក្រុមហ៊ុនទាហានស៊ីឈ្នួលរបស់រុស្ស៊ី Wagner Group កាលពីថ្ងៃអង្គារ បាននិរទេសខ្លួន តាមយន្ដហោះឯកជនរបស់គាត់ ទៅកាន់ប្រទេសបេឡារុស។ ស្របគ្នានេះ រដ្ឋាភិបាលក្រុងមូស្គូ ក៏បានអះអាង ថា កម្លាំងទាហានប៉ារ៉ា Wagner បានព្រមព្រៀង ប្រគល់អាវុធធុនធ្ងន់របស់ពួកគេ មកឲ្យរដ្ឋាភិបាល ក្រោយការបះបោររបស់ពួកគេ បានទទួលបរាជ័យ។

ទីភ្នាក់ងារសារព័ត៌មានជាតិរបស់បេឡារុស Belta (បែលតា) បានរាយការណ៍ ថា «លោក អាឡិកសានដឺរ លូកាសែនកូ (Alexander Lukashenko) ប្រធានាធិបតីបេឡារុស បានបញ្ជាក់ ថា «ជាការពិតណាស់ លោក ព្រីហ្គោហ្ស៊ីន បានមកដល់ប្រទេសរបស់គាត់ នៅថ្ងៃនេះ»។

លោក យ៉ែវហ្គេនី ព្រីហ្គោហ្ស៊ីន វ័យ៦២ឆ្នាំ ជាអតីតអ្នកទោស ពីបទប្លន់ប្រដាប់អាវុធ ការវាយប្រហារ និង អូសទាញកុមារឲ្យចូលក្រុមក្មេងទំនើង បានចាប់ផ្ដើមរះឡើង ក្លាយជាមេទាហានស៊ីឈ្នួលដ៏មានឥទ្ធiពលបំផុត នៅក្នុងប្រទេសរុស្ស៊ី។ គាត់បានបង្ហាញខ្លួ នជាសាធារណៈ ខណៈគាត់បានចាកចេញពីទីក្រុងរូស្ដូវ-អន-ដុន (Rostov-on-Don) កាលពីថ្ងៃសៅរ៍ ទី២៤ ខែមិថុនា ដែលជាទីក្រុងដ៏ធំមួយ ស្ថិតនៅភាគខាងត្បូងរបស់ប្រទេសរុស្ស៊ី ត្រូវបានកម្លាំងប្រដាប់អាវុធរបស់គាត់ កាន់កាប់មួយរយៈពេលខ្លី។

សេវាកម្មសន្ដិសុខសហព័ន្ធន៍រុស្ស៊ី (FSB) កាលពីព្រឹក ថ្ងៃអង្គារ បានទម្លាក់ចោលរាល់ការចោទប្រកាន់ ដល់អ្នកចូលរួមទាំងអស់ នៅក្នុងសកម្មភាពបះបោរបរាជ័យរបស់ Wagner Group ក្រោយកិច្ចចរចាសម្របសម្រួល ពីប្រធានាធិបតីបេឡារុស លោក លូកាសេនកូ និង ប្រធានាធិបតីរុស្ស៊ី លោក វ៉្លាឌីមៀ ពូទីន។ កិច្ចព្រមព្រៀងនោះ បានតម្រូវឲ្យលោក ព្រីហ្គោហ្ស៊ីន និរទេសខ្លួន ទៅកាន់ប្រទេសបេឡារុស។

ប្រធានាធិបតីរុស្ស៊ី លោក វ៉្លាឌីមៀ ពូទីន បានបញ្ជាក់ ថា រដ្ឋាភិបាលក្រុងមូស្គូ បានចំណាយលុយ ចំនួន ៨៦ពាន់លានរូប្លិ៍ (Rouble លុយរុស្ស៊ី) ឬស្មើនឹងប្រហែល ១ពាន់លានដុល្លារ នៅក្នុងរយៈពេល១២ខែ គិតត្រឹមខែឧសភា ឆ្នាំ២០២៣។ នៅក្នុងរយៈពេលដូចគ្នានេះ មេទាហានស៊ីឈ្នួល បានរកលុយបានច្រើនបំផុត ពីពាណិជ្ជកម្មអាហារ និង ការផ្គត់ផ្គង់អាហាររបស់គាត់។

លោកប្រធានាធិបតី ពូទីន បានសង្កត់ធ្ងន់ ថា អាជ្ញាធរ គួរតែស៊ើបអង្កេត អំពីរបៀបលុយត្រូវបានចំណាយទាំងនោះ។ រដ្ឋាភិបាលក្រុងមូស្គូ បានផ្គត់ផ្គង់លុយគ្រប់គ្រាន់ ដល់យុទ្ធជនទាហានស៊ីឈ្នួល Wagner ផ្ទុយពីការអះអាងរបស់លោក ព្រីហ្គោហ្ស៊ីន លើកឡើង ថា គាត់បានផ្តល់ហិរញ្ញវត្ថុ ដល់ទាហានស៊ីឈ្នួលរបស់គាត់ ជាមូលនិធិផ្ទាល់ខ្លួន។

លោកប្រធានាធិបតី ពូទីន បានបន្ថែម ថា «ក្រុមយុទ្ធជន Wagner ទាំងមូល ត្រូវបានផ្តល់ជូនយ៉ាងពេញលេញ ដោយរដ្ឋ ពីក្រសួងការពារជាតិ ពីថវិការដ្ឋ។ យើងបានផ្តល់មូលនិធិយ៉ាងពេញលេញ ដល់ក្រុមទាហានឯកជនទាំងនេះ»។

រុស្សី ធ្លាប់បដិសេធអត្ថិភាពរបស់ក្រុម Wagner ប៉ុន្តែក្រុមទាហានឯកជនមួយនេះ បានការពារផលប្រយោជន៍របស់រុស្ស៊ី យ៉ាងច្រើន នៅតាមបណ្តាប្រទេសមួយចំនួន នៅទ្វីបអាហ្វ្រិក និង តំបន់មជ្ឈិមបូព៌ា។

សហរដ្ឋអាមេរិក កាលពីថ្ងៃអង្គារ (ទី២៧) បានប្រកាសដាក់ទណ្ឌកម្មជាច្រើន ដោយមានគោលបំណង បង្អាក់សកម្មភាពរុករករ៉ែមាស នៅទ្វីបអាហ្វ្រិក សម្រាប់ការផ្តល់មូលនិធិ ជួយដល់ក្រុមហ៊ុនទាហានស៊ីឈ្នួល Wagner Group ។ ទន្ទឹមគ្នានេះ រដ្ឋាភិបាលក្រុងវ៉ាស៊ីនតោន បានប្តេជ្ញា ថា នឹងរក្សាពួកទាហានស៊ីឈ្នួលទាំងនេះ ឱ្យទទួលខុសត្រូវ ចំពោះការរំលោភបំពានជាច្រើន ក្រោយពេលពួកគេ បានងើបបះបោរឡើង ដោយប្រដាប់អាវុធធុនធ្ងន់ នៅក្នុងប្រទេសរុស្ស៊ី កាលពីថ្ងៃសៅរ៍ ទី២៤ ខែមិថុនា។

ក្រសួងហិរញ្ញវត្ថុរបស់សហរដ្ឋអាមេរិក បានប្រកាស ដាក់ទណ្ឌកម្មជាច្រើន ប្រឆាំងនឹងក្រុមហ៊ុន Midas Resources (មីដាស រីសស) ដែលកំពុងតែប្រតិបត្ដិការរុករករ៉ែ នៅសាធារណរដ្ឋអាហ្វ្រិកកណ្ដាល និង ក្រុមហ៊ុន Diamville (ឌីយ៉ាមវិលឡេ) ដែលជាក្រុមហ៊ុនទិញមាស និង ពេជ្រ នៅក្នុងប្រទេសអាហ្វ្រិកមួយនេះ។ ក្រុមហ៊ុនទាំង២នេះ ត្រូវបានគេរាយការណ៍ ថា កំពុងតែស្ថិតក្រោមការគ្រប់គ្រងរបស់លោក ព្រីហ្គោហ្ស៊ីន។

វិធានការដាក់ទណ្ឌកម្មទាំងនេះ នឹងរារាំងដល់ទ្រព្យសម្បត្តិណាមួយ នៅលើទឹកដីរបស់សហរដ្ឋអាមេរិក និង ដាក់ទណ្ឌកម្ម លើប្រតិបត្តិការជាមួយក្រុមហ៊ុនទាំងនោះ។ សហរដ្ឋអាមេរិក ក៏បានកំណត់គោលដៅ លើក្រុមហ៊ុន មានមូលដ្ឋាននៅទីក្រុងឌូបៃ ឈ្មោះ Industrial Resources General Trading (អ៊ីនដាសស្ត្រៀល រីសស ជេណឺរ៉ល ត្រេឌីង) ក្រោមការចោទប្រកាន់ពីបទគ្រប់គ្រងហិរញ្ញវត្ថុ សម្រាប់ការជួញដូររបស់ Prigozhin នៅក្នុងក្រុមហ៊ុន Diamville ៕

កាលពីចុងខែមិថុនា ឆ្នាំ២០២៣ កម្មវិធីវីដេអូខ្លី TikTok របស់ក្រុមហ៊ុនចិន ByteDance បានលើកឡើងថា ក្រុមហ៊ុននឹងវិនិយោគទឹកប្រាក់រាប់លានដុល្លារអាមេរិកនៅតំបន់អាស៊ីអាគ្នេយ៍ សម្រាប់រយៈពេល២ឆ្នាំ ទៅ៣ឆ្នាំខាងមុខ ដើម្បីបង្កើនភាពរឹងមាំក្នុងតំបន់នេះ ។ ការប្រកាសវិនិយោគក្នុងតំបន់អាស៊ីអាគ្នេយ៍បន្ថែម ស្របពេលប្រទេសមួយចំនួនបានត្រួតពិនិត្យពីសុវត្ថិភាពទិន្នន័យរបស់អ្នកប្រើប្រាស់កម្មវិធី TikTok ។

តំបន់អាស៊ីអាគ្នេយ៍មានប្រជាជនសរុបប្រមាណ៦៣០លាននាក់ ហើយប្រជាជនពាក់កណ្តាលក្នុងតំបន់នេះមានអាយុតិចជាង៣០ឆ្នាំ ។ ដូច្នេះ ក្រុមហ៊ុននេះចាត់ទុកថា វាជាឱកាសល្អសម្រាប់ចូលទីផ្សារដ៏ធំបំផុតរបស់ TikTok ខណៈមានអ្នកប្រើប្រាស់កម្មវិធី TikTok ជាង៣២៥លាននាក់ក្នុង១ខែ ។ ប៉ុន្តែ TikTok ពុំបានផ្តល់ព័ត៌មានលម្អិតអំពីផែនការជំរុញពាណិជ្ជកម្មអេឡិចត្រូនិចទេ ដោយគ្រាន់តែនិយាយថា នឹងមានការវិនិយោគលើការបណ្តុះបណ្តាល ការផ្សាយពាណិជ្ជកម្ម និងការគាំទ្រអ្នកលក់ខ្នាតតូច ដែលចង់ចូលរួមក្នុងពាណិជ្ជកម្មអេឡិចត្រូនិច គឺ TikTok Shop ។

ទោះយ៉ាងណា TikTok មិនអាចផ្លាស់ប្តូរឋានៈរបស់ខ្លួនដែលមានអ្នកប្រើប្រាស់កម្មវិធីនេះច្រើនបំផុតនៅតំបន់អាស៊ីអាគ្នេយ៍ ឱ្យក្លាយជាកន្លែងរកប្រាក់ចំណូលចម្បងផ្នែកពាណិជ្ជកម្មអេឡិចត្រូនិចបានទេ ដោយសារមានគូប្រជែងធំៗជាច្រើនទៀតដូចជា Shopee (Sea) Lazada (Alibaba) និង GoTo (Tokopedia) នៅក្នុងទីផ្សារ ។

TikTok មានបុគ្គលិកក្នុងតំបន់អាស៊ីអាគ្នេយ៍ប្រមាណ៨.០០០នាក់ និងមានអ្នកលក់ក្នុងកម្មវិធីនេះប្រមាណ២លាននាក់នៅប្រទេសឥណ្ឌូណេស៊ី ។ ទោះយ៉ាងណា ចំនួនការលក់ផលិតផលក្នុងតំបន់អាស៊ីអាគ្នេយ៍របស់ TikTok គឺទាបជាងក្រុមហ៊ុន Shopee ។ នេះបើយោងតាមទិន្នន័យរបស់ Momentum Works ៕ ប្រភព ៖ AEC connect

្រទេសកូរ៉េខាងត្បូង ៖ ពលរដ្ឋកូរ៉េខាងត្បូងមានអារម្មណ៍សប្បាយចិត្ត ដោយសារពួកគេមានអាយុតិចជាងមុន១ឆ្នាំ ឬ២ឆ្នាំ ។ កូរ៉េខាងត្បូងបានចេញច្បាប់ថ្មីមួយ ដែលកំណត់ឱ្យប្រើប្រាស់វិធីរាប់អាយុពលរដ្ឋតាមស្តង់ដារអន្តរជាតិ ។ ច្បាប់ថ្មីនេះអនុវត្តចាប់ពីថ្ងៃទី២៨ ខែមិថុនា ឆ្នាំ២០២៣ ដើម្បីជំនួសឱ្យការរាប់អាយុតាមវិធីចាស់ ។

ប្រទេសកូរ៉េខាងត្បូងបានរាប់អាយុតាមវិធីចាស់អស់រយៈពេលយូរមកហើយ ដែលប្រព័ន្ធនេះមានឈ្មោះថា អាយុកូរ៉េ ។ ជាទូទៅ ពលរដ្ឋនៅប្រទេសផ្សេងៗនឹងមានអាយុគ្រប់១ឆ្នាំ នៅពេលដល់ថ្ងៃកំណើត ប៉ុន្តែនៅប្រទេសកូរ៉េខាងត្បូង គេបានបូកបន្ថែមអាយុ១ឆ្នាំទៀតនៅរៀងរាល់ថ្ងៃទី១ ខែមករា ។ កូរ៉េខាងត្បូងបានរាប់អាយុតាមវិធីនេះតាំងពីឆ្នាំ១៩៦០ មកម៉្លេះ ដើម្បីធ្វើសំបុត្រពេទ្យ និងឯកសារផ្លូវច្បាប់នានា ប៉ុន្តែមានពលរដ្ឋកូរ៉េខាងត្បូងជាច្រើននាក់នៅតែរាប់អាយុរបស់ខ្លួនតាមវិធីចាស់ ។

កាលពីខែធ្នូ ឆ្នាំ២០២២ ប្រទេសកូរ៉េខាងត្បូងបានធ្វើវិសោធនកម្មច្បាប់ដើម្បីលុបចោលការរាប់អាយុតាមវិធីចាស់ និងប្តូរមករាប់អាយុតាមស្តង់ដារសកលវិញ ក្រោយពីរដ្ឋាភិបាលសាកសួរមតិយោបល់ពលរដ្ឋ កាលពីខែកញ្ញា ឆ្នាំ២០២២ ឃើញថា ពលរដ្ឋប្រមាណ៨៦% ចង់រាប់អាយុតាមសកលក្នុងជីវិតប្រចាំថ្ងៃ នៅពេលគេអនុវត្តច្បាប់ថ្មី ។ ទោះយ៉ាងណា បើទោះជាមានការយកវិធីរាប់អាយុតាមសកលមកប្រើប្រាស់នៅកូរ៉េខាងត្បូងក្តី ប៉ុន្តែការរាប់អាយុសម្រាប់ការចូលបម្រើយោធា ការសិក្សា ការជក់បារី និងការផឹកគ្រឿងស្រវឹង គេនៅតែប្រើប្រាស់វិធីចាស់ដើម្បីរាប់អាយុដដែល ។

កាលពីអតីតកាល បណ្តាប្រទេសនៅអាស៊ីខាងកើតបានរាប់អាយុតាមវិធីចាស់ ហើយក្រោយមកទៀត ប្រទេសភាគច្រើនក៏ឈប់រាប់អាយុតាមវិធីចាស់នេះ ក្នុងនោះប្រទេសជប៉ុនបានចាប់ផ្តើមរាប់អាយុតាមស្តង់ដារសកលកាលពីឆ្នាំ១៩៥០ ចំណែកកូរ៉េខាងជើងបានរាប់អាយុតាមវិធីថ្មីកាលពីឆ្នាំ១៩៨០ ៕ ប្រភព ៖ TNN World

បរទេស៖ លោក Elon Musk បានចាប់ផ្តើមហាត់ក្បាច់គុនចម្រុះ (MMA) ជាមួយលោក Lex Fridman ដែលជាខ្សែក្រវាត់ខ្មៅនៅ Jiu-jitsu ដើម្បីត្រៀមខ្លួនសម្រាប់ការប្រកួតរបស់គាត់ជាមួយប្រធានក្រុមហ៊ុន Meta គឺលោក Mark Zuckerberg ។

លោក Lex Fridman ដែលជាពិធីករនៃ ប៉ុស្តិ៍ Lex Fridman Podcast និងជាម្ចាស់ខ្សែក្រវាត់ខ្មៅនៅក្នុង Jiu-jitsu បានសរសេរនៅលើបណ្តាញសង្គម Twitter កាលពីថ្ងៃទី ២៨ ខែមិថុនា ថា “ខ្ញុំបានចាប់ផ្តើមវគ្គបណ្តុះបណ្តាលភ្លាមៗជាមួយលោក Elon Musk ហើយខ្ញុំពិតជាមានការចាប់អារម្មណ៍យ៉ាងខ្លាំងចំពោះកម្លាំង និងជំនាញរបស់គាត់ ទាំងដៃ និងជើង”។ Lex Fridman ក៏បានបន្តទៀតថា “ខ្ញុំពិតជារំភើបណាស់នៅពេលដែលខ្ញុំបានឃើញ Elon Mark ហាត់ក្បាច់គុន”។

បន្ទាប់មក Fridman ក៏បានបង្ហោះរូបថតចំនួនពីរសន្លឹកនៅពេលដែល Musk បានគៀបករបស់គាត់ បុកដៃរបស់គាត់ និងវាយគូប្រកួតបានយ៉ាងស្អាត។ ដោយរូបថតនេះទទួលបានការចូលមើលជាង ១០ លានដង និងមតិជាង ៦០០០ ហើយ Musk ក៏បានចូលទៅខំមិននៅលើរូបនោះថា “វាពិតសប្បាយណាស់”។

គួររំលឹកដែរថា កាលពីថ្ងៃទី ២១ ខែមិថុនា មានរឿងកំប្លែងមួយនៅលើ Twitter ដោយមហាសេដ្ឋីបច្ចេកវិទ្យា Elon Musk បានបបួលលោក Mark Zuckerberg ធ្វើការប្រកួតក្នុងទ្រុងជាមួយគ្នា ហើយ CEO Meta ក៏បានទទួលយកសំណើរនេះផងដែរ។ អ្នកទាំងពីរក៏បានជ្រើសរើសកន្លែងសម្រាប់ “ការប្រយុទ្ធដ៏ធំនេះ” នៅក្នុង Las Vegas ដែលជាកន្លែង Apex Arena ធ្វើជាម្ចាស់ផ្ទះក្នុងការប្រកួត UFC ។

នៅថ្ងៃទី ២៧ ខែមិថុនាលោក Musk ក៏បានយល់ព្រមហ្វឹកហាត់ ជាមួយ Georges St-Pierre ដែលជាអ្នកប្រយុទ្ធ MMA ដ៏ល្អបំផុតមួយនៅលើពិភពលោក។ ឪពុកម្តាយរបស់លោក Musk មានការព្រួយបារម្ភយ៉ាងខ្លាំង អំពីកូនប្រុសរបស់គាត់ ដោយលោកទាំងពីរបាននិយាយថា Elon Musk មានរូបរាងកាយធំពិតមែន ប៉ុន្តែខ្ជិលហាត់ប្រាណណាស់។

គួរបញ្ជាក់ដែរថា បច្ចុប្បន្នលោក Dana White ដែលជាប្រធាន UFC កំពុងព្យាយាមធ្វើឱ្យការប្រកួតប្រជែងនេះក្លាយជាការពិត ហើយអាចនឹងបើកការប្រកួតក្បាច់គុនដ៏ធំបំផុតនេះក្នុងប្រវត្តិសាស្ត្រពិភពលោកផងដែរ៕ ប្រភព៖vnexpress

បរទេស៖ Lordstown Motors គឺជាក្រុមហ៊ុនរថយន្តអគ្គិសនីដែលធ្លាប់វិនិយោគដោយ Foxconn ទើបតែបានដាក់ពាក្យក្ស័យធន និងលក់ខ្លួនបន្ទាប់ពីបរាជ័យក្នុងការដោះស្រាយជម្លោះដែលមានស្រាប់។
យោងតាមក្រុមហ៊ុនរថយន្តអគ្គិសនី Lordstown Motors កាលពីថ្ងៃទី ២៧ ខែមិថុនា បានឱ្យដឹងថា ក្រុមហ៊ុនបានដាក់ពាក្យសុំការការពារក្ស័យធននៅក្នុងតុលាការ នៃរដ្ឋ Delaware ។ ចាប់តាំងពីដើមខែឧសភាមក Lordstown បានព្រមានអំពីការក្ស័យធនរបស់ខ្លួនដែលអាចកើតមានប្រសិនបើមិនទទួលបានដើមទុនបន្ថែម ដោយប៉ុន្មានថ្ងៃមុននេះ ពួកគេស្ទើរតែអស់លុយពីខ្លួនទៅហើយ។

នៅខែមករា ឆ្នាំ២០២៣ ក្រុមហ៊ុន Lordstown បានធ្វើការចោទប្រកាន់ Foxconn ដែលជាក្រុមហ៊ុនរថយន្តដ៏ធំរបស់តៃវ៉ាន់ ពីការក្លែងបន្លំ និងការខកខានក្នុងការបំពេញកិច្ចសន្យាវិនិយោគជាបន្តបន្ទាប់ក្រោមកិច្ចព្រមព្រៀងក្នុងការវិនិយោគទឹកប្រាក់អតិបរមាចំនួន ១៧០ លានដុល្លារ ដោយចំនួននេះគឺស្មើនឹង ១៩.៣% នៃភាគហ៊ុន។កាលពីមុន Foxconn បានវិនិយោគទឹកប្រាក់ចំនួន ៥២,៧ លានដុល្លារចូលទៅក្នុងក្រុមហ៊ុន Lordstown ដែលបច្ចុប្បន្ន Foxconn បានកាន់កាប់ភាគហ៊ុន ៨.៤% នៅទីនោះ។ដោយ Lordstown បាននិយាយថា Foxconn មិនបានទិញភាគហ៊ុនបន្ថែមទៀតដូចការប្តេជ្ញាចិត្តនោះទេ និងបណ្តាលឱ្យ Lordstown យល់ខុសអំពីកិច្ចសហប្រតិបត្តិការរបស់ភាគីទាំងពីរក្នុងការអភិវឌ្ឍន៍ផលិតផល។ ជាមួយគ្នានេះដែរ ក្រុមហ៊ុនតៃវ៉ាន់ក៏បានទទូចថាខ្លួនរក្សា “អាកប្បកិរិយាវិជ្ជមានក្នុងការចរចាជាមួយ Lordstown” ប៉ុន្តែ Lordstown មានការស្ទាក់ស្ទើរក្នុងការអនុវត្តកិច្ចព្រមព្រៀងនេះ។ ជាលទ្ធផល Foxconn ឈប់ចរចា ហើយអាចនឹងចាត់វិធានការផ្លូវច្បាប់។

ក្រុមហ៊ុនរថយន្តអគ្គិសនី Lordstown ត្រូវបានបង្កើតឡើងក្នុងឆ្នាំ ២០១៨ ដោយផលិតផលចម្បងរបស់ក្រុមហ៊ុននេះគឺរថយន្តភីកអាប់អគ្គិសនី Endurance ។ កាលពីដើមឆ្នាំ Lordstown បានបញ្ឈប់ការផលិតរថយន្តដោយសារជម្លោះជាមួយក្រុមហ៊ុនតៃវ៉ាន់ Foxconn។ ដែលថ្មីៗនេះ Lordstown បានដាក់ពាក្យសុំក្ស័យធនជាមួយនឹងផែនការស្វែងរកអ្នកទិញ ប្រសិនបើមិនអាចរកឃើញអ្នកទិញដែលមានឆន្ទៈក្នុងការស្ដារឡើងវិញនូវការផលិតរថយន្តអគ្គិសនី Endurance ពេញលេញទេ រោងចក្រនេះនឹងត្រូវបានកាន់កាប់ទាំងស្រុងដោយក្រុមហ៊ុនតៃវ៉ាន់ Foxconn ហើយ៕ ប្រភព៖vnexpress

ប្រទេសចិន ៖ ប្រទេសចិនបាននាំចូលបន្លែ និងផ្លែឈើពីវៀតណាមកើនឡើងជាបន្តបន្ទាប់ ហើយសមាគមផ្លែឈើវៀតណាមរំពឹងថា នៅឆ្នាំ២០២៣នេះ ការទិញ-លក់បន្លែ និងផ្លែឈើ នឹងស្មើទឹកប្រាក់ជាង៣.០០០លានដុល្លារអាមេរិក ។

ផ្លែឈើជាច្រើនប្រភេទដូចជា ទុរេន មង្ឃុត និងខ្នុរ ត្រូវបានវៀតណាមនាំចេញមកកាន់ប្រទេសចិនតាមរយៈ Pingxiang ដែលជាផ្លូវដឹកជញ្ជូនទំនិញតាមផ្លូវគោក និងងាយស្រួលបំផុតរវាងប្រទេសចិន និងវៀតណាម ព្រមទាំងប្រទេសផ្សេងទៀតក្នុងតំបន់អាស៊ាន ។ កម្មករនៅកំពង់ផែ Youyi បានបញ្ជូនឡាំងផ្លែឈើដែលបានត្រួតពិនិត្យរួចទៅកាន់រថភ្លើងដឹកជញ្ជូនទំនិញ ដើម្បីចែកចាយទៅតាមតំបន់ផ្សេងៗដូចជា Hebei, Zhejiang និង Guangdong ព្រមទាំងតំបន់ផ្សេងទៀត ។

Li Wenzhi ជានាយកគ្រប់គ្រងក្រុមហ៊ុន Wanchengxi Guangxi International Trade បាននិយាយថា ចាប់ពីខែមេសា រហូតដល់ខែតុលា ជារៀងរាល់ឆ្នាំ គឺជាពេលដែលចិននាំចូលផ្លែឈើពីតំបន់អាស៊ាន ។ ជាទូទៅ ចិននឹងនាំចូលទុរេនវៀតណាមជាង៣០ទូរកុងតឺន័រក្នុង១ថ្ងៃ ហើយចាប់ពីដើមឆ្នាំ២០២៣នេះ ក្រុមហ៊ុនបាននាំចូលទុរេនវៀតណាមជាង១.២០០ទូរកុងតឺន័រ ។

កាលពីខែកក្កដា ឆ្នាំ២០២២ ចិនបានអនុញ្ញាតឱ្យវៀតណាមនាំចូលទុរេនស្រស់មកប្រទេសរបស់ខ្លួន ហើយគេសង្កេតឃើញថា ទុរេនស្រស់របស់វៀតណាមនឹងដណ្តើមចំណែកទីផ្សារទុរេនថៃ ដោយសារទុរេនវៀតណាមមានតម្លៃថោកជាង ។ នៅត្រីមាសទី១ ឆ្នាំ២០២៣ ប្រទេសចិនបាននាំចូលផ្លែឈើពីវៀតណាមចំនួន៣៧៦.៣០០តោន កើនឡើង២,១% ។

មន្ត្រីគយប្រចាំកំពង់ផែ Youyi និយាយថា ការនាំចូលផ្លែឈើពីតំបន់អាស៊ាននៅពេលនេះមានបរិមាណច្រើន ហើយមានរថយន្តដឹកជញ្ជូនផ្លែឈើឆ្លងកាត់ច្រកព្រំដែន ចំនួន២៨០គ្រឿងក្នុង១ថ្ងៃ ។ ប្រទេសចិន គឺជាដៃគូពាណិជ្ជកម្មដ៏ធំបំផុតរបស់វៀតណាម ដោយមានកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់ (RCEP) បានធ្វើឱ្យការធ្វើពាណិជ្ជកម្មរវាងចិន និងវៀតណាម រីកលូតលាស់ជាបន្តបន្ទាប់ ៕ ប្រភព ៖ China Face