បរទេស៖ កំពូលតារាបាល់ទាត់របស់ពិភពលោក Messi បានធ្វើការបង្ហាញខ្លួនដំបូងនៅក្លិបបាល់ទាត់ Inter Maimi ជាមួយអ្នកគាំទ្រជិត ២ ម៉ឺននាក់ កាលពីថ្ងៃទី១៦ ខែកក្កដា ឆ្នាំ២០២៣។

Inter Miami បានរៀបចំពិធីបង្ហាញវត្តមាន Messi ជាលើកដំបូងនៅសហរដ្ឋអាមេរិក ដោយបង្កឱ្យមានការកកស្ទះចរាចរណ៍យ៉ាងខ្លាំង។ យោងតាមប្រភពព័ត៌មាន Daily Mail មានមនុស្សជាច្រើនបានជួបជុំគ្នាដើម្បីអបអរ Messi ដែលក្នុងនោះមានជនជាតិអាហ្សង់ទីនប្រហែល ១០០,០០០ នាក់ក៏បានរស់នៅក្នុងទីក្រុងម៉ៃអាមីផងដែរ។ អ្នកគាំទ្របានសម្រុកចូលទៅកន្លែងអង្គុយរបស់ពួកគេយ៉ាងអន្ទះសា ដោយរង់ចាំការមកដល់របស់ Messi។ កៅអីចំនួន ១៨,០០០ នៃកីឡាដ្ឋាន DRV PNK បានពេញអស់ហើយ ដូច្នេះអ្នករៀបចំត្រូវដំឡើងកន្លែងឈរបន្ថែមទៀតដើម្បីបំពេញតម្រូវការរបស់អ្នកគាំទ្រ។

Inter Miami ត្រូវបានបង្កើតឡើងដោយអតីតកីឡាករ David Beckham និងអ្នកវិនិយោគមួយចំនួនក្នុងឆ្នាំ ២០១៨។ ក្លិបនេះក៏បានចូលរួមជាមួយ MLS តាំងពីឆ្នាំ ២០២០ ហើយលទ្ធផលល្អបំផុតគឺស្ថិតនៅលំដាប់ទីប្រាំមួយក្នុងដូវកាលមុន។
បច្ចុប្បន្ន ពួកគេស្ថិតនៅបាតតារាង MLS Eastern League ក្នុង ២០ ប្រកួត ដោយឈ្នះ ៥ ស្មើ ២ និង ចាញ់ ១៣ សរុបគឺ ១៧ ពិន្ទុ ហើយមាន ៩ ពិន្ទុតាមពីក្រោយដោយក្រុមជម្រុះ។

នៅម៉ោងប្រហែល ៧ យប់ Messi បាននាំប្រពន្ធនិងកូនៗរបស់គាត់ទៅកាន់ទីធ្លានៃកម្មវិធីនោះ ដោយលោកបាននិយាយថា ខ្ញុំពិតជាសប្បាយចិត្តណាស់ ខ្ញុំចង់ចាប់ផ្តើមហ្វឹកហាត់ និងលេងបាល់នៅទីនេះ ហើយខ្ញុំនឹងឈ្នះដើម្បីជួយក្លិបនេះឱ្យរីកចម្រើនបន្តទៅមុខរហូត។ យើងប្រាកដជាមានពេលវេលាដ៏រីករាយជាមួយគ្នា ហើយខ្ញុំពិតជាអរគុណអ្នកទាំងអស់គ្នាសម្រាប់អ្វីដែលបានកើតឡើងនៅថ្ងៃនេះ។គួរបញ្ជាក់ដែរថា ខ្សែប្រយុទ្ធវ័យ ៣៦ ឆ្នាំរូបនេះ បានចុះហត្ថលេខាលើកិច្ចសន្យារយៈពេល ២ ឆ្នាំកន្លះជាមួយក្លឹប Inter Miami ដោយគាត់អាចចាប់ផ្តើមការប្រកួតជាលើកដំបូងរបស់គាត់ក្នុងក្លិបនេះនៅថ្ងៃទី ២១ ខែកក្កដា ទល់នឹង Cruz Azul ក្នុងក្របខ័ណ្ឌ Leagues Cup ៕ ប្រភព៖vnexpress

ប្រទេសថៃ ៖ អ្នកនាង Paethongthan Shinawatra (ហៅ អុង អ៊ីង) ជាបេក្ខជននាយករដ្ឋមន្ត្រីមកពីគណបក្សភឿថៃ បានផ្តល់បទសម្ភាសន៍ជាមួយក្រុមអ្នកសារព័ត៌មាន ពាក់ព័ន្ធនឹងករណីលោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រី ។ អ្នកនាង អុង អ៊ីង បានប្រកាសថា ប្រសិនបើការបោះឆ្នោតជ្រើសរើសនាយករដ្ឋមន្ត្រី លើកទី២ នៅថ្ងៃទី១៩ ខែកក្កដា ទទួលបានពិន្ទុមិនកើនឡើងទេ វានឹងជាតួនាទីរបស់គណបក្សភឿថៃ ។

អ្នកនាង អុង អ៊ីង បានលើកឡើងថា លោក Pita ធ្លាប់លើកឡើងថា សូមប្រឹងប្រែងឱ្យអស់ពីសមត្ថភាព មុននឹងឈានដល់ថ្ងៃទី១៩ ខែកក្កដា ។ ចំណែកគណបក្សភឿថៃបានគាំទ្រលោក Pita ឱ្យធ្វើជានាយករដ្ឋមន្ត្រីយ៉ាងពេញទំហឹង ប៉ុន្តែលទ្ធផលនឹងចេញមកដូចម្តេចនោះ យើងត្រូវរង់ចាំមើលសិន ។

អ្នកនាង អុង អ៊ីង បន្តទៀតថា បើលោក Pita ធ្លាក់ក្នុងការបោះឆ្នោតជ្រើសរើសនាយករដ្ឋមន្ត្រី លើកទី២ គណបក្សភឿថៃបានជជែកពិភាក្សាគ្នារួចហើយថា នឹងបញ្ជូនឈ្មោះលោក Srettha Thavisin ធ្វើជាបេក្ខជននាយករដ្ឋមន្ត្រីប្រទេសថៃ ប៉ុន្តែយើងនឹងអនុវត្តម្តងមួយជំហាន ។

អ្នកនាងនិយាយថា ៖ «នយោបាយប្រទេសថៃត្រូវផ្តោតលើការបង្កើតរដ្ឋាភិបាលឱ្យពលរដ្ឋបាននៅពេលណា ព្រោះប្រទេសជាតិត្រូវអភិវឌ្ឍន៍ទៅមុខបន្តទៀត ។ ប៉ុន្តែពេលនេះ ខ្ញុំយល់ថា ច្បាប់នៅប្រទេសថៃមិនធម្មតាទេ និងមានអន្ទាក់ច្រើន ហើយយើងត្រូវតែឆ្លងកាត់វាឱ្យបាន ។ ម្យ៉ាងទៀត យើងត្រូវដោះស្រាយបញ្ហាជីវភាពរបស់ពលរដ្ឋ បើយើងអាចដោះស្រាយបាន ប្រទេសជាតិនឹងរីកចម្រើន ហើយអន្តរជាតិនឹងមានទំនុកចិត្តមកវិនិយោគនៅប្រទេសថៃ ។ ខ្ញុំចង់ឱ្យអ្នករាល់គ្នាផ្តោតលើរឿងនេះជាចម្បង» ៕ ប្រភព ៖ chiangmai news

រដ្ឋធានីកៀវ៖ យុទ្ធនាការវាយបករបស់រដ្ឋាភិបាលក្រុងកៀវ បានចាប់ផ្ដើម តាំងពីថ្ងៃទី៤ ខែមិថុនា រហូតមកដល់ពេលនេះ កងទ័ពអ៊ុយក្រែន បានរំដោះទឹកដី ប្រហែល ២០០គីឡូម៉ែត្រការ៉េ ពីកម្លាំងទាហានរុស្ស៊ី ប៉ុន្ដែមានមនុស្សតិចណាស់ នៅលើពិភពលោក បានដឹង អំពីមេទ័ពកំពូល នៅពីក្រោយផែនការនេះ ហើយគាត់ត្រូវបានគេពិពណ៌នា ថា ជាឧត្ដមសេនីយ៍ប្រកបដោយជោគជ័យ នាសតវត្សទី២១នេះ។

សារព័ត៌មាន BBC បានផ្សាយ នៅថ្ងៃអង្គារ ទី១៨ ខែកក្កដា ថា លោកឧត្ដមសេនីយ៍ អូឡែកសានដ្រ ស៊ីស្គី (Oleksandr Syrskyi) បានដឹកនាំកម្លាំងទ័ពការពាររដ្ឋធានីកៀវ ខណៈរុស្ស៊ី បានចាប់ផ្តើមឈ្លានពានទ្រង់ទ្រាយធំ មកលើប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។

លោកឧត្ដមសេនីយ៍ ក្លាយជាមេគំនិត នៅពីក្រោយការវាយប្រហារដ៏គួរឱ្យភ្ញាក់ផ្អើល និង បានទទួលជោគជ័យ សម្រាប់កងទ័ពអ៊ុយក្រែន នៅទីក្រុងខាគីវ (Kharkiv) កាលពីរដូវក្តៅ នាឆ្នាំ២០២២។ ឥឡូវនេះ គាត់ក៏កំពុងតែត្រួតពិនិត្យ លើផែនការវាយបកជាថ្មីរបស់កងទ័ពអ៊ុយក្រែន នៅក្នុងឋានៈជាប្រធានប្រតិបត្តិការយោធា នៅតំបន់ភាគខាងកើតរបស់ប្រទេសអ៊ុយក្រែន ដែលជាអ័ក្សសំខាន់ចំនួនពីររបស់អ៊ុយក្រែន។

អ្នកឆ្លើយព័ត៌មានរបស់ BBC បានរាយការណ៍ ថា យើងជួបគាត់ នៅទីតាំងសម្ងាត់មួយកន្លែង នៅក្បែរយានបញ្ជា ដែលគាត់តែងតែប្រើប្រាស់ សម្រាប់ចុះទៅពិនិត្យមើល និង សាកសួរសុខទុក្ខដល់កងទ័ពរបស់គាត់ ហើយតាមដាននូវសកម្មភាពប្រយុទ្ធ។ នៅលើដំបូលរថយន្ដ មានបំពាក់ទៅដោយកាំភ្លើងយន្តដ៏ខ្លាំងក្លា ខណៈនៅខាងក្នុងរថយន្ដ មានអេក្រង់ធំៗ បង្ហាញអំពីវីដេអូផ្សាយបន្តផ្ទាល់ តាមដ្រូនរាប់រយ ដែលកំពុងតែបង្ហោះ នៅលើពីសមរភូមិនានា។ ប៉ុន្ដែនៅពេលខ្ញុំបានសួរទៅគាត់ ថា តើវាជាគោលដៅរបស់គាត់ វាយរំដោះទីក្រុងនោះ មកឡើងវិញឬ? គាត់បានញញឹម ហើយនិយាយ ថា «បាទ! ពិតណាស់ ខ្ញុំកំពុងតែព្យាយាមរំដោះទឹកដីរបស់អ៊ុយក្រេន»។

លោកឧត្តមសេនីយ៍ Syrskyi មានបញ្ជាក់ ថា «យើងចង់ទទួលបានលទ្ធផលលឿនណាស់។ ប៉ុន្តែតាមពិតទៅ វាមិនអាចទៅរួចនោះទេ។ សូម្បីតែនៅភាគខាងកើតតំបន់នេះ ក៏ពោរពេញទៅដោយគ្រាប់មីន និង ខ្សែត្រៀមការពារ។ ទាហានរុស្សី មានបន្ទាយដ៏រឹងមាំជាច្រើន។ ហេតុដូច្នេះ ទើបការវាយបករបស់យើង ពិតជាមិនអាចធ្វើទៅបានលឿន ដូចអ្វីដែលយើងចង់បានឡើយ»។

លោកឧត្តមសេនីយ៍ Syrskyi បានសង្កត់ធ្ងន់ ថា «ខ្ញុំជឿ ថា ការរួបរួមដឹកនាំកម្លាំងយោធារបស់យើង និង ការជឿទុកចិត្តគ្នាទៅវិញទៅមករបស់ទាហានយើង ក្លាយជាចំណុចខ្លាំង សម្រាប់កងទ័ពរបស់យើង។ ដូច្នេះវាមានភាពផ្ទុយគ្នាស្រឡះ ពីឋានានុក្រមយោធារបស់រុស្ស៊ី មើលទៅហាក់បីដូចជា កំពុងតែរងនូវការប៉ះទង្គិច ដោយសារតែមន្ត្រីជាន់ខ្ពស់យោធា ត្រូវបានដកចេញពីតំណែង។

លោកឧត្តមសេនីយ៍ Syrskyi ត្រូវបានអ្នកនៅជុំវិញរខ្លួនរបស់គាត់ កោតសរសើរ អំពីការប្តេជ្ញាចិត្ត ការតាំងចិត្ត និង យុទ្ធសាស្រ្ដសង្គ្រាមរបស់គាត់។ គាត់តែងតែគេងត្រឹមតែបួនម៉ោងកន្លះនៅក្នុងមួយយប់ ហើយពេលសម្រាក តែងតែហាត់ប្រាណ។

លោកស្រី ហានណា ម៉ាលីយ៉ា (Hanna Maliar) អនុរដ្ឋមន្ត្រីការពារជាតិអ៊ុយក្រែន បានប្រាប់យើង ថា កម្លាំងទាហានរុស្ស៊ី ស្ថិតក្នុងទីក្រុងបាកមូត នឹងត្រូវឡោមព័ទ្ធ នាពេលដ៏ឆាប់ៗនេះ។ ប៉ុន្តែគ្រាប់កាំភ្លើងធំរបស់រុស្ស៊ី នៅតែបាញ់ស្រោច ដូចទឹកភ្លៀង ធ្លាក់មកលើទីតាំងរបស់អ៊ុយក្រែន ដែលមានចម្ងាយ ត្រឹមតែ៣គីឡូម៉ែត្រ ពីទីក្រុងនេះ។

លោកវរសេនីយ៍ Oleksandr Bakulin មេបញ្ជាការកងពលតូចលេខ៥៧ បញ្ជាក់ ថា ឥឡូវនេះទាហានរុស្ស៊ី កំពុងតែប្រឈមមុខនឹងបញ្ហាជាច្រើន។ ប៉ុន្ដែគាត់មិនបានមើលស្រាល ទៅលើសត្រូវរបស់គាត់ នោះដែរ។ ទាហានរបស់រដ្ឋាភិបាលរុស្ស៊ី ប្រឈមមុខ នៅពេលនេះ មិនដូចជាទាហានស៊ីឈ្នួល Wagner របស់លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) ដែលទីបំផុតបានដណ្តើម កាន់កាប់ទីក្រុងបាកមូត កាលពីដើម ឆ្នាំ២០២៣

លោកមេបញ្ជាការ បានបន្ដ ថា «ប្រសិនបើយើងប្រឹងប្រែងបន្តិចទៀតនោះ ទីក្រុងបាកមូត (Bakhmut) អាចនឹងត្រូវយើងឡោមព័ទ្ធបាន។ បើទោះជាការវាយរុលទៅមុខយឺតយ៉ាងណាក៏ដោយ ក៏គាត់បានអះអាង ថា ត្រូវបានបង្កើនសីលធម៌ផងដែរ ដូច្នេះការខាតបង់ កាន់តែតិចឡើង។

លោកឧត្តមសេនីយ Syrskyi បានបញ្ជាក់ ថា គ្រាប់បែកចង្កោមរបស់អាមេរិក ឥឡូវនេះ បានមកដល់អ៊ុយក្រែនហើយ ហើយនឹងរៀបចំរួចរាល់ សម្រាប់ការប្រើប្រាស់ នៅក្នុងរយៈពេលប៉ុន្មានថ្ងៃទៀត។ យើងបានឃើញឧបករណ៍បាញ់ ប្រភេទ M777 ត្រូវបានផ្គត់ផ្គង់ ដោយសហរដ្ឋអាមេរិក ដែលនឹងបាញ់គ្រាប់ផ្លោង ទៅលើទីតាំង នៅជុំវិញទីក្រុងបាកមូត។ ការវាយរំដោះយកទីក្រុងបាកមូតត្រឡប់មកវិញ នឹងមានលើសពីតម្លៃនិមិត្តរូប។ ប៉ុន្ដែទីក្រុងនេះ មានសារៈសំខាន់ ជាយុទ្ធសាស្ត្រ ហើយវាជាច្រកចេញទៅកាន់ទីក្រុងសំខាន់ៗផ្សេងទៀត នៅក្នុងតំបន់។ ចំណែកប្រជាជនរបស់យើង កំពុងតែរង់ចាំនូវជ័យជម្នះរបស់កងទ័ពយើង។ ដូច្នេះពួកគេត្រូវការជ័យជម្នះជាជំហានៗ»៕