មហាជនអ្នកលេងបណ្តាញសង្គមកំពុងមានមោទនភាពនិងស្ញប់ស្ញែងយ៉ាងខ្លាំងទៅ នាដការីរបាំបុរាណ សុគា គីមលាង ដែលបានគ្រងឈុតអប្សរាសម្តែងរបាំព្រះរាជទ្រព្យ ( របាំអប្សារា)នៅលើភ្នំទឹកកក នៃប្រទេសនូវែលសេឡង់ (New Zealand) ប្រកដដោយស្នាមញញឹម ទន់ភ្លន់ រេរាំយ៉ាងស្រស់ស្អាតនៅក្នុងភាពដ៏ត្រជាក់។
នៅថ្ងៃទី១ កញ្ញា នេះតាមរយៈវីដេអូនៅលើហ្វេកប៊ុកមួយដែលគេស្គាល់ថាជា នាដការីរបាំបុរាណ សុគា គីមលាង ឬជាព្រះថោង បានបង្ហោះវីដេអូដែលកំពុងរាំរបាំអប្សរា ដោយភ្ជាប់ជាមួយខ្លឹមសារថា «ពូជខ្មែរមានពូជពង្ស រុងរឿងគង់វង្ស នៃជាតិខេមរា សម្បត្តិវប្បធម៌ ល្អសែនអស្ចារ្យល្បីសព្ទលោកាសកលស្ញប់ស្ញែង ពួកយើងពិតជាមានមោទនភាព ខ្លាំងណាស់ ដែលនាំយកឈុតអប្សរាអង្គរកម្ពុជាមករាំនៅលើភ្នំទឹកកកនៃប្រទេស New Zealand ដែលជាលើកទី១ របស់ពួកយើងខ្ញុំ»។
សុគា គីមលាង បានបង្ហាញអារម្មណ៍របស់ខ្លួនដែរថា «ក្នុងនាមខ្ញុំជានាដការីរបាំបុរាណមួយរូបខ្ញុំពិតជាមានមោទកភាពខ្លាំងណាស់ដែលមានឱកាសបានសម្តែងរបាំព្រះរាជទ្រព្យ ( របាំអប្សរា )ដែលជាសម្បត្តិបេតិកភណ្ឌជាតិ នៃព្រះរាជាណាចក្រកម្ពុជា នៅលើទឹកដីប្រទេសនូវែលសេឡង់»។
បន្ទាប់ពីឃើញសកម្មភាពដ៏អស្ចារ្យនេះ ប្រជាជនកម្ពុជាបានបង្ហាញអារម្មណ៍មានមោទនភាពយ៉ាងខ្លាំងចំពោះនាដការីរូបនេះនិងក្រុមការងារដែលបានបង្ហាញវប្បធម៌ខ្មែរដ៏ផូរផង់បង្ហាញទៅកាន់ពិភពលោក៕.png)
