រដ្ឋធានីហែលស៊ីនគី (Helsinki)៖ ស្របពេលកងទ័ពការពារទឹកដីរបស់អ៊ុយក្រែន កំពុងតែវាយបករុលទៅមុខ ប្រឆាំងនឹងកម្លាំងទាហានរុស្ស៊ី នៅលើសមរភូមិជាច្រើននោះ ប្រធានាធិបតីសហរដ្ឋអាមេរិក ក៏បានប្រកាស អំពីបរាជ័យរបស់ពូទីន នៅក្នុងសង្គ្រាម ប្រឆាំងនឹងប្រទេសជិតខាងរបស់រុស្ស៊ី។

សារព័ត៌មាន Al Jazeera បានចេញផ្សាយ នៅថ្ងៃសុក្រ ទី១៤ ខែកក្កដា ថា លោក ចូ បៃដិន ប្រធានាធិបតីសហរដ្ឋអាមេរិក បានថ្លែងទៅកាន់សន្និសីទសារព័ត៌មានមួយ ជាមួយនឹងសមភាគីហ្វាំងឡង់ដ៍ (Finland) លោក សូលី នីនីស្តូ (Sauli Niinisto) នៅក្នុងរដ្ឋធានីហែលស៊ីនគី (Helsinki) ថា «ពូទីន បានចាញ់សង្គ្រាម នៅក្នុងប្រទេសអ៊ុយក្រែន រួចទៅហើយ។ គាត់ពិតជាមានបញ្ហា។ ដូច្នេះវាមិនមានលទ្ធភាព សម្រាប់ពូទីន ឈ្នះសង្គ្រាមដ៏ឃោរឃៅនេះទេ»។

លោកប្រធានាធិបតី ចូ បៃដិន បានប្រើប្រាស់ដំណើរទស្សនកិច្ចរបស់គាត់ ទៅកាន់ប្រទេសហ្វាំងឡង់ដ៍ ដែលជាសមាជិកដ៏ថ្មីបំផុតរបស់អង្គការណាតូ ដោយសន្យា ថា នៅថ្ងៃណាមួយ អ៊ុយក្រែន នឹងចូលរួមជាមួយនឹងសម្ពន្ធភាពយោធារបស់លោកខាងលិចមួយនេះ បើទោះជា ឥឡូវ មេដឹកនាំអង្គការណាតូ នៅមិនទាន់ផ្តល់ពេលវេលាកំណត់ជាសមាជិកភាពរបស់ក្រុងកៀវ នៅក្នុងកិច្ចប្រជុំកំពូល នាសប្តាហ៍នេះ នៅក្នុងរដ្ឋធានីវិលនីស(Vilnius) ប្រទេសលីទុយអានី យ៉ាងណាក្ដី។

បណ្ដាមេដឹកនាំរបស់អង្គការណាតូ បានធ្វើឲ្យប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy) អស់សង្ឃឹម សម្រាប់ផ្លូវដើរចូលទៅកាន់អង្គការណាតូ ដោយគ្រាន់តែនិយាយ ថា អ៊ុយក្រែន នឹងចូលរួម ខណៈលក្ខខណ្ឌត្រូវបានបំពេញរួចរាល់។

ដោយឡែក លោក វ៉្លាឌីមៀ ពូទីន ប្រធានាធិបតីរុស្ស៊ី ក៏បានបញ្ជាក់ជាដដែលៗ ថា រដ្ឋាភិបាលក្រុងមូស្គូ ប្រឆាំងដាច់ខាត សម្រាប់សមាជិកភាពរបស់អ៊ុយក្រែន ចូលរួមនៅក្នុងអង្គការណាតូ។ សកម្មភាពទាំងនេះ កំពុងតែបង្កការគំរាមកំហែង ដល់ផលប្រយោជន៍ជាយុទ្ធសាស្រ្ដរបស់រុស្ស៊ី ដោយផ្ទាល់។

មេដឹកនាំវិមានក្រឹមឡាំង រូបនេះ បានបញ្ជាក់ ថា «ការចូលរួមជាសមាជិកបស់អង្គការណាតូ នឹងមិនជួយបង្កើន ដល់សន្ដិសុខរបស់អ៊ុយក្រែន ខ្លួនឯងនោះឡើយ។ ប៉ុន្ដែផ្ទុយទៅវិញវានឹងធ្វើឱ្យពិភពលោក កាន់តែងាយរងគ្រោះទៅវិញទេ។ ប្រទេសណាក៏ដោយមានសិទ្ធិកែលម្អសន្តិសុខរបស់ខ្លួនដែរ ប៉ុន្តែមិនមែនរាល់ការចំណាយ មកពីប្រទេសផ្សេងៗនោះឡើយ»។

វិទ្យាស្ថានសិក្សាពីសង្រ្គាម (ISW) មានមូលដ្ឋាន នៅរដ្ឋធានីវ៉ាស៊ីនតោន សហរដ្ឋអាមេរិក បានអះអាង ថា ការឆ្លើយតប ដោយបិទមាត់ជាទូទៅរបស់ប្រទេសរុស្ស៊ី ចំពោះការអភិវឌ្ឍន៍ នៅក្នុងកិច្ចប្រជុំកំពូលរបស់អង្គការណាតូ នាសប្តាហ៍នេះ បានបង្ហាញឱ្យឃើញ អំពីកម្រិតនៃការឈ្លានពានរបស់រុស្ស៊ី ចាប់តាំងពីឆ្នាំ២០២២មក ដោយបានកំណត់គោលដៅត្រឡប់ថយក្រោយ ដោយវិមានក្រឹមឡាំង បានអះអាង ថា រុស្ស៊ី បានចាប់ផ្តើមសង្គ្រាម នៅក្នុងប្រទេសអ៊ុយក្រែន។

លោក ឌីមីទ្រី មេដវេដេវ (Dmitry Medvedev) អតីតប្រធានាធិបតីរុស្ស៊ី ហើយឥឡូវកាន់តំណែងជាអនុប្រធានក្រុមប្រឹក្សាសន្ដិសុខ ក៏បានព្រមាន នៅសប្ដាហ៍នេះ ថា ជំនួយសម្រាប់ប្រទេសអ៊ុយក្រែន មកពីប្រទេសជាសមាជិកអង្គការណាតូ នឹងនាំឲ្យទៅរកសង្គ្រាមលោកលើកទី៣ កាន់តែខិតចូលមកដល់៕

ប្រទេសរុស្ស៊ី ៖ កាលពីថ្ងៃទី១៣ ខែកក្កដា កន្លងមក លោក Sergei Lavrov រដ្ឋមន្ត្រីការបរទេសរុស្ស៊ីបានទាមទារឱ្យប្រទេសផ្សេងៗនៅតំបន់អាស៊ីអាគ្នេយ៍ធ្វើការរួមគ្នា ដើម្បីស្តារពាណិជ្ជកម្មឡើងវិញជាមួយរុស្ស៊ី ដែលបានធ្លាក់ចុះនាពេលកន្លងមក ។ លោកក៏បានស្នើឱ្យប្រទេសនីមួយៗទូទាត់រូបិយប័ណ្ណក្នុងស្រុក ជំនួសប្រាក់ដុល្លារអាមេរិកផងដែរ ។

ក្រសួងការបរទេសរុស្ស៊ីបានបញ្ជាក់ក្នុងសេចក្តីថ្លែងការណ៍ថា វិធានការដាក់ទណ្ឌកម្មខ្លាំងក្លាក្រោយពីប្រទេសរុស្ស៊ីបានចូលឈ្លានពានអ៊ុយក្រែនកាលពីឆ្នាំ២០២២ បានធ្វើឱ្យការធ្វើពាណិជ្ជកម្មរវាងរុស្ស៊ី និងប្រទេសជាសមាជិកអាស៊ាន ធ្លាក់ចុះ៤,៤% ។

លោក Sergei Lavrov បានផ្តល់បទសម្ភាសន៍ជាមួយសារព័ត៌មាន Kompas របស់ប្រទេសឥណ្ឌូណេស៊ីថា រុស្ស៊ីបានត្រៀមខ្លួនធ្វើការជាមួយប្រទេសសមាជិកអាស៊ាន ដើម្បីលើកកម្ពស់ការប្រើប្រាស់រូបិយប័ណ្ណក្នុងស្រុក ដោយលោកបញ្ជាក់ថា ៖ «មិនត្រឹមតែប្រទេសរុស្ស៊ីមួយទេ ប៉ុន្តែប្រទេសផ្សេងទៀត ក៏បានព្យាយាមកាត់បន្ថយចាយប្រាក់ដុល្លារអាមេរិកជាបន្តបន្ទាប់ ហើយប្រទេសទាំងនោះផ្លាស់ប្តូរទៅប្រើប្រព័ន្ធទូទាត់ប្រាក់ឌីជីថល និងទូទាត់ជារូបិយប័ណ្ណជាតិរបស់ខ្លួន ។ ហេតុនេះ ប្រទេសសមាជិកអាស៊ានបានគាំទ្រការទូទាត់ជារូបិយប័ណ្ណជាតិជំនួសប្រាក់ដុល្លារ ដើម្បីលើកកម្ពស់សេដ្ឋកិច្ចក្នុងតំបន់នេះឱ្យកាន់តែរឹងមាំ» ។

បើទោះជាការធ្វើពាណិជ្ជកម្មរួមជាមួយប្រទេសសមាជិកអាស៊ានធ្លាក់ចុះក្តី ប៉ុន្តែការធ្វើពាណិជ្ជកម្មទ្វេភាគីរវាងរុស្ស៊ី និងឥណ្ឌូណេស៊ី ដែលជាប្រទេសមួយមានសេដ្ឋកិច្ចធំបំផុតក្នុងក្រុមប្រទេសអាស៊ាន បែរជាកើនឡើងដល់៤៥% កាលពីឆ្នាំ២០២២ ។ លោក Sergei Lavrov បាននិយាយទៅកាន់សារព័ត៌មាន Kompas ថា ឥណ្ឌូណេស៊ី និងប្រទេសសមាជិកអាស៊ានមួយចំនួនបានព្យាយាមរក្សាការធ្វើពាណិជ្ជកម្មជាមួយរុស្ស៊ី បើទោះជាមានការថ្កោលទោសចំពោះការវាយប្រហារអ៊ុយក្រែនក្តី ៕ ប្រភព ៖ Bangkok biznews

រាជធានីបាងកក៖ ក្រុមនិស្សិត មកពីសាកលវិទ្យាល័យធម្មសាត បានចេញមុខប្រតិកម្មយ៉ាងធ្ងន់ធ្ងរបំផុត វាយប្រហារដ៏ខ្លាំងក្លា ទៅលើសមាជិកសភា និង ព្រឹទ្ធសភាថៃ ជុំវិញការបោះឆ្នោតបេក្ខភាពនាយករដ្ឋមន្រ្ដីរបស់មេបក្សឆ្ពោះទៅមុខ (Move Forward Party) ហៅកាត់ MFP ដោយមានសំឡេងប្រឆាំង និង អនុបវាទច្រើន ហើយបរាជ័យមិនអាចរកអ្នកដឹកនាំប្រទេសថ្មីបាន។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃសុក្រ ទី១៤ ខែកក្កដា ថា ក្រុមប្រឹក្សានិស្សិត នៃសាកលវិទ្យាល័យ Thammasat (ធម្មសាត) បានចេញសេចក្តីថ្លែងការណ៍មួយ ថ្កោលទោសយ៉ាងធ្ងន់ធ្ងរ ដល់ការបោះឆ្នោតនាយករដ្ឋមន្រ្តីថ្មី កាលពីល្ងាច ថ្ងៃព្រហស្បតិ៍។ ពួកគេ បានចោទប្រកាន់ដល់សមាជិកសភា និង សមាជិកព្រឹទ្ធសភា កំពុងតែឆ្នោតប្រឆាំងនឹងឆន្ទៈរបស់ប្រជាជន ឬ មិនចូលរួម នៅក្នុងការបោះឆ្នោត កំពុងតែក្លាយជាអ្នកបង្កការអាម៉ាស់បំផុតមួយ នៅក្នុងស្ថាប័ននីតិប្បញ្ញត្ដិទាំង២នេះ។

គណៈកម្មាធិការអចិន្ត្រៃយ៍ នៃក្រុមប្រឹក្សាទទួលបន្ទុកផ្នែកនយោបាយ និង ការលើកកម្ពស់លទ្ធិប្រជាធិបតេយ្យ នៃសាកលវិទ្យាល័យធម្មសាត បានថ្កោលទោស ដល់សភាទាំង២នេះ ក្រោយការបោះឆ្នោតរួមរបស់សមាជិកសភាតំណាងរាស្រ្ត និង សមាជិកព្រឹទ្ធសភា។

លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ បានខកខានក្លាយជានាយករដ្ឋមន្រ្ដីទី៣០របស់ថៃ ក្រោយទទួលបានសំឡេងគាំទ្រមិនគ្រប់គ្រាន់ មកពីក្នុងចំណោមសមាជិកសភា និង សមាជិកព្រឹទ្ធសភា ចំនួន៧៤៩អាសនៈ ខណៈសមាជិកព្រឹទ្ធសភាមួយរូប បានលាឈប់ កាលពីថ្ងៃពុធ នៅមុនការបោះឆ្នោតនាយករដ្ឋមន្រ្ដី ត្រឹមតែ១ថ្ងៃ។

ការបោះឆ្នោតរួមរបស់សភាទាំង កាលពីល្ងាច ថ្ងៃព្រហស្បតិ៍ សម្រាប់ជ្រើសរើសលោក ភីថា ធ្វើជានាយករដ្ឋមន្រ្ដីថ្មីរបស់ប្រទេសថៃ គឺទទួលបានសំឡេងគាំទ្រ ចំនួន៣២៤ ដោយរួមទាំងសំឡេងគាំទ្រពីព្រឹទ្ធសភា ចំនួន១៣សំឡេងផងដែរ ខណៈសំឡេងប្រឆាំងចំនួន១៨២សំឡេង និង អនុបវាទចំនួន១៩៩សំឡេង មកពីក្នុងចំណោមសមាជិកសភាទាំង២ ចំនួន៧០២នាក់ ដែលបានចូលរួមបោះឆ្នោត នៅក្នុងសភា។ គណបក្សឆ្ពោះទៅមុខរបស់លោក ភីថា លីមចារឿនរ៉ាត បានឈ្នះនៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣ ជាមួយនឹងសំឡេង ចំនួន ១៥១អាសនៈ នៅក្នុងរដ្ឋសភា។

លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ ជាបេក្ខជនតែងតាំងតែម្នាក់គត់ សម្រាប់ឲ្យសភាទាំង២ បោះឆ្នោតគាំទ្រ ក្លាយជានាយករដ្ឋមន្រ្ដី។ គាត់ត្រូវការសំឡេងគាំទ្រ ចំនួន៣៧៥ មកពីក្នុងចំណោមសមាជិកសភា និង ព្រឹទ្ធសភា ចំនួន៧៤៩ ខណៈសមាជិកព្រឹទ្ធសភាមួយរូបបានលាលែងពីតំណែង កាលពីថ្ងៃពុធ ពោលគឺ១ថ្ងៃ នៅមុនការបោះឆ្នោតនេះ។

លោក ភីថា លីមចារឿនរ៉ាត មេដឹកនាំគណបក្សឆ្ពោះទៅមុខ បានទទួលសំឡេងគាំទ្រ ពីរដ្ឋសភាចំនួន៣១១សំឡេង, ប្រឆាំងចំនួន ១៤៨សំឡេង និង អនុបវាទ ចំនួន៣៩សំឡេង ហើយគាត់ក៏បានទទួលសំឡេងគាំទ្រ មកពីសមាជិកព្រឹទ្ធសភា ចំនួន១៣សំឡេង, ប្រឆាំងចំនួន៣៤សំឡេង និង អនុបវាទ ចំនួន១៥៩សំឡេង។

ជាការប្រតិកម្មដ៏ខ្លាំង ជុំវិញបរាជ័យ ចំពោះការបោះឆ្នោតនាយករដ្ឋមន្រ្ដីទី៣០របស់ប្រទេសថៃ នោះ គណៈកម្មាធិការក្រុមប្រឹក្សាសាកលវិទ្យាល័យធម្មសាត បានសង្កត់ធ្ងន់ ថា សមាជិកសភា និង សមាជិកព្រឹទ្ធសភា ដែលបានបោះឆ្នោតប្រឆាំង ឬ អនុប្បវាទ កំពុងតែប្រព្រឹត្តផ្ទុយ ឬ ប្រឆាំងនឹងឆន្ទៈរបស់ប្រជាជន ដូចអ្វីដែលបានបង្ហាញរួចមកហើយ តាមរយៈការបោះឆ្នោតសកល កាលពីថ្ងៃទី១៤ ខែឧសភា ឆ្នាំ២០២៣។ គណបក្ស MFP បានឈ្នះនៅក្នុងការបោះឆ្នោតសកលនេះ ដោយទទួលបានអាសនៈសភា ចំនួន១៥១។ ដូច្នេះមេដឹកនាំរបស់គណបក្សឆ្ពោះទៅមុខ បានទទួលអាណត្តិរបស់ប្រជាជន សម្រាប់ការឡើងធ្វើ ជានាយករដ្ឋមន្ត្រីបន្ទាប់។

គណៈកម្មាធិការអចិន្រ្ដៃយ៍ក្រុមប្រឹក្សា សាកលវិទ្យាល័យធម្មសាត បានបន្ថែម ថា «សកម្មភាពរបស់សមាជិកសភាទាំង២ ពិតជាគួរឲ្យស្អប់ខ្ពើម និង អាម៉ាស់ ចំពោះប្រព័ន្ធរាជានិយមអាស្រ័យរដ្ឋធម្មនុញ្ញ និង ប្រវត្តិសាស្ត្រនយោបាយរបស់ថៃ។ ការបោះឆ្នោតប្រឆាំងនឹងលោក ភីថា ក៏ដូចជា អ្នកបោះឆ្នោតអនុប្បវាទ កំពុងតែក្លាយជាអ្នកមិនអើពើនឹងតួនាទីរបស់ខ្លួន នៅក្នុងនាមជាអ្នកតំណាងរបស់ប្រជាជនថៃ ដែលមានកាតព្វកិច្ច ត្រូវបំពេញភារកិច្ច សម្រាប់ផលប្រយោជន៍ជាតិ សុខុមាលភាពរបស់ប្រជាជន និង សន្លឹកឆ្នោតរបស់ពួកគាត់។

ជាមួយគ្នានេះ គណៈកម្មាធិការមួយនេះ ក៏បានអំពាវនាវដល់សមាជិកសភា និង ព្រឹទ្ធសភា ត្រូវតែគោរពសំឡេងរបស់ប្រជាជន ព្រោះថា កុមារក្នុងយុគសម័យអភិវឌ្ឍន៍ប្រទេស នឹងដឹកនាំប្រទេស ឆ្ពោះទៅរកការរីកចម្រើន៊។ ប៉ុន្តែសមាជិកព្រឹទ្ធសភា នឹងដឹកនាំស្រុកទេស ឲ្យដើរទៅរកគ្រោះមហន្តរាយ។ ស្របគ្នានេះដែរ អ្នកគាំទ្រគណបក្សឆ្ពោះទៅមុខ (MFP) ភាគច្រើនបំផុត បានសម្តែងនូវការខកចិត្ត ចំពោះលទ្ធផលបោះឆ្នោតជ្រើសរើសនាយករដ្ឋមន្រ្ដី កាលពីថ្ងៃព្រហស្បតិ៍។ ប៉ុន្តែពួកគេបានអះអាង ថា លទ្ធផល មិននឹកស្មានដល់នោះឡើយ។ ពួកគេបានជំរុញដល់សមាជិកសភាទាំង២ ត្រូវតែគោរពសន្លឹកឆ្នោតរបស់ប្រជាជន។

សភាទាំង២របស់ប្រទេសថៃ នឹងត្រូវរៀបចំការបោះឆ្នោតជ្រើសរើសនាយករដ្ឋមន្រ្ដី ជាថ្មីម្តងទៀត នៅសប្តាហ៍ក្រោយ។ បេក្ខជនដដែល ក៏នឹងនៅតែអាចឈរឈ្មោះជាថ្មី ឬ ក៏បេក្ខជនផ្សេងទៀត ត្រូវបានតែងតាំងឱ្យចូលរួមប្រកួតប្រជែង។ នីតិវិធីរបស់សភាបែបនេះ នឹងត្រូវធ្វើឡើង រហូតទាល់តែមានបេក្ខជនណាម្នាក់ ត្រូវទទួលបានសំឡេងគាំទ្រគ្រប់គ្រាន់ ដោយមិនបានកំណត់ពីចំនួន នៃការបោះឆ្នោត ឬ កាលបរិច្ឆេទផុតកំណត់នោះឡើយ៕

ប្រទេសឥណ្ឌា ៖ ក្រុមហ៊ុន Tesla បានពិភាក្សាជាមួយរដ្ឋាភិបាលឥណ្ឌា ដើម្បីសាងសង់រោងចក្រផលិតរថយន្តអគ្គិសនី ។ រោងចក្រនេះនឹងផលិតរថយន្តអគ្គិសនីឱ្យបានចំនួន៥សែនគ្រឿងក្នុង១ឆ្នាំ ហើយក្រុមហ៊ុន Tesla នឹងយកប្រទេសឥណ្ឌាធ្វើជាទីតាំងនាំចេញរថយន្តទៅកាន់ប្រទេសផ្សេងៗក្នុងតំបន់ឥណ្ឌូប៉ាស៊ីហ្វិកផងដែរ ។

សារព័ត៌មាន Times India បានចុះផ្សាយយោងតាមប្រភពពីរដ្ឋាភិបាលឥណ្ឌាថា ក្រុមហ៊ុន Tesla បានពិភាក្សាជាមួយរដ្ឋាភិបាលឥណ្ឌា ដើម្បីសាងសង់រោងចក្រដែលអាចផលិតរថយន្តបានចំនួន៥សែនគ្រឿងក្នុង១ឆ្នាំ ។ ហេតុនេះ តម្លៃរថយន្តអាចចាប់ផ្តើមពី២លានរូពីឡើងទៅ ប៉ុន្តែតម្លៃនេះច្រើនជាងតម្លៃរថយន្តអគ្គិសនីយីហោ MG Comet នៅឥណ្ឌា ដែលថោកជាង២ដង ហើយវាថ្លៃជាងរថយន្ត Tata Nexon EV ដែលមានតម្លៃប្រមាណ៦៦ម៉ឺនរូពី ដែលជារថយន្តអគ្គិសនីលក់ដាច់បំផុតនៅឥណ្ឌា ។

ក្រៅពីនេះ ក្រុមហ៊ុន Tesla របស់លោក Elon Musk កំពុងតែពិចារណាយកប្រទេសឥណ្ឌាធ្វើជាទីតាំងនាំចេញរថយន្តអគ្គិសនីទៅកាន់ប្រទេសផ្សេងៗក្នុងតំបន់ឥណ្ឌូប៉ាស៊ីហ្វិកផងដែរ ។ កាលពីឆ្នាំ២០២២ ផែនការដំណើរការអាជីវកម្មនៅប្រទេសឥណ្ឌារបស់ក្រុមហ៊ុន Tesla ទើបតែចាប់ផ្តើម ក្រោយពីរដ្ឋាភិបាលឥណ្ឌាបដិសេធមិនកាត់បន្ថយពន្ធនាំចូលរថយន្ត Tesla ហើយឥណ្ឌាបានទាមទារប្រមូលពន្ធនាំចូលរថយន្ត រហូតដល់១០០% ឯណោះ ៕ ប្រភព ៖ Bangkok biznews

ប្រទេសថៃ ៖ សារព័ត៌មានបរទេសបានចុះផ្សាយថា លោក Pita Limjaroenrat ជាបេក្ខជននាយករដ្ឋមន្ត្រីថៃ បានទទួលបរាជ័យក្នុងការបោះឆ្នោតជ្រើសរើសនាយករដ្ឋមន្ត្រីប្រទេសថៃ ដែលជាអំឡុងពេលសំខាន់មួយដើម្បីបង្ហាញពីប្រជាធិបតេយ្យនៅប្រទេសថៃ ។

សារព័ត៌មាន Al Jazeera រាយការណ៍ថា លោក Pita Limjaroenrat ជាបេក្ខជននាយករដ្ឋមន្ត្រីមកពីគណបក្សកាវក្លៃ មិនទទួលបានសំឡេងគាំទ្រពីសមាជិកព្រឹទ្ធសភាដើម្បីធ្វើជានាយករដ្ឋមន្ត្រីទេ ក្នុងកិច្ចប្រជុំរួមគ្នារបស់សមាជិកសភាតំណាងរាស្ត្រ និងព្រឹទ្ធសភា កាលពីថ្ងៃទី១៣ ខែកក្កដា ឆ្នាំ២០២៣ ។ ការបរាជ័យលើកនេះ គឺជាឧបសគ្គចុងក្រោយបង្អស់របស់លោក Pita និងគណបក្សកាវក្លៃ ក្រោយពីតុលាការធម្មនុញ្ញ (Constitutional Court of Thailand) បានទទួលយកញត្តិនៃផែនការរបស់គណបក្សកាវក្លៃ ក្នុងការធ្វើវិសោធនកម្មច្បាប់មាត្រា១១២ និងញត្តិបង្ហាញពីគុណសម្បត្តិជាសមាជិកសភាតំណាងរាស្ត្ររបស់លោក Pita ពាក់ព័ន្ធនឹងរឿងលោកកាន់ភាគហ៊ុន ។

ក្រៅពីនេះ សារព័ត៌មាន News Asia និង Nikkei Asia បានចុះផ្សាយដូចគ្នាដែរថា លោក Pita បានទទួលបរាជ័យក្នុងការបោះឆ្នោតជ្រើសរើសនាយករដ្ឋមន្ត្រីលើកទី១ ហើយលោក Pita ព្រមទទួលស្គាល់លទ្ធផលបោះឆ្នោត ប៉ុន្តែលោកមិនព្រមចុះចាញ់ទេ ។ លោក Pita លើកឡើងថា លោកនឹងតែបន្តឆ្ពោះទៅមុខក្នុងការរួបរួមសំឡេងគាំទ្រសម្រាប់ការបោះឆ្នោតជ្រើសរើសនាយករដ្ឋមន្ត្រីលើកក្រោយ ។

ចំណែកសារព័ត៌មាន CNN រាយការណ៍ថា លោក Pita ជាបេក្ខជននាយករដ្ឋមន្ត្រីថៃតែម្នាក់គត់ ដែលទទួលបានសំឡេងគាំទ្រក្នុងរដ្ឋសភាមិនគ្រប់គ្រាន់ដើម្បីបង្កើតរដ្ឋាភិបាល ។ ហេតុនេះ វាជាការដើរថយក្រោយសម្រាប់អនាគតប្រជាធិបតេយ្យនៅប្រទេសថៃ បន្ទាប់ពីប្រទេសនេះស្ថិតនៅក្រោមការគ្រប់គ្រងរបស់កងទ័ពអស់រយៈពេលជិត១០ឆ្នាំ ។

រីឯសារព័ត៌មាន Reuters រាយការណ៍ថា លទ្ធផលបោះឆ្នោតលើកនេះ គឺជាការធ្វើតេស្តដ៏សំខាន់មួយអំពីឥទ្ធិពលនយោបាយរបស់លោក Pita និងជាការវាស់ស្ទង់ពីសំឡេងគាំទ្រលើគោលនយោបាយគណបក្សកាវក្លៃ រួមមាន ការបំបែកកងទ័ពចេញពីនយោបាយ, កម្ចាត់ការធ្វើអាជីវកម្មផ្តាច់មុខ និងការធ្វើវិសោធនកម្មមាត្រា១១២ ៕ ប្រភព ៖ Nation World News